1, 2. Σαρ ο Ιεχωβά ντέλα αντράλ πι γκίσταρ αμέντε;

Ο ΙΕΧΩΒΑ ισί εκ Ντεβέλ σο ντέλα αντράλ πι γκίσταρ. Σο-ντα τθεράσα αβέλα λέσταρ. Σαρέ ο πολύτιμα πράγματα σο ισί κι πφουβ ισί λέσκε, ντα βοβ χρησιμοποιήνελα-λεν για τι συνεχίνελ τι υπαρχίντιβελ ζωή. (Ψαλμός 104:​13-15· Αγγαίος 2:8) Κατά Αγία Γραφή, σικλιάσα σαρ ο Ιεχωβά χρησιμοποιηντάς ανταλά πολύτιμα πράγματα με θαυματουργικός τρόπος για τι ντελ πι λαόστε οντουλά σο χρειαζίντιβελα.

² Για παράδειγμας, ο Ιεχωβά ντινάς μάννα ντα πανί κο Ισραηλίτες κάνα τζουβντιόνας κι έρημος 40 μπρεσά. (Έξοδος 16:​35) Οτθάρ, τθερένας σαρέ οντουλά σο χρειαζίντιβενας. (Νεεμίας 9:​20, 21) Πιο σοράν, ο Ιεχωβά ντινάς ζορ κο προφήτης Ελισαιέ για τι αβγατίνελ ο χάνικ λάδι σο τθερέλας εκ πιστή χήρα. Ανταβά δώρος κατά Ντεβέλ βοηθιντάς-λα τι ποκινέλ πο μπόρτζια ντα τι ατσσόν λάκε λοβέ-ντα για τι τζουβντιόλ βόι ντα λάκε τσσαβέ. (2 Βασιλέων 4:​1-7) Ντα με τη βοήθεια ι Ιεχωβάσκι, ο Ιησούς κερντάς θαύματα για τι ντελ  χαμπέ, αλλά ατζέ-ντα λοβέ κάνα χρειαζίντιλο.​—Ματθαίος 15:​35-38· 17:27.

3. Σο κα ντικχάς ανταλέ μαθημάστε;

³ Ο Ιεχωβά μπορίνελα τι χρησιμοποιήνελ σο-ντα τραμπίνελα για τι βοηθίνελ πι υπηρετόν. Όμως, καλίνελα-λεν τι ντεν σο μπορίνενα βον για τι υποστηρίνεν λέσκι οργάνωση. (Έξοδος 36:​3-7· διαβάνεν Παροιμίες 3:9) Σόσκε ο Ιεχωβά μπεσέλα αμένταρ τι ντας λέστε αμαρέ πολύτιμε πραγματένταρ; Σαρ ο υπηρέτες ι Ιεχωβάσκε κο πουρανέ μπρεσά υποστηρίνενας ι αληθινή λατρεία; Σαρ χρησιμοποιήνελα η οργάνωση ο λοβέ σο ντιντιόνα κατά συνεισφορές αμαρέ ντιβεσέντε; Ανταβά μάθημας κα απαντίνελ ανταλέ ερωτησιέντε.

4. Σο σικαβάσα κο Ιεχωβά όταν υποστηρίνασα ι αληθινή λατρεία;

⁴ Ντάσα κο Ιεχωβά επειδή μανγκάσα-λες ντα εκτιμίνασα-λες. Όταν σκεφτίνασα σαρέ οντουλά σο κερντάς αμένγκε, αμαρό γκι συγκινίντιβελα. Ο βασιλιάς Δαβίδ νιωσάλο αντικάς κάνα εξηγιντάς σο χρειαζίντιβελας για τι χτίντιβελ ο ναός. Ο Δαβίδ βακερντάς ότι σο-ντα τθεράσα ισί κατά Ιεχωβά ντα σαρέ οντουλά σο ντάσα λέστε ισί πράγματα σο βοβ ντινάς-λεν αμέντε.​—Διαβάνεν 1 Χρονικών 29:​11-14.

5. Σαρ σικλιαρέλα-αμέν η Γραφή ότι εκ σημαντικός τρόπος τι ντας λατρεία ισί τι ντας οντουλένταρ σο τθεράσα χωρίς τι ντικχάς αμαρό συμφέρον;

⁵ Επίσης, ντάσα κο Ιεχωβά επειδή ανταβά ισί εκ τρόπος για τι ντας-λες λατρεία. Εκχέ φαντασιάτε, ο απόστολος Ιωάννης ασουντάς ι Ιεχωβάσκε υπηρετόν κο ουρανός τι βακερέν: «Άξιος ισινάν Ιεχωβά, αμαρό Ντεβέλ, τι λες ι δόξα ντα ι τιμή ντα ι ζορ, σόσκε τούι κερντάν-λεν σαρέ, ντα επειδή μανγκλάν-λες κερντιλέ ντα υπαρχίντιβενα». (Αποκάλυψη 4:​11) Σίγουρα, ο Ιεχωβά αξίνελα σαρί ι δόξα ντα ι τιμή, οτθάρ μανγκάσα τι ντας-λες ο πιο λατσσό σο τθεράσα. Αντράλ κατά Μωυσής, ο Ιεχωβά ντινάς εντολή κο Ισραηλίτες τι κερέν τριν γιορτές κάθε μπρες. Ανταλέ γιορτέντε, ντένας πουμαρέ πραγματένταρ κο Ιεχωβά για τι ντεν-λες λατρεία. Δεν έπρεπε τι “τζαν ανγκλάλ κο Ιεχωβά τσουτσέ βαστέντζαρ”. (Δευτερονόμιο 16:​16) Αμαρέ ντιβεσέντε-ντα, εκ σημαντικός τρόπος σο ντάσα λατρεία ισί τι ντας οντουλένταρ σο τθεράσα χωρίς τι ντικχάς αμαρό συμφέρον. Αντικάς, σικαβάσα ότι εκτιμίνασα ντα υποστηρίνασα ι οργάνωση ι Ιεχωβάσκι.

6. Σόσκε ισί λατσσό αμένγκε τι ντας; (Ντικχ ι φωτογραφία σο ισί κι αρχή)

⁶ Ισί λατσσό αμένγκε τι ντας αντράλ αμαρέ γκίσταρ ντα όχι σάντε τι λας. (Διαβάνεν Παροιμίες 29:​21) Σκεφτίνεν εκχέ χουρντέ τσσαβές σο λέλα εκ χουρντό χαρτζιλίκι πι νταντέσταρ ντα πι νταγιάταρ ντα σοράν χαλαβέλα χάνικ οντουλέ χαρτζιλικίσταρ για τι λελ λένγκε εκ δώρος. Σαρ νιωθίνελα ο ντατ ντα η ντάι ανταλέ δωρόσκε; Ή σκεφτίνεν εκχέ τερνέ σκαπανεάς σο μπεσέλα πι νταντέσαρ ντα πι νταγιάσαρ ντα ντέλα-λεν χάνικ λοβέ για τι βοηθίνελ-λεν τι ποκινέν ο ενοίκιος ή τι κινέν χαμπέ ι φαμιλιάκε. Ο ντατ ντα η ντάι μπορεί μα τι μπεκλεντίνενα τι κερέλ-λες ανταβά, αλλά δεχτίνενα-λες. Σόσκε; Επειδή ανταβά ισί εκ τρόπος για τι σικαβέλ ότι εκτιμίνελα σαρέ οντουλά σο κερένα λέσκε. Αντικάς ο Ιεχωβά-ντα τζανέλα ότι ισί λατσσό αμένγκε τι ντας αμαρέ πολύτιμε πραγματένταρ.

7, 8. Σαρ ντινέ παράδειγμας ο υπηρέτες ι Ιεχωβάσκε κο πουρανέ μπρεσά όταν κερένας συνεισφορές (α) συγκεκριμέ πραγματένγκε; (β) για τι υποστηρίνεν οντουλέν σο τθερένας ι ευθύνη κι Ντεβλέσκο λαός;

⁷ Κατά Γραφή, σικλιάσα ότι ο υπηρέτες ι Ιεχωβάσκε κερένας συνεισφορές για τι υποστηρίνεν ι αληθινή λατρεία. Μερικές φορές ντένας για τι αβέν-πες συγκεκριμέ πράγματα. Για παράδειγμας, ο Μωυσής ενθαρρυντάς ι Ισραηλιτέν τι ντεν πουμαρέ πραγματένταρ για τι κερντιόλ η σκηνή της μαρτυρίας. Πιο σοράν, ο βασιλιάς Δαβίδ κερντάς ο ίδιος για το χτίσιμος ι ναόσκο. (Έξοδος 35:5· 1 Χρονικών 29:​5-9) Κάνα κυβερνίνελας ο βασιλιάς Ιωάς, ο ιερείς χρησιμοποιηντέ ο λοβέ σο ντινάας ο λαός για τι λατσσαρέν ο ναός. (2 Βασιλέων 12:4, 5) Κο πρώτος αιώνας, ο Χριστιανοί λιντέ αμπέρι ότι αβιλί μποκχ κι Ιουδαία ντα ότι ο πφραλά χρειαζίντιβενας βοήθεια. Οτθάρ, κάθε Χριστιανός αποφασιντάς τι μπουτσσαβέλ σο μπορίνελας κο πφραλά οτθέ.​—Πράξεις 11:​27-30.

⁸ Ο υπηρέτες ι Ιεχωβάσκε κερένας επίσης συνεισφορές για τι υποστηρίνεν οντουλέν σο τθερένας ι ευθύνη κι Ντεβλέσκο λαός. Για παράδειγμας, κο Μωσαϊκός Νόμος, ο Λευίτες να τθερένας κληρονομιά σαρ τθερένας ο γιαβερά φάρες. Οτθάρ, ο γιαβερά Ισραηλίτες ντένας συχνά κο Λευίτες πουμαρέ πραγματένταρ για τι υποστηρίνεν-λεν. Αντικάς, ο Λευίτες κα μπορίνενας τι ατσσόν αφοσιωμέ κο μπουτιά σο κερένας κι σκηνή της μαρτυρίας. (Αριθμοί 18:​21) Επίσης, κάποια τζουβλιά ντένας αντράλ πουμαρέ γκίσταρ οντουλένταρ σο τθερένας για τι υποστηρίνεν ι Ιησούς ντα λέσκε αποστολόν.​—Λουκάς 8:​1-3.

9. Κατάρ αβένας ο συνεισφορές κο πουρανέ μπρεσά;

⁹ Ανταλά συνεισφορές σο κερένας ο υπηρέτες ι Ντεβλέσκε ισινέ πράγματα ή λοβέ σο ερεσένας λένγκε βαστέντε με διάφορους τρόπους. Ο Ισραηλίτες σο κερντέ συνεισφορές για τι κερντιόλ η σκηνή της μαρτυρίας μάλλον ντινέ πολύτιμα πράγματα σο αντέας κατά Αίγυπτος. (Έξοδος 3:​21, 22· 35:​22-24) Κο πρώτος αιώνας, μερικοί Χριστιανοί μπικιντέ πουμαρέ πράγματα, σαρ για παράδειγμας χωράφια ή κχερά, ντα αντέ ο λοβέ κο απόστολοι. Ο απόστολοι σοράν ιλιαβένας-λεν κο πφραλά ντα κο πφενιά σο τθερένας ανάγκη. (Πράξεις 4:​34, 35) Γιαβερά Χριστιανοί τσσουβένας λοβέ κι άκρη ντα κερένας συχνά συνεισφορές για τι υποστηρίνεν ι αληθινή λατρεία. (1 Κορινθίους 16:2) Άρα, κατά μπουτ χουλανέ μέχρι κο μπουτ τσορορέ, σαρέ μπορίνενας τι ντεν κάτι.​—Λουκάς 21:​1-4.

10, 11. (α) Σαρ μπορίνασα τι μοιάζας κο υπηρέτες κι Ιεχωβάσκε σο ντένας αντράλ πουμαρέ γκίσταρ κο πουρανέ μπρεσά; (β) Σαρ νιωθίνενα τουμέν όταν υποστηρίνενα ι οργάνωση ι Ιεχωβάσκι;

¹⁰ Αμαρέ ντιβεσέντε, μπορεί τι χρειαζίντιβελ τι ντας αμέν-ντα εκχέ συγκεκριμέ σκοπόσκε. Ίσως τουμαρί εκκλησία μανγκέλα τι λατσσαρέλ ι Αίθουσα Βασιλείας ή τι κερέλ εκ νεβί. Ή μπορεί ο γραφείος τμήματος τουμαρέ τθεμέστε τι χρειαζίντιβελα λατσσαριπέ. Επίσης, μπορεί τι βοηθίνας κο έξοδα αμαρέ συνελευσιάκε. Ή μπορεί κάποια πφραλά τι χρειαζίντιβενα αμαρί βοήθεια επειδή λένγκε τθεμέστε αβιλί-πες καταστροφή. Αμαρέ συνεισφορές υποστηρίνενα  επίσης οντουλέν σο ισί ιεραπόστολοι, ειδικοί σκαπανείς, επίσκοποι περιοχής ντα οντουλέν σο κερένα μπουτί κο κεντρικά γραφεία ντα κο γραφεία τμήματος σαρό κο ντουνιάς. Επίσης, τουμαρί εκκλησία μπορεί τι ντέλα συνεισφορές συχνά για τι χτίντιβεν Αίθουσες Συνελεύσεων ντα Αίθουσες Βασιλείας αμαρέ πφραλένγκε σαρί κι πφουβ.

¹¹ Σαρέ μπορίνασα τι ντας κάτι για τι υποστηρίνας ο πράγματα σο κερέλα η οργάνωση ι Ιεχωβάσκι ανταλέ τελευταίε ντιβεσέντε. Ο πιο μπουτ φαρ, να τζανάσα κον κερέλα συνεισφορές. Όταν τσσουβάσα λοβέ κο κουτιά σο ισί κο Αίθουσες Βασιλείας ή κεράσα ηλεκτρονικές συνεισφορές αντράλ κατά jw.org, να βακεράσα κο γιαβερά καζόμ ντινάμ. Σο αβέλα-πες όμως άμα αμντίνενα ότι τουμαρέ χουρντέ συνεισφορές να τθερένα μπαρί αξία; Κι πραγματικότητα, ο πιο μπουτ συνεισφορές σο ντιντιόνα κι οργάνωση νανέ χάνικ ντα μπαρέ αλλά μπουτ ντα χουρντέ. Ατζέ-ντα αμαρέ πφραλά σο τθερένα μπουτ χάνικ λοβέ κερένα οντουβά σο κερντέ ο πρώτοι Χριστιανοί κι Μακεδονία. Βον ισινέ «μπουτ τσορορέ», αλλά μολίνενας για τι μπορίνεν τι ντεν, ντα τελικά ντινέ αντράλ πουμαρέ γκίσταρ.​—2 Κορινθίους 8:​1-4.

12. Σαρ προσπαθίνελα η οργάνωση τι χρησιμοποιήνελ ο συνεισφορές καζόμ πιο λατσσές αβέλα-πες;

¹² Ο πφραλά κατά Κυβερνών Σώμας ισί πιστοί ντα φρόνιμοι κο τρόπος σο χρησιμοποιήνενα ο συνεισφορές. (Ματθαίος 24:​45) Προσευχίντιβενα για τι λεν λατσσέ αποφάσεις ντα σκεφτίνενα προσεκτικά σαρ κα χρησιμοποιήνεν ο λοβέ. (Λουκάς 14:​28) Κο πουρανέ μπρεσά, υπαρχίντιβενας πιστά μουρσά σο ισινέ υπεύθυνοι για τι χρησιμοποιήντιβεν ο συνεισφορές σάντε κι λατρεία κι Ιεχωβάσκι. Για παράδειγμας, ο Έσδρας όταν βουρτισάλο κι Ιερουσαλήμ τθερέλας πολύτιμα πράγματα σο ντινάας ο Πέρσης βασιλιάς, χρυσάφι, ασήμι ντα γιαβερά θησαυρούς σο αμαρέ ντιβεσέντε κα αξίνενας πιο μπουτ από 85 εκατομμύρια ευρώ. Ο Έσδρας ντικχέλας ανταλά πράγματα σαρ δώρα σο έπρεπε τι ντιντιόν κο Ιεχωβά. Οτθάρ, ντινάς συγκεκριμέ οδηγίες για τι αρακχαβέν-λεν καζόμ κα νακχένας επικίνδυνε τθεμένταρ. (Έσδρας 8:​24-34) Μπουτ μπρεσά πιο σοράν, ο απόστολος Παύλος γκιντιντάς λοβέ για τι ντιντιόλ βοήθεια κο πφραλά σο τθερένας ανάγκη κι Ιουδαία. Κερντάς πράγματα για τι αβέλ σίγουρος ότι οντουλά σο κα γκερένας ο λοβέ κα “αβένας τίμιοι σαρέ κο πράγματα, όχι σάντε κο γιακχά κι Ιεχωβάσκε, αλλά κι τζενένγκε γιακχά-ντα”. (Διαβάνεν 2 Κορινθίους 8:​18-21) Αμαρέ ντιβεσέντε, η οργάνωση κερέλα οντουβά σο κερέλας ο Έσδρας ντα ο Παύλος, ντα χρησιμοποιήνελα ο συνεισφορές μπουτ προσεκτικά.

13. Σόσκε η οργάνωση κερντάς συγκεκριμέ αλλαγές κο τελευταία μπρεσά;

¹³ Ο τζενέ εκχέ φαμιλιάτε μπορεί τι κερέν αλλαγές κο τρόπος σο χρησιμοποιήνενα πουμαρέ λοβέ για μα τι χαλαβέν πιο μπουτ οντουλένταρ σο νικαβένα. Ή μπορεί τι ρόντεν τρόπους τι τζουβντιόν πιο απλά για τι μπορίνεν τι κερέν πιο μπουτ ι Ιεχωβάσκε. Ο ίδιος κερέλα η οργάνωση ι Ιεχωβάσκι-ντα. Κο τελευταία μπρεσά, αβιλέ-πες μπουτ σουκάρ νεβέ πράγματα, ντα μπάζιμα, χαλάντιβενας πιο μπουτ λοβέ οντουλένταρ σο γκιντίντιβενας. Οτθάρ η οργάνωση, σαρ εκ φαμιλί, ρόντελα τρόπους για τι χαλαβέλ πιο χάνικ λοβέ ντα τι κερέλ ο μπουτιά με πιο απλός τρόπος, για τι μπορίνελ τι κερέλ καζόμ πιο μπουτ πράγματα αβέλα-πες με το συνεισφορές σο ντένα αντράλ τουμαρέ γκίσταρ.

14-16. (α) Καλέ πραγματένγκε χρησιμοποιήντιβενα τουμαρέ συνεισφορές; (β) Σαρ βοηθιντέ-τουμέν ανταλά πράγματα;

¹⁴ Μπουτ πφραλά σο ισί μπρεσά κι αλήθεια βακερένα ότι ακανά η οργάνωση ντέλα-λεν πιο μπουτ πνευματικά δώρα σαρέ κατά γιαβερά μπρεσά σο νακχλέ. Ακανά τθεράσα ο ιστότοπος jw.org ντα ο JW Broadcasting. Τθεράσα ι Μετάφραση Νέου Κόσμου πιο μπουτ τσσιμπέντε. Κο 2014/2015, ο Διεθνείς Συνελεύσεις «Να Επιζητείτε Πρώτα τη Βασιλεία του Θεού!» σο ισινέ τρινέ ντιβεσένγκε αβιλέ-πες σε μπουτ μπαρέ γήπεδα σε 14 πόλεις σαρό κο ντουνιάς. Σαρέ οντουλά σο γκιλέ χαιρισάλεας μπουτ!

¹⁵ Μπουτ πφραλά βακερντέ καζόμ εκτιμίνενα οντουλά δώρα σο ντέλα ι Ιεχωβάσκι οργάνωση. Για παράδειγμας, εκ αντρόγυνος σο υπηρετίνελα κι Ασία γραφιντάς: «Διορισάλαμ τι υπηρετίνας σε εκ χουρντί πόλη. Οτθάρ, μπάζιμα νιωθίνασα ντουρ κατά γιαβερά πφραλά ντα ισί εύκολος τι μπιστράς καζόμ μπουτ πράγματα κερέλα η οργάνωση ι Ιεχωβάσκι. Αλλά κάνα παρακολουθίνασα ο διάφορα προγράμματα κο JW Broadcasting, ντάσα-αμέν γκοντί ότι τθεράσα πφραλέν ντα πφενίν σαρό κο ντουνιάς. Αμαρέ αγαπητά πφραλά ντα πφενιά ατθέ μπεϊντίνενα μπουτ ο JW Broadcasting. Μπουτ φαρ ασουνάσα-λεν τι βακερέν ότι, κάνα παρακολουθίνενα ο προγράμματα σο νικιόνα κάθε μάσεκ, νιωθίνενα πασέ κο Κυβερνών Σώμας. Ακανά νιωθίνενα ατζέ πιο σουκάρ σο ισί αντρέ κι οργάνωση κι Ντεβλέσκι».

¹⁶ Ακανά σαρό κο ντουνιάς, χτίντιβενα ή λατσσάρντιβενα σχεδόν 2.500 Αίθουσες Βασιλείας. Ο πφραλά εκχέ εκκλησιάτε κι Ονδούρα βακερντέ ότι μανγκένας μπουτ τι τθερέν πουμαρί Αίθουσα Βασιλείας, ντα ακανά ανταβά αβιλό-πες. Βον γραφιντέ: «Χαιρίνασα μπουτ σο ισινάμ αντρέ κι φαμιλί κι Ιεχωβάσκι ντα σο τθεράσα λατσσέ πφραλέν ντα πφενίν σαρό κο ντουνιάς». Μπουτ πφραλά νιωθίνενα αντικάς όταν λένα ι Γραφή ντα γιαβερά έντυπα πουμαρέ τσσιμπάτε, όταν ο γιαβερά πφραλά ντα πφενιά βοηθίνενα-λεν μετά από εκ  καταστροφή ή όταν ντικχένα ο λατσσέ αποτελέσματα σο τθερέλα η δημόσια μαρτυρία λένγκε τθανέστε.

17. Σαρ τζανάσα ότι ο Ιεχωβά υποστηρίνελα πι οργάνωση αμαρέ ντιβεσέντε;

¹⁷ Μπουτ τζενέ σο νανέ Μάρτυρες του Ιεχωβά ναστί αγαβένα σαρ κεράσα σαρέ ανταλά πράγματα σάντε ι λοβέντζαρ σο ντένα τζενέ αντράλ πουμαρέ γκίσταρ. Εκ τζενό από εκ μπαρί εταιρία γκιλό τι ντικχέλ εκ κατά τθανά σο τθεράσα για τι εκτυπώνας ο έντυπα. Σαστισάλο όταν σικλιλό ότι σαρί η μπουτί αβέλα-πες τζενένταρ σο να ποκίντιβενα, λοβέντζαρ σο ντένα τζενέ αντράλ πουμαρέ γκίσταρ ντα χωρίς ποτές τι μανγκέν λοβέ καεκχέσταρ. Βακερντάς ότι κανονικά ανταβά σο κεράσα ναστί αβέλα-πες. Συμφωνίνασα! Τζανάσα ότι μπορίνελα τι αβέλ-πες σάντε επειδή ο Ιεχωβά υποστηρίνελα πι οργάνωση.​—Ιώβ 42:2.

18. (α) Σο ευλογίες τθεράσα κάνα ντάσα για τι υποστηρίνας ι Βασιλεία; (β) Σαρ μπορίνασα τι σικλιαράς αμαρέ τσσαβέν ντα οντουλέν σο ισί νεβέ τι κερέν ο ίδιος;

¹⁸ Ο Ιεχωβά ντέλα-αμέν ο προνόμιος ντα ι ευκαιρία τι ντας για τι υποστηρίνας ι Βασιλεία. Βοβ βακερέλα ότι όταν κεράσα-λες ανταβά, σίγουρα κα ευλογίνελ-αμέν. (Μαλαχίας 3:​10) Ο Ιεχωβά ντέλα πο λάφι ότι άμα ντάσα αντράλ αμαρέ γκίσταρ, ο πράγματα κα τζαν λατσσές αμένγκε. (Διαβάνεν Παροιμίες 11:​24, 25) Επίσης, βακερέλα αμένγκε ότι κα αβάς ευτυχισμέ όταν ντάσα, σόσκε «ισί πιο ευτυχισμέ εκ τζενό όταν ντέλα παρά όταν λέλα». (Πράξεις 20:​35) Οντουλέντζαρ σο βακεράσα ντα κεράσα, μπορίνασα τι σικλιαράς αμαρέ τσσαβέν ντα οντουλέν σο ισί νεβέ σαρ τι κερέν συνεισφορές ντα αντικάς τι απολαμβάνεν μπουτ ευλογίες.

19. Σαρ ενθαρρυντάς-τουμέν ανταβά μάθημας;

¹⁹ Σο-ντα τθεράσα αβέλα κατά Ιεχωβά. Όταν ντάσα λέστε, σικαβάσα ότι μανγκάσα-λες ντα ότι εκτιμίνασα σαρέ οντουλά σο κερντάς αμένγκε. (1 Χρονικών 29:​17) Όταν ο Ισραηλίτες κερντέ συνεισφορές για τι χτίντιβελ ο ναός, “χαιρισάλε μπουτ σο ντινέ ανταλά πράγματα αντράλ πουμαρέ γκίσταρ, επειδή αντέ-λεν κο Ιεχωβά σαστέ γκίσαρ”. (1 Χρονικών 29:9) Μακάρι αμέν-ντα τι συνεχίνας τι αβάς χαρούμενοι ντα ικανοποιημέ καζόμ ντάσα κο Ιεχωβά οντουλέ πραγματένταρ σο ντινάς-αμέν βοβ.