1. Σο βακερντάς ο Ιεχωβά ότι κα αβέλας-πες αμαρέ ντιβεσέντε;

Ο ΙΕΧΩΒΑ βακερντάς αμαρέ ντιβεσένγκε: «Ντες μουρσά σαρέ κατά τσσιμπά ι τθεμένγκε κα ασταρέν, βα, κα ασταρέν σικίς ο σέα εκχέ Ιουδαιόσκε ντα κα βακερέν: “Μανγκάσα τι αβάς τουμέντζαρ, σόσκε ασουντάμ ότι ο Ντεβέλ ισί τουμέντζαρ”». (Ζαχ. 8:​23) Ο “Ιουδαίος” ατθέ μανγκέλα τι σικαβέλ οντουλέν σο τραμπιντάς πι άγιε πνευμάσαρ ο Ντεβέλ. Βον βακέρντιβενα επίσης “ο Ισραήλ ι Ντεβλέσκο”. (Γαλ. 6:​16) Ο «ντες μουρσά» μανγκένα τι σικαβέν οντουλέν σο μπεκλεντίνενα τι τζουβντιόν για πάντα κι πφουβ. Τζανένα ότι ο Ιεχωβά ευλογιντάς οντουλέν σο τραμπίντιλε κατά πνεύμας ντα χαιρίνενα μπουτ σο ντένα-λες λατρεία γιεκ λέντζαρ.

2. Σαρ τζάνα ο «ντες μουρσά» γιεκ οντουλέντζαρ σο ισί χρισμέ;

² Παρόλο σο ναστί τζανάσα ο ναβά σαρέ οντουλένγκε σο ισί χρισμέ κι πφουβ αντιβές, * οντουλά σο μπεκλεντίνενα τι τζουβντιόν κι πφουβ μπορίνενα τι αβέν “λέντζαρ”. Σαρ; Η Αγία Γραφή βακερέλα ότι ο «ντες μουρσά» κα “ασταρένας σικίς ο σέα εκχέ Ιουδαιόσκε ντα κα βακερένας: «Μανγκάσα τι αβάς τουμέντζαρ, σόσκε ασουντάμ ότι ο Ντεβέλ ισί τουμέντζαρ»”. Ο εδάφιος βακερέλα σάντε εκχέ Ιουδαιόσκε. Αλλά ο λάφι «τουμέντζαρ» σικαβέλα ότι ισί πιο μπουτ τζενέ. Ανταβά μανγκέλα τι βακερέλ ότι ανταβά Ιουδαίος νανέ σάντε εκ τζενό αλλά μανγκέλα τι σικαβέλ σαρέ οντουλέν σο τραμπίντιλε ι πνευμάσαρ. Οντουλά σο νανέ χρισμέ υπηρετίνενα ι Ιεχωβάς  γιεκ οντουλέντζαρ σο ισί χρισμέ. Αλλά να ντικχένα-λεν σαρ τι αβένας λένγκε αρχηγοί, σόσκε αγαβένα ότι ο Ιησούς ισί ο Αρχηγός.​—Ματθ. 23:10.

3. Καλέ ερωτησιέντε κα απαντίνελ ανταβά μάθημας;

³ Αντιβές κο λαός κι Ντεβλέσκο ατζέκ ατζέκ ισί χρισμέ Χριστιανοί, οτθάρ ισί τζενέ σο μπορεί τι πουτσένα: (1) Σαρ πρέπει τι ντικχέν πουμαρό νεαυτός ο χρισμέ; (2) Σαρ πρέπει τι συμπεριφερίντιβας οντουλένγκε σο λένα κατά μαντρό ντα κατά μολ κι Ανάμνηση; (3) Πρέπει τι ανησυχίνας άμα οντουλά σο λένα κατά μαντρό ντα κατά μολ αβένα πιο μπουτ καζόμ τζάλα; Ανταβά μάθημας κα απαντίνελ ανταλέ ερωτησιέντε.

4. Καγιά προειδοποίηση σο ισί κο εδάφια 1 Κορινθίους 11:​27-29 πρέπει τι σκεφτίνεν σοβαρά ο χρισμέ, ντα σόσκε;

⁴ Ο χρισμέ πρέπει τι σκεφτίνεν σοβαρά ι προειδοποίηση σο ισί κο εδάφια 1 Κορινθίους 11:​27-29. (Διαβάνεν) Σαρ κα μπορίνελας εκ χρισμέ τι λελ κατά μαντρό ντα κατά μολ κι Ανάμνηση «χωρίς τι αξίνελ-λες»; Άμα να κα τζουβντιόλας σαρ βακερένα ο κανόνες ι Ιεχωβάσκε. (Εβρ. 6:​4-6· 10:​26-29) Ο χρισμέ αγαβένα ότι πρέπει τι ατσσόν πιστοί άμα μανγκένα τι λεν ο «βραβείος, δηλαδή ι ζωή κο ουρανός, σο ο Ντεβέλ κα ντελ οντουλέντε σο καλιντάς  αντράλ κατά Χριστός Ιησούς».​—Φιλιπ. 3:​13-16.

5. Σαρ πρέπει τι ντικχέν πουμαρό νεαυτός ο χρισμέ Χριστιανοί;

⁵ Ο υπηρέτες ι Ιεχωβάσκε βοηθίντιβενα λέσκε άγιε πνευμάσταρ τι αβέν ταπεινοί, όχι μπαρικανέ. (Εφεσ. 4:​1-3· Κολ. 3:​10, 12) Οτθάρ, ο χρισμέ να αμντίνενα ότι ισί πιο λατσσέ κατά γιαβερά. Τζανένα ότι ο Ιεχωβά να ντέλα-λεν πάντα πιο μπουτ άγιος πνεύμας κατά γιαβερά επειδή ισί χρισμέ. Να αμντίνενα ότι αγαβένα πιο λατσσές ι αλήθεια ι Γραφιάκι κατά γιαβερά. Ούτε κα βακερένας ποτές εκχέ τζενέσκε ότι αβιλό βοβ-ντα χρισμέ ντα ότι πρέπει τι αρχίνελ τι λελ κατά μαντρό ντα κατά μολ κι Ανάμνηση. Τζανένα ότι σάντε ο Ιεχωβά τραμπίνελα τζενέν τι τζαν κο ουρανός.

6. Σαρ πρέπει τι συμπεριφερίντιβεν ο χρισμέ Χριστιανοί σαρ βακερένα ο εδάφια 1 Κορινθίους 4:7, 8;

⁶ Παρόλο σο ι χρισμέ Χριστιανόνγκε ισί προνόμιος σο τραμπίντιλε τι τζαν κο ουρανός, να μπεσένα κατά γιαβερά τι συμπεριφερίντιβεν λένγκε με εκ ξεχωριστός τρόπος. (Φιλιπ. 2:2, 3) Επίσης, τζανένα ότι κάνα ο Ιεχωβά τραμπιντάς-λεν να μουτθαντάς-λες ανταβά σαριλένγκε. Οτθάρ, να κερέλα εντύπωση εκχέ χρισμέ τζενέσκε άμα μερικοί να πακιάνα αμέσως ότι τραμπίντιλο ι άγιε πνευμάσαρ. Τζανέλα ότι η Γραφή ντέλα-αμέν ι συμβουλή μα τι σιγκιαράς τι πακιάς εκχέ τζενές σο βακερέλα ότι ο Ντεβέλ ντινάς-λες εκ μπαρί ευθύνη. (Αποκ. 2:2) Εκ χρισμέ Χριστιανός να μανγκέλα τι ταρτίνελ ι προσοχή οπρά-πέστε ντα οτθάρ να βακερέλα ότι ισί χρισμέ οντουλένγκε σο ντικχέλα-λεν πρώτη φαρ. Ντα σίγουρα να ισαρέλα-πες ανταλέσκε κο γιαβερά.​—Διαβάνεν 1 Κορινθίους 4:7, 8.

7. Σο να κερένα ο χρισμέ, ντα σόσκε;

⁷ Ο χρισμέ Χριστιανοί να αμντίνενα ότι πρέπει τι κερέν παρέα σάντε γιαβερέ χρισμέ Χριστιανόντζαρ. Να ρόντενα τι αρακχέν γιαβερένγκε σο τραμπίντιλε βον-ντα ι άγιε πνευμάσαρ για τι κερέν λάφι ανταλέσκε ή τι γκιντίντιβεν γιεκ για τι σικλιαρέν-πες κατά Γραφή μπι ι πφραλένγκο σο νανέ χρισμέ. (Γαλ. 1:​15-17) Η κχανγκιρί να κα αβέλας ενωμέ άμα ο χρισμέ κερένας ασακέ πράγματα. Κα τζάνας κόντρα κο άγιος πνεύμας, σο βοηθίνελα ι Ντεβλέσκε λαός τι τθερέλ ειρήνη ντα τι αβέλ ενωμέ.​—Ρωμ. 16:​17, 18.

8. Σόσκε πρέπει τι προσοχίνεν σαρ συμπεριφερίντιβενα οντουλένγκε σο λένα κατά μαντρό ντα κατά μολ κι Ανάμνηση; (Ντικχέν ι υποσημείωση-ντα)

⁸ Σαρ πρέπει τι συμπεριφερίντιβας κο χρισμέ πφραλά ντα πφενιά; Κα αβέλας λάθος τι βάντας μπουτ οπρέ εκχέ τζενές,  ατζέ-ντα άμα ισί χρισμέ πφραλ ι Χριστόσκο. (Ματθ. 23:​8-12) Κάνα η Γραφή κερέλα λάφι ι πρεσβυτερόνγκε, βακερέλα αμένγκε τι “τθεράς ι πίστη σο τθερένα βον”, αλλά ανταβά να μανγκέλα τι βακερέλ ότι κα κεράς εκχέ τζενές αμαρό αρχηγός. (Εβρ. 13:7) Ισί μπαγιά ότι η Γραφή βακερέλα ότι μερικά πφραλά «αξίνενα τι λεν διπλή τιμή». Αλλά ανταβά αβέλα-πες επειδή «κερένα κουμάντος με λατσσό τρόπος» ντα «μαρένα-πες κο λάφι ντα κο σικλιαριπέ», όχι επειδή ισί χρισμέ. (1 Τιμ. 5:​17) Άμα ισαράσα μπουτ οντουλέν σο ισί χρισμέ ντα βάντασα-λεν μπουτ οπρέ, μπορεί τι ανάς-λεν σε δύσκολη θέση. * Ή ατζέ χειρότερα, μπορεί τι αβέν μπαρικανέ ιτιρί αμένταρ. (Ρωμ. 12:3) Καέκ αμένταρ να κα μανγκέλας τι κερέλ εκχέ χρισμέ πφραλές ι Χριστόσκο τι κερέλ εκ λάθος αζόμ μπαρό!​—Λουκ. 17:2.

9. Σαρ σικαβάσα ότι σεβάνασα οντουλέν σο τραμπίνελα ο Ιεχωβά;

⁹ Σαρ σικαβάσα ότι σεβάνασα οντουλέν σο τραμπίνελα ο Ιεχωβά; Νανέ σωστός τι πουτσάς-λεν σαρ αβιλέ χρισμέ. Ισί λένγκι μπουτί, να τθεράσα ο δικαίωμας τι σικλιάς αμέν-ντα. (1 Θεσ. 4:​11· 2 Θεσ. 3:​11) Ντα δεν πρέπει τι αμντίνας ότι λένγκο ρομ ή λένγκι ρομνί, λένγκο ντατ ντα λένγκι ντάι ή γιαβερά τζενέ λένγκε φαμιλιάταρ ισί βον-ντα χρισμέ. Εκ τζενό να αβέλα χρισμέ πι φαμιλιάταρ αλλά κατά Ντεβέλ. (1 Θεσ. 2:​12) Επίσης, δεν πρέπει τι κεράς ερωτήσεις σο κα πληγώνενας ι γιαβερέν. Για παράδειγμας, να κα αβέλας σωστός τι πουτσάς ι ρομνιά εκχέ χρισμέ πφραλέσκι σαρ νιωθίνελα σο κα τζουβντιόλ για πάντα κι πφουβ μπι πι ρομέσκο. Ισινάμ σίγουροι ότι κο νεβό ντουνιάς ο Ιεχωβά κα “τσαλιαρέλ ι επιθυμία σαρέ οντουλένγκι σο τζουβντιόνα”.​—Ψαλμ. 145:16.

10. Σαρ αρακχαβάσα αμαρό νεαυτός άμα να “βάντασα μπουτ οπρέ τζενέν”;

¹⁰ Άμα να βάντασα ι χρισμέν πιο οπρέ κατά γιαβερά, αρακχαβάσα αμαρό νεαυτός-ντα. Σαρ; Η Γραφή βακερέλα αμένγκε ότι μερικοί χρισμέ μπορεί μα τι ατσσόν πιστοί. (Ματθ. 25:​10-12· 2 Πέτρ. 2:​20, 21) Αλλά άμα να “βάντασα μπουτ οπρέ τζενέν”, να κα ντικχάς-λεν σαρ τι αβένας αμαρέ αρχηγοί ατζέ-ντα άμα ισί χρισμέ ή τζανένα-λεν μπουτ τζενέ ή ισί μπουτ μπρεσά κι αλήθεια. (Ιούδα 16, υποσ.) Αντικάς, άμα οντουλά κα νασέν κατά πίστη ή κατά κχανγκιρί να κα τσσιναβάς τι πακιάς κο Ιεχωβά ντα τι υπηρετίνας-λες.

11. Σο αβέλα-πες οντουλέντζαρ σο λένα κατά μαντρό ντα κατά μολ κι Ανάμνηση;

¹¹ Για μπουτ μπρεσά, οντουλά σο λένας κατά μαντρό ντα κατά μολ κι Ανάμνηση αβένας πιο χάνικ. Αλλά ο τελευταία μπρεσά αβένα πιο μπουτ κάθε μπρες. Πρέπει τι ανησυχίνας ανταλέσκε; Νάα. Κα ντικχάς μερικά σημαντικά πράγματα σο πρέπει τι ντας-αμέν γκοντί.

12. Σόσκε δεν πρέπει τι ανησυχίνας καζόμ τζενέ λένα κατά μαντρό ντα κατά μολ κι Ανάμνηση;

¹² «Ο Ιεχωβά τζανέλα οντουλέν σο ισί λέσκε». (2 Τιμ. 2:​19) Αλλά ο πφραλά σο γκινένα οντουλέν σο λένα κατά μαντρό ντα κατά μολ κι Ανάμνηση να τζανένα κον ισί μπαγιά χρισμέ. Οτθάρ, ανταβά αριθμός τθερέλα αντρέ τζενέν-ντα σο αμντίνενα ότι ισί χρισμέ αλλά νανέ. Για παράδειγμας, μερικοί σο λένας κατά μαντρό ντα κατά μολ κι Ανάμνηση τσσιναντέ σοράν. Γιαβερά μπορεί τι τθερένα ψυχολογικά ή συναισθηματικά προβλήματα σο κερένα-λεν τι πακιάν ότι κα αβέν βασιλιάδες ι Χριστόσαρ κο ουρανός. Ντικχίντιβελα ξεκάθαρα ότι  να τζανάσα καζόμ ακριβώς χρισμέ ατσσιλέ κι πφουβ.

13. Βακερέλα η Γραφή καζόμ χρισμέ κα αβέν κι πφουβ κάνα κα αρχίνελ η μπαρί στεναχώρια;

¹³ Ο χρισμέ κα αβέν μπουτέ τθανέντε κι πφουβ κάνα κα αβέλ ο Ιησούς για τι λελ-λεν κο ουρανός. (Ματθ. 24:​31) Η Γραφή βακερέλα ότι κο τελευταία ντιβεσά κα ατσσόν κι πφουβ χάνικ χρισμέ. (Αποκ. 12:​17) Αλλά να βακερέλα καζόμ χρισμέ κα αβέν κάνα κα αρχίνελ η μπαρί στεναχώρια.

14. Σο πρέπει τι αγαβάς για το τρόπος σο τραμπίνελα ο Ιεχωβά ι χρισμέ τζενέν σαρ βακερένα ο εδάφια Ρωμαίους 9:​11, 16;

¹⁴ Ο Ιεχωβά αποφασίνελα κάνα κα τραμπίνελ μερικέ τζενέν τι αβέν χρισμέ. (Ρωμ. 8:​28-30) Ο Ιεχωβά αρχισάλο τι τραμπίνελ μερικέ τζενέν πι πνευμάσαρ σοράν κατά ανάσταση ι Ιησούσκι. Ντικχίντιβελα ότι κο πρώτος αιώνας σαρέ ο αληθινοί Χριστιανοί ισινέ χρισμέ. Αλλά σαρέ κο μπρεσά σο αβιλέ πιο σοράν, ο πιο μπουτ τζενέ σο βακερένας ότι ισινέ Χριστιανοί κι πραγματικότητα να ισινέ. Όμως, οντουλά μπρεσά, ο Ιεχωβά τραμπιντάς πι άγιε πνευμάσαρ οντουλέ χάνικ τζενέν σο ισινέ αληθινοί Χριστιανοί. Βον ισινέ σαρ ο γκιβ σο βακερντάας ο Ιησούς ότι κα μπαριόλας αντρέ κο ζιζάνια. (Ματθ. 13:​24-30) Ανταλέ τελευταίε ντιβεσέντε, ο Ιεχωβά ατζέκ ατζέκ τραμπίνελα οντουλέν σο κα αβέν αντρέ κο 144.000. * Οτθάρ, άμα βοβ κα αποφασίνελ τι τραμπίνελ μερικέ τζενέν οντουλένταρ χάνικ πριν τι αβέλ ο τέλος, σίγουρα δεν πρέπει τι αμντίνας ότι να κερέλα ο σωστός. (Διαβάνεν Ρωμαίους 9:​11, 16) * Τι τθεράς αμαρί γκοντί μα τι κεράς οντουβά σο κερντέ  ο εργάτες σο βακερντάς ο Ιησούς κι παραβολή. Βον κερντέ παράπονα οντουλέσκε σο κερντάς λένγκο κύριος κο τζενέ σο ασταρντέ μπουτί κο τελευταίος σαάτι.​—Ματθ. 20:​8-15.

15. Ισί σαρέ ο χρισμέ αντρέ κο «πιστός ντα φρόνιμος δούλος» σο βακέρντιβελα κο εδάφια Ματθαίος 24:​45-47; Εξηγίνεν.

¹⁵ Νανέ αντρέ κο «πιστός ντα φρόνιμος δούλος» σαρέ οντουλά σο μπεκλεντίνενα τι τζαν κο ουρανός. (Διαβάνεν Ματθαίος 24:​45-47) Σαρ κο πρώτος αιώνας, αντικάς αντιβές-ντα ο Ιεχωβά ντα ο Ιησούς χρησιμοποιήνενα χάνικ τζενέν για τι παρβαρέν, ή γιαβέρτουλους τι σικλιαρέν, μπουτέν. Κο πρώτος αιώνας, σάντε χάνικ χρισμέ Χριστιανοί γραφιντέ ο Χριστιανικές Ελληνικές Γραφές. Αντιβές, σάντε χάνικ χρισμέ Χριστιανοί τθερένα ι ευθύνη τι ντεν κι Ντεβλέσκο λαός “χαμπέ αζομάν σο πρέπει τι ντεν-λες”.

16. Σο σικλιλέν ανταλέ μαθημάσταρ;

¹⁶ Σο σικλιαρντάς-αμέν ανταβά μάθημας; Ο Ιεχωβά αποφασιντάς τι ντελ ζωή για πάντα κι πφουβ κο πιο μπουτ τζενέ σο ισί λέσκε λαόστε ντα ζωή κο ουρανός οντουλέ χάνικ τζενέντε σο κα αβέν βασιλιάδες ι Ιησούσαρ. Ο Ιεχωβά ευλογίνελα σαρέ πι υπηρετόν​—εμ ι “Ιουδαιός” εμ ι “ντεσέ μουρσέν”​—ντα μπεκλεντίνελα λένταρ τι ντεν καν κο ίδιοι νόμοι ντα τι ατσσόν πιστοί. Σαρέ πρέπει τι ατσσόν ταπεινοί. Σαρέ πρέπει τι υπηρετίνεν γιεκ ντα τι αβέν ενωμέ. Ντα σαρέ πρέπει τι κερέν μπουτ μπουτί για τι ατσσικιαρέν ι ειρήνη κι κχανγκιρί. Καζόμ ερεσέλα ο τέλος, τι συνεχίνας σαρέ τι υπηρετίνας ι Ιεχωβάς ντα τι ακολουθίνας ι Χριστός σαρ «εκ κοπάδι».​—Ιωάν. 10:16.