1. Σο βακερντάς ο Ιησούς χάνικ πριν τι μερέλ κο εγκληματίας σο ισινέ πασέ λέστε; (Λουκάς 23:​39-43)

 Ο ΙΗΣΟΥΣ ντα ο ντούι εγκληματίες σο ισινέ πασέ λέστε ντουκχάνας καζόμ αγαβένας ότι μερένας. (Λουκ. 23:​32, 33) Ο ντούι-ντα εγκληματίες πρασάνας ι Ιησούς, άρα σίγουρα να ισινέ λέσκε μαθητές. (Ματθ. 27:​44· Μάρκ. 15:​32) Αλλά εκ τανό λένταρ αλλαξάλο γνώμη ντα βακερντάς: «Ιησού, μα τι μπιστρές-μαν κάνα κα αβές τι Βασιλειάτε». Ντα ο Ιησούς βακερντάς λέσκε: «Μπαγιά βακεράβα τούκε αντιβές, κα αβές μάντζαρ κο Παράδεισος». (Διαβάνεν Λουκάς 23:​39-43) Τίποτα να σικαβέλα ότι ανταβά εγκληματίας δεχτιντάς ο λάφι ότι “η Βασιλεία σο ισί κο ουρανός ερεσλίας”. Ούτε βακερντάς ο Ιησούς ότι ανταβά τζενό κα τζάλας κι Βασιλεία. (Ματθ. 4:​17) Ο Ιησούς κερέλας λάφι για τον Παράδεισο σο κα αβέλας κι πφουβ. Σόσκε βακεράσα-λες ανταβά;

2. Σο σικαβέλα ότι ο εγκληματίας σο μετανιωσάλοας ισινέ Ιουδαίος;

² Ο εγκληματίας σο μετανιωσάλοας ντικχίντιβελα ότι ισινέ Ιουδαίος. Οντουβά εγκληματίας βακερντάς κο γιαβέρ: «Να νταρέσα ιτς κατά Ντεβέλ, ακανά σο λιντάν ι ίδια τιμωρία ανταλέ τζενέσαρ;» (Λουκ. 23:​40) Ο Ιουδαίοι ντένας λατρεία εκχέ Ντεβλέστε, αλλά ο τζενέ κατά γιαβερά τθεμά πακιάνας μπουτέ ντεβλέντε. (Έξοδ. 20:2, 3· 1 Κορ. 8:5, 6) Άμα οντουλά εγκληματίες ισινέ τζενέ κατά γιαβερά τθεμά, η ερώτηση μπέκιμ τι αβέλας: «Να νταρέσα ιτς ι ντεβλένταρ;» Ντα ο Ιησούς να μπουτσσάντιλο κο τθεμά αλλά κο “μπρακέ σο ισί χασαρντέ κο λαός Ισραήλ”. (Ματθ. 15:​24) Ο Ντεβέλ μουτθαντάς κο Ισραηλίτες ότι κα τζουβντιαρέλ ι μουλέν. Ο εγκληματίας σο μετανιωσάλοας μπέκιμ τι τζανέλας-λες ανταβά ντα, σαρ σικαβένα λέσκε λάφια, νικαντάς ο συμπέρασμας ότι ο Ιεχωβά κα τζουβντιαρέλας ι  Ιησούς για τι κυβερνίνελ κι Βασιλεία κι Ντεβλέσκι. Ντικχίντιβελα ότι οντουβά τζενό πακιάλας ότι ο Ντεβέλ κα τζουβντιαρέλας εμ λες.

3. Σο ντικχίντιβελα ότι αβιλό κι γκοντί κι εγκληματιάσκι κάνα ο Ιησούς βακερντάς ο λάφι Παράδεισος; Εξηγίνεν. (Γένεση 2:15)

³ Σαρ Ιουδαίος, οντουβά εγκληματίας τζανέλας ι Αδαμίσκε ντα ι Ευάκε, αλλά εμ ι Παραδεισόσκε σο τσσουντάας-λεν ο Ιεχωβά. Άρα ντικχίντιβελα ότι ο εγκληματίας αγαντάς ότι, κάνα ο Ιησούς βακερντάς ο λάφι Παράδεισος, μανγκέλας τι σικαβέλ εκ σουκάρ κήπος σο κα κερντιόλας ατθέ κι πφουβ.​—Διαβάνεν Γένεση 2:15.

4. Σο πρέπει τι τσσίντεν-αμέν τι σκεφτίνας ο λάφια σο βακερντάς ο Ιησούς κο εγκληματίας;

⁴ Ο λάφια σο βακερντάς ο Ιησούς κο εγκληματίας πρέπει τι τσσίντεν-αμέν τι σκεφτίνας σαρ κα αβέλ η ζωή κο Παράδεισος. Κι πραγματικότητα, μπορίνασα τι σικλιάς κάτι ι Παραδεισόσκε κατά ειρηνικός τρόπος σο κυβερνιντάς ο βασιλιάς Σολομών. Ντα μπεκλεντίνασα ότι οντουβά σο ισί πο μπαρό κατά Σολομώντας, ο Ιησούς, κα κερέλ μπουτί οντουλέντζαρ σο κα κυβερνίνεν γιεκ λέσαρ για τι κερέλ ι πφουβ εκ μπουτ σουκάρ παράδεισος. (Ματθ. 12:​42) Οτθάρ, ο “γιαβερά μπρακέ” πρέπει τι σκεφτίνεν σοβαρά σο πρέπει τι κερέν για τι τζουβντιόν για πάντα κο Παράδεισος.​—Ιωάν. 10:16.

5. Σαρ μπεκλεντίνενα ότι κα αβέλ η ζωή κο Παράδεισος;

⁵ Σο αβέλα τουμαρέ γκοντιάτε κάνα σκεφτίνενα τουμαρί ζωή κο Παράδεισος; Μπέκιμ ανένα φαντασία εκ σουκάρ κήπος, σαρ ισινέ ο κήπος της Εδέμ. (Γέν. 2:​7-9) Μπέκιμ ντένα-τουμέν γκοντί ι προφητεία σο γραφιντάς ο Μιχαίας ότι ο υπηρέτες ι Ντεβλέσκε κα μπεσέν «ο κάθε εκ τελάλ πι ρεζάταρ ντα τελάλ πι χχελινγκινάταρ». (Μιχ. 4:3, 4) Μπέκιμ ανένα τουμαρέ γκοντιάτε ο λάφια ι Γραφιάκε ότι κα υπαρχίντιβελ μπουτ χαμπέ. (Ψαλμ. 72:​16· Ησ. 65:​21, 22) Άρα μπέκιμ ντικχένα τουμαρό νεαυτός εκχέ σουκάρ κηπόστε, τι μπεσέλ εκχέ τραπεζίστε πφερντό λατσσέ χαμπιματέντζαρ. Μπέκιμ παντού ντονταλάι κχάντενα μίσκι ο φυτά ντα ο λουλούδια. Ντα ασουνένα ο ασαπέ τουμαρέ τζενένγκο ντα αμαλένγκο​—εμ οντουλένγκο σο αβιλέ πάλι κι ζωή—​καζόμ κερένα παρέα. Σαρέ ανταλά νανέ φαντασίες. Σίγουρα, πράγματα σαρ ανταλά κα αβέν-πες κι πφουβ. Ατζέ, η ζωή κο Παράδεισος κα τθερέλ μπουτί-ντα σο κα μπεϊντίνας-λα.

6. Σο κα κεράς κο Παράδεισος; (Ντικχέν ι φωτογραφία)

⁶ Ο Ιεχωβά κερντάς-αμέν τι αρακχάς χαρά αμαρέ μπουτιάτε. (Εκκλ. 2:​24) Κι Βασιλεία κι Χριστόσκι σο κα ατσσικιαρέλ χίλια μπρεσά, κα τθεράς μπουτ πράγματα τι κεράς. Οντουλά σο κα σώντιβεν κατά μπαρί στεναχώρια, αλλά εμ ο εκατομμύρια τζενέ σο κα τζουβντιόν πάλι, κα χρειαζίντιβεν σέα, χαμπέ ντα εκ τθαν τι μπεσέν. Για τι αβέν-πες σαρέ ανταλά πράγματα, κα χρειαζίντιβελ τι κεράς μπουτ μπουτί σο κα μπεϊντίνας-λα. Ο Αδάμ ντα η Εύα έπρεπε  τι φροντίνεν ο κήπος σο ισινέ λένγκο κχερ. Αντικάς αμέν-ντα, κα τθεράς ο προνόμιος τι φροντίνας ι πφουβ σο κα αβέλ παράδεισος. Σκεφτίνεν καζόμ σουκάρ κα αβέλ τι σικλιαράς εκατομμύρια αναστημέ τζενέν σο τζανένα χάνικ ι Ιεχωβάσκε ντα λέσκε σκοπόσκε, ντα τι βοηθίνας πιστέ τζενέν σο τζουβντιλέ μπουτ πο τζανγκλέ κατά Ιησούς τι σικλιόν πο μπουτ!

7. Καγιά σιγουριά μπορίνασα τι τθεράς, ντα σόσκε;

⁷ Μπορίνασα τι αβάς σίγουροι ότι η ζωή κο Παράδεισος κα αβέλ πφερντί ειρήνη, κα τζουβντιάς λατσσές ντα ο πράγματα κα αβέν εκχέ σειράστε. Σόσκε; Επειδή ο Ιεχωβά ντινάς-αμέν από ακανά τι αγαβάς σαρ κα αβέλ αμαρί ζωή κάνα λέσκο Τσσαβό κα κερέλ κουμάντος. Ντικχάσα-λες ανταβά κατά ιστορία σο βακερέλα η Γραφή για την κυβέρνηση ι Σολομωντάσκι.

8. Σαρ νικίστιλε μπαγιά ο εδάφια Ψαλμός 37:​10, 11, 29 αφού γραφιντάς-λεν ο βασιλιάς Δαβίδ; (Ντικχέν ο θέμας «Ο Τζενέ σο Διαβάνενα Πουτσένα» ανταλέ περιοδικόστε)

⁸ Ο βασιλιάς Δαβίδ γραφιντάς ι Ντεβλέσκε πνευμάσαρ σαρ κα αβέλας η ζωή κο μέλλον, κάνα εκ γκοντιαβέρ ντα πιστός βασιλιάς κα μπεσέλας κο θρόνος. (Διαβάνεν Ψαλμός 37:​10, 11, 29) Μπουτ φαρ, διαβάνασα κο τζενέ ο εδάφιος Ψαλμός 37:​11 κάνα κεράσα λάφι ι Παραδεισόσκε. Ανταβά ισί σωστός, σόσκε ο Ιησούς βακερντάς ανταβά εδάφιος κι Επί του Όρους Ομιλία, ντα σικαντάς ότι οντουλά λάφια κα νικιόνας μπαγιά κο ντιβεσά σο κα αβένας. (Ματθ. 5:5) Αλλά οντουλά σο βακερντάς ο Δαβίδ σικαβένας-ντα σαρ κα αβέλας η ζωή κο ντιβεσά κι Σολομωντάσκε. Κάνα ο Σολομών κυβερνίνελας κο Ισραήλ, ο λαός ι Ντεβλέσκο τθερέλας μπουτ ειρήνη ντα τζουβντιόλας λατσσές εκχέ πφουβιάτε σο “τθερέλας μπερεκέτι τθουτ ντα αβγίν”. Ο Ντεβέλ βακερντάας: «Άμα να κα τσσιναβέν τι πφιρέν σαρ βακερένα μο νόμοι . . . , κα τσσουβάβ ειρήνη ανταλέ πφουβιάτε, ντα κα ζαντίνεν χωρίς καέκ τι κερέλ-τουμέν τι νταρέν». (Λευιτ. 20:​24· 26:3, 6) Οντουλά υποσχέσεις νικίστιλε μπαγιά καζόμ ισινέ βασιλιάς ο Σολομών. (1 Χρον. 22:9· 29:​26-28) Ντα ο Ιεχωβά ντινάς πο λάφι ότι ο πφιρνέ “να κα υπαρχίντιβενας”. (Ψαλμ. 37:​10) Οτθάρ, ο εδάφια Ψαλμός 37:​10, 11, 29 νικίστιλε μπαγιά κο πουρανέ μπρεσά, αλλά κα νικιόν μπαγιά κο ντιβεσά-ντα σο κα αβέν.

9. Σο βακερντάς η βασίλισσα ι Σεβάκι ι τροπόσκε σο κυβερνίνελας ο βασιλιάς Σολομών;

 ⁹ Η βασίλισσα ι Σεβάκι λιντάς αμπέρι ότι ο λαός Ισραήλ τθερέλας ειρήνη ντα τζουβντιόλας λατσσές κάνα ο Σολομών ισινέ βασιλιάς. Ανταγιά βασίλισσα κερντάς εκ μπαρό ταξίδι για τι αβέλ κι Ιερουσαλήμ ντα τι ντικχέλ πι γιακχίντζαρ σο αβέλας-πες. (1 Βασ. 10:1) Κάνα ντικχλάς σαρ κυβερνίνελας ο Σολομών, βακερντάς: «Να βακερντέας μάνγκε ούτε ο επκάς. . . . Ευτυχισμέ ισί το μουρσά ντα ευτυχισμέ ισί το υπηρέτες σο ατσσόνα ανγκλά-τούτε συνέχεια ντα ασουνένα τι σοφία!» (1 Βασ. 10:​6-8) Αλλά η λατσσί ζωή σο τθερένας ο τζενέ κάνα ισινέ βασιλιάς ο Σολομών ισινέ σάντε εκ χουρντό παράδειγμας οντουλένγκο σο κα κερέλ ο Ιεχωβά ι τζενένγκε κάνα κα κυβερνίνελ Λέσκο Τσσαβό, ο Ιησούς.

10. Σόσκε βακεράσα ότι ο Ιησούς ισί πο οπρέ κατά Σολομώντας;

¹⁰ Ο Ιησούς ισί μπουτ πο οπρέ κατά Σολομώντας σαρέ κο πράγματα. Ο Σολομών ισινέ εκ ατελής τζενό ντα κερντάς μπαρέ λάθη κάνα κρίνελας. Ανταλά λάθη αντέ προβλήματα κο λαός κι Ντεβλέσκο. Ο Ιησούς, οκιά μπάνταρ, ισί εκ τέλειος άρχοντας σο να κερέλα λάθη. (Λουκ. 1:​32· Εβρ. 4:​14, 15) Ο Ιησούς ντινάς-λεν πέρα μπαρέ δοκιμασιέντζαρ σο αντάς λέσκε ο Μπενγκ. Ο Χριστός σικαντάας ότι ποτές να κα αμαρτίνελ ούτε κα κερέλ ζιάνι πι αφοσιωμέ υπηρετόντε. Ισί μπαρό προνόμιος αμένγκε τι αβέλ ο Ιησούς αμαρό Βασιλιάς.

11. Κον κα βοηθίνεν ι Ιησούς;

¹¹ Ο Ιησούς γιεκ ι 144.000 τζενέντζαρ κα κερέν μπουτί για τι αρακχαβέν ι τζενέν ντα τι κερέν τι νικιόλ μπαγιά ο σκοπός σο τθερέλα ο Ιεχωβά ι πφουβιάκε. (Αποκ. 14:​1-3) Βον νακχλέ μπουτ δοκιμασίες ντα βάσανα κάνα ισινέ μουρσά ντα τζουβλιά, οτθάρ κα πφαμπόν ι τζενένγκε κάνα κα κυβερνίνεν ι Ιησούσαρ. Καγιά ακριβώς κα αβέλ λένγκι μπουτί;

12. Σο έργος κα ντελ ο Ιεχωβά κο 144.000;

¹² Ο έργος σο ντιντιλό κο Ιησούς ντα οντουλέντε σο κα κυβερνίνεν λέσαρ ισί μπουτ πο μπαρό κατά έργος σο ντιντιλόας κο Σολομώντας. Οντουβά Ισραηλίτης βασιλιάς τθερέλας τι αρακχαβέλ εκατομμύρια τζενέν σάντε εκχέ τθεμέστε. Όμως, οντουλά σο κα κυβερνίνεν κι Βασιλεία κι Ντεβλέσκι κα αρακχαβέν δισεκατομμύρια τζενέν, σο κα τζουβντιόν σαρί κι πφουβ. Σο μπαρό προνόμιος ντινάς ο Ιεχωβά κο 144.000!

13. Καγιά μπουτί κα κερέν οντουλά σο κα κυβερνίνεν ι Ιησούσαρ;

¹³ Σαρ ο Ιησούς, αντικάς ο 144.000-ντα, κα υπηρετίνεν σαρ βασιλιάδες ντα ιερείς. (Αποκ. 5:​10) Τελάλ κατά Μωσαϊκός Νόμος, ο ιερείς ισινέ υπεύθυνοι τι βοηθίνεν ι λαός τι τθερέλ λατσσί υγεία ντα τι αβέλ πασέ κο Ιεχωβά. Ο Νόμος ισινέ «βουτσσάλ ι λατσσέ πραγματένγκι σο κα αβέν», οτθάρ ισί λογικός τι πακιάς ότι οντουλά σο κα κυβερνίνεν ι Ιησούσαρ κα τθερέν εκ σημαντική μπουτί​—τι βοηθίνεν ι Ντεβλέσκε λαός τι τθερέλ σο-ντα κα χρειαζίντιβελ ντα τι αβέλ πασέ κο Ιεχωβά. (Εβρ. 10:1) Κα μπεκλεντίνας τι ντικχάς σαρ ακριβώς οντουλά βασιλιάδες ντα ιερείς κα κερέν λάφι οντουλέντζαρ σο κα μπεσέν ατθέ κι πφουβ. Σο-ντα τι κανονίνελ ο Ιεχωβά, μπορίνασα τι αβάς σίγουροι ότι κο Παράδεισος οντουλά σο κα μπεσέν κι πφουβ κα λεν ο οδηγίες σο χρειαζίντιβενα.​—Αποκ. 21:3, 4.

14. Σαρ τζάνα-λεν ο “γιαβερά μπρακέ” ι Χριστόσκε πφραλέντζαρ;

¹⁴ Ο Ιησούς βακερντάς οντουλένγκε σο κα κυβερνίνεν λέσαρ «χουρντό κοπάδι». (Λουκ. 12:​32) Κερντάς λάφι εκχέ δεύτερε ομαδάκε-ντα, ι “γιαβερέ μπρακένγκε”. Ανταλά ντούι ομάδες  ισί εκ ενωμέ κοπάδι. (Ιωάν. 10:​16) Ο ντούι ομάδες κερένα γιεκ μπουτί από ακανά, ντα ανταβά να κα τσσινάντιβελ καζόμ η πφουβ κα αβέλ Παράδεισος. Όμως αζομάν, οντουλά σο ισί κο «χουρντό κοπάδι» κα αβέν κο ουρανός, ντα ο “γιαβερά μπρακέ” κα τθερέν ι ευκαιρία τι τζουβντιόν για πάντα κι πφουβ. Αλλά ισί κάποια πράγματα σο πρέπει τι κερέν ο “γιαβερά μπρακέ” ακανά για τι τζουβντιόν κο Παράδεισος.

15. (α) Σαρ κερένα μπουτί γιεκ ο “γιαβερά μπρακέ” ι Χριστόσκε πφραλέντζαρ; (β) Σαρ μπορίνενα τι μοιάζεν κο πφραλ σο ισί κο φαρμακείος; (Ντικχέν ι φωτογραφία)

¹⁵ Ο εγκληματίας σο μετανιωσάλοας μουλό πριν τι ντιντιόλ-λες η ευκαιρία τι σικαβέλ πι εκτίμηση κο Χριστός καζόμ πο μπουτ αβέλας-πες. Οκιά μπάνταρ, αμέν σο ισινάμ κο “γιαβερά μπρακέ” τθεράσα ακανά μπουτ ευκαιρίες τι σικαβάς σαρ νιωθίνασα ι Ιησούσκε. Για παράδειγμας, σικαβάσα αμαρό μανγκιπέ λέσκε ι τροπόσαρ σο συμπεριφερίντιβασα κο χρισμέ σο ισί ο πφραλά λέσκε. Ο Ιησούς βακερντάς ότι ανταλέσταρ κα κρίνελ ι μπρακέν. (Ματθ. 25:​31-40) Μπορίνασα τι βοηθίνας ι Χριστόσκε πφραλέν κάνα βακεράσα ντα σικλιαράσα χαράσαρ ο λατσσέ αμπέρια. (Ματθ. 28:​18-20) Οτθάρ, πρέπει τι χρησιμοποιήνας ο έντυπα σο τθεράσα για τι κεράς μελέτες, σαρ ισί ο βιβλίος Μπουτ Σουκάρ Ζωή για Πάντα! Άμα να κερένα ατζέκ εκ μελέτη, μήπως μπορίνενα τι τσσουβέν στόχος τι πουτσέν καζόμ πο μπουτ τζενέν αβέλα-πες άμα μανγκένα τι αρχίνεν μελέτη;

16. Σο μπορίνασα τι κεράς ακανά για τι ετοιμάνας-αμέν τι τζουβντιάς κι Βασιλεία κι Ντεβλέσκι;

¹⁶ Να χρειαζίντιβελα τι μπεκλεντίνας τι τζουβντιάς κο Παράδεισος για τι αβάς ο τζενέ σο μανγκέλα ο Ιεχωβά οτθέ. Μπορίνασα από ακανά τι μαράς-αμέν τι βακεράς ι αλήθεια, τι αβάς τίμιοι οντουλέντε σο κεράσα ντα μα τι νακχαβάς ο όρια αμαρέ ζωγιάτε. Επίσης, μπορίνασα τι αβάς αφοσιωμέ κο Ιεχωβά, αμαρέ ρομέστε ή ρομνιάτε ντα αμαρέ πφραλέντε. Καζόμ πο πιστά κεράσα ο κανόνες ι Ντεβλέσκε, καμπόρ τζουβντιάσα ανταλέ πφιρνέ ντουνιάστε, αζόμ πο εύκολος κα αβέλ αμένγκε τι ντας καν ανταλέντε κο Παράδεισος. Μπορίνασα επίσης τι σικλιάς τι κεράς μπουτιά ντα τι τθεράς ιδιότητες σο σικαβένα ότι ετοιμάνασα-αμέν τι τζουβντιάς οτθέ. Ντικχέν ο μάθημας «Ισινέν  Έτοιμοι τι Λεν “Τουμένγκε ι Πφουβ”;» ανταλέ περιοδικόστε.

17. Πρέπει τι χασαράς αμαρί ζορ αμαρέ πουρανέ αμαρτιένγκε; Εξηγίνεν.

¹⁷ Πρέπει επίσης τι μαράς-αμέν τι νασκιαράς ο τύψεις σο μπέκιμ τι τθεράς επειδή κερντάμ μπαρέ αμαρτίες ανγκλέ. Σίγουρα, δεν πρέπει ποτές τι ντικχάς ι θυσία ι Ιησούσκι σαρ εκ δικαιολογία για τι “αμαρτίνας επίτηδες”. (Εβρ. 10:​26-31) Αλλά μπορίνασα τι αβάς σίγουροι ότι, άμα μετανιωσάλαμ μπαγιά εκχέ μπαρέ αμαρτιάκε, μανγκλάμ ι βοήθεια σο ντέλα ο Ιεχωβά ντα αλλαντάμ οντουλά σο κερντάμ, βοβ συγχωριντάς-αμέν μπαγιά. (Ησ. 55:7· Πράξ. 3:​19) Ντεν-τουμέν γκοντί ο λάφια σο βακερντάς ο Ιησούς κο Φαρισαίοι: «Να αβιλόμ τι καλίναβ δίκαιε τζενέν, αλλά αμαρτωλόν». (Ματθ. 9:​13) Η θυσία ι Ιησούσκι τθερέλα ι ζορ τι ιτσσαρέλ αμαρέ αμαρτίες.

18. Σο κα μανγκένας τι πουτσέν ι εγκληματιάς σο μουλό πασέ κο Ιησούς;

¹⁸ Ανένα τουμαρέ γκοντιάτε τουμαρό νεαυτός κο Παράδεισος τι ασταρέλ συζήτηση ι εγκληματιάσαρ σο κερντάς λάφι ι Ιησούσαρ; Ο ντούι-ντα κα βακερέν καζόμ εκτιμίνενα ι θυσία ι Ιησούσκι. Ντα κα μπορίνενας τι μανγκέν κατά εγκληματίας τι βακερέλ τουμένγκε πο μπουτ οντουλένγκε σο αβιλέ-πες κο τελευταία σαάτια ι Ιησούσκε κι πφουβ, ντα σαρ νιωσάλο κάνα ο Ιησούς απαντιντάς οντουλέστε σο μανγκλάς λέσταρ. Οκιά μπάνταρ, ο εγκληματίας-ντα μπέκιμ τι πουτσέλ-τουμέν σαρ ισινέ η ζωή κο τελευταία ντιβεσά ανταλέ Μπενγκαλέ ντουνιάστε. Κα αβέλ προνόμιος αμένγκε τι κεράς μελέτη ασακέ τζενέντζαρ, σαρ οντουβά τζενό!​—Εφεσ. 4:​22-24.

19. Σόσκε να κα αβέλ βαρετή η ζωή κο Παράδεισος; (Ντικχέν ι φωτογραφία κι ανγκλαϊνί σελίδα)

¹⁹ Η ζωή κο Παράδεισος να κα αβέλ ιτς βαρετή. Πάντα κα τθεράς μπουτ τι σικλιάς μπερεκέτι τζενένταρ ντα κα κεράς μπουτί σο κα πφερέλ-αμέν. Ο πο σημαντικός όμως ισί ότι, κάθε ντιβές, κα σικλιάς ατζέκ πο λατσσές αμαρέ Νταντές σο ισί κο ουρανός ντα κα αβέλ αμαρό γκι οντουλέντζαρ σο ντινάς-αμέν. Πάντα κα αβέν γιαβερά-ντα πράγματα τι σικλιάς λέσκε. Κα τθεράς επίσης μπουτ τι σικλιάς οντουλένγκε σο λατσσαρντάς. Καζόμ πο μπουτ κα τζουβντιάς, αζόμ πο μπαρό κα αβέλ αμαρό μανγκιπέ ι Ντεβλέσκε. Ισινάμ πφερντέ εκτίμηση κο Ιεχωβά ντα κο Ιησούς σο ντινέ-αμέν πουμαρό λάφι ότι κα τζουβντιάς για πάντα κο Παράδεισος!