1-3. (α) Σόσκε μανγκέλας ο Ιεχωβά ι Σολομωντάς, ντα καλά ευλογίες λιντάς ο Σολομών; (β) Καλά ερωτήσεις κα ντικχάς ανταλέ μαθημάστε;

Ο ΣΟΛΟΜΩΝ αβιλό βασιλιάς κο Ισραήλ κάνα ισινέ μπουτ τερνό. Αζομάν, ο Ιεχωβά σικαντάς-πες λέσκε κο σουνό ντα βακερντάς: «Μανγκ μάνταρ σο μανγκέσα τι νταβ-τουτ». Ο Σολομών βακερντάς: «Με ισινόμ τερνό ντα να τζανάβα μπουτ πράγματα. . . . Οτθάρ, ντε τι υπηρετίστε εκ γκι σο ντέλα καν για τι κρίνελ τι λαός». (1 Βασ. 3:​5-10) Ο Σολομών μανγκλάς «εκ γκι σο ντέλα καν» ντα ανταβά σικαντάς ότι ισινέ ταπεινός! Άκ’ σόσκε μανγκέλας-λες ο Ιεχωβά! (2 Σαμ. 12:​24) Αμαρό Ντεβέλ χαιρισάλο αζόμ μπουτ οντουλέσαρ σο μανγκλάς λέσταρ ο Σολομών σο ντινάς-λες «γκι σο τθερέλα σοφία ντα αγαβέλα».​—1 Βασ. 3:12.

² Καζόμ ισινέ πιστός, ο Σολομών τθερέλας μπουτ ευλογίες. Τθερέλας ο προνόμιος τι χτίνελ εκ ναός “ι Ιεχωβάσκε ναβέσκε, ι Ντεβλέσκε σο πακιάλας ο Ισραήλ”. (1 Βασ. 8:​20) Σαρέ τζανένας ότι ο Ντεβέλ ντινάας-λες σοφία. Ο πράγματα σο βακερντάς ι Ντεβλέσκε πνευμάσαρ γραφίντιλε τρινέ βιβλιόντε κι Αγία Γραφή. Εκ τανό ανταλένταρ ισί ο βιβλίος Παροιμίες.

³ Η λέξη «γκι» βακέρντιβελα περίπου εκατό φαρ κο βιβλίος Παροιμίες. Για παράδειγμας, ο εδάφιος Παροιμίες 4:​23 βακερέλα: «Πιο μπουτ σαρέ οντουλένταρ σο αρακχαβέσα, αράκχαβ το γκι». Σο μανγκέλα τι βακερέλ η λέξη «γκι» ανταλέ εδαφιόστε; Κα ντικχάς ι απάντηση ανταλέ μαθημάστε. Επίσης, κα ντικχάς ο απαντήσεις ακαλέ ντουέ ερωτησιέντε: Σο κερέλα ο Μπενγκ για τι μαγαρίνελ αμαρό γκι, ή γιαβέρτουλους τι τσσουβέλ γκεραλέ πράγματα αμαρέ γκίστε; Ντα σο μπορίνασα τι κεράς για τι αρακχαβάς αμαρό γκι; Για τι ατσσάς πιστοί κο Ντεβέλ, πρέπει τι αγαβάς ο απαντήσεις ανταλέ σημαντικέ ερωτησιέντε.

4, 5. (α) Σαρ βοηθίνελα-αμέν ο εδάφιος Ψαλμός 51:6 τι αγαβάς σο μανγκέλα τι βακερέλ η λέξη «γκι»; (β) Σαρ σικαβέλα η υγεία ι σωμάσκι καζόμ σημαντικός ισί οντουβά σο ισινάμ αντρ’ αμέντε;

⁴ Κο εδάφιος Παροιμίες 4:​23, η λέξη «γκι» μανγκέλα τι βακερέλ οντουβά σο ισινάμ αντρ’ αμέντε ή αμαρό «γκεραντό νεαυτός». (Διαβάνεν Ψαλμός 51:6 ντα υποσημείωση) Γιαβερέ λαφίντζαρ, ο «γκι» μανγκέλα τι βακερέλ αμαρέ σκέψεις σο ισί γκεραντέ, αμαρέ αισθήματα, ο πράγματα σο τσσίντενα-αμέν τι κεράς κάτι ντα οντουλά σο μανγκάσα. Ισί ο τζενό σο ισινάμ μπαγιά αντρ’ αμέντε, όχι απλά οντουβά σο ντικχίντιβελα αβριάλ.

⁵ Για παράδειγμας, η υγεία ι σωμάσκι σικαβέλα καζόμ σημαντικός ισί οντουβά σο ισινάμ αντρ’ αμέντε. Πρώτον, για τι τθεράς λατσσί υγεία, πρέπει τι χας υγιεινός χαμπέ ντα τι κεράς γυμναστική. Αντικάς, για τι αβάς λατσσές πνευματικά-ντα, πρέπει τι διαβάνας ι Γραφή ντα ο έντυπα ντα τι σικαβάς ότι πακιάσα κο Ιεχωβά. Σικαβάσα-λες ανταβά κάνα κεράσα οντουλά σο σικλιάσα ντα βακεράσα κο τζενέ οντουλά σο πακιάσα. (Ρωμ. 10:​8-10· Ιακ. 2:​26) Δεύτερον, άμα ντικχάσα σαρ ισινάμ αβριάλ, μπορεί τι αμντίνας ότι ισινάμ λατσσές ενώ ισινάμ νασφαλέ. Ντα άμα ντικχάσα ο πράγματα σο κεράσα ι Ιεχωβάσκε, μπορεί τι αμντίνας ότι αμαρί πίστη ισί ζουρανί ενώ αντρ’ αμέντε μανγκάσα λάθος πράγματα. (1 Κορ. 10:​12· Ιακ. 1:​14, 15) Πρέπει τι ντας-αμέν γκοντί ότι ο Μπενγκ κα μανγκέλας τι μαγαρίνελ-αμέν με το τρόπος σο σκεφτίνελα. Σο κερέλα για τι μαγαρίνελ-αμέν; Ντα σαρ μπορίνασα τι αρακχαβάς-αμέν;

6. Σο μανγκέλα τι κερέλ ο Μπενγκ, ντα σαρ προσπαθίνελα τι κερέλ-λες;

⁶ Ο Μπενγκ μανγκέλα τι αβάς σαρ λέστε​—τι τζας κόντρα κο Ιεχωβά, μα τι ντας καν κο κανόνες λέσκε ντα τι ντικχάς σάντε αμαρό νεαυτός. Ναστί αναγκάνελα-αμέν τι σκεφτίνας ντα τι κεράς ο πράγματα σαρ κερέλα-λεν βοβ. Οτθάρ, προσπαθίνελα τι κερέλ οντουβά σο μανγκέλα γιαβερέ τροπόντζαρ. Για παράδειγμας, τζουβντιάσα τζενέντζαρ σο μαγαριντάς λένγκο γκι. (1 Ιωάν. 5:​19) Μπεκλεντίνελα τι κεράς παρέα λέντζαρ, παρόλο σο τζανάσα ότι ο κακές παρέες κα “χαλαβέν” ο τρόπος σο σκεφτίνασα ντα συμπεριφερίντιβασα. (1 Κορ. 15:​33) Ανταβά αβιλό-πες κο  βασιλιάς Σολομών. Παντρισάλο μπουτέ ρομνίντζαρ σο πακιάνας ψεύτικε ντεβλέντε. Βον «επηρεάνενας-λες μπουτ» ντα «κερντέ σιγά σιγά λέσκο γκι τι νασέλ» κατά Ιεχωβά.​—1 Βασ. 11:3· υποσ.

7. Σο γιαβέρ χρησιμοποιήνελα ο Μπενγκ για τι νακχαβέλ κο τζενέ πο τρόπος σκέψης, ντα σόσκε πρέπει τι προσοχίνας;

⁷ Ο Μπενγκ νακχαβέλα κο τζενέ πο τρόπος σκέψης αντράλ κατά ιστορίες σο ισί κο σινεμάδες ντα κι τηλεόραση. Τζανέλα ότι ανταλά ιστορίες να κερένα-αμέν απλά τι νακχάς λατσσές, αλλά σικλιαρένα-αμέν σαρ τι σκεφτίνας, σαρ τι νιωθίνας ντα σο τι κεράς. Ο Ιησούς βακερέλας λατσσέ ιστορίες για τι σικλιαρέλ ι γιαβερέν. Για παράδειγμας, βακερντάς ι λατσσέ Σαμαρειτίσκε ντα ι τσσαβέσκε σο κερντάς μπέτι ζωή. (Ματθ. 13:​34· Λουκ. 10:​29-37· 15:​11-32) Όμως, οντουλά σο μαγαρίντιλε κατά τρόπος σο σκεφτίνελα ο Μπενγκ χρησιμοποιήνενα ο ιστορίες για τι μαγαρίνεν αμέν-ντα. Πρέπει τι τθεράς ισορροπία. Ισί σινεμάδες ντα πράγματα κι τηλεόραση σο κερένα-αμέν τι νακχάς λατσσές ντα σικλιαρένα-αμέν χωρίς τι μαγαρίνεν-αμέν. Αλλά πρέπει τι αβάς προσεκτικοί. Κάνα τραμπίνασα σο κα ντικχάς, ισί λατσσό τι σκεφτίνας: “Μήπως ανταβά σο ντικχάβα σικλιαρέλα-μαν ότι νανέ λάθος τι κεράβ ο πράγματα σο μανγκέλα μο σώμας;” (Γαλ. 5:​19-21· Εφεσ. 2:​1-3) Σο πρέπει τι κερέν άμα κα αγαβέν ότι οντουβά σο ντικχένα νακχαβέλα τουμένγκε ο τρόπος σκέψης ι Μπενγκέσκο; Νασέν λέσταρ σαρ κα νασένας εκχέ γκεραλέ νασφαλιμάσταρ!

8. Σαρ κα βοηθίνεν ο νταντά ντα ο νταγιά πουμαρέ τσσαβέν τι αρακχαβέν πουμαρό γκι;

⁸ Νταντάλεν ντα νταγιάλεν, τθερένα ι μπαρί ευθύνη τι αρακχαβέν τουμαρέ τσσαβέν κατά Μπενγκέσκε προσπάθειες τι μαγαρίνελ λένγκο γκι. Σίγουρα κερένα σο νακχέλα τουμαρέ βαστέσταρ για μα τι νασφάλιβεν τουμαρέ τσσαβέ. Ατσσικιαρένα τουμαρό κχερ πάκι ντα φουρτίνενα σο-ντα κα μπορίνελας τι κερέλ τουμέν ή τουμαρέ τσσαβέν τι νασφάλιβεν. Αντικάς χρειαζίντιβελα τι αρακχαβέν τουμαρέ τσσαβέν κατά σινεμάδες-ντα, κατά πράγματα κι τηλεόραση ή κο  Ίντερνετ ντα κατά παιχνίδια σο μπορεί τι μαγαρίνεν-λεν με το τρόπος σκέψης ι Μπενγκέσκο. Ο Ιεχωβά ντινάς-τουμέν ι ευθύνη τι βοηθίνεν τουμαρέ τσσαβέν τι αβέν λέσκε αμαλά. (Παρ. 1:8· Εφεσ. 6:1, 4) Οτθάρ, μα νταρέν τι τσσουβέν κι φαμιλί κανόνες αντράλ κατά Γραφή. Τι βακερέν τουμαρέ τσσαβένγκε σο μουκχένα-λεν ντα σο να μουκχένα-λεν τι ντικχέν ντα τι βοηθίνεν-λεν τι αγαβέν σόσκε βακερένα-λες ανταβά. (Ματθ. 5:​37) Καζόμ μπαριόνα τουμαρέ τσσαβέ, σικλιαρέν-λεν τι αγαβέν κορκορέ ο σωστός ντα ο λάθος σαρ βακερένα ο κανόνες ι Ιεχωβάσκε. (Εβρ. 5:​14) Ντα τι ντεν-τουμέν γκοντί ότι τουμαρέ τσσαβέ κα σικλιόν μπουτ πράγματα τουμαρέ λαφίνταρ, αλλά ατζέ πιο μπουτ οντουλένταρ σο κερένα.​—Δευτ. 6:6, 7· Ρωμ. 2:21.

9. Σο βακερέλα ο Μπενγκ, ντα σόσκε ισί επικίνδυνος ανταβά;

⁹ Επίσης, ο Μπενγκ για τι μαγαρίνελ αμαρό γκι, κερέλα-αμέν τι ντας μπέσα κι τζενένγκι σοφία ντα όχι κο τρόπος σο σκεφτίνελα ο Ιεχωβά. (Κολ. 2:8) Σκεφτίνεν σάντε εκ πράγμας σο βακερέλα ο Μπενγκ​—ότι ο πιο σημαντικός πράγμας κι ζωή ισί τι αβάς χουλανέ. Ο τζενέ σο σκεφτίνενα αντικάς μπορεί τι χουλάνιβεν ή μα τι χουλάνιβεν. Σο-ντα τι αβέλ-πες, ισί σε κίνδυνος. Σόσκε; Επειδή μπορεί τι μαρέν-πες αζόμ μπουτ τι κερέν λοβέ σο κα θυσιάνεν πουμαρί λατσσί υγεία, ο σχέσεις πουμαρέ φαμιλιάσαρ ή ατζέ-ντα πουμαρί φιλία ι Ντεβλέσαρ. (1 Τιμ. 6:​10) Εκτιμίνασα μπουτ ι Ιεχωβάς σο τθερέλα σοφία ντα βοηθίνελα-αμέν τι τθεράς σωστή άποψη ι λοβένγκε.​—Εκκλ. 7:​12· Λουκ. 12:15.

10, 11. (α) Σο πρέπει τι κεράς για τι αρακχαβάς-αμέν; (β) Σο κερένας ο φρουροί κο πουρανέ μπρεσά, ντα σαρ ισί αμαρί συνείδηση σαρ φρουρός;

¹⁰ Άμα μανγκάσα τι αρακχαβάς λατσσές αμαρό γκι, πρέπει τι αγαβάς καλά ισί ο κίνδυνοι ντα τι αρακχαβάς-αμέν σουγκό. Η λέξη «αράκχαβ» σο ισί κο εδάφιος Παροιμίες 4:23 ανέλα αμαρέ γκοντιάτε εκχέ φρουρός. Κο μπρεσά σο ισινέ βασιλιάς ο Σολομών, ο φρουροί ισινέ οπράλ κο μπαρέ ντουβάρια σο τθερέλας η πόλη ντα ντένας βίκος άμα ντικχένας τι αβέν ο ντουσμάνια. Κάνα σκεφτίνασα-λες ανταβά, αγαβάσα σο πρέπει τι κεράς για μα τι μουκχάς ι Μπενγκές τι τσσουβέλ μπέτι πράγματα αμαρέ γκοντιάτε.

¹¹ Κο πουρανέ μπρεσά, ο φρουροί συνεργαζίντιβενας οντουλέντζαρ σο αρακχαβένας ο μπαρέ πόρτες. (2 Σαμ. 18:​24-26) Γιεκ, αρακχαβένας ι πόλη ντα πφάντενας ο μπαρέ πόρτες κάνα ισινέ πασέ ο ντουσμάνια. (Νεεμ. 7:​1-3) Αμαρί συνείδηση * σο σικλιαράσα-λα αντράλ κατά Γραφή ισί σαρ φρουρός ντα προειδοποιήνελα-αμέν κάνα ο Μπενγκ μανγκέλα τι τσσουβέλ-πες αμαρέ γκίστε, ή γιαβερέ λαφίντζαρ, κάνα προσπαθίνελα τι επηρεάνελ αμαρέ σκέψεις, αμαρέ αισθήματα, ο πράγματα σο τσσίντενα-αμέν τι κεράς κάτι ντα οντουλά σο μανγκάσα. Κάνα προειδοποιήνελα-αμέν αμαρί συνείδηση, πρέπει τι ασουνάς ντα τι πφάντας αμαρί πόρτα, σαρ τι βακεράας.

12, 13. Σο μπορεί τι μανγκάς τι κεράς, αλλά σο πρέπει τι κεράς;

¹² Προσοχίνεν εκ παράδειγμας σο σικαβέλα σαρ μπορίνασα τι αρακχαβάς-αμέν για μα τι επηρεάντιβας κατά τρόπος σκέψης ι Μπενγκέσκο. Ο Ιεχωβά σικλιαρντάς-αμέν ότι “δεν πρέπει ούτε καν τι κεράς λάφι ι πραγματένγκε σο ισί λουμνικανέ ντα μαγαριμέ”. (Εφεσ. 5:3) Αλλά σο κα κεράς άμα οντουλά σο κεράσα λέντζαρ μπουτί ή αμαρέ συμμαθητές κα πουτρέν αμένγκε λουμνικανέ  πραγματένγκε; Τζανάσα ότι δεν πρέπει «τι αβάς τζενέ σο να τθερένα σεβασμός ι Ντεβλέσκε ντα μανγκένα ι ντουνιάσκε πράγματα». (Τίτο 2:​12) Αμαρί συνείδηση, σαρ φρουρός, μπορεί τι προειδοποιήνελ-αμέν. (Ρωμ. 2:​15) Αλλά αντίς τι ασουνάς λα, μπορεί τι μανγκάς τι ασουνάς ανταλέ τζενέν ή τι ντικχάς ο φωτογραφίες σο μπουτσσαβένα. Αζομάν όμως πρέπει τι αλλάνας ι συζήτηση ή τι νασάς οτθάρ για τι πφάντας ο πόρτες, σαρ τι βακεράας.

¹³ Χρειαζίντιβελα θάρρος για μα τι μουκχάς ι γιαβερέν τι κερέν-αμέν τι σκεφτίνας ή τι κεράς λάθος πράγματα. Ισινάμ σίγουροι ότι ο Ιεχωβά ντικχέλα αμαρέ προσπάθειες ντα κα ντελ-αμέν ι ζορ ντα ι σοφία σο χρειαζίντιβασα για τι τζας κόντρα κο τρόπος σκέψης κι Μπενγκέσκο. (2 Χρον. 16:9· Ησ. 40:​29· Ιακ. 1:5) Σο γιαβέρ μπορίνασα τι κεράς για τι αρακχαβάς αμαρό γκι;

14, 15. (α) Καλέ πραγματένγκε χρειαζίντιβελα τι πουτράς αμαρό γκι, ντα σαρ μπορίνασα τι κεράς-λες ανταβά; (β) Σαρ βακερένα ο εδάφια Παροιμίες 4:​20-22, σο πρέπει τι κεράς για τι βοηθίντιβας καζόμ πιο μπουτ αβέλα-πες κατά διάβασμας ι Γραφιάκο; (Ντικχ ο πλαίσιος-ντα « Σαρ τι Σκεφτίνας Προσεκτικά»)

¹⁴ Για τι αρακχαβάς αμαρό γκι, να ερεσέλα σάντε τι ατσσικιαράς-λες πφαντό κο μπέτι πράγματα, αλλά πρέπει τι τθεράς-λες πουταρντό-ντα κο λατσσέ πράγματα. Σκεφτίνεν πάλι εκ πόλη μπαρέ ντουβαρίντζαρ. Οντουβά σο αρακχαβέλας ο μπαρέ πόρτες πφάντελας-λεν για μα τι τσσουβέν-πες αντρέ κι πόλη ο ντουσμάνια. Όμως, γιαβέρ φαρ πουτρέλας ο μπαρέ πόρτες για τι ανέν χαμπέ ντα γιαβερά πράγματα. Άμα ο μπαρέ πόρτες να κα πουτάρντιβενας ποτές, ο τζενέ σο μπεσένας κι πόλη κα μερένας μποκχάταρ. Αμέν-ντα χρειαζίντιβελα τι πουτράς αμαρό γκι για τι επηρεάνελ-αμέν ο τρόπος σκέψης ι Ντεβλέσκο.

¹⁵ Η Γραφή τθερέλα ο τρόπος σκέψης ι Ιεχωβάσκο, οτθάρ κάθε φαρ σο διαβάνασα-λα μουκχάσα ο σκέψεις ι Ιεχωβάσκε τι επηρεάνεν ο τρόπος σο σκεφτίνασα, σο νιωθίνασα ντα σο κεράσα ο πράγματα. Σαρ μπορίνασα τι βοηθίντιβας καζόμ πιο μπουτ αβέλα-πες κατά διάβασμας ι Γραφιάκο; Η προσευχή ισί μπουτ σημαντική. Εκ πφεν βακερέλα: «Πριν τι διαβάναβ ι Γραφή, κεράβα προσευχή κο Ιεχωβά ντα μανγκάβα λέσταρ τι βοηθίνελ-μαν τι “ντικχάβ ξεκάθαρα ο μπουτ σουκάρ πράγματα” λέσκε Λαφίστε». (Ψαλμ. 119:​18) Επίσης, χρειαζίντιβελα τι σκεφτίνας προσεκτικά οντουλά σο διαβάνασα. Κάνα κεράσα προσευχή, διαβάνασα ντα σκεφτίνασα προσεκτικά, ο Λάφι ι Ντεβλέσκο ερεσέλα “ντιπ αντρέ αμαρέ γκίστε” ντα σικλιάσα τι μανγκάς ο τρόπος σκέψης ι Ιεχωβάσκο.​—Διαβάνεν Παροιμίες 4:​20-22· Ψαλμ. 119:97.

16. Σαρ βοηθίντιβενα μπουτ τζενέ κατά JW Broadcasting;

¹⁶ Επίσης, μουκχάσα ο σκέψεις ι Ιεχωβάσκε τι επηρεάνεν-αμέν κάνα ντικχάσα οντουλά σο ισί κο JW Broadcasting^®. Εκ αντρόγυνος βακερέλα: «Ο προγράμματα σο νικιόνα κάθε μάσεκ ισί απάντηση αμαρέ προσευχιέντε! Ντένα-αμέν ζορ ντα ενθαρρύνενα-αμέν κάνα ισινάμ στεναχωριμέ ή νιωθίνασα κορκορέ. Ντα συνέχεια ασουνάσα ο γκιλιά αμαρέ κχερέστε. Ασουνάσα-λεν κάνα κεράσα χαμπέ, κάνα καθαρίνασα ή κάνα πιάσα αμαρό τσάι». Ανταλά προγράμματα βοηθίνενα-αμέν τι αρακχαβάς αμαρό γκι. Σικλιαρένα-αμέν τι σκεφτίνας σαρ ο Ιεχωβά ντα μα τι μουκχάς τίποτα τι κερέλ-αμέν τι σκεφτίνας σαρ ο Μπενγκ.

17, 18. (α) Σαρ βακερέλα ο εδάφιος 1 Βασιλέων 8:​61, σο σικαβάσα κάνα κεράσα οντουλά σο σικλιάσα κατά Ιεχωβά; (β) Σο σικλιάσα κατά βασιλιάς Εζεκίας; (γ) Σαρ σικαβένα ο εδάφια Ψαλμός 139:​23, 24, καλέ πραγμάσκε μπορίνασα τι προσευχίντιβας;

¹⁷ Κάθε φαρ σο ντικχάσα καζόμ λατσσό ισί αμένγκε τι κεράς ο σωστός, αμαρί πίστη αβέλα πιο ζουρανί. (Ιακ. 1:2, 3) Νιωθίνασα σουκάρ επειδή ο Ιεχωβά καμαρώνελα σο ισινάμ λέσκε τσσαβέ, ντα αμέν μανγκάσα ατζέ πιο μπουτ τι κεράς-λες τι χαιρίνελ. (Παρ. 27:​ 11) Κάθε φαρ σο τθεράσα εκ δοκιμασία, ντιντιόλα-αμέν η ευκαιρία τι σικαβάς ότι να υπηρετίνασα αμαρέ λατσσέ Νταντές επκάς γκίσαρ. (Ψαλμ. 119:​113) Αλλά σικαβάσα ότι μανγκάσα ι Ιεχωβάς σαστέ γκίσαρ, δηλαδή εκχέ γκίσαρ σο ισί αποφασισμέ τι ντελ καν κο εντολές λέσκε ντα τι κερέλ οντουβά σο μανγκέλα.​—Διαβάνεν 1 Βασιλέων 8:61.

¹⁸ Κα κεράς λάθη; Βα, επειδή να ισινάμ τέλειοι. Άμα κα κεράς λάθος, τι ντας-αμέν γκοντί ι Εζεκιάς. Βοβ κερντάς λάθη. Αλλά μετανιωσάλο ντα συνεχιντάς τι υπηρετίνελ ι Ιεχωβάς «σαστέ γκίσαρ». (Ησ. 38:​3-6· 2 Χρον. 29:1, 2· 32:​25, 26) Οτθάρ, μα τι μουκχάς κο τρόπος σο σκεφτίνελα ο Μπενγκ τι μαγαρίνελ-αμέν. Τι προσευχίντιβας για τι τθεράς «γκι σο ντέλα καν». (1 Βασ. 3:9· διαβάνεν Ψαλμός 139:​23, 24) Κα ατσσάς πιστοί κο Ιεχωβά αν, πιο μπουτ σαρέ κατά γιαβερά πράγματα, αρακχαβάσα αμαρό γκι.