1, 2. (α) Σαρ επηρεαντάς ο εδάφιος Ησαΐας 41:​10 ι πφενιά Γιόσικο; (β) Κάσκε αρακχαντάς ο Ιεχωβά ανταλά λάφια;

ΕΚ ΠΙΣΤΗ πφεν, η Γιόσικο, λιντάς εκ μπέτι αμπέρι. Λάκι γιατρός βακερντάς λάκε ότι να κα τζουβντιόλας μπουτ μάσεκ. Σο κερντάς η Γιόσικο; Ντινάς-πες γκοντί εκ αγαπημέ εδάφιος, ο Ησαΐας 41:​10. (Διαβάνεν) Ισινέ ήρεμη ντα βακερντάς κι γιατρός ότι να νταρέλας, επειδή ο Ιεχωβά ασταρέλας σικίς λάκο βας. * Ο λάφια ανταλέ εδαφιόσκε παρηγοριντέ αμαρέ αγαπημέ πφενιά ντα βοηθιντέ-λα τι τθερέλ σαρί πι εμπιστοσύνη κο Ιεχωβά. Ο ίδιος εδάφιος μπορίνελα τι βοηθίνελ αμέν-ντα τι ατσσάς ήρεμοι κάνα νακχάσα μπαρέ δοκιμασίες. Για τι αγαβάς σαρ μπορίνελα τι αβέλ-πες ανταβά, πρώτα κα ντικχάς σόσκε ο Ντεβέλ βακερντάς κο Ησαΐας τι γραφίνελ ανταλά λάφια.

² Κι αρχή, ο Ιεχωβά βακερντάς κο Ησαΐας τι γραφίνελ ανταλά λάφια για τι παρηγορίνελ ι Ιουδαιόν σο κα γκερένας-λεν κι Βαβυλώνα. Όμως, ο Ιεχωβά αρακχαντάς ανταλά λάφια όχι σάντε οντουλέ Ιουδαιόνγκε, αλλά σαρέ πι υπηρετόνγκε σο τζουβντιόνα μέχρι αντιβές. (Ησ. 40:8· Ρωμ. 15:4) Αντιβές, τζουβντιάσα ντιβεσέντε σο ισί «δύσκολα ντα επικίνδυνα», ντα χρειαζίντιβασα ατζέ πιο μπουτ ι ενθάρρυνση σο αρακχάσα κο βιβλίος Ησαΐας.​—2 Τιμ. 3:1.

3. (α) Καλά υποσχέσεις αρακχάσα κο εδάφιος Ησαΐας 41:​10, σο ισί ο εδάφιος ι μπρεσέσκο για το 2019; (β) Σόσκε χρειαζίντιβασα ανταλά υποσχέσεις;

³ Ανταλέ μαθημάστε, κα ντικχάς τριν υποσχέσεις ι Ιεχωβάσκε σο μπαριαρένα αμαρί πίστη ντα ισί γραμμέ κο εδάφιος Ησαΐας 41:​10: (1) Ο Ιεχωβά κα αβέλ αμέντζαρ, (2) βοβ ισί αμαρό  Ντεβέλ ντα (3) κα βοηθίνελ-αμέν. Χρειαζίντιβασα ανταλά υποσχέσεις επειδή, σαρ η Γιόσικο, αντικάς αμέν-ντα τθεράσα δοκιμασίες αμαρέ ζωγιάτε. Επίσης, τθεράσα προβλήματα σόσκε αβένα μπέτι πράγματα κο ντουνιάς. Μερικοί αμένταρ τθερένα ατζέ-ντα διωγμός κατά κυβερνήσεις. Για τι ντικχάς ανταλά τριν υποσχέσεις ξεχωριστά. *

4. (α) Καγιά ισί η πρώτη υπόσχεση σο κα ντικχάς; (Ντικχ ι υποσημείωση-ντα) (β) Σαρ σικαβέλα ο Ιεχωβά οντουλά σο νιωθίνελα αμένγκε; (γ) Σαρ επηρεάνενα-τουμέν ο λάφια ι Ντεβλέσκε;

⁴ Ο Ιεχωβά λοκχιαρέλα αμαρό γκι ακαλέ λαφίντζαρ: «Μα ντάρα, σόσκε με ισινόμ τούσαρ». * Ο Ιεχωβά σικαβέλα ότι ισί αμέντζαρ σόσκε τθερέλα πο γιακχά οπρ’ αμέντε ντα σικαβέλα αγάπη σο ταταρέλα-αμέν. Ντικχέν σαρ σικαβέλα ο Ιεχωβά οντουλά σο νιωθίνελα αμένγκε. Βακερέλα: «Αβιλάν πολύτιμος μι γιακχίντε, άξιος, ντα με μανγκλόμ-τουτ». (Ησ. 43:4) Τίποτα σαρό κο σύμπαν να μπορίνελα τι κερέλ ι Ιεχωβάς τι τσσιναβέλ τι μανγκέλ οντουλέν σο υπηρετίνενα-λες. Σο-ντα τι αβέλ-πες, ατσσόλα αφοσιωμέ αμέντε. (Ησ. 54:​10) Λέσκι αγάπη ντα λέσκι φιλία πφερένα-αμέν θάρρος. Κα αρακχαβέλ-αμέν, ακριβώς σαρ αρακχαβέλας πι αμαλές-ντα, τον Άβραμ (Αβραάμ). Ο Ιεχωβά βακερντάς λέσκε: «Μα ντάρα, Άβραμ. Με ισινόμ ασπίδα τούκε».​—Γέν. 15:1.

5, 6. (α) Σαρ τζανάσα ότι ο Ιεχωβά μανγκέλα τι βοηθίνελ-αμέν κάνα νακχάσα δοκιμασίες; (β) Σο σικλιάσα κατά Γιόσικο;

⁵ Τζανάσα ότι ο Ιεχωβά μανγκέλα τι βοηθίνελ-αμέν κάνα νακχάσα δοκιμασίες επειδή ντέλα πο λάφι πι λαόστε: «Κάνα νακχέσα αντράλ κατά πανιά, κα αβάβ τούσαρ, ντα κάνα νακχέσα κατά λενιά, να κα τασάντιβες. Κάνα πφιρέσα αντράλ κατά γιακχ, να κα πφαμπός». (Ησ. 43:2) Σο μανγκένα τι βακερέν ανταλά λάφια;

⁶ Ο Ιεχωβά να ντέλα πο λάφι ότι κα εξαφανίνελ ο πράγματα σο κερένα δύσκολη ι ζωή, αλλά να κα μουκχέλ ο μπουτ προβλήματα τι τασαβέν-αμέν σαρ «λενιά» ή ο δοκιμασίες σο ισί σαρ «γιακ» τι κερέν ζιάνι σο κα ατσσόλ αμένγκε. Ντέλα πο λάφι ότι κα αβέλ αμέντζαρ ντα κα βοηθίνελ-αμέν τι “νακχάς  αντράλ” ανταλέ δυσκολιένταρ. Σο κα κερέλ ο Ιεχωβά; Κα βοηθίνελ-αμέν τι νασκιαράς αμαρί νταρ για τι μπορίνας τι ατσσάς αφοσιωμέ λέστε, ατζέ-ντα ανγκλάλ κο μεριπέ. (Ησ. 41:​13) Η Γιόσικο αγαντάς-λες ανταβά. Λάκι τσσάι βακερέλα: «Κερέλας αμένγκε εντύπωση η ηρεμία αμαρέ νταγιάκι. Ντικχλάμ ότι ο Ιεχωβά βοηθίνελας-λα τι τθερέλ ειρήνη αντρά-πέστε. Μέχρι ο ντιβές σο μουλί, κερέλας λάφι κο γιατροί ντα κο γιαβερά νασφαλέ ι Ιεχωβάσκε ντα για το υποσχέσεις σο ντινάς». Σο σικλιάσα κατά Γιόσικο; Κάνα τθεράσα εμπιστοσύνη κι Ντεβλέσκι υπόσχεση «κα αβάβ τούσαρ», κα τθεράς αμέν-ντα θάρρος ντα ζορ καζόμ νταϊντίνασα δοκιμασίες.

7, 8. (α) Καγιά γιαβέρ υπόσχεση κα ντικχάς, ντα σο μανγκέλα τι βακερέλ; (β) Σόσκε βακερντάς ο Ιεχωβά κο Ιουδαίοι σο ισινέ κι Βαβυλώνα “μα τι ανησυχίνεν”; (γ) Καλά λάφια σο ισί κο εδάφια Ησαΐας 46:3, 4 πρέπει τι βοηθιντέ ι Ντεβλέσκε λαός μα τι νταρέλ;

⁷ Προσοχίνεν ι γιαβέρ υπόσχεση σο γραφιντάς ο Ησαΐας: «Μα ανησύχινε, σόσκε με ισινόμ το Ντεβέλ». Σο μανγκέλα τι βακερέλ ανταβά; Η λέξη σο μεταφράντιβελα ατθέ «ανησύχινε» σικαβέλα ότι «ντικχέσα παλάλ επειδή νταρέσα ότι κάτι ή κάποιος μπορεί τι κερέλ τούκε κακός» ή ότι «βραντίνεσα-τουτ σαρ εκ τζενό σο νταρέλα».

⁸ Σόσκε βακερντάς ο Ιεχωβά κο Ιουδαίοι σο κα γκερένας-λεν κι Βαβυλώνα “μα τι ανησυχίνεν”; Επειδή τζανέλας ότι ο τζενέ σο μπεσένας οντουλέ τθεμέστε κάποια στιγμή κα νταρένας. Σο κα κερέλας-λεν τι νταρέν; Κάνα κα ερεσένας κο τέλος ο 70 μπρεσά σο ισινέ ο Ιουδαίοι ντουρ πουμαρέ τθεμέσταρ, η Μηδοπερσία πι ζουρανέ στρατόσαρ κα κερέλας επίθεση κι Βαβυλώνα. Ο Ιεχωβά κα χρησιμοποιήνελας οντουλέ στρατός για τι ελευθερώνελ πι λαός κατά Βαβυλώνα. (Ησ. 41:​2-4) Κάνα ο Βαβυλώνιοι ντα ο τζενέ γιαβερέ τθεμένταρ σο τζουβντιόνας αζομάν σικλιλέ ότι ερεσέλας λένγκο ντουσμάνι, προσπαθιντέ τι ατσσικιαρέν πουμαρό θάρρος ντα βακερένας ο εκ κο γιαβέρ: «Τι αβές ζουρανό». Επίσης κερντέ πιο μπουτ ψεύτικε ντεβλέν ντα πακιάνας ότι κα αρακχαβένας-λεν. (Ησ. 41:​5-7) Οκιά μπάνταρ, ο Ιεχωβά κοβλιαρντάς ο γκι οντουλέ Ιουδαιόνγκο, ακαλέ λαφίντζαρ: «Τούι, Ισραήλ, [να ισινάν σαρ ο γιαβερά λαοί σο ισί πασέ τούτε] ισινάν μο υπηρέτης . . . Μα ανησύχινε, σόσκε με ισινόμ το Ντεβέλ». (Ησ. 41:​8-10) Προσοχίνεν ότι ο Ιεχωβά βακερντάς: «Με ισινόμ το Ντεβέλ». Ανταλέ λαφίντζαρ, ο Ιεχωβά βακερντάς πι πιστέ υπηρετόνγκε ότι σίγουρα να μπισταρντάς-λεν​—συνεχίνελας τι αβέλ λένγκο Ντεβέλ ντα βον συνεχίνενας τι αβέν λέσκο λαός. Βακερντάς λένγκε: «Κα γκεράβ-τουμέν . . . ντα κα ελευθερώναβ-τουμέν». Ανταγιά υπόσχεση σίγουρα ντινάς ζορ κο Ιουδαίοι σο ισινέ κι Βαβυλώνα.​—Διαβάνεν Ησαΐας 46:3, 4.

9, 10. Σόσκε να χρειαζίντιβελα τι νταράς; Βακερέν εκ παράδειγμας.

⁹ Ακανά, πιο μπουτ από ποτές, ο τζενέ ντονταλάι αμένταρ ανησυχίνενα επειδή ο ντουνιάς καζόμ τζάλα αβέλα χειρότερος. Σίγουρα, αμέν-ντα επηρεάντιβασα ανταλέ προβληματένταρ. Αλλά να χρειαζίντιβελα τι νταράς. Ο Ιεχωβά βακερέλα αμένγκε: «Με ισινόμ το Ντεβέλ». Σόσκε βοηθίνενα-αμέν μπουτ ανταλά λάφια μα τι νταράς;

¹⁰ Σκεφτίνεν ακαβά παράδειγμας: Ο Δημήτρης ντα ο Κώστας ταξιδίνενα εκχέ αεροπλανόσαρ σο κουνιάντιβελα κατά ζουρανί μπαρμπάλ. Καζόμ ο αεροπλάνος τζάλα οπρέ τελέ, ο πιλότος βακερέλα σαριλένγκε: «Ατσσόν τουμαρέ θεσιέντε ντα τθερέν τουμαρέ ζώνες πφαντέ. Ανταβά κα ατσσικιαρέλ χάνικ ατζέκ». Ο Δημήτρης ανησυχίνελα μπουτ. Αλλά αζομάν ο πιλότος βακερέλα: «Μα ανησυχίνεν. Κερέλα τουμέντζαρ λάφι ο πιλότος». Ο Δημήτρης να ντέλα μπέσα κο πιλότος ντα βακερέλα: «Ντα σο μανγκέλα τι  βακερέλ ανταβά;» Ντικχέλα όμως ότι ο Κώστας να ανησυχίνελα ιτς. Ο Δημήτρης πουτσέλα-λες: «Σαρ ισινάν αζόμ ήρεμος;» Ο Κώστας ασάλα ντα βακερέλα: «Τζανάβα μπουτ λατσσές ανταλέ πιλοτός. Ισί μο ντατ!» Επίσης, βακερέλα: «Κα μανγκάβας τι βακεράβ τούκε μι νταντέσκε. Ισινόμ σίγουρος ότι, κάνα κα σικλιός λέσκε πιο μπουτ ντα κα ντικχές καζόμ λατσσό ισί πι μπουτιάτε, κα ηρεμίνες τούι-ντα».

11. Σο σικλιάσα κατά παράδειγμας ι ντουέ τζενένγκο κο αεροπλάνος;

¹¹ Σο σικλιάσα ανταλέ παραδειγμάσταρ; Σαρ ο Κώστας, αντικάς αμέν-ντα ισινάμ ήρεμοι επειδή τζανάσα μπουτ λατσσές αμαρέ Νταντές σο ισί κο ουρανός, ι Ιεχωβάς. Τζανάσα ότι κα βοηθίνελ-αμέν τι νταϊντίνας ατζέ-ντα ο μπαρέ προβλήματα σο τθεράσα κο τελευταία ντιβεσά ανταλέ ντουνιάσκε. (Ησ. 35:4) Τθεράσα εμπιστοσύνη κο Ιεχωβά, οτθάρ να νταράσα κάνα ο γιαβερά τζενέ κο ντουνιάς ισί πφερντέ νταρ. (Ησ. 30:​15) Επίσης, ισινάμ σαρ ο Κώστας κάνα βακεράσα κο τζενέ σόσκε τι τθερέν εμπιστοσύνη κο Ντεβέλ. Αζομάν κα μπορίνεν βον-ντα τι αβέν σίγουροι ότι, σο-ντα δυσκολίες τι νακχέν, ο Ιεχωβά κα στηρίνελ-λεν.

12. (α) Καγιά ισί η τελευταία υπόσχεση σο κα ντικχάς; (β) Σο ντάσα-αμέν γκοντί κάνα διαβάνασα ότι ο Ιεχωβά “κα κερέλ κουμάντος πι ζουρανέ μουσιάσαρ”;

¹² Ντικχέν ι τελευταία υπόσχεση: «Κα νταβ-τουτ ζορ, βα, κα βοηθίναβ-τουτ». Πιο τζανγκλέ, ο Ησαΐας εξηγιντάας σαρ κα ντέλας ζορ ο Ιεχωβά πι λαόστε κάνα βακερντάς: «Ο . . . Ιεχωβά κα αβέλ ζοριάσαρ, ντα πι ζουρανέ μουσιάσαρ κα κερέλ κουμάντος». (Ησ. 40:​10) Η Γραφή μπουτ φαρ χρησιμοποιήνελα συμβολικά ι λέξη «μουσί» για τι σικαβέλ ι ζορ. Άρα, όταν διαβάνασα ότι ο Ιεχωβά «πι ζουρανέ μουσιάσαρ κα κερέλ κουμάντος» αβέλα αμαρέ γκοντιάτε ότι ισί ζουρανό Βασιλιάς. Πι μπουτ μπαρέ ζοριάσαρ, βοηθιντάς ντα αρακχαντάς πι υπηρετόν κο πουρανέ μπρεσά, ντα μέχρι  αμαρέ ντιβεσέντε ντέλα ζορ ντα αρακχαβέλα οντουλέν σο τθερένα λέσκε εμπιστοσύνη.​—Δευτ. 1:​30, 31· Ησ. 43:​10, υποσ.

13. (α) Κάνα μανγκέλα ατζέ πιο μπουτ ο Ιεχωβά τι ατσσικιαρέλ ο λάφι σο ντινάς τι ντελ-αμέν ζορ; (β) Καγιά υπόσχεση πφερέλα-αμέν ζορ ντα σιγουριά;

¹³ Κάνα ο ντουσμάνια τζάνα αμέντζαρ κόντρα, ο Ιεχωβά μανγκέλα ατζέ πιο μπουτ τι ατσσικιαρέλ ο λάφι σο ντινάς: «Κα νταβ-τουτ ζορ». Μερικέ τθεμέντε κο ντουνιάς αντιβές, αμαρέ ντουσμάνια κερένα σο νακχέλα λένγκε βαστέσταρ για τι τσσιναβέν αμαρό έργος ντα τι τσσουβέν απαγόρευση κι οργάνωση αμαρί. Αλλά αμέν να ανησυχίνασα μπουτ όταν κερένα αμένγκε ασακέ επιθέσεις. Ο Ιεχωβά ντινάς-αμέν ακαγιά υπόσχεση σο πφερέλα-αμέν ζορ ντα σιγουριά: «Καέκ όπλος σο κα κερντιόλ για τι κερέλ τούκε κακός να κα τθερέλ επιτυχία». (Ησ. 54:​17) Ανταβά ανέλα αμαρέ γκοντιάτε τριν σημαντικά πράγματα.

14. Σόσκε να κερέλα αμένγκε εντύπωση σο τσσουβένα-λεν αμέντζαρ ι Ντεβλέσκε ντουσμάνια;

¹⁴ Πρώτον, σαρ μαθητές ι Χριστόσκε, μπεκλεντίνασα ότι κα μισίνεν-αμέν. (Ματθ. 10:​22) Ο Ιησούς βακερντάς ότι ο τζενέ κο τελευταία ντιβεσά κα τζάνας μπαρί κόντρα λέσκε μαθητέντζαρ. (Ματθ. 24:9· Ιωάν. 15:​20) Δεύτερον, ο προφήτης Ησαΐας βακερντάς αμένγκε ότι αμαρέ ντουσμάνια, να κα μισίνεν-αμέν σάντε, αλλά κα χρησιμοποιήνεν μπουτ όπλα για τι τσσουβέν-λεν αμέντζαρ. Μπορεί τι μανγκέν τι χουχαβέν-αμέν, τι βακερέν μπαρέ ψέματα αμένγκε ντα τι τζαν αμέντζαρ μπαρί κόντρα. (Ματθ. 5:​11) Ο Ιεχωβά κα μουκχέλ αμαρέ ντουσμανίν τι χρησιμοποιήνεν ανταλά όπλα για τι τσσουβέν-λεν αμέντζαρ. (Εφεσ. 6:​12· Αποκ. 12:​17) Αλλά να χρειαζίντιβελα τι νταράς. Σόσκε;

15, 16. (α) Καβά ισί ο τρίτος πράγμας σο πρέπει τι ντας-αμέν γκοντί, ντα σαρ σικάντιβελα ανταβά κο εδάφια Ησαΐας 25:4, 5; (β) Σαρ σικαβένα ο εδάφια Ησαΐας 41:​11, 12 οντουλά σο κα αβέν-πες αμαρέ ντουσμανίνγκε;

¹⁵ Ντικχέν ο τρίτος πράγμας σο πρέπει τι ντας-αμέν γκοντί. Ο Ιεχωβά βακερντάς ότι «καέκ όπλος» σο κα κερντιόλ για τι κερέλ αμένγκε κακός «να κα τθερέλ επιτυχία». Σαρ  εκ ντουβάρι αρακχαβέλα-αμέν κατά καταστροφή σο ανέλα εκ μπαρό μπρισίμ, αντικάς ο Ιεχωβά-ντα αρακχαβέλα-αμέν κάνα “πφούντενα οντουλά σο ζορισκιαρένα ι γιαβερέν”. (Διαβάνεν Ησαΐας 25:4, 5) Αμαρέ ντουσμάνια ποτές να κα κερέν αμένγκε ζιάνι σο κα ατσσόλ.​—Ησ. 65:17.

¹⁶ Ο Ιεχωβά μπαριαρέλα ατζέ πιο μπουτ αμαρί εμπιστοσύνη Λέστε κάνα σικαβέλα αμένγκε ξεκάθαρα σο κα αβέλ-πες οντουλένγκε σο “νευριάνενα αμέντζαρ”. (Διαβάνεν Ησαΐας 41:​11, 12) Καζόμ-ντα χολί τι τθερέν αμένγκε ο ντουσμάνια, καζόμ-ντα μπαρό τζένγκι τι κερέν, τζανάσα σο κα αβέλ-πες: Σαρέ αμαρέ ντουσμάνια «κα εξαφανίντιβεν ντα κα χασάρντιβεν».

17, 18. (α) Σαρ μπαριόλα αμαρί εμπιστοσύνη κο Ντεβέλ κάνα διαβάνασα ι Γραφή; Βακερέν εκ παράδειγμας. (β) Σαρ κα βοηθίντιβας άμα κα σκεφτίνας ο εδάφιος ι μπρεσέσκο για το 2019;

¹⁷ Μπαριαράσα αμαρί εμπιστοσύνη κο Ιεχωβά κάνα σικλιάσα-λες πιο λατσσές. Ο μόνος τρόπος τι σικλιάς μπουτ λατσσές ι Ντεβλές ισί τι διαβάνας ι Γραφή προσεκτικά ντα τι σκεφτίνας οντουλά σο διαβάνασα. Η Γραφή βακερέλα σαρ ο Ιεχωβά αρακχαντάς πι λαός κο πουρανέ μπρεσά. Ανταλά λάφια σο ισί μπαγιά κερένα-αμέν τι αβάς σίγουροι ότι κα αρακχαβέλ αμέν-ντα αντιβές.

¹⁸ Ντικχέν σαβέ σουκάρ λαφίντζαρ σικαβέλα ο Ησαΐας ι Ιεχωβάσκο αρακχαϊπέ. Βακερέλα ότι ο Ιεχωβά ισί σαρ τσομπάνης ντα λέσκε υπηρέτες σαρ μπρακέ. Ο Ησαΐας βακερέλα: «[Ο Ιεχωβά] πι μουσιάσαρ κα γκίντελ ι μπρακέν, ντα πι αγκαλιάτε κα ασταρέλ-λεν». (Ησ. 40:​11) Κάνα νιωθίνασα ότι ο Ιεχωβά λέλα-αμέν πι ζουρανέ μουσιέντε, αισθάντιβασα αρακχαντέ ντα ήρεμοι. Για τι βοηθίνελ-αμέν τι ατσσάς ήρεμοι σο-ντα προβλήματα τι τθεράσα, ο πιστός ντα φρόνιμος δούλος τραμπιντάς ο Ησαΐας 41:​10 τι αβέλ ο εδάφιος ι μπρεσέσκο για το 2019: «Μα ανησύχινε, σόσκε με ισινόμ το Ντεβέλ». Τι σκεφτίνεν ανταλά λάφια. Κα ντεν-τουμέν ζορ ι δυσκολιένγκε σο κα αβέν.