1-3. Σο να κερντάς εκ προφήτης κατά Ιούδας, ντα καβά ισινέ ο αποτέλεσμας; (Ντικχ ι φωτογραφία σο ισί κι αρχή.)

Ο ΒΑΣΙΛΙΑΣ του Ισραήλ, ο Ιεροβοάμ, κερντάας εκ θυσιαστήριος κι Βαιθήλ για τι ντελ λατρεία ψεύτικε ντεβλέντε. Ο Ιεχωβά μπουτσσαντάς εκχέ προφητής κατά Ιούδας τι βακερέλ κο Ιεροβοάμ ι τιμωρία σο κα αβέλας λέσκε. Ο ταπεινός προφήτης ντινάς καν ι Ιεχωβάς ντα βακερντάς κο Ιεροβοάμ λέσκι τιμωρία. Ο βασιλιάς νευριασάλο ι προφητίσαρ, αλλά ο Ιεχωβά αρακχαντάς-λες.—1 Βασιλέων 13:1-10.

² Ο Ιεχωβά ντινάς εντολή κο προφήτης μα τι χαλ ούτε τι πιλ κο Ισραήλ ντα βακερντάς λέσκε ότι έπρεπε τι βουρτίνελ πι τθεμέστε γιαβερέ ντρομέσταρ. Όταν βουρτίνελας πέσκε, ο προφήτης χουχάντιλο εκχέ πφουρέσταρ σο βακερντάς λέσκε ψέματα ότι τθερέλας εκ μήνυμας κατά Ιεχωβά. Οντουβά πφουρό καλιντάς ι προφητής πι κχερέστε για τι χαλ ντα τι πιλ. Ο προφήτης να ντινάς καν ι Ιεχωβάς ντα γκιλό κι πφουρέσκο κχερ. Ο Ιεχωβά να μπεϊντιντάς-λες ιτς ανταβά. Όταν ο προφήτης τζάλας πέσκε κχερέ, εκ λιοντάρι γκιλό οπρά-λέστε ντα μουνταρντάς-λες.—1 Βασιλέων 13:11-24.

³ Να τζανάσα σόσκε ο προφήτης αποφασιντάς τι ασουνέλ ι  πφουρές ντα μα τι ασουνέλ ι Ιεχωβάς. Αλλά τζανάσα ότι τσσιναντάς “τι πφιρέλ με μετριοφροσύνη” ι Ιεχωβάσαρ. (Διαβάνεν Μιχαίας 6:8) Η Γραφή βακερέλα ότι, για τι πφιρέλ κάποιος ι Ιεχωβάσαρ, πρέπει τι τθερέλ εμπιστοσύνη λέστε, τι ακολουθίνελ λέσκε οδηγίες ντα τι ντελ-λες καν. Ο τζενό σο ισί μετριόφρων τζανέλα ότι πρέπει τι προσευχίντιβελ συνέχεια. Άμα ο προφήτης ισινέ μετριόφρων, κα πουτσέλας ι Ιεχωβάς αν αλλαξάλεας Λέσκε οδηγίες. Μερικές φορές, αμέν-ντα πρέπει τι λας δύσκολες αποφάσεις, ντα μπορεί μα τι αγαβάς ξεκάθαρα σο μανγκέλα αμένταρ ο Ιεχωβά. Αλλά άμα ισινάμ μετριόφρονες, κα μανγκάς κατά Ιεχωβά τι οδηγίνελ-αμέν ντα αντικάς να κα κεράς σοβαρά λάθη.

4. Σο κα σικλιάς ανταλέ μαθημάστε;

⁴ Κο γιαβέρ μάθημας, σικλιλάμ σο ισί η μετριοφροσύνη ντα σόσκε ισί σημαντική αμένγκε αντιβές. Αλλά σαρ μπορίνασα τι αβάς πιο μετριόφρονες; Ντα καλά πράγματα μπορεί τι δοκιμάνεν αμαρί μετριοφροσύνη, δηλαδή τι σικαβέν άμα ισινάμ πραγματικά μετριόφρονες; Για τι ντικχάς ακανά τριν πράγματα σο μπορεί τι δοκιμάνεν αμαρί μετριοφροσύνη.—Παροιμίες 11:2.

5, 6. Σαρ σικαντάς ο Βαρζελαΐ ότι ισινέ μετριόφρων;

⁵ Ο τρόπος σο αντιδράνασα όταν ο πράγματα αμαρέ ζωγιάτε ή αμαρέ διορισμοί αλλάνενα, σικαβέλα άμα ισινάμ πραγματικά μετριόφρονες. Μπορίνασα τι λας εκ μάθημας κατά παράδειγμας του Βαρζελαΐ, σο ισινέ μπουτ λατσσό αμάλ του Βασιλιά Δαβίδ. Όταν ο Βαρζελαΐ ισινέ 80 μπρεσένγκο, ο Δαβίδ καλιντάς-λες για τι υπηρετίνελ-λες κο παλάτι. Παρόλο σο ισινέ λέσκε μπαρό προνόμιος, ο Βαρζελαΐ βακερντάς ότι κα αβέλας πιο λατσσό τι ντελ οντουβά διορισμός εκχέ μουρσέστε σο βακέρντιβελας Χιμάμ, σο μπορεί τι ισινέ λέσκο τσσαβό.—2 Σαμουήλ 19:31-37.

⁶ Σόσκε να δεχτιντάς ο Βαρζελαΐ ι πρόσκληση; Μήπως κερντάς-λες επειδή να μανγκέλας τι τθερέλ ευθύνες ή για τι τθερέλ εκ ήρεμη ζωή; Όχι, κερντάς-λες επειδή ισινέ μετριόφρων. Αγαντάς ντα δεχτιντάς ότι ο πράγματα λέσκε ζωγιάτε αλλαξάλεας. (Διαβάνεν Γαλάτες 6:4, 5) Σαρ ο Βαρζελαΐ, αντικάς αμέν-ντα πρέπει τι αβάς μετριόφρονες. Αντί τι τθεράς συνέχεια αμαρέ γκοντιάτε ο πράγματα σο μανγκάσα ή αντί τι συγκρίνας αμαρό νεαυτός γιαβερέντζαρ, τθεράσα αμαρέ γκοντιάτε τι ντας κο Ιεχωβά ο πιο λατσσό σο μπορίνασα. Ανταβά ισί πιο σημαντικός κατά διορισμούς ή κατά φήμη σο μπορεί τι τθεράς. (Γαλάτες 5:26) Άμα ισινάμ μετριόφρονες, κα συνεργαζίντιβας αμαρέ πφραλέντζαρ για τι δοξάνας ι Ιεχωβάς ντα τι βοηθίνας γιαβερέν.—1 Κορινθίους 10:31.

7, 8. Σαρ μπορίνελα η μετριοφροσύνη τι βοηθίνελ-αμέν μα τι στηρίντιβας αμαρέ νεαυτόστε;

⁷ Μπορεί τι αβέλ δύσκολος τι ατσσάς μετριόφρονες άμα κα ντιντιόν-αμέν πιο μπαρέ ευθύνες ή εξουσία. Μπορίνασα τι λας εκ μάθημας κατά παράδειγμας του Νεεμία. Όταν ο Νεεμίας λιντάς αμπέρι ότι ο τζενέ κι Ιερουσαλήμ τθερένας μπουτ προβλήματα, μολιντάς ι Ιεχωβάς τι βοηθίνελ-λεν. (Νεεμίας 1:4, 11) Ο Ιεχωβά απαντιντάς κι προσευχή σο κερντάς ο Νεεμίας. Ο Βασιλιάς Αρταξέρξης διοριντάς τον Νεεμία κυβερνήτη οντουλέ τθεμέστε. Παρόλο σο ισινέ ζουρανό ντα χουλανό, ο Νεεμίας ποτές να στηριντάς-πες πι νεαυτόστε. Ρόντελας ι κατεύθυνση ι Ιεχωβάσκι ντα διαβάνελας συνέχεια λέσκο Νόμος. (Νεεμίας 8:1, 8, 9) Ο Νεεμίας τθερέλας εξουσία οπράλ μπουτέ τζενέντε. Αλλά ποτές να χρησιμοποιηντάς οντιά εξουσία πέσκε ή για τι συμπεριφερίντιβελ με μπέτι τρόπος κο γιαβερά.—Νεεμίας 5:14-19.

⁸ Σαρ κερντάς ο Νεεμίας, άμα κα λας αμέν-ντα πιο μπουτ ευθύνες ή κα αλλάνελ  αμαρό διορισμός, πρέπει τι αβάς σίγουροι ότι κα ατσσάς μετριόφρονες. Να μανγκάσα τι στηρίντιβας σάντε κο ικανότητες σο τθεράσα ή κο πράγματα σο τζανάσα. Σαρ κα μπορίνελας εκ τζενό τι αρχίνελ τι στηρίντιβελ πι νεαυτόστε; Για παράδειγμας, εκ πρεσβύτερος μπορεί τι κερέλ πράγματα σο τθερένα τι κερέν με την εκκλησία χωρίς πρώτα τι προσευχίντιβελ. Ή μπορεί εκ πφραλ ή εκ πφεν τι λελ πρώτα εκ απόφαση ντα σοράν τι προσευχίντιβελ κο Ιεχωβά για τι ευλογίνελ οντιά απόφαση. Όμως, ο τζενό σο ισί μετριόφρων να στηρίντιβελα πι νεαυτόστε, ατζέ-ντα άμα κερέλα κάτι σο κερντάς-λες μπουτ φορές πριν. Πάντα ντέλα-πες γκοντί ότι ο ικανότητες λέσκε νανέ τίποτα ανγκλάλ κο ικανότητες σο τθερέλα ο Ιεχωβά. (Διαβάνεν Παροιμίες 3:5, 6) Αμαρέ ντιβεσέντε, μπουτ τζενέ ισί εγωιστές ντα προσπαθίνενα τι ξεχωρίνεν κατά γιαβερά τζενέ. Αλλά ο υπηρέτες ι Ιεχωβάσκε να μοιάζενα λέντε. Να σκεφτίνασα ότι επειδή τθεράσα ευθύνες ισινάμ πιο λατσσέ κατά γιαβερά σο ισί αμαρέ φαμιλιάτε ή αμαρέ εκκλησιάτε. Αντίθετα, ντάσα-αμέν γκοντί αμαρί θέση κι οργάνωση κι Ντεβλέσκι ντα συνεργαζίντιβασα αμαρέ πφραλέντζαρ ντα αμαρέ πφενίντζαρ.—1 Τιμόθεο 3:15.

9, 10. Σαρ μπορίνελα τι βοηθίνελ-αμέν η μετριοφροσύνη όταν ο γιαβερά κατηγορίνενα-αμέν άδικα;

⁹ Μπορεί τι αναστατώντιβας όταν κάποιος κατηγορίνελα-αμέν άδικα. Ανταβά  αβιλό-πες κι Άννα. Παρόλο σο λάκο ρομ μανγκέλας-λα μπουτ, η Άννα να ισινέ χαρούμενη. Η Φενίννα, η γιαβέρ ρομνί σο τθερέλας ο ρομ της Άννας, συνέχεια πφαριαρέλας-λα. Η Άννα μανγκέλας τι κερέλ τσσαβέν αλλά να μπορίνελας. Εκ ντιβές σο ισινέ μπουτ στεναχωριμέ, η Άννα γκιλί κι σκηνή της μαρτυρίας για τι προσευχίντιβελ. Ο Αρχιερέας Ηλεί ντικχλάς-λα τι ροβέλ ντα κατηγοριντάς-λα ότι ισινέ ματί! Η Άννα κα μπορίνελας τι νευριάνελ λέσαρ μπουτ. Όμως απαντιντάς κο Ηλεί με σεβασμός. Σοράν, η Άννα κερντάς εκ προσευχή σο σικαντάς ότι πακιάλας ντα μανγκέλας ι Ιεχωβάς.—1 Σαμουήλ 1:5-7, 12-16· 2:1-10.

¹⁰ Η μετριοφροσύνη μπορίνελα τι βοηθίνελ-αμέν τι “νικίνας ο κακός με το λατσσό”. (Ρωμαίους 12:21) Ο ντουνιάς ι Μπενγκέσκο ισί πφερντό πφιρνιπέ. Οτθάρ, δεν πρέπει τι αβέλ αμένγκε παράξενος όταν συμπεριφερίντιβενα αμένγκε με άδικος τρόπος. Παρόλο σο ανταβά μπορεί τι κερέλ-αμέν τι νευριάνας, πρέπει τι κεράς μπαρί προσπάθεια για τι ατσσικιαράς αμαρό νεαυτός. (Ψαλμός 37:1) Η ντουκχ μπορεί τι αβέλ πιο μπαρί όταν τθεράσα προβλήματα ι πφραλέντζαρ ντα ι πφενίντζαρ αντρέ κι εκκλησία. Άμα κα αβέλ-πες ανταβά, μανγκάσα τι μοιάζας κο Ιησούς. Η Γραφή βακερέλα: «Όταν προσβαλίνενας-λες, να προσβαλίνελας βοβ-ντα». Αλλά «μουκχέλας πο νεαυτός Οντουλέστε σο κρίνελα δίκαια». (1 Πέτρου 2:23) Ο Ιησούς ισινέ ταπεινός ντα τζανέλας ότι ο Ιεχωβά κα διορθώνελ σαρί ι αδικία. (Ρωμαίους 12:19) Αμέν-ντα μανγκάσα τι αβάς ταπεινοί ντα να  μανγκάσα “τι κεράς κακός οντουλένγκε σο κερένα αμένγκε κακός”.—1 Πέτρου 3:8, 9.

11, 12. (α) Σαρ μπορίνασα τι ατσσάς μετριόφρονες όταν ο γιαβερά ισαρένα-αμέν ή βακερένα αμένγκε σουκάρ λάφια; (β) Σαρ μπορίνασα τι σικαβάς ότι ισινάμ μετριόφρονες με το τρόπος σο ιριαβάσα-αμέν ντα συμπεριφερίντιβασα;

¹¹ Επίσης, αμαρί μετριοφροσύνη δοκιμάντιβελα όταν ο τζενέ ισαρένα-αμέν ή βακερένα αμένγκε σουκάρ λάφια. Η Εσθήρ ασουνέλας συνέχεια τι ισαρέν-λα. Ισινέ εκ κατά πιο σουκάρ τζουβλιά κι Περσία. Για εκ σαστό μπρες περιποιήνενας εμ λα εμ γιαβερέ τζουβλίν σο προσπαθίνενας σαρέ τι ταρτίνεν ι προσοχή του βασιλιά. Σοράν ο βασιλιάς τραμπιντάς την Εσθήρ για τι αβέλ λέσκι βασίλισσα. Αλλά σαρί οντιά προσοχή να αλλαντάς-λα. Η Εσθήρ να αμντίνελας ότι αβιλί μπουτ σημαντική. Ατσσιλί μετριόφρων, λατσσί ντα σεβαστική.—Εσθήρ 2:9, 12, 15, 17.

¹² Άμα ισινάμ μετριόφρονες, κα ιριαβάς-αμέν ντα κα συμπεριφερίντιβας με τρόπος σο σικαβέλα ότι σεβάνασα ι γιαβερέν σαρ αμαρό νεαυτός. Αντί τι ισαράς-αμέν ή τι προσπαθίνας τι εντυπωσιάνας ι τζενέν, προσπαθίνασα τι αβάς “ήσυχοι ντα ήρεμοι”. (Διαβάνεν 1 Πέτρου 3:3, 4· Ιερεμίας 9:23, 24) Ο τρόπος σο ντικχάσα αμαρό νεαυτός κα αγαντίντιβελ οντουλένταρ σο βακεράσα ντα κεράσα. Για παράδειγμας, μπορεί τι προσπαθίνασα τι κεράς ι γιαβερέν τι σκεφτίνεν ότι ισινάμ ξεχωριστοί επειδή κεράσα ή τζανάσα κάποια πράγματα ή επειδή τζανάσα σημαντικέ τζενέν. Ή μπορεί τι προσπαθίνασα τι σικαβάς ότι κερντάμ κάτι σημαντικός κορκορέ, παρόλο σο βοηθιντέ-αμέν γιαβερά-ντα τζενέ. Αλλά σκεφτίνεν ι Ιησούς. Κα μπορίνελας τι εντυπωσιάνελ ι τζενέν με τη σοφία σο τθερέλας. Όμως, ο Ιησούς κερέλας λάφι αντράλ κατά Λάφι ι Ντεβλέσκο. Να μανγκέλας τι δοξάνεν-λες ο τζενέ. Πάντα μανγκέλας τι τζαλ η δόξα κο Ιεχωβά.—Ιωάννης 8:28.

13, 14. Σαρ μπορίνελα τι βοηθίνελ-αμέν η μετριοφροσύνη τι λας σωστές αποφάσεις;

¹³ Πρέπει τι αβάς μετριόφρονες όταν λάσα αποφάσεις ή όταν ο γιαβερά λένα αποφάσεις σο επηρεάνενα-αμέν. Όταν ο απόστολος Παύλος μπεσέλας κι Καισάρεια, μανγκέλας τι τζαλ κι Ιερουσαλήμ για τι τελειώνελ ο έργος σο ντινάας-λες ο Ιεχωβά. Όμως, ο προφήτης Άγαβος βακερντάς λέσκε ότι, άμα γκιλόας, μπορεί τι τσσουβένας-λες φυλακή ντα τι μουνταρένας-λες. Ο πφραλά μολιντέ ι Παυλός μα τι τζαλ. Όμως, ο Παύλος αποφασιντάς τι τζαλ κι Ιερουσαλήμ. Μήπως κερντάς-λες ανταβά επειδή στηρίντιβελας πι νεαυτόστε; Όχι, ο Παύλος ισινέ μετριόφρων ντα τθερέλας εμπιστοσύνη κο Ιεχωβά σαρέ κο πράγματα. Ο πφραλά-ντα ισινέ μετριόφρονες. Οτθάρ, δεχτιντέ ι απόφαση σο λιντάς ντα μουκχλέ-λες τι νασέλ.—Πράξεις 21:10-14.

¹⁴ Η μετριοφροσύνη κα βοηθίνελ-αμέν τι λας σωστές αποφάσεις ατζέ-ντα άμα να μπορίνασα τι τζανάς ή τι ελεγχίνας σαρέ ο πράγματα. Για παράδειγμας, μπορεί τι σκεφτίνασα τι αρχίνας ι ολοχρόνια υπηρεσία. Αλλά σο κα αβέλ-πες άμα κα νασφάλιβας; Σο κα αβέλ-πες αν αμαρό ντατ ή αμαρί ντάι κα νασφάλιβεν ντα κα μανγκέν αμαρί βοήθεια; Σο κα κεράς όταν κα πφουρίλιβας; Να μπορίνασα τι απαντίνας σαρέ ανταλέ ερωτησιέντε, καζόμ-ντα τι προσευχίντιβας ή τι σκεφτίνας-λεν. (Εκκλησιαστής 8:16, 17) Όμως άμα τθεράσα εμπιστοσύνη κο Ιεχωβά, κα αγαβάς ντα κα δεχτίνας σο μπορίνασα ντα σο να μπορίνασα τι κεράς. Κα σκεφτίνας λατσσές ο πράγματα, κα μανγκάς συμβουλές κατά γιαβερά ντα, ο πιο σημαντικός, κα προσευχίντιβας κο Ιεχωβά για τι οδηγίνελ-αμέν. Σοράν, πρέπει τι ακολουθίνας οντουβά σο σικαβέλα αμένγκε ο πνεύμας ι Ιεχωβάσκο. (Διαβάνεν Εκκλησιαστής 11:4-6) Ο Ιεχωβά μπορίνελα τι ευλογίνελ  αμαρέ αποφάσεις ή μπορίνελα τι βοηθίνελ-αμέν τι αλλάνας ο στόχους σο τθεράσα.—Παροιμίες 16:3, 9.

15. Σαρ βοηθίνενα-αμέν ο σκέψεις σο κεράσα για τον Ιεχωβά τι ατσσάς ταπεινοί;

¹⁵ Σαρ μπορίνασα τι αβάς πιο μετριόφρονες; Κα ντικχάς σταρ τρόπους. Πρώτον, πρέπει τι κεράς σκέψεις για τον Ιεχωβά ντα τι σκεφτίνας λατσσές σο Ντεβέλ ισί. Όταν συγκρίνασα αμαρό νεαυτός ι Ιεχωβάσαρ, αγαβάσα καζόμ χουρντέ ισινάμ ανγκλά-λέστε ντα καζόμ χάνικ πράγματα τζανάσα. (Ησαΐας 8:13) Τι ντεν-τουμέν γκοντί ότι υπηρετίνασα ι Ζουρανέ Ντεβλές, όχι εκχέ τζενές ή εκχέ αγγελός. Όταν σκεφτίνασα-λες ανταβά, κα ταπεινώνας αμαρό νεαυτός «τελάλ κατά ζουρανό βας ι Ντεβλέσκο».—1 Πέτρου 5:6.

16. Σαρ αβάσα μετριόφρονες όταν σκεφτίνασα καζόμ μπουτ μανγκέλα-αμέν ο Ντεβέλ;

¹⁶ Εκ δεύτερος τρόπος για τι αβάς πιο μετριόφρονες ισί τι σκεφτίνας καζόμ μπουτ μανγκέλα-αμέν ο Ιεχωβά. Ο Παύλος βακερντάς ότι η εκκλησία μοιάζελα με το σώμας. Ο Ιεχωβά κερντάς σαρέ ο μέρη αμαρέ σωμάσκε τι αβέν σημαντικά. (1 Κορινθίους 12:23, 24) Αντικάς ο κάθε εκ αμένταρ-ντα ισί σημαντικός ι Ιεχωβάσκε. Να συγκρίνελα-αμέν γιαβερέντζαρ ούτε σταματίνελα τι μανγκέλ-αμέν όταν κεράσα λάθη. Μπορίνασα τι νιωθίνας ασφάλεια επειδή τζανάσα ότι ο Ιεχωβά μανγκέλα-αμέν.

17. Σαρ κα βοηθίντιβας όταν ρόντασα ο λατσσιπέ κο γιαβερά;

¹⁷ Τρίτον, κα αβάς πιο μετριόφρονες όταν ρόντασα ο λατσσιπέ κο γιαβερά, σαρ κερέλα ο Ιεχωβά. Αντί τι μανγκάς τι ταρτίνας πάντα ι προσοχή οπρ’ αμέντε ή τι βακεράς κο γιαβερά σο τι κερέν, κα μανγκάς συμβουλή λένταρ ντα κα δεχτίνας λένγκε ιδέες. (Παροιμίες 13:10) Χαιρίνασα οντουλέ πφραλένγκε ντα πφενίνγκε σο λένα προνόμια. Ντα ευχαριστίνασα ι Ιεχωβάς σο μουκχέλα-αμέν τι υπηρετίνας-λες σαρέ γιεκ.—1 Πέτρου 5:9.

18. Σαρ κα αβάς πιο μετριόφρονες όταν σικλιαράσα αμαρί συνείδηση;

¹⁸ Τέταρτον, κα αβάς πιο μετριόφρονες όταν χρησιμοποιήνασα ο συμβουλές σο ισί κι Γραφή για τι σικλιαράς αμαρί συνείδηση. Οντουλά συμβουλές σικλιαρένα-αμέν σαρ νιωθίνελα ντα σαρ σκεφτίνελα ο Ιεχωβά. Όταν σικλιάσα τι ντικχάς ο πράγματα αντικάς σαρ ντικχέλα-λεν ο Ιεχωβά, μπορίνασα τι λας αποφάσεις σο ευχαριστίνενα ι Ντεβλές. Καζόμ διαβάνασα, προσευχίντιβασα ντα κεράσα αμαρέ ζωγιάτε οντουλά σο σικλιάσα, αζόμ πιο ζουρανί κα αβέλ αμαρί συνείδηση. (1 Τιμόθεο 1:5) Σικλιάσα τι τσσουβάς ι γιαβερέν πιο οπρέ αμένταρ. Άμα αμέν κεράσα ανταλά πράγματα, ο Ιεχωβά ντέλα πο λάφι ότι κα “τελειώνελ αμαρό σικλιαριπέ”, ντα αντικάς κα βοηθίνελ-αμέν τι αβάς πιο μετριόφρονες.—1 Πέτρου 5:10.

19. Σο κα βοηθίνελ-αμέν τι ατσσάς πάντα μετριόφρονες;

¹⁹ Ντένα-τουμέν γκοντί ι προφητής κατά Ιούδας σο βακερντάμας λέσκε κι αρχή; Χασαρντάς πι ζωή ντα πι φιλία ι Ιεχωβάσαρ επειδή να ατσσιλό μετριόφρων. Αμέν όμως μπορίνασα τι ατσσάς μετριόφρονες ατζέ-ντα όταν ανταβά ισί δύσκολος. Ο παράδειγμας μπουτέ πιστέ τζενένγκο κατά πουρανέ μπρεσά μέχρι ακανά σικαβέλα ότι ανταβά μπορίνελα τι αβέλ-πες. Καζόμ πιο μπουτ υπηρετίνασα ι Ιεχωβάς, αζόμ πιο μπουτ κα στηρίντιβας λέστε. (Παροιμίες 8:13) Σαρ-ντα τι αβέν ο πράγματα αμαρέ ζωγιάτε, μπορίνασα τι συνεχίνας τι πφιράς ι Ιεχωβάσαρ. Ανταβά ισί ο πιο μπαρό προνόμιος σο μπορίνασα τι τθεράς. Οτθάρ, τι κεράς ο πιο λατσσό σο μπορίνασα για τι ατσσάς μετριόφρονες ντα τι πφιράς για πάντα ι Ιεχωβάσαρ.