1, 2. Σο προβλήματα νακχένα μπουτ υπηρέτες ι Ιεχωβάσκε, ντα σο μπορεί τι ανέν ανταλά;

ΑΝΕΝ τουμαρέ γκοντιάτε ακαλά τριν παραδείγματα: Εκ τερνό πφραλ λέλα αμπέρι ότι τθερέλα εκ μπουτ πφαρό νασφαλιπέ. Εκ μπουτιαρνό πφραλ σο ισί πιο μπουτ από 50 μπρεσένγκο χασαρέλα πι μπουτί ντα, παρόλο σο μαρέλα-πες τι αρακχέλ γιαβέρ, ναστί αρακχέλα. Εκ πιστή πφεν σο ισί πφουρί αγαβέλα ότι ναστί κερέλα αζόμ μπουτ ι Ιεχωβάσκε καζόμ κερέλας ανγκλέ.

² Άμα νακχένα τουμέν-ντα κάτι ασακό, μπορεί τι νιωθίνενα ότι να αξίνενα. Ασακέ προβλήματα μπορεί τι λεν τουμαρί χαρά, τι κερέν-τουμέν τι νιωθίνεν μπέτι τουμαρέ νεαυτόσκε ντα τι κερέν ζιάνι κι φιλία σο τθερένα ι γιαβερέντζαρ.

3. Σαρ ντικχέλα ι τζενένγκι ζωή ο Μπενγκ ντα οντουλά σο ισί λέσκε βαστέντε;

³ Ανταβά ντουνιάς σικαβέλα σαρ ντικχέλα ο Μπενγκ ι τζενένγκι ζωή. Ο Μπενγκ πάντα συμπεριφερίντιβελας κο τζενέ σαρ μα τι τθερένας ιτς αξία. Να τζιτζισάλο ιτς ι Ευάκε κάνα βακερντάς λάκε ότι κα αβέλας ελεύθερη άμα να κα ντέλας καν ι Ντεβλές, παρόλο σο τζανέλας ότι ανταβά κα γκερέλας-λα κο μεριπέ. Ο Μπενγκ πάντα τθερέλας πι βαστέντε ο εμπορικός, ο πολιτικός ντα ο θρησκευτικός σύστημας ανταλέ ντουνιάσκο. Οντουλέσκε, να ατσσάσα πουταρντέ μόσαρ σο μπουτ επιχειρηματίες, πολιτικοί ντα αρχηγοί ι θρησκειάκε να σεβάνενα βον-ντα ι τζενένγκι ζωή ντα να τζιτζίνενα ι γιαβερένγκε.

4. Σο κα ντικχάς ανταλέ μαθημάστε;

⁴ Οκιά μπάνταρ, ο Ιεχωβά μανγκέλα τι νιωθίνας λατσσές αμαρέ νεαυτόσκε, ντα ισί πασ’ αμέντε κάνα τθεράσα προβλήματα  σο κερένα-αμέν τι νιωθίνας άχρηστοι. (Ψαλμ. 136:​23· Ρωμ. 12:3) Ανταβά μάθημας κα σικαβέλ σαρ βοηθίνελα-αμέν ο Ιεχωβά (1) κάνα μαράσα-αμέν εκχέ νασφαλιμάσαρ, (2) κάνα τθεράσα οικονομικά προβλήματα ντα (3) κάνα ο πφουρίματα κερένα-αμέν τι νιωθίνας ότι να τθεράσα τίποτα λατσσό τι ντας κο Ιεχωβά. Πρώτα όμως για τι ντικχάς σόσκε ισινάμ σίγουροι ότι σαρέ τθεράσα αξία ι Ιεχωβάσκε.

5. Σο κερέλα-τουμέν τι πακιάν ότι ο τζενέ τθερένα μπαρί αξία ι Ιεχωβάσκε;

⁵ Παρόλο σο ισινάμ κερντέ κατά τσικ, τθεράσα μπουτ πιο μπαρί αξία λάταρ. (Γέν. 2:7) Ντικχέν σάντε χάνικ πράγματα σο σικαβένα αμένγκε ότι τθεράσα μπαρί αξία ι Ιεχωβάσκε. Βοβ λατσσαρντάς ι τζενέν τι τθερέν λέσκε ιδιότητες. (Γέν. 1:​27) Αντικάς, κερντάς-αμέν πιο λατσσέ σαρέ κατά γιαβερά πράγματα κι πφουβ ντα τσσουντάς-αμέν τι κεράς κουμάντος ο ζώα.​—Ψαλμ. 8:​4-8.

6. Σο γιαβέρ σικαβέλα αμένγκε ότι ο ατελείς τζενέ τθερένα μπαρί αξία ι Ιεχωβάσκε;

⁶ Ατζέ-ντα σοράν κατά αμαρτία σο κερντάς ο Αδάμ, ο τζενέ να χασαρντέ πουμαρί αξία κι Ιεχωβάσκε γιακχά. Τθεράσα λέσκε αζόμ μπαρί αξία σο ντινάς πι αγαπημέ τσσαβές, ι Ιησούς, σαρ λύτρος αμαρέ αμαρτιένγκε. (1 Ιωάν. 4:9, 10) Αντράλ κατά λύτρος, ο Ιεχωβά κα τζουβντιαρέλ οντουλέν σο μουλέ ιτιρί κατά αμαρτία σο κερντάς ο Αδάμ, “εμ οντουλέν σο ισί δίκαιοι εμ οντουλέν σο νανέ”. (Πράξ. 24:​15) Ο Λάφι λέσκο σικαβέλα ότι τθεράσα μπαρί αξία λέσκε ατζέ-ντα άμα ισινάμ νασφαλέ, να τθεράσα λοβέ ή ισινάμ πφουρέ.​—Πράξ. 10:​34, 35.

7. Καλά γιαβερά πράγματα κερένα-αμέν τι πακιάς ότι τθεράσα μπαρί αξία ι Ιεχωβάσκε;

⁷ Γιαβερά-ντα πράγματα κερένα-αμέν τι πακιάς ότι τθεράσα μπαρί αξία ι Ιεχωβάσκε. Ταρτιντάς-αμέν πασέ πέστε ντα ντικχλάς σο κερντάμ κάνα ασουντάμ ο λατσσέ αμπέρια. (Ιωάν. 6:​44) Καζόμ τζάας πασέ λέστε, αβέλας βοβ-ντα πασ’ αμέντε. (Ιακ. 4:8) Επίσης, ο Ιεχωβά σικαβέλα ότι τθεράσα λέσκε μπαρί αξία επειδή ντέλα πι σαατίσταρ ντα κερέλα μπουτ πράγματα για τι σικλιαρέλ-αμέν. Τζανέλα σο τζενέ ισινάμ ακανά ντα σο τζενέ μπορίνασα τι αβάς. Ντα διορθώνελα-αμέν σόσκε μανγκέλα-αμέν. (Παρ. 3:​11, 12) Καζόμ λατσσές σικαβένα ανταλά πράγματα ι μπαρί αξία σο τθεράσα ι Ιεχωβάσκε!

8. Σαρ κερένα-αμέν τι ντικχάς αμαρέ προβλήματα ο λάφια ι εδαφιόνγκε Ψαλμός 18:​27-29;

⁸ Μερικά τζενέ πακιάνας ότι ο βασιλιάς Δαβίδ ισινέ άχρηστος, αλλά βοβ τζανέλας ότι ο Ιεχωβά μανγκέλας-λες ντα ισινέ πασέ λέστε. Ανταβά βοηθιντάς-λες τι ντικχέλ πο προβλήματα με το σωστός τρόπος. (2 Σαμ. 16:​5-7) Κάνα τθεράσα πφανγκό γκι ή προβλήματα, ο Ιεχωβά μπορίνελα τι βοηθίνελ-αμέν τι ντικχάς ο πράγματα γιαβέρτουλους ντα τι νακχαβάς σο-ντα εμπόδιος ισί ανγκλ’ αμέντε. (Διαβάνεν Ψαλμός 18:​27-29) Κάνα τθεράσα ι Ιεχωβάς πασ’ αμέντε, τίποτα ναστί τσσιναβέλα-αμέν τι υπηρετίνας-λες χαράσαρ. (Ρωμ. 8:​31) Ακανά κα ντικχάς οντουλά τριν προβλήματα σο χρειαζίντιβελα ατζέ πιο μπουτ τι ντας-αμέν γκοντί ότι ο Ιεχωβά μανγκέλα-αμέν ντα ότι τθεράσα μπαρί αξία λέσκε.

9. Σαρ μπορεί τι ντικχάς αμαρό νεαυτός άμα ισινάμ νασφαλέ;

⁹ Εκ νασφαλιπέ μπορεί τι ανέλ αμένγκε μπαρό πφαριπέ ντα τι κερέλ-αμέν τι νιωθίνας ότι να τθεράσα αξία καεκχέσκε. Μπορεί τι νιωθίνασα μπέτι κάνα ο τζενέ ντικχένα ότι να ισινάμ λατσσές ή ότι τθεράσα ανάγκη ι γιαβερένγκι βοήθεια. Ατζέ-ντα κάνα  ο γιαβερά να τζανένα ότι ισινάμ νασφαλέ, μπορεί τι λατζάσα σο ναστί κεράσα οντουλά σο κεράας. Κάνα νακχάσα ασακέ προβλήματα, ο Ιεχωβά ντέλα-αμέν ζορ. Σαρ;

10. Σο κα βοηθίνελ-αμέν κάνα ισινάμ νασφαλέ σαρ βακερέλα ο εδάφιος Παροιμίες 12:25;

¹⁰ Κάνα ισινάμ νασφαλέ, εκ «λατσσό λάφι» κα ντελ-αμέν ζορ. (Διαβάνεν Παροιμίες 12:​25) Κι Αγία Γραφή, ο Ιεχωβά βακερέλα αμένγκε μπερεκέτι λατσσέ λάφια σο ανένα αμαρέ γκοντιάτε ότι τθεράσα αξία λέσκε ατζέ-ντα άμα ισινάμ νασφαλέ. (Ψαλμ. 31:​19· 41:3) Άμα διαβάνασα μπουτ φαρ ανταλά λάφια σο αβένα λέσταρ, ο Ιεχωβά κα βοηθίνελ-αμέν τι κεράς κουμάντος ο μπέτι αισθήματα σο ανέλα αμένγκε αμαρό νασφαλιπέ.

11. Σαρ βοηθιντάς ο Ιεχωβά εκχέ πφραλές;

¹¹ Ντικχέν σο αβιλό-πες κο Χόρχε. Κάνα ισινέ τερνό, νασφάλιλο μπουτ εκχέ νασφαλιμάσταρ σο μπαριόλας μπουτ σουγκό ντα κερέλας-λες τι νιωθίνελ άχρηστος. Βοβ βακερέλα: «Να μπεκλεντίναβας ότι μο νασφαλιπέ κα κερέλας-μαν τι νιωθίναβ αντικάς ούτε ότι κα λατζάβας σο ταρτίναβας ι τζενένγκι προσοχή οπρά-μάντε. Καζόμ μο νασφαλιπέ μπαριόλας, σκεφτίναβας σο κα αβέλας-πες μι ζωγιάσαρ. Χασαρντόμας μι ζορ ντα μολίναβας ι Ιεχωβάς τι βοηθίνελ-μαν». Σο κερντάς ο Ιεχωβά λέσκε; «Ναστί ατσσικιαράβας μι γκοντί εκχέ πραγμάστε, οτθάρ βακερντέ μάνγκε τι διαβάναβ κατά Ψαλμοί κάθε φαρ χάνικ λάφια σο σικαβένα ότι ο Ιεχωβά πφαμπόλα πι υπηρετόνγκε. Διαβάναβας χάνικ ανταλέ εδαφιόνταρ κάθε ντιβές, ντα λοκχιόλας μπουτ μο γκι. Καζόμ νακχένας ο ντιβεσά, ο γιαβερά ντικχένας ότι ασάβας πιο μπουτ. Ντα βακερντέ ότι ανταβά ντέλας-λεν ζορ. Αγαντόμ ότι ο Ιεχωβά απαντιντάς μι προσευχιέντε! Βοηθιντάς-μαν τι ντικχάβ μο νεαυτός γιαβέρτουλους. Αρχισάλομ τι τθεράβ μι γκοντί κο λάφια κι Γραφιάκε σο σικαβένα σαρ  ντικχέλα-μαν Βοβ παρόλο σο ισινόμ νασφαλό».

12. Κάνα μαρένα-τουμέν εκχέ νασφαλιμάσαρ, σο μπορίνενα τι κερέν για τι νιωθίνεν ι Ιεχωβάς πασέ τουμέντε;

¹² Άμα μαρένα-τουμέν εκχέ νασφαλιμάσαρ, τι αβέν σίγουροι ότι ο Ιεχωβά τζανέλα σο νακχένα. Μολίνεν-λες τι βοηθίνελ-τουμέν τι ντικχέν τουμαρό πρόβλημας με το σωστός τρόπος. Σοράν, ρόντεν τι αρακχέν κι Γραφή ο λατσσέ λάφια σο βακερέλα ο Ιεχωβά τουμένγκε. Τι ντικχέν πιο μπουτ ο εδάφια σο σικαβένα καζόμ μπαρί αξία τθεράσα ι Ιεχωβάσκε. Καζόμ κα κερέν-λες ανταβά, κα ντικχέν ότι ο Ιεχωβά ισί λατσσό σαρέ οντουλέντζαρ σο υπηρετίνενα-λες πιστά.​—Ψαλμ. 84:11.

13. Σαρ μπορεί τι νιωθίνελ ο σορό εκχέ φαμιλιάκο άμα κα χασαρέλ πι μπουτί;

¹³ Ο σορό κι κάθε φαμιλί μανγκέλα τι ντελ πι φαμιλιάτε ο αναγκαία. Βακερέν όμως ότι εκ πφραλ χασαρέλα πι μπουτί παρόλο σο να κερντάς κάτι λάθος. Κερέλα σο νακχέλα λέσκε βαστένταρ για τι αρακχέλ γιαβέρ μπουτί αλλά να αρακχέλα. Ανταβά μπορεί τι κερέλα-λες τι νιωθίνελ άχρηστος. Σαρ κα βοηθίντιβελ άμα τθερέλα πι γκοντί οντουλέντε σο βακερντάς ο Ιεχωβά ότι κα κερέλ;

14. Σόσκε κερέλα ο Ιεχωβά οντουλά σο βακερντάς;

¹⁴ Ο Ιεχωβά πάντα κερέλα οντουλά σο βακερέλα. (Ιησ. Ναυή 21:​45· 23:​14) Σόσκε; Πρώτον, να μανγκέλα τι χαλάντιβελ λέσκο λατσσό ναβ. Ο Ιεχωβά ντινάς πο λάφι ότι κα βοηθίνελ πι πιστέ υπηρετόν ντα να αβέλα-πες μα τι ατσσικιαρέλ πο λάφι. (Ψαλμ. 31:​1-3) Επίσης, τζανέλα ότι, επειδή ισινάμ λέσκε φαμιλιάτε, κα στεναχωρίντιβαας ντα κα πφανγκέλας αμαρό γκι άμα να κα βοηθίνελας-αμέν. Βοβ ντέλα πο λάφι ότι κα ντελ-αμέν σο-ντα χρειαζίντιβασα για  τι τζουβντιάς ντα για τι υπηρετίνας-λες πιστά, ντα τίποτα να κα τσσιναβέλ-λες τι κερέλ οντουβά σο βακερντάς!​—Ματθ. 6:​30-33· 24:45.

15. (α) Καβά πρόβλημας τθερένας ο πρώτοι Χριστιανοί; (β) Καλέ πραγμάσκε ισινάμ σίγουροι σαρ βακερένα ο εδάφια Ψαλμός 37:​18, 19;

¹⁵ Κάνα ντάσα-αμέν γκοντί σόσκε ο Ιεχωβά κερέλα οντουλά σο βακερέλα, ισινάμ σίγουροι ότι κα βοηθίνελ-αμέν κο οικονομικά προβλήματα. Ανέν τουμαρέ γκοντιάτε ι πρώτε Χριστιανόν. Κάνα ο τζενέ γκιλέ λέντζαρ μπαρί κόντρα κι Ιερουσαλήμ, «σαρέ, εκτός κατά απόστολοι, τρουγισάλε». (Πράξ. 8:1) Σο μπορεί τι αντάς ανταβά; Οικονομικά προβλήματα! Ντικχίντιβελα ότι ο Χριστιανοί χασαρντέ πουμαρέ κχερά ντα πουμαρέ μπουτιά. Αλλά ο Ιεχωβά να μουκχλάς-λεν, ντα βον να χασαρντέ πουμαρί χαρά. (Πράξ. 8:4· Εβρ. 13:5, 6· Ιακ. 1:2, 3) Ο Ιεχωβά ισινέ πασέ οντουλέ πιστέ Χριστιανόντε ντα κα αβέλ πασέ αμέντε-ντα.​—Διαβάνεν Ψαλμός 37:​18, 19.

16. Σο μπορεί τι κερέλ-αμέν τι σκεφτίνας ότι οντουλά σο κεράσα ι Ιεχωβάσκε να τθερένα αξία;

¹⁶ Καζόμ πφουριάσα, μπορεί τι αρχίνας τι νιωθίνας ότι να τθεράσα μπουτ τι ντας κο Ιεχωβά. Ο βασιλιάς Δαβίδ μπορεί τι τθερέλας βοβ-ντα ασακέ μπέτι συναισθήματα καζόμ πφουριόλας. (Ψαλμ. 71:9) Σαρ μπορίνελα τι βοηθίνελ-αμέν ο Ιεχωβά;

17. Σο σικλιάσα κατά πφεν Τζέρι;

¹⁷ Ντικχέν σο αβιλό-πες εκχέ πφενιάκε κι Τζέρι. Βακερντέ λάκε τι τζαλ σε εκ συνάντηση σο κα σικλιαρένας ι πφραλέν σαρ τι λατσσαρέν ι Αίθουσα Βασιλείας, αλλά να μανγκέλας. Βακερντάς: «Ισινόμ πφουρί, μο ρομ μουλό ντα να τζανάβα τι κεράβ τίποτα για τι βοηθίναβ. Ισινόμ άχρηστη». Ι ιράτ πριν τι τζαλ, πουταρντάς πο γκι κο Ιεχωβά αντράλ κατά προσευχή. Κάνα γκιλί κι Αίθουσα  Βασιλείας ο γιαβέρ ντιβές, ατζέ να τζανέλας σόσκε μανγκλέ λάταρ τι τζαλ. Καζόμ ασουνέλας εκ ομιλία οτθέ, εκ πφραλ βακερντάς ότι ο πιο σημαντικός ισί τι μανγκάς αντράλ αμαρέ γκίσταρ τι σικλιάς κατά Ιεχωβά. Η Τζέρι ντέλα-πες γκοντί: «Σκεφτιντόμ: “Τθεράβα-λες ανταβά!” Ροβάβας κάνα αγαντόμ ότι ο Ιεχωβά απαντίνελας μι προσευχιάτε. Ντέλας-μαν ι σιγουριά ότι τθεράβα κάτι μπουτ λατσσό τι νταβ ντα ότι μανγκέλας αντράλ πι γκίσταρ τι σικλιαρέλ-μαν!» Σοράν ανταλέσταρ, η Τζέρι βακερέλα: «Κάνα γκιλόμ οτθέ, νταράβας, να τθεράβας ζορ ντα μο γκι ισινέ πφανγκό. Κάνα νασλόμ οτθάρ ντάβας μάνγκε μπέσα, λιντόμας ζορ ντα νιωθίναβας ότι τθεράβας αξία!»

18. Σαρ σικαβέλα η Γραφή ότι οντουλά σο κεράσα ι Ιεχωβάσκε τθερένα αξία λέσκε ατζέ-ντα άμα ισινάμ πφουρέ;

¹⁸ Καζόμ πφουριάσα, μπορίνασα τι αβάς σίγουροι ότι ο Ιεχωβά ατζέκ ατζέκ τθερέλα μπουτί αμένγκε. (Ψαλμ. 92:​12-15) Ο Ιησούς σικλιαρντάς-αμέν ότι, ατζέ-ντα άμα οντουλά σο τζανάσα τι κεράς ντικχίντιβενα αμένγκε μπουτ χουρντέ, ο Ιεχωβά εκτιμίνελα σο-ντα μπορίνασα τι κεράς λέσκε. (Λουκ. 21:​2-4) Οντουλέσκε, τι τθερέν τουμαρί γκοντί κο πράγματα σο μπορίνενα τι κερέν. Μπορίνενα για παράδειγμας τι κερέν λάφι ι Ιεχωβάσκε, τι κερέν προσευχή τουμαρέ πφραλένγκε ντα τι ντεν ζορ ι γιαβερέν τι ατσσόν πιστοί. Ο Ιεχωβά ντικχέλα-τουμέν σαρ συνεργάτες όχι επειδή κερένα μπουτ πράγματα, αλλά επειδή ντένα-λες καν αντράλ τουμαρέ γκίσταρ.​—1 Κορ. 3:​5-9.

19. Καγιά σιγουριά ντένα-αμέν ο εδάφια Ρωμαίους 8:​38, 39;

¹⁹ Καζόμ σουκάρ ισί τι ντας λατρεία ι Ιεχωβάς, ι Ντεβλές σο εκτιμίνελα μπαγιά οντουλέν σο υπηρετίνενα-λες! Λατσσαρντάς-αμέν τι κεράς οντουβά σο μανγκέλα ντα ανταβά πφερέλα αμαρί ζωή. (Αποκ. 4:​11) Παρόλο σο μπορεί τι αβάς άχρηστοι κι ντουνιάσκε γιακχά, ο Ιεχωβά να λατζάλα αμένγκε. (Εβρ. 11:​16, 38) Κάνα εκ νασφαλιπέ, ο οικονομικά προβλήματα ή ο πφουρίματα ανένα αμένγκε μπαρό πφαριπέ κο γκι, τι ντας-αμέν γκοντί ότι τίποτα ναστί τσσιναβέλα-αμέν κατά αγάπη αμαρέ Νταντέσκι, ι Ιεχωβάσκι.​—Διαβάνεν Ρωμαίους 8:​38, 39.