1. Σο ισί «η ειρήνη ι Ντεβλέσκι» ντα σο λατσσιπέ ντικχάσα κάνα τθεράσα-λα; (Φιλιππησίους 4:​6, 7)

 Ο ΤΖΕΝΕ ανταλέ ντουνιάστε να τζανένα ι «ειρήνη ι Ντεβλέσκι», ι ηρεμία σο αβέλα κατά λατσσί φιλία αμαρέ Νταντέσαρ σο ισί κο ουρανός. Κάνα τθεράσα ι ειρήνη ι Ντεβλέσκι, νιωθίνασα αρακχαντέ. (Διαβάνεν Φιλιππησίους 4:​6, 7) Τθεράσα λατσσί φιλία γιαβερέντζαρ-ντα σο μανγκένα-Λες. Επίσης, τθεράσα εκ λατσσί ντα ζουρανί φιλία “ι Ντεβλέσαρ σο ντέλα ειρήνη”. (1 Θεσ. 5:​23) Κάνα τζανάσα αμαρέ Νταντές, ντάσα μπέσα λέστε ντα ντάσα-λες καν, η ειρήνη ι Ντεβλέσκι κα ηρεμίνελ αμαρό γκι κάνα νακχάσα εκ δυσκολία.

2. Σόσκε ισινάμ σίγουροι ότι αβέλα-πες τι τθεράς ι ειρήνη ι Ντεβλέσκι;

² Αβέλα-πες μπαγιά τι αρακχάς ειρήνη κάνα νακχάσα εκ μπαρί δοκιμασία σαρ ισί ο νασφαλίματα, εκ καταστροφή, κάνα ο τζενέ γκιντίντιβενα για τι κερέν παράπονα ή κάνα τζάνα αμέντζαρ κόντρα; Σαρέ ανταλά μπορεί τι πφερέν-αμέν νταρ. Ο Ιησούς βακερντάς πι μαθητένγκε: «Μα τι ιζράλ τουμαρό γκι ντα μα τι σικίντιβελ κατά νταρ». (Ιωάν. 14:​27) Σο σουκάρ ισί σο μπουτ πφραλά ντα πφενιά κερντέ ι συμβουλή ι Ιησούσκι. Ι Ιεχωβάσκε βοηθειάσαρ, αρακχλέ πουμαρί ειρήνη καζόμ νακχένας μπουτ μπαρέ δοκιμασίες.

3. Σαρ μπορίνελα εκ μπαρό νασφαλιπέ τι λελ αμένταρ αμαρί ειρήνη;

³ Εκ μπαρό νασφαλιπέ μπορίνελα τι αλλάνελ μπουτ αμαρί ζωή. Ανέν τουμαρέ γκοντιάτε σαρ επηρεαντάς μπουτέν ο νασφαλιπέ COVID-19. Εκχέ ροντιμάστε σο αβιλό, ο επκάς ντα πο μπουτ τζενέ βακερντέ ότι αντρέ κο Κορωνοϊός δυσκολίντιβενας τι σοβέν. Ιτιρί ανταλέ νασφαλιμάσταρ, ο άγχος, η κατάθλιψη, ο ματιπέ, ο ναρκωτικά, η βία αντρέ κι φαμιλί ντα ο τζενέ σο προσπαθισάλε τι μουνταρέν-πες, αβγατίντιλε. Άμα αβιλό εκ νασφαλιπέ  οτθέ σο μπεσένα, σαρ μπορίνενα τι κερέν κουμάντος τουμαρί ανησυχία ντα τι τθερέν ι ειρήνη ι Ντεβλέσκι;

4. Σόσκε τθεράσα ειρήνη σο τζανάσα ι Ιησούσκι προφητεία ι τελευταίε ντιβεσένγκε;

⁴ Ο Ιησούς βακερντάας ότι κο τελευταία ντιβεσά κα αβένας νασφαλίματα σο κα πφιρντιόνας μπουτ, «τθεμ τθεμέστε». (Λουκ. 21:​11) Σόσκε τθεράσα ειρήνη σο τζανάσα-λες ανταβά; Να σαστίνασα κάνα αβένα νασφαλίματα. Αγαβάσα ότι ο πράγματα αβένα ντιπ σαρ βακερντάας ο Ιησούς. Οτθάρ, κεράσα ι συμβουλή σο ντινάς ο Ιησούς οντουλένγκε σο τζουβντιόνα κο τελευταία ντιβεσά: «Μα νταρέν».​—Ματθ. 24:6.

5. (α) Σαρ βακερένα ο εδάφια Φιλιππησίους 4:​8, 9, καλέ πραγμάσκε πρέπει τι προσευχίντιβας κάνα αβέλα εκ νασφαλιπέ; (β) Σαρ βοηθίντιλι εκ πφεν κατά ηχογραφήσεις ι Γραφιάκε, ντα σο σικλιάσα ανταλέσταρ;

⁵ Κάνα αβέλα εκ νασφαλιπέ, μπορεί τι κερέλ-αμέν τι ανησυχίνας μπουτ ντα τι νταράς. Ανταβά αβιλό-πες εκχέ πφενιάτε, κι Ντέζι. b Κάνα λάκο κακ, λάκο ξάδελφος ντα λάκο γιατρός μουλέ κατά Κορωνοϊός, νταρέλας ότι κα πφερντιόλας βόι-ντα ντα κα κολλίνελας πι πφουρέ νταγιά-ντα. Ατζέ, ιτιρί κατά Κορωνοϊός, νταρέλας ότι κα χασαρέλας πι μπουτί ντα σκεφτίνελας ότι ναστί κα ποκινέλας ο χαμπίματα ντα ο κχερ άμα κα αβέλας-πες ανταβά. Ανησυχίνελας αζόμ μπουτ ανταλένγκε, σο ναστί σοβέλας ι ιράτ. Αλλά η Ντέζι αρακχλάς πάλι πι ειρήνη. Σαρ; Κερέλας συγκεκριμέ προσευχή για τι βοηθίνελ-λα ο Ιεχωβά τι αβέλ ήρεμη ντα τι πφερέλ πι γκοντί λατσσέ πραγματέντζαρ. (Διαβάνεν Φιλιππησίους 4:​8, 9) Ασουνέλας ι Ιεχωβάς τι «κερέλ λάσαρ λάφι» αντράλ κατά ηχογραφήσεις ι Γραφιάκε. Η Ντέζι βακερέλα: «Η ήρεμη φωνή ι πφραλένγκι σο διαβάνενας κοβλιαρέλας μι ανησυχία ντα ανέλας μι γκοντιάτε ότι ο Ιεχωβά τζιτζίνελα μάνγκε».​—Ψαλμ. 94:19.

6. Σαρ κα βοηθίντιβεν άμα σικλιαρένα-τουμέν κατά Γραφή ντα τζάνα κο συναθροίσεις;

⁶ Αντρέ εκχέ νασφαλιμάστε, να αβέλα-πες πάντα τι κεράς οντουλά σο κεράας ανγκλέ. Όμως, μα μουκχέν-λες ανταβά τι κερέλ-τουμέν μα τι σικλιαρέν-τουμέν κατά Γραφή ή τι τζαν κο συναθροίσεις. Ο εμπειρίες κο έντυπα ντα κο βίντεα κα ανέν τουμαρέ γκοντιάτε ότι τουμαρέ πφραλά ντα πφενιά να τσσιναβένα τι υπηρετίνεν πιστά ι Ιεχωβάς ατζέ-ντα κάνα νακχένα ασακέ δυσκολίες. (1 Πέτρ. 5:9) Ο συναθροίσεις κα βοηθίνεν-τουμέν τι πφερέν τουμαρί γκοντί πραγματέντζαρ κατά Γραφή σο ντένα ζορ. Ατζέ, κα μπορίνεν τι ντεν ζορ κο γιαβερά ντα τι λεν τουμέν-ντα ζορ. (Ρωμ. 1:​11, 12) Καζόμ ανένα τουμαρέ γκοντιάτε ότι ο Ιεχωβά ισινέ πασέ πι υπηρετόντε κάνα ισινέ νασφαλέ, νταρένας ή νιωθίνενας κορκορέ, τουμαρί πίστη κα μπαριόλ ντα κα αβέν σίγουροι ότι κα βοηθίνελ τουμέν-ντα.

7. Σο σικλιόνα κατά απόστολος Ιωάννης;

 ⁷ Προσπαθίνεν τι κερέν λάφι τουμαρέ πφραλέντζαρ ντα πφενίντζαρ. Κάνα αβέλα εκ νασφαλιπέ, μπέκιμ τι μανγκλιόλ-πες τι ατσσάς ντουρ ο εκ κατά γιαβέρ, ατζέ-ντα αμαρέ πφραλένταρ. Ασακέ βακιτίντε, μπέκιμ τι νιωθίνενα σαρ ο απόστολος Ιωάννης. Βοβ, μανγκέλας τι ντικχέλ πι αμαλές ι Γαϊός πασάλ. (3 Ιωάν. 13, 14) Όμως, αγαβέλας ότι έπρεπε τι μπεκλεντίνελ μέχρι τι ντικχέλ ι Γαϊός. Οτθάρ, ο Ιωάννης κερντάς σο νακχέλας λέσκε βαστέσταρ: Γραφιντάς κο Γάιος εκ επιστολή. Άμα να αβέλα-πες πάντα τι ντικχέν πασάλ τουμαρέ πφραλέν ντα πφενίν, προσπαθίνεν τι κερέν λάφι λέντζαρ αντράλ κατά τηλέφωνος, κατά βιντεοκλήση ή κατά μηνύματα. Κάνα κερένα λάφι τουμαρέ πφραλέντζαρ ντα πφενίντζαρ, κα νιωθίνεν πο αρακχαντέ ντα ήρεμοι. Άμα τθερένα μπαρί ανησυχία, βακερέν-λες κο πρεσβύτεροι ντα μουκχέν-λεν τι ντεν-τουμέν ζορ.​—Ησ. 32:​1, 2.

8. Σαρ μπορίνελα εκ καταστροφή τι λελ τουμένταρ τουμαρί ειρήνη;

⁸ Άμα αβιλίας-πες εκ πλημμύρα, εκ σεισμός ή εκ μπαρί γιακ, μπέκιμ τι τθερένας μπαρί ανησυχία μπουτ βακίτι σοράν ανταλέσταρ. Άμα χασαρντέν τουμαρέ αγαπημέ τζενέν ή τουμαρέ πράγματα καταστραφισάλε, μπέκιμ τι ισινένας πφανγκέ γκίσκε, μα τι τζανένας σο τι κερέν ή ατζέ-ντα τι τθερένας χολί. Ανταβά να μανγκέλα τι βακερέλ ότι ντικχένα ο υλικά πράγματα μπουτ σημαντικά ή ότι τθερένα χάνικ πίστη. Νακχλέν εκ πφαρί δοκιμασία, ντα μερικοί μπέκιμ αγαβένα ότι να κα αντιδράνεν σουκάρ. (Ιώβ 1:​11) Αλλά παρόλο σο νακχλέν κάτι αζόμ δύσκολος, μπορίνενα τι αρακχέν ειρήνη. Σαρ;

9. Σαρ προετοιμαντάς-αμέν ο Ιησούς ι καταστροφιένγκε;

⁹ Ντεν-τουμέν γκοντί σο βακερντάας ο Ιησούς. Ισί τζενέ σο αμντίνενα ότι να κα νακχέν καέκ καταστροφή. Αλλά αμέν τζανάσα ότι αμαρέ ντιβεσέντε ο καταστροφές κα αβένας πο μπουτ, ντα ότι μπέκιμ τι νακχάας αμέν-ντα μερικές ανταλένταρ. Ο Ιησούς βακερντάς πι μαθητένγκε ότι κα αβένας «μπαρέ σεισμοί» ντα γιαβερά καταστροφές πριν τι αβέλ ο τέλος. (Λουκ. 21:​11) Επίσης, βακερντάας ότι ο τζενέ “κα κερένας μπουτ μπέτι πράγματα”. Ανταβά σικάντιβελα μπουτ λατσσές κατά έγκλημας, κατά βία ντα κατά τρομοκρατία σο ντικχάσα-λεν μπουτ αντιβές. (Ματθ. 24:​12) Ο Ιησούς να βακερντάς ότι ανταλά μπέτι πράγματα κα αβένας-πες σάντε οντουλέντε σο νασλέ κατά Ιεχωβά. Ισί μπαγιά ότι μπουτ πιστοί υπηρέτες ι Ιεχωβάσκε νακχλέ καταστροφές. (Ησ. 57:1· 2 Κορ. 11:​25) Ο Ιεχωβά μπέκιμ μα τι αρακχαβέλ-αμέν εκχέ θαυμάσαρ σαρέ κατά καταστροφές, αλλά κα ντελ-αμέν σο-ντα χρειαζίντιβασα για τι ατσσάς ήρεμοι ντα τι τθεράς ειρήνη.

10. Σόσκε σικαβάσα ότι τθεράσα πίστη κάνα προετοιμάντιβασα από ακανά εκχέ καταστροφιάκε; (Παροιμίες 22:3)

¹⁰ Κάνα αβέλα κάτι σο να μπεκλεντίνασα, κα αβέλ αμένγκε πο εύκολος τι ατσσάς ήρεμοι άμα προετοιμασάλαμ πο τζανγκλέ. Μήπως όμως η προετοιμασία σικαβέλα ότι να τθεράσα πίστη κο Ιεχωβά; Σίγουρα νάα. Κι πραγματικότητα, άμα προετοιμάντιβασα ι καταστροφιένγκε σικαβάσα ότι τθεράσα πίστη ότι ο Ιεχωβά μπορίνελα τι αρακχαβέλ-αμέν. Σόσκε; Ο Λάφι ι Ντεβλέσκο βακερέλα αμένγκε τι προετοιμάντιβας καταστροφιένγκε σο μπορεί τι αβέν-πες. (Διαβάνεν Παροιμίες 22:3) Αντράλ κατά περιοδικά, κατά συναθροίσεις ντα κατά αμπέρια, η οργάνωση ι Ντεβλέσκι τθερέλα αμένγκε βακερντό μπουτ φαρ τι προετοιμάντιβας πραγματένγκε σο να μπεκλεντίνασα. c Ντάσα μπέσα κο Ιεχωβά; Άμα βα, κα κεράς ανταγιά συμβουλή ακανά​—πριν τι αβέλ εκ καταστροφή.

11. Σο σικλιόνα κατά Μάργκαρετ;

 ¹¹ Ντικχέν ι εμπειρία εκχέ πφενιάκι σο βακέρντιβελα Μάργκαρετ. Βακερντέ λάκε τι μουκχέλ πο κχερ κάνα αβιλί εκ μπαρί γιακ λάκε τθεμέστε. Μπουτ τζενέ μανγκένας τι νασέν οντιά στιγμή, οτθάρ ο ντρομ πφερντιλό ντα ο κούρσες ναστί νασένας. Ισινέ μπουτ καλό κάντος κι μπαρμπάλ, ντα η Μάργκαρετ ναστί νασέλας πι κουρσάταρ. Όμως, σωσάλι σόσκε ισινέ προετοιμασμέ. Πι τσαντάτε τθερέλας εκ χάρτης σο κα βοηθίνελας-λα τι αρακχέλ εκ ντρομ για τι νασέλ. Αλλά να κερντάας σάντε ανταβά. Νακχλάας πάλι οντουλέ ντρομέσταρ για τι σικλιόλ-λες ντα τι αβέλ λάκε πο εύκολος τι νασέλ άμα κα αβέλας-πες εκ καταστροφή. Επειδή ισινέ προετοιμασμέ, σωντάς πι ζωή.

12. Σόσκε ντάσα καν κο οδηγίες ι αρακχαϊμάσκε;

¹² Για τι ατσσάς αρακχαντέ εμ αμέν εμ ο γιαβερά, η κυβέρνηση μπέκιμ τι μανγκέλ ι τζενένταρ μα τι νικιόν αβρί. Γιαβερά φαρ, μπέκιμ τι βακερέλ τι νασέν πουμαρέ κχερένταρ ή τι ντεν καν γιαβερέ οδηγιέντε. Ισί τζενέ σο να ντένα καν σουγκό ή χασαρένα σαάτι σόσκε να μανγκένα τι μουκχέν πουμαρέ πράγματα. Σο κερένα ο Χριστιανοί; Η Αγία Γραφή βακερέλα αμένγκε: «Μάξους ι Κυριόσκε, ντεν καν σαρέ ι τζενέν σο τθερένα εξουσία: είτε ισί βασιλιάς σαρ πο μπαρό είτε ισί κυβερνήτες σο μπουτσσάντιλε λέσταρ». (1 Πέτρ. 2:​13, 14) Η οργάνωση ι Ντεβλέσκι-ντα ντέλα-αμέν οδηγίες για τι αβάς αρακχαντέ. Βακέρντιβελα αμένγκε μπουτ φαρ τι ντας κο πρεσβύτεροι ο πο νεβό αριθμός ντα διεύθυνση σο τθεράσα για τι αρακχέν-αμέν άμα κα αβέλ-πες εκ καταστροφή. Τουμέν, τθερένα-λες κερντό; Μπέκιμ επίσης τι ντιντιόν-αμέν οδηγίες για τι ατσσάς αμαρέ κχερέστε ή, γιαβερά φαρ, για τι νασάς αμαρέ κχερέσταρ. Ατζέ, μπορεί τι βακερέν αμένγκε σαρ τι λας ο πράγματα σο μανγκλιόνα-πες αμένγκε ή σαρ τι βοηθίνας γιαβερέν ντα κάνα τι κεράς-λες ανταβά. Άμα να κα ντας καν, κα μπορίναας τι τσσουβάς σε κίνδυνος εμ αμαρί ζωή εμ ι πρεσβυτερόνγκι. Ντεν-τουμέν γκοντί ότι οντουλά πιστά μουρσά πφαμπόνα αμένγκε. (Εβρ. 13:​17) Η Μάργκαρετ βακερντάς: «Πακιάβα σαρέ μι γκίσαρ ότι μι ζωή σωσάλι σόσκε ντινόμ καν κο οδηγίες κι πρεσβυτερόνγκε ντα κι οργανωσιάκε».

13. Κάι αρακχλέ χαρά ντα ειρήνη μπουτ Χριστιανοί σο νασλέ πουμαρέ κχερέσταρ;

¹³ Μπουτ πφραλά ντα πφενιά νασλέ πουμαρέ κχερέσταρ σόσκε αβιλί-πες εκ καταστροφή, εκ τζένγκι ή ο τζενέ λένγκε τθεμέστε γκιντίντιβενας για τι κερέν παράπονα. Οντουλά πφραλά  κερντέ ο πο λατσσό για τι συνηθίνεν πουμαρί νεβί ζωή ντα τι κερέν πράγματα ι Ιεχωβάσκε χωρίς τι χασαρέν σαάτι. Σαρ ο πρώτοι Χριστιανοί σο τρουγισάλεας ιτιρί κατά κόντρα σο τζάνας λέντζαρ, αντικάς βον-ντα να τσσιναβένα “τι βακερέν ο λατσσέ αμπέρια ι Ντεβλέσκε”. (Πράξ. 8:4) Κάνα βακερένα ο λατσσέ αμπέρια, ατσσικιαρένα πουμαρέ γιακχά κι Βασιλεία ντα όχι κο δυσκολίες. Αντικάς, να χασαρένα πουμαρί χαρά ντα πουμαρί ειρήνη.

14. Σαρ μπορίνελα η κόντρα ι τζενένγκι τι λελ αμένταρ αμαρί ειρήνη;

¹⁴ Κάνα τζάνα αμέντζαρ κόντρα, μπέκιμ τι χασαράς μπουτ πράγματα σο ντένα-αμέν ειρήνη. Ισινάμ χαρούμενοι ντα πφερντέ κάνα τζάσα κο συναθροίσεις ντα κο έργος ντα κεράσα πράγματα χωρίς τι νταράς ότι κα ασταρέν-αμέν. Άμα ναστί κεράσα-λεν ανταλά, μπέκιμ τι αρχίνας τι τθεράς ανησυχία ντα νταρ οντουλένγκε σο κα αβέν-πες. Ισί λογικός τι νιωθίνας αντικάς. Αλλά πρέπει τι τθεράς αμαρί γκοντί. Ο Ιησούς σικαντάς ότι η κόντρα σο κα τζάνας λέσκε μαθητέντζαρ κα μπορίνελας τι κερέλ-λεν τι χασαρέν πουμαρί πίστη. (Ιωάν. 16:​1, 2) Άρα, σαρ μπορίνασα τι ατσσικιαράς αμαρί ειρήνη κάνα τζάνα αμέντζαρ κόντρα;

15. Σόσκε δεν πρέπει τι νταράς κάνα κα τζαν αμέντζαρ κόντρα; (Ιωάννης 15:​20· 16:33)

¹⁵ Ο Λάφι ι Ντεβλέσκο βακερέλα αμένγκε: «Κα τζαν κόντρα σαρέ οντουλέ τζενέντζαρ-ντα σο μανγκένα τι αβέν αφοσιωμέ κο Ντεβέλ ντα τζουβντιόνα σαρ μανγκέλα ο Χριστός Ιησούς». (2 Τιμ. 3:​12) Κάνα τσσιναντέ ο έργος κο τθεμ εκχέ πφραλέσκο, ι Αντρεΐσκο, βοβ ναστί πακιάλας ότι κα τζάνας κόντρα σαρέ ι Ιεχωβάσκε υπηρετόντζαρ. Βακερντάς: “Ισί αζόμ μπουτ Μάρτυρες ατθέ. Σαρ αβέλα-πες τι ασταρέν-αμέν σαριλέν;” Όμως ανταγιά σκέψη αντίς τι ανέλ λέσκε ειρήνη κερέλας-λες εμ τι ανησυχίνελ. Γιαβερά πφραλά μουκχλέ ο πράγματα κο βαστά κι Ιεχωβάσκε ντα να σκεφτίνενας ότι να κα ασταρένας-λεν. Αγαβένας ότι μπορεί τι ασταρένας-λεν, αλλά να ανησυχίνενας σαρ ο Αντρέι. Οτθάρ ο Αντρέι αποφασιντάς τι ντελ σαρί πι μπέσα κο Ντεβέλ, σαρ οντουλά πφραλά. Μπουτ σουγκό, αρακχλάς ειρήνη ντα ακανά ισί χαρούμενος παρόλο σο τθερέλα δυσκολίες. Ο ίδιος αβέλα-πες αμέντζαρ-ντα. Παρόλο σο ο Ιησούς βακερντάς αμένγκε τι μπεκλεντίνας ότι κα τζαν αμέντζαρ κόντρα, σικαντάς  αμένγκε ότι μπορίνασα εμ τι ατσσάς πιστοί.​—Διαβάνεν Ιωάννης 15:​20· 16:33.

16. Καλέ οδηγιέντε πρέπει τι ντας καν κάνα τζάνα αμέντζαρ κόντρα;

¹⁶ Κάνα ο τζενέ τσσιναβένα αμαρό έργος, μπορεί τι λας οδηγίες κατά γραφείος τμήματος ντα κατά πρεσβύτεροι. Ανταλά οδηγίες ντιντιόνα-αμέν για τι αρακχαβέν-αμέν, για τι συνεχίνας τι λας πνευματικός χαμπέ ντα για τι κεράς έργος καζόμ αβέλα-πες. Κερέν ο πο λατσσό για τι ντεν καν ατζέ-ντα άμα να αγαβένα ντιπ σόσκε ντιντιόλα εκ οδηγία. (Ιακ. 3:​17) Ατζέ, μα μουτθαβέν ποτές πράγματα αμαρέ πφραλένγκε ντα πφενίνγκε ή οντουλένγκε σο κερέλα η κχανγκιρί κο τζενέ σο να τθερένα ο δικαίωμας τι τζανέν-λεν.​—Εκκλ. 3:7.

17. Σαρ ο απόστολοι κο πρώτος αιώνας, σο μανγκάσα τι κεράς;

¹⁷ Εκ κατά πο σημαντικούς λόγους σο ο Μπενγκ κερέλα τζένγκι κόντρα κι Ντεβλέσκο λαός ισί ότι «οπρά-λέντε ισί ο έργος για τι ντεν μαρτυρία ι Ιησούσκε». (Αποκ. 12:​17) Μα μουκχέν ι Μπενγκές ντα λέσκε ντουνιάς τι νταραβέν-τουμέν. Κάνα βακεράσα ο λατσσέ αμπέρια ντα κεράσα μαθητέν τθεράσα χαρά ντα ειρήνη, ατζέ-ντα κάνα τζάνα αμέντζαρ κόντρα. Κο πρώτος αιώνας, κάνα ο μπαρέ σορέ ι Ιουδαιόνγκε ντινέ ι εντολή κο απόστολοι τι τσσιναβέν τι βακερέν ο λατσσέ αμπέρια, οντουλά πιστά μουρσά τραμπιντέ τι ντεν καν ι Ντεβλές. Συνεχιντέ τι βακερέν ο λατσσέ αμπέρια, ντα ανταβά κερντάς-λεν ευτυχισμέ. (Πράξ. 5:​27-29, 41, 42) Ισί μπαγιά ότι, κάνα ο τζενέ τσσιναβένα αμαρό έργος, πρέπει τι τθεράς αμαρί γκοντί κάνα κεράσα λάφι ι Ντεβλέσκε. (Ματθ. 10:​16) Αλλά άμα κεράσα σο νακχέλα αμαρέ βαστέσταρ, κα τθεράς ι ειρήνη σο αβέλα κάνα κεράσα ι Ιεχωβάσκο γκι ντα βακεράσα λάφια σο σώνενα τζενέν.

18. Κάσταρ μπορίνασα τι αρακχάς μπαγιά ειρήνη;

¹⁸ Τι αβέν σίγουροι ότι, ατζέ-ντα ι πο δύσκολε βακιτίντε, αβέλα-πες τι τθεράς ειρήνη. Ασακέ βακιτίντε, πρέπει τι ντας-αμέν γκοντί ότι η ειρήνη σο μανγκλιόλα-πες αμένγκε ισί η ειρήνη ι Ντεβλέσκι, δηλαδή η ειρήνη σο σάντε ο Ιεχωβά μπορίνελα τι ντελ. Ντεν μπέσα λέστε κάνα αβέλα εκ νασφαλιπέ, εκ καταστροφή ή κόντρα κατά τζενέ. Ατσσόν πασέ λέσκε οργανωσιάτε. Ατσσικιαρέν τουμαρέ γιακχά κο μπουτ σουκάρ ντιβεσά σο τθερένα ανγκλά-τουμέντε. Καζόμ κερένα-λες ανταβά, «ο Ντεβέλ σο ντέλα ειρήνη κα αβέλ τουμέντζαρ». (Φιλιπ. 4:9) Κο γιαβέρ μάθημας, κα ντικχάς σαρ τι βοηθίνας αμαρέ πφραλέν σο νακχένα στεναχώριες τι τθερέν ι ειρήνη ι Ντεβλέσκι.