1, 2. (α) Σο ντικχέλα ο Ιεχωβά κάνα εκατομμύρια τζενέ γκιντίντιβενα για τι κερέν ι Ανάμνηση; (Ντικχ ι φωτογραφία κι ανγκλαϊνί σελίδα) (β) Σο κα ντικχάς ανταλέ μαθημάστε;

ΑΝΕΝ τουμαρέ γκοντιάτε σο ντικχέλα ο Ιεχωβά κάνα εκατομμύρια τζενέ σαρό κο ντουνιάς γκιντίντιβενα για τι κερέν ι Ανάμνηση. Να ντικχέλα σάντε ότι μπουτ τζενέ τζάνα οτθέ. Ντικχέλα ι κάθε εκχές λένταρ. Για παράδειγμας, ντικχέλα οντουλέν σο τζάνα κάθε μπρες. Ντα μερικοί λένταρ τζάνα παρόλο σο τθερένα μπαρί εναντίωση. Γιαβερά να τζάνα σαρέ κο συναθροίσεις, αλλά πακιάνα ότι η Ανάμνηση ισί αζόμ σημαντική σο δεν πρέπει τι χασαρέν-λα. Ο Ιεχωβά ντικχέλα οντουλέν-ντα σο τζάνα πρώτη φαρ κι Ανάμνηση για τι ντικχέν σο αβέλα-πες οτθέ.

² Κάνα ο Ιεχωβά ντικχέλα ότι αζόμ μπουτ τζενέ τζάνα κι Ανάμνηση σίγουρα αβέλα λέσκο γκι. (Λουκ. 22:​19) Αλλά οντουβά σο τθερέλα πιο μπαρί σημασία ι Ιεχωβάσκε νανέ καζόμ τζενέ τζάνα αλλά σόσκε τζάνα. Ανταλέ μαθημάστε, κα ντικχάς εκ μπουτ σημαντική ερώτηση: Σόσκε τζάσα εμ κι Ανάμνηση κάθε μπρες, αλλά εμ κο γιαβερά συναθροίσεις σο ντέλα ο Ιεχωβά οντουλένγκε σο μανγκένα-λες;

3, 4. (α) Σόσκε τζάσα κο συναθροίσεις; (β) Σο σικαβάσα κάνα τζάσα κο συναθροίσεις; (γ) Σαρ βακερένα ο εδάφια 1 Κορινθίους 11:​23-26, σόσκε δεν πρέπει τι χασαράς ι Ανάμνηση;

³ Τζάσα κο συναθροίσεις πιο μπουτ για τι ντας λατρεία ι Ιεχωβάς. Επίσης, τζάσα κο συναθροίσεις σόσκε οτθέ σικλιαρέλα-αμέν ο Ιεχωβά. Ο μπαρικανέ τζενέ να πακιάνα ότι χρειαζίντιβενα τι σικλιόν. (3 Ιωάν. 9) Αλλά αμέν μανγκάσα τι σικλιαρέλ-αμέν ο Ιεχωβά ντα λέσκι οργάνωση.​—Ησ. 30:​20· Ιωάν. 6:45.

 ⁴ Κάνα τζάσα κο συναθροίσεις σικαβάσα ότι ισινάμ ταπεινοί, ότι μανγκάσα αντράλ αμαρέ γκίσταρ τι σικλιάς. Ι ιράτ σο ισί η Ανάμνηση, τζάσα οντουλέ συναθροισιάτε επειδή τζανάσα ότι ισί μπουτ σημαντική ντα επειδή ντάσα καν με ταπεινότητα κι εντολή κι Ιησούσκι: «Συνεχίνεν τι κερέν-λες ανταβά για τι ντεν-τουμέν γκοντί μαν». (Διαβάνεν 1 Κορινθίους 11:​23-26) Ανταγιά συνάθροιση κερέλα-αμέν τι αβάς πιο σίγουροι οντουλένγκε σο μπεκλεντίνασα τι αβέν ντα ανέλα αμαρέ γκοντιάτε καζόμ μπουτ μανγκέλα-αμέν ο Ιεχωβά. Αλλά ο Ιεχωβά τζανέλα ότι να ερεσέλα τι λας ενθάρρυνση ντα ζορ σάντε εκ φαρ κο μπρες. Οτθάρ, ντέλα-αμέν συναθροίσεις κάθε εβδομάδα ντα βακερέλα αμένγκε τι τζας οντουλέ συναθροισιέντε. Η ταπεινότητα τσσίντελα-αμέν τι ντας καν. Κάθε εβδομάδα ντάσα μπουτ αμαρέ σαατίσταρ για τι ετοιμάντιβας ι συναθροισιένγκε ντα για τι τζας οτθέ.

5. Σόσκε ο τζενέ σο ισί ταπεινοί ντένα καν ι Ιεχωβάς κάνα καλίνελα-λεν τι σικλιόν λέσταρ;

⁵ Κάθε μπρες, μπουτ τζενέ σο ισί ταπεινοί ντένα καν ι Ιεχωβάς κάνα καλίνελα-λεν τι σικλιόν λέσταρ. (Ησ. 50:4) Μπεϊντίνενα οντουλά σο ασουνένα ντα ντικχένα κι Ανάμνηση ντα σοράν τζάνα κο γιαβερά-ντα συναθροίσεις. (Ζαχ. 8:​20-23) Γιεκ οντουλέντζαρ σο ισί νεβέ κο συναθροίσεις χαιρίνασα σο σικλιαρέλα-αμέν ντα οδηγίνελα-αμέν ο Ιεχωβά, “οντουβά σο βοηθίνελα ντα σώνελα-αμέν”. (Ψαλμ. 40:​17) Βα, ο πιο σημαντικός ντα σουκάρ πράγμας ισί τι ντας καν ι Ιεχωβάς κάνα καλίνελα-αμέν τι σικλιάς λέσταρ ντα κατά Ιησούς, λέσκε αγαπημέ Τσσαβέσταρ.​—Ματθ. 17:5· 18:​20· 28:20.

6. Σαρ βοηθιντάς η ταπεινότητα εκχέ τζενές τι τζαλ κι Ανάμνηση;

⁶ Κάθε μπρες, προσπαθίνασα τι καλίνας καζόμ πιο μπουτ τζενέν αβέλα-πες κι Ανάμνηση. Μπουτ τζενέ σο ισί ταπεινοί κερντέ πέσκε λατσσιπέ σο αβιλέ. Σκεφτίνεν εκ παράδειγμας. Πριν μπουτ μπρεσά, εκ τζενό λιντάς εκ πρόσκληση για την Ανάμνηση εκχέ πφραλέσταρ, αλλά βακερντάς λέσκε ότι ναστί τζάλας. Όμως, οντιά ιράτ σο ισινέ η Ανάμνηση, ο πφραλ ντικχλάς οντουλέ τζενές κι Αίθουσα Βασιλείας. Κερντάς λέσκε αζόμ μπαρί εντύπωση κάνα ο πφραλά χαιρετιντέ-λες αντράλ πουμαρέ γκίσταρ σο αρχισάλο τι τζαλ κο συναθροίσεις κάθε εβδομάδα. Αντρέ εκχέ μπρεσέστε χασαρντάς σάντε τριν συναθροίσεις. Σο βοηθιντάς-λες τι τζαλ σαρέ κο συναθροίσεις; Ισινέ κοβλό τζενό ντα οτθάρ αλλαντάς γνώμη. Ο πφραλ σο καλιντάς-λες βακερντάς πιο σοράν: «Ισί μπουτ ταπεινός τζενό». Ο Ιεχωβά σίγουρα ταρτιντάς ανταλέ τζενές πασέ πέστε για τι ντελ-Λες λατρεία, ντα ακανά ισί μπολντό.​—2 Σαμ. 22:​28· Ιωάν. 6:44.

7. Σαρ βοηθίνενα-αμέν τι αβάς ταπεινοί οντουλά σο σικλιάσα κο συναθροίσεις ντα οντουλά σο διαβάνασα κι Γραφή;

⁷ Οντουλά σο σικλιάσα κο συναθροίσεις ντα οντουλά σο διαβάνασα κι Γραφή βοηθίνενα-αμέν τι αβάς ταπεινοί. Κο εβδομάδες πριν κατά Ανάμνηση, ο συναθροίσεις σικαβένα μπουτ φαρ ο παράδειγμας ι Ιησούσκο ντα ι ταπεινότητα σο σικαντάς κάνα ντινάς πι ζωή σαρ λύτρος. Κο ντιβεσά πριν κατά Ανάμνηση, ισί λατσσό τι διαβάνας οντουλά σο αβιλέ-πες πριν ντα σοράν κατά μεριπέ ντα κατά ανάσταση ι Ιησούσκι. Οντουλά σο σικλιάσα οντουλέ συναθροισιέντε ντα οντουλά σο διαβάνασα οντουλέ εδαφιόντε κερένα-αμέν τι εκτιμίνας ατζέ πιο μπουτ ι θυσία σο κερντάς ο Ιησούς αμένγκε. Μανγκάσα τι αβάς ταπεινοί σαρ βοβ ντα τι κεράς οντουβά σο μανγκέλα ο Ιεχωβά, ατζέ-ντα κάνα ισί δύσκολος.​—Λουκ. 22:​41, 42.

8. Σαρ σικαντάς θάρρος ο Ιησούς;

⁸ Επίσης, κεράσα ο πιο λατσσό για τι  τθεράς θάρρος σαρ ο Ιησούς. Σκεφτίνεν ο θάρρος σο σικαντάς κο ντιβεσά πριν τι μερέλ. Τζανέλας μπουτ λατσσές ότι ατζεχάνικ λέσκε ντουσμάνια κα συμπεριφερίντιβενας λέσκε μπέτι, κα νταπένας-λες ντα κα μουνταρένας-λες. (Ματθ. 20:​17-19) Αλλά δεχτιντάς τι μερέλ. Κάνα αβιλό ο σαάτι, βακερντάς πι πιστέ αποστολόνγκε σο ισινέ λέσαρ κι Γεθσημανή: «Ιστίν, πάμε. Άκ’! Οντουβά σο κα προδόνελ-μαν ισί πασέ». (Ματθ. 26:​36, 46) Κάνα γκιλέ τι ασταρέν-λες τζενέ σο τθερένας σπαθιά ντα λουμπούτια, τσσουντάς-πες ανγκλάλ, μουτθαντάς κον ισί ντα βακερντάς κο στρατιώτες τι μουκχέν λέσκε μαθητέν τι νασέν. (Ιωάν. 18:​3-8) Σο μπαρό θάρρος σικαντάς ο Ιησούς! Αντιβές, ο χρισμέ Χριστιανοί ντα ο γιαβερά μπρακέ κερένα σο νακχέλα λένγκε βαστέσταρ για τι σικαβέν θάρρος σαρ ο Ιησούς. Σαρ;

9. (α) Σόσκε χρειαζίντιβελα θάρρος για μα τι χασαράς ο συναθροίσεις; (β) Σαρ επηρεάνελα αμαρό παράδειγμας ι πφραλέν σο ισί κι φυλακή μάξους ι Ιεχωβάσκε ναβέσκε;

⁹ Για μα τι χασαράς ο συναθροίσεις, χρειαζίντιβελα τι σικαβάς θάρρος ατζέ-ντα κο δυσκολίες. Ισί πφραλά ντα πφενιά σο τζάνα κο συναθροίσεις παρόλο σο ισί στεναχωριμέ, χασαρντέ πουμαρό κουράγιος ή να τθερένα λατσσί υγεία. Γιαβερά σικαβένα θάρρος ντα τζάνα κο συναθροίσεις παρόλο σο τζάνα λέντζαρ μπουτ κόντρα λένγκε τζενέ ή οντουλά σο τθερένα εξουσία. Σκεφτίνεν χάνικ σαρ επηρεάνελα αμαρό παράδειγμας ι πφραλέν σο ισί κι φυλακή μάξους ι Ιεχωβάσκε ναβέσκε. (Εβρ. 13:3) Κάνα λένα αμπέρι ότι ο δοκιμασίες να κερένα-αμέν τι τσσιναβάς τι υπηρετίνας ι Ιεχωβάς, λένα ζορ για μα τι χασαρέν πουμαρό θάρρος ντα για τι ατσσόν πιστοί. Ανταβά αβιλό-πες κο απόστολος Παύλος-ντα. Κάνα ισινέ φυλακισμέ κι Ρώμη, χαιρίνελας σο λέλας αμπέρι ότι ο πφραλά υπηρετίνενας ι Ντεβλές πιστά. (Φιλιπ. 1:​3-5, 12-14) Ο Παύλος γραφιντάς πι επιστολή κο Εβραίοι χάνικ πριν τι νικιόλ κατά φυλακή ή μόλις νικίστιλο. Κι επιστολή ανταγιά βακερντάς οντουλέ πιστέ Χριστιανόνγκε τι «συνεχίνεν τι μανγκέν ο εκ ι γιαβερές σαρ πφραλά» ντα ποτές μα τι τσσιναβέν τι τζαν κο συναθροίσεις.​—Εβρ. 10:​24, 25· 13:1.

10, 11. (α) Κας πρέπει τι καλίνας κι Ανάμνηση; (β) Σαρ βακερέλα ο εδάφιος Εφεσίους 1:7, σόσκε πρέπει τι κεράς-λες ανταβά;

¹⁰ Σικαβάσα θάρρος κάνα καλίνασα κι Ανάμνηση αμαρέ τζενέν, οντουλέν σο κεράσα λέντζαρ μπουτί ντα αμαρέ γειτονέν. Σόσκε καλίνασα-λεν; Εκτιμίνασα αζόμ μπουτ οντουβά σο κερντάς αμένγκε ο Ιεχωβά ντα ο Ιησούς, σο να αβέλα-πες μα τι καλίνας ι γιαβερέν κι Ανάμνηση. Μανγκάσα τι σικλιόν σαρ κα βοηθίντιβεν βον-ντα κατά «λατσσιπέ σο να αξίνασα» ντα σο σικαβέλα αμένγκε ο Ιεχωβά αντράλ κατά λύτρος.​—Διαβάνεν Εφεσίους 1:7· Αποκ. 22:17.

¹¹ Κάνα τζάσα κο συναθροίσεις, σικαβάσα θάρρος. Αλλά σικαβάσα εκ γιαβέρ-ντα σημαντική ιδιότητα, σο σικαβέλα με μπουτ σουκάρ τρόπους ο Ντεβέλ ντα λέσκο Τσσαβό.

12. (α) Σαρ μπαριαρένα ο συναθροίσεις αμαρί αγάπη ι Ιεχωβάσκε ντα ι Ιησούσκε; (β) Σο βακερένα αμένγκε τι κεράς ο εδάφια 2 Κορινθίους 5:​14, 15 για τι μοιάζας κο Ιησούς;

¹² Αμαρί αγάπη ι Ιεχωβάσκε ντα ι Ιησούσκε κερέλα-αμέν τι αβάς υποχρεωμέ τι τζας κο συναθροίσεις. Ντα οντουλά σο σικλιάσα οτθέ μπαριαρένα ανταγιά αγάπη. Μπουτ φαρ κο συναθροίσεις ντάσα-αμέν γκοντί σο κερντάς αμένγκε ο Ιεχωβά ντα ο Ιησούς. (Ρωμ. 5:8) Η Ανάμνηση ανέλα αμαρέ γκοντιάτε καζόμ μπαρί αγάπη τθερένα, ατζέ-ντα οντουλένγκε σο να αγαβένα καζόμ σημαντικός ισί ο λύτρος. Ισινάμ πφερντέ εκτίμηση, οτθάρ κεράσα ο πιο λατσσό για τι μοιάζας κο Ιησούς οντουλέντζαρ σο κεράσα κάθε ντιβές αμαρέ ζωγιάτε. (Διαβάνεν 2 Κορινθίους 5:​14, 15) Επίσης, μανγκάσα τι ντας δόξα ι Ιεχωβάς σο ντινάς-αμέν ο λύτρος. Εκ τρόπος τι ντας-λες δόξα ισί τι απαντίνας κο συναθροίσεις αντράλ αμαρέ γκίσταρ.

13. Σαρ σικαβάσα καζόμ μανγκάσα ι Ιεχωβάς ντα λέσκε Τσσαβές; Εξηγίνεν.

¹³ Σικαβάσα καζόμ μανγκάσα ι Ιεχωβάς ντα λέσκε Τσσαβές κάνα μουκχάσα γιαβερά πράγματα μάξους λένγκε. Μπουτ φαρ κεράσα-λες ανταβά για τι τζας κο συναθροίσεις. Μπουτ κχανγκιριά κερένα εκ συνάθροιση κο τέλος εκχέ ντιβεσέσκο σο κεράσα μπουτί, κάνα μπορεί τι ισινάμ κχινέ. Εκ γιαβέρ συνάθροιση αβέλα-πες κο σαββατοκύριακος, κάνα ο γιαβερά ξεκουράντιβενα. Ντικχέλα ο Ιεχωβά ότι τζάσα κο συναθροίσεις ατζέ-ντα κάνα ισινάμ κχινέ; Βα! Καζόμ πιο μπουτ προσπαθίνασα, αζόμ πιο μπουτ εκτιμίνελα ο Ιεχωβά ι αγάπη σο σικαβάσα λέσκε.​—Μάρκ. 12:​41-44.

14. Σαρ σικαντάς αμένγκε ο Ιησούς τι μανγκάς ι γιαβερέν χωρίς τι ντικχάς αμαρό συμφέρον;

¹⁴ Ο Ιησούς σικαντάς αμένγκε μπουτ λατσσές σαρ τι μανγκάς ι γιαβερέν χωρίς τι ντικχάς αμαρό συμφέρον. Μανγκλάς όχι σάντε τι μερέλ πι μαθητένγκε αλλά κάθε ντιβές τι τσσουβέλ-λεν πιο οπρέ πέσταρ. Για παράδειγμας, ντέλας πι σαατίσταρ κο μαθητές ατζέ-ντα κάνα ισινέ κχινό ή μπουτ πιεσμέ. (Λουκ. 22:​39-46) Ντα ντικχέλας σο μπορίνελας τι ντελ κο γιαβερά, όχι σο μπορίνελας τι λελ λένταρ. (Ματθ. 20:​28) Κάνα μανγκάσα ι Ιεχωβάς ντα ι Ιησούς αζόμ μπουτ, κα κεράς σο νακχέλα αμαρέ βαστέσταρ για τι τζας κι Ανάμνηση ντα σαρέ κο γιαβερά συναθροίσεις.

15. Κας μανγκάσα πιο μπουτ τι βοηθίνας;

 ¹⁵ Ισινάμ κι μόνη αληθινή Χριστιανική κχανγκιρί ντα χαιρίνασα τι ντας καζόμ αβέλα-πες πιο μπουτ αμαρέ σαατίσταρ για τι καλίνας νεβέ τζενέν τι αβέν αμέντζαρ. Όμως, μανγκάσα ατζέ πιο μπουτ τι βοηθίνας οντουλέν σο ισινάμ λέντζαρ «τζενέ κι πίστη» αλλά τσσιναντέ τι τζαν κο έργος ντα κο συναθροίσεις. (Γαλ. 6:​10) Σικαβάσα ότι μανγκάσα-λεν κάνα βακεράσα λένγκε τι αβέν κο συναθροίσεις, ντα ατζέ πιο μπουτ κι Ανάμνηση. Σαρ ο Ιεχωβά ντα ο Ιησούς, τθεράσα μπαρί χαρά κάνα εκ ασακό πφραλ βουρτίνελα κο Ιεχωβά, σο ισί αμαρό λατσσό Ντατ ντα Τσομπάνης.​—Ματθ. 18:14.

16. (α) Σαρ ντάσα ζορ ο εκ ι γιαβερές, ντα σαρ βοηθίνενα-αμέν αμαρέ συναθροίσεις; (β) Σόσκε ανταλά ντιβεσά ι μπρεσέσκε ισί λατσσέ για τι ντας-αμέν γκοντί ι Ιησούσκε λάφια σο ισί κο εδάφιος Ιωάννης 3:16;

¹⁶ Κο ντιβεσά σο αβένα, καλίνεν καζόμ πιο μπουτ τζενέν αβέλα-πες κι Ανάμνηση σο κα αβέλ Παρασκευή 19 Απριλίου 2019. (Ντικχ ο πλαίσιος « Κα Καλίνεν-λεν;») Σαρό κο μπρες, μανγκάσα τι κεράς ο πιο λατσσό για μα τι χασαράς ο συναθροίσεις σο ντέλα-αμέν ο Ιεχωβά, ντα αντικάς τι ντας ζορ ο εκ ι γιαβερές. Καζόμ ερεσέλα ο τέλος ανταλέ ντουνιάσκο, αμαρέ συναθροίσεις κα βοηθίνεν-αμέν τι ατσσάς ταπεινοί ντα μα τι τσσιναβάς τι σικαβάς θάρρος ντα αγάπη. (1 Θεσ. 5:​8-11) Τι σικαβάς σαρέ αμαρέ γκίσαρ σαρ νιωθίνασα ι Ιεχωβάσκε ντα λέσκε Τσσαβέσκε σο μανγκένα-αμέν αζόμ μπουτ!​—Διαβάνεν Ιωάννης 3:16.