1-3. Καλά δυσκολίες μπέκιμ τι κερένα ι Ιεχωβάσκε υπηρετόν τι ροβέν;

 ΚΑΝΑ ισινέ η τελευταία φαρ σο ροντέν; Μπάζιμα, ροβάσα σόσκε ισινάμ χαρούμενοι. Αλλά ο πο μπουτ φαρ ροβάσα σόσκε τθεράσα ντουκχ αντρέ αμαρέ γκίστε. Για παράδειγμας, μπέκιμ τι ροβάσα κάνα μερέλα εκ τζενό σο μανγκάσα-λες μπουτ. Η Λόριλι, εκ πφεν κο Ηνωμένες Πολιτείες, βακερντάς: «Ισινέ φαρ σο τθεράβας αζόμ μπαρί ντουκχ αντρέ μι γκίστε επειδή μουλί μι τσσάι σο καέκ ναστί κοβλιαρέλας μι ντουκχ. Οντουλά σαάτια, σκεφτίναβας σαρ ντέλας ατζέ μι καρδιά, σο αβιλίας ντιπ κοτορά». *

² Μπέκιμ τι ροβάσα γιαβερέ-ντα πραγματένταρ. Η Χιρόμι, εκ σκαπάνισσα κι Ιαπωνία, βακερντάς: «Ισί φαρ σο πφανγκιόλα μπουτ μο γκι κάνα ο τζενέ σο κεράβα λένγκε έργος να μανγκένα τι ασουνέν ι Γραφιάκε. Μπάζιμα, δακρυέντζαρ κο γιακχά, κεράβα προσευχή κο Ιεχωβά τι βοηθίνελ-μαν τι αρακχάβ εκχέ τζενές σο μανγκέλα τι σικλιόλ ι αλήθεια».

³ Νιωσάλεν σαρ ανταλά πφενιά; Μπουτ αμένταρ νιωσάλαμ αντικάς. (1 Πέτρ. 5:9) Μανγκάσα τι “υπηρετίνας ι Ιεχωβάς χαράσαρ”, αλλά μπάζιμα ροβάσα σόσκε εκ τζενό σο μανγκάας μουλό, χασαρντάμ αμαρί ζορ ή τθεράσα εκ πρόβλημας σο δυσκολίνελα-αμέν τι ατσσάς πιστοί κο Ντεβέλ. (Ψαλμ. 6:6· 100:2) Σο μπορίνασα τι κεράς κάνα νιωθίνασα αντικάς;

4. Σο κα ντικχάς ανταλέ μαθημάστε;

⁴ Σικλιάσα μπουτ πράγματα κατά Ιησούς. Μπάζιμα, βοβ-ντα νακχέλας πράγματα σο κερένας-λες τι ροβέλ. (Ιωάν. 11:​35· Λουκ. 19:​41· 22:​44· Εβρ. 5:7) Για τι ντικχάς χάνικ ανταλέ πραγματένταρ. Καζόμ κα κεράς-λες ανταβά, κα ντικχάς σο σικλιάσα ι Ιησούσκε ντα λέσκε Νταντέσκε, ι Ιεχωβάσκε. Κα ντικχάς επίσης  σο μπορίνασα τι κεράς κάνα νακχάσα πράγματα σο κερένα-αμέν τι ροβάς.

5. Σο σικλιάσα ι Ιησούσκε κατά εδάφια Ιωάννης 11:​32-36;

⁵ Κο βεν 32 Κ.Χ., εκ λατσσό αμάλ ι Ιησούσκο, ο Λάζαρος, νασφάλιλο ντα μουλό. (Ιωάν. 11:3, 14) Ο Λάζαρος τθερέλας ντουέ πφενίν, ι Μαριά ντα ι Μαρθά, ντα ο Ιησούς μανγκέλας μπουτ ανταγιά φαμιλί. Ο ντούι πφενιά τθερένας μπαρί ντουκχ αντρέ πουμαρέ γκίστε σόσκε λένγκο πφραλ μουλόας. Σοράν κατά μεριπέ ι Λαζαρόσκο, ο Ιησούς γκιλό κο γκαβ Βηθανία, σο μπεσέλας η Μαρία ντα η Μάρθα. Κάνα η Μάρθα σικλιλί ότι αβέλα ο Ιησούς, γκιλί τθαβντιμάσαρ τι αρακχέλ-λες. Ανέν τουμαρέ γκοντιάτε καζόμ ντουκχ τθερέλας αντρέ πι γκίστε κάνα βακερντάς λέσκε: «Κύριε, άμα ισινάνας ατθέ, μο πφραλ να κα μερέλας». (Ιωάν. 11:​21) Χάνικ πο σοράν, κάνα ο Ιησούς ντικχλάς ι Μαριά ντα γιαβερέν τι ροβέν, «δακρυσάλο».​—Διαβάνεν Ιωάννης 11:​32-36.

6. Σόσκε ροντάς ο Ιησούς αζομάν;

⁶ Σόσκε ροντάς ο Ιησούς αζομάν; Η εγκυκλοπαίδεια Ενόραση στις Γραφές βακερέλα: «Ο μεριπέ λέσκε αμαλέσκο, ι Λαζαρόσκο, ντα η ντουκχ σο αντάς ανταβά λέσκε πφενίνγκε κερντέ ι Ιησούς τι “τσσίντελ γκίσαρ ντα τι δακρύνελ”». * Ο Ιησούς μπέκιμ τι σκεφτίνελας καζόμ μπουτ ντουκχάλας λέσκο αγαπημέ αμάλ, ο Λάζαρος, πι νασφαλιμάσταρ ντα ανέλας πι γκοντιάτε σαρ νιωθίνελας κάνα αγαβέλας ότι ατζεχάνικ κα μερέλας. Ντα ο Ιησούς σίγουρα ροντάς κάνα ντικχλάς καζόμ μπαρί ντουκχ τθερέλας η Μαρία ντα η Μάρθα σο μουλό λένγκο πφραλ. Άμα χασαρντέν εκχέ λατσσέ αμαλές ή εκχέ τζενές τουμαρέ φαμιλιάταρ, σίγουρα νιωσάλεν τουμέν-ντα αντικάς. Ντικχέν τριν πράγματα σο μπορίνενα τι σικλιόν ανταλέσταρ σο αβιλό-πες.

7. Σο σικλιάσα ι Ιεχωβάσκε κατά δάκρυα σο περαβέλας ο Ιησούς πι αμαλένγκε;

⁷ Ο Ιεχωβά αγαβέλα τουμαρό γκι. Ο Ιησούς ισί ντιπ σαρ πι Νταντέστε. (Εβρ. 1:3) Κάνα ο Ιησούς ροβέλας, σικαβέλας σαρ νιωθίνελα ο Ιεχωβά. (Ιωάν. 14:9) Άμα μουλό εκ τζενό  σο μανγκένα, τι αβέν σίγουροι ότι ο Ιεχωβά να ντικχέλα σάντε τουμαρί ντουκχ, αλλά πφαμπόλα-ντα τουμένγκε μπουτ. Μανγκέλα τι πφάντελ ο πληγές τουμαρέ πφανγκέ γκίσκε.​—Ψαλμ. 34:​18· 147:3.

8. Σόσκε μπορίνασα τι αβάς σίγουροι ότι ο Ιησούς κα τζουβντιαρέλ αμαρέ αγαπημέ τζενέν;

⁸ Ο Ιησούς μανγκέλα τι τζουβντιαρέλ τουμαρέ αγαπημέ τζενέν. Χάνικ πριν τι ροβέλ, ο Ιησούς βακερντάς ι Μαρθάκε: «Το πφραλ κα ιστίλ». Η Μάρθα πακιαντάς ι Ιησούς. (Ιωάν. 11:​23-27) Επειδή η Μάρθα υπηρετίνελας ι Ιεχωβάς, τζανέλας ότι μπουτ μπρεσά ανγκλέ ο προφήτες Ηλίας ντα Ελισαιέ τζουβντιαρντέας τζενέν. (1 Βασ. 17:​17-24· 2 Βασ. 4:​32-37) Ντα μπέκιμ τι ασουντάας ότι ο Ιησούς-ντα τζουβντιαρντάας τζενέν. (Λουκ. 7:​11-15· 8:​41, 42, 49-56) Μπορίνενα τι αβέν τουμέν-ντα σίγουροι ότι κα ντικχέν πάλι τουμαρέ αγαπημέ τζενέν σο μουλέ. Ο δάκρυα ι Ιησούσκε κάνα κοβλιαρντάας ι μπαρί ντουκχ πι αμαλένγκι σικαβένα ότι μπεσέλα σαρ σαρ τι τζουβντιαρέλ ι μουλέν!

9. Σαρ ο Ιησούς, σαρ μπορίνενα τουμέν τι κοβλιαρέν ι ντουκχ οντουλένγκι σο χασαρντέ εκχέ τζενές; Βακερέν εκ παράδειγμας.

⁹ Μπορίνενα τουμέν-ντα τι κοβλιαρέν ι ντουκχ οντουλένγκι σο χασαρντέ εκχέ τζενές. Ο Ιησούς, όχι σάντε ροντάς ι Μαρθάσαρ ντα ι Μαριάσαρ, αλλά εμ ασουντάς-λεν εμ κοβλιαρντάς λένγκι ντουκχ. Μπορίνασα τι κεράς-λες αμέν-ντα ανταβά οντουλένγκε σο χασαρντέ εκχέ τζενές. Ο Νταν, εκ πρεσβύτερος σο τζουβντιόλα κι Αυστραλία, βακερέλα: «Κάνα χασαρντόμ μι ρομνιά, τθεράβας ανάγκη τι κοβλιαρέν μι ντουκχ. Μερικά αντρόγυνα ισινέ πάντα έτοιμοι τι ασουνέν-μαν. Μουκχένας-μαν τι βακεράβ λένγκε μι ντουκχ ντα να λατζάβας κάνα ροβάβας. Επίσης, βοηθίνενας-μαν ι μπουτιέντζαρ, για παράδειγμας τθοβένας μο αυτοκίνητος, κινένας ο πράγματα σο τθεράβας ανάγκη ντα κερένας χαμπέ κάνα ναστί κεράβας με ανταλά μπουτιά. Ντα μπουτ φαρ κερένας προσευχή μάντζαρ. Ισινέ μπαγιά αμαλά ντα πφραλά “σο μπιάντιλε ι ντιβεσένγκε σο αβέλα στεναχώρια”».​—Παρ. 17:17.

10. Καλέ πραγμάσκε σο αβιλό-πες βακερένα ο εδάφια Λουκάς 19:​36-40;

¹⁰ Ο Ιησούς ερεσλό κι Ιερουσαλήμ 9 Νισάν κο 33 Κ.Χ. Καζόμ ερεσέλας πασέ κι πόλη, γκιντισάλε μπουτ τζενέ ντα μπουγαρένας πουμαρέ σέα τελέ κο ντρομ για τι σικαβέν ότι μανγκένας τι αβέλ λένγκο Βασιλιάς. Ανταβά σίγουρα ισινέ εκ χαρούμενος ντιβές. (Διαβάνεν Λουκάς 19:​36-40) Οτθάρ, ο μαθητές μπέκιμ μα τι μπεκλεντίνενας οντουβά σο αβιλό-πες σοράν. «Κάνα [ο Ιησούς] ερεσλό πασέ, ντικχλάς ι πόλη ντα ροντάς λάκε». Δακρυέντζαρ κο γιακχά, ο Ιησούς βακερντάς ο μπέτι πράγματα σο κα αβένας-πες ατζεχάνικ κο τζενέ σο μπεσένας κι Ιερουσαλήμ.​—Λουκ. 19:​41-44.

11. Σόσκε ροντάς ο Ιησούς ι τζενένγκε σο μπεσένας κι Ιερουσαλήμ;

¹¹ Ο Ιησούς τθερέλας ντουκχ πι γκίστε σόσκε τζανέλας ότι ο πο μπουτ Ιουδαίοι να κα ασουνένας ο αμπέρια ι Βασιλειάκε. Οτθάρ, η Ιερουσαλήμ κα καταστραφίντιβελας, ντα ο Ιουδαίοι σο κα σώντιβενας κα αβένας δούλοι. (Λουκ. 21:​20-24) Δυστυχώς, σαρ βακερντάας ο Ιησούς, ο πο μπουτ τζενέ να ασουντέ-λες. Σο κερένα ο πο μπουτ τζενέ κάνα ασουνένα ο αμπέρια ι Βασιλειάκε τουμαρέ τθεμέστε; Άμα σάντε χάνικ τζενέ ασουνένα ι αλήθεια, σο μπορίνενα τι σικλιόν τουμέν κατά δάκρυα ι Ιησούσκε; Ντικχέν ατζέ τριν πράγματα σο σικλιάσα.

12. Σο σικλιάσα ι Ιεχωβάσκε κατά δάκρυα σο περαβέλας ο Ιησούς οντουλένγκε σο ισινέ πασέ λέστε;

¹² Ο Ιεχωβά πφαμπόλα ι τζενένγκε. Ο δάκρυα ι Ιησούσκε ανένα αμαρέ γκοντιάτε καζόμ μπουτ πφαμπόλα ο Ιεχωβά ι τζενένγκε. «Να  μανγκέλα τι καταστραφίντιβελ καέκ τζενό αλλά σαρέ τι μετανιώνεν». (2 Πέτρ. 3:9) Αμέν αντιβές σικαβάσα ότι μανγκάσα ι τζενέν σο ισί πασέ αμέντε κάνα κεράσα σο νακχέλα αμαρέ βαστέσταρ για τι ερεσέν ο λατσσέ αμπέρια λένγκε γκίστε.​—Ματθ. 22:​39. *

13, 14. Σαρ σικαντάς ο Ιησούς ότι πφαμπόλας ι τζενένγκε, ντα σαρ μπορίνασα τι κεράς-λες αμέν-ντα ανταβά;

¹³ Ο Ιησούς κερέλας σο νακχέλας λέσκε βαστέσταρ κο έργος. Σικαβέλας ότι μανγκέλας ι τζενέν κάνα σικλιαρέλας-λεν κάθε φαρ σο ντιντιόλας-λες η ευκαιρία. (Λουκ. 19:​47, 48) Σο τσσίντελας-λες τι κερέλ-λες ανταβά; Ο Ιησούς πφαμπόλας ι τζενένγκε. Μπάζιμα, ισινέ αζόμ μπουτ ο τζενέ σο μανγκένας τι ασουνέν-λες σο βοβ ντα λέσκε μαθητές «να μπορίνενας ούτε τι χαν». (Μάρκ. 3:​20) Ντα εκ φαρ, μανγκλάς τι κερέλ λάφι αρατί εκχέ τζενέσαρ σόσκε οντουβά σαάτι μπορίνελας οντουβά τζενό. (Ιωάν. 3:1, 2) Ο πο μπουτ τζενέ σο ασουντέ ι Ιησούς να αβιλέ μαθητές λέσκε. Αλλά σαρέ οντουλά σο ασουντέ-λες τθερένας ι ευκαιρία τι σικλιόν ι Ντεβλέσκε. Αμέν αντιβές μανγκάσα τι ντας σαριλέντε ι ευκαιρία τι ασουνέν ο λατσσέ αμπέρια. (Πράξ. 10:​42) Για τι κεράς-λες ανταβά, μπέκιμ τι χρειαζίντιβελα τι κεράς αλλαγές αμαρέ εργόστε.

¹⁴ Μανγκέν τι κερέν ο αλλαγές σο χρειαζίντιβελα. Άμα κεράσα έργος πάντα ο ίδια σαάτια, μπέκιμ μα τι αρακχάς τζενέν σο κα μανγκένας τι ασουνέν ο λατσσέ αμπέρια. Εκ σκαπάνισσα, η Ματίλντα, βακερέλα: «Μι ρομέσαρ προσπαθίνασα τι τζας κο τζενέ διαφορετικά σαάτια. Νωρίς το πρωί, κεράσα έργος κο μαγαζιά. Κάνα τζάλα μεσημέρι, σο μπουτ τζενέ ισί κο ντρομά, κεράσα έργος κο σταντ. Πο σοράν αντρέ κο ντιβές, αρακχάσα πο μπουτ τζενέν κο κχερά». Να μανγκάσα τι κεράς έργος σάντε κάνα ισί αμένγκε εύκολος, μανγκάσα τι κεράς αλλαγές αμαρέ προγραμμάστε για τι κεράς έργος αζομάν σο ντικχίντιβελα ότι κα αρακχάς τζενέν. Άμα κεράσα-λες ανταβά, μπορίνασα τι αβάς σίγουροι ότι κα αβέλ ο γκι ι Ιεχωβάσκο.

15. Σο αβιλό-πες ι ιράτ πριν τι μερέλ ο Ιησούς σαρ βακερένα ο εδάφια Λουκάς 22:​39-44;

¹⁵ Αρατί, 14 Νισάν κο 33 Κ.Χ., ο Ιησούς γκιλό κο κήπος της Γεθσημανή. Οτθέ, πουταρντάς  πο γκι κο Ιεχωβά. (Διαβάνεν Λουκάς 22:​39-44) Οντουλέ δύσκολε σαατίντε, ο Ιησούς μολίνελας ι Ντεβλές «βικόσαρ ντα ροϊμάσαρ». (Εβρ. 5:7) Καλέ πραγμάσκε κερντάς προσευχή ο Ιησούς οντιά ιράτ πριν τι μερέλ; Μανγκλάς ζορ για τι ατσσόλ αφοσιωμέ κο Ιεχωβά ντα τι κερέλ οντουβά σο μανγκλάς λέσταρ ο Ιεχωβά. Ο Ιεχωβά ασουντάς ι προσευχή σο κερντάς αντράλ πι γκίσταρ λέσκο Τσσαβό ντα μπουτσσαντάς εκχέ αγγελός τι ντελ-λες ζορ.

16. Σόσκε τθερέλας μπαρί ντουκχ πι γκίστε ο Ιησούς καζόμ προσευχίντιβελας κο κήπος της Γεθσημανή;

¹⁶ Ο Ιησούς σίγουρα ροβέλας καζόμ προσευχίντιβελας κο κήπος της Γεθσημανή, σόσκε ανέλας λέσκε μπαρί ντουκχ σάντε η σκέψη ότι ο τζενέ κα ντικχένας-λες σαρ τζενό σο να σεβάνελας ο ναβ ι Ντεβλέσκο. Ντα τζανέλας καζόμ σημαντικός ισινέ τι ατσσόλ αφοσιωμέ ντα τι δικαιώνελ ο ναβ πι Νταντέσκο. Άμα εκ μπαρί ντουκχ αντρέ τουμαρέ γκίστε κερέλα-τουμέν μα τι ατσσόν αφοσιωμέ κο Ιεχωβά, σο μπορίνενα τι σικλιόν κατά δάκρυα ι Ιησούσκε; Ντικχέν ατζέ τριν πράγματα σο σικλιάσα.

17. Σο σικλιάσα ι Ιεχωβάσκε σο απαντιντάς κο προσευχές σο κερντάς ο Ιησούς αντράλ πι γκίσταρ;

¹⁷ Ο Ιεχωβά ασουνέλα τουμαρέ προσευχές. Ο Ιεχωβά ασουντάς ι Ιησούς κάνα μολίνελας-λες αντράλ πι γκίσταρ. Σόσκε; Επειδή ο πο σημαντικός ι Ιησούσκε ισινέ τι ατσσόλ αφοσιωμέ πι Νταντέστε ντα τι δικαιώνελ λέσκο ναβ. Άμα ο πο σημαντικός αμένγκε ισί τι ατσσάς αφοσιωμέ κο Ιεχωβά ντα τι δικαιώνας λέσκο ναβ, βοβ κα απαντίνελ κο προσευχές σο κεράσα τι βοηθίνελ-αμέν.​—Ψαλμ. 145:​18, 19.

18. Σαρ ισί ο Ιησούς εκ λατσσό αμάλ σο αγαβέλα-αμέν;

¹⁸ Ο Ιησούς αγαβέλα τουμαρό γκι. Κάνα νακχάσα στεναχώριες, ισινάμ χαρούμενοι κάνα τθεράσα εκχέ αμαλές σο αγαβέλα σαρ νιωθίνασα, ντα πο μπουτ εκχέ τζενές σο νακχλάς βοβ-ντα ασακέ στεναχώριες. Ο Ιησούς ισί ανταβά αμάλ. Τζανέλα σαρ ισί τι νιωθίνελ εκ τζενό μπίζουρανο ντα τι μανγκέλ βοήθεια. Αγαβέλα ότι ισινάμ μπίζουρανε ντα κα ντελ-αμέν ι βοήθεια σο τθεράσα ανάγκη “αζομάν σο χρειαζίντιβασα-λα”. (Εβρ. 4:​15, 16) Σαρ ο Ιησούς λιντάς ι βοήθεια εκχέ αγγελόσκι κο κήπος της Γεθσημανή, αντικάς αμέν-ντα πρέπει τι μανγκάς τι λας ι βοήθεια σο ντέλα ο Ιεχωβά είτε αντράλ εκχέ εντυπόσταρ, εκχέ βιντεόσταρ ή εκχέ ομιλιάταρ είτε αντράλ εκχέ πρεσβυτερόσταρ ή εκχέ γιαβερέ πφραλέσταρ ή πφενιάταρ.

19. Σαρ μπορίνενα τι λεν ζορ κάνα τουμαρί αφοσίωση κο Ντεβέλ δοκιμάντιβελα; Βακερέν εκ παράδειγμας.

 ¹⁹ Ο Ιεχωβά κα ντελ-τουμέν ι «ειρήνη ι Ντεβλέσκι». Σαρ ντέλα-αμέν ζορ ο Ιεχωβά; Κάνα προσευχίντιβασα, λάσα ι “ειρήνη ι Ντεβλέσκι σο ισί πο οπρέ σαρέ οντουλένταρ σο αγαβάσα”. (Φιλιπ. 4:6, 7) Η ειρήνη σο ντέλα ο Ιεχωβά ηρεμίνελα αμαρό γκι ντα βοηθίνελα-αμέν τι σκεφτίνας λατσσές. Ανταβά αβιλό-πες εκχέ πφενιάκε σο βακερένα λάκε Λους. Βόι βακερέλα: «Μπουτ φαρ νιωθίναβα κορκορί. Οτθάρ, μπάζιμα αμντίναβα ότι ο Ιεχωβά να μανγκέλα-μαν. Αλλά κάνα αβέλα-πες ανταβά, βακεράβα σουγκό κο Ιεχωβά σαρ νιωθίναβα. Η προσευχή βοηθιντάς-μαν τι νιωθίναβ πο λατσσές». Σαρ σικαβέλα λάκι εμπειρία, μπορίνασα τι αρακχάς ειρήνη αντράλ κατά προσευχή.

20. Σο σικλιλάμ κατά δάκρυα ι Ιησούσκε;

²⁰ Καζόμ μπουτ κοβλιόλα αμαρί ντουκχ ντα καζόμ μπουτ βοηθίνενα-αμέν οντουλά σο σικλιάσα κατά δάκρυα ι Ιησούσκε! Ανένα αμαρέ γκοντιάτε τι βοηθίνας αμαρέ αμαλέν σο χασαρντέ τζενέν κο μεριπέ ντα τι αβάς σίγουροι ότι ο Ιεχωβά ντα ο Ιησούς κα βοηθίνεν αμέν-ντα άμα κα χασαράς εκχέ τζενές σο μανγκάσα μπουτ. Πφαμπάσα ι τζενένγκε ντα ανταβά τσσίντελα-αμέν τι βακεράς ντα τι σικλιαράς ο λατσσέ αμπέρια σόσκε ο Ιεχωβά Ντεβέλ ντα ο Ιησούς Χριστός σικαβένα ανταγιά μπουτ σουκάρ ιδιότητα. Ντα λοκχιόλα αμαρό γκι σο τζανάσα ότι ο Ιεχωβά ντα λέσκο αγαπημέ Τσσαβό αγαβένα σαρ νιωθίνασα, αγαβένα ότι ισινάμ μπίζουρανε ντα κα βοηθίνεν-αμέν τι νταϊντίνας. Μα τι τσσιναβάς τι κεράς ανταλά σο σικλιλάμ μέχρι κο ντιβές σο ο Ιεχωβά κα «νασκιαρέλ σαρέ ο δάκρυα [αμαρέ] γιακχίνταρ» σαρ ντινάς πο λάφι.​—Αποκ. 21:4.