1, 2. Σο πρέπει τι κερέν ο νταντά ντα ο νταγιά κάνα λένγκε τσσαβέ κερένα ερωτήσεις οντουλένγκε σο πακιάσα;

 ΜΠΟΥΤ τζενέ κα βακερένας ότι ο νταντά ντα ο νταγιά κερένα μπουτ μπουτί πουμαρέ τσσαβέντζαρ για τι μπαριαρέν-λεν. Άμα τθερένα χουρντέ τσσαβέν, ισαράσα-τουμέν σο μαρένα-τουμέν για τι βοηθίνεν-λεν τι μπαριαρέν πουμαρί πίστη. (Δευτ. 6:6, 7) Καζόμ τουμαρέ τσσαβέ μπαριόνα, μπέκιμ αρχίνενα τι κερέν ερωτήσεις οντουλένγκε σο πακιάσα, σαρ για παράδειγμας σόσκε ο Ιεχωβά να μανγκέλα τι κεράς κάποια πράγματα.

² Κι αρχή, μπέκιμ τι αγχώντιβενα κατά ερωτήσεις τουμαρέ τσσαβένγκε. Ή μπέκιμ τι αμντίνενα ότι ασακέ ερωτήσεις σικαβένα ότι να τθερένα ζουρανί πίστη. Αλλά, καζόμ μπαριόνα, ο τσσαβέ μανγκένα τι κερέν ερωτήσεις για τι μπαριαρέν πουμαρί πίστη. (1 Κορ. 13:11) Οτθάρ, μα νταρέν. Κάνα ο τσσαβέ κερένα ερωτήσεις οντουλένγκε σο πακιάσα, τουμέν μπορίνενα τι βοηθίνεν-λεν τι σικλιόν τι σκεφτίνεν πο αχόρτ.

3. Σο κα ντικχάς ανταλέ μαθημάστε;

³ Ανταλέ μαθημάστε, κα ντικχάς σαρ μπορίνενα ο νταντά ντα ο νταγιά τι βοηθίνεν πουμαρέ τσσαβέν (1) τι μπαριαρέν πουμαρί πίστη κο Ντεβέλ ντα κι Γραφή, (2) τι αγαβέν σόσκε ισί λατσσό λένγκε τι ντεν καν κο πάκι κανόνες κι Γραφιάκε ντα (3) τι υπερασπίνεν οντουλά σο πακιάνα. Καζόμ κεράσα-λες ανταβά, κα ντικχάς επίσης σόσκε ισί λατσσό τι κερέν ο τσσαβέ ερωτήσεις, ντα κάποια πράγματα σο μπορίνενα τι κερέν σαρ φαμιλί, σο κα ντεν κο νταντά ντα κο νταγιά ι ευκαιρία τι κερέν λάφι οντουλένγκε σο πακιάσα.

ΒΟΗΘΙΝΕΝ ΤΟΥΜΑΡΕ ΤΣΣΑΒΕΝ ΤΙ ΜΠΑΡΙΑΡΕΝ ΠΟΥΜΑΡΙ ΠΙΣΤΗ

4. Σο μπέκιμ τι πουτσέν ο τσσαβέ, ντα σόσκε;

⁴ Ο νταντά ντα ο νταγιά σο ισί Χριστιανοί αγαβένα ότι η πίστη κο Ντεβέλ νανέ κληρονομική. Τουμέν να μπιάντιλεν με πίστη  κο Ιεχωβά. Αντικάς τουμαρέ τσσαβέ-ντα. Οντουλέσκε, ο τσσαβέ μπέκιμ τι αρχίνεν τι πουτσέν: “Σαρ τζανάβα ότι υπαρχίντιβελα Ντεβέλ; Μπορίναβα μπαγιά τι πακιάβ ανταλά σο βακερέλα η Γραφή;” Η Γραφή βακερέλα ότι ισί λατσσό τι χρησιμοποιήνας “σαρί αμαρί γκοντί” ντα “τι ρόντας σαρέ ο πράγματα για τι ντικχάς άμα ισί σωστά”. (Ρωμ. 12:1· 1 Θεσ. 5:21) Αλλά σαρ μπορίνενα τι βοηθίνεν τουμαρέ τσσαβέν τι μπαριαρέν πουμαρί πίστη;

5. Σαρ μπορίνενα ο νταντά ντα ο νταγιά τι βοηθίνεν πουμαρέ τσσαβέν τι μπαριαρέν πουμαρί μπέσα κι Αγία Γραφή; (Ρωμαίους 12:2)

⁵ Βοηθίνεν τουμαρέ τσσαβέν τι αρακχέν αποδείξεις ότι ανταλά σο βακερέλα η Γραφή ισί μπαγιά. (Διαβάνεν Ρωμαίους 12:2) Κάνα τουμαρέ τσσαβέ κερένα ερωτήσεις, ασταρέν ι ευκαιρία για τι σικαβέν λένγκε σαρ τι αρακχέν ο απαντήσεις αντράλ κατά εργαλεία για τι ρόντας. Για παράδειγμας, μπορίνενα τι βοηθίνεν-λεν τι ρόντεν θέματα ντα βίντεα κο jw.org για τι αρακχέν αποδείξεις ότι η Αγία Γραφή νανέ σάντε εκ λατσσό βιβλίος σο γραφίντιλο τζενένταρ. Οκιά μπάνταρ, ισί «ο λάφι ι Ντεβλέσκο». (1 Θεσ. 2:13) Για παράδειγμας, ο τσσαβέ κα μπορίνενας τι ρόντεν για την Νινευή, σο ισινέ εκ πουρανί ασσυριακή πόλη. Ανγκλέ, μερικά σπουδαγμέ τζενέ σο ασχολίντιβενας ι Γραφιάσαρ βακερένας ότι ανταγιά πόλη να υπαρχίντιβελας μπαγιά. Αλλά πασέ κο 1850, ο ειδικοί αρακχλέ ι πουρανί πόλη Νινευή, ντα αντικάς σικάντιλο ότι η Γραφή ισινέ σωστή. (Σοφ. 2:13-15) Για τι σικλιόν σαρ νικίστιλε μπαγιά προφητείες ι Γραφιάκε κάνα καταστραφισάλι η Νινευή, ο τσσαβέ κα μπορίνενας τι ντικχέν ο θέμας «Τζανένας-λες;» κι Σκοπιά Νοέμβριος 2021. Βοηθίνεν τουμαρέ τσσαβέν τι συγκρίνεν ανταλά σο σικλιόνα κατά έντυπα αμαρέ, οντουλέντζαρ σο σικλιόνα κατά γιαβερά βιβλία σο μπορίνενα τι ντεν λένγκε μπέσα. Ανταβά κα μπαριαρέλ λένγκι πίστη οντουλέντε σο βακερέλα η Γραφή.

6. Σαρ μπορίνενα ο νταντά ντα ο νταγιά τι βοηθίνεν πουμαρέ τσσαβέν τι ντικχέν αποδείξεις ότι η Γραφή ισί σωστή; Βακερέν εκ παράδειγμας. (Ντικχέν ι φωτογραφία-ντα)

⁶ Βοηθίνεν τουμαρέ τσσαβέν τι ντικχέν αποδείξεις ότι η Γραφή ισί σωστή. Ο νταντά ντα ο νταγιά τθερένα μπουτ ευκαιρίες για τι κερέν λάφι πουμαρέ τσσαβέντζαρ ι Γραφιάκε ή ι Ντεβλέσκε. Μπέκιμ τι τθερέν ασακέ ευκαιρίες κάνα τζάνα σε εκ μουσείος, εκ πάρκος ή εκ έκθεση κο Μπέθελ. Για παράδειγμας, κάνα ντικχένα εκ μουσείος, είτε πασάλ είτε κατά Ίντερνετ, κα μπορίνενας τι σικαβέν τουμαρέ τσσαβένγκε εκ πράγμας ή εκ ιστορία σο τθερέλα σχέση ι Γραφιάσαρ. Ανταβά μπορίνελα τι βοηθίνελ-λεν τι ντικχέν ότι ανταλά σο βακερέλα η Γραφή ισί σωστά. Μπορίνενα τι σικαβέν τουμαρέ τσσαβένγκε ι Μωαβιτική Λίθος. Ανταγιά πλάκα ισί 3.000 μπρεσένγκι ντα ισί γραμμέ οπρά-λάτε ο ναβ ι Ντεβλέσκο.  Η Μωαβιτική Λίθος ισί κο Μουσείος του Λούβρου κο Παρίσι. Επίσης, εκ αντίγραφος της Μωαβιτικής Λίθου ισί κι έκθεση «Η Αγία Γραφή και το Θεϊκό Όνομα» κο Παγκόσμια Κεντρικά Γραφεία ι Ιεχωβάσκε Μαρτυρένγκε κο Γουόργουικ, κι Νέα Υόρκη. Η Μωαβιτική Λίθος σικαβέλα ότι ο βασιλιάς Μησά κατά Μωάβ γκιλό κόντρα κο Ισραήλ. Ανταβά ταιριάνελα ι Γραφιάσαρ. (2 Βασ. 3:4, 5) Κάνα τουμαρέ τσσαβέ ντικχένα πουμαρέ γιακχίντζαρ αποδείξεις ότι η Αγία Γραφή ισί αληθινή ντα σωστή, λένγκι πίστη κα αβέλ πο ζουρανί.​—Ντικχέν 2 Χρονικών 9:6.

7, 8. (α) Σο σικλιάσα κατά σουκάρ σχέδια σο ντικχάσα κι φύση; Βακερέν εκ παράδειγμας. (Ντικχέν ι φωτογραφία-ντα) (β) Καλά ερωτήσεις μπορίνενα τι βοηθίνεν τουμαρέ τσσαβέν τι μπαριαρέν πουμαρί πίστη Οντουλέστε σο κερντάς-λεν σαρέ;

⁷ Βοηθίνεν τουμαρέ τσσαβέν τι σκεφτίνεν ο πράγματα σο λατσσαρντάς ο Ιεχωβά. Κάνα πφιρένα αβρί κι φύση ή κερένα μπουτιά κο κήπος τουμαρό, βοηθίνεν τουμαρέ τσσαβέν τι ντικχέν ο μπουτ σουκάρ σχέδια σο υπαρχίντιβενα κι φύση. Σόσκε; Ανταλά σχέδια σικαβένα ότι Οντουβά σο κερντάς-λεν ισί μπουτ γκοντιαβέρ. Για παράδειγμας, ισί μερικά σχέδια σο μοιάζενα με το σχέδιος σο τθερέλα ο σαλιγκάρι. Ο επιστήμονες ρόντενα ανταλά σχέδια μπουτ μπρεσά. Ο επιστήμονας Νίκολα Φαμέλι βακερέλα ότι, κάνα γκινένα καζόμ στροφές τθερέλα εκ ασακό σχέδιος κι φύση, κα αρακχέν ότι ο αριθμοί σο τθερένα ο στροφές, ακολουθίνενα εκ συγκεκριμέ σειρά. Ανταγιά σειρά βακέρντιβελα ακολουθία Φιμπονάτσι. a Ασακέ σχέδια ντικχάσα-λεν σε μπουτ πράγματα, σαρ ισί κο σχέδιος σο τθερένα μερικοί γαλαξίες, κο καβούκι σο τθερέλα ο σαλιγκάρι, κο φύλλα κι λουλουδίνγκε ντα κο ηλίανθος. b

⁸ Κο σχολείος, τουμαρέ τσσαβέ μπέκιμ τι σικλιόν γιαβερά-ντα σχέδια σο ισί κι φύση. Για παράδειγμας, κο πο μπουτ δέντρα ντικχάσα ο ίδια σχέδια πάλι ντα πάλι. Ο κορμός χωρίντιβελα σε μπαρέ κλαδιά, ο μπαρέ κλαδιά χωρίντιβενα σε πο χουρντέ κλαδιά, ντα ο πο χουρντέ κλαδιά χωρίντιβενα σε κλαδάκια. Ανταλά σχέδια αρακχάσα-λεν μπουτ φαρ κι φύση. Αλλά κον σκεφτιντάς ανταλά σουκάρ σχέδια; Κον δημιουργιντάς σαρέ ο σουκάρ πράγματα κι φύση; Καζόμ πο μπουτ σκεφτίνενα τουμαρέ τσσαβέ ασακέ ερωτήσεις, αζόμ πο σίγουρος ισί ότι κα μπορίνεν τι μπαριαρέν πουμαρί πίστη ότι ο Ντεβέλ κερντάς-λεν σαρέ. (Εβρ. 3:4) Καζόμ μπαριόνα, κα μπορίνενας τι πουτσέν-λεν: «Άμα δημιουργιντάς-αμέν ο Ντεβέλ, νανέ λογικός τι σκεφτίνας ότι βοβ τζανέλα πο λατσσές σο πρέπει τι κεράς για τι αβάς ευτυχισμέ;» Σοράν, μπορίνενα τι βακερέν ότι ο Ντεβέλ ντινάς-αμέν ι Γραφή για τι σικαβέλ αμένγκε σαρ τι αβάς ευτυχισμέ.

 ΒΟΗΘΙΝΕΝ ΤΟΥΜΑΡΕ ΤΣΣΑΒΕΝ ΤΙ ΑΓΑΒΕΝ Ο ΛΑΤΣΣΙΠΕ ΣΟ ΑΒΕΛΑ ΚΑΤΑ ΠΑΚΙ ΚΑΝΟΝΕΣ Ι ΓΡΑΦΙΑΚΕ

9. Σόσκε μπέκιμ τουμαρέ τσσαβέ μα τι αβέν σίγουροι για το πάκι κανόνες ι Γραφιάκε;

⁹ Άμα τουμαρέ τσσαβέ νανέ σίγουροι ότι ο πάκι κανόνες ι Γραφιάκε ισί λατσσέ, προσπαθίνεν τι αγαβέν σόσκε νιωθίνενα αντικάς. Ο πρόβλημας ισί ότι να πακιάνα ότι οντουλά σο βακερέλα η Γραφή ισί σωστά; Ή απλά να τζανένα σαρ τι εξηγίνεν ανταλά σο πακιάνα κο γιαβερά; Σαρ-ντα τι αβέν ο πράγματα, μπορίνενα τι βοηθίνεν τουμαρέ τσσαβέν τι αγαβέν σόσκε ο πάκι κανόνες ι Γραφιάκε ισί λένγκε λατσσιμάσκε, καζόμ κερένα μελέτη κατά βιβλίος Μπουτ Σουκάρ Ζωή για Πάντα! c

10. Σαρ μπορίνενα τι βοηθίνεν τουμαρέ τσσαβέν τι σκεφτίνεν σαρ κα αβέν λατσσέ αμαλά ι Ιεχωβάσαρ;

¹⁰ Βοηθίνεν τουμαρέ τσσαβέν τι ντικχέν πολύτιμη ι φιλία σο τθερένα ι Ιεχωβάσαρ. Κάνα κερένα μελέτη κατά Γραφή τουμαρέ τσσαβέντζαρ, χρησιμοποιήνεν ο ερωτήσεις ντα ο παραδείγματα σο ισί κο βιβλίος Μπουτ Σουκάρ Ζωή για Πάντα! για τι αγαβέν σαρ νιωθίνενα. (Παρ. 20:5) Για παράδειγμας, ο μάθημας 8 μοιασκιαρέλα ι Ιεχωβάς εκχέ λατσσέ αμαλέσαρ σο ανέλα αμαρέ γκοντιάτε πράγματα σο αρακχαβένα-αμέν ντα βοηθίνενα-αμέν. Κάνα κα συζητίνεν ο εδάφιος 1 Ιωάννη 5:3, σοράν κα μπορίνενας τι πουτσέν: «Αφού τζανάσα ότι ο Ιεχωβά ισί εκ ασακό λατσσό Αμάλ, σαρ πρέπει τι ντικχάς ανταλά σο βακερέλα αμένγκε τι κεράς;» Ανταγιά ερώτηση μπέκιμ τι ντικχίντιβελ απλή, αλλά κα μπορίνελας τι βοηθίνελ τουμαρέ τσσαβέν τι αγαβέν ότι ο Ιεχωβά τσσουβέλα αμένγκε νόμους επειδή μανγκέλα-αμέν.​—Ησ. 48:17, 18.

11. Σαρ μπορίνενα τι βοηθίνεν τουμαρέ τσσαβέν τι αγαβέν σόσκε ισί λατσσό λένγκε τι ντεν καν κο αρχές κι Γραφιάκε; (Παροιμίες 2:10, 11)

¹¹ Τι συζητίνεν σαρ βοηθίνενα-αμέν ο αρχές ι Γραφιάκε κάνα κεράσα-λεν αμαρέ ζωγιάτε. Κάνα διαβάνενα γιεκ ι Γραφή ή ο εδάφιος ι ντιβεσέσκο, τι συζητίνεν σαρ ο αρχές ι Γραφιάκε βοηθιντέ τουμαρί φαμιλί. Για παράδειγμας, αγαβένα τουμαρέ τσσαβέ καζόμ λατσσό ισί τι κεράς προσεκτικά αμαρί μπουτί ντα τι αβάς τίμιοι; (Εβρ. 13:18) Κα μπορίνενας επίσης τι βακερέν ότι κάνα κεράσα ο αρχές ι Γραφιάκε τθεράσα πο λατσσί υγεία ντα ισινάμ πο ευτυχισμέ. (Παρ. 14:29, 30) Κάνα συζητίνενα ασακέ αρχές, τουμαρέ τσσαβέ κα αγαβέν σόσκε ισί λατσσό λένγκε τι ντεν καν κο συμβουλές κι Γραφιάκε ατζέ πο μπουτ.​—Διαβάνεν Παροιμίες 2:10, 11.

12. Σαρ βοηθίνελα εκ ντατ πι τσσαβές τι αγαβέλ καζόμ λατσσό ισί τι ντελ καν κο αρχές κι Γραφιάκε;

¹² Ο Στιβ, εκ ντατ κι Γαλλία, βακερέλα σαρ βοβ ντα λέσκι ρομνί βοηθίνενα πουμαρέ τερνέ τσσαβές, τον Ίθαν, τι αγαβέλ ότι ο Ιεχωβά τσσουβέλα νόμους επειδή μανγκέλα-αμέν. Ο Στιβ βακερέλα: «Πουτσάσα-λες: “Σόσκε μανγκέλα ο Ιεχωβά τι ντας καν κι αρχή ανταγιά; Σαρ σικαβέλα ανταβά ότι μανγκέλα-αμέν; Σο κα αβέλας-πες άμα να κα κερέας ανταγιά αρχή;”» Ασακέ συζητήσεις βοηθιντέ τον Ίθαν τι κερέλ πιρέ ο πάκι κανόνες ι Ιεχωβάσκε. Επίσης, ο Στιβ βακερέλα: «Αμαρό στόχος ισί τι βοηθίνας τον Ίθαν τι αγαβέλ ότι ο γκοντιαβέρ λάφια ι Γραφιάκε ισί μπουτ πο λατσσέ κατά γκοντιαβέρ λάφια ι τζενένγκε».

13. Σαρ μπορίνενα ο νταντά ντα ο νταγιά τι σικλιαρέν πουμαρέ τσσαβέν τι κερέν ο αρχές ι Γραφιάκε; Βακερέν εκ παράδειγμας.

¹³ Σικλιαρέν τουμαρέ τσσαβέν τι κερέν πουμαρέ ζωγιάτε ο αρχές ι Γραφιάκε. Εκ ευκαιρία για τι κερέν-λες ανταβά ισί κάνα ο σχολείος ντέλα εκ άσκηση τουμαρέ τσσαβέντε τι διαβάνεν εκ βιβλίος. Ο βιβλίος μπέκιμ τι βακερέλ τζενένγκε σο κερένα λουμνικανέ πράγματα ντα ισί χολιάκε, ντα τι ντικχίντιβελ ότι ισί λατσσό τι μοιάζες λέντε. Κα μπορίνενας τι μανγκέν τουμαρέ τσσαβένταρ τι σκεφτίνεν σαρ νιωθίνελα ο Ιεχωβά κάνα ο τζενέ κερένα ή βακερένα ασακέ πράγματα. (Παρ. 22:24, 25· 1 Κορ. 15:33· Φιλιπ. 4:8) Ανταβά μπορίνελα τι βοηθίνελ-λεν τι ντεν  μαρτυρία κο δάσκαλος ντα πουμαρέ συμμαθητέντε κάνα κα κερέν λάφι ι βιβλιόσκε κι τάξη.

ΠΡΟΕΤΟΙΜΑΝΕΝ ΤΟΥΜΑΡΕ ΤΣΣΑΒΕΝ ΓΙΑ ΤΙ ΥΠΕΡΑΣΠΙΝΕΝ ΟΝΤΟΥΛΑ ΣΟ ΠΑΚΙΑΝΑ

14. Καλέ πραγμάσκε μπέκιμ τι νταρέλ τι κερέλ λάφι εκ τερνό Χριστιανός, ντα σόσκε;

¹⁴ Μερικές φορές ο τερνέ Χριστιανοί μπέκιμ να τθερένα θάρρος τι υπερασπίνεν οντουλά σο πακιάνα. Για παράδειγμας, μπέκιμ τι νταρένα κάνα πρέπει τι εξηγίνεν σόσκε να πακιάνα κι εξέλιξη. Σόσκε; Ο δάσκαλοι μπέκιμ βακερένα ότι η εξέλιξη ισί μπαγιά. Σαρ κα βοηθίνεν τουμαρέ τσσαβέν τι αβέν ντιπ σίγουροι ότι οντουλά σο πακιάνα ισί μπαγιά;

15. Σο μπορίνελα τι βοηθίνελ εκχέ τερνέ Χριστιανός τι αβέλ πο σίγουρος οντουλένγκε σο πακιάλα;

¹⁵ Βοηθίνεν τουμαρέ τσσαβέν τι αβέν πο σίγουροι οντουλένγκε σο πακιάνα. Τουμαρέ τσσαβέ να χρειαζίντιβελα τι λατζάν επειδή τζανένα ι αλήθεια για τη δημιουργία. (2 Τιμ. 1:8) Ατζέ-ντα μπουτ επιστήμονες αγαβένα ότι η ζωή να κερντιλί κορκορί ή τυχαία. Κάνα οντουλά επιστήμονες ντικχένα σαρ κερντιλί η ζωή, αγαβένα ότι κάποιος σο ισινέ μπουτ γκοντιαβέρ λατσσαρντάς-λα. Ντα ανταλέσκε, να πακιάνα κι εξέλιξη σο σικλιαρένα-λα κο σχολεία σαρί κι πφουβ. Τουμαρέ τσσαβέ μπορίνενα τι αβέν πο σίγουροι οντουλένγκε σο πακιάνα κάνα σκεφτίνενα ο λόγοι σο κερντέ γιαβερέ πφραλέν ντα πφενίν τι αβέν σίγουροι ότι η ζωή δημιουργισάλι. d

16. Σαρ μπορίνενα ο νταντά ντα ο νταγιά τι βοηθίνεν πουμαρέ τσσαβέν τι υπερασπίνεν πουμαρί πίστη Οντουλέσκε σο κερντάς-λεν σαρέ; (1 Πέτρου 3:15) (Ντικχέν ι φωτογραφία-ντα)

¹⁶ Προετοιμάνεν τουμαρέ τσσαβέν για τι υπερασπίνεν πουμαρί πίστη Οντουλέσκε σο κερντάς-λεν σαρέ. (Διαβάνεν 1 Πέτρου 3:15) Μπέκιμ τι βοηθίνελ-τουμέν τι ντικχέν γιεκ θέματα κατά σειρά «Οι Νεαροί Ρωτούν​—Δημιουργία ή Εξέλιξη;» κο ιστότοπος jw.org. Σοράν, συζητίνεν τουμαρέ τσσαβέντζαρ καβά λάφι πακιάνα βον ότι ισί πο λατσσό για τι βοηθίνεν γιαβερέν τι αγαβέν ι αλήθεια για τον Δημιουργό. Ανέν λένγκε γκοντιάτε ότι να χρειαζίντιβελα τι χαν-πες πουμαρέ συμμαθητέντζαρ. Βοηθίνεν-λεν τι χρησιμοποιήνεν απλά, λογικά λάφια άμα κάποιοι μανγκένα τι κερέν λέντζαρ συζήτηση. Για παράδειγμας, εκ συμμαθητής μπέκιμ τι βακερέλ λένγκε: «Με πακιάβα σάντε οντουλά σο ντικχάβα, ντα ι Ντεβλές να ντικχλόμ-λες ποτές». Ο τερνό Χριστιανός κα μπορίνελας τι βακερέλ: «Σκέφτινε ότι πφιρέσα αντρέ κο δάσος ντουρ κατά πόλη ντα ξαφνικά ντικχέσα εκ πηγάδι. Να κα αγαβές ότι  κάποιος λατσσαρντάς-λες; Αφού ο πηγάδι έπρεπε κάποιος τι λατσσαρέλ-λες, καζόμ πο μπουτ ο σύμπαν!»

17. Σαρ μπορίνενα ο νταντά ντα ο νταγιά τι βοηθίνεν πουμαρέ τσσαβέν τι ρόντεν ευκαιρίες για τι μουτθαβέν ι αλήθεια ι Γραφιάκι γιαβερέντε; Βακερέν εκ παράδειγμας.

¹⁷ Βοηθίνεν τουμαρέ τσσαβέν τι ρόντεν ευκαιρίες για τι μουτθαβέν ι αλήθεια ι Γραφιάκι γιαβερέντε. (Ρωμ. 10:10) Κα μπορίνενας τι μοιασκιαρέν ι προσπάθεια λένγκι τι κερέν λάφι οντουλένγκε σο πακιάνα, με την προσπάθεια σο κερέλα εκ τζενό για τι σικλιόλ τι κχελέλ κιθάρα. Κι αρχή, κχελέλα πο απλά γκιλιά. Όμως σιγά σιγά, αβέλα λέσκε πο εύκολος τι κχελέλ. Αντικάς, ο τερνέ Χριστιανοί κι αρχή κα μπορίνενας τι κερέν λάφι οντουλένγκε σο πακιάνα απλέ τροπόσαρ. Για παράδειγμας, κα μπορίνενας τι πουτσέν εκχέ συμμαθητής: «Τζανέας ότι ο επιστήμονες μπουτ φαρ κερένα αντιγραφή οντουλά σο ντικχένα κι φύση; Έλα τι σικαβάβ τούκε εκ μπουτ σουκάρ βίντεος». Αφού κα σικαβέν εκ βίντεος κατά σειρά Μανγκέλας Γκοντί για τι Κερντιόλ; κα μπορίνενας τι βακερέν: «Άμα εκ επιστήμονας λέλα νάμι κάνα λατσσαρέλα κάτι σο μοιάζελα οντουλέντζαρ σο ισί κι φύση, κον πρέπει τι λελ ο νάμι ι πραγματένγκε σο ισί κι φύση;» Κάνα κερένα λάφι απλέ τροπόσαρ, ανταβά μπέκιμ ερεσέλα για τι μανγκέλ ο συμμαθητής τι σικλιόλ πο μπουτ ι Ιεχωβάσκε.

ΣΥΝΕΧΙΝΕΝ ΤΙ ΒΟΗΘΙΝΕΝ ΤΟΥΜΑΡΕ ΤΣΣΑΒΕΝ ΤΙ ΜΠΑΡΙΑΡΕΝ ΠΟΥΜΑΡΙ ΠΙΣΤΗ

18. Σαρ μπορίνενα ο νταντά ντα ο νταγιά τι συνεχίνεν τι μπαριαρέν ι πίστη πουμαρέ τσσαβένγκι ι Ντεβλέσκε;

¹⁸ Κο ντουνιάς, ο πο μπουτ τζενέ να πακιάνα κο Ιεχωβά. (2 Πέτρ. 3:3) Ανταλέσκε νταντάλεν ντα νταγιάλεν, καζόμ κερένα μελέτη κατά Γραφή τουμαρέ τσσαβέντζαρ, τσσίντεν-λεν τι ρόντεν θέματα σο κα μπαριαρέν λένγκο σεβασμός ι Ντεβλέσκε Λαφίσκε ντα για το πάκι κανόνες Λέσκε. Βοηθίνεν-λεν τι σκεφτίνεν πο αχόρτ κάνα κερένα λάφι ι σουκάρ πραγματένγκε σο λατσσαρντάς ο Ιεχωβά. Βοηθίνεν-λεν τι εκτιμίνεν ο προφητείες ι Γραφιάκε σο ήδη νικίστιλε μπαγιά. Ντα ο πο σημαντικός, τι προσευχίντιβεν γιεκ τουμαρέ τσσαβέντζαρ ντα τουμαρέ τσσαβένγκε. Άμα κερένα-λες ανταβά, μπορίνενα τι αβέν σίγουροι ότι ο Ιεχωβά κα ευλογίνελ ο προσπάθειες σο κερένα για τι βοηθίνεν τουμαρέ τσσαβέν τι μπαριαρέν πουμαρί πίστη.​—2 Χρον. 15:7.