1, 2. Καλά πράγματα μπορίνενα τι κερέν-αμέν τι ροβάς;

 ΜΠΑΖΙΜΑ σαρέ ροβάσα. Μπουτ φαρ μπορεί τι λελ-αμέν ροϊπέ επειδή νιωθίνασα χαρά. Μπέκιμ ροντέν κάνα αβιλό-πες κάτι μπουτ σημαντικός, σαρ για παράδειγμας κάνα μπιάντιλο τουμαρό χουρντό. Ή μπέκιμ ροντέν κάνα αντέν τουμαρέ γκοντιάτε εκ μπουτ σουκάρ πράγμας σο νακχλέν. Ή κάνα ντικχλέν εκχέ αμαλές σο τθερένας τι ντικχέν-λες σοράν από μπουτ μπρεσά.

² Ο πο μπουτ φαρ όμως, ροβάσα κάνα ισινάμ μπουτ στεναχωριμέ ντα κάνα τσσίντασα μπουτ. Για παράδειγμας, μπορεί τι ροβάσα κάνα εκ τζενό σο ντάας λέσκε μπέσα προδοντάς-αμέν. Επίσης μπορεί τι λελ-αμέν ροϊπέ κάνα ισινάμ νασφαλέ ντα ντουκχάσα για μπουτ βακίτι. Ή κάνα εκ τζενό σο μανγκάσα μπουτ μερέλα. Μπορεί τι νιωθίνασα σαρ ο Ιερεμίας κάνα ο Βαβυλώνιοι λιντέ ι Ιερουσαλήμ. Βοβ βακερντάς: «Λενιάκε πανιά τθάβντενα μι γιακχίνταρ . . . Μο γιακχά ροβένα συνέχεια, χωρίς τι τσσιναβέν».​—Θρ. 3:48, 49.

3. Σαρ νιωθίνελα ο Ιεχωβά κάνα ντικχέλα ότι λέσκε υπηρέτες τσσίντενα μπουτ; (Ησαΐας 63:9)

³ Ο Ιεχωβά τζανέλα μπουτ λατσσές καζόμ φορές ροντάμ αμαρέ ζωγιάτε ιτιρί κατά δυσκολίες σο νακχλάμ. Η Αγία Γραφή βακερέλα αμένγκε ότι ο Ιεχωβά τζανέλα ι κάθε στενοχώρια σο νακχάσα ντα ότι ασουνέλα-αμέν κάνα ντάσα βίκος για βοήθεια. (Ψαλμ. 34:15) Όμως, ο Ιεχωβά νανέ σάντε ότι ντικχέλα-αμέν ντα ασουνέλα-αμέν αλλά κερέλα πο μπουτ πράγματα. Βοβ ισί αμαρό ντατ ντα μανγκέλα-αμέν μπουτ. Οτθάρ κάνα ντικχέλα-αμέν τι ροβάς, στεναχωρίνελα μπουτ ντα τθάβντελα σουγκό για τι βοηθίνελ-αμέν.​—Διαβάνεν Ησαΐας 63:9.

4. Καλά παραδείγματα κα ντικχάς, ντα σο κα σικλιάς ι Ιεχωβάσκε;

⁴ Ο Ιεχωβά αντράλ πι Λαφίσταρ, βακερέλα αμένγκε σαρ νιωθίνελας κάνα ροβένας λέσκε υπηρέτες ντα σαρ βοηθιντάς-λεν. Μπορίνασα τι ντικχάς-λες ανταβά αντράλ κατά παράδειγμας  της Άννας, του Δαβίδ ντα του βασιλιά Εζεκία. Κα σικλιάς σόσκε ροβένας. Επίσης κα ντικχάς σαρ βοηθιντάς-λεν ο Ιεχωβά. Ντα τέλος κα σικλιάς σαρ παρηγορίνελα-αμέν ο Ιεχωβά κάνα νιωθίνασα στεναχωριμέ, κάνα ο γιαβερά προδόνενα-αμέν, ή κάνα χασαράσα αμαρί ελπίδα.

ΡΟΒΑΣΑ ΕΠΕΙΔΗ ΙΣΙΝΑΜ ΣΤΕΝΑΧΩΡΙΜΕ

5. Σαρ νιωθίνελας η Άννα;

⁵ Η Άννα νακχέλας μπουτ προβλήματα σο κερένας-λα τι ροβέλ. Ο ρομ ι Αννάκο τθερέλας ατζέκ εκ ρομνιά σο λάκο ναβ ισινέ Φενίννα. Βόι μισίνελας ι Αννά. Επίσης η Άννα να μπορίνελας τι κερέλ τσσαβέν, ενώ η Φενίννα τθερέλας μπουτέ τσσαβέν. (1 Σαμ. 1:1, 2) Η Φενίννα πρασάλας συνέχεια ι Αννά σο ναστί κερέλας τσσαβέν. Σαρ κα νιωθίνενας τουμέν άμα κα νακχένας κάτι ασακό; Η Άννα στεναχωρίνελας αζόμ μπουτ σο “ροβέλας ντα να χάλας” ντα τθερέλας «μπαρό κερκιπέ αντρέ πι γκίστε».​—1 Σαμ. 1:6, 7, 10.

6. Σο κερντάς η Άννα για τι λοκχιόλ λάκο γκι;

⁶ Σο κερντάς η Άννα για τι λοκχιόλ λάκο γκι; Εκ πράγμας σο κερντάς ισινέ ότι γκιλί κι σκηνή της μαρτυρίας για τι ντελ λατρεία κο Ντεβέλ. Οτθέ, μάλλον κάπου πασέ κι πόρτα της αυλής της σκηνής, «αρχισάλι τι προσευχίντιβελ κο Ιεχωβά ντα τι ροβέλ χωρίς τι λοκχιόλ λάκο γκι». Μολιντάς ι Ιεχωβάς: “Ντικχ μπαγιά ι ταλαιπωρία σο τσσίντελα τι δούλη ντα τθερ-μαν τι γκοντιάτε”. (1 Σαμ. 1:10β, 11) Η Άννα πουταρντάς πο γκι κο Ιεχωβά αντράλ κατά προσευχή. Κάνα ο Ιεχωβά ντικχλάς ι Αννά τι ροβέλ, πφανγκιλό λέσκο-ντα γκι. Πφαμπόλας λάκε μπουτ ντα μανγκέλας τι βοηθίνελ-λα!

7. Σαρ λοκχιλό ι Αννάκο γκι κάνα πουταρντάς πο γκι κο Ιεχωβά;

⁷ Σαρ νιωσάλι η Άννα κάνα πουταρντάς πο γκι κο Ιεχωβά αντράλ κατά προσευχή ντα ασουντάς κατά αρχιερέας Ηλεί ότι ο Ιεχωβά κα απαντίνελας λάκε; Η Γραφή βακερέλα: «Οτθάρ νασλί η τζουβέλ ντα χαλάς, ντα λάκο μούι να ντικχίντιβελας στεναχωριμέ». (1 Σαμ. 1:17, 18) Παρόλο σο οντουλά σο νακχέλας να αλλαξάλεας ατζέκ, η Άννα νιωθίνελας πο λατσσές. Ισινέ σίγουρη ότι ο Ιεχωβά κα αγαβέλας σαρ νιωθίνελας ντα σο νακχέλας ντα κα βοηθίνελας-λα. Βοβ ντικχλάς λάκι στεναχώρια, ασουντάς λάκο βίκος ντα ευλογιντάς-λα ντα κερντάς τσσαβέν.​—1 Σαμ. 1:19, 20· 2:21.

8, 9. Σαρ σικαβένα ο εδάφια Εβραίους 10:24, 25, σόσκε πρέπει τι κεράς ο πο λατσσό για τι τζας κο συναθροίσεις; (Ντικχέν ι φωτογραφία-ντα)

⁸ Σο σικλιάσα. Μήπως νακχένα εκ δυσκολία σο πφανγκέλα τουμαρό γκι; Μπορεί τι ροβένα επειδή μουλό εκ τζενό τουμαρέ φαμιλιάταρ ή εκ αμάλ τουμαρό. Κάνα νακχένα κάτι ασακό, ισί λογικός τι μανγκέν τι αβέν κορκορέ. Αλλά βοηθίνελα-αμέν μπουτ ο παράδειγμας ι Αννάκο. Λάκο γκι λοκχιλό μπουτ ντα λιντάς ζορ κάνα γκιλί κι σκηνή της μαρτυρίας. Αντικάς μπορίνελα τι λοκχιόλ τουμαρό-ντα γκι κάνα τζάνα κο συναθροίσεις, ατζέ-ντα άμα να ισινέν αζόμ λατσσές. (Διαβάνεν Εβραίους  10:24, 25) Κο συναθροίσεις, ασουνάσα εδάφια κατά Γραφή σο κερένα-αμέν τι σκεφτίνας λατσσέ πράγματα σο ντένα-αμέν ζορ. Ανταβά ισί εκ τρόπος σο ο Ιεχωβά βοηθίνελα-αμέν τι τσσιναβάς τι σκεφτίνας ο πράγματα σο πφανγκένα αμαρό γκι. Ανταβά βοηθίνελα-αμέν τι κεράς κουμάντος οντουλά σο νιωθίνασα, ατζέ-ντα άμα ο πράγματα να κα αλλάνεν σουγκό.

⁹ Κο συναθροίσεις, αμαρέ πφραλά ντα πφενιά ντένα-αμέν ζορ ντα σικαβένα αμένγκε καζόμ μπουτ μανγκένα-αμέν. Ντα νιωθίνασα πο λατσσές κάνα ισινάμ λέντζαρ. (1 Θεσ. 5:11, 14) Ντικχέν σο βακερντάς εκ ειδικός σκαπανέας σο χασαρντάς πι ρομνιά: «Μπάζιμα μανγκάβα τι ατσσάβ κορκορό επειδή ναστί τσσιναβάβα τι ροβάβ. Όμως, κάνα τζάβα κι συνάθροιση, λάβα ι ενθάρρυνση σο χρειαζίντιβαβα. Ο σουκάρ λάφια σο βακερένα μο πφραλά κοβλιαρένα μπαγιά μι ντουκχ. Καζόμ-ντα ανησυχία, ή στεναχώρια, τι νιωθίναβ πριν τι τζαβ κι συνάθροιση, οτθέ πάντα νιωθίναβα πο λατσσές». Κάνα ισινάμ κι συνάθροιση, ο Ιεχωβά μπορίνελα τι χρησιμοποιήνελ αμαρέ πφραλέν ντα πφενίν για τι βοηθίνεν-αμέν.

10. Σαρ μπορίνασα τι μοιάζας κι Άννα κάνα πφανγκιόλα μπουτ αμαρό γκι;

¹⁰ Εκ γιαβέρ τρόπος σο λοκχιλό ι Αννάκο γκι ισινέ κάνα βακερέλας κο Ιεχωβά αντράλ κατά προσευχή σαρ νιωθίνελας. Μπορίνενα τουμέν-ντα τι “μουκχέν οπράλ [κο Ιεχωβά] σο-ντα στεναχώρια τθερένα”, ντα τι αβέν σίγουροι ότι κα ασουνέλ-τουμέν. (1 Πέτρ. 5:7) Εκ πφεν σο μουνταρντέ λάκε ρομές τσορά, βακερντάς: «Πφαμπιλό αζόμ μπουτ μο γκι σο νιωθίναβας ότι να κα αβάβας ποτές λατσσές. Όμως, κάνα προσευχίντιβαβας μι λατσσέ Νταντέστε, κο Ιεχωβά, λοκχιόλας μο γκι. Μπάζιμα, ναστί αρακχάβας ο σωστά λάφια για τι βακεράβ λέσκε, αλλά βοβ αγαβέλας-μαν. Κάνα νιωθίναβας μπαρί ανησυχία ντα στεναχώρια, προσευχίντιβαβας για τι τθεράβ ειρήνη. Κάνα κεράβας-λες ανταβά, ηρεμίνελας μο γκι ντα μι γκοντί ντα αρακχάβας ι ζορ για τι συνεχίναβ». Κάνα τθάβντενα ροϊμάσαρ κο Ιεχωβά αντράλ κατά προσευχή για τι βακερέν λέσκε τουμαρέ ανησυχίες, βοβ ντικχέλα τουμαρέ δάκρυα ντα αγαβέλα τουμαρί ντουκχ. Ατζέ-ντα άμα ο πρόβλημας να νασέλα, ο Ιεχωβά μπορίνελα τι λοκχιαρέλ-τουμέν κατά πφαριπέ σο τθερένα τουμαρέ γκίστε ντα τι βοηθίνελ-τουμέν τι τθερέν ειρήνη. (Ψαλμ. 94:19· Φιλιπ. 4:6, 7) Επίσης, κα ευλογίνελ τουμαρί πίστη.​—Εβρ. 11:6.

ΡΟΒΑΣΑ ΚΑΝΑ Ο ΓΙΑΒΕΡΑ ΠΡΟΔΟΝΕΝΑ-ΑΜΕΝ

11. Σαρ νιωθίνελας ο Δαβίδ κάνα ο γιαβερά πφανγκένας λέσκο γκι;

¹¹ Ο Δαβίδ νακχλό μπουτ δυσκολίες πι ζωγιάτε σο κερντέ-λες τι ροβέλ. Μπουτ τζενέ μισίνενας-λες. Ατζέ-ντα μερικοί λέσκε αμαλένταρ ντα λέσκε τζενένταρ να ατσσιλέ αφοσιωμέ λέστε ντα προσπαθισάλε τι κερέν λέσκε ζιάνι. (1 Σαμ. 19:10, 11· 2 Σαμ. 15:10-14, 30) Κάποια στιγμή, γραφιντάς: «Χασαρντόμ μι ζορ ιτιρί κατά στεναχώριες σο τθεράβα· σαρί ι ιράτ σουσλιαράβα μο κρεβάτι με δάκρυα· ισί πφερντό μι ροϊμάσταρ». Σόσκε νιωθίνελας αντικάς ο Δαβίδ; «Ιτιρί σαρέ οντουλένταρ σο κυνηγίνενα-μαν», βακερντάς βοβ. (Ψαλμ. 6:6, 7) Κάνα ο γιαβερά προδόνενας ι Δαβιδίς πφανγκένας αζόμ μπουτ λέσκο γκι σο ναστί σταματίνελας τι ροβέλ.

12. Σαρ σικαβέλα ο εδάφιος Ψαλμός 56:8, καλέ πραγμάσκε ισινέ σίγουρος ο Δαβίδ;

¹² Παρόλο σο ο Δαβίδ νακχέλας μπαρέ δυσκολίες, ισινέ σίγουρος ότι ο Ιεχωβά μανγκέλας-λες. Γραφιντάς: «Ο Ιεχωβά κα ασουνέλ μο ροϊπέ». (Ψαλμ. 6:8) Εκ γιαβέρ φαρ, ο Δαβίδ βακερντάς ο σουκάρ λάφια σο ισί κο εδάφιος Ψαλμός 56:8. (Διαβάνεν) Κάνα διαβάνασα ανταλά λάφια, μπορίνασα τι αγαβάς ότι ο Ιεχωβά μανγκέλα-αμέν μπουτ ντα ότι τζανέλα σαρ νιωθίνασα. Ο Δαβίδ νιωθίνελας σαρ τι τσσουβέλας  ο Ιεχωβά λέσκε δάκρυα αντρέ εκχέ παγουρίστε ή τι γραφίνελας-λεν σε εκ βιβλίος. Ο Δαβίδ ισινέ σίγουρος ότι ο Ιεχωβά ντικχέλας ντα ντέλας-πες γκοντί λέσκι ντουκχ. Τθερέλας ι σιγουριά ότι λέσκο λατσσό Ντατ σο ισί κο ουρανός τζανέλας, όχι σάντε οντουλά σο νακχλόας, αλλά εμ σαρ κερντέ-λες τι νιωθίνελ σαρέ ανταλά.

13. Σο πρέπει τι ντας-αμέν γκοντί κάνα ο γιαβερά πληγώνενα-αμέν; (Ντικχέν ι φωτογραφία-ντα)

¹³ Σο σικλιάσα. Μήπως πφανγκιλό τουμαρό γκι επειδή εκ τζενό σο ντένας λέσκε μπέσα κερντάς κάτι σο πληγωντάς-τουμέν ή προδοντάς-τουμέν; Μπορεί τι πφαμπόλα τουμαρό γκι επειδή ο τζενό σο ισινέ τι παντρίνεν λέσαρ ή τουμαρό ρομ μουκχλάς-τουμέν ή μπέκιμ κάποιος σο μανγκένα-λες τσσιναντάς τι υπηρετίνελ ι Ιεχωβάς. Εκ πφραλ, σο λέσκι ρομνί κερντάς λουμνιπέ οπράλ πι μπιαβέστε ντα μουκχλάς-λες, βακερντάς: «Χασαρντόμας μι γκοντί ντα ναστί πακιάβας οντουβά σο αρακχλάς-μαν. Νιωθίναβας άχρηστος, ισινόμας μπουτ στεναχωριμέ ντα χολιαμέ». Άμα κάποιος προδοντάς-τουμέν ή πληγωντάς-τουμέν, μπορίνελα τι λοκχιόλ τουμαρό γκι επειδή τζανένα ότι ο Ιεχωβά να κα μουκχέλ-τουμέν ποτές. Ο πφραλ βακερντάς: «Αγαντόμ ότι ο τζενέ μπορεί μα τι αβέν πάντα αφοσιωμέ ο εκ κο γιαβέρ, αλλά ο Ιεχωβά πάντα κα αβέλ. Σο-ντα τι αβέλ-πες, βοβ κα αβέλ πάντα οτθέ. Να κα μουκχέλ πι αφοσιωμέ υπηρετόν». (Ψαλμ. 37:28) Επίσης ντεν-τουμέν γκοντί ότι η αγάπη ι Ιεχωβάσκι ισί πο ζουρανί κατά αγάπη σο σικαβένα ο τζενέ. Κάνα εκ τζενό προδόνελα-τουμέν, σίγουρα ντουκχαβέλα μπουτ τουμαρό γκι. Όμως ο Ιεχωβά να αλλάνελα ο τρόπος σο ντικχέλα-τουμέν. Τθερένα μπαρί αξία λέσκε γιακχίντε. (Ρωμ. 8:38, 39) Ανταβά σο τθερέλα σημασία ισί ότι σαρ-ντα τι συμπεριφερισάλο τουμένγκε εκ τζενό, τουμαρό Ντατ σο ισί κο ουρανός μανγκέλα-τουμέν.

14. Καλέ πραγμάσκε ισινάμ σίγουροι, σαρ βακερέλα ο εδάφιος Ψαλμός 34:18;

¹⁴ Άμα εκ τζενό προδοντάς-αμέν, μπορίνελα τι λοκχιόλ αμαρό γκι κατά λάφια ι Δαβιδίσκε σο ισί κο Ψαλμός 34:18. (Διαβάνεν) “Οντουλά σο ισί μπουτ στεναχωριμέ” μπέκιμ νιωθίνενα ότι να τθερένα τίποτα λατσσό τι μπεκλεντίνεν. Σαρ συμπεριφερίντιβελα ο Ιεχωβά οντουλέντε σο νιωθίνενα αντικάς επειδή κάποιος προδοντάς-λεν; Σαρ εκ λατσσό ντατ λέλα ανγκάλι πι τσσαβές σο ισί στεναχωριμέ ντα λοκχιαρέλα λέσκο γκι, αντικάς ο Ιεχωβά-ντα ισί πασέ αμέντε. Βοβ αγαβέλα αμαρί ντουκχ ντα ισί έτοιμος τι βοηθίνελ-αμέν. Μανγκέλα μπαγιά τι λοκχιαρέλ αμαρό γκι κάνα ισινάμ μπουτ στεναχωριμέ ντα νιωθίνασα άχρηστοι. Επίσης ντέλα-αμέν μπουτ υποσχέσεις σο μπορίνενα τι ντεν-αμέν ζορ για τι νταϊντίνας ο δυσκολίες σο τθεράσα ακανά.​—Ησ. 65:17.

 ΡΟΒΑΣΑ ΚΑΝΑ ΧΑΣΑΡΑΣΑ ΑΜΑΡΙ ΕΛΠΙΔΑ

15. Σόσκε ο Εζεκίας ισινέ αζόμ στεναχωριμέ ντα ροβέλας;

¹⁵ Κάνα ο βασιλιάς Εζεκίας του Ιούδα ισινέ 39 μπρεσένγκο, σικλιλό ότι τθερέλας εκ πφαρό νασφαλιπέ σο κα γκερέλας-λες κο μεριπέ. Ο Ιεχωβά βακερντάς κο Εζεκίας, αντράλ κατά προφήτης Ησαΐας, ότι κα μερέλας πι νασφαλιμάσταρ. (2 Βασ. 20:1) Κάνα ο Εζεκίας ασουντάς-λες ανταβά, ισινέ αζόμ στεναχωριμέ σο ροντάς μπουτ. Μολίνελας ι Ιεχωβάς τι βοηθίνελ-λες.​—2 Βασ. 20:2, 3.

16. Σαρ απαντιντάς ο Ιεχωβά κι προσευχή σο κερντάς ροϊμάσαρ ο Εζεκίας;

¹⁶ Κάνα ο Ιεχωβά ασουντάς ι προσευχή σο κερντάς ο Εζεκίας ντα ντικχλάς λέσκε δάκρυα, πφαμπιλό λέσκε ντα βακερντάς λέσκε: «Ασουντόμ τι προσευχή, ντικχλόμ το δάκρυα, ντα κα κεράβ-τουτ λατσσές». Ο Ιεχωβά τζιτζισάλο για τον Εζεκία ντα ντινάς πο λάφι λέστε, αντράλ κατά Ησαΐας, τι ντελ-λες ι ευκαιρία τι τζουβντιόλ πο μπουτ ντα τι σώνελ-λες κατά Ασσύριοι.​—2 Βασ. 20:4-6.

17. Σαρ στηρίνελα-αμέν ο Ιεχωβά κάνα τθεράσα εκ σοβαρός νασφαλιπέ; (Ψαλμός 41:3) (Ντικχέν ι φωτογραφία-ντα)

¹⁷ Σο σικλιάσα. Μήπως τθερένα εκ νασφαλιπέ σο ντικχίντιβελα ότι να τζάλα λατσσές; Κερέν προσευχή κο Ιεχωβά, ατζέ-ντα ροϊμάσαρ. Η Γραφή βακερέλα αμένγκε ότι “ο Ντατ σο τζιτζίνελα ι τζενένγκε αντράλ πι γκίσταρ ντα ο Ντεβέλ σο κοβλιαρέλα αμαρί ντουκχ σο-ντα τι νακχάσα κα κοβλιαρέλ αμαρί ντουκχ σαρέ κο στεναχώριες σο τθεράσα”. (2 Κορ. 1:3, 4) Αντιβές, ναστί μπεσάσα ότι ο Ιεχωβά κα νασκιαρέλ αμένταρ σαρέ ο προβλήματα, αλλά ισινάμ σίγουροι ότι κα στηρίνελ-αμέν. (Διαβάνεν Ψαλμός 41:3) Αντράλ πι πνευμάσταρ, ο Ιεχωβά ντέλα-αμέν ζορ, σοφία ντα ειρήνη αντρέ κο γκι για τι νταϊντίνας. (Παρ. 18:14· Φιλιπ. 4:13) Επίσης ντέλα-αμέν ζορ αντράλ κατά ελπίδα ότι κο μέλλον καέκ να κα αβέλ νασφαλό.​—Ησ. 33:24.

18. Καβά εδάφιος αρακχλέν σο λοκχιαρέλα τουμαρό γκι κάνα νακχένα μπαρέ δοκιμασίες; (Ντικχέν ο πλαίσιος « Λάφια σο Λοκχιαρένα Αμαρό Γκι ντα Κοσένα Αμαρέ Δάκρυα»)

¹⁸ Ο λάφια ι Ιεχωβάσκε λοκχιαρντέ ο γκι του Εζεκία. Αμαρό-ντα γκι μπορίνελα τι λοκχιόλ κάνα ασουνάσα οντουλά σο βακερέλα αμένγκε ο Ιεχωβά πι Λαφίστε. Κάνα ισινάμ πφανγκέ γκίσκε, ο λάφια ι Ιεχωβάσκε σο ισί κι Γραφή μπορίνενα τι λοκχιαρέν-αμέν ντα τι ηρεμίνεν-αμέν. (Ρωμ. 15:4) Κάνα εκ πφεν κι Δυτική Αφρική λιντάς αμπέρι ότι τθερέλας καρκίνος, ροβέλας μπουτ φαρ. Βόι βακερέλα: «Εκ εδάφιος σο ντέλα-μαν μπουτ ζορ ισί ο Ησαΐας 26:3. Παρόλο σο ο πο μπουτ φαρ ναστί νασκιαράσα ο πρόβλημας, ανταβά εδάφιος σικαβέλα αμένγκε ότι ο Ιεχωβά μπορίνελα τι ντελ-αμέν ηρεμία αντρέ κο γκι. Ανταγιά ηρεμία μπορίνελα τι βοηθίνελ-αμέν τι ελεγχίνας ο τρόπος σο αντιδράνασα κο δοκιμασίες». Τουμέν, αρακχλέν εκ εδάφιος σο λοκχιαρέλα τουμαρό γκι κάνα νακχένα δοκιμασίες  σο ντικχίντιβενα μπουτ δύσκολες, ή ατζέ-ντα ότι να υπαρχίντιβελα ελπίδα;

19. Σο μπεσάσα τι αβέλ ανγκλ’ αμέντε;

¹⁹ Ο τέλος ανταλέ ντουνιάσκο ισί πασέ ντα μπεσάσα ότι κα αβέν ατζέ πο μπουτ δυσκολίες σο κα ανέν ντουκχ ντα δάκρυα. Αλλά σαρ σικλιλάμ κατά Άννα, κατά Δαβίδ ντα κατά βασιλιάς Εζεκίας, ο Ιεχωβά ντικχέλα-αμέν κάνα ροβάσα ντα στεναχωρίντιβελα. Αμαρέ δάκρυα τθερένα μπαρί αξία λέσκε. Οτθάρ, κάνα νακχάσα πράγματα σο ανένα αμένγκε μπαρί ντουκχ, πρέπει σίγουρα τι πουτράς αμαρό γκι κο Ιεχωβά αντράλ κατά προσευχή. Πρέπει τι ατσσάς πασέ αμαρέ πφραλέντε ντα πφενίντε κι κχανγκιρί. Ντα τι συνεχίνας τι διαβάνας ι Γραφή σο λοκχιαρέλα αμαρό γκι. Μπορίνασα τι αβάς σίγουροι ότι, άμα κα συνεχίνας τι νταϊντίνας πιστά, ο Ιεχωβά κα ευλογίνελ-αμέν. Εκ τρόπος σο κα κερέλ-λες ανταβά ισί ότι κα κερέλ τι νικιόλ μπαγιά ο λάφι σο ντινάς τι νασκιαρέλ σαρέ ο δάκρυα σο τσσοράσα επειδή ισινάμ στεναχωριμέ, προδοντέ-αμέν ή χασαρντάμ αμαρί ελπίδα. (Αποκ. 21:4) Αζομάν κα ροβάς σάντε επειδή ισινάμ χαρούμενοι.