ΚΟ Μουσείο Βιβλικών Γαιών κι Ιερουσαλήμ ισί εκ μπαρ, σο οπρά-λέστε ισί γραμμέ μερικά λάφια περίπου κατά 700-600 Π.Κ.Χ. Ανταβά μπαρ αρακχλέ-λες αντρέ εκχέ σπηλιάτε σο αζομάν τσσουβένας ι μουλέν πασέ κι Χεβρών κο Ισραήλ. Ο μπαρ βακερέλα: «Ι αρμάν του Γιαχβέ Σαβαώθ τι τθερέλ οπρά-πέστε ο Αγάφ ο τσσαβό του Αγάβ». Σαρ ανταβά μπαρ σικαβέλα ότι η Αγία Γραφή ισί μπαγιά; Σικαβέλα ότι κο πουρανέ μπρεσά σαρέ τζανένας ντα βακερένας κάθε ντιβές ο ναβ ι Ντεβλέσκο, Ιεχωβά, σο γραφίντιβελας κο εβραϊκά ΓΧΒΧ. Γιαβερά-ντα λάφια σο αρακχλέ γραμμέ σπηλιέντε σικαβένα ότι ο τζενέ σο αρακχένας-πες ντα γκεραβένας-πες οτθέ μπουτ φαρ γραφίνενας οντουλέ τθανέστε ο ναβ ι Ντεβλέσκο ντα ναβά τζενένγκε σο τθερένας αντρέ ανταβά ναβ.

Η Δρ Ρέιτσελ Ναμπούλσι κατά Πανεπιστήμιος κι Τζόρτζια βακερντάς οντουλέ λαφίνγκε σο αρακχλέ γραμμέ: «Ισί μπουτ σημαντικός σο αρακχάσα γραμμέ μπουτ φαρ ο ναβ ΓΧΒΧ. . . . Ανταλέσταρ αγαβάσα ότι ο ναβ ΓΧΒΧ ισινέ μπουτ σημαντικός ι Ισραηλιτένγκε ντα ι Ιουδαιόνγκε». Ανταβά σικαβέλα ότι η Αγία Γραφή, σο τθερέλα ο ναβ ι Ντεβλέσκο ΓΧΒΧ χιλιάδες φαρ εβραϊκέ γραμματέντζαρ, ισί μπαγιά. Μπουτ φαρ, ναβά τζενένγκε τθερένας αντρέ ο ναβ ι Ντεβλέσκο.

Ο λάφι «Γιαχβέ Σαβαώθ», σο ισί γραμμέ οπράλ κο μπαρ, μανγκέλα τι βακερέλ «Ιεχωβά σο κερέλα κουμάντος ι στρατόν». Ανταλέσταρ ντικχίντιβελα ότι αζομάν ο τζενέ μπουτ φαρ βακερένας, όχι σάντε ο ναβ ι Ντεβλέσκο, αλλά ο λάφι-ντα «Ιεχωβά σο κερέλα κουμάντος ι στρατόν». Άκ’ σόσκε η Γραφή-ντα τθερέλα ο λάφι «Ιεχωβά σο κερέλα κουμάντος ι στρατόν». Ανταβά λάφι αρακχάσα-λες 283 φαρ κο Εβραϊκές Γραφές, πιο μπουτ κο βιβλία Ησαΐας, Ιερεμίας ντα Ζαχαρίας.