1. Σο πρέπει τι κεράς για τι αβάς ώριμοι Χριστιανοί;

 ΙΣΙ εντυπωσιακός καζόμ σουγκό μπαριόλα εκ χουρντό. Ντικχίντιβελα ότι ο τσσαβέ μπαριόνα χωρίς τι κερέν καέκ προσπάθεια. Όμως, για τι αβέλ εκ τζενό ώριμος Χριστιανός, πρέπει τι κερέλ προσπάθειες. b (1 Κορ. 13:11· Εβρ. 6:1) Για τι πετυχίνας ανταβά στόχος, πρέπει τι τθεράς εκ ζουρανί φιλία ι Ιεχωβάσαρ. Χρειαζίντιβασα επίσης λέσκο άγιος πνεύμας καζόμ μπαριαράσα ιδιότητες σο κερένα λέσκο γκι, σικλιάσα χρήσιμα πράγματα σο κα βοηθίνεν-αμέν αμαρέ ζωγιάτε ντα προετοιμάντιβασα για το ευθύνες σο κα τθεράς κο μέλλον.​—Παρ. 1:5.

2. Σο σικλιάσα κατά εδάφιος Γένεση 1:27, ντα σο κα ντικχάς ανταλέ μαθημάστε;

² Ο Ιεχωβά κερντάς ι τζενέν τι αβέν μουρσά ντα τζουβλιά. (Διαβάνεν Γένεση 1:​27) Ισί εύκολος τι ντικχάς ο διαφορές σο τθερένα ο μουρσά ντα ο τζουβλιά κο σώμας. Όμως, εκτός ανταλέσταρ, τθερένα γιαβερά-ντα διαφορές. Για παράδειγμας, ο Ιεχωβά κερντάς ι μουρσέν ντα ι τζουβλίν τι μπορίνεν τι τθερέν κάποιες ευθύνες, οτθάρ χρειαζίντιβενα ιδιότητες ντα τι σικλιόν κάποια πράγματα για τι μπορίνεν τι κερέν πουμαρέ ευθύνες. (Γέν. 2:18) Ανταλέ μαθημάστε, κα ντικχάς σο μπορίνελα τι κερέλ εκ τερνί πφεν για τι αβέλ ώριμη Χριστιανή. Κο γιαβέρ μάθημας, κα ντικχάς σο μπορίνενα τι κερέν ο τερνέ πφραλά.

3, 4. Κατέ κα αρακχέν ο τερνέ πφενιά λατσσέ παραδείγματα σο μπορίνενα τι μοιάζεν λέντε; (Ντικχέν ι φωτογραφία-ντα)

³ Η Αγία Γραφή κερέλα λάφι μπουτέ λατσσέ τζουβλίνγκε σο μανγκένας ι Ιεχωβάς ντα υπηρετίνενας-λες. (Ντικχέν ο θέμας  «Γυναίκες της Αγίας Γραφής​—Τι Μαθαίνουμε από Αυτές;» κο ιστότοπος jw.org) Βον, σαρ βακερέλα ο εδάφιος ανταλέ μαθημάσκο, “να νακχαβένας ο όρια κο συνήθειες” ντα ισινέ «πιστές σαρέ κο πράγματα». Επίσης, ο πφενιά μπορίνενα τι αρακχέν πουμαρέ κχανγκιριάτε παραδείγματα πφενίνγκε σο ισί ώριμες ντα τι σικλιόν λένταρ μπουτ πράγματα.

⁴ Πφενιάλεν σο ισινέν τερνέ, τζανένα πφενίν σο ισί ώριμες ντα μπορίνενα τι μοιάζεν λέντε; Ντικχέν λένγκε σουκάρ ιδιότητες. Σοράν, σκεφτίνεν σαρ μπορίνενα τι σικαβέν-λεν τουμέν-ντα. Κο παράγραφοι σο ισί πο τελέ, κα ντικχάς τριν σημαντικές ιδιότητες σο χρειαζίντιβελα τι μπαριαρέν ο ώριμα τζουβλιά.

5. Σόσκε ισί σημαντική η ταπεινότητα για εκ ώριμη Χριστιανή;

⁵ Η ταπεινότητα ισί μπουτ σημαντική για τι αβέλ εκ τζενό ώριμος Χριστιανός. Άμα εκ τζουβέλ ισί ταπεινή, κα τθερέλ λατσσί σχέση ι Ιεχωβάσαρ ντα ι γιαβερέντζαρ. (Ιακ. 4:6) Για παράδειγμας, εκ τζουβέλ σο μανγκέλα ι Ιεχωβάς τραμπίνελα ταπεινά τι ακολουθίνελ οντουβά σο βακερέλα κι 1 Κορινθίους 11:3. Οτθέ ο Ιεχωβά εξηγίνελα κάστε ντινάς ι ευθύνη τι οδηγίνελ ι κχανγκιρί ντα ι φαμιλί. c

6. Σο μπορίνενα τι σικλιόν ο τερνέ πφενιά για την ταπεινότητα κατά Ρεβέκκα;

⁶ Σκεφτίνεν ο παράδειγμας σο μουκχλάς η Ρεβέκκα. Ισινέ εκ γκοντιαβέρ τζουβέλ σο σαρέ πι ζωγιάτε λέλας αποφάσεις μπίνταρανες ντα τζανέλας σο έπρεπε τι κερέλ. (Γέν. 24:58· 27:5-17) Όμως, σικαβέλας σεβασμός ντα ντέλας καν. (Γέν. 24:17, 18, 65) Άμα ισινέν ταπεινές σαρ η Ρεβέκκα ντα υποστηρίνενα οντουλέν σο ο Ιεχωβά ντινάς-λεν ι ευθύνη τι οδηγίνεν-τουμέν, κα αβέν ευλογία εμ τουμαρέ φαμιλιάκε εμ τουμαρέ κχανγκιριάκε.

7. Σαρ μπορίνενα ο τερνέ πφενιά τι τθερέν ι μετριοφροσύνη σο τθερέλας η Εσθήρ;

⁷ Η μετριοφροσύνη, δηλαδή τι αγαβέλ εκ τζενό πο όρια, ισί ατζέκ εκ ιδιότητα σο χρειαζίντιβενα σαρέ ο ώριμοι Χριστιανοί. Η Γραφή βακερέλα ότι «η σοφία ισί οντουλέντζαρ σο ισί μετριόφρονες». (Παρ. 11:2) Η Εσθήρ ισινέ  εκ μετριόφρων ντα πιστή τζουβέλ. Επειδή αγαβέλας πο όρια, ανταβά αρακχαβέλας-λα ντα να ισαρέλας-πες κάνα αβιλί βασίλισσα. Ασουνέλας ο συμβουλές σο ντέλας-λα λάκο πο μπαρό ξάδελφος, ο Μαροδοχαίος, ντα κερέλας-λεν. (Εσθήρ 2:10, 20, 22) Μπορίνενα τουμέν-ντα τι τθερέν ασακί μετριοφροσύνη κάνα μανγκένα λατσσέ συμβουλές ντα κερένα-λεν.​—Τίτο 2:3-5.

8. Σαρ βοηθίνελα εκχέ πφενιά η μετριοφροσύνη τι τραμπίνελ γκοντιάσαρ πο σέα ντα πι εμφάνιση, σαρ σικαβένα ο εδάφια 1 Τιμόθεο 2:9, 10;

⁸ Η Εσθήρ σικαντάς μετριοφροσύνη ατζέκ εκχέ τροπόσαρ. «Ισινέ σουκάρ ντα τθερέλας μπουτ λατσσί εμφάνιση», αλλά να ταρτίνελας μπουτ ι προσοχή πι νεαυτόστε. (Εσθήρ 2:7, 15) Σαρ μπορίνελα εκ πφεν τι βοηθίντιβελ κατά παράδειγμας σο μουκχλάς η Εσθήρ; Εκ τρόπος ισί κο εδάφια 1 Τιμόθεο 2:9, 10. (Διαβάνεν) Ο απόστολος Παύλος ντινάς κο Χριστιανές ι οδηγία τι ιρίν σέα σο να ανένα λατζ καεκχέστε ντα τραμπίντιβενα γκοντιάσαρ. Ο λάφια κο πουρανό μπαλαμανό κείμενος σο χρησιμοποιήντιβενα ακατέ μανγκένα τι σικαβέν ότι εκ Χριστιανή πρέπει πάντα τι ιριαβέλ-πες λατσσέ τροπόσαρ. Επίσης, πρέπει τι σικαβέλ ότι σεβάνελα ο αισθήματα ι γιαβερένγκε οντουλέντζαρ σο ιρίλα. Καμαρώνασα αμαρέ ώριμε πφενίν σο κερένα ανταγιά συμβουλή!

9. Σο σικλιάσα κατά παράδειγμας σο μουκχλάς η Αβιγαία;

⁹ Εκ γιαβέρ ιδιότητα σο χρειαζίντιβελα τι τθερέν σαρέ ο ώριμα πφενιά ισί τι αβέν γκοντιαβέρ. Σο μανγκέλα τι βακερέλ ανταβά; Τι μπορίνεν τι αγαβέν καβά ισί ο σωστός ντα καβά ισί ο λάθος, ντα σοράν τι τραμπίνεν τι κερέν ο σωστός. Σκεφτίνεν ο παράδειγμας σο μουκχλάς η Αβιγαία. Λάκο ρομ λιντάς εκ μπέτι απόφαση, σο κα ανέλας μπαρό ζιάνι σαρέ λέσκε φαμιλιάτε. Η Αβιγαία κερντάς κάτι σουγκό. Επειδή ισινέ γκοντιαβέρ, αγαντάς σο έπρεπε τι κερέλ, ντα ανταβά σωντάς ζωές. (1 Σαμ. 25:14-23, 32-35) Άμα ισινάμ γκοντιαβέρ, τζανάσα επίσης κάνα πρέπει τι κεράς λάφι ντα κάνα δεν πρέπει. Ανταβά βοηθίνελα-αμέν τι σικαβάς κο γιαβερά ότι πφαμπάσα λένγκε χωρίς τι ανάς-λεν σε δύσκολη θέση.​—1 Θεσ. 4:11.

10, 11. Σαρ μπορίνενα τι βοηθίνεν εμ τουμαρό νεαυτός εμ ι γιαβερέν άμα διαβάνενα ντα γραφίνενα λατσσές; (Ντικχέν ι φωτογραφία-ντα)

¹⁰ Εκ πφεν χρειαζίντιβελα τι σικλιόλ τι κερέλ μερικά χρήσιμα πράγματα. Κάποια πράγματα σο σικλιόλα εκ τσσάι κάνα ισί χουρντί κα βοηθίνεν-λα σαρέ λάκε ζωγιάτε. Ντικχέν μερικά παραδείγματα.

¹¹ Σικλιόν τι διαβάνεν ντα τι γραφίνεν λατσσές. Μερικέ κουλτουρέντε, νανέ σημαντικός τι σικλιόν ο τζουβλιά τι διαβάνεν ντα τι γραφίνεν. Όμως, ανταλά πράγματα ισί μπουτ σημαντικά ι κάθε Χριστιανόσκε. d (1 Τιμ. 4:13)  Οτθάρ, μα μουκχέν τίποτα τι τσσιναβέλ-τουμέν τι σικλιόν τι διαβάνεν ντα τι γραφίνεν λατσσές. Σο λατσσιπέ κα τθερέν; Ανταλά πράγματα μπέκιμ τι βοηθίνεν-τουμέν τι αρακχέν ντα τι ατσσικιαρέν εκ μπουτί. Κα μπορίνεν τι σικλιαρέν εμ τουμέν εμ ι γιαβερέν πο λατσσές κατά Λάφι ι Ντεβλέσκο. Ο πο σημαντικός ισί ότι κα τζαν πο πασέ κο Ιεχωβά καζόμ διαβάνενα λέσκο Λάφι ντα σκεφτίνενα-λες λατσσές.​—Ιησ. Ναυή 1:8· 1 Τιμ. 4:15.

12. Σο μπορίνενα τι σικλιόν κατά Παροιμίες 31:26;

¹² Σικλιόν σαρ τι ασουνέν λατσσές ντα τι κερέν λάφι γκουλντές. Ισί σημαντικός τι κερέν-λες ανταβά ο Χριστιανοί. Ο μαθητής Ιάκωβος ντέλα-αμέν ακαγιά λατσσί συμβουλή: «Κάθε τζενό πρέπει τι ασουνέλ με προσοχή, μα τι σιγκιαρέλ τι κερέλ λάφι». (Ιακ. 1:19) Κάνα ασουνένα προσεκτικά ι γιαβερέν τι κερέν λάφι, σικαβένα ότι νιωθίνενα λένγκι ντουκχ, ότι “αγαβένα-λεν”. (1 Πέτρ. 3:8) Άμα να ισινέν σίγουροι σο βακερέλα ή σαρ νιωθίνελα εκ τζενό, κερέν λέσκε ερωτήσεις. Σοράν, σκεφτίνεν χάνικ πριν τι κερέν λάφι. (Παρ. 15:28) Πουτσέν-τουμέν: “Ισί ανταβά σο μανγκάβα τι βακεράβ αληθινός ντα κα ντελ ζορ; Σικαβέλα σεβασμός ντα λατσσιπέ;” Σικλιόν κατά ώριμα πφενιά σο ασουνένα προσεκτικά ντα κερένα λάφι γκουλντές. (Διαβάνεν Παροιμίες 31:​26) Τσσουβέν σημασία κο τρόπος σο κερένα λάφι ο γιαβερά. Καζόμ πο λατσσές σικλιόνα ανταλά πράγματα, αζόμ πο εύκολος κα αβέλ τουμένγκε τι κερέν αμαλέν ντα τι τθερέν ειρήνη λέντζαρ.

13. Σαρ μπορίνενα τι σικλιόν τι ντεν πέρα εκ κχερ; (Ντικχέν ι φωτογραφία-ντα)

¹³ Σικλιόν τι ντεν πέρα εκ κχερ. Μπουτέ τθεμέντε, ο τζουβλιά κερένα ο πο μπουτ μπουτιά κο κχερ. Τουμαρί ντάι ή εκ γιαβέρ πφεν μπορίνελα τι σικλιαρέλ-τουμέν σαρ τι κερέν ανταλά μπουτιά λατσσές. Εκ πφεν, η Σίντι, βακερέλα: «Εκ κατά πο λατσσέ πράγματα σο σικλιαρντάς-μαν μι ντάι ισινέ η χαρά σο αβέλα κατά πφαρί μπουτί. Επειδή σικλιλόμ σαρ τι κεράβ χαμπέ, τι καθαρίναβ, τι σουβάβ, ντα τι χρησιμοποιήναβ σωστά μο λοβέ κάνα ψωνίναβα, μπορίναβας τι φροντίναβ μο νεαυτός ντα τι κεράβ πο μπουτ ι Ιεχωβάσκε. Μι ντάι επίσης σικλιαρντάς-μαν τι πουτράβ μο κχερ ι γιαβερένγκε, ντα ανταβά βοηθιντάς-μαν τι γνωρίναβ μπουτ λατσσέ πφραλέν ντα πφενίν σο μπορίναβας τι μοιάζαβ λέντε». (Παρ. 31:15, 21, 22) Άμα εκ τζουβέλ ισί μπουτιαρνί, πουτρέλα πο κχερ ι γιαβερένγκε ντα τζανέλα τι ντελ πέρα ο κχερ κα αβέλ μπαρί ευλογία πι φαμιλιάκε ντα ι κχανγκιριάκε.​—Παρ. 31:13, 17, 27· Πράξ. 16:15.

14. Σο σικλιόνα κατά Κρίσταλ, ντα σο πρέπει τι τθερέν τουμαρέ γκοντιάτε;

¹⁴ Σικλιόν τι ερεσέν-τουμέν οντουλά σο τθερένα. Ισί σημαντικός τι σικλιόν-λες ανταβά σαρέ ο ώριμοι Χριστιανοί. (Φιλιπ. 4:11) Εκ πφεν, η Κρίσταλ, βακερέλα: «Μο ντατ ντα μι ντάι βοηθιντέ-μαν τι τραμπίναβ μαθήματα κο σχολείος σο κα μπορίναβας τι χρησιμοποιήναβ-λεν πο σοράν μι ζωγιάτε. Μο ντατ βακερντάς μάνγκε ότι κα αβέλας λατσσό τι κεράβ μαθήματα λογιστικής. Ανταβά βοηθιντάς-μαν μπουτ». Να ερεσέλα σάντε τι σικλιόν σαρ τι  νικαβέν λοβέ. Προσπαθίνεν επίσης τι σικλιόν σαρ τι χρησιμοποιήνεν-λεν γκοντιάσαρ για μα τι χαλαβέν πο μπουτ οντουλένταρ σο τθερένα. (Παρ. 31:16, 18) Τθερέν τουμαρέ γκοντιάτε τουμαρέ πνευματικούς στόχους. Για τι πετυχίνεν-λεν, πρέπει τι ερεσέν-τουμέν οντουλά σο τθερένα ντα μα τι τσσουβέν σινανέ μπόρτζια.​—1 Τιμ. 6:8.

15, 16. Σαρ βοηθίνενα ο εργένια πφενιά ι γιαβερέν; (Μάρκος 10:29, 30)

¹⁵ Άμα κα μπαριαρέν ιδιότητες σο κερένα ι Ιεχωβάσκο γκι ντα κα σικλιόν τι κερέν μερικά πράγματα, ανταβά κα βοηθίνελ-τουμέν κο ευθύνες σο κα αβέν. Ντικχέν μερικά παραδείγματα.

¹⁶ Κα μπορίνενας τι ατσσόν εργένια για κάποιος βακίτι. Σαρ βακερντάς ο Ιησούς, μερικά τζουβλιά τραμπίνενα μα τι παντρίνεν, ατζέ-ντα άμα ανταβά να ντικχίντιβελα σουκάρ λένγκε κουλτουράτε. (Ματθ. 19:10-12) Γιαβερά μπέκιμ ατσσιλέ εργένια επειδή ο πράγματα λένγκε ζωγιάτε αβιλέ αντικάς. Τι αβέν σίγουροι ότι ο Ιεχωβά ντα ο Ιησούς να αμντίνενα ότι, επειδή να ισινέν παντριμέ, να τθερένα αξία. Σαρό κο ντουνιάς, ο εργένια πφενιά ισί ευλογία ι κχανγκιριάκε. Επειδή μανγκένα ι γιαβερέν ντα πφαμπόνα λένγκε, αβένα σαρ πφενιά ντα νταγιά λένγκε.​—Διαβάνεν Μάρκος 10:​29, 30· 1 Τιμ. 5:2.

17. Σαρ μπορίνελα εκ πφεν τι προετοιμάντιβελ ακανά για την ολοχρόνια υπηρεσία;

¹⁷ Κα μπορίνενας τι αρχίνεν ι ολοχρόνια υπηρεσία. Ο πφενιά κερένα μπουτ πράγματα κο έργος σαρό κο ντουνιάς. (Ψαλμ. 68:11) Μπορίνενα τι κερέν σχέδια ακανά για τι αβέν κι ολοχρόνια υπηρεσία; Κα μπορίνενας τι αβέν σκαπάνισσες, τι τζαν κι οικοδόμηση ή κο Μπέθελ. Προσευχίντιβεν για το στόχος σο τσσουντέν. Κερέν λάφι γιαβερέντζαρ σο πετυχιντέ εκ ασακό στόχος ντα σικλιόν σο χρειαζίντιβελα τι κερέν για τι αβέν κι ολοχρόνια υπηρεσία. Σοράν, κερέν εκ σχέδιος σο κα βοηθίνελ-τουμέν τι πετυχίνεν-λες ανταβά. Άμα κα αβέν κι ολοχρόνια υπηρεσία, κα μπορίνεν τι κερέν γιαβερά-ντα μπουτ σουκάρ πράγματα ι Ιεχωβάσκε.

18. Σόσκε πρέπει τι τραμπίνελ εκ πφεν μπουτ προσεκτικά πι ρομές; (Ντικχέν ι φωτογραφία-ντα)

¹⁸ Μπορεί τι τραμπίνεν τι παντρίνεν. Ο ιδιότητες ντα ο πράγματα σο ντικχλάμ κα βοηθίνεν-τουμέν τι αβέν λατσσέ ρομνιά. Βέβαια, άμα σκεφτίνενα τι παντρίνεν, πρέπει τι τραμπίνεν τουμαρέ ρομές μπουτ προσεκτικά. Ανταγιά ισί εκ κατά πο σημαντικές αποφάσεις σο κα λεν  τουμαρέ ζωγιάτε. Ντεν-τουμέν γκοντί ότι ο ρομ σο κα λεν κα αβέλ τουμαρό σορό. (Ρωμ. 7:2· Εφεσ. 5:23, 33) Οτθάρ, πουτσέν-τουμέν: “Ισί ώριμος Χριστιανός; Τσσουβέλα ο πνευματικά πράγματα πρώτα πι ζωγιάτε; Λέλα γκοντιαβέρ αποφάσεις; Αγαβέλα πο λάθη; Σεβάνελα ι τζουβλίν; Κα μπορίνελ τι βοηθίνελ-μαν τι ατσσικιαράβ ζουρανί μι φιλία ι Ιεχωβάσαρ, τι ανέλ ο αναγκαία, ντα τι αβέλ εκ λατσσό αμάλ μάνγκε; Κερέλα λατσσές πο ευθύνες; Για παράδειγμας, σο διορισμούς τθερέλα κι κχανγκιρί ντα σαρ κερέλα-λεν;” (Λουκ. 16:10· 1 Τιμ. 5:8) Σίγουρα, άμα μανγκένα τι αρακχέν εκχέ λατσσέ ρομές, κα χρειαζίντιβελ τουμέν-ντα τι αβέν λατσσέ ρομνιά.

19. Σόσκε ισί τιμή ι ρομνιάκε τι αβέλ «βοηθός»;

¹⁹ Η Γραφή βακερέλα ότι η λατσσί ρομνί ισί «βοηθός» πι ρομέσκε ντα χάρη λάταρ ισί «σαστό». (Γέν. 2:18) Μήπως ανταβά να ντέλα αξία κι τζουβέλ; Νάα! Ισί τιμή ι ρομνιάκε τι αβέλ βοηθός. Ντεν-τουμέν γκοντί ότι ατζέ-ντα ο Ιεχωβά βακέρντιβελα «βοηθός» μπουτ φαρ κι Γραφή. (Ψαλμ. 54:4· Εβρ. 13:6) Η ρομνί ισί μπαγιά βοηθός πι ρομέσκε κάνα στηρίνελα-λες. Για παράδειγμας, κάνα βοβ λέλα αποφάσεις ι φαμιλιάκε, βόι συνεργαζίντιβελα λέσαρ για τι τζαν λατσσές λέσκε αποφάσεις. Ντα επειδή μανγκέλα ι Ιεχωβάς, κερέλα σο νακχέλα λάκε βαστέσταρ για τι βοηθίνελ πι ρομές τι τθερέλ εκ λατσσό ναβ. (Παρ. 31:11, 12· 1 Τιμ. 3:11) Μπορίνενα τι προετοιμάντιβεν ακανά για τι παντρίνεν άμα κα μπαριαρέν τουμαρί αγάπη ι Ιεχωβάσκε ντα κα βοηθίνεν ι γιαβερέν κο κχερ ντα κι κχανγκιρί.

20. Καβά λατσσιπέ μπορίνελα τι κερέλ εκ ντάι πι φαμιλιάκε;

²⁰ Μπέκιμ τι αβέν νταγιά. Αφού κα παντρίνεν, τουμέν ντα τουμαρό ρομ μπέκιμ τι κερέν τσσαβέν. (Ψαλμ. 127:3) Άρα, ισί γκοντιαβέρ τι σκεφτίνεν σαρ κα αβέν λατσσέ νταγιά. Ο ιδιότητες ντα ο πράγματα σο ντικχλάμ ανταλέ μαθημάστε κα βοηθίνεν-τουμέν άμα κα αβέν ρομνιά ντα νταγιά. Η αγάπη, ο λατσσιπέ ντα η υπομονή κα βοηθίνεν τουμαρί φαμιλί τι αβέλ χαρούμενη, ντα τουμαρέ τσσαβέν τι νιωθίνεν αρακχαντέ ντα ότι μανγκένα-λεν.​—Παρ. 24:3.

21. Σαρ νιωθίνασα αμαρέ πφενίνγκε, ντα σόσκε; (Ντικχέν ι φωτογραφία κι ανγκλαϊνί σελίδα)

²¹ Μανγκάσα-τουμέν, πφενιάλεν, σαρέ οντουλένγκε σο κερένα ι Ιεχωβάσκε ντα λέσκε λαόσκε. (Εβρ. 6:10) Μαρένα-τουμέν για τι μπαριαρέν ιδιότητες σο κερένα ι Ντεβλέσκο γκι, τι σικλιόν πράγματα σο κα βοηθίνεν εμ τουμέν εμ ι γιαβερέν ντα τι προετοιμάντιβεν για το ευθύνες σο μπορεί τι αβέν. Ισινέν μπαγιά πολύτιμες για την οργάνωση ι Ιεχωβάσκι!