ΣΙΓΟΥΡΑ ισί τουμένγκε πολύτιμα ο διάφορα δώρα ι Ιεχωβάσκε, σαρ ισί η ελευθερία-ντα τι τραμπίνεν σο κα κερέν ντα αντικάς τι αποφασίνεν σαρ κα απολαμβάνεν ανταλά δώρα. Ισί ενδιαφέρον ότι η Αγία Γραφή βακερέλα ότι η μολ ισί δώρος ι Ντεβλέσκο ντα μάλιστα βακερέλα: «Ο μαντρό κερντιόλα για το ασαπέ, ντα η μολ κερέλα ι ζωή σουκάρ». (Εκκλ. 10:19· Ψαλμ. 104:15) Όμως, μάλλον ντικχλέν ότι μερικά τζενέ τθερένα προβλήματα ι μολιάσαρ. Επίσης, ο τζενέ σαρό κο ντουνιάς τθερένα διαφορετικές απόψεις ι μολιάκε. Οτθάρ, καβά πράγμας ισί γκοντιαβέρ ι Χριστιανόνγκε;

Κατέ-ντα τι τζουβντιάσα ή καλέ κουλτουράτε-ντα τι μπαριλάμ, άμα μουκχάσα κι άποψη κι Ντεβλέσκι τι οδηγίνελ αμαρό τρόπος σκέψης ντα αμαρέ αποφάσεις, ισί σίγουρος ότι κα ντικχάς λατσσιπέ σο κα ατσσικιαρέλ για πάντα.

Μπέκιμ ντικχλέν ότι μπουτ τζενέ κο ντουνιάς πίνα συχνά ντα μπουτ. Μερικοί μπέκιμ πίνα μολ επειδή βοηθίνελα-λεν τι χαλαρώνεν. Γιαβερά πίνα για τι νταϊντίνεν πουμαρέ προβλήματα. Ντα μερικέ τθεμέντε, ισί τζενέ σο πίνα για τι σικαβέν ότι τζανένα από ποτά ή ότι ισί ζουρανέ μουρσά.

Ο Χριστιανοί όμως τθερένα γκοντιαβέρ οδηγίες πουμαρέ λατσσέ Δημιουργόσταρ. Για παράδειγμας, βοβ προειδοποιηντάς-αμέν για το μπέτι αποτελέσματα σο ανέλα ο μπουτ πιπέ. Μπέκιμ τι διαβαντάμ κο εδάφια Παροιμίες 23:29-35 ι ιστορία εκχέ ματέ τζενέσκι ντα ο προβλήματα σο αβιλέ-πες. a Ο Ντάνιελ, εκ Χριστιανός πρεσβύτερος κι Ευρώπη, ντέλα-πες γκοντί σαρ ισινέ λέσκι ζωή πριν τι αβέλ αληθινός Χριστιανός. Βακερέλα: «Ο μπουτ πιπέ γκερντάς-μαν σε λάθος αποφάσεις ντα μπέτι πραγματέντε σο ατζέκ ατζέκ στεναχωρίνενα-μαν κάνα σκεφτίναβα-λεν».

Σαρ μπορίνενα ο Χριστιανοί τι χρησιμοποιήνεν ι ελευθερία σο τθερένα τι τραμπίνεν σο κα κερέν ντα τι νασέν κατά μπέτι αποτελέσματα σο ανέλα η μπουτ μολ; Ο μυστικός ισί τι μουκχάς κι άποψη κι Ντεβλέσκι τι οδηγίνελ αμαρό τρόπος σκέψης ντα οντουλά σο κεράσα.

Για τι ντικχάς ακανά σο βακερέλα η Αγία Γραφή ι μολιάκε ντα τι εξετάνας ο λόγους σο πίνα μερικά τζενέ.

Ο Λάφι ι Ντεβλέσκο να βακερέλα ότι ισί κακός τι πιλ εκ τζενό μολ με μέτρος. Μάλιστα, η Αγία Γραφή σικαβέλα ότι η μολ μπορεί τι αβέλ εκ σουκάρ εμπειρία εκχέ τζενέσκε. Διαβάνασα: «Τζα, χα το χαμπέ με χαρά ντα πι τι μολ τι γκίσαρ». (Εκκλ. 9:7) Ο Ιησούς πιλάς μολ σε κάποιες περιπτώσεις. Κάτι ασακό κερένας γιαβερά-ντα πιστοί υπηρέτες ι Ιεχωβάσκε.​—Ματθ. 26:27-29· Λουκ. 7:34· 1 Τιμ. 5:23.

Όμως, ο Λάφι ι Ντεβλέσκο, βακερέλα ξεκάθαρα ότι γιαβέρ ισί τι πιλ εκ τζενό χάνικ μολ ντα γιαβέρ ισί τι ματιόλ. Βακερέλα: «Μα τι ματιόν μολιάσαρ». (Εφεσ. 5:18) Μάλιστα, σικαβέλα ότι «οντουλά σο ματιόνα . . . να κα νακχέν κι Βασιλεία κι Ντεβλέσκι». (1 Κορ. 6:10) Βα, ο Ιεχωβά καταδικάνελα αυστηρά ο μπουτ πιπέ ντα ο ματιπέ. Αντίς απλώς τι κεράς οντουβά σο κερένα ο πο μπουτ τζενέ αμαρέ τθεμέστε, αμέν μανγκάσα τι τθεράς ι άποψη ι Ντεβλέσκι.

Κάποιοι αμντίνενα ότι μπορίνενα τι πιν μπουτ μολ χωρίς τι ματιόν. Ανταβά όμως ισί μπουτ επικίνδυνος. Η Γραφή βακερέλα ξεκάθαρα ότι, άμα εκχέ τζενές “κερέλα-λες κουμάντος η μπουτ μολ”, ανταβά μπορεί τι γκερέλ-λες σε σοβαρά λάθη ντα αντικάς τι χαλαβέλ ι φιλία σο τθερέλα ι Ιεχωβάσαρ. (Τίτο 2:3· Παρ. 20:1) Ο Ιησούς μάλιστα προειδοποιηντάς ότι ο μπουτ πιπέ μπορεί τι  εμποδίνελ εκχέ τζενές τι τζαλ κο νεβό ντουνιάς κι Ντεβλέσκο. (Λουκ. 21:34-36) Οτθάρ, σο κα βοηθίνελ εκχέ τζενές τι νασέλ κατά παγίδες σο ισί εύκολος τι περέλ κάποιος κάνα πίλα;

Κάνα πρέπει τι λας αποφάσεις ι μολιάκε, ισί επικίνδυνος τι σκεφτίνας απλώς σο κερένα ο πο μπουτ τζενέ αμαρέ κουλτουράτε. Ο Χριστιανοί τραμπίνενα γκοντιάσαρ τι ανέν χαρά κο Ιεχωβά με το αποφάσεις σο λένα ι χαμπέσκε ντα ι μολιάκε. Η Γραφή βακερέλα αμένγκε: «Είτε χάνα είτε πίνα ή σο-ντα γιαβέρ κερένα, τι κερέν τα πάντα για τι ντιντιόλ δόξα κο Ντεβέλ». (1 Κορ. 10:31) Πο τελέ ισί μερικά ερωτήματα ντα αρχές ι Γραφιάκε σο ισί λατσσό τι εξετάνας:

Μήπως πιάβα μολ για μα τι ξεχωρίναβ κατά γιαβερά; Ο εδάφιος Έξοδος 23:2 βακερέλα: «Δεν πρέπει τι ακολουθίνες ι μπουτέν». Ατθέ ο Ιεχωβά βακερντάς κο Ισραηλίτες μα τι ακολουθίνεν ι τζενέν σο να κερένας ο γκι ι Ιεχωβάσκο. Ανταγιά συμβουλή ισί ι Χριστιανόνγκε-ντα αντιβές. Άμα μουκχάσα κο τζενέ σο ισί ντονταλάι αμένταρ τι επηρεάνεν αμαρό τρόπος σκέψης ντα αμαρέ αποφάσεις σο τθερένα τι κερέν ι μολιάσαρ, μπορεί τελικά τι τσσίντας-αμέν ντουρ κατά Ιεχωβά ντα κατά κανόνες λέσκε.​—Ρωμ. 12:2.

Μήπως πιάβα μολ για τι σικαβάβ καζόμ ζουρανό ισινόμ; Μερικέ τθεμέντε, ισί συνηθισμέ ντα νανέ κακός τι πιλ εκ τζενό μολ συχνά ντα μπουτ. (1 Πέτρ. 4:3) Ντικχέν όμως ι συμβουλή σο ντέλα-αμέν ο εδάφιος 1 Κορινθίους 16:13: «Τι αβέν τζανγκαντέ, τι ατσσόν σταθεροί κι πίστη, τι τθερέν θάρρος, τι αβέν ζουρανέ». Μπορίνελα μπαγιά η μολ τι βοηθίνελ εκχέ τζενές τι αβέλ ζουρανό; Όχι, κερέλα ακριβώς ο αντίθετος. Η μολ μπορίνελα εύκολα τι κερέλ εκχέ τζενές μα τι σκεφτίνελ καθαρά ντα μα τι λελ λατσσέ αποφάσεις. Άρα, αντίς ο πιπέ τι σικαβέλ ότι εκ τζενό ισί ζουρανό σικαβέλα ακριβώς ο αντίθετος, ότι ισί μπίζουρανο. Ο εδάφιος Ησαΐας 28:7 σικαβέλα σαρ ισί ο τζενό σο λέλα λάθος αποφάσεις ιτιρί κατά μολ. Βακερέλα ότι τζάλα εκ ακατάρ εκ οκουτάρ ντα περέλα.

Η αληθινή ζορ αβέλα κατά Ιεχωβά ντα για τι τθεράς-λα πρέπει τι αβάς τζανγκαντέ ντα τι ατσσάς σταθεροί κι πίστη. (Ψαλμ. 18:32) Κεράσα-λες ανταβά κάνα αρακχαβάσα-αμέν κατά κίνδυνοι ντα λάσα αποφάσεις σο να κα κερέν ζιάνι κι φιλία σο τθεράσα ι Ιεχωβάσαρ. Ο Ιησούς σικαντάς  ασακί ζορ κάνα ισινέ κι πφουβ, ντα μπουτ τζενέ σεβάνενας-λες επειδή ισινέ μπίνταρανο ντα αποφασισμέ τι κερέλ ο σωστός.

Μήπως πιάβα για τι μπιστράβ μο προβλήματα; Εκ ψαλμωδός γραφιντάς ι Ντεβλέσκε πνευμάσαρ: «Κάνα μο ανησυχίες τασαντέ-μαν, τούι [Ιεχωβά] λοκχιαρντάν ντα γαλιντάν μο γκι». (Ψαλμ. 94:19) Άμα τασαβένα-τουμέν ο προβλήματα, μουκχέν ι Ιεχωβάς τι λοκχιαρέλ-τουμέν, όχι ι μολ. Εκ λατσσό τρόπος για τι κερέν-λες ανταβά ισί τι προσευχίντιβεν πο μπουτ φαρ κο Ιεχωβά. Επίσης, μπουτ τζενέ τθερένα ντικχλό ότι ισί λατσσό τι μανγκέν συμβουλές εκχέ αμαλέσταρ κι κχανγκιρί σο ισί ώριμος. Κι πραγματικότητα, άμα κάποιος πίλα για τι ντελ πέρα ο προβλήματα, ανταβά μπορεί τι κερέλ-λες μα τι αβέλ αποφασισμέ τι κερέλ ο σωστός. (Ωσηέ 4:11) Ο Ντάνιελ βακερντάς: «Τθεράβας μπουτ άγχος ντα χάνας-μαν ο τύψεις. Πιάβας για τι νταβ-λεν πέρα, αλλά ο προβλήματα αβγατίντιβενας, ντα χασαρντόμ εμ μι αμαλέν εμ ο σεβασμός σο τθεράβας μι νεαυτόσκε». Σο βοηθιντάς τελικά τον Ντάνιελ; Βακερντάς: «Αγαντόμ ότι οντουβά σο χρειαζίντιβαβας πασέ μάντε ισινέ ο Ιεχωβά, όχι η μολ. Μπορισάλομ τελικά τι νταβ πέρα μο προβλήματα ντα τι νακχαβάβ-λεν». Ο Ιεχωβά ισί πάντα οτθέ για τι βοηθίνελ-αμέν, ατζέ-ντα άμα ο πράγματα ντικχίντιβενα μπουτ δύσκολα.​—Φιλιπ. 4:6, 7· 1 Πέτρ. 5:7.

Άμα πίνα μπάζιμα μολ, κα μπορίνενας τι πουτσέν-τουμέν: “Μήπως κάποιος μι φαμιλιάταρ ή εκ λατσσό αμάλ βακερντάς μάνγκε ότι ανησυχίνελα επειδή πιάβα;” Άμα βα, ανταβά μπέκιμ σικαβέλα ότι ο πιπέ αρχισάλο τι αβέλ τουμένγκε συνήθεια ή τι αβέλ πρόβλημας χωρίς τι αγαβέν-λες τουμέν. “Μήπως πιάβα πο μπουτ από ό,τι ανγκλέ;” Άμα βα, ανταβά μπέκιμ σικαβέλα ότι, παρόλο σο εκ τζενό να κολλισάλο ατζέκ ι μολιάσαρ, άμα κα συνεχίνελ τι πιλ μπορεί τι αβέλ αλκοολικός. “Μήπως δυσκολίντιβαβα τι ατσσάβ μπι-μολιάκο χάνικ ντιβεσά ή πο μπουτ;” Άμα βα, μάλλον ο πιπέ αβιλό τουμένγκε μπαρί συνήθεια, ή ατζέ-ντα τι κολλισάλεν λέσαρ. Ανταβά μπέκιμ μανγκέλα τι βακερέλ ότι κα χρειαζίντιβεν βοήθεια κατά γιατρός για τι αντιμετωπίνεν ο πρόβλημας.

Επειδή ο πιπέ μπορίνελα τι ανέλ μπουτ προβλήματα, μερικοί Χριστιανοί τραμπιντέ μα τι πιν ιτς.  Γιαβερά μπέκιμ να πίνα απλώς επειδή να μπεϊντίνενα η γεύση. Άμα εκ αμάλ τουμαρό τραμπιντάς μα τι πιλ ιτς, μπορίνενα τι σικαβέν λατσσιπέ άμα κα σεβάνεν λέσκι απόφαση ντα να κα κρίνεν-λες.

Μπορεί επίσης τι αγαντέν ότι ισί γκοντιαβέρ τι τσσουβέν μερικά όρια τουμαρέ νεαυτόστε. Εκ Χριστιανός μπορεί τι τσσουβέλ όριος καζόμ μολ κα πιλ. Ή μπορεί τι τσσουβέλ εκ κανόνας καζόμ συχνά κα πιλ, μπέκιμ εκ φαρ κι εβδομάδα ή με μέτρος κάνα χάλα. Γιαβερά τραμπιντέ μα τι πιν ιτς μερικά μολιά. Για παράδειγμας, τραμπιντέ ότι κα πιν μολ ή μπίρα με μέτρος, αλλά να κα πιν ζουρανέ μολιά, ούτε κα τσσουβέν-λεν αντρέ κο κοκτέιλ. Άμα εκ τζενό τσσουντάς ξεκάθαρα όρια, κα αβέλ λέσκε πο εύκολος τι κερέλ-λεν. Άμα εκ ώριμος Χριστιανός τραμπιντάς κάτι ασακό ντα ισί αποφασισμέ τι ατσσόλ σταθερός ανταλέστε, δεν πρέπει τι λατζάλ.

Κάνα λάσα αποφάσεις ι πιμάσκε πρέπει επίσης τι σκεφτίνας σαρ νιωθίνενα ο γιαβερά. Ο εδάφιος Ρωμαίους 14:21 βακερέλα: «Πο λατσσές μα τι χας μας ούτε τι πις μολ ούτε τι κερές τίποτα σο κα μπορίνελας τι κερέλ τι πφραλές τι χασαρέλ πι πίστη». Σαρ μπορίνενα τι κερέν ανταγιά συμβουλή; Τι σικαβέν αγάπη τουμαρέ πφραλένγκε. Άμα αμντίνενα ότι κάποιος μπορεί τι ενοχλίντιβελ άμα κα πιν μολ, η αγάπη κα τσσίντελ-τουμέν μα τι πιν κι περίπτωση οντιά. Αντικάς σικαβένα ότι πφαμπόνα ι γιαβερένγκε ντα σεβάνενα-λεν, ντα ότι ντικχένα λένγκο συμφέρον, όχι τουμαρό.​—1 Κορ. 10:24.

Επίσης, η κυβέρνηση μπέκιμ τσσουντάς νόμους ι πιμάσκε. Σίγουρα, εκ Χριστιανός πρέπει τι ντελ καν κο νόμοι ανταλά. Μπέκιμ ισί νόμοι σο βακερένα καλέ ηλικιάταρ μπορίνελα τι αρχίνελ τι πιλ εκ τζενό μολ. Ή ανταλά νόμοι μπέκιμ να μουκχένα τι πιλ κάποιος κάνα ισί τι οδηγίνελ ή τι χρησιμοποιήνελ μερικά μηχανήματα.​—Ρωμ. 13:1-5.

Ο Ιεχωβά ντινάς-αμέν μπερεκέτι σουκάρ δώρα, ντα εκ ανταλένταρ ισί η ελευθερία τι τραμπίνας σαρ κα χρησιμοποιήνας ανταλά δώρα. Για παράδειγμας, ντέλα-αμέν ι ελευθερία τι τραμπίνας σο κα χας ντα σο κα πιας. Μακάρι οντουλά σο τραμπίνασα τι σικαβέν ότι ισί αμένγκε πολύτιμη ανταγιά ελευθερία καζόμ χρησιμοποιήνασα-λα για τι κεράς ο γκι αμαρέ Νταντέσκο σο ισί κο ουρανός.