1. Σόσκε πακιάνα μερικά τζενέ ότι να αβέλα-πες τι τζουβντιόν για πάντα;

 ΜΠΟΥΤ τζενέ προσοχίνενα σο χάνα ντα προσπαθίνενα τι κερέν γυμναστική για τι τθερέν λατσσί υγεία. Ατζέ-ντα ανταλά τζενέ όμως, να μπεκλεντίνενα τι τζουβντιόν για πάντα. Μπέκιμ πακιάνα ότι να αβέλα-πες τι τζουβντιόν για πάντα. Επίσης, γιαβερά βακερένα ότι άμα ισί τι τζουβντιάβ για πάντα αλλά τι αβάβ πφουρό ντα τι τθεράβ ο προβλήματα σο ανένα ο πφουρίματα, να αξίνελα τι τζουβντιάβ. Όμως, ο Ιησούς κάνα βακερντάς ότι ο τζενέ αβέλα-πες τι “τζουβντιόν για πάντα”, σαρ σικαβένα ο εδάφια Ιωάννης 3:16 ντα 5:24, να βακερντάς κάτι ασακό.

2. Καλέ πραγμάσκε κερέλα λάφι ο κεφάλαιος 6 κο Ιωάννης; (Ιωάννης 6:39, 40)

² Ο Ιησούς αντράλ από εκ θαύμας ντινάς μαντρό ντα ματσσέ σε χιλιάδες τζενέ. a Ανταβά ισινέ κάτι σο κερντάς-λεν τι ατσσόν πουταρντέ μόσαρ, αλλά οντουβά σο βακερντάς ο γιαβέρ ντιβές κα κερέλας-λεν τι σαστίνεν ατζέ πο μπουτ. Ο τζενέ ακολουθιντέας-λες κι Καπερναούμ, πασέ κι ντεριάβ της Γαλιλαίας, ντα οτθέ βακερντάς λένγκε ότι ο τζενέ μπορίνενα τι αβέν πάλι κι ζωή ντα τι τζουβντιόν για πάντα. (Διαβάνεν Ιωάννης 6:39, 40) Ανέν τουμαρέ γκοντιάτε τουμαρέ αμαλέν ντα τουμαρέ τζενέν σο μουλέ. Ο λάφια ι Ιησούσκε σικαβένα ότι μπουτ τζενέ σο μουλέ αβέλα-πες τι αβέν πάλι κι ζωή. Επίσης κατά λάφια λέσκε αγαβάσα ότι εμ τουμέν αλλά εμ τουμαρέ τζενέ μπορίνενα τι τζουβντιόν για πάντα. Όμως, μπουτ τζενέ δυσκολίντιβενα τι αγαβέν ο λάφια σο βακερντάς ο Ιησούς πο τελέ κο κεφάλαιος 6 κο Ιωάννης. Ελάν τι ντικχάς-λεν πο λατσσές.

3. Σο βακερντάς ο Ιησούς κο Ιωάννης 6:51;

 ³ Ο τζενέ κι Καπερναούμ σκεφτιντέ ότι ο θαύμας σο κερντάς ο Ιησούς ι μαντρέντζαρ μοιάζελας με το μάννα σο ντινάας ο Ιεχωβά λένγκε παππουδέντε. Ο Γραφές βακερένα ότι ο μάννα ισινέ «μαντρό κατά ουρανός». (Ψαλμ. 105:40· Ιωάν. 6:31) Ο Ιησούς βακερντάς μερικά πράγματα σο τζανένας ο τζενέ για το μάννα για τι σικλιαρέλ-λεν κάτι μπουτ σημαντικός. Παρόλο σο ο Ντεβέλ ντινάς-λεν ο μάννα αντράλ από εκ θαύμας, οντουλά τζενέ σο χάνας-λες τελικά μουλέ. (Ιωάν. 6:49) Όμως, ο Ιησούς βακερντάς ότι βοβ ισί «ο αληθινός μαντρό κατά ουρανός», «ο μαντρό ι Ντεβλέσκο» ντα «ο μαντρό ι ζωγιάκο». (Ιωάν. 6:32, 33, 35) Ο Ιησούς εξηγιντάς ότι βοβ τθερέλα εκ μπουτ σημαντική διαφορά κατά μάννα. Οτθάρ βακερντάς: «Με ισινόμ ο τζουβντό μαντρό σο γουλίστιλο κατά ουρανός. Άμα εκ τζενό κα χαλ ανταλέ μαντρέσταρ, κα τζουβντιόλ για πάντα». (Διαβάνεν Ιωάννης 6:51) Οντουλά Ιουδαίοι μπερδισάλε. Σαρ μπορίνελας ο Ιησούς τι βακερέλ ότι αβιλόας κατά ουρανός σαρ «ο μαντρό» σο ισί πο μπαρό κατά μάννα σο ντινάας ο Ντεβέλ λένγκε παππουδέντε; Ο Ιησούς βακερντάς κάτι σο ισί μπουτ σημαντικός: «Ο μαντρό σο κα νταβ με ισί μο σώμας». Σο μπορεί τι μανγκέλας τι βακερέλ; Ισί σημαντικός τι αγαβάς-λες ανταβά επειδή η απάντηση σικαβέλα σαρ μπορίνασα τι τζουβντιάς για πάντα εμ αμέν εμ αμαρέ αγαπημέ τζενέ. Ελάν τι ντικχάς σο μανγκέλας τι βακερέλ ο Ιησούς.

Ο ΤΖΟΥΒΝΤΟ ΜΑΝΤΡΟ ΝΤΑ Ο ΣΩΜΑΣ Ι ΙΗΣΟΥΣΚΟ

4. Σόσκε σαστισάλε μερικοί οντουλέσταρ σο βακερντάς ο Ιησούς;

⁴ Μερικοί οντουλένταρ σο ασουνένας ι Ιησούς σαστισάλε κάνα βακερντάς ότι κα ντελ πο «σώμας για τι τζουβντιόλ ο ντουνιάς». Μπορεί τι αμντισάλε ότι κα ντέλας-λεν τι χαν μπαγιά λέσκο σώμας. (Ιωάν. 6:52) Προσοχίνεν κάτι γιαβέρ σο βακερντάς ο Ιησούς ντα ισί μπουτ σημαντικός: «Άμα να κα χαν ο σώμας ι τζενέσκε Τσσαβέσκο ντα να κα πιν λέσκο ρατ, να τθερένα ζωή αντρέ τουμέντε».​—Ιωάν. 6:53.

5. Σόσκε ισινάμ σίγουροι ότι ο Ιησούς να μανγκέλας τι βακερέλ ότι ο τζενέ έπρεπε τι πιν μπαγιά ο ρατ λέσκο;

⁵ Από αζομάν σο τζουβντιόλας ο Νώε, ο Ντεβέλ ντινάς ι εντολή κο τζενέ μα τι χαν ρατ. (Γέν. 9:3, 4) Ο Ιεχωβά τσσουντάς ανταγιά εντολή αντρέ κο Νόμος σο ντινάας κο Ισραηλίτες. Κον κα χάλας ρατ δεν έπρεπε «τι ατσσόλ τζουβντό». (Λευιτ. 7:27) Ο Ιησούς υποστηρίνελας ανταβά Νόμος. (Ματθ. 5:17-19) Άρα, να αβέλας-πες με τίποτα ο Ιησούς τι βακερέλας ανταλέ Ιουδαιόνγκε τι χάνας μπαγιά λέσκο σώμας ντα τι πίνας ο ρατ σο τθερέλας πι σωμάστε. Όμως, ανταλέσαρ σο βακερντάς, ο Ιησούς μανγκέλας τι σικλιαρέλ ι τζενέν σαρ μπορίνενα τι “τζουβντιόν για πάντα”.​—Ιωάν. 6:54.

6. Σαρ τζανάσα ότι κο Ιωάννης 6:53 ο Ιησούς χρησιμοποιηντάς εκ παράδειγμας;

⁶ Σο μανγκέλας τι βακερέλ ο Ιησούς; Σίγουρα ο Ιησούς αντράλ ανταλέ λαφίνταρ μανγκέλας τι ανέλ λένγκε εκ παράδειγμας σαρ κερντάς με εκ Σαμαρείτισσα-ντα ακαλέ λαφίντζαρ: «Κον . . . κα πιλ κατά πανί σο κα νταβ-λες με ποτές να κα μερέλ πανίσκε, αλλά ο πανί σο κα νταβ-λες κα αβέλ αντρέ λέστε χανίνγκ σο κα νικαβέλ πανί για τι ντελ ζωή για πάντα». (Ιωάν. 4:7, 14) b Ο Ιησούς να μανγκέλας τι βακερέλ ότι η Σαμαρείτισσα κα τζουβντιόλας για πάντα απλά άμα κα πίλας εκ συγκεκριμέ πανί. Αντικάς-ντα, να μανγκέλας τι βακερέλ ότι ο τζενέ σο ασουνένας-λες κι Καπερναούμ κα τζουβντιόνας για πάντα αν κα χάνας μπαγιά λέσκο σώμας ντα κα πίνας λέσκο ρατ.

 ΕΚ ΓΙΑΒΕΡ ΠΕΡΙΠΤΩΣΗ ΣΟ Ο ΙΗΣΟΥΣ ΧΡΗΣΙΜΟΠΟΙΗΝΤΑΣ Ο ΙΔΙΑ ΛΑΦΙΑ

7. Σο βακερένα μερικοί για το λάφια ι Ιησούσκε σο ισί κο εδάφιος Ιωάννης 6:53;

⁷ Μερικοί βακερένα ότι κο εδάφιος Ιωάννης 6:53, ο Ιησούς εξηγίνελα σο πρέπει τι κερέν ο τζενέ κο Δείπνος κι Κυριόσκο επειδή αζομάν σο κερντάς λάφι λάκε χρησιμοποιηντάς ο ίδια λάφια. (Ματθ. 26:26-28) Πακιάνα ότι σαρέ οντουλά σο ισί κι Ανάμνηση πρέπει τι λεν κατά μαντρό ντα κατά μολ. Ισί μπαγιά ανταβά; Ισί σημαντικός τι αρακχάς ι απάντηση, επειδή κάθε μπρες εκατομμύρια τζενέ σαρό κο ντουνιάς αβένα γιεκ αμέντζαρ κι Ανάμνηση. Κα ντικχάς ότι οντουβά σο βακερντάς ο Ιησούς κο Ιωάννης 6:53 τθερέλα διαφορετική σημασία οντουλένταρ σο βακερντάς κάνα κερντάς ι Ανάμνηση.

8. Καλά διαφορές τθερένα ανταλά ντούι περιπτώσεις; (Ντικχέν ο φωτογραφίες-ντα)

⁸ Ελάν τι ντικχάς ντούι διαφορές σο τθερένα ανταλά περιπτώσεις. Πρώτον, κάνα ντα κατέ βακερντάς ο Ιησούς ο λάφια σο ισί κο εδάφια Ιωάννης 6:53-56; Βακερντάς ανταλά λάφια κο μπρες 32 Σ.Κ.Χ. (Σοράν Κατά Χριστός). Ανταβά αβιλό-πες περίπου εκ μπρες πριν τι κερέλ ο Δείπνος ι Κυριόσκο κι Ιερουσαλήμ. Δεύτερον, κάσκε βακερντάς ανταλά λάφια; Βακερντάς ανταλά πράγματα τζενέντε σο χάλας-λεν ανάγκη πο μπουτ τι λεν χαμπέ κατά Ιησούς παρά για τι σικλιόν ι Ιεχωβάσκε ντα λέσκε Βασιλειάκε. (Ιωάν. 6:26) Επίσης, κάνα ο Ιησούς  βακερντάς κάτι σο ναστί αγαβένας-λες λατσσές, χασαρντέ μπουτ σουγκό πουμαρί πίστη λέστε. Ατζέ-ντα κάποιοι κατά μαθητές λέσκε τσσιναντέ τι ακολουθίνεν-λες. (Ιωάν. 6:14, 36, 42, 60, 64, 66) Συγκρίνεν οντουβά σο αβιλό-πες εκ μπρες πο σοράν κο 33 Σ.Κ.Χ. (Σοράν Κατά Χριστός) κάνα ο Ιησούς κερντάς ο Δείπνος ι Κυριόσκο. Αζομάν, λέσκε 11 πιστοί μαθητές ισινέ λέσαρ παρόλο σο να αγαβένας αζόμ λατσσές σαρέ οντουλά σο σικλιαρέλας. Όμως, να ισινέ σαρ ο πο μπουτ τζενέ οντουλένταρ σο ισινέ κι Γαλιλαία. Λέσκε πιστοί μαθητές ισινέ σίγουροι ότι ο Ιησούς ισινέ ο Τσσαβό ι Ντεβλέσκο σο γουλίστιλοας κατά ουρανός. (Ματθ. 16:16) Βοβ ισαρντάς-λεν ι λαφίντζαρ: «Τουμέν ισινέν σο ατσσιλέν πασέ μάντε σο-ντα νακχαντόμ». (Λουκ. 22:28) Ατζέ-ντα ανταλά ντούι διαφορές σικαβένα ότι κο Ιωάννης 6:53, ο Ιησούς να προσπαθίνελας τι εξηγίνελ σο έπρεπε τι αβέλ-πες κο Δείπνος κι Κυριόσκο. Αλλά υπαρχίντιβενα γιαβερά-ντα διαφορές.

ΣΟ ΜΑΝΓΚΕΝΑ ΤΙ ΒΑΚΕΡΕΝ Ο ΛΑΦΙΑ Ι ΙΗΣΟΥΣΚΕ ΤΟΥΜΕΝΓΚΕ

9. Καλέ τζενένγκε ισί ο λάφια σο βακερντάς ο Ιησούς κο Δείπνος κι Κυριόσκο;

⁹ Κάνα κερντέ ο Δείπνος ι Κυριόσκο, ο Ιησούς ντινάς μαντρό σο να τθερέλας μαγιά πι αποστολόντε ντα βακερντάς λένγκε ότι ανταβά μανγκέλας τι σικαβέλ λέσκο σώμας. Σοράν ντινάς-λεν μολ ντα βακερντάς λένγκε ότι ανταγιά μανγκέλας τι σικαβέλ ο «ρατ ι συμφωνιάκο». (Μάρκ. 14:22-25· Λουκ. 22:20· 1 Κορ. 11:24) Ανταβά σο βακερντάς λένγκε ι συμφωνιάκε ισί μπουτ σημαντικός. Η νεβί συμφωνία αβιλί με το πνευματικός “λαός Ισραήλ” σο κα αβέλ «κι Βασιλεία κι Ντεβλέσκι», όχι σαρέ ι τζενέντζαρ γενικά. (Εβρ. 8:6, 10· 9:15) Ο απόστολοι να αγαντέας-λες ανταβά αζομάν. Όμως, χάνικ βακίτι πο σοράν λιντέ ο άγιος πνεύμας ντα τσσουντέ-πες κι νεβί συμφωνία για τι αβέν γιεκ ι Ιησούσαρ κο ουρανός.​—Ιωάν. 14:2, 3.

10. Σο διαφορά τθερένα ο λάφια σο βακερντάς ο Ιησούς κι Γαλιλαία ντα κο Δείπνος κι Κυριόσκο; (Ντικχέν ι φωτογραφία-ντα)

¹⁰ Τσσουβέν σημασία ότι, κάνα ο Ιησούς κερντάς ο Δείπνος ι Κυριόσκο, ο λάφια σο βακερντάς ισινέ για εκ ομάδα σο τθερέλα ο ναβ «χουρντό κοπάδι». O πρώτα τζενέ σο τθερέλας ανταγιά ομάδα, ισινέ ο πιστοί μαθητές λέσκε σο ισινέ γιεκ λέσαρ οντουλέ δωματιόστε. (Λουκ. 12:32) Ισινέ οντουλά τζενέ σο ο Ιησούς μανγκλάς λένταρ τι χαν ο μαντρό ντα τι πιν ι μολ οντιά ιράτ. Ο ίδιος πράγμας πρέπει τι κερέν ο γιαβερά-ντα τζενέ σο κα αβένας κι ομάδα ανταγιά πο σοράν. Δηλαδή βον-ντα πρέπει τι χαν ο μαντρό ντα τι πιν ι μολ κάνα κα αβέν κο Δείπνος κι Κυριόσκο. Ανταλά τζενέ κα αβέν πασέ κο Ιησούς κο ουρανός. Οντουλά λάφια σο βακερντάς ο Ιησούς πι αποστολόντε κι περίπτωση ανταγιά ισί διαφορετικά κατά λάφια σο βακερντάς κο τζενέ κι Γαλιλαία. Ανταλά λάφια ι Ιησούσκε ισινέ πο μπουτ τζενένγκε.

11. Σο βακερντάς ο Ιησούς κι Γαλιλαία σο σικαβέλα ότι να κερέλας λάφι σάντε χάνικα τζενένγκε;

¹¹ Κάνα ο Ιησούς ισινέ κι Γαλιλαία κο μπρες 32 Σ.Κ.Χ. (Σοράν Κατά Χριστός), κερέλας λάφι ι Ιουδαιόνγκε σο μανγκένας λέσταρ μαντρό. Βοβ όμως βακερέλας λένγκε για κάτι μπουτ πο λατσσό κατά χαμπέ. Βακερέλας λένγκε για κάτι σο κα ντέλας-λεν ι ευκαιρία τι τζουβντιόν για πάντα. Επίσης ο Ιησούς βακερντάς ότι οντουλά τζενέ σο κα μερένας κα μπορίνενας τι αναστίντιβεν κο τελευταίος ντιβές ντα τι τζουβντιόν για πάντα. Να κερέλας λάφι χάνικα τζενένγκε σο τραμπίντιλε, σαρ κερντάς πο σοράν κο Δείπνος κι Κυριόσκο. Οκιά μπάνταρ, κι Γαλιλαία κερντάς λάφι για εκ ευλογία σο κα μπορίνενας τι τθερέν-λα σαρέ ο τζενέ. Βοβ βακερντάς: «Άμα εκ τζενό κα χαλ ανταλέ μαντρέσταρ, κα τζουβντιόλ για πάντα. Ντα ο μαντρό  σο κα νταβ με ισί μο σώμας για τι τζουβντιόλ ο ντουνιάς».​—Ιωάν. 6:51. c

12. Σο χρειαζίντιβελα τι κεράς για τι τζουβντιάς για πάντα;

¹² Ο Ιησούς να βακερντάς κο Ιουδαίοι κι Γαλιλαία ότι ανταγιά ευλογία κα τθερέλας-λα κάθε τζενό σο τζουβντιλόας ή σο κα τζουβντιόλας κι πφουβ. Σάντε οντουλά σο κα “χαν ανταλέ μαντρέσταρ”, οντουλά σο κα σικαβέν πίστη, κα ευλογίντιβεν. Μπουτ τζενέ κο ντουνιάς σο ισί Χριστιανοί αμντίνενα ότι κα σώντιβεν άμα απλά πακιάνα κο Ιησούς ντα ντικχένα-λες σαρ οντουβά σο κα σώνελ-λεν προσωπικά. (Ιωάν. 6:29) Όμως χρειαζίντιβενα πο μπουτ πράγματα. Κι αρχή, μπουτ τζενέ κι Γαλιλαία πακιασάλε κο Ιησούς, όμως σοράν τσσιναντέ τι ακολουθίνεν-λες. Σόσκε;

13. Σο πρέπει τι κερέλ κάποιος για τι αβέλ αληθινός μαθητής ι Ιησούσκο;

¹³ Ο πο μπουτ κατά τζενέ σο ντινάς-λεν τι χαν ο Ιησούς τζάνας παλά-λέστε χαράσαρ καζόμ βοβ ντέλας-λεν οντουλά σο μανγκένας. Μανγκένας-λες για τι κερέλ-λεν λατσσές, τι ντελ-λεν χαμπέ, ντα τι βακερέλ λένγκε ο πράγματα σο μπεϊντίνενας τι ασουνέν. Όμως, ο Ιησούς σικαντάς ότι ο αληθινοί μαθητές λέσκε έπρεπε τι κερέν πο μπουτ πράγματα. Βοβ ντινάς-λεν τι αγαβέν ξεκάθαρα ότι να αβιλό κι πφουβ απλά για τι ντελ-λεν οντουλά σο μανγκένας. Αβιλό για τι σικλιαρέλ-λεν σο έπρεπε τι κερέν για τι αβέν αληθινοί μαθητές λέσκε. Χρειαζίντιβελας τι τζαν λέστε, δηλαδή τι ασουνέν-λες ντα τι ντεν-λες καν.​—Ιωάν. 5:40· 6:44.

14. Σο πρέπει τι κεράς για τι βοηθίντιβας κατά σώμας ντα κατά ρατ ι Ιησούσκο;

 ¹⁴ Ο Ιησούς βακερντάς κο τζενέ αζομάν ότι έπρεπε τι σικαβέν πίστη. Καλέ πραγμάστε; Κι θυσία σο κα κερέλας κάνα κα ντέλας πο σώμας ντα πο ρατ. Ανταγιά πίστη ισινέ σημαντική ι Ιουδαιόνγκε ντα συνεχίνελα τι αβέλ σημαντική αντιβές-ντα. (Ιωάν. 6:40) Βα, για τι βοηθίντιβας κατά σώμας ντα κατά ρατ ι Ιησούσκο, σαρ βακερέλα ο εδάφιος Ιωάννης 6:53, χρειαζίντιβελα τι σικαβάς πίστη κο λύτρος. Ανταγιά ευλογία μπορίνενα τι τθερέν-λα μπουτ τζενέ.​—Εφεσ. 1:7.

15, 16. Καλά σημαντικά πράγματα σικλιάσα κατά Ιωάννης κεφάλαιος 6;

¹⁵ Ο λάφια σο ισί κο Ιωάννης κο κεφάλαιος 6 τθερένα μπαρί σημασία αμένγκε ντα αμαρέ αγαπημέ τζενένγκε. Σικαβένα μπουτ λατσσές καζόμ μπουτ πφαμπόλα ο Ιησούς ι τζενένγκε. Κάνα ισινέ κι Γαλιλαία, κερντάς λατσσές νασφαλέν, κερέλας λάφι ι Βασιλειάκε ντα ντινάς κο τζενέ χαμπέ αζομάν σο τθερένας-λες ανάγκη. (Λουκ. 9:11· Ιωάν. 6:2, 11, 12) Ο πο σημαντικός ισί ότι σικλιαρντάς ότι βοβ ο ίδιος ισί «ο μαντρό ι ζωγιάκο».​—Ιωάν. 6:35, 48.

¹⁶ Ο τζενέ σο ισί κατά ομάδα σο ο Ιησούς ντινάς-λα ο ναβ “γιαβερά μπρακέ” να λένα ντα δεν πρέπει τι λεν, κατά μαντρό ντα κατά μολ κο Δείπνος κι Κυριόσκο. (Ιωάν. 10:16) Όμως, λένγκε-ντα κερέλα λατσσιπέ ο σώμας ντα ο ρατ ι Ιησού Χριστόσκο. Ανταβά αβέλα-πες κάνα σικαβένα πίστη κο λύτρος. (Ιωάν. 6:53) Οκιά μπάνταρ, οντουλά σο πρέπει τι λεν κατά μαντρό ντα κατά μολ σικαβένα ότι ισί αντρέ κι νεβί συμφωνία ντα τθερένα ι ελπίδα τι τζαν κο ουρανός. Άρα, ο λάφια σο ισί κο Ιωάννης κο κεφάλαιος 6 βοηθίνενα-αμέν τι σικλιάς μπουτ σημαντικά πράγματα, είτε ισινάμ κατά χρισμέ είτε κατά γιαβερά μπρακέ. Σικλιαρένα-αμέν ότι σαρέ πρέπει τι τθεράς ζουρανί πίστη κο λύτρος για τι τζουβντιάς για πάντα.