1. Σαρ αλλαξάλι ι ελπίδα εκχέ τερνέσκι κάνα ασουντάς εκ ομιλία εκχέ συνελευσιάτε κο 1935;

 ΕΚ ΤΕΡΝΟ ισινέ 18 μπρεσένγκο κάνα μπολντιλό κο 1926. Λέσκο ντατ ντα λέσκι ντάι ισινέ Σπουδαστές της Γραφής, σαρ βακέρντιβενας αζομάν ο Μάρτυρες ι Ιεχωβάσκε. Τθερένας τρινέ τσσαβέν ντα ντουέ τσσαΐν, ντα σικλιαρένας πουμαρέ τσσαβέν τι υπηρετίνεν ι Ιεχωβά Ντεβλές ντα τι κερέν οντουλά σο κερέλας ο Ιησούς Χριστός. Σαρ κερένας σαρέ ο Σπουδαστές της Γραφής αζομάν, αντικάς οντουβά-ντα πιστός τερνό λέλας κατά μαντρό ντα κατά μολ κάθε μπρες κι Ανάμνηση. Όμως, λέσκι ελπίδα αλλαξάλι κάνα ασουντάς ι ομιλία «Ο Μπαρό Πλήθος». Οντιά ομιλία κερντάς-λα κο 1935 ο Ιωσήφ Ρόδερφορντ εκχέ συνελευσιάτε κι Ουάσινγκτον, σο ισί κο ΗΠΑ. Σο σικλιλέ ο Σπουδαστές της Γραφής οντουλέ συνελευσιάτε;

2. Καγιά αλήθεια σικαντάς ο πφραλ Ρόδερφορντ κι ομιλία σο κερντάς;

² Κι ομιλία σο κερντάς ο πφραλ Ρόδερφορντ σικαντάς κον ισί ο «μπαρό πλήθος» σο βακέρντιβελα κο εδάφιος Αποκάλυψη 7:9. Μέχρι αζομάν, πακιάνας ότι ο μπαρό πλήθος ισινέ εκ ομάδα τζενένγκι σο κα τζάνας κο ουρανός αλλά να ισινέ αζόμ πιστοί. Ο πφραλ Ρόδερφορντ σικαντάς αντράλ κατά Γραφή ότι ο μπαρό πλήθος να τραμπίντιλο για τι τζουβντιόλ κο ουρανός, αλλά ισί ο γιαβερά μπρακέ * ι Χριστόσκε σο κα  νακχέν κατά «μπαρί στεναχώρια» ντα κα τζουβντιόν για πάντα κι πφουβ. (Αποκ. 7:​14) Ο Ιησούς ντινάς πο λάφι: «Γιαβερέ-ντα μπρακέν τθεράβα, σο νανέ ανταλέ μαντρινάταρ· οντουλέν-ντα πρέπει τι τσσουβάβ-λεν αντρέ, ντα κα ασουνέν μι φωνή ντα κα αβέν εκ κοπάδι, εκ τσομπάνης». (Ιωάν. 10:​16) Ανταλά «γιαβερά μπρακέ» ισί πιστοί Μάρτυρες ι Ιεχωβάσκε σο μπεκλεντίνενα τι τζουβντιόν για πάντα κο Παράδεισος κι πφουβ. (Ματθ. 25:​31-33, 46) Ακανά κα ντικχάς σαρ οντουβά νεβό πράγμας σο αγαντέ κατά Γραφή αλλαντάς ι ζωή μπουτένγκι σο υπηρετίνενας ι Ιεχωβάς, οντουλέ πφραλέσκι-ντα σο ισινέ 18 μπρεσένγκο.​—Ψαλμ. 97:​11· Παρ. 4:18.

3, 4. Κι συνέλευση κο 1935, σο αγαντέ χιλιάδες τζενέ για την ελπίδα σο τθερένας, ντα σόσκε;

³ Ισινέ μπουτ σουκάρ κάνα ο πφραλ Ρόδερφορντ πουτσλάς οντουλέν σο ισινέ οτθέ: «Μπορίνενα τι ιστίν σαρέ τουμέν σο μπεκλεντίνενα τι τζουβντιόν για πάντα ακατέ κι πφουβ;» Εκ πφραλ σο ισινέ οτθέ βακερέλα ότι πιο μπουτ κατά επκάς οντουλέ 20.000 τζενένταρ ιστίντιλε. Αζομάν ο πφραλ Ρόδερφορντ βακερντάς: «Ντικχέν! Ο μπαρό πλήθος!» Σοράν ανταλέσταρ, σαρέ οντουλά σο ισινέ οτθέ αρχισάλε τι ντεν βίκος χαράσαρ. Οντουλά σο ιστίντιλε αγαντέ ότι να τραμπίντιλεας για τι τζουβντιόν κο ουρανός. Αγαντέ ότι να αβιλέας χρισμέ ι Ντεβλέσκε πνευμάσαρ. Ο γιαβέρ ντιβές ι συνελευσιάκο, μπολντιλέ 840 τζενέ. Ο πιο μπουτ λένταρ ισινέ αντρέ κο γιαβερά μπρακέ.

⁴ Σοράν οντουλέ ομιλιάταρ, ο τερνό σο βακερντάμ πιο οπρέ ντα χιλιάδες γιαβερά κερντέ ο σωστός ντα τσσιναντέ τι λεν κατά μαντρό ντα κατά μολ κι Ανάμνηση. Μπουτ πφραλά νιωσάλε σαρ ακαβά πφραλ σο βακερντάς: «Κι Ανάμνηση κο 1935 ισινέ η τελευταία φαρ σο λιντόμ κατά μαντρό ντα κατά μολ. Αγαντόμ ότι ο Ιεχωβά να ντινάας-μαν αντράλ κατά άγιος πνεύμας ι ελπίδα τι τζουβντιάβ κο ουρανός, αλλά ότι τθεράβας ι ελπίδα τι τζουβντιάβ κι πφουβ ντα τι βοηθίναβ τι κερντιόλ παράδεισος». (Ρωμ. 8:​16, 17· 2 Κορ. 1:​21, 22) Από αζομάν, ο τζενέ σο αβιλέ αντρέ κο μπαρό πλήθος ισί μπουτ ντα υπηρετίνενα γιεκ ι χρισμέ πφραλέντζαρ σο ισί ατζέ τζουβντέ κι πφουβ.

5. Σαρ ντικχέλα ο Ιεχωβά οντουλέν σο τσσιναντέ τι λεν κατά μαντρό ντα κατά μολ;

⁵ Σαρ ντικχέλα ο Ιεχωβά οντουλέν σο τσσιναντέ τι λεν κατά μαντρό ντα κατά μολ σοράν κατά 1935; Σο αβέλα-πες άμα εκ μπολντό Μάρτυρας αντιβές πακιάλα ότι ισί σωστός σο λέλα κατά μαντρό ντα κατά μολ κι Ανάμνηση αλλά σοράν αγαβέλα ότι νανέ μπαγιά χρισμέ; (1 Κορ. 11:​28) Μερικά τζενέ κερντέ-λες ανταβά σόσκε να αγαντέας καγιά ισινέ λένγκι ελπίδα. Αλλά άμα κα αγαβέν πουμαρό λάθος, κα τσσιναβέν τι λεν κατά μαντρό ντα κατά μολ ντα κα συνεχίνεν τι υπηρετίνεν πιστά ι Ιεχωβάς, βοβ σίγουρα κα δεχτίνελ-λεν αντρέ κο γιαβερά μπρακέ. Παρόλο σο να λένα κατά μαντρό ντα κατά μολ, τζάνα κι Ανάμνηση σόσκε εκτιμίνενα μπουτ οντουλά σο κερντάς λένγκε ο Ιεχωβά ντα ο Ιησούς.

6. Σο βακερντάς ο Ιησούς ι αγγελόνγκε τι κερέν;

⁶ Επειδή η μπαρί στεναχώρια ισί αζόμ πασέ, κα λας μπουτ ζορ άμα κα ντικχάς σο γιαβέρ βακερέλα ο κεφάλαιος 7 κι Αποκάλυψη ι χρισμέ Χριστιανόνγκε ντα οντουλένγκε σο ισί αντρέ κο μπαρό πλήθος ι γιαβερέ μπρακένγκο. Ο Ιησούς βακερέλα ι αγγελόνγκε τι συνεχίνεν τι ασταρέν ο σταρ  μπαρμπαλιά σο ανένα καταστροφή. Δεν πρέπει τι μουκχέν οντουλά μπαρμπαλιά τι πφούντεν κι πφουβ μέχρι σαρέ ο χρισμέ Χριστιανοί τι λεν ι σφραγίδα, δηλαδή μέχρι ο Ιεχωβά τι βακερέλ ότι ισί πιστοί. (Αποκ. 7:​1-4) Επειδή ατσσιλέ πιστοί, ο χρισμέ πφραλά ι Χριστόσκε αβένα βασιλιάδες ντα ιερείς λέσαρ κο ουρανός. (Αποκ. 20:6) Ο Ιεχωβά, ο Ιησούς ντα ο άγγελοι κα αβέν μπουτ χαρούμενοι κάνα κα ντικχέν ι 144.000 χρισμέν τι τζαν κο ουρανός.

7. Καλέ τζενέν ντικχλάς ο Ιωάννης κι φαντασία, ντα σο κερένας βον σαρ βακερένα ο εδάφια Αποκάλυψη 7:9, 10; (Ντικχέν ι φωτογραφία κι ανγκλαϊνί σελίδα)

⁷ Αφού κερντάς λάφι για το 144.000 βασιλιάδες ντα ιερείς, ο Ιωάννης ντικχέλα κάτι σο ισί μπουτ σουκάρ: «εκ μπαρό πλήθος» σο νακχέλα τζουβντό κατά Αρμαγεδδώνας. Ανταλά ντούι ομάδες νανέ ίδιες. Η δεύτερη ομάδα ισί πιο μπαρί κατά πρώτη ντα να τζανάσα καζόμ τζενέ ισί λάτε. (Διαβάνεν Αποκάλυψη 7:9, 10) Οντουλά σο ισί λάτε ισί «ιριαντέ παρνέ σεΐντζαρ», σο μανγκέλα τι βακερέλ ότι να μουκχλέ τι “μελιαρέλ-λεν” ανταβά ντουνιάς ι Μπενγκέσκο ντα ότι ατσσιλέ πιστοί κο Ντεβέλ ντα κο Χριστός. (Ιακ. 1:​27) Ντένα βίκος ζουρανές ότι σώντιλε χάρη οντουλέσταρ σο κερντάς λένγκε ο Ιεχωβά ντα ο Ιησούς, σο ισί ο Μπρακό ι Ντεβλέσκο. Επίσης, ασταρένα κλαριά από φοίνικες, σο μανγκέλα τι βακερέλ ότι δεχτίνενα χαράσαρ ότι ο Ιησούς ισί ο βασιλιάς σο τσσουντάς ο Ιεχωβά.​—Ντικχέν Ιωάννης 12:​12, 13.

8. Σο βακερένα αμένγκε ο εδάφια Αποκάλυψη 7:​11, 12 οντουλένγκε σο ισί κο ουρανός;

⁸ Διαβάνεν Αποκάλυψη 7:​11, 12. Σο αβιλό-πες κο ουρανός; Ο Ιωάννης ντικχέλα ότι σαρέ οντουλά σο ισί κο ουρανός ισί χαρούμενοι ντα ντένα δόξα ι Ντεβλές κάνα ντικχένα ο μπαρό πλήθος. Οντουλά σο ισί κο ουρανός κα χαιρίνεν κάνα κα ντικχέν τι νικιόλ μπαγιά ανταγιά φαντασία, αζομάν σο ο μπαρό πλήθος κα νακχέλ τζουβντό κατά μπαρί στεναχώρια.

9. Σο κερένα ακανά οντουλά σο ισί αντρέ κο μπαρό πλήθος σαρ βακερένα ο εδάφια Αποκάλυψη 7:​13-15;

⁹ Διαβάνεν Αποκάλυψη 7:​13-15. Ο Ιωάννης βακερντάς ότι οντουλά σο ισί αντρέ κο μπαρό πλήθος «τθοντέ πουμαρέ σέα ντα κερντέ-λεν παρνέ ι Μπρακέσκε ρατέσαρ». Ανταβά μανγκέλα τι βακερέλ ότι τθερένα πάκι συνείδηση ντα κερένα ι Ιεχωβάσκο γκι. (Ησ. 1:​18) Ισί αφιερωμέ, μπολντέ Χριστιανοί, σο σικαβένα μπαρί πίστη κι Ιησούσκι θυσία ντα ισί λατσσέ αμαλά ι Ιεχωβάσαρ. (Ιωάν. 3:​36· 1 Πέτρ. 3:​21) Άκ’ σόσκε μπορίνενα τι αβέν ανγκλάλ κο θρόνος κι Ντεβλέσκο ντα “τι υπηρετίνεν-λες ντισάρα ντα ιράτ” ατθέ κι πφουβ. Ντα ακανά κερένα αντράλ πουμαρέ γκίσταρ ο πιο μπουτ κατά έργος σο τθεράσα για τι βακεράς ντα τι σικλιαράς ο λατσσέ αμπέρια ντα τσσουβένα ι Ντεβλέσκι Βασιλεία πιο οπρέ πουμαρέ νεαυτόσταρ.​—Ματθ. 6:​33· 24:​14· 28:​19, 20.

10. Καλέ πραγμάσκε ισί σίγουρος ο μπαρό πλήθος, ντα καβά πράγμας κα ντικχέν τι νικιόλ μπαγιά;

¹⁰ Οντουλά σο ισί αντρέ κο μπαρό πλήθος σο νακχέλα κατά μπαρί στεναχώρια ισί σίγουροι ότι ο Ντεβέλ να κα τσσιναβέλ τι φροντίνελ-λεν, σόσκε «Οντουβά σο μπεσέλα κο θρόνος κα τσσουβέλ πο τσαντίρι οπρά-λέντε». Ντα κα νικιόλ μπαγιά οντουβά σο μπεκλεντίνενας τι ντικχέν ο γιαβερά μπρακέ: «[Ο Ντεβέλ] κα νασκιαρέλ σαρέ ο δάκρυα λένγκε γιακχίνταρ, ντα ο μεριπέ να κα αβέλ πάλι, ούτε λύπη ούτε βίκος ούτε ντουκχ να κα αβέν πάλι».​—Αποκ. 21:3, 4.

11, 12. (α) Καλά ευλογίες κα τθερέλ ο μπαρό πλήθος σαρ βακερένα ο εδάφια Αποκάλυψη 7:​16, 17; (β) Σο μπορίνενα τι κερέν ο γιαβερά μπρακέ κι Ανάμνηση, ντα σόσκε;

¹¹ Διαβάνεν Αποκάλυψη 7:​16, 17. Αντιβές,  μερικά πφραλά ντα πφενιά ισί μποκχαλέ επειδή τθερένα οικονομικά προβλήματα ή επειδή αβέλα-πες τζένγκι οτθέ σο μπεσένα. Γιαβερά ισί κι φυλακή σόσκε μανγκένα τι ατσσόν πιστοί. Όμως, οντουλά σο ισί αντρέ κο μπαρό πλήθος χαιρίνενα μπουτ σόσκε τζανένα ότι, αφού κα νακχέν τζουβντέ κατά καταστροφή ανταλέ πφιρνέ ντουνιάσκι, κα τθερέν πάντα πουμαρό μαντρό ντα σικλιαριπέ κατά Ιεχωβά. Κάνα ο ντουνιάς ι Μπενγκέσκο κα καταστραφίντιβελ, ο μπαρό πλήθος κα γλιτώνελ κατά χολί ι Ιεχωβάσκι, σο ισί σαρ «κάψα». Κάνα κα τελειώνελ η μπαρί στεναχώρια, ο Ιησούς κα γκερέλ οντουλέν σο ατσσιλέ τζουβντέ “πανίντε σο ντένα ζωή [για πάντα]”. Σκεφτίνεν: Ο μπαρό πλήθος τθερέλα εκ σουκάρ ελπίδα. Σαρέ κατά δισεκατομμύρια τζενέ σο τζουβντιλέ κι πφουβ, βον μπορεί μα τι μερέν ποτές!​—Ιωάν. 11:26.

¹² Ο γιαβερά μπρακέ τθερένα εκ σουκάρ ελπίδα, οτθάρ ισί πφερντέ εκτίμηση ι Ιεχωβάσκε ντα ι Ιησούσκε! Παρόλο σο να τραμπίντιλε για τι τζουβντιόν κο ουρανός, ανταβά να μανγκέλα τι βακερέλ ότι τθερένα πιο χάνικ αξία ι Ιεχωβάσκε. Οντουλά σο ισί κο ντούι-ντα ομάδες μπορίνενα τι ντεν δόξα ι Ντεβλές ντα ι Χριστός. Εκ τρόπος σο κερένα-λες ανταβά ισί ότι τζάνα κι Ανάμνηση.

13, 14. Σόσκε πρέπει σαρέ τι τζαν κι Ανάμνηση;

¹³ Ο τελευταία μπρεσά, περίπου 1 κο 1.000 τζενέ σο τζάνα κι Ανάμνηση λέλα κατά μαντρό ντα κατά μολ. Ο πιο μπουτ κχανγκιριά να τθερένα καεκχές σο λέλα κατά μαντρό ντα κατά μολ. Ο πιο μπουτ οντουλένταρ σο τζάνα κι Ανάμνηση μπεκλεντίνενα τι τζουβντιόν κι πφουβ. Αφού ισί αντικάς, σόσκε τζάνα κι Ανάμνηση; Σκεφτίνεν σο αβέλα-πες εκχέ μπιαβέσαρ. Ο τζενέ τζάνα κο μπιαβ εκχέ αμαλέσκο σόσκε μανγκένα οντουλέν σο παντρίνενα. Αντικάς ο γιαβερά μπρακέ-ντα, τζάνα κι Ανάμνηση σόσκε μανγκένα τι σικαβέν ότι μανγκένα ι Χριστός ντα ι χρισμέν. Επίσης, τζάνα για τι σικαβέν πουμαρί εκτίμηση για τη θυσία ι Ιησούσκι, σο πουταρντάς λένγκε ο ντρομ για τι τζουβντιόν για πάντα κι πφουβ.

¹⁴ Εκ γιαβέρ λόγος σο ο γιαβερά μπρακέ τζάνα κι Ανάμνηση ισί ότι ντένα καν κι εντολή κι Ιησούσκι. Κάνα ο Ιησούς κερντάς πρώτη φαρ ι Ανάμνηση γιεκ πι πιστέ αποστολόντζαρ, βακερντάς λένγκε: «Συνεχίνεν  τι κερέν-λες ανταβά για τι ντεν-τουμέν γκοντί μαν». (1 Κορ. 11:​23-26) Οτθάρ, καζόμ μερικά χρισμέ τζουβντιόνα ατζέκ ατθέ κι πφουβ, ο γιαβερά μπρακέ να τσσιναβένα τι τζαν κι Ανάμνηση για τι ντεν-πες γκοντί ο μεριπέ ι Ιησούσκο. Ντα βακερένα σαριλένγκε τι αβέν κι Ανάμνηση λέντζαρ.

15. Σαρ μπορίνασα αμέν τι ντας δόξα ι Ντεβλές ντα ι Χριστός κι Ανάμνηση;

¹⁵ Κι Ανάμνηση, ντάσα δόξα ι Ντεβλές ντα ι Χριστός κάνα γκιλιαβάσα ντα κεράσα προσευχή. Ανταβά μπρες, κα ασουνάς ι ομιλία ι θεμάσαρ: «Τι Εκτιμίνεν Οντουλά σο Κερντάς ο Ντεβέλ ντα ο Χριστός Τουμένγκε!» Ανταγιά ομιλία κα μπαριαρέλ αμαρί εκτίμηση ι Ιεχωβάσκε ντα ι Χριστόσκε. Καζόμ κα νακχέλ ανγκλ’ αμένταρ ο μαντρό ντα η μολ, κα ντας-αμέν γκοντί σο μανγκένα τι σικαβέν​—ο σώμας ντα ο ρατ ι Ιησούσκο. Κα ντας-αμέν γκοντί ότι ο Ιεχωβά μουκχλάς πι Τσσαβές τι μερέλ αντίς αμένγκε για τι μπορίνας τι λας ζωή. (Ματθ. 20:​28) Σαρέ οντουλά σο μανγκένα αμαρέ Νταντές, ι Ιεχωβάς, ντα λέσκε Τσσαβές κα μανγκέν τι αβέν κι Ανάμνηση.

16. Σαρ τζανάσα ότι ι Ιεχωβάσκε εμ ο χρισμέ εμ ο γιαβερά μπρακέ τθερένα ι ίδια αξία;

¹⁶ Ο Ιεχωβά μανγκέλα εμ ι χρισμέν εμ ι γιαβερέ μπρακέν. Ο ντούι-ντα ομάδες τθερένα ι ίδια μπαρί αξία λέσκε. Τζανάσα ότι ποκιντάς, δηλαδή ντινάς ι ζωή πι αγαπημέ Τσσαβέσκι, για τι κινέλ εμ ι χρισμέν εμ ι γιαβερέ μπρακέν. Η διαφορά κο ντούι ομάδες ισί ότι τθερένα διαφορετική ελπίδα. Αλλά ο ντούι-ντα ομάδες πρέπει τι ατσσόν πιστοί κο Ντεβέλ ντα κο Χριστός. (Ψαλμ. 31:​23) Ντα τι ντεν-τουμέν γκοντί ότι ο πνεύμας ι Ντεβλέσκο μπορίνελα τι ντελ-αμέν σαριλέν ι ίδια ζορ. Ανταβά μανγκέλα τι βακερέλ ότι ο Ιεχωβά ντικχέλα σο τθερέλα ανάγκη ο κάθε εκ ντα ντέλα-λες πο άγιος πνεύμας.

17. Καλέ πραγμάσκε μπεσένα σαρ σαρ ο χρισμέ σο ισί ατζέ κι πφουβ;

¹⁷ Ο χρισμέ Χριστιανοί να τθερένα πουμαρέ μπιανιμάσταρ ι ελπίδα τι τζαν κο ουρανός. Πρέπει ο Ντεβέλ τι τσσουβέλ-λα λένγκε γκίστε. Σκεφτίνενα πουμαρί ελπίδα, προσευχίντιβενα λάκε ντα μανγκένα σαρέ πουμαρέ γκίσαρ τι τζαν κο ουρανός. Ναστί νακχέλα ιτς λένγκε γκοντιάταρ σαρ κα αβέλ λένγκο πνευματικός σώμας. (Φιλιπ. 3:​20, 21· 1 Ιωάν. 3:2) Όμως, μπεσένα σαρ σαρ τι αβέν γιεκ ι Ιεχωβάσαρ, ι Ιησούσαρ, ι αγγελόντζαρ ντα ι γιαβερέ χρισμέ Χριστιανόντζαρ κι Βασιλεία κο ουρανός.

18. Καλέ πραγμάσκε μπεσένα σαρ σαρ ο γιαβερά μπρακέ;

¹⁸ Ο γιαβερά μπρακέ μπεκλεντίνενα τι τζουβντιόν για πάντα κι πφουβ, αντικάς σαρ μανγκένα σαρέ ο τζενέ. (Εκκλ. 3:​11)  Μπεκλεντίνενα τι αβέλ ο ντιβές σο κα βοηθίνεν τι αβέλ σαρί η πφουβ παράδεισος. Μπεσένα σαρ σαρ τι αβέλ ο ντιβές σο κα μπορίνεν τι κερέν πουμαρέ κχερά, τι φυτίνεν πουμαρό μπαχτσές ντα τι τθερέν τέλεια υγεία καζόμ κα μπαριαρέν πουμαρέ τσσαβέν. (Ησ. 65:​21-23) Ανένα πουμαρέ γκοντιάτε σαρ κα αβέλ κάνα κα κερέν ταξίδια σαρί κι πφουβ​—κο βεσά, κο δάση ντα κο ντεριαβά—​ντα κα ρόντεν τι σικλιόν οντουλά σο κερντάς ο Ιεχωβά. Οντουβά σο ντέλα-λεν ι πιο μπαρί χαρά ισί ότι τζανένα ότι λένγκι φιλία ι Ιεχωβάσαρ καζόμ κα νακχέλ ο βακίτι κα αβέλ πιο ζουρανί.

19. Καγιά ευκαιρία ντέλα κο κάθε εκ αμένταρ ι Ανάμνηση, ντα κάνα κα αβέλ-πες ανταβά μπρες;

¹⁹ Ο Ιεχωβά ντινάς πι κάθε εκχέ υπηρετής εκ σουκάρ ελπίδα. (Ιερ. 29:​11) Η Ανάμνηση σο κεράσα για τι ντας-αμέν γκοντί ο μεριπέ ι Χριστόσκο ντέλα κο κάθε εκ αμένταρ ι μπουτ σουκάρ ευκαιρία τι ντας δόξα ι Ντεβλές ντα ι Χριστός οντουλένγκε σο κερντέ για τι μπορίνας αμέν τι τθεράς ζωή για πάντα. Η Ανάμνηση ισί η πιο σημαντική συνάθροιση ι αληθινέ Χριστιανόνγκε. Κα αβέλ-πες Σάββατος 27 Μαρτίου 2021 αφού κα περέλ ο κχαμ. Ανταβά μπρες, μπουτ τζενέ σο τζουβντιόνα τθεμέντε σο ισί ελεύθεροι κα τζαν κι Ανάμνηση. Γιαβερά κα τζαν παρόλο σο τζάνα λέντζαρ κόντρα. Μερικά τζενέ κα κερέν ι Ανάμνηση κι φυλακή. Καζόμ ο Ιεχωβά, ο Ιησούς, ο άγγελοι ντα ο χρισμέ σο ισί κο ουρανός κα τθερέν πουμαρέ γιακχά οπρ’ αμέντε, μανγκάσα κάθε κχανγκιρί, όμιλος ντα τζενό τι νακχέλ σουκάρ κι Ανάμνηση!