1. Καγιά ερώτηση μπέκιμ τι απασχολίνελα-αμέν κάνα σκεφτίνασα ι πίστη του Αβραάμ;

 ΠΑΡΟΛΟ σο μπουτ τζενέ τθερένα ασουντό για τον Αβραάμ, ο πο μπουτ τζανένα χάνικ πράγματα λέσκε. Τουμέν όμως τζανένα μπουτ για τον Αβραάμ. Τζανένα, για παράδειγμας, ότι ο Αβραάμ βακέρντιλο «ο ντατ σαρέ οντουλένγκο σο τθερένα πίστη». (Ρωμ. 4:11) Μπέκιμ όμως τι σκεφτίνενα: “Μπορίναβα τι ακολουθίναβ ο παράδειγμας του Αβραάμ ντα τι τθεράβ σαρ λέσκι πίστη;” Βα, μπορίνενα.

2. Σόσκε ισί σημαντικός τι σικλιαράς-αμέν κατά παράδειγμας του Αβραάμ; (Ιακώβου 2:22, 23)

² Εκ τρόπος για τι τθεράς πίστη σαρ τθερέλας ο Αβραάμ ισί τι σικλιαράς-αμέν λέσκε παραδειγμάσταρ. Σοράν κατά εντολή ι Ντεβλέσκι, ο Αβραάμ γκιλό σε εκ τθεμ σο ισινέ ντουρ, τζουβντιλό κο τσαντίρια για μπουτ μπρεσά ντα ισινέ έτοιμος τι θυσιάνελ ατζέ-ντα πι αγαπημέ τσσαβές, τον Ισαάκ. Ανταλά πράγματα σο κερντάς σικαβένας ζουρανί πίστη. Χάρη κι πίστη σο τθερέλας ντα κο πράγματα σο κερέλας, ο Αβραάμ κερντάς χαρούμενος ι Ιεχωβάς ντα αβιλό λέσκο αμάλ. (Διαβάνεν Ιακώβου 2:22, 23) Ο Ιεχωβά μανγκέλα τι τθεράς σαρέ αμέν​—εμ τουμέν​—ανταλά ευλογίες. Οτθάρ, ντινάς πο πνεύμας κο Παύλος ντα κο Ιάκωβος τι γραφίνεν για το παράδειγμας του Αβραάμ. Ακανά, για τι ντικχάς ο παράδειγμας λέσκο, σαρ βακέρντιβελα κι επιστολή Ρωμαίους, κεφάλαιος 4 ντα κι επιστολή σο γραφιντάς ο Ιάκωβος, κεφάλαιος 2. Ο ντούι-ντα κεφάλαια ανταλά βακερένα κάτι μπουτ σημαντικός σο τθερέλα τι κερέλ με τον Αβραάμ.

3. Καβά βασικός εδάφιος βακερντάς εμ ο Παύλος εμ ο Ιάκωβος;

³ Εμ ο Παύλος εμ ο Ιάκωβος βακερντέ ο λάφια σο ισί κο εδάφιος  Γένεση 15:6, σο βακερέλα: «[Ο Αβραάμ] σικαντάς πίστη κο Ιεχωβά, ντα Λέσκε γιακχίντε ισινέ δίκαιος τζενό». Ακατέ, ο λάφι «δίκαιος» μανγκέλα τι βακερέλ ότι, κο γιακχά κι Ντεβλέσκε, εκ τζενό ισί λατσσό, ατζέ-ντα ντιπ σωστός. Ισί εντυπωσιακός σο εκ ατελής ντα αμαρτωλός τζενό μπορεί τι αβέλ ντιπ σωστός κο γιακχά κι Ντεβλέσκε! Σίγουρα, μανγκένα τουμέν-ντα τι αβέν δίκαιοι λέσκε γιακχίντε, ντα ανταβά μπορίνελα τι αβέλ-πες. Ακανά κα σικλιάς σόσκε βακερντάς ο Ιεχωβά για τον Αβραάμ ότι ισινέ δίκαιος, ντα σο πρέπει τι κεράς για τι βακερέλ ο Ντεβέλ ο ίδιος πράγμας αμένγκε-ντα.

4. Σο τσσιναβέλα ι τζενέν τι αβέν δίκαιοι;

⁴ Κι επιστολή σο γραφιντάς κο Ρωμαίους, ο Παύλος βακερντάς ότι σαρέ ο τζενέ ισί αμαρτωλοί. (Ρωμ. 3:23) Αφού ισί αντικάς ο πράγματα, σαρ μπορίνελα ο κάθε εκ τι αβέλ δίκαιος ή ντιπ σωστός ντα αντικάς τι κερδίνελ ι φιλία ι Ντεβλέσκι; Για τι βοηθίνελ σαρέ ι Χριστιανόν τι απαντίνεν ανταλέ ερωτησιάτε, ο Παύλος κερντάς λάφι για τον Αβραάμ.

5. Σόσκε βακερντάς ο Ιεχωβά ότι ο Αβραάμ ισινέ δίκαιος; (Ρωμαίους 4:2-4)

⁵ Ο Ιεχωβά βακερντάς ότι ο Αβραάμ ισινέ δίκαιος τζενό καζόμ μπεσέλας κο τθεμ Χαναάν. Σόσκε ο Ιεχωβά μπορίνελας τι βακερέλ ότι ο Αβραάμ ισινέ δίκαιος; Μήπως επειδή ο Αβραάμ κερέλας τέλεια ο Μωσαϊκός Νόμος; Σίγουρα όχι. (Ρωμ. 4:13) Οντουβά νόμος ντιντιλό κο λαός Ισραήλ πο μπουτ από 400 μπρεσά αφού ο Ντεβέλ βακερντάς ότι ο Αβραάμ ισί δίκαιος. Οτθάρ, σόσκε βακερντάς ο Ντεβέλ ότι ο Αβραάμ ισινέ δίκαιος; Ο Ιεχωβά σικαντάς κο Αβραάμ λατσσιπέ σο να αξίνελας-λες, ντα βακερντάς ότι ο Αβραάμ ισινέ δίκαιος επειδή τθερέλας πίστη.—Διαβάνεν Ρωμαίους 4:​2⁠-4.

6. Σόσκε μπορίνελα τι βακερέλ ο Ιεχωβά ότι εκ αμαρτωλός ισί δίκαιος;

⁶ Ο Παύλος εξηγιντάς πο μπουτ ανταγιά σκέψη κάνα βακερντάς ότι, κάνα εκ τζενό σικαβέλα πίστη κο Ντεβέλ, «η πίστη λέσκι κερέλα-λες δίκαιος». (Ρωμ. 4:5) Σοράν βακερντάς: «Εκ τζενό ισί ευτυχισμέ επειδή ισί δίκαιος κο γιακχά κι Ντεβλέσκε χωρίς τι κερέλ πράγματα. Ο Δαβίδ-ντα κερντάς λάφι ανταλέσκε κάνα βακερντάς: “Ευτυχισμέ ισί οντουλά σο συγχωρίντιλε λένγκε παρανομίες, ντα λένγκε αμαρτίες ιτσσάρντιλε. Ευτυχισμέ ισί ο τζενό σο ο Ιεχωβά να κα ανέλ πι γκοντιάτε λέσκι αμαρτία”». (Ρωμ. 4:6-8· Ψαλμ. 32:1, 2) Ο Ντεβέλ συγχωρίνελα, ή γιαβέρσοϊ ιτσσαρέλα, ο αμαρτίες οντουλένγκε σο σικαβένα πίστη λέστε. Συγχωρίνελα-λεν ντιπ ντα να ανέλα πι γκοντιάτε λένγκε αμαρτίες. Λέσκε γιακχίντε, ανταλά τζενέ ισί ντιπ σωστά ντα δίκαια επειδή τθερένα πίστη.

7. Σόσκε βακεράσα ότι ισινέ δίκαια ο πιστά τζενέ;

⁷ Παρόλο σο βακέρντιλε δίκαιοι, ο Αβραάμ, ο Δαβίδ ντα γιαβερά πιστά τζενέ σο ντένας λατρεία ι Ντεβλές συνεχίνενας τι αβέν ατελείς ντα αμαρτωλοί. Αλλά επειδή πακιάνας κο Ντεβέλ, λέσκε γιακχίντε ισινέ ντιπ σωστοί, κάτι σο να αβέλας-πες ι τζενέντζαρ σο να ισινέ λέσαρ αμαλά. (Εφεσ. 2:12) Σαρ βακερντάς ξεκάθαρα ο Παύλος κι επιστολή σο γραφιντάς, η πίστη κχελέλα σημαντικός ρόλος για τι τθεράς φιλία ι Ντεβλέσαρ. Ο Αβραάμ ντα ο Δαβίδ ισινέ αμαλά ι Ντεβλέσκε επειδή τθερένας πίστη λέστε. Αμέν-ντα μπορίνασα τι αβάς αμαλά ι Ντεβλέσκε χάρη κι πίστη σο τθεράσα.

8, 9. Καβά λάθος συμπέρασμας νικαντέ μερικοί κατά λάφια σο γραφιντάς ο Παύλος ντα ο Ιάκωβος, ντα σόσκε;

⁸ Για μπουτ μπρεσά, ο αρχηγοί ι θρησκειάκε τθερένα διαφορετικές απόψεις. Μερικοί πακιάνα ότι η πίστη ισί η πο σημαντική, ενώ γιαβερά οντουλά σο κερέλα εκ τζενό. Μερικά παπάζια σικλιαρένα ότι ο μόνος σο χρειαζίντιβελα τι κερέλ εκ τζενό για τι σώντιβελ ισί τι πακιάλ κο Κύριος Ιησούς Χριστός. Ή μπέκιμ τι ασουντέν-λεν τι βακερέν: «Δεχτίνεν ι Ιησούς ντα κα σώντιβεν». Ο παπάζια μπέκιμ τι προσπαθίνεν τι στηρίνεν  πουμαρί άποψη κο λάφια κι Παυλόσκε: «Εκ τζενό . . . ισί δίκαιος κο γιακχά κι Ντεβλέσκε χωρίς τι κερέλ πράγματα». (Ρωμ. 4:6) Όμως, γιαβερά πακιάνα ότι εκ τζενό μπορίνελα «τι σώνελ πο νεαυτός» κάνα περέλα κοτσίντζαρ ανγκλάλ κο εικόνες ή κερέλα γιαβερά πράγματα σο βακερέλα η κχανγκιρί. Ανταλά τζενέ μπέκιμ τι βακερένα ο λάφια ι εδαφιόσκε Ιακώβου 2:24: «Ο τζενό κα βακέρντιβελ δίκαιος αντράλ κατά πράγματα σο κερέλα ντα όχι σάντε αντράλ κατά πίστη».

⁹ Επειδή υπαρχίντιβενα αζόμ μπουτ διαφορετικές απόψεις, μερικά σπουδαγμέ τζενέ σο ασχολίντιβενα ι Γραφιάσαρ νικαντέ ο συμπέρασμας ότι ο Παύλος ντα ο Ιάκωβος να συμφωνίνενας κο πράγματα σο τθερένας τι κερέν με την πίστη ντα οντουλέντζαρ σο κερέλα εκ τζενό. Ο παπάζια μπέκιμ τι βακερένα ότι ο Παύλος πακιάλας ότι ο τζενό βακέρντιβελα δίκαιος αντράλ κατά πίστη χωρίς τι κερέλ πράγματα. Ενώ βακερένα ότι ο Ιάκωβος σικλιαρέλας ότι ο πράγματα σο κερέλα εκ τζενό ισί μπουτ σημαντικά για τι κερέλ κάποιος ι Ντεβλέσκο γκι. Εκ καθηγητής σο γραφίνελα βιβλία ι θρησκειάκε βακερντάς ακαβά οπράλ ανταλέστε: «Ο Ιάκωβος να αγαβέλας σόσκε ο Παύλος επιμίνελας ότι [ο τζενό βακέρντιβελα δίκαιος] σάντε αντράλ κατά πίστη ντα όχι ι πραγματένταρ σο κερέλα». Αλλά ο Ιεχωβά ντινάς πο πνεύμας εμ κο Παύλος εμ κο Ιάκωβος για τι γραφίνεν οντουλά σο γραφιντέ. (2 Τιμ. 3:16) Άρα πρέπει τι υπαρχίντιβελ εκ λογική εξήγηση για τη διαφορά σο τθερένα ο λάφια λένγκε. Βα, υπαρχίντιβελα​—τι ντικχάς ανταλά λάφια γιεκ ι γιαβερέ λαφίντζαρ σο βακερένα.

10. Καλέ “πραγματένγκε” κερέλας λάφι ο Παύλος; (Ρωμαίους 3:21, 28) (Ντικχέν ι φωτογραφία-ντα)

¹⁰ Καλέ “πραγματένγκε” σο κερέλας εκ τζενό κερντάς λάφι ο απόστολος Παύλος κο κεφάλαια 3 ντα 4 κι επιστολή Ρωμαίους; Πο μπουτ κερέλας λάφι για το «πράγματα σο συμφωνίνενα με το νόμος», ο νόμος του Μωυσή, σο ντιντιλό κο όρος Σινά. (Διαβάνεν Ρωμαίους 3:21, 28) Ντικχίντιβελα  ότι, κο ντιβεσά κι Παυλόσκε, μερικοί Ιουδαίοι Χριστιανοί δυσκολίντιβενας τι δεχτίνεν ότι ο Μωσαϊκός Νόμος ντα ο πράγματα σο μανγκέλας λένταρ οντουβά Νόμος τσσινάντιλεας. Οτθάρ, ο Παύλος βακερντάς ο παράδειγμας του Αβραάμ για τι σικαβέλ ότι εκ τζενό να αβέλας δίκαιος κι Ντεβλέσκε γιακχά επειδή «κερέλα ο πράγματα σο συμφωνίνενα με το νόμος». Αβέλα δίκαιος κατά πίστη. Ανταβά ισί ενθαρρυντικός επειδή σικλιαρέλα-αμέν ότι, άμα τθεράσα πίστη κο Ντεβέλ ντα κο Χριστός, μπορίνασα τι τθεράς ι Ντεβλέσκι ευλογία.

11. Καλέ “πραγματένγκε” κερέλας λάφι ο Ιάκωβος;

¹¹ Οκιά μπάνταρ, ο «πράγματα» σο κερέλα εκ τζενό, σαρ βακερέλα ο Ιάκωβος κο κεφάλαιος 2 κι επιστολή σο γραφιντάς, νανέ ο «πράγματα σο συμφωνίνενα με το νόμος», σο βακερντάς ο Παύλος. Ο Ιάκωβος κερέλα λάφι ι πραγματένγκε σο κερένα ο Χριστιανοί κάθε ντιβές πουμαρέ ζωγιάτε. Ανταλά πράγματα σικαβένα άμα εκ Χριστιανός τθερέλα αληθινή πίστη κο Ντεβέλ ή όχι. Ντικχέν ντούι παραδείγματα σο χρησιμοποιηντάς ο Ιάκωβος.

12. Σαρ εξηγιντάς ο Ιάκωβος ι σχέση σο τθερέλα η πίστη ντα ο πράγματα σο κεράσα; (Ντικχέν ι φωτογραφία-ντα)

¹² Κο πρώτος παράδειγμας, ο Ιάκωβος βακερντάς κο Χριστιανοί μα τι ξεχωρίνεν ι γιαβερέν. Σικαντάς-λες ανταβά κάνα κερντάς λάφι εκχέ τζενέσκε σο ντινάς αξία εκχέ χουλανές, ενώ εκχέ τσορορές κερντάς-λες πέρα. Ο Ιάκωβος βακερντάς ότι εκ ασακό τζενό μπέκιμ τι βακερέλα ότι τθερέλα πίστη, αλλά κατέ ισί ο πράγματα σο κερέλα; (Ιακ. 2:1-5, 9) Κο δεύτερος παράδειγμας, ο Ιάκωβος κερντάς λάφι εκχέ τζενέσκε σο ντικχλάς ότι “εκ πφραλ ή εκ πφεν να τθερέλα τι ιριαβέλ-πες ή να τθερέλα χαμπέ” αλλά να βοηθιντάς-λεν. Ατζέ-ντα άμα ανταβά τζενό βακερέλας ότι τθερέλας πίστη, να σικαντάς-λα ι πραγματέντζαρ σο κερντάς. Άρα λέσκι πίστη ισινέ άχρηστη. Σαρ γραφιντάς ο Ιάκωβος: «Κορκορί η πίστη, άμα να  κερέλα λατσσέ πράγματα, ισί μουλί».​—Ιακ. 2:14-17.

13. Καβά τζενό σικαντάς ότι τθερέλας πίστη οντουλέντζαρ σο κερντάς; (Ιακώβου 2:25, 26)

¹³ Ο Ιάκωβος βακερντάς ότι η Ραάβ ισινέ εκ μπουτ λατσσό παράδειγμας σο σικαντάς ότι τθερέλας πίστη οντουλέντζαρ σο κερντάς. (Διαβάνεν Ιακώβου 2:​25, 26) Η Ραάβ ασουντάας ι Ιεχωβάσκε ντα αγαντάας ότι βοβ υποστηρίνελας ι Ισραηλιτέν. (Ιησ. Ναυή 2:9-11) Σικαντάς πι πίστη οντουλέντζαρ σο κερντάς​—αρακχαντάς ντουέ κατασκοπόν σο ισινέ Ισραηλίτες κάνα λένγκι ζωή ισινέ σε κίνδυνος. Ντα αντικάς, ανταγιά ατελής τζουβέλ σο να ισινέ Ισραηλίτισσα βακέρντιλι δίκαιη, ακριβώς σαρ ο Αβραάμ. Λάκο παράδειγμας σικαβέλα καζόμ σημαντικός ισί τι αγαντίντιβελ η πίστη κατά πράγματα σο κερέλα εκ τζενό.

14. Σαρ ταιριάνενα ο λάφια σο γραφιντάς ο Παύλος ντα ο Ιάκωβος;

¹⁴ Ο Παύλος ντα ο Ιάκωβος απλώς εξηγιντέ ι πίστη ντα ο πράγματα σο κεράσα με ντούι διαφορετικούς τρόπους. Ο Παύλος εξηγιντάς κο Ιουδαίοι Χριστιανοί ότι να κα μπορίνενας ποτές τι τθερέν ι ευλογία ι Ιεχωβάσκι σάντε άμα κα κερένας ο πράγματα σο συμφωνίνενας με το Μωσαϊκός Νόμος. Ο Ιάκωβος βακερντάς καζόμ σημαντικός ισί τι σικαβέν σαρέ ο Χριστιανοί πουμαρί πίστη, καζόμ κερένα λατσσέ πράγματα ι γιαβερένγκε.

15. Καλέ τροπόντζαρ μπορίνασα τι σικαβάς πίστη ι πραγματέντζαρ σο κεράσα; (Ντικχέν ο φωτογραφίες-ντα)

¹⁵ Ο Ιεχωβά να βακερέλα ότι, άμα μανγκάσα τι βακέρντιβας δίκαιοι, πρέπει τι κεράς ακριβώς οντουλά σο κερντάς ο Αβραάμ. Κι πραγματικότητα, ισί μπουτ τρόποι για τι σικαβάς πίστη ι πραγματέντζαρ σο κεράσα. Μπορίνασα τι δεχτίνας λατσσιμάσαρ ι νεβέ τζενέν κι κχανγκιρί, τι βοηθίνας ι πφραλέν ντα ι πφενίν σο τθερένα ανάγκη ντα τι κεράς ο λατσσιπέ αμαρέ φαμιλιάτε. Σαρέ ανταλά ισί πράγματα σο μπεϊντίνελα-λεν ο Ντεβέλ ντα ευλογίνελα-λεν. (Ρωμ. 15:7· 1 Τιμ. 5:4, 8· 1 Ιωάν. 3:18) Εκ μπουτ λατσσό τρόπος σο σικαβάσα αμαρί  πίστη ισί τι βακεράς αντράλ αμαρέ γκίσταρ ο λατσσέ αμπέρια κο γιαβερά. (1 Τιμ. 4:16) Σαρέ μπορίνασα τι σικαβάς οντουλέντζαρ σο κεράσα ότι τθεράσα πίστη ότι ο υποσχέσεις ι Ιεχωβάσκε κα νικιόν μπαγιά ντα ότι λέσκο ντρομ ισί ο πο λατσσό. Άμα κα κεράς-λες ανταβά, μπορίνασα τι αβάς ντιπ σίγουροι ότι κο γιακχά αμαρέ Ντεβλέσκε κα αβάς δίκαιοι, ντα κα βακερέλ αμένγκε ότι ισινάμ λέσκε αμαλά.

16. Σο σχέση τθερέλας η ελπίδα με την πίστη του Αβραάμ;

¹⁶ Ο κεφάλαιος 4 κι επιστολή Ρωμαίους σικαβέλα ατζέκ εκ σημαντικός πράγμας σο μπορίνασα τι σικλιάς κατά Αβραάμ: καζόμ σημαντική ισί η ελπίδα. Ο Ιεχωβά ντινάς πο λάφι ότι αντράλ κατά Αβραάμ μπουτ τθεμά κα ευλογίντιβενας. Ανέν τουμαρέ γκοντιάτε σο σουκάρ ελπίδα τθερέλας ο Αβραάμ! (Γέν. 12:3· 15:5· 17:4· Ρωμ. 4:17) Όμως, ατζέ-ντα κάνα ο Αβραάμ ισινέ 100 μπρεσένγκο ντα η Σάρρα 90, ο τσσαβό σο ντινάας πο λάφι ο Ιεχωβά να αβιλόας ατζέκ. Κι τζενένγκε γιακχά, ντικχίντιβελας ότι ναστί αβέλας-πες τι κερέν τσσαβές ο Αβραάμ ντα η Σάρρα. Ανταγιά ισινέ μπαγιά εκ μπαρί δοκιμασία για τον Αβραάμ. Όμως, «πακιάλας ότι κα αβέλας ντατ μπουτέ τθεμένγκο». (Ρωμ. 4:18, 19) Τελικά, οντιά ελπίδα αβιλί-πες μπαγιά. Ο Αβραάμ αβιλό ντατ του Ισαάκ, ι τσσαβέσκο σο μπεκλεντίνελας αζόμ μπουτ βακίτι τι τθερέλ.​—Ρωμ. 4:20-22.

17. Σαρ τζανάσα ότι μπορίνασα τι βακέρντιβας δίκαιοι σαρ αμαλά ι Ντεβλέσκε;

¹⁷ Μπορίνασα τι τθεράς ι ευλογία ι Ντεβλέσκι ντα τι βακέρντιβας αμέν-ντα δίκαιοι σαρ αμαλά ι Ντεβλέσκε, σαρ ο Αβραάμ. Μάλιστα, ο Παύλος κερντάς λάφι ανταλέ πραγμάσκε κάνα γραφιντάς: «Ο λάφι “κι Ντεβλέσκε γιακχά ισινέ δίκαιος τζενό” να γραφίντιλο σάντε [για τον Αβραάμ], αλλά αμένγκε-ντα σο κα αβάς δίκαιοι λέσκε γιακχίντε, επειδή πακιάσα Οντουλέστε σο αναστιντάς ι Ιησούς». (Ρωμ. 4:23, 24) Σαρ ο Αβραάμ, αντικάς αμέν-ντα χρειαζίντιβελα τι τθεράς πίστη, τι κεράς πράγματα, ντα τι τθεράς ελπίδα. Κι συνέχεια, ο Παύλος εξηγίνελα αμαρί ελπίδα κο κεφάλαιος 5 κι επιστολή Ρωμαίους, σαρ κα ντικχάς κο γιαβέρ μάθημας.