1. Σαρ ο βασιλιάς Δαβίδ, σο μπορεί τι πουτσέν μερικοί αμένταρ;

 ΣΑΡΕ μανγκάσα τι τθεράς εκ ήρεμη ντα ειρηνική ζωή. Καέκ τζενό να μανγκέλα τι τσσουβέλ πι γκίστε. Μπάζιμα όμως, σαρέ μπορεί τι νιωθίνασα ότι τασαβένα-αμέν ο ανησυχίες. Οτθάρ, μερικοί υπηρέτες ι Ιεχωβάσκε μπορεί τι πουτσένα βον-ντα οντουβά σο πουτσλάας ο βασιλιάς Δαβίδ ι Ιεχωβάς: «Καμπόρ ατζέ κα χαλ-μαν η ανησυχία ντα κα τσσουβάβ μι γκίστε κάθε ντιβές;»​—Ψαλμ. 13:2.

2. Σο κα ντικχάς ανταλέ μαθημάστε;

² Παρόλο σο ναστί νασκιαράσα ντιπ αντρ’ αμένταρ οντουλά σο ανησυχίνενα-αμέν, μπορίνασα τι κεράς μπουτ πράγματα για τι κεράς-λεν κουμάντος. Ανταλέ μαθημάστε, κα ντικχάς μερικά πράγματα σο μπέκιμ ανένα αμένγκε ανησυχία. Σοράν, κα ντικχάς σιοβ πράγματα σο μπορίνασα τι κεράς για τι ατσσάς ήρεμοι κάνα νακχάσα προβλήματα.

3. Καλά δυσκολίες νακχάσα, ντα ισί αμαρέ βαστέντε τι νακχαβάς-λεν;

³ Κάποια πράγματα ανένα αμένγκε ανησυχία ειδικά κάνα ναστί κεράσα-λεν κουμάντος. Για παράδειγμας, κάθε μπρες ο χαμπίματα, ο σέα ντα ο ενοίκια αβένα πιο πααλίς ντα αμέν ναστί κεράσα τίποτα ανταλέσκε. Ούτε ισί αμαρέ βαστέντε τι τζανάς καζόμ φαρ κα προσπαθίνεν ο τζενέ σο κεράσα λέντζαρ μπουτί ή αμαρέ συμμαθητές τι χουχαβέν-αμέν για τι κεράς κάτι σο νανέ τίμιος ή κάτι σο ισί μπίλατζανο. Ντα ναστί τσσιναβάσα οντουλέν σο κερένα μπέτι πράγματα αμαρέ γειτονιάτε. Νακχάσα ανταλά προβλήματα επειδή τζουβντιάσα εκχέ  ντουνιάστε σο ο πιο μπουτ τζενέ να κερένα ο αρχές ι Γραφιάκε. Ο Σατανάς, ο ντεβέλ ανταλέ ντουνιάσκο, τζανέλα ότι μερικοί κα μουκχέν ο «ανησυχίες ανταλέ ντουνιάσκε» τι τσσιναβέν-λεν τι υπηρετίνεν ι Ιεχωβάς. (Ματθ. 13:​22· 1 Ιωάν. 5:​19) Οτθάρ, να κερέλα αμένγκε εντύπωση σο ο ντουνιάς ισί πφερντό πραγματέντζαρ σο ζορισκιαρένα-αμέν!

4. Σο μπορεί τι κεράσα κάνα τθεράσα μπουτ προβλήματα σο ζορισκιαρένα-αμέν;

⁴ Κάνα τθεράσα μπαρέ προβλήματα σο ζορισκιαρένα-αμέν, μπορεί τι μουκχάσα ο ανησυχίες τι τασαβέν-αμέν. Για παράδειγμας, μπορεί τι ανησυχίνασα ότι να κα τθεράς μπερεκέτι λοβέ για τι κινάς οντουλά σο χρειαζίντιβασα ή ότι κα νασφάλιβας ντα ναστί κα τζας αμαρέ μπουτιάτε ή ατζέ-ντα ότι κα χασαράς αμαρί μπουτί. Μπορεί ατζέ-ντα τι νταράσα ότι να κα ατσσάς πιστοί άμα κα αβάς ανγκλάλ κο πειρασμός τι κεράς κάτι σο τζάλα κόντρα κο νόμος κι Ντεβλέσκο. Ατζεχάνικ ο Μπενγκ κα κερέλ οντουλέν σο τθερέλα πι βαστέντε τι τζαν κόντρα ι Ντεβλέσκε λαόσαρ, οτθάρ μπορεί τι ανησυχίνασα σο κα κεράς κάνα κα αβέλ-πες ανταβά. Μπορεί τι πουτσάσα-αμέν: “Ισί λάθος τι τσσουβάβ μι γκίστε ασακέ πραγματένγκε;”

5. Σο μανγκέλας τι βακερέλ ο Ιησούς κάνα βακερντάς: «Μα ανησυχίνεν»;

⁵ Τζανάσα ότι ο Ιησούς βακερντάς πι μαθητένγκε: «Μα ανησυχίνεν». (Ματθ. 6:​25) Μήπως ανταβά μανγκέλα τι βακερέλ ότι δεν πρέπει τι τσσουβάς αμαρέ γκίστε καέκ πραγμάσκε; Νάα! Ντεν-τουμέν γκοντί ότι κο πουρανέ μπρεσά μερικοί πιστοί υπηρέτες ι Ιεχωβάσκε τθερένας ανησυχίες αλλά ο Ιεχωβά ισινέ ευχαριστιμέ λέντζαρ. * (1 Βασ. 19:4· Ψαλμ. 6:3) Ο Ιησούς βακερέλας αμένγκε μα τι τσσουβάς αζόμ μπουτ αμαρέ γκίστε ι πραγματένγκε σο τθεράσα ανάγκη κάθε ντιβές για μα τι τσσιναβάς τι τθεράς κι πρώτη θέση ι Ντεβλέσκι υπηρεσία. Καλά ισί μερικά πράγματα σο μπορίνασα τι κεράς για μα τι ανησυχίνας αζόμ μπουτ;​—Ντικχέν ο πλαίσιος «Σαρ κα Κερέν-λες Ανταβά».

6. Σο κα βοηθίνελ-αμέν τι τθεράς ειρήνη αμαρέ γκοντιάτε σαρ βακερένα ο εδάφια Φιλιππησίους 4:6, 7;

⁶ (1) Τι κερέν προσευχή μπουτ φαρ. Ο Χριστιανοί σο τθερένα εκ πρόβλημας μπορίνενα τι κερέν προσευχή για τι μανγκέν βοήθεια κατά Ιεχωβά. (1 Πέτρ. 5:7) Ο Ιεχωβά κα απαντίνελ τουμαρέ προσευχιέντε ντα κα ντελ-τουμέν ι «ειρήνη ι Ντεβλέσκι σο ισί πιο οπρέ σαρέ οντουλένταρ σο αγαβένα». (Διαβάνεν Φιλιππησίους 4:6, 7) Ο Ιεχωβά κα ντελ-αμέν ειρήνη αντράλ κατά ζουρανό άγιος πνεύμας.​—Γαλ. 5:22.

7. Σο πρέπει τι ντας-αμέν γκοντί κάνα κεράσα προσευχή κο Ντεβέλ;

⁷ Κάνα κερένα προσευχή κο Ιεχωβά, πουτρέν λέσκε τουμαρό γκι. Βακερέν λέσκε καβά ισί ο πρόβλημας ντα σαρ νιωθίνενα ανταλέσκε. Άμα τθερένα εκ λύση, μανγκέν κατά Ιεχωβά σοφία για τι τζανέν σο τι κερέν ντα ζορ για τι κερέν οντουβά σο πρέπει. Άμα ναστί κερένα τίποτα τουμαρέ προβλημάσκε, μανγκέν λέσταρ τι βοηθίνελ-τουμέν μα τι ανησυχίνεν μπουτ. Άμα κερένα προσευχή συγκεκριμέ πραγματένγκε, πιο σοράν κα μπορίνεν τι ντικχέν πιο λατσσές σαρ απαντιντάς ο Ιεχωβά. Άμα κερένα εκ προσευχή ντα η απάντηση να αβέλα σουγκό, μα μουκχέν-τουμέν. Ο Ιεχωβά μανγκέλα, όχι σάντε τι βακερέν συγκεκριμέ πράγματα τουμαρέ προσευχιέντε, αλλά μα τι τσσιναβέν-ντα τι κερέν προσευχή.​—Λουκ. 11:​8-10.

8. Σο μπορίνασα τι βακεράς αμαρέ προσευχιέντε;

⁸ Κάνα βακερένα κο Ιεχωβά οντουλά σο ανησυχίνενα-τουμέν, τι βακερέν ευχαριστώ-ντα. Ισί λατσσό τι ανάς αμαρέ γκοντιάτε ο ευλογίες σο λιντάμ, ατζέ-ντα κάνα τθεράσα  μπουτ προβλήματα. Άμα μπάζιμα να αρακχένα λάφια για τι βακερέν κο Ιεχωβά οντουλά σο νιωθίνενα, μα μπιστρέν ότι ο Ιεχωβά απαντίνελα αζόμ απλέ προσευχιέντε-ντα σαρ ισί: “Μολίναβα-τουτ, βοήθινε-μαν!”​—2 Χρον. 18:​31· Ρωμ. 8:26.

9. Σαρ κα αβάς μπαγιά αρακχαντέ;

⁹ (2) Τι ντεν μπέσα κι Ιεχωβάσκι σοφία, όχι τουμαριάτε. Κάνα τζουβντιόλας ο Ησαΐας, ο τζενέ κο Ιούδας νταρένας κατά Ασσύριοι. Για μα τι περέν λένγκε βαστέντε, ο Ιουδαίοι μανγκλέ βοήθεια κατά Αιγύπτιοι σο πακιάνας ψεύτικε ντεβλέντε. (Ησ. 30:1, 2) Ο Ιεχωβά βακερντάς λένγκε ότι ιτιρί ανταλέσταρ ο πράγματα να κα τζάνας λατσσές λένγκε. (Ησ. 30:7, 12, 13) Αντράλ κατά Ησαΐας, ο Ιεχωβά βακερντάς κο τζενέ σαρ κα αβένας μπαγιά αρακχαντέ. «Ατσσόν ήρεμοι ντα σικαβέν εμπιστοσύνη [κο Ιεχωβά]​—ανταβά κα αβέλ τουμαρί ζορ».​—Ησ. 30:​15β.

10. Κάνα μπορίνασα τι σικαβάς ότι ντάσα μπέσα κο Ιεχωβά;

¹⁰ Σαρ κα σικαβάς ότι ντάσα μπέσα κο Ιεχωβά; Ντικχέν μερικά παραδείγματα. Βακερέν ότι αρακχένα εκ μπουτί σο κα νικαβέν λάταρ πιο μπουτ λοβέ, αλλά κα χρειαζίντιβελ τι κερέν μπουτ σαάτια μπουτί ντα κα τσσιναβέν τι κερέν μερικά πράγματα σο κερένας κι Ιεχωβάσκι υπηρεσία. Ή βακερέν ότι εκ τζενό τουμαρέ μπουτιάταρ περέλα τουμένγκε, αλλά νανέ μπολντό υπηρέτης ι Ντεβλέσκο. Ή σκεφτίνεν ότι εκ τζενό τουμαρέ φαμιλιάταρ σο μανγκένα-λες μπουτ βακερέλα τουμένγκε: «Τράμπινε ή μαν ή τι Ντεβλές». Κο τριν-ντα περιπτώσεις, πρέπει τι λεν εκ σοβαρή απόφαση, αλλά κι κάθε εκ ο Ιεχωβά κα ντελ-τουμέν ι βοήθεια σο μανγκένα. (Ματθ. 6:​33· 10:​37· 1 Κορ. 7:​39) Η ερώτηση ισί: Κα ντεν μπέσα κο Ιεχωβά ντα κα κερέν οντουβά σο κα βακερέλ τουμένγκε;

11. Καλά ιστορίες ι Γραφιάκε μπορίνασα τι διαβάνας για τι ατσσάς ήρεμοι κάνα τζάνα αμέντζαρ κόντρα;

¹¹ (3) Τι σικλιόν λατσσέ ντα γκεραλέ παραδειγματένταρ. Η Αγία Γραφή τθερέλα μπουτ ιστορίες σο σικαβένα καζόμ σημαντικός ισί τι ατσσάς ήρεμοι ντα τι ντας μπέσα κο Ιεχωβά. Καζόμ διαβάνενα ανταλά ιστορίες, τι ντικχέν σο βοηθίνελας ι Ντεβλέσκε υπηρετόν τι ατσσόν ήρεμοι ατζέ-ντα κάνα τζάνας λέντζαρ μπουτ μπαρί κόντρα. Για παράδειγμας, κάνα ο πιο μπαρό ιουδαϊκός δικαστήριος βακερντάς ι αποστολόνγκε τι τσσιναβέν τι βακερέν ο λατσσέ αμπέρια, βον να νταρασάλε. Αλλά βακερντέ μπίνταρανες: «Πρέπει τι ντας καν ι Ντεβλές, σο ισί πιο μπαρό σαριλένταρ, ντα όχι ι τζενέν». (Πράξ. 5:​29) Ατζέ-ντα κάνα νταπλέ-λεν, ι αποστολόν να χαλάς-λεν ι νταρ. Σόσκε; Επειδή τζανένας ότι ο Ιεχωβά ισινέ πασέ λέντε. Ισινέ ευχαριστιμέ λέντζαρ. Αντικάς, να τσσιναντέ τι βακερέν ο λατσσέ αμπέρια. (Πράξ. 5:​40-42) Ντα κάνα γκιλέ τι μουνταρέν ι Στεφανός, βοβ ατσσιλό αζόμ ήρεμος, σο λέσκο μούι ισινέ «σαρ μούι αγγελόσκο». (Πράξ. 6:​12-15) Σόσκε; Επειδή ισινέ σίγουρος ότι ο Ιεχωβά ισινέ ευχαριστιμέ λέσαρ.

12. Σόσκε μπορίνασα τι αβάς ευτυχισμέ κάνα τζάνα αμέντζαρ κόντρα σαρ βακερένα ο εδάφια 1 Πέτρου 3:​14 ντα 4:14;

¹² Ο απόστολοι ντικχλέ πουμαρέ γιακχίντζαρ ότι ο Ιεχωβά ισινέ λέντζαρ. Βοβ ντινάας-λεν ι ζορ τι κερέν θαύματα. (Πράξ. 5:​12-16· 6:8) Αμέν να τθεράσα ανταγιά ζορ αντιβές. Όμως, ο Ιεχωβά βακερέλα αμένγκε αντράλ πι Λαφίσταρ ότι, κάνα νακχάσα δυσκολίες για τη δικαιοσύνη, κεράσα λέσκο γκι ντα λέσκο πνεύμας ισί αμέντζαρ. (Διαβάνεν 1 Πέτρου 3:​14· 4:​14) Οτθάρ, δεν πρέπει τι ανησυχίνας σο κα κεράς άμα κα τζαν αμέντζαρ κόντρα κο ντιβεσά σο κα αβέν. Οκιά μπάνταρ, πρέπει τι κεράς σο νακχέλα αμαρέ βαστέσταρ για τι μπαριαράς αμαρί σιγουριά ότι ο Ιεχωβά κα βοηθίνελ-αμέν ντα κα σώνελ-αμέν. Σαρ οντουλά πρώτοι μαθητές, αντικάς αμέν-ντα πρέπει τι ντας μπέσα ακαλέ λαφίστε σο βακερντάς ο  Ιησούς: «Με κα νταβ-τουμέν λάφια ντα σοφία σο ατζέ-ντα άμα κα γκιντίντιβεν σαρέ γιεκ τουμαρέ ντουσμάνια ναστί κα τζαν λάσαρ κόντρα ντα να κα τθερέν σο τι βακερέν τουμένγκε». Ο Ιησούς ντινάς-αμέν πο λάφι: «Άμα κα νταϊντίνεν, κα ατσσικιαρέν τουμαρί ζωή». (Λουκ. 21:​12-19) Ντα ποτές μα τι μπιστράς ότι ο Ιεχωβά ντέλα-πες γκοντί σο-ντα τθερέλα τι κερέλ λέσκε υπηρετόντζαρ σο μερένα πιστοί λέστε. Κα χρησιμοποιήνελ οντουλά σο τζανέλα λένγκε για τι τζουβντιαρέλ-λεν.

13. Σαρ βοηθίντιβασα κάνα διαβάνασα ιστορίες τζενένγκε σο να ατσσιλέ ήρεμοι ντα να ντινέ μπέσα κο Ιεχωβά;

¹³ Επίσης, σικλιάσα κατά ιστορίες τζενένγκε σο να ατσσιλέ ήρεμοι ντα να ντινέ μπέσα κο Ιεχωβά. Κάνα διαβάνασα ανταλά γκεραλέ παραδείγματα κα βοηθίντιβας μα τι κεράς ο λάθη σο κερντέ βον. Για παράδειγμας, κάνα ο Ασά αβιλό βασιλιάς κο Ιούδας ντα εκ μπαρό στρατός γκιλό τι κερέλ λέσαρ τζένγκι, ντινάς μπέσα κο Ιεχωβά. Ο Ιεχωβά ευλογιντάς-λες ντα βοηθιντάς-λες τι νικίνελ. (2 Χρον. 14:​9-12) Πιο σοράν όμως, κάνα ο Βαασά, σο ισινέ βασιλιάς κο Ισραήλ, γκιλό μπουτ πιο χάνικ στρατιωτέντζαρ τι κερέλ λέσαρ τζένγκι, ο Ασά ποκιντάς ι Συριόν για τι βοηθίνεν-λες αντίς τι μανγκέλ βοήθεια κατά Ιεχωβά, σαρ κερντάας ανγκλέ. (2 Χρον. 16:​1-3) Ντα χάνικ πριν τι μερέλ, κάνα ισινέ μπουτ νασφαλό, να μανγκλάς βοήθεια κατά Ιεχωβά.​—2 Χρον. 16:12.

14. Σο σικλιάσα κατά λάθη σο κερντάς ο Ασά;

¹⁴ Κι αρχή, ο Ασά μανγκέλας βοήθεια κατά Ιεχωβά κάνα τθερέλας προβλήματα. Πιο σοράν όμως, τσσιναντάς τι κερέλ-λες ανταβά, ντα μανγκέλας τι λύνελ κορκορό πο προβλήματα. Κι αρχή, μπορεί τι ντικχίντιβελας μπουτ λατσσό σο σκεφτιντάς τι μανγκέλ βοήθεια κατά Σύριοι για τι νικίνελ ι Ισραηλιτέν. Αλλά η ειρήνη λέσκε τθεμέστε να ατσσικιαρντάς μπουτ. Ο Ιεχωβά βακερντάς λέσκε αντράλ εκχέ προφητίσταρ: «Επειδή στηριντάν-τουτ κο βασιλιάς της Συρίας ντα να στηριντάν-τουτ κο Ιεχωβά τι Ντεβλέστε, ο στρατός ι βασιλιάσκο της Συρίας νασλό τι βαστέσταρ». (2 Χρον. 16:7) Αμέν δεν πρέπει τι ντας αζόμ μπουτ μπέσα αμαρέ νεαυτόσκε ντα τι προσπαθίνας τι λύνας κορκορέ αμαρέ προβλήματα, χωρίς τι μανγκάς βοήθεια κατά Ιεχωβά αντράλ λέσκε Λαφίσταρ. Ατζέ-ντα άμα πρέπει τι λας εκ απόφαση μπουτ σουγκό, πρέπει τι ατσσάς ήρεμοι ντα τι ντας μπέσα κο Ιεχωβά ντα βοβ κα βοηθίνελ-αμέν τι ντας-λεν πέρα.

15. Σο κα μπορίναας τι κεράς κάνα διαβάνασα ι Γραφή;

¹⁵ (4) Τι σικλιόν αβριάλ εδάφια ι Γραφιάκε. Κάνα αρακχένα εδάφια κι Γραφή σο σικαβένα καζόμ σημαντικός ισί τι ατσσάς ήρεμοι ντα τι ντας μπέσα κο Ιεχωβά, προσπαθίνεν τι σικλιόν-λεν αβριάλ. Εκ πράγμας σο κα βοηθίνελ-τουμέν ισί τι γραφίνεν-λεν ντα τι διαβάνεν-λεν μπουτ φαρ. Ο Ιεχωβά βακερντάς κο Ιησούς του Ναυή τι διαβάνελ μπουτ φαρ ο βιβλίος σο λέστε ισινέ γραμμέ ο Νόμος ντα τι σκεφτίνελ-λες για τι κερέλ ο πράγματα γκοντιάσαρ. Ανταλά λάφια κα βοηθίνενας-λες τι αβέλ μπίνταρανο καζόμ κα κερέλας κουμάντος ι Ντεβλέσκε λαός. (Ιησ. Ναυή 1:8, 9) Μπουτ λάφια κατά Ντεβλέσκο Λάφι μπορίνενα τι ντεν τουμέν-ντα ειρήνη σο κα αρακχαβέλ τουμαρό γκι ντα τουμαρί γκοντί καζόμ νακχένα προβλήματα σο κα ανένας τουμένγκε ανησυχία ή νταρ.​—Ψαλμ. 27:​1-3· Παρ. 3:​25, 26.

16. Σαρ χρησιμοποιήνελα ο Ιεχωβά ι κχανγκιρί για τι βοηθίνελ-αμέν τι ατσσάς ήρεμοι ντα τι ντας λέσκε μπέσα;

¹⁶ (5) Τι κερέν παρέα ι Ντεβλέσκε λαόσαρ. Ο Ιεχωβά, αντράλ αμαρέ πφραλένταρ ντα πφενίνταρ, βοηθίνελα-αμέν τι ατσσάς ήρεμοι ντα τι ντας λέσκε μπέσα. Αμαρέ συναθροισιέντε, βοηθίντιβασα κατά σικλιαριπέ σο λάσα, κατά απαντήσεις σο ασουνάσα ντα κατά συζητήσεις σο κεράσα αμαρέ πφραλέντζαρ  ντα πφενίντζαρ. (Εβρ. 10:​24, 25) Επίσης, λάσα μπουτ ζορ κάνα πουτράσα αμαρό γκι αμαλέντε σο ισί μπεσαλήδες αντρέ κι κχανγκιρί. «Ο λατσσό λάφι» εκχέ αμαλέσταρ μπορεί τι λοκχιαρέλ αμαρό γκι κάνα τθεράσα ανησυχίες.​—Παρ. 12:25.

17. Σαρ κα βοηθίνελ-τουμέν η ελπίδα ι Βασιλειάκι τι ατσσόν ήρεμοι παρόλο σο τθερένα δυσκολίες σαρ βακερέλα ο εδάφιος Εβραίους 6:19;

¹⁷ (6) Τι ατσσικιαρέν ζουρανί τουμαρί ελπίδα. Η ελπίδα ι Βασιλειάκι ισί «σαρ άγκυρα ι γκίσκε» ντα βοηθίνελα-αμέν τι ατσσάς ήρεμοι παρόλο σο τθεράσα δυσκολίες ντα σκέψεις σο ανησυχίνενα-αμέν. (Διαβάνεν Εβραίους 6:​19) Τι σκεφτίνεν ο λάφι σο ντέλα-αμέν ο Ιεχωβά ότι κο ντιβεσά σο κα αβέν να κα ανησυχίνας καέκ πραγμάσκε. (Ησ. 65:​17) Τι ανέν τουμαρέ γκοντιάτε ότι ισινέν κο νεβό ντουνιάς, σο να κα αβέν μπέτι πράγματα. (Μιχ. 4:4) Επίσης, τουμαρί ελπίδα κα αβέλ πιο ζουρανί άμα κα πουτρέν λάκε γιαβερένγκε. Τι κερέν σο νακχέλα τουμαρέ βαστένταρ για τι βακερέν ο λατσσέ αμπέρια ντα τι κερέν μαθητέν. Αντικάς, κα αβέν “μπουτ σίγουροι μέχρι κο τέλος ότι κα λεν ι ελπίδα”.​—Εβρ. 6:11.

18. Καλά δυσκολίες μπεκλεντίνασα κο ντιβεσά σο κα αβέν, ντα σαρ κα νταϊντίνας-λεν;

¹⁸ Καζόμ ανταβά ντουνιάς ερεσέλα κο τέλος, κα τθεράς πιο μπουτ δυσκολίες σο κα μπορίνενας τι κερέν-αμέν τι ανησυχίνας. Ο εδάφιος ι μπρεσέσκο για το 2021 κα βοηθίνελ-αμέν τι νταϊντίνας ανταλά δυσκολίες ντα τι ατσσάς ήρεμοι, όχι αμαρέ ζοριάσαρ, αλλά επειδή ντάσα μπέσα κο Ιεχωβά. Σαρό ο μπρες, τι σικαβάς οντουλέντζαρ σο κεράσα ότι πακιάσα ι Ιεχωβάσκο λάφι: «Ατσσόν ήρεμοι ντα σικαβέν εμπιστοσύνη​—ανταβά κα αβέλ τουμαρί ζορ».​—Ησ. 30:15.