1, 2. (α) Σόσκε ισινέ λογικός ότι ο Ιησούς κα σικαβέλας αμένγκε εκ απλός τρόπος για τι ντας-αμέν γκοντί λέσκο μεριπέ; (β) Καλά ιδιότητες ι Ιησούσκε κα ντικχάς;

ΜΠΟΡΙΝΕΝΑ τι βακερέν σο αβέλα-πες κάθε μπρες κι Ανάμνηση; Σίγουρα ο πιο μπουτ αμένταρ ντάσα-αμέν γκοντί ο πράγματα σο αβένα-πες οτθέ. Σόσκε; Επειδή ανταγιά συνάθροιση ισί μπουτ απλή. Αλλά ισί μπουτ σημαντική-ντα. Οτθάρ, μπορεί τι πουτσάς: “Σόσκε ισί αζόμ απλή ανταγιά συνάθροιση;”

² Κάνα ισινέ κι πφουβ ο Ιησούς, σαρέ τζανένας ότι σικλιαρέλας σημαντικές αλήθειες τροπόσαρ σο ισινέ απλός, ξεκάθαρος ντα εύκολος τι αγαβέν-λες. (Ματθαίος 7:​28, 29) Αντικάς, σικαντάς αμένγκε εκ απλός τρόπος για τι ντας-αμέν γκοντί λέσκο μεριπέ. Για τι ντικχάς προσεκτικά ι Ανάμνηση * ντα μερικά πράγματα σο βακερντάς ντα κερντάς ο Ιησούς. Κα αγαβάς ατζέ πιο λατσσές καζόμ ταπεινός ισί ντα καζόμ θάρρος ντα αγάπη τθερέλα, ντα κα σικλιάς σαρ τι μοιάζας λέστε ατζέ πιο μπουτ.

3. Σαρ βακερένα ο εδάφια Ματθαίος 26:​26-28, καζόμ απλή ισινέ η Ανάμνηση σο κερντάς ο Ιησούς, ντα σο μανγκένας τι σικαβέν ο ντούι πράγματα σο χρησιμοποιηντάς;

³ Ο Ιησούς κερντάς ι Ανάμνηση πι μεριμάσκι γιεκ πι 11 πιστέ αποστολόντζαρ. Για τι κερέλ ανταγιά απλή γιορτή, λιντάς μερικά πράγματα σο τθερένας για το Πάσχας σο κερντέας  χάνικ πιο τζανγκλέ. (Διαβάνεν Ματθαίος 26:​26-28) Χρησιμοποιηντάς σάντε ο μαντρό σο ισινέ μπι-μαγιάκο ντα ι μολ σο ισινέ οτθέ. Ο Ιησούς βακερντάς πι αποστολόνγκε ότι οντουλά ντούι απλά πράγματα μανγκένας τι σικαβέν λέσκο τέλειος σώμας ντα λέσκο τέλειος ρατ σο κα ντέλας λένγκε. Ο απόστολοι μπορεί μα τι σαστισάλε κάνα ντικχλέ καζόμ απλή ισινέ ανταγιά νεβί συνάθροιση. Σόσκε;

4. Σαρ βοηθίνελα-αμέν η συμβουλή σο ντινάας ο Ιησούς κι Μάρθα τι αγαβάς σόσκε κερντάς ι Ανάμνηση με απλός τρόπος;

⁴ Σκεφτίνεν σο αβιλό-πες χάνικ μάσεκ πιο τζανγκλέ, κο τρίτος μπρες σο κερέλας έργος ο Ιησούς κι πφουβ, κάνα γκιλό κο κχερ πι λατσσέ αμαλένγκο​—κι Λαζαρόσκο, κι Μαρθάκο ντα κι Μαριάκο. Οτθέ, ο Ιησούς αρχισάλο τι σικλιαρέλ. Η Μάρθα ισινέ οντουτθέ, αλλά τθερέλας πι γκοντί κο μπουτιά για τι κερέλ εκ μπαρό τραπέζι ι Ιησούσκε. Κάνα ο Ιησούς ντικχλάς-λες ανταβά, διορθωντάς λατσσιμάσαρ ι Μαρθά ντα βοηθιντάς-λα τι αγαβέλ ότι να χρειαζίντιβελα πάντα τι κερέλ εκ ξεχωριστός τραπέζι. (Λουκάς 10:​40-42) Σοράν, χάνικ σαάτια πριν τι μερέλ, ο Ιησούς κερντάς ι συμβουλή σο ντινάας. Κερντάς ι Ανάμνηση με απλός τρόπος. Σο σικλιαρέλα-αμέν ανταβά ι Ιησούσκε;

5. Σο σικλιαρέλα-αμέν ι Ιησούσκε ανταγιά απλή συνάθροιση, ντα σαρ ταιριάνελα ανταβά με το εδάφια Φιλιππησίους 2:​5-8;

⁵ Ο Ιησούς ισινέ ταπεινός σαρέ κο πράγματα σο βακερέλας ντα κερέλας. Να κερέλα αμένγκε εντύπωση σο σικαντάς-λες ανταβά ι τελευταία ιράτ πριν τι μερέλ. (Ματθ. 11:​29) Τζανέλας ότι ατζεχάνικ κα ντέλας ι πιο σημαντική θυσία σο ντιντιλί ποτές ντα ότι ο Ιεχωβά κα τζουβντιαρέλας-λες για τι αβέλ Βασιλιάς κο ουρανός. Παρόλο σο τζανέλας-λες ανταβά, να μανγκέλας τι ταρτίνελ σαρί ι προσοχή οπρά-πέστε, οτθάρ να βακερντάς πι μαθητένγκε τι κερέν μπαρέ πράγματα κι Ανάμνηση. Αλλά βακερντάς ότι εκ φαρ κο μπρες έπρεπε τι κερέν ανταγιά απλή συνάθροιση για τι ντεν-πες γκοντί λες. (Ιωάν. 13:​15· 1 Κορ. 11:​23-25) Ανταγιά απλή αλλά σημαντική συνάθροιση σικαβέλα ότι ο Ιησούς να ισινέ μπαρικανό. Χαιρίνασα σο η ταπεινότητα ισί εκ κατά πιο σημαντικές ιδιότητες αμαρέ Βασιλιάσκε σο ισί κο ουρανός.​—Διαβάνεν Φιλιππησίους 2:​5-8.

6. Σαρ μπορίνασα τι αβάς ταπεινοί σαρ ο Ιησούς κάνα τθεράσα δοκιμασίες;

⁶ Σαρ μπορίνασα τι αβάς ταπεινοί σαρ ο Ιησούς; Κάνα τσσουβάσα ο συμφέρον ι γιαβερένγκο πιο οπρέ αμαρέσταρ. (Φιλιπ. 2:3, 4) Ανέν πάλι τουμαρέ γκοντιάτε ι τελευταία ιράτ ι Ιησούσκε ζωγιάκι. Βοβ τζανέλας ότι ατζεχάνικ  κα τσσίντελας μπουτ ντουκχ ντα κα μερέλας. Όμως, ανησυχίνελας μπουτ πι πιστέ αποστολόνγκε σο κα στεναχωρίντιβενας λέσκε. Οντιά τελευταία ιράτ σικλιαρντάς-λεν ντα ντινάς-λεν ζορ ντα βακερντάς λένγκε μα τι νταρέν. (Ιωάν. 14:​25-31) Ο Ιησούς σικαντάς με ταπεινότητα ότι τσσουβέλας ο λατσσιπέ ι γιαβερένγκο πιο οπρέ πιρέ λατσσιμάσταρ. Σο λατσσό παράδειγμας αμένγκε!

7. Σαρ σικαντάς ο Ιησούς μπαρό θάρρος χάνικ πιο σοράν κατά Ανάμνηση σο κερντάς;

⁷ Χάνικ πιο σοράν κατά Ανάμνηση σο κερντάς ο Ιησούς, σικαντάς μπουτ μπαρό θάρρος. Σαρ; Δεχτιντάς τι κερέλ οντουβά σο μανγκλάς λέσταρ λέσκο Ντατ, παρόλο σο τζανέλας ότι κα μουνταρένας-λες ντα κα τθερέλας οπρά-πέστε ι λατζ ότι μουλό σόσκε προσβαλιντάς ι Ντεβλές πι λαφίντζαρ. (Ματθ. 26:​65, 66· Λουκ. 22:​41, 42) Ο Ιησούς ατσσιλό πιστός σαρέ κο πράγματα για τι δοξάνελ ο ναβ ι Ιεχωβάσκο, για τι σικαβέλ ότι Βοβ τθερέλα ο δικαίωμας τι κυβερνίνελ ντα για τι τζουβντιόν για πάντα ο τζενέ σο μετανιώνενα. Επίσης, ο Ιησούς προετοιμαντάς πι μαθητέν οντουλένγκε σο κα αβένας-πες λένγκε ατζεχάνικ.

8. (α) Σο βακερντάς ο Ιησούς πι πιστέ αποστολόνγκε; (β) Σοράν κατά μεριπέ ι Ιησούσκο, σαρ σικαβένας θάρρος ο μαθητές σαρ ο Ιησούς;

⁸ Ο Ιησούς σικαντάς επίσης θάρρος κάνα τσσουντάς κι νάκρη πο ανησυχίες ντα σκεφτιντάς με προσοχή ο ανάγκες πι πιστέ αποστολόνγκε. Η απλή συνάθροιση σο κερντάς αφού παλντιντάς ι Ιουδάς, κα ανέλας κι γκοντί οντουλένγκι σο κα αβένας χρισμέ μαθητές σαρ κα βοηθίντιβενας κατά Ιησούσκο ρατ ντα κατά νεβί συμφωνία σο κα συμμετεχίνενας βον. (1 Κορ. 10:​16, 17) Για τι βοηθίνελ-λεν τι ατσσόν πιστοί ντα τι αβέν κο ουρανός λέσαρ, ο Ιησούς βακερντάς πι μαθητένγκε σο μπεκλεντίνελας βοβ ντα  λέσκο Ντατ λένταρ. (Ιωάν. 15:​12-15) Ντα κερντάς λάφι κο απόστολοι για το δοκιμασίες σο κα τθερένας. Σοράν, σικαντάς λένγκε σο κερντάς βοβ ντα βακερντάς: «Λεν θάρρος!» (Ιωάν. 16:​1-4α, 33) Ατζέ-ντα μπουτ μπρεσά πιο σοράν, ο μαθητές ι Ιησούσκε μοιάζενας κο Ιησούς, σο ντέλας πέσταρ για τι βοηθίνελ ι γιαβερέν ντα σικαβέλας θάρρος. Στηρίνενας ο εκ ι γιαβερές κο διάφορες δοκιμασίες, παρόλο σο κα τθερένας προβλήματα επειδή κερένας-λες ανταβά.​—Εβρ. 10:​33, 34.

9. Σαρ μπορίνασα τι σικαβάς θάρρος σαρ ο Ιησούς;

⁹ Αμέν-ντα αντιβές σικαβάσα θάρρος σαρ ο Ιησούς. Για παράδειγμας, χρειαζίντιβελα θάρρος για τι βοηθίνας αμαρέ πφραλέν σο τθερένα διωγμός μάξους ι Ιεχωβάσκε ναβέσκε. Αμαρέ πφραλά μπορεί τι τζάνα φυλακή σινανέ. Κάνα αβέλα-πες ανταβά, πρέπει τι κεράς σο νακχέλα αμαρέ βαστέσταρ λένγκε, ατζέ-ντα τι κεράς λάφι για τι υπερασπίνας-λεν. (Φιλιπ. 1:​14· Εβρ. 13:​19) Εκ γιαβέρ τρόπος σο σικαβάσα θάρρος ισί τι συνεχίνας τι βακεράς ο λατσσέ αμπέρια «μπίνταρανες». (Πράξ. 14:3) Σαρ ο Ιησούς, αντικάς αμέν-ντα ισινάμ αποφασισμέ τι βακεράς ο αμπέρια ι Βασιλειάκε, παρόλο σο ο τζενέ μπορεί τι τζάνα αμέντζαρ κόντρα. Μπάζιμα όμως μπορεί τι αγαβάσα ότι νανέ-αμέν αζόμ μπουτ θάρρος. Σο μπορίνασα τι κεράς;

10. Ο εβδομάδες πριν κατά Ανάμνηση, σο πρέπει τι κεράς, ντα σόσκε;

¹⁰ Μπαριαράσα αμαρό θάρρος άμα σκεφτίνασα οντουλά σο μπεκλεντίνασα τι αβέν χάρη κο λύτρος σο ντινάς ο Ιησούς. (Ιωάν. 3:​16· Εφεσ. 1:7) Ο εβδομάδες πριν κατά Ανάμνηση, τθεράσα ι ευκαιρία τι μπαριαράς αμαρί εκτίμηση για το λύτρος. Αζομάν, τι διαβάνεν ο εδάφια σο ισί για την Ανάμνηση ντα τι σκεφτίνεν με προσευχή ο πράγματα σο αβιλέ-πες πριν ντα σοράν κατά μεριπέ ι Ιησούσκο. Αντικάς, κάνα κα γκιντίντιβας για τι κεράς ι Ανάμνηση, κα αγαβάς ατζέ πιο  μπουτ καζόμ σημαντικός ισί ο μαντρό, η μολ ντα η μπουτ μπαρί θυσία ι Ιησούσκι. Κάνα εκτιμίνασα οντουβά σο κερντάς ο Ιησούς ντα ο Ιεχωβά αμένγκε ντα αγαβάσα σαρ βοηθίνελα αμέν ντα ι τζενέν σο μανγκάσα, αβάσα πιο σίγουροι ι πραγματένγκε σο μπεκλεντίνασα τι αβέν ντα μανγκάσα τι νταϊντίνας μέχρι κο τέλος.​—Εβρ. 12:3.

11, 12. Σο σικλιλάμ μέχρι ακανά;

¹¹ Μέχρι ακανά σικλιλάμ ότι η Ανάμνηση ανέλα αμαρέ γκοντιάτε, όχι σάντε ο πολύτιμος λύτρος, αλλά ο μπουτ σουκάρ ιδιότητες-ντα ι Ιησούσκε σαρ ισί η ταπεινότητα ντα ο θάρρος. Ισινάμ πφερντέ εκτίμηση σο ο Ιησούς σικαβέλα ακανά-ντα ανταλά ιδιότητες σαρ Αρχιερέας κο ουρανός, σο μολίνελα ι Ντεβλές αμένγκε! (Εβρ. 7:​24, 25) Για τι σικαβάς αμαρί μπαρί εκτίμηση, πρέπει τι κεράς ι ανάμνηση για τι ντας-αμέν γκοντί ο μεριπέ ι Ιησούσκο σο-ντα τι αβέλ-πες, αντικάς σαρ βακερντάς βοβ. (Λουκ. 22:​19, 20) Κεράσα-λες ανταβά κο ντιβές σο περέλα 14 Νισάν, κο πιο σημαντικός ντιβές κι μπρεσέσκο.

¹² Κατά απλά πράγματα σο κεράσα κι Ανάμνηση σικλιάσα εκ γιαβέρ-ντα ιδιότητα σο κερντάς ι Ιησούς τι μερέλ αμένγκε. Κάνα ισινέ κι πφουβ σαρ τζενό, σαρέ τζανένας ότι τθερέλας ανταγιά ιδιότητα. Καγιά ισινέ;

13. Σαρ σικαβένα ο εδάφια Ιωάννης 15:9 ντα 1 Ιωάννη 4:​8-10 ι αγάπη σο σικαντάς ο Ιεχωβά ντα ο Ιησούς, ντα καλά τζενέ βοηθίντιβενα λάταρ;

¹³ Ο Ιησούς σο-ντα τι κερέλας σικαβέλας τέλεια ι μπαρί αγάπη ι Ιεχωβάσκι αμένγκε. (Διαβάνεν Ιωάννης 15:9· 1 Ιωάννη 4:​8-10) Μανγκλάς αντράλ πι γκίσταρ τι ντελ ατζέ-ντα πι ζωή αμένγκε. Είτε ισινάμ χρισμέ είτε κατά “γιαβερά μπρακέ”, βοηθίντιβασα κατά αγάπη σο σικαντάς αμένγκε ο Ιεχωβά ντα λέσκο Τσσαβό αντράλ ανταλέ θυσιάταρ. (Ιωάν. 10:​16· 1 Ιωάν. 2:2) Σκεφτίνεν επίσης ο μαντρό ντα ι μολ σο ισινέ οτθέ. Σικαβένα ότι ο Ιησούς μανγκέλα ντα πφαμπόλα πι μαθητένγκε. Σαρ;

14. Σαρ σικαντάς ο Ιησούς αγάπη πι μαθητένγκε;

¹⁴ Ο Ιησούς σικαντάς αγάπη πι χρισμέ μαθητένγκε κάνα βακερντάς λένγκε τι κερέν, όχι μπουτ ντα δύσκολα πράγματα, αλλά εκ απλή συνάθροιση. Ανταλά χρισμέ μαθητές έπρεπε τι κερέν ι Ανάμνηση κάθε μπρες, σαρ-ντα τι αβένας ο πράγματα, ατζέ-ντα κι φυλακή. (Αποκ. 2:​10) Μπορισάλε τι ντεν καν ι Ιησούς; Βα!

15, 16. Σαρ κερντέ μερικοί ι Ανάμνηση ατζέ-ντα κάνα ισινέ δύσκολος;

¹⁵ Οτθάρ μπερί, ο αληθινοί Χριστιανοί κερένα σο νακχέλα λένγκε βαστέσταρ για τι κερέν ι Ανάμνηση με το τρόπος σο βακερντάς ο Ιησούς ατζέ-ντα άμα μπουτ φαρ ισί δύσκολος. Ντικχέν ο παραδείγματα σο ισί πιο τελέ. Κάνα ο πφραλ Χάρολντ Κινγκ ισινέ κορκορό εκχέ κελίστε κι Κίνα, έπρεπε τι αρακχέλ εκ τρόπος τι κερέλ ι Ανάμνηση. Χρησιμοποιήνελας πράγματα σο τθερέλας για τι ετοιμάνελ αποτσοράλ ο μαντρό ντα ι μολ. Επίσης, γκινέλας ο ντιβεσά καζόμ πιο προσεκτικά μπορίνελας για τι αρακχέλ κάνα περέλας η Ανάμνηση. Οντουβά ντιβές, κορκορό πι κελίστε, βακερέλας ύμνους, προσευχίντιβελας ντα κερέλας εκ ομιλία.

¹⁶ Για τι ντικχάς ατζέκ εκ παράδειγμας. Κάποια πφενιά σο ισινέ φυλακισμέ σε εκ στρατόπεδος συγκέντρωσης κο Δεύτερος Παγκόσμιος Πόλεμος τσσουντέ σε κίνδυνος πουμαρί ζωή για τι κερέν ι Ανάμνηση. Αλλά επειδή ανταγιά συνάθροιση ισί απλή, μπορισάλε τι κερέν-λα χωρίς τι αγαβέν-λεν. Ο πφενιά βακερντέ: «Ισινάμας η εκ πασέ κι γιαβέρ ντονταλάι εκχέ σκαμπόσταρ σο ισινέ ιτσσαρντό εκχέ παρνέ κοτορέσαρ. Οτθέ οπράλ ισινέ ο μαντρό ντα η μολ. Εκ μεμελί ντέλας φως κο δωμάτιος,  σόσκε άμα κα πουτράας ο φως κα αγαβένας-αμέν. . . . Ντινάμ πάλι αμαρό λάφι αμαρέ Νταντέστε ότι κα ντας σο τθεράσα ντα να τθεράσα για τι δικαιώντιβελ λέσκο άγιος ναβ». Σο μπαρί πίστη σικαντέ! Ντα καζόμ αγάπη σικαντάς ο Ιησούς σο να μανγκλάς τι κεράς δύσκολα πράγματα κι Ανάμνηση ντα οτθάρ μπορίνασα τι κεράς-λα ατζέ-ντα κάνα ισί δύσκολος!

17. Σο μπορεί τι πουτσάς αμαρό νεαυτός;

¹⁷ Καζόμ ερεσέλα η Ανάμνηση, κα αβέλας λατσσό τι πουτσάς αμαρό νεαυτός: “Σαρ κα σικαβάβ πιο μπουτ αγάπη σαρ ο Ιησούς; Σκεφτίναβα ο ανάγκες ι πφραλένγκε πιο μπουτ μιρένταρ; Μπεκλεντίναβα κατά πφραλά πιο μπουτ οντουλένταρ σο μπορίνενα τι κερέν ή αγαβάβα καλά πράγματα ναστί κερένα;” Τι μοιάζας πάντα κο Ιησούς ντα τι σικαβάς ότι “αγαβάσα ι γιαβερέν”.​—1 Πέτρ. 3:8.

18, 19. (α) Καλέ πραγμάσκε ισινάμ σίγουροι; (β) Σο ισινέν αποφασισμέ τι κερέν;

¹⁸ Ατζεχάνικ, κα τσσιναβάς τι κεράς ι Ανάμνηση ι Χριστόσκε μεριμάσκε. Κάνα ο Ιησούς κα «αβέλ» κι μπαρί στεναχώρια, κα γκίντελ κο ουρανός ι τζενέν σο ατσσόνα “οντουλένταρ σο τραμπίντιλε”, ντα να κα κεράς ατζέκ φαρ ι Ανάμνηση.​—1 Κορ. 11:​26· Ματθ. 24:31.

¹⁹ Ισινάμ σίγουροι ότι, ατζέ-ντα κάνα κα τσσιναβάς τι κεράς ι Ανάμνηση, κα πφερντιάς εκτίμηση κάνα κα σκεφτίνας ανταγιά απλή συνάθροιση σο κα ανέλ αμαρέ γκοντιάτε ι πιο μπαρί ταπεινότητα, θάρρος ντα αγάπη σο σικάντιλε τζενέσταρ. Οντουβά βακίτι, ο τζενέ σο τζάνας κι Ανάμνηση σίγουρα κα κερέν λάφι λάκε σαρέ οντουλένγκε σο κα τζουβντιόν αζομάν. Αλλά για τι βοηθίντιβας ακανά κατά Ανάμνηση, πρέπει τι αβάς αποφασισμέ τι αβάς ταπεινοί ντα τι σικαβάς θάρρος ντα αγάπη σαρ ο Ιησούς. Άμα κα κεράς-λες ανταβά, ισινάμ σίγουροι ότι ο Ιεχωβά κα ευλογίνελ-αμέν.​—2 Πέτρ. 1:​10, 11.