1. Σο πρέπει τι κερέλ εκ μουρς σο ισί Χριστιανός για τι τθερέλ επιτυχία;

 Ο ΒΑΣΙΛΙΑΣ Δαβίδ βακερντάς κο Σολομώντας: «Τι αβές ζουρανό ντα τι σικάντιβες μουρς». (1 Βασ. 2:1-3) Σαρέ ο μουρσά σο ισί Χριστιανοί αντιβές ισί λατσσό τι κερέν-λες ανταβά. Για τι τθερέν επιτυχία, πρέπει τι σικλιόν τι ντεν καν κο νόμοι κι Ντεβλέσκε ντα τι κερέν ο αρχές ι Γραφιάκε σαρέ κο πράγματα πουμαρέ ζωγιάτε. (Λουκ. 2:52) Σόσκε ισί αζόμ σημαντικός τι αβέν ο τερνέ πφραλά ώριμοι Χριστιανοί;

2, 3. Σόσκε ισί σημαντικός τι αβέλ εκ τερνό πφραλ ώριμος Χριστιανός;

² Ο μουρς σο ισί Χριστιανός τθερέλα σημαντικές ευθύνες κι φαμιλί ντα κι κχανγκιρί. Πφραλάλεν σο ισινέν τερνέ, σίγουρα σκεφτιντέν ο ευθύνες σο κα μπορίνενας τι τθερέν κο μέλλον. Μπέκιμ τσσουντέν στόχος τι αβέν κι ολοχρόνια υπηρεσία, τι αβέν διακονικός υπηρέτης ντα πο σοράν πρεσβύτερος. Μπορεί επίσης τι μανγκέν τι παντρίνεν ντα τι κερέν τσσαβέν. (Εφεσ. 6:4· 1 Τιμ. 3:1) Για τι πετυχίνεν ανταλά στόχοι ντα τι τθερέν επιτυχία, πρέπει τι αβέν ώριμοι Χριστιανοί. b

³ Σο μπορίνελα τι βοηθίνελ-τουμέν τι αβέν ώριμοι Χριστιανοί; Χρειαζίντιβελα τι σικλιόν κάποια χρήσιμα πράγματα σο κα βοηθίνεν-τουμέν τουμαρέ ζωγιάτε. Οτθάρ, σο μπορίνενα τι κερέν ακανά για τι προετοιμάντιβεν για το ευθύνες σο μπορεί τι τθερέν κο μέλλον, ντα τι κερέν-λεν λατσσέ τροπόσαρ;

4. Κατέ μπορίνενα τι αρακχέν λατσσέ παραδείγματα για τι μοιάζεν λέντε; (Ντικχέν ι φωτογραφία-ντα)

⁴ Τραμπίνεν λατσσέ παραδείγματα για τι μοιάζεν λέντε. Η Αγία Γραφή ισί πφερντί λατσσέ παραδείγματα για τι μοιάζεν λέντε ο τερνέ μουρσά. Οντουλά μουρσά κατά πουρανέ μπρεσά μανγκένας ι Ντεβλές ντα τθερένας μπερεκέτι ευθύνες καζόμ αρακχαβένας λέσκε λαός. Μπορίνενα επίσης τι αρακχέν λατσσέ  παραδείγματα ώριμε μουρσένγκε τουμαρέ φαμιλιάτε ντα κχανγκιριάτε. (Εβρ. 13:7) Επίσης, τθερένα ο τέλειος παράδειγμας ι Ιησού Χριστόσκο. (1 Πέτρ. 2:21) Καζόμ σικλιαρένα-τουμέν προσεκτικά ανταλέ παραδειγματένταρ, σκεφτίνεν λένγκε μπουτ λατσσέ ιδιότητες. (Εβρ. 12:1, 2) Σοράν, αποφασίνεν σο κα κερέν για τι μοιάζεν οντουλέ μουρσέντε.

5. Σαρ κα σικλιόν τι τσσουβέν τουμαρί γκοντί τι κχελέλ, ντα σόσκε ανταβά ισί σημαντικός; (Ψαλμός 119:9)

⁵ Τι αβέν γκοντιαβέρ ντα τι τσσουβέν τουμαρί «γκοντί τι κχελέλ». (Παρ. 3:21) Κάνα εκ μουρς τσσουβέλα πι γκοντί τι κχελέλ, σκεφτίνελα προσεκτικά πριν τι αποφασίνελ σο κα κερέλ. Οτθάρ, μαρέν-τουμέν για τι σικλιόν τι κερέν-λες ανταβά ντα τι συνεχίνεν τι κερέν-λες. Σόσκε; Επειδή αντιβές, ο πο μπουτ τερνέ κο ντουνιάς κερένα οντουβά σο πακιάνα βον ότι ισί σωστός ή μουκχένα πουμαρέ συναισθήματα τι κερέν-λεν κουμάντος. (Παρ. 7:7· 29:11) Επίσης, η τηλεόραση, ο σιναμάδες, ο Ίντερνετ ντα ο κοινωνικά δίκτυα μπορίνενα τι επηρεάνεν ο τρόπος σο σκεφτίνενα ντα κερένα ο πράγματα. Αλλά σαρ κα τσσουβέν τουμαρί γκοντί τι κχελέλ; Πρώτον, σικλιόν μερικές αρχές ι Γραφιάκε ντα σκεφτίνεν σόσκε κα κερέν τουμένγκε λατσσιπέ. Σοράν, χρησιμοποιήνεν ανταλά αρχές για τι λεν αποφάσεις σο κα κερέν ι Ιεχωβάσκο γκι. (Διαβάνεν Ψαλμός 119:9) Άμα κα σικλιόν τι σκεφτίνεν ανταλέ τροπόσαρ, ανταβά κα βοηθίνελ-τουμέν μπουτ τι αβέν ώριμος Χριστιανός. (Παρ. 2:11, 12· Εβρ. 5:14) Ντικχέν ο λατσσιπέ σο κα λεν κάνα τσσουβένα τουμαρί γκοντί τι κχελέλ ντουέ περιπτωσιέντε: (1) κο τρόπος σο συμπεριφερίντιβενα κο πφενιά ντα (2) κο αποφάσεις σο λένα για το ιριαϊπέ ντα για την εμφάνιση τουμαρί.

6. Σόσκε εκ τερνό πφραλ κα σικαβέλ σεβασμός κο πφενιά άμα κα τσσουβέλ πι γκοντί τι κχελέλ;

⁶ Άμα κα τσσουβέν τουμαρί γκοντί τι κχελέλ, ανταβά κα βοηθίνελ-τουμέν τι σικαβέν σεβασμός κο τζουβλιά. Για παράδειγμας, ισί φυσιολογικός εκ τερνό πφραλ τι μανγκέλ τι γνωρίνελ πο λατσσές εκχέ πφενιά. Όμως, εκ τερνό σο τσσουβέλα πι γκοντί τι κχελέλ να βακερέλα, να γραφίνελα ντα να κερέλα τίποτα σο κα κερέλας ανταλέ πφενιά τι σκεφτίνελ ότι ενδιαφερίντιβελα λάκε άμα να τθερέλα σκοπός τι παντρίνελ λάσαρ. (1 Τιμ. 5:1, 2) Άμα νικιόλα ραντεβού εκχέ πφενιάσαρ, κα αρακχαβέλ λάκο ναβ κάνα να κα ατσσόλ ποτές κορκορό λάσαρ εκτός άμα τθερένα κάποιον παλά-πέστε.​—1 Κορ. 6:18.

7. Κάνα εκ τερνό πφραλ λέλα αποφάσεις για το ιριαϊπέ ντα για την εμφάνιση, σαρ κα βοηθίντιβελ άμα κα τσσουβέλ πι γκοντί τι κχελέλ;

 ⁷ Εκ γιαβέρ τρόπος για τι σικαβέλ εκ τερνό ότι τσσουβέλα πι γκοντί τι κχελέλ ισί τι λελ λατσσέ αποφάσεις για το ιριαϊπέ ντα για την εμφάνιση. Ο πο μπουτ τζενέ σο κερένα ντα διαφημίνενα ο σέα σο νικιόνα κι μόδα να σεβάνενα ι Ιεχωβάς ή κερένα μπίλατζανε πράγματα. Επειδή σκεφτίνενα μπίλατζανε τροπόσαρ, κερένα σέα σο ισί μπουτ στενά ή κερένα ι μουρσέν τι ντικχίντιβεν σαρ τζουβλιά. Κάνα αποφασίνελα σο κα ιρίλ, εκ τερνό σο σικλιόλα σαρ τι αβέλ ώριμος Χριστιανός κα ακολουθίνελ ο αρχές ι Γραφιάκε ντα κα μοιάζελ κο λατσσέ παραδείγματα κι κχανγκιρί. Μπορεί τι πουτσέλ πο νεαυτός: “Σικαβένα μο αποφάσεις ότι ισινόμ γκοντιαβέρ ντα ότι σκεφτίναβα ι γιαβερέν; Κάνα ο γιαβερά ντικχένα σαρ ιριαβάβα-μαν, ισί εύκολος λένγκε τι πακιάν ότι υπηρετίναβα μπαγιά ι Ντεβλές;” (1 Κορ. 10:31-33· Τίτο 2:6) Εκ τερνό σο τσσουβέλα πι γκοντί τι κχελέλ κα τθερέλ ο σεβασμός, όχι σάντε πι πφραλένγκο, αλλά πι Νταντέσκο-ντα σο ισί κο ουρανός.

8. Σαρ μπορίνελα εκ τερνό πφραλ τι σικλιόλ τι αβέλ μπεσαλής;

⁸ Τι αβέν μπεσαλήδες. Εκ τερνό πφραλ σο ισί μπεσαλής κερέλα προσεκτικά σαρέ πο ευθύνες. (Λουκ. 16:10) Ντικχέν ο τέλειος παράδειγμας ι Ιησούσκο. Να ισινέ ποτές εκ τζενό σο να προσοχίνελας. Ούτε ισινέ εκ τζενό σο να ντικχέλας σοβαρά πο ευθύνες. Οκιά μπάνταρ, κερέλας ο διορισμοί σο ντέλας-λες ο Ιεχωβά, ατζέ-ντα κάνα ανταβά ισινέ δύσκολος. Μανγκέλας ι τζενέν​—ειδικά πι μαθητέν​—ντα ντινάς αντράλ πι γκίσταρ πι ζωή λένγκε. (Ιωάν. 13:1) Τι μοιάζεν κο Ιησούς ντα τι μαρέν-τουμέν για τι κερέν σο-ντα διορισμός λένα. Άμα να ισινέν σίγουροι σαρ τι κερέν κάτι, τι αβέν ταπεινοί ντα τι μανγκέν βοήθεια κατά ώριμα πφραλά. Μα τι ερεσέλ-τουμέν τι κερέν ο πο χάνικ πράγματα κατά ευθύνες σο τθερένα. (Ρωμ. 12:11) Οκιά μπάνταρ, τι κερέν ντιπ τουμαρό διορισμός, καζόμ κερένα-λες ανταβά «ι Ιεχωβάσκε, ντα όχι ι τζενένγκε». (Κολ. 3:23) Όμως, να ισινέν τέλειοι. Οτθάρ, τι αγαβέν τουμαρέ όρια ντα τι δεχτίνεν ο λάθη σο μπέκιμ τι κερέν.​—Παρ. 11:2.

9. Σόσκε πρέπει εκ τερνό πφραλ τι σικλιόλ μερικά χρήσιμα πράγματα;

⁹ Για τι αβέν ώριμοι Χριστιανοί, πρέπει τι σικλιόν μερικά χρήσιμα πράγματα σο κα βοηθίνεν-τουμέν τουμαρέ ζωγιάτε. Ανταλά πράγματα κα βοηθίνεν-τουμέν τι λεν ευθύνες κι κχανγκιρί, τι ατσσικιαρέν εκ μπουτί για τι τθερέν ο αναγκαία τουμέν ή τουμαρί φαμιλί ντα τι αβέν λατσσέ αμαλά ι γιαβερέντζαρ. Ντικχέν μερικά ανταλέ πραγματένταρ.

10, 11. Κάνα εκ τερνό πφραλ τζανέλα τι διαβάνελ ντα τι γραφίνελ λατσσές, σαρ βοηθίντιβελα εμ βοβ εμ σαρί η κχανγκιρί; (Ψαλμός 1:1-3) (Ντικχέν ι φωτογραφία-ντα)

¹⁰ Σικλιόν τι διαβάνεν ντα τι γραφίνεν λατσσές. Η Γραφή βακερέλα ότι ο ευτυχισμέ ντα επιτυχιμέ τζενό ντέλα σαάτι κάθε ντιβές για τι διαβάνελ ο Λάφι ι Ντεβλέσκο ντα τι σκεφτίνελ-λες λατσσές. (Διαβάνεν Ψαλμός 1:1-3) Καζόμ διαβάνελα ι Γραφή κάθε ντιβές, σικλιόλα ο τρόπος σο σκεφτίνελα ο Ιεχωβά. Ανταβά κα  βοηθίνελ-λες τι σκεφτίνελ καθαρά ντα τι κερέλ λογικές σκέψεις. (Παρ. 1:3, 4) Η κχανγκιρί χρειαζίντιβελα ασακέ μουρσέν. Σόσκε;

¹¹ Αμαρέ πφραλά ντα πφενιά χρειαζίντιβενα ι βοήθεια μουρσένγκι σο μπορίνενα τι σικλιαρέν ντα τι ντεν συμβουλές κατά Γραφή. (Τίτο 1:9) Άμα διαβάνενα ντα γραφίνενα λατσσές, κα μπορίνεν τι ετοιμάνεν ομιλίες ντα απαντήσεις σο βοηθίνενα ι γιαβερέν ντα μπαριαρένα λένγκι πίστη. Επίσης, κα μπορίνεν τι ατσσικιαρέν λατσσέ σημειώσεις κάνα σικλιαρένα-τουμέν ντα κάνα ασουνένα ομιλίες κο συναθροίσεις ντα κο συνελεύσεις. Ανταλά σημειώσεις κα βοηθίνεν-τουμέν τι τθερέν πο ζουρανί πίστη ντα τι ντεν ζορ ι γιαβερέν.

12. Σο κα βοηθίνελ-τουμέν τι ασουνέν ντα τι κερέν λάφι λατσσές;

¹² Σικλιόν σαρ τι ασουνέν ντα τι κερέν λάφι λατσσές. Ο Χριστιανός πρέπει τι σικλιόλ τι κερέλ-λες ανταβά λατσσές. Ανταβά μανγκέλα τι βακερέλ τι ασουνέλ προσεκτικά ι γιαβερέν ντα τι αγαβέλ λένγκε σκέψεις ντα λένγκε αισθήματα. (Παρ. 20:5) Μπορίνελα τι σικλιόλ σο σκεφτίνελα ντα σαρ νιωθίνελα εκ τζενό κατά φωνή λέσκι, κατά εκφράσεις σο κερέλα πι μόσαρ ντα κατά κινήσεις σο κερέλα πι σωμάσαρ. Ναστί σικλιόνα τι κερέν-λες ανταβά άμα να νακχένα σαάτι ι γιαβερέντζαρ. Άμα κερένα λάφι συνέχεια αντράλ κατά Ίντερνετ, σαρ ισί ο e-mail ντα ο μηνύματα, ανταβά μπορεί τι κερέλ τουμένγκε δύσκολος τι κερέν λάφι ι γιαβερέντζαρ πασάλ. Οτθάρ, τι αρακχέν ευκαιρίες για τι κερέν λάφι ι γιαβερέντζαρ πασάλ.​—2 Ιωάν. 12.

13. Σο γιαβέρ πρέπει τι σικλιόλ εκ τερνό; (1 Τιμόθεο 5:8) (Ντικχέν ι φωτογραφία-ντα)

¹³ Σικλιόν τι νικαβέν ο αναγκαία. Εκ ώριμος Χριστιανός πρέπει τι μπορίνελ τι νικαβέλ ο αναγκαία πέσκε ντα πι φαμιλιάκε. (Διαβάνεν 1 Τιμόθεο 5:8) Μερικέ τθεμέντε, εκ τερνό πφραλ μπορίνελα τι σικλιόλ εκ μπουτί πι νταντέσταρ ή πι τζενένταρ. Γιαβερέ τθεμέντε, εκ τερνό μπορίνελα τι σικλιόλ εκ επάγγελμας κο λύκειος. Σαρ-ντα τι αβέν ο πράγματα, ισί λατσσό τι σικλιόν εκ χρήσιμος πράγμας σο κα βοηθίνελ-τουμέν τι αρακχέν μπουτί. (Πράξ. 18:2, 3· 20:34· Εφεσ. 4:28) Τι κερέν προσπάθεια για τι τθερέν ο ναβ ότι ισινέν μπουτιαρνέ ντα ότι μπιτισκιαρένα σο-ντα αρχίνενα. Αζομάν, κα αβέλ πο σίγουρος ότι κα αρακχέν εκ μπουτί ντα κα ατσσικιαρέν-λα. Ο ιδιότητες ντα ο χρήσιμα πράγματα σο ντικχλάμ ισί επίσης σημαντικά για τι μπορίνελ εκ Χριστιανός τι κερέλ μερικές ευθύνες σο κα αβέν. Για τι ντικχάς μερικές κατά ευθύνες ανταλά.

14. Σαρ μπορίνελα εκ τερνό πφραλ τι προετοιμάντιβελ για τι αρχίνελ ι ολοχρόνια υπηρεσία;

¹⁴ Ολοχρόνια υπηρεσία. Μπουτ ώριμοι Χριστιανοί αρχισάλε ι ολοχρόνια υπηρεσία κάνα  ισινέ τερνέ. Ο σκαπανικός βοηθίνελα εκχέ τερνές τι σικλιόλ τι συνεργαζίντιβελ λατσσές μπουτέ τζενέντζαρ σο τθερένα διαφορετικούς χαρακτήρες. Επίσης, βοηθίνελα-λες τι σικλιόλ σαρ τι χρησιμοποιήνελ πο λοβέ γκοντιάσαρ ντα μα τι χαλαβέλ πο μπουτ λοβέ οντουλένταρ σο νικαβέλα. (Φιλιπ. 4:11-13) Εκ λατσσό τρόπος για τι αρχίνελ κάποιος ι ολοχρόνια υπηρεσία ισί ο βοηθητικός σκαπανικός. Μπουτ τζενέ υπηρετίνενα για κάποιο βακίτι σαρ βοηθητικοί σκαπανείς, ντα ανταβά βοηθίνελα-λεν τι ετοιμάνεν-πες για τι αρχίνεν ο τακτικός σκαπανικός. Ο σκαπανικός μπορίνελα τι πουτρέλ τουμένγκε ο ντρομ για τι κερέν γιαβερά-ντα πράγματα κι ολοχρόνια υπηρεσία. Για παράδειγμας, κα μπορίνενας τι αβέν υπηρέτης οικοδόμησης ή Μπεθελίτης.

15, 16. Σαρ μπορίνελα εκ τερνό πφραλ τι τθερέλ ο προσόντα για τι υπηρετίνελ κι κχανγκιρί;

¹⁵ Διακονικός υπηρέτης ή πρεσβύτερος. Ο μουρσά σο ισί Χριστιανοί πρέπει τι τσσουβέν στόχος τι τθερέν ο προσόντα για τι υπηρετίνεν πουμαρέ πφραλέν ντα πφενίν σαρ πρεσβύτεροι. Η Γραφή βακερέλα ότι ο μουρσά σο μανγκένα ανταγιά ευθύνη “μανγκένα κάτι λατσσό”. (1 Τιμ. 3:1) Πριν τι αρχίνελ εκ πφραλ τι υπηρετίνελ σαρ πρεσβύτερος, πρέπει τι τθερέλ ο προσόντα για τι υπηρετίνελ σαρ διακονικός υπηρέτης. Ο διακονικοί υπηρέτες βοηθίνενα ι πρεσβυτερόν μπουτέ τροπόντζαρ. Εμ ο πρεσβύτεροι εμ ο διακονικοί υπηρέτες υπηρετίνενα ταπεινά πουμαρέ πφραλέν ντα πφενίν ντα κερένα έργος αντράλ πουμαρέ γκίσταρ. Ο τερνέ πφραλά μπορίνενα τι τθερέν ο προσόντα για τι υπηρετίνεν σαρ διακονικοί υπηρέτες ατζέ-ντα κάνα ισί από 17 μέχρι 19 μπρεσένγκε. Επίσης, εκ μπουτ λατσσό διακονικός υπηρέτης μπορίνελα τι διορίντιβελ πρεσβύτερος από 20 μπρεσένγκο.

¹⁶ Ο προσόντα για το διακονικοί υπηρέτες ντα για το πρεσβύτεροι υπαρχίντιβενα κι Γραφή ντα βασίντιβενα κι αγάπη σο τθερένα ι Ιεχωβάσκε, τουμαρέ φαμιλιάκε ντα ι κχανγκιριάκε. (1 Τιμ. 3:1-13· Τίτο 1:6-9· 1 Πέτρ. 5:2, 3) Σαρ μπορίνενα τι τθερέν ο προσόντα για το ευθύνες ανταλά; Προσπαθίνεν τι αγαβέν σο μανγκέλα τι βακερέλ ο κάθε εκ κατά προσόντα ανταλά. Προσευχίντιβεν κο Ιεχωβά για τι βοηθίνελ-τουμέν τι τθερέν ανταλά προσόντα. c

17. Σαρ μπορίνελα εκ τερνό πφραλ τι προετοιμάντιβελ για τι αβέλ ρομ ντα σορό ι φαμιλιάκο; (Ντικχέν ι φωτογραφία-ντα)

¹⁷ Ρομ ντα σορό ι φαμιλιάκο. Σαρ σικαντάς ο Ιησούς, μερικοί ώριμοι Χριστιανοί ατσσόνα εργένια. (Ματθ. 19:12) Όμως, άμα κα τραμπίνεν τι παντρίνεν, κα τθερέν πο μπουτ ευθύνες. Κα αβέν ρομ ντα σορό ι φαμιλιάκο. (1 Κορ. 11:3) Ο Ιεχωβά μπεκλεντίνελα κατά ρομ τι μανγκέλ πι  ρομνιά ντα τι ανέλ λάκε ο αναγκαία, τι αβέλ λατσσό αμάλ λάσαρ ντα τι βοηθίνελ-λα τι ατσσικιαρέλ ζουρανί πι φιλία ι Ιεχωβάσαρ. (Εφεσ. 5:28, 29) Ο ιδιότητες ντα ο χρήσιμα πράγματα σο ντικχλάμ πο οπρέ, σαρ ισί τι τσσουβέν τουμαρί γκοντί τι κχελέλ, τι σικαβέν σεβασμός κο τζουβλιά ντα τι αβέν μπεσαλήδες, κα βοηθίνεν-τουμέν άμα κα παντρίνεν. Κα αβέν λατσσέ προετοιμασμέ τι κερέν σωστά ο ευθύνες σο τθερέλα ο ρομ ντα ο σορό ι φαμιλιάκο.

18. Σαρ μπορίνελα εκ τερνό πφραλ τι προετοιμάντιβελ για τι αβέλ ντατ;

¹⁸ Ντατ. Κάνα κα παντρίνεν, μπέκιμ τι αβέν ντατ. Σο μπορίνενα τι σικλιόν κατά Ιεχωβά σο κα βοηθίνελ-τουμέν τι αβέν εκ λατσσό ντατ; Μπορίνενα τι σικλιόν μπουτ πράγματα. (Εφεσ. 6:4) Ο Ιεχωβά βακερέλας πι Τσσαβέσκε, ι Ιησούσκε, ότι μανγκέλας-λες ντα ότι βοβ κερέλας λέσκο γκι, χωρίς τι σακιντίνελ. (Ματθ. 3:17) Άμα κα αβέν ντατ, τι κερέν μπουτ φαρ τουμαρέ τσσαβέν τι αβέν σίγουρα ότι μανγκένα-λεν. Τι ισαρέν-λεν συχνά ι λατσσέ πραγματένγκε σο κερένα. Ο νταντά σο μοιάζενα κο Ιεχωβά βοηθίνενα πουμαρέ τσσαβέν τι αβέν ώριμα μουρσά ντα τζουβλιά. Μπορίνενα τι προετοιμάντιβεν από ακανά για τι αβέν εκ λατσσό ντατ, κάνα σικαβένα αγάπη κι φαμιλί ντα κι κχανγκιρί ντα κάνα φροντίνενα-λεν λατσσές. Ντα σικλιόν τι βακερέν λένγκε ότι μανγκένα-λεν ντα ότι ισί πολύτιμοι τουμένγκε. (Ιωάν. 15:9) Ανταβά κα βοηθίνελ-τουμέν τι αβέν εκ λατσσό ρομ ντα ντατ κο μέλλον. Μέχρι τι αβέλ-πες ανταβά, κα αβέν πολύτιμοι ι Ιεχωβάσκε ντα κα βοηθίνεν μπουτ τουμαρί φαμιλί ντα ι κχανγκιρί.

19, 20. Σο κα βοηθίνελ ι τερνέ πφραλέν τι αβέν ώριμοι Χριστιανοί; (Ντικχέν ι φωτογραφία κι ανγκλαϊνί σελίδα)

¹⁹ Πφραλάλεν σο ισινέν τερνέ, χρειαζίντιβελα προσπάθεια για τι αβέν ώριμοι Χριστιανοί. Χρειαζίντιβελα τι τραμπίνεν λατσσέ παραδείγματα για τι μοιάζεν λέντε, τι τσσουβέν τουμαρί γκοντί τι κχελέλ, τι αβέν μπεσαλήδες, τι σικλιόν χρήσιμα πράγματα σο κα βοηθίνεν-τουμέν τουμαρέ ζωγιάτε ντα τι προετοιμάντιβεν για το ευθύνες σο κα αβέν.

²⁰ Μπάζιμα, σαρέ ανταλά σο πρέπει τι κερέν μπορεί τι ντικχίντιβενα τουμένγκε σαρ βες. Αλλά μπορίνενα τι ντεν-λεν πέρα! Ντεν-τουμέν γκοντί ότι ο Ιεχωβά μανγκέλα μπουτ τι βοηθίνελ-τουμέν. (Ησ. 41:10, 13) Σίγουρα, εμ τουμαρέ πφραλά εμ τουμαρέ πφενιά κι κχανγκιρί κα βοηθίνεν-τουμέν. Κάνα κα αβέν ώριμοι Χριστιανοί, τουμαρί ζωή κα αβέλ σουκάρ ντα πφερντί. Μανγκάσα-τουμέν, πφραλάλεν σο ισινέν τερνέ! Μακάρι ο Ιεχωβά τι ευλογίνελ-τουμέν μπουτ, καζόμ μαρένα-τουμέν από ακανά για τι αβέν ώριμοι Χριστιανοί.​—Παρ. 22:4.