Μπιάντιλομ κο 1927 σε εκ χουρντί πόλη κο Σικάγο κο Ιλινόις κι Αμερική. Μο ντατ μι νταγιάσαρ κερντέ παντς τσσαβέν την Τζέθα, τον Ντον, μαν, τον Καρλ ντα την Τζόι. Σαρέ ισινάμας αποφασισμέ τι υπηρετίνας ι Ιεχωβάς αντράλ αμαρέ γκίσταρ. Η Τζέθα γκιλί κι δεύτερη τάξη κι Γαλαάδ σο αβιλί-πες κο 1943. Ο Ντον γκιλό κο Μπέθελ κο Μπρούκλιν κι Νέα Υόρκη κο 1944, ο Καρλ γκιλό βοβ-ντα κο 1947 ντα η Τζόι γκιλί βόι-ντα κο 1951. Ο μπουτ λατσσό παράδειγμας λένγκο ντα ο παράδειγμας μι νταντέσκο ντα μι νταγιάκο, κερντέ μάνγκε μπουτ μπαρί εντύπωση.

Μο ντατ ντα μι ντάι διαβάνενας ι Αγία Γραφή ντα μανγκένας ι Ντεβλές. Οτθάρ, σικλιαρντέ αμέν-ντα χουρντιαρέλα μπερί τι μανγκάς ι Ντεβλές. Όμως, πο σοράν μο ντατ χασαρντάς πο σεβασμός ι κχανγκιρίνγκε κάνα υπηρετίνελας σαρ στρατιώτης κι Ευρώπη αζομάν σο αβέλας-πες ο Πρώτος Παγκόσμιος Πόλεμος. Κάνα βουρτισάλο κχερέ μι ντάι ισινέ μπουτ χαρούμενη ανταλέσκε, οτθάρ βακερντάς λέσκε: «Καρλ, έλα τι τζας κι κχανγκιρί σαρ κεράας ανγκλέ». Μο ντατ βακερντάς λάκε: «Κα τζας παρέα μέχρι οτθέ, αλλά με να κα νταβ αντρέ». Βόι πουτσλάς-λες: «Σόσκε;»Βοβ βακερντάς: «Κο πόλεμος, παπάζια σο τθερένας ι ίδια θρησκεία ευλογίνενας ι στρατιωτέν σο ο εκ μουνταρέλας ι γιαβερές! Μήπως ο Ντεβέλ υποστηρίνελας ο ντούι-ντα πλευρές;»

Πο σοράν, εκ φαρ σο μι ντάι ισινέ κι κχανγκιρί, ντούι Μάρτυρες ι Ιεχωβάσκε αβιλέ αμαρέ κχερέστε. Ντινέ μι νταντέστε εκ βιβλίος σο βοηθίνελας-τουτ τι αγαβές ι Αγία Γραφή ντα τθερέλας ο τίτλος Φως. Ανταβά βιβλίος τθερέλας ντούι μέρη ντα εξηγίνελας ι Αποκάλυψη. Μο ντατ μπεϊντιντάς-λεν οτθάρ λιντάς-λεν. Κάνα μι ντάι ντικχλάς ο βιβλία, αρχισάλι τι διαβάνελ-λεν. Πο σοράν, εκ ντιβές ντικχλάς εκ αγγελία κι εφημερίδα, σο βακερέλας ότι κον μανγκέλας μπορίνελας τι κερέλ μελέτη κατά Αγία Γραφή ανταλέ βιβλιόντζαρ ντα βόι αποφασιντάς τι τζαλ. Κάνα ερεσλί, εκ πφουρί τζουβέλ πουταρντάς λάκε ι πόρτα ντα ασταρέλας εκ κατά βιβλία ανταλά. Οτθάρ μι ντάι πουτσλάς-λα: «Ατθέ σικλιάσα ανταλέ βιβλιόσκε;» ντα βόι βακερντάς λάκε: «Βα μι τσσαγιορί, έλα αντρέ». Η γιαβέρ εβδομάδα, μι ντάι λιντάς αμέν-ντα πι τσσαβέν. Από αζομάν τζάας μπουτ συχνά.

 Εκχέ συναθροισιάτε, ο πφραλ σο κερέλας εκ μέρος βακερντάς μάνγκε τι διαβάναβ ο εδάφιος Ψαλμός 144:15, σο οτθέ βακερέλα ότι οντουλά σο ντένα λατρεία ι Ιεχωβάς ισί ευτυχισμέ. Ανταβά εδάφιος πάντα κερέλας μάνγκε εντύπωση. Επίσης, ντούι γιαβερά-ντα εδάφια σο κερένας μάνγκε εντύπωση ισί ο 1 Τιμόθεο 1:11, σο βακερέλα ότι ο Ιεχωβά ισί “ο ευτυχισμέ Ντεβέλ”, ντα ο Εφεσίους 5:1, σο βακερέλα αμένγκε “τι μοιάζας κο Ντεβέλ”. Αγαντόμ ότι έπρεπε τι αβάβ χαρούμενος σο υπηρετίναβα οντουλές σο κερντάς-μαν ντα τι βακεράβ λέσκε ευχαριστώ σο τθεράβα ο προνόμιος ανταβά. Ανταλά ισί ντούι πράγματα σο προσπαθίναβας τι κεράβ σαρέ μι ζωγιάτε.

Η κχανγκιρί σο ισινέ πο πασέ μάντε, ισινέ κο Σικάγο, 32 χιλιόμετρα οτθάρ σο μπεσάβας. Παρόλο σο ισινέ ντουρ, τζάας κο συναθροίσεις ντα σικλιάβας ατζέ πο μπουτ πράγματα κατά Αγία Γραφή. Ντάβα-μαν γκοντί ότι, εκ φαρ, ο πφραλ σο κερέλας ο μέρος ντινάς εκ απάντηση κι Τζέθα. Καζόμ ασουνάβας λάκι απάντηση, σκεφτίναβας: “Ανταβά τζανάβας-λες με-ντα. Κα μπορίναβας τι βάνταβ με-ντα μο βας”. Οτθάρ, αρχισάλομ τι προετοιμάναβ-μαν ντα τι νταβ με-ντα απαντήσεις. Ο πο σημαντικός ισί ότι γιεκ μι πφραλέντζαρ με-ντα κερντόμ πο ζουρανί πι πίστη κο Ιεχωβά. Μπολντιλόμ κο 1941.

Πο μπουτ ντάβα-μαν γκοντί η συνέλευση σο αβιλί-πες κο 1942 κο Κλίβελαντ κο Οχάιο. Συνδεσάλεας κατά τηλέφωνος πο μπουτ από 50 πόλεις κι Αμερική. Μι φαμιλιάσαρ μπεσλάμ τσαντιρίντε κι «τροχοσπιτούπολη» σο κερντέας αμαρέ πφραλά οτθέ πασέ σο αβέλας-πες η συνέλευση. Αζομάν αβέλας-πες ο Δεύτερος Παγκόσμιος Πόλεμος ντα ο κράτος τζάλας κόντρα κο Μάρτυρες ι Ιεχωβάσκε ατζέ πο μπουτ. Ι ιράτ, ντικχάβας ομάδες πφραλένγκε τι τσσουβέν πουμαρέ αυτοκίνητα ο εκ δίπλα κο γιαβέρ, ντα ο φώτα τι ντικχέν ανγκλάλ όχι οπράλ κο τσαντίρια αλλά κατά γιαβέρ μπάντα. Κανονιντέας κο κάθε αυτοκίνητος τι αβέλας αντρέ εκ τζενό σο κα ατσσόλας τζανγκαντό σαρί ι ιράτ. Άμα κα ντικχένας κάτι περίεργος, κα πουτρένας ο φώτα σαρέ μαζί για τι κοριαρέν οντουλέν σο κα προσπαθίνενας τι ντεν αντρέ ντα κα ισταβένας κόρνα. Αζομάν γιαβερά-ντα τζενέ κα τζάνας για τι βοηθίνεν. Σκεφτισάλομ: “Ο λαός ι Ιεχωβάσκο ισί λατσσές προετοιμασμέ σο-ντα τι αβέλ-πες!” Επειδή νιωθίναβας ότι ισινόμ αρακχαντό, σοτόμ ήσυχα ντα να αβιλό-πες τίποτα κακός.

Μπουτ μπρεσά πο σοράν, καζόμ ανάβας μι γκοντιάτε οντιά συνέλευση, αγαντόμ ότι μι ντάι να ανησυχισάλιας ντα να νταρασάλιας ιτς. Ντέλας μπαρί μπέσα κο Ιεχωβά ντα κι οργάνωση λέσκι. Να κα μπιστράβ ποτές ο μπουτ λατσσό παράδειγμας λάκο.

Χάνικ πριν κατά συνέλευση οντιά, μι ντάι αβιλί τακτική σκαπάνισσα. Οτθάρ, ντινάς μπουτ σημασία κο ομιλίες σο κερένας λάφι για την ολοχρόνια υπηρεσία. Καζόμ κεράας ταξίδι για τι βουρτίνας παλάλ, βακερντάς: «Μανγκάβα τι συνεχίναβ ο σκαπανικός, αλλά ναστί κεράβα εμ ανταβά εμ σαρέ ο μπουτιά ι κχερέσκε». Πουτσλάς-αμέν άμα κα μπορίναας τι βοηθίναας-λα. Βακερντάμ βα, οντουλέσκε βακερντάς κο κάθε εκ τι καθαρίνεν εκ ή ντούι δωμάτια πριν τι χας πρωινός. Κάνα νασάας για τι τζας κο σχολείος, βόι ντικχέλας άμα ο κχερ ισινέ τακτοποιημέ ντα σοράν νικιόλας κο έργος. Πάντα τθερέλας τι κερέλ μπουτ πράγματα, αλλά ποτές να μπιστρέλας τι φροντίνελ πι τσσαβέν. Κάνα τζάας μεσημέρι κχερέ για τι χας ντα απόγευμας σοράν κατά σχολείος, πάντα ισινέ κχερέ ντα μπεσέλας αμένγκε. Μερικές φορές σοράν κατά σχολείος, τζάας γιεκ λάσαρ κο έργος ντα ανταβά βοηθιντάς-αμέν τι αγαβάς σο μανγκέλα τι βακερέλ τι αβές σκαπανέας.

Αρχισάλομ ο σκαπανικός κάνα ισινόμας 16 μπρεσένγκο. Παρόλο σο μο ντατ να αβιλόας ατζέκ Μάρτυρας ι Ιεχωβάσκο, μανγκέλας τι σικλιόλ σαρ τζάβας. Εκ ιράτ, βακερντόμ λέσκε ότι, παρόλο σο προσπαθίναβας μπουτ κο έργος, να αρακχλόμας καεκχές σο μανγκέλας τι κερέλ μελέτη κατά Αγία Γραφή. Ατσσιλόμ για χάνικ χωρίς τι κεράβ λάφι ντα σοράν πουτσλόμ-λες: «Μήπως κα μανγκέας τι κερές μάντζαρ μελέτη;» Σκεφτιντάς-λες για χάνικ ντα βακερντάς: «Να τθεράβα καέκ λόγος για τι βακεράβ όχι». Βα, ι πρώτε τζενές σο κερντόμ μελέτη ισινέ μο ντατ. Ισινέ μπουτ μπαρό προνόμιος μάνγκε ανταβά!

Κεράβας-λες μελέτη κατά βιβλίος «Η Αλήθεια Ελευθερώσει Υμάς». Καζόμ η μελέτη τζάλας λατσσές, αγαντόμ ότι μο ντατ βοηθιντάς-μαν τι σικλιαράβ-μαν πο λατσσές αντράλ κατά Αγία Γραφή ντα επίσης τι αβάβ πο λατσσό δάσκαλος. Για παράδειγμας, εκ ιράτ αφού διαβαντάμ εκ παράγραφος, βακερντάς: «Ντικχάβα σο βακερέλα ο βιβλίος. Αλλά σαρ τζανέσα ότι ανταβά σο βακερέλα ισί σωστός;» Να ισινόμας προετοιμασμέ ανταλέσκε, οτθάρ βακερντόμ λέσκε: «Να μπορίναβα τι βακεράβ τούκε ακανά αποδείξεις σο σικαβένα ότι ισί σωστός ανταβά, αλλά κι γιαβέρ μελέτη σο κα κεράς κα βακεράβ τούκε». Ντα ι γιαβέρ φαρ εξηγιντόμ λέσκε. Αρακχλόμ εδάφια σο σικαβένας ότι ισί σωστός ανταβά σο συζητίναας. Οτθάρ μπερί, προετοιμάναβα-μαν πο λατσσές για τι μελέτη σο κεράβας-λες ντα αντικάς σικλιλόμ σαρ τι κεράβ έρευνα. Ανταβά βοηθιντάς εμ μαν αλλά εμ μι νταντές τι αγαβάς πο λατσσές ι Αγία Γραφή. Κερέλας οντουλά σο σικλιόλας πι μελετιάτε ντα μπολντιλό κο 1952.

Νασλόμ μι κχερέσταρ κάνα ισινόμας 17 μπρεσένγκο. Η Τζέθα a αβιλί ιεραπόστολος ντα ο Ντον Μπεθελίτης. Ο ντούι-ντα μπεϊντίνενας μπουτ πουμαρέ διορισμούς, ντα ανταβά ισινέ κάτι σο ντέλας μπουτ θάρρος μαν-ντα. Οτθάρ, κερντόμ αίτηση για το Μπέθελ ντα για την Σχολή Γαλαάδ, ντα μπεκλεντίναβας ι Ιεχωβάσκε τι σικαβέλ μάνγκε κατέ μανγκέλας τι υπηρετίναβ-λες. Τελικά γκιλόμ κο Μπέθελ κο 1946.

Καζόμ νακχένας ο μπρεσά, τθεράβας μπουτ διορισμούς κο Μπέθελ, ντα αντικάς μπορισάλομ τι σικλιάβ μπουτ νεβέ πράγματα. Ισινόμ κο Μπέθελ 75 μπρεσά, ντα αντρέ ανταλέ μπρεσέντε σικλιλόμ ι βιβλιοδεσία ντα ο λογιστικά. Επίσης σικλιλόμ σαρ τι κινάβ πράγματα σο χρειαζίντιβαας κο Μπέθελ ντα σαρ τι μπουτσσαβάβ σημαντικά πράγματα γιαβερέ τθεμέντε. Πο μπουτ σαριλένταρ όμως, μπεϊντίναβα ο λατσσό σικλιαριπέ σο ντέλα-αμέν ο Μπέθελ αντράλ κατά πρωινή λατρεία κατά ομιλίες ντα κατά διάφορα προγράμματα.

Σικλιλόμ μπουτ πράγματα επίσης κατά πο χουρντό πφραλ μιρό τον Καρλ, σο αβιλό κο Μπέθελ κο 1947. Διαβάνελας μπουτ λατσσές ι Γραφή ντα ισινέ μπουτ λατσσό δάσκαλος. Εκ φαρ μανγκλόμ λέσκι βοήθεια για εκ ομιλία σο ντινέ-μαν τι κεράβ. Βακερντόμ κο  Καρλ ότι διαβαντόμας μπουτ πράγματα ντα ότι να τζανάβας σαρ τι χρησιμοποιήναβ-λεν. Βοηθιντάς-μαν σάντε με εκ ερώτηση: «Τζόελ, καβά ισί ο θέμας τι ομιλιάκο;» Αγαντόμ αμέσως σο μανγκέλας τι βακερέλ. Έπρεπε τι χρησιμοποιήναβ σάντε ο πληροφορίες σο κα βοηθίνενας-μαν τι εξηγίναβ ο θέμας μι ομιλιάκο ντα όχι τι τσσουβάβ γιαβερά-ντα πληροφορίες. Να μπισταρντόμ ποτές ανταβά μάθημας.

Για τι αβάς ευτυχισμέ κο Μπέθελ πρέπει τι κεράς ο πο λατσσό σο μπορίνασα κο έργος. Άμα κεράσα-λες ανταβά κα τθεράς σουκάρ εμπειρίες. Εκ εμπειρία σο ντάβα-μαν γκοντί μπουτ λατσσές αρχισάλι εκ απόγευμας κο Μπρονξ, κι Νέα Υόρκη. Εκχέ πφραλέσαρ γκιλάμ εκχέ τζουβλιάτε σο λιντάας ι Σκοπιά ντα ο Ξύπνα! Βακερντάμ λάκε ακαλά λάφια: «Αντιβές βοηθίνασα ι τζενέν τι σικλιόν λατσσέ πράγματα αντράλ κατά Αγία Γραφή». Βόι βακερντάς: «Άμα ισί για την Αγία Γραφή, ελάν αντρέ». Διαβαντάμ ντα συζητιντάμ μπουτ εδάφια σο κερένα λάφι για την Βασιλεία ι Ντεβλέσκι ντα για το νεβό ντουνιάς. Ανταβά κερντάς λάκε μπαρί εντύπωση, σόσκε κάνα γκιλάμ πάλι ι γιαβέρ εβδομάδα, καλιντάας μερικέ πι αμαλένταρ. Πο σοράν, βόι ντα λάκο ρομ αβιλέ πιστοί υπηρέτες ι Ιεχωβάσκε.

Λιντόμ ι απόφαση ότι μανγκάβας τι παντρίναβ. Σοράν από 10 μπρεσά γνωριντόμ μι ρομνιά. Σο βοηθιντάς-μαν τι αρακχάβ εκχέ λατσσέ ρομνιά; Σκεφτισάλομας με προσευχή ο ερώτημας: “Σο μανγκάβα τι κεράβ γιεκ μι ρομνιάσαρ αφού κα παντρίνας;”

Σοράν κατά συνέλευση κο 1953 κο Στάδιος Γιάνκι, γνωριντόμ εκχέ πφενιά σο λάκο ναβ ισινέ Μαίρη Άνιολ. Νακχλίας ι δεύτερη τάξη της σχολής Γαλαάδ μαζί με την Τζέθα σο ισινέ σοράν συνεργάτιδες κο ιεραποστολικός έργος. Η Μαίρη βακερέλας μάνγκε με μπαρό ενθουσιασμός για το διορισμοί σο τθερέλας κι Καραϊβική ντα για το μελέτες σο κερέλας σαρέ ανταλά μπρεσά. Καζόμ γνωρίναας ο εκ ι γιαβερές πο λατσσές, αγαντάμ ότι ο ντούι-ντα μανγκάας τι υπηρετίνας ι Ιεχωβάς ολοχρόνια. Μανγκλάμ ο εκ ι γιαβερές ντα παντρισάλαμ κο Απρίλιος κο 1955. Η Μαίρη σικαντάς μπουτέ τροπόντζαρ, ότι ισινέ εκ δώρος κατά Ιεχωβά ντα εκ λατσσό παράδειγμας. Ισινέ μπουτ ευτυχισμέ καβά-ντα διορισμός τι κερέλας. Ισινέ μπουτιαρνί, ενδιαφερίντιβελας μπαγιά ι γιαβερένγκε ντα τσσουβέλας ο πράγματα ι Βασιλειάκε κι πρώτη θέση. (Ματθ. 6:33) Ισινάμας κο έργος περιοχής τριν μπρεσά ντα, κο 1958, βακερντέ αμένγκε τι τζας κο Μπέθελ.

Σικλιλόμ μπουτ πράγματα κατά Μαίρη. Για παράδειγμας, κι αρχή αμαρέ μπιαβέστε, αποφασιντάμ τι διαβάνας ι Γραφή γιεκ, περίπου 15 εδάφια κάθε φαρ. Ο εκ αμένταρ διαβάνελας ο εδάφια ντα σοράν κεράας σχόλια ντα συζητίναας σαρ μπορίνασα τι κεράς-λεν αμαρέ ζωγιάτε. Μπουτ φαρ, η Μαίρη βακερέλας μάνγκε πράγματα σο σικλιλίας κι Γαλαάδ ή κι ιεραποστολική υπηρεσία. Ανταλά συζητήσεις βοηθίνενας-μαν τι αγαβάβ πο λατσσές ο πράγματα ι Γραφιάκε τι κεράβ πο λατσσέ μο ομιλίες ντα τι νταβ πο λατσσέ τροπόσαρ ζορ κο πφενιά.​—Παρ. 25:11.

Μι αγαπημέ ρομνί η Μαίρη μουλί κο 2013. Καζόμ μπουτ μανγκάβα τι ντικχάβ-λα πάλι κο νεβό ντουνιάς! Μέχρι αζομάν, ισινόμ αποφασισμέ τι συνεχίναβ τι σικλιάβ, ντα τι νταβ μπέσα κο Ιεχωβά σαρέ μι γκίσαρ. (Παρ. 3:5, 6) Λάβα παρηγοριά ντα χαρά κάνα σκεφτίναβα οντουλά σο κα κερέλ ο λαός ι Ιεχωβάσκο κο νεβό ντουνιάς. Σίγουρα, κα σικλιάς νεβέ πράγματα κατά Μπαρό Εκπαιδευτής αμαρό αλλά επίσης κα σικλιάς μπουτ πράγματα λέσκε-ντα! Ευχαριστώ ι Ιεχωβάς σαρέ οντουλένγκε σο σικλιαρντάς-μαν μέχρι ακανά ντα ι λατσσιμάσκε σο σικαντάς μάνγκε παρόλο σο να αξίναβα-λες.