1. Καγιά δυσκολία τθερέλας ο Δαβίδ;

 Ο ΔΑΒΙΔ νασλόας τθαβντιμάσαρ σόσκε εκ τζενό μανγκέλας τι μουνταρέλ-λες. Ο Σαούλ, ο ζουρανό βασιλιάς κο Ισραήλ, μανγκέλας τι μουνταρέλ-λες. Κάνα ο Δαβίδ μανγκέλας χαμπέ, ατσσιλό κι πόλη Νωβ, σο οτθέ μανγκλάς σάντε παντς μαντρέ. (1 Σαμ. 21:1, 3) Σοράν, βοβ ντα λέσκε μουρσά γκεραντέ-πες εκχέ σπηλιάτε. (1 Σαμ. 22:1) Σόσκε αβιλό-πες ανταβά κο Δαβίδ;

2. Σαρ τσσουντάς ο Σαούλ πο νεαυτός σε κίνδυνος; (1 Σαμουήλ 23:​16, 17)

² Ο Σαούλ ζηλίνελας μπουτ ι Δαβιδίς σόσκε μπουτ τζενέ μανγκένας-λες ντα ισαρένας-λες σο νικίνελας μπουτέ τζενγκίντε. Ο Σαούλ τζανέλας επίσης ότι, επειδή να ντινάας καν, ο Ιεχωβά να μανγκέλας-λες τι αβέλ βασιλιάς κο Ισραήλ ντα ότι τραμπιντάας ι Δαβιδίς τι αβέλ ο νεβό βασιλιάς. (Διαβάνεν 1 Σαμουήλ 23:​16, 17) Αφού όμως ισινέ ατζέκ ατζέκ βασιλιάς κο Ισραήλ, ο Σαούλ τθερέλας μπαρό στρατός ντα μπουτέ τζενέν σο τσσίντενας λέσταρ, οτθάρ ο Δαβίδ έπρεπε τι νασέλ για τι σώνελ-πες. Αμντίνελας μπαγιά ο Σαούλ ότι κα μπορίνελας τι τσσιναβέλ ι Ντεβλές τι κερέλ βασιλιάς ι Δαβιδίς; (Ησ. 55:​11) Η Γραφή να βακερέλα, αλλά ισινάμ σίγουροι ακαλέσκε: Ο Σαούλ τσσουντάς πο νεαυτός σε κίνδυνος. Κον τζάλα κόντρα κο Ντεβέλ, πάντα χασαρέλα!

3. Σαρ νιωθίνελας ο Δαβίδ παρόλο σο τθερέλας δυσκολίες;

³ Ο Δαβίδ ισινέ ταπεινός τζενό. Να τραμπιντάς βοβ τι αβέλ βασιλιάς κο Ισραήλ. Ο Ιεχωβά τραμπιντάς-λες τι αβέλ βασιλιάς. (1 Σαμ. 16:1, 12, 13) Ο Σαούλ μισίνελας μπουτ ι Δαβιδίς. Αλλά ο Δαβίδ να βακερντάς ότι ο Ιεχωβά φταίνελας οντουλένγκε σο νακχέλας. Ούτε κερέλας παράπονα ι χάνικ χαμπιματένγκε  σο τθερέλας ντα ι σπηλιάκε σο γκεραβέλας-πες. Οκιά μπάνταρ, ντικχίντιβελα ότι αζομάν σο γκεραβέλας-πες οντουλέ σπηλιάτε γραφιντάς ο σουκάρ ύμνος σο αντρέ λέστε ισί ο εδάφιος ι μπρεσέσκο: «Οντουλά σο ρόντενα ι Ιεχωβάσκε κα λεν σαρέ ο λατσσίματα».​—Ψαλμ. 34:10.

4. Καλά ερωτήσεις κα ντικχάς ακανά, ντα σόσκε ισί σημαντικές;

⁴ Αντιβές, μπουτ υπηρέτες ι Ιεχωβάσκε μπάζιμα να τθερένα μπουτ χαμπέ ντα γιαβερά πράγματα σο χρειαζίντιβενα. * Ανταβά αβιλό-πες πο μπουτ κο νασφαλιπέ κι Κορωνοϊόσκο. Ντα ο πράγματα κα αβέν ατζέ πο δύσκολα καζόμ ερεσάσα πασέ κι «μπαρί στεναχώρια». (Ματθ. 24:​21) Οτθάρ, κα αβέλας λατσσό αμένγκε τι απαντίνας σταρέ ερωτησιέντε: Σόσκε βακεράσα ότι “λιντάς σαρέ ο λατσσίματα” ο Δαβίδ; Σόσκε πρέπει τι σικλιάς τι αβάς ευχαριστιμέ οντουλέντζαρ σο τθεράσα; Σόσκε μπορίνασα τι αβάς σίγουροι ότι ο Ιεχωβά κα ντελ-αμέν οντουλά σο τθεράσα ανάγκη; Ντα σαρ μπορίνασα τι προετοιμάνας-αμέν ακανά οντουλένγκε σο κα αβέν-πες ανγκλ’ αμέντε;

5, 6. Σαρ βοηθίνελα-αμέν ο Ψαλμός 23 τι αγαβάς σο μανγκέλας τι βακερέλ ο Δαβίδ κάνα βακερντάς ότι ο υπηρέτες ι Ντεβλέσκε «κα λεν σαρέ ο λατσσίματα»;

⁵ Σο μανγκέλας τι βακερέλ ο Δαβίδ κάνα βακερντάς ότι ο υπηρέτες ι Ιεχωβάσκε «κα λεν σαρέ ο λατσσίματα»; Ο Δαβίδ γραφιντάς ασακέ λάφια εμ κο Ψαλμός 23. Οτθάρ, ανταβά ψαλμός βοηθίνελα-αμέν τι αγαβάς σο μανγκέλας τι βακερέλ. (Διαβάνεν Ψαλμός 23:​1-6) Ο Δαβίδ αρχίνελα ανταβά ψαλμός ακαλέ λαφίντζαρ: «Ο Ιεχωβά ισί μο Τσομπάνης. Κα τθεράβ σο-ντα μανγκάβα». Σοράν, ανταλέ ψαλμόσταρ, ο Δαβίδ βακερέλα πράγματα σο ισί μπαγιά σημαντικά, σαρ ισί ο λατσσέ πράγματα σο τθερέλα επειδή ο Ιεχωβά ισί λέσκο Τσομπάνης. Ο Ιεχωβά γκερέλα-λες «ντρομέντε σο ισί δικαιοσύνη» ντα ισί πιστά πασέ λέστε λατσσέ ντα μπέτι βακιτίντε. Ο Δαβίδ αγαβέλα ότι λέσκι ζωή κι Ιεχωβάσκε “τθανά σο ισί πφερντέ τσαριά” να κα νασκιαρέλ λέσκε προβλήματα. Μπάζιμα, μπέκιμ τι χασαρέλα πι ζορ,  σαρ τι πφιρέλα «τθανέστε σο ισί μπουτ καρανίκι», ντα τθερέλα ντουσμανίν. Αλλά επειδή ο Ιεχωβά ισί λέσκο Τσομπάνης, ο Δαβίδ “να κα νταρέλ μα τι αβέλ λέσκε ζιάνι”.

⁶ Άρα, ακαγιά ισί η απάντηση κι ερώτηση: Σόσκε βακεράσα ότι “λιντάς σαρέ ο λατσσίματα” ο Δαβίδ; Τθερέλας σο-ντα χρειαζίντιβελας για τι ατσσόλ πασέ κο Ιεχωβά. Λέσκι ευτυχία να αβέλας κατά υλικά πράγματα. Ισινέ ευχαριστιμέ οντουλέντζαρ σο ντέλας-λες ο Ιεχωβά. Ο πο σημαντικός λέσκε ισινέ ότι ο Ιεχωβά ευλογίνελας-λες ντα αρακχαβέλας-λες.

7. Σο δυσκολίες τθερένας ο Χριστιανοί σο τζουβντιόνας κι Ιουδαία σαρ βακερένα ο εδάφια Λουκάς 21:​20-24;

⁷ Κατά λάφια ι Δαβιδίσκε αγαβάσα ότι ισί μπουτ σημαντικός μα τι αβέν ο υλικά πράγματα σημαντικά αμένγκε. Σίγουρα μπορίνασα τι απολαμβάνας σο-ντα υλικά πράγματα τθεράσα, αλλά δεν πρέπει τι αβέν ανταλά ο πο σημαντικά αμαρέ ζωγιάτε. Ο Χριστιανοί σο τζουβντιόνας κι Ιουδαία έπρεπε τι αγαβέν ανταγιά σημαντική αλήθεια. (Διαβάνεν Λουκάς 21:​20-24) Ο Ιησούς βακερντάας λένγκε ότι κα αβέλας βακίτι σο η Ιερουσαλήμ κα “πφαντιόλας ντονταλάι στρατόντζαρ”. Κάνα κα αβέλας-πες ανταβά, βον έπρεπε τι «αρχίνεν τι νασέν κο βεσά». Άμα κα νασένας, κα ατσσόνας τζουβντέ, αλλά κα μουκχένας παλάλ μπουτ πράγματα. Χάνικ μπρεσά ανγκλέ, Η Σκοπιά βακερντάς ακαβά: «Μουκχλέ χωράφια ντα κχερά, ντα να γκιντιντέ ατζέ-ντα πουμαρέ πράγματα πουμαρέ κχερένταρ. Επειδή ισινέ σίγουροι ότι ο Ιεχωβά κα αρακχαβέλας-λεν ντα κα βοηθίνελας-λεν, τσσουντέ λέσκι λατρεία πο οπρέ οντουλένταρ σο μπέκιμ τι ντικχίντιβενας σημαντικά».

8. Σο σικλιάσα αμέν οντουλένταρ σο αβιλέ-πες κο Χριστιανοί σο τζουβντιόνας κι Ιουδαία;

⁸ Σο σικλιάσα αμέν οντουλένταρ σο αβιλέ-πες κο Χριστιανοί σο τζουβντιόνας κι Ιουδαία; Η ίδια Σκοπιά βακερέλας: «Μπέκιμ τι αβέν δυσκολίες σο κα σικαβέν σαρ ντικχάσα ο υλικά πράγματα​—ισί αμένγκε πο σημαντικά ανταλά πράγματα ή ισί αμένγκε πο σημαντικός τι σώντιβας επειδή ισινάμ αφοσιωμέ κο Ντεβέλ; Κάνα κα χρειαζίντιβελ τι “νασάς”, μπέκιμ τι τθεράς δυσκολίες ντα τι μουκχάς παλ’ αμέντε αμαρέ πράγματα. Πρέπει τι αβάς έτοιμοι τι κεράς σο-ντα χρειαζίντιβελα σαρ οντουλά Χριστιανοί σο νασλέ κατά Ιουδαία». *

9. Σαρ ντένα-τουμέν ζορ ο λάφια σο βακερντάς ο απόστολος Παύλος κο Εβραίοι;

⁹ Μπορίνενα τι ανέν τουμαρέ γκοντιάτε καζόμ δύσκολος ισινέ οντουλέ Χριστιανόνγκε τι μουκχέν-λεν σαρέ ντα τι αρχίνεν εκ νεβί ζωή εκχέ νεβέ τθανέστε; Έπρεπε τι τθερέν πίστη κο Ιεχωβά ότι κα ντέλας-λεν οντουλά σο τθερένας ανάγκη. Αλλά ντιντιλίας-λεν βοήθεια ανταλέσκε. Παντς μπρεσά πριν τι πφάντεν ντονταλάι ο Ρωμαίοι ι Ιερουσαλήμ, ο απόστολος Παύλος ντινάς κο Εβραίοι εκ μπουτ λατσσί συμβουλή: «Ο τρόπος σο τζουβντιόνα τι σικαβέλ ότι να μανγκένα ο λοβέ ντα τι ερεσέν-τουμέν οντουλά σο τθερένα. Σόσκε βοβ βακερντάς: “Ποτές να κα μουκχάβ-τουτ ντα ποτές να κα παρατίναβ-τουτ”. Αντικάς κα μπορίνας τι τθεράς μπαρό θάρρος ντα τι βακεράς: “Ο Ιεχωβά ισί μο βοηθός· να κα νταράβ. Σο μπορίνενα τι κερέν-μαν ο τζενέ;”» (Εβρ. 13:5, 6) Ισινέ πο εύκολος οντουλένγκε σο ντινέας καν κι Παυλόσκι συμβουλή τι ερεσέν-λεν ο χάνικ πράγματα σο τθερένας πουμαρέ νεβέ κχερέστε. Μπορίνενας τι αβέν σίγουροι ότι ο Ιεχωβά κα ντέλας-λεν ο βασικά πράγματα σο τθερένας ανάγκη. Ο λάφια ι Παυλόσκε κερένα αμέν-ντα τι αβάς σίγουροι ότι ο Ιεχωβά κα ντελ-αμέν οντουλά σο τθεράσα ανάγκη.

10. Καβά «μυστικός» μουτθαβέλα αμένγκε ο Παύλος;

¹⁰ Ο Παύλος ντινάς εκ ασακί συμβουλή κο  Τιμόθεος ντα ανταγιά συμβουλή ισί αμένγκε-ντα. Γραφιντάς: «Οτθάρ, άμα τθεράσα χαμπέ ντα σέα, κα αβάς ευχαριστιμέ ανταλέντζαρ». (1 Τιμ. 6:8) Μήπως ανταβά μανγκέλα τι βακερέλ ότι δεν πρέπει τι χας εκ λατσσό χαμπέ, τι τθεράς εκ σουκάρ κχερ ή τι κινάς αμένγκε μπάζιμα νεβέ σέα; Να μανγκέλα τι βακερέλ ανταβά ο Παύλος. Ο Παύλος βακερέλα ότι πρέπει τι αβάς ευχαριστιμέ οντουλέντζαρ σο τθεράσα. (Φιλιπ. 4:​12) Ανταβά ισινέ ο «μυστικός» ι Παυλόσκο. Ο πο σημαντικός πράγμας σο τθεράσα ισί αμαρί φιλία αμαρέ Ντεβλέσαρ, όχι ο υλικά πράγματα σο τθεράσα.​—Αββακ. 3:​17, 18.

11. Σο σικλιάσα κατά λάφια σο βακερντάς ο Μωυσής κο Ισραηλίτες για τι αβάς ευχαριστιμέ οντουλέντζαρ σο τθεράσα;

¹¹ Οντουλά σο πακιάσα αμέν ότι τθεράσα ανάγκη μπέκιμ μα τι αβέν ίδια οντουλέντζαρ σο τζανέλα ο Ιεχωβά ότι τθεράσα ανάγκη. Ντικχέν σο βακερντάς ο Μωυσής κο Ισραηλίτες κάνα μπεσλέας 40 μπρεσά κι έρημος: «Ο Ιεχωβά το Ντεβέλ ευλογιντάς-τουτ σαρέ οντουλέντε σο κερντάν. Βοβ τζανέλα μπουτ λατσσές σαρ πφιρντάν αντρέ κι μπαρί έρημος ανταγιά. Σαράντα μπρεσά ακανά ο Ιεχωβά το Ντεβέλ ισί τούσαρ ντα τθερέας-λεν σαρέ». (Δευτ. 2:7) Οντουλά 40 μπρεσά, ο Ιεχωβά ντέλας κο Ισραηλίτες μάννα για τι χαν. Λένγκε σέα​—οντουλά σέα σο τθερένας κάνα νασλέας κατά Αίγυπτος—​να κερνιλέ. (Δευτ. 8:3, 4) Παρόλο σο μερικοί μπέκιμ τι πακιάνας ότι οντουλά σο τθερένας να ερεσένας-λεν, ο Μωυσής αντάς κι γκοντί κι Ισραηλιτένγκι ότι τθερένας σαρέ οντουλά σο χρειαζίντιβενας. Κα αβέλ ο γκι ι Ιεχωβάσκο άμα κα σικλιάς τι αβάς  ευχαριστιμέ οντουλέντζαρ σο τθεράσα. Μανγκέλα τι εκτιμίνας ατζέ-ντα ο απλά πράγματα σο ντέλα-αμέν ντα τι αγαβάς ότι ισί δώρος λέσταρ.

12. Σο σικαβέλα ότι ο Δαβίδ ντέλας μπέσα κο Ιεχωβά ντα όχι πι νεαυτόστε;

¹² Ο Δαβίδ τζανέλας ότι ο Ιεχωβά ισί αφοσιωμέ ντα πφαμπόλα μπουτ οντουλένγκε σο μανγκένα-λες. Παρόλο σο μανγκένας τι μουνταρέν-λες κάνα γραφιντάς ο Ψαλμός 34, η πίστη σο τθερέλας ο Δαβίδ κο Ιεχωβά ισινέ αζόμ μπαρί σο ισινέ σίγουρος ότι «ο άγγελος ι Ιεχωβάσκο» ισινέ «ντονταλάι» λέσταρ. (Ψαλμ. 34:7) Μπέκιμ ι Δαβιδίσκε ο άγγελος ι Ιεχωβάσκο τι ισινέ σαρ εκ στρατιώτης σο ισί κο τζένγκι, σο πάντα βραντίνελα-πες μα τι αβέν ο ντουσμάνια. Παρόλο σο ισινέ μπίνταρανο πολεμιστής ντα ο Ιεχωβά ντινάας-λες πο λάφι ότι κα αβέλας βασιλιάς, ο Δαβίδ να ντέλας μπέσα πι νεαυτόσκε επειδή τζανέλας τι φουρτίνελ μπαρά σφεντονάσαρ ή τι χρησιμοποιήνελ ο σπαθίς για τι νικίνελ ι ντουσμανίς. (1 Σαμ. 16:​13· 24:​12) Ντέλας μπέσα κο Ντεβέλ, σόσκε ισινέ σίγουρος ότι ο άγγελος ι Ιεχωβάσκο “σώνελα οντουλέν σο νταρένα Λέσταρ”. Αμέν αντιβές να μπεκλεντίνασα τι αβέλ-πες θαύμας για τι ατσσάς αρακχαντέ. Αλλά τζανάσα ότι σαρέ οντουλά σο ντένα μπέσα κο Ιεχωβά κα τζουβντιόν για πάντα ατζέ-ντα άμα κα μερέν ακανά.

13. Σόσκε κα ντικχίντιβελ ότι να ισινάμ αρακχαντέ κάνα κα αβέλ ο Γωγ του Μαγώγ, αλλά σόσκε να κα νταράς; (Ντικχέν ι φωτογραφία κι ανγκλαϊνί σελίδα)

¹³ Ατζεχάνικ, η μπέσα σο τθεράσα ότι ο Ιεχωβά μπορίνελα τι αρακχαβέλ-αμέν κα δοκιμάντιβελ. Κάνα ο Γωγ του Μαγώγ, δηλαδή τθεμά σο κα γκιντίντιβεν σαρέ γιεκ, κα τσσουβέλ-λεν ι Ντεβλέσκε λαόσαρ, μπέκιμ τι αμντίνας ότι κα μουνταρέν-αμέν. Κα χρειαζίντιβελ τι αβάς σίγουροι ότι ο Ιεχωβά μπορίνελα τι σώνελ-αμέν ντα ότι κα κερέλ-λες ανταβά. Οντουλά τθεμά κα ντικχέν-αμέν σαρ μπρακέ σο να αρακχαβέλα-λεν καέκ. (Ιεζ. 38:​10-12) Να κα τθεράς όπλα ντα να κα τζανάς τι κεράς τζένγκι. Ο τθεμά κα αμντίνεν ότι κα νικίνεν-αμέν εύκολα. Να τζανένα ότι ο άγγελοι ι Ιεχωβάσκε κα αβέν έτοιμοι τι αρακχαβέν-αμέν. Αλλά αμέν τζανάσα-λες ανταβά σόσκε τθεράσα πίστη. Σίγουρα, ο τθεμά ναστί αγαβένα-λες ανταβά. Να τθερένα πίστη κο Ντεβέλ. Κα ατσσόν πουταρντέ μόσαρ κάνα κα αβέν ο στρατοί ι ουρανόσκε τι κερέν τζένγκι μάξους αμένγκε!​—Αποκ. 19:​11, 14, 15.

14. Σο μπορίνασα τι κεράς ακανά για τι προετοιμάνας-αμέν ι ντιβεσένγκε σο κα αβέν;

¹⁴ Σο μπορίνασα τι κεράς ακανά για τι προετοιμάνας-αμέν ι ντιβεσένγκε σο κα αβέν; Πο μπουτ σαριλένταρ, δεν πρέπει τι πακιάς ότι ο υλικά πράγματα ισί μπουτ σημαντικά σόσκε κα αβέλ ο ντιβές σο κα μουκχάς-λεν παλ’ αμέντε. Πρέπει επίσης τι αβάς ευχαριστιμέ οντουλέντζαρ σο τθεράσα ντα τι αβάς μπουτ χαρούμενοι σο τθεράσα εκ λατσσί φιλία ι Ιεχωβάσαρ. Καζόμ πο λατσσές τζανάσα αμαρέ Ντεβλές, αζόμ πο σίγουροι κα αβάς ότι κα αρακχαβέλ-αμέν κάνα κα τσσουβέλ-λεν αμέντζαρ ο Γωγ του Μαγώγ.

15. Καλά πράγματα σο αβιλέ-πες κάνα ισινέ τερνό ο Δαβίδ σικλιαρντέ-λες ότι ο Ιεχωβά πάντα κα βοηθίνελας-λες;

¹⁵ Ντικχέν σο γιαβέρ βοηθιντάς ι Δαβιδίς ντα μπορίνελα τι βοηθίνελ αμέν-ντα τι προετοιμάντιβας ι δοκιμασιένγκε. Ο Δαβίδ βακερντάς: «Δοκιμάνεν ντα ντικχέν ότι ο Ιεχωβά ισί λατσσό· ευτυχισμέ ισί ο τζενό σο τζάλα τι αρακχαβέλ-πες λέστε». (Ψαλμ. 34:8) Ανταλά λάφια ντένα-αμέν τι αγαβάς σόσκε ο Δαβίδ τζανέλας ότι μπορίνελας τι ντελ μπέσα κο Ιεχωβά. Ο Δαβίδ ντέλας μπέσα μπουτ φαρ κο Ιεχωβά, ντα λέσκο Ντεβέλ πάντα βοηθίνελας-λες.  Κάνα ισινέ τερνό, ο Δαβίδ γκιλό κο Φιλισταίος γίγαντας Γολιάθ για τι τσσουβέλ-λεν λέσαρ ντα βακερντάς οντουλέ ζουρανέ πολεμιστίσκε: «Αντιβές ο Ιεχωβά κα ντελ-τουτ μι βαστέστε». (1 Σαμ. 17:​46) Κάνα ο Δαβίδ υπηρετίνελας ι Σαουλίς, ο Σαούλ προσπαθιντάς μπουτ φαρ τι μουνταρέλ-λες. Αλλά «ο Ιεχωβά ισινέ» ι Δαβιδίσαρ. (1 Σαμ. 18:​12) Επειδή ο Δαβίδ λιντάας βοήθεια κατά Ιεχωβά ανγκλέ, τζανέλας ότι ο Ιεχωβά σίγουρα κα βοηθίνελας-λες λέσκε προβληματέντζαρ.

16. Σο μπορίνασα τι κεράς για τι “δοκιμάνας” καζόμ λατσσό ισί ο Ιεχωβά;

¹⁶ Καζόμ πο μπουτ ντάσα μπέσα ακανά οντουλέντε σο βακερέλα αμένγκε ο Ιεχωβά τι κεράς, αζόμ πο σίγουροι κα αβάς ότι μπορίνελα τι σώνελ-αμέν κο ντιβεσά σο κα αβέν. Πρέπει τι τθεράς πίστη ντα τι ντας μπέσα κο Ιεχωβά για τι μανγκάς αμαρέ αφεντικόσταρ άδεια τι τζας κι συνέλευση ή τι μανγκάς τι αλλάνας ο σαάτια σο κεράσα μπουτί για τι τζας σαρέ κο συναθροίσεις ντα τι κεράς πο μπουτ έργος. Βακερέν χάι ότι αμαρό αφεντικός να μανγκέλα τι ντελ-αμέν άδεια ντα χασαράσα αμαρί μπουτί. Πακιάσα ότι ο Ιεχωβά ποτές να κα μουκχέλ-αμέν ούτε κα παρατίνελ-αμέν ντα ότι πάντα κα ντελ-αμέν οντουλά σο τθεράσα ανάγκη; (Εβρ. 13:5) Μπουτ πφραλά ντα πφενιά σο ισί κι ολοχρόνια υπηρεσία μπορίνενα τι βακερέν τουμένγκε εμπειρίες σο σικαβένα σαρ βοηθιντάς-λεν ο Ιεχωβά κάνα τθερένας-λες πο μπουτ ανάγκη. Ο Ιεχωβά ποτές να μουκχέλα-αμέν.

17. Καβά ισί οι εδάφιος ι μπρεσέσκο για το 2022, ντα σο κα βοηθίνελ-αμέν τι κεράς;

¹⁷ Ι Ιεχωβάσαρ πασέ αμέντε, να τθεράσα καέκ λόγος τι νταράς ι ντιβεσένγκε σο κα αβέν. Ο Ντεβέλ να κα μουκχέλ-αμέν ποτές άμα αμέν τσσουβάσα πρώτα αμαρέ ζωγιάτε λέσκι Βασιλεία. Για τι ανέλ αμαρέ γκοντιάτε καζόμ σημαντικός ισί τι προετοιμάνας-αμέν ακανά ι δύσκολε ντιβεσένγκε σο αβένα ντα τι αβάς σίγουροι ότι ο Ιεχωβά να κα μουκχέλ-αμέν ποτές, ο Κυβερνών Σώμας τραμπιντάς ο εδάφιος Ψαλμός 34:​10 σαρ εδάφιος ι μπρεσέσκο για το 2022: «Οντουλά σο ρόντενα ι Ιεχωβάσκε κα λεν σαρέ ο λατσσίματα».