1, 2. (α) Κάνα αβέλα πο μπουτ αμαρέ γκοντιάτε εκ τζενό σο μουλό; (β) Καγιά εντολή ντινάς ο Ιησούς ι ιράτ πριν τι μερέλ;

 ΚΑΖΟΜ μπρεσά-ντα τι νακχλέ από αζομάν σο μουλέ μερικά τζενέ σο μανγκάας, συνεχίνασα τι τθεράς-λεν αμαρέ γκοντιάτε. Πο μπουτ ανάσα-λεν αμαρέ γκοντιάτε ο ντιβές σο μουλέ.

² Κάθε μπρες, ισινάμ αντρέ κο εκατομμύρια τζενέ σαρό κο ντουνιάς σο τζάνα για τι ντεν-πες γκοντί ο μεριπέ εκχέ τζενέσκο σο μανγκάσα μπουτ, ι Ιησού Χριστόσκο. (1 Πέτρ. 1:8) Γκιντίντιβασα για τι ντας-αμέν γκοντί οντουλές σο ντινάς πι ζωή σαρ λύτρος για τι σώνελ-αμέν κατά αμαρτία ντα κατά μεριπέ. (Ματθ. 20:​28) Ντα ο Ιησούς μανγκέλας ο μαθητές λέσκε τι ντεν-πες γκοντί λέσκο μεριπέ. Ι ιράτ πριν τι μερέλ, κερντάς πρώτη φαρ ι Ανάμνηση ντα ντινάς ι εντολή: «Συνεχίνεν τι κερέν-λες ανταβά για τι ντεν-τουμέν γκοντί μαν».​—Λουκ. 22:19.

3. Σο κα ντικχάς ανταλέ μαθημάστε;

³ Χάνικ οντουλένταρ σο τζάνα κι Ανάμνηση για τι ντεν-πες γκοντί ο μεριπέ ι Χριστόσκο μπεκλεντίνενα τι τζουβντιόν κο ουρανός. Αλλά τζάνα εκατομμύρια γιαβερά-ντα τζενέ σο μπεκλεντίνενα τι τζουβντιόν κι πφουβ. Ανταλέ μαθημάστε, κα ντικχάς σόσκε σαρέ ανταλά τζενέ τζάνα κι Ανάμνηση κάθε μπρες. Ντα κα ντικχάς σαρ βοηθίντιβασα κάνα τζάσα οτθέ. Πρώτα, κα ντικχάς σόσκε ο χρισμέ τζάνα κι Ανάμνηση.

4. Σόσκε ο χρισμέ λένα κατά μαντρό ντα κατά μολ κι Ανάμνηση;

⁴ Κάθε μπρες, ο χρισμέ σο τζάνα κι Ανάμνηση χάνα κατά μαντρό ντα πίνα κατά μολ. Σόσκε ισί λατσσό τι λεν ο χρισμέ κατά μαντρό ντα κατά μολ; Για τι αρακχάς ι απάντηση, τι σκεφτίνας σο αβιλό-πες ι τελευταία ιράτ πριν τι μερέλ ο Ιησούς. Αφού κερντέας ο Πάσχας, ο Ιησούς κερντάς ο Δείπνος ι Κυριόσκο, σαρ τζανένα-λες ο πο μπουτ τζενέ. Ντινάς ο μαντρό ντα ι μολ πι 11 πιστέ αποστολόντε ντα βακερντάς λένγκε τι χαν ντα τι πιν ανταλένταρ. Κερντάς λένγκε λάφι ντουέ συμφωνιένγκε, ι νεβέ συμφωνιάκε ντα ι συμφωνιάκε εκχέ Βασιλειάκε. * (Λουκ. 22:​19, 20, 28-30) Ανταλά συμφωνίες πουταρντέ ο ντρομ για τι αβέν οντουλά απόστολοι ντα χάνικ γιαβερά τζενέ βασιλιάδες ντα ιερείς κο ουρανός. (Αποκ. 5:​10· 14:1) Σάντε ο χρισμέ σο ισί ατζέ τζουβντέ κι πφουβ, ντα ισί αντρέ ανταλέ συμφωνιέντε, μπορίνενα τι λεν κατά μαντρό ντα κατά μολ κι Ανάμνηση.

5. Σο αγαβένα ο χρισμέ για την ελπίδα σο ντιντιλί-λεν;

⁵ Ντικχέν ατζέκ εκ λόγος σο ο χρισμέ μπεσένα σαρ σαρ τι τζαν κι Ανάμνηση: Ανταγιά γιορτή ντέλα-λεν ι ευκαιρία τι σκεφτίνεν πουμαρί ελπίδα. Ο Ιεχωβά ντινάς-λεν εκ μπουτ σουκάρ ελπίδα​—τι τθερέν αθάνατη ντα άφθαρτη ζωή κο ουρανός, τι υπηρετίνεν γιεκ ι Ιησού Χριστόσαρ ντα ι γιαβερέντζαρ κατά 144.000, ντα πο μπουτ σαριλένταρ, τι αβέν ανγκλάλ κο Ιεχωβά Ντεβέλ! (1 Κορ. 15:​51-53· 1 Ιωάν. 3:2) Ο χρισμέ αγαβένα ότι τραμπίντιλε τι τθερέν ασακέ προνόμια κο ουρανός. Αλλά για τι τζαν κο ουρανός πρέπει τι ατσσόν πιστοί μέχρι ο ντιβές σο κα μερέν. (2 Τιμ. 4:7, 8) Ο χρισμέ ισί μπουτ χαρούμενοι κάνα σκεφτίνενα ι ελπίδα σο τθερένα τι τζουβντιόν κο ουρανός. (Τίτο 2:​13) Σο κα βακεράς “ι γιαβερέ μπρακένγκε”; (Ιωάν. 10:​16) Σόσκε τζάνα κι Ανάμνηση;

6. Σόσκε τζάνα ο γιαβερά μπρακέ κι Ανάμνηση κάθε μπρες;

⁶ Ο γιαβερά μπρακέ τζάνα κι Ανάμνηση ντα να χάνα κατά μαντρό ούτε πίνα κατά μολ, αλλά ισί χαρούμενοι οτθέ. Κο 1938, βακέρντιλο πρώτη φαρ οντουλένγκε σο τθερένας ι ελπίδα τι τζουβντιόν κι πφουβ τι τζαν κι Ανάμνηση. Η Σκοπιά 1 Μαρτίου 1938 (1 Απριλίου 1938 κι μπαλαμανί) βακερέλας: “Κα αβέλας ντιπ σωστός ντα λατσσό [οντουλένγκε σο ισί κο γιαβερά μπρακέ] τι τζαν οντουλέ συναθροισιάτε ντα τι ντικχέν σο αβέλα-πες. . . . Ανταβά πρέπει τι ισί, ντα ισί, βακίτι σο ντέλα χαρά λεν-ντα”. Σαρ ο καλεσμέ σο τζάνα χαράσαρ εκχέ μπιαβέστε, αντικάς οντουλά-ντα σο ισί κο γιαβερά μπρακέ χαιρίνενα τι τζαν ντα τι ντικχέν ι Ανάμνηση.

7. Σόσκε μπεκλεντίνενα σαρ σαρ ο γιαβερά μπρακέ ι ομιλιάκε κι Ανάμνηση;

⁷ Σαρ ο χρισμέ, αντικάς ο γιαβερά μπρακέ-ντα σκεφτίνενα πουμαρί ελπίδα. Μπεκλεντίνενα σαρ σαρ τι ασουνέν ι ομιλία κι Ανάμνηση, σόσκε ανταγιά ομιλία βακερέλα πο μπουτ οντουλά σο κα κερέλ ο Χριστός ντα ο 144.000 ι πιστέ τζενένγκε κι Βασιλεία σο κα ατσσικιαρέλ χίλια μπρεσά. Καζόμ κα κερέλ κουμάντος λένγκο Βασιλιάς, ο Ιησούς Χριστός, οντουλά σο κα κυβερνίνεν λέσαρ κο ουρανός κα βοηθίνεν τι αβέν ο τζενέ τέλειοι ντα η πφουβ παράδεισος. Ισί μπουτ σουκάρ οντουλένγκε σο τζάνα κι Ανάμνηση τι ανέν πουμαρέ γκοντιάτε σαρ κα νικιόν μπαγιά ο προφητείες ι Γραφιάκε, σαρ οντουλά σο ισί κο εδάφια Ησαΐας 35:5, 6· 65:​21-23 ντα Αποκάλυψη 21:3, 4.  Ανένα πουμαρέ γκοντιάτε σαρ κα αβέν βον ντα λένγκε αγαπημέ τζενέ κο νεβό ντουνιάς, ντα αντικάς κερένα πουμαρί ελπίδα πο ζουρανί οντουλένγκε σο κα αβέν-πες ανγκλ’ αμέντε ντα μανγκένα ατζέ πο μπουτ μα τι τσσιναβέν ποτές τι υπηρετίνεν ι Ιεχωβάς.​—Ματθ. 24:​13· Γαλ. 6:9.

8. Καβά ισί εκ γιαβέρ λόγος σο ο γιαβερά μπρακέ τζάνα κι Ανάμνηση;

⁸ Ντικχέν εκ γιαβέρ-ντα λόγος σο τζάνα ο γιαβερά μπρακέ κι Ανάμνηση. Αντικάς σικαβένα ότι μανγκένα ι χρισμέ πφραλέν ντα ότι τσσίντενα λένταρ. Ο Λάφι ι Ντεβλέσκο βακερντάς ότι ο χρισμέ κα τθερένας λατσσί συνεργασία οντουλέντζαρ σο μπεκλεντίνενα τι τζουβντιόν κι πφουβ. Για τι ντικχάς χάνικ παραδείγματα.

9. Σαρ ντικχένα ο γιαβερά μπρακέ ι χρισμέ πφραλέν σαρ σικαβέλα η προφητεία σο ισί γραμμέ κο εδάφιος Ζαχαρίας 8:23;

⁹ Διαβάνεν Ζαχαρίας 8:​23. Ανταγιά προφητεία σικαβέλα μπουτ σουκάρ σαρ ντικχένα ο γιαβερά μπρακέ πουμαρέ χρισμέ πφραλέν ντα πφενίν. Ο λάφια “Ιουδαίος” ντα «τουμέντζαρ» βακέρντιβενα ι ίδιε τζενένγκε, οντουλένγκε σο ισί χρισμέ. (Ρωμ. 2:​28, 29) Ο «10 μουρσά σαρέ κατά τσσιμπά ι τθεμένγκε» μανγκένα τι σικαβέν ι γιαβερέ μπρακέν. Βον “ασταρένα σικίς” ι χρισμέ πφραλέν, δηλαδή ατσσόνα πασέ λέντε ντα ντένα γιεκ λέντζαρ πάκι λατρεία. Οτθάρ, ι ιράτ σο αβέλα-πες η Ανάμνηση, ο γιαβερά μπρακέ σικαβένα ότι ισί αφοσιωμέ κο χρισμέ κάνα ισί οτθέ λέντζαρ.

10. Σαρ κερντάς ο Ιεχωβά τι νικιόλ μπαγιά η προφητεία σο ισί κο εδάφια Ιεζεκιήλ 37:​15-19, 24, 25;

¹⁰ Διαβάνεν Ιεζεκιήλ 37:​15-19, 24, 25. Ο Ιεχωβά κερντάς τι νικιόλ μπαγιά ανταγιά προφητεία κάνα κερντάς ι χρισμέ τζενέν ντα ι γιαβερέ μπρακέν τι αβέν γιεκ. Η προφητεία βακερέλα ντουέ ραβδίνγκε. Οντουλά σο μπεκλεντίνενα τι τζουβντιόν κο ουρανός ισί σαρ ο ραβδίς “ι Ιουδάσκο” (ι φαράκο σο λάταρ τραμπίντιβενας ο βασιλιάδες κο Ισραήλ), ντα οντουλά σο μπεκλεντίνενα τι τζουβντιόν κι πφουβ σαρ ο ραβδίς «ι Εφραϊμίσκο». * Ο Ιεχωβά κα ανέλας πασέ ανταλά ντούι ομάδες για τι αβέν «εκ ραβδίς». Ανταβά μανγκέλα τι βακερέλ ότι υπηρετίνενα σαρέ γιεκ ντα ότι λένγκο Βασιλιάς ισί εκ τανό, ο Χριστός Ιησούς. Κάθε μπρες, ο χρισμέ ντα ο γιαβερά μπρακέ ισί κι Ανάμνηση, όχι σαρ ντούι ομάδες, αλλά σαρ «εκ κοπάδι» σο τθερέλα “εκχέ τσομπανίς”.​—Ιωάν. 10:16.

11. Σαρ σικαβένα πο μπουτ ότι ισί πασέ κο πφραλά κι Χριστόσκε “ο μπρακέ” σο βακέρντιβενα κο εδάφια Ματθαίος 25:​31-36, 40;

¹¹ Διαβάνεν Ματθαίος 25:​31-36, 40. “Ο μπρακέ” σο βακερντάς ο Ιησούς μανγκένα τι σικαβέν ι δίκαιε τζενέν κο βακίτι κι τελευταίε ντιβεσένγκο σο μπεκλεντίνενα τι τζουβντιόν κι πφουβ, δηλαδή ι γιαβερέ μπρακέν. Βον ισί πασέ κο χρισμέ πφραλά κι Χριστόσκε πο μπουτ κάνα βοηθίνενα-λεν τι ντεν πέρα εκ μπαρί ευθύνη σο τθερένα, τι βακερέν ντα τι σικλιαρέν ο λατσσέ αμπέρια σαρό κο ντουνιάς.​—Ματθ. 24:​14· 28:​19, 20.

12, 13. Καλέ γιαβερέ τροπόντζαρ ο γιαβερά μπρακέ σικαβένα ότι ισί πασέ κο πφραλά κι Χριστόσκε;

¹² Κάθε μπρες κο εβδομάδες πριν κατά Ανάμνηση, ο γιαβερά μπρακέ σικαβένα ότι ισί πασέ κο πφραλά κι Χριστόσκε κάνα νικιόνα καζόμ πο μπουτ αβέλα-πες κο έργος για τι καλίνεν τζενέν κι Ανάμνηση. (Ντικχέν ο πλαίσιος « Σκεφτιντέν σο κα Κερέν Πριν ντα Σοράν Κατά Ανάμνηση;») Επίσης, σίγουρα κερένα σο-ντα χρειαζίντιβελα πριν κατά Ανάμνηση ατζέ-ντα άμα να τθερένα καεκχέ τζενές πουμαρέ κχανγκιριάτε σο κα χαλ κατά μαντρό  ντα κα πιλ κατά μολ. Ο γιαβερά μπρακέ μπεϊντίνενα τι αβέν πασέ κο πφραλά κι Χριστόσκε ασακέ τροπόντζαρ. Ανταλά μπρακέ τζανένα ότι ο Ιησούς ντικχέλα σαρέ οντουλά σο κερένα λέσκε χρισμέ πφραλένγκε σαρ τι κερένας-λεν λέσκε.​—Ματθ. 25:​37-40.

¹³ Καλά ισί γιαβερά-ντα λόγοι σο σαρέ, είτε μπεκλεντίνασα τι τζουβντιάς κο ουρανός είτε κι πφουβ, τζάσα κι Ανάμνηση;

14. Σαρ σικαντάς ο Ιεχωβά ντα ο Ιησούς καζόμ μπουτ μανγκένα-αμέν;

¹⁴ Ισινάμ πφερντέ εκτίμηση σο ο Ιεχωβά ντα ο Ιησούς μανγκένα-αμέν. Ο Ιεχωβά σικαντάς ότι μανγκέλα-αμέν μπουτέ τροπόντζαρ. Αλλά ο πο μπαρό τρόπος σο σικαντάς-λες ανταβά ισινέ κάνα μπουτσσαντάς πι αγαπημέ Τσσαβές τι ντουκχάλ ντα τι μερέλ αμένγκε. (Ιωάν. 3:​16) Αγαβάσα ότι ο Ιησούς-ντα σικαντάς καζόμ μπουτ μανγκέλα-αμέν κάνα ντινάς σαρέ πι γκίσαρ πι ζωή αμένγκε. (Ιωάν. 15:​13) Ποτές ναστί κα σικαβάς ι Ιεχωβάσκε ντα ι Ιησούσκε ο μανγκιπέ σο σικαντέ βον αμένγκε. Μπορίνασα όμως τι σικαβάς λένγκε αμαρί εκτίμηση οντουλέντζαρ σο κεράσα κάθε ντιβές αμαρέ ζωγιάτε. (Κολ. 3:​15) Ντα τζάσα κι Ανάμνηση για τι ντας-αμέν γκοντί καζόμ μπουτ μανγκένα-αμέν ντα για τι σικαβάς λένγκε ότι αμέν-ντα μανγκάσα-λεν.

15. Σόσκε εμ ο χρισμέ εμ ο γιαβερά μπρακέ εκτιμίνενα μπουτ ο λύτρος;

¹⁵ Εκτιμίνασα μπουτ ο λύτρος. (Ματθ. 20:​28) Ο λύτρος τθερέλα μπαρί αξία ι χρισμέ τζενένγκε σόσκε πουτρέλα λένγκε ο ντρομ τι τζουβντιόν κο ουρανός. Επειδή πακιάνα κι θυσία κι Χριστόσκι, ο Ιεχωβά βακερντάς ότι ισί δίκαιοι ντα τραμπιντάς-λεν τι αβέν λέσκε τσσαβέ. (Ρωμ. 5:1· 8:​15-17, 23) Οντουλά σο ισί κο γιαβερά μπρακέ σικαβένα βον-ντα εκτίμηση ι λυτρόσκε. Επειδή πακιάνα κι θυσία κι Χριστόσκι, ισί πάκι κο γιακχά κι Ντεβλέσκε, μπορίνενα τι υπηρετίνεν-λες ντα τι μπεκλεντίνεν τι σώντιβεν κατά «μπαρί στεναχώρια». (Αποκ. 7:​13-15) Εκ τρόπος σο εμ ο χρισμέ εμ ο γιαβερά μπρακέ σικαβένα πουμαρί εκτίμηση κο λύτρος ισί κάνα τζάνα κι Ανάμνηση κάθε μπρες.

16. Καβά ισί εκ γιαβέρ λόγος σο τζάσα κι Ανάμνηση;

¹⁶ Εκ γιαβέρ λόγος σο τζάσα κι Ανάμνηση ισί ότι μανγκάσα τι ντας καν κο Ιησούς. Είτε μπεκλεντίνασα τι τζουβντιάς κο ουρανός είτε κι πφουβ, πακιάσα ότι ισί αμένγκε-ντα ακαγιά εντολή ι Ιησούσκι: «Συνεχίνεν τι κερέν-λες ανταβά για τι ντεν-τουμέν γκοντί μαν».​—1 Κορ. 11:​23, 24.

17. Σαρ βοηθίνελα-αμέν η Ανάμνηση τι αβάς πο πασέ κο Ιεχωβά;

¹⁷ Αβάσα πο πασέ κο Ιεχωβά. (Ιακ. 4:8) Σαρ σικλιλάμ, η Ανάμνηση ντέλα-αμέν ι ευκαιρία τι ανάς αμαρέ γκοντιάτε οντουβά σο μπεκλεντίνασα τι κερέλ αμένγκε ο Ιεχωβά ντα τι σκεφτίνας ο μπαρό μανγκιπέ σο σικαντάς αμένγκε. (Ιερ. 29:​11· 1 Ιωάν. 4:​8-10) Κάνα ανάσα αμαρέ γκοντιάτε ότι κα αβέν-πες σίγουρα οντουλά σο μπεκλεντίνασα τι αβέν-πες ανγκλ’ αμέντε ντα ότι ο Ντεβέλ μανγκέλα-αμέν αζόμ μπουτ, μανγκάσα αμέν-ντα ατζέ πο μπουτ ι Ιεχωβάς ντα αβάσα πο λατσσέ αμαλά λέσαρ.​—Ρωμ. 8:​38, 39.

18. Σο μανγκάσα τι κεράς κάνα σκεφτίνασα λατσσές οντουβά σο κερντάς ο Ιησούς;

¹⁸ Μανγκάσα τι μοιάζας κο Ιησούς. (1 Πέτρ. 2:​21) Ο ντιβεσά πριν κατά Ανάμνηση, διαβάνασα πο μπουτ ιστορίες ι Γραφιάκε σο βακερένα ι τελευταίε ντιβεσένγκε σο ισινέ ατθέ κι πφουβ ο Ιησούς, σο μουλό ντα σο τζουβντιλό πάλι. Σοράν, ι ιράτ σο αβέλα η Ανάμνηση, η ομιλία ανέλα αμαρέ γκοντιάτε καζόμ μπουτ μανγκέλα-αμέν ο Ιησούς. (Εφεσ. 5:2· 1 Ιωάν.  3:​16) Καζόμ διαβάνασα ι θυσιάκε σο κερντάς ο Ιησούς ντα σκεφτίνασα λατσσές ανταβά σο κερντάς, μανγκάσα “τι πφιράς ακριβώς σαρ πφιρντάς βοβ”.​—1 Ιωάν. 2:6.

19. Σαρ μπορίνασα τι ατσσάς κι Ντεβλέσκο μανγκιπέ;

¹⁹ Μανγκάσα σαρέ αμαρέ γκίσαρ τι ατσσάς κι Ντεβλέσκο μανγκιπέ. (Ιούδα 20, 21) Ατσσάσα κι Ντεβλέσκο μανγκιπέ κάνα κεράσα ο πο λατσσό σο αβέλα-πες για τι ντας-λες καν, τι αγιάνας λέσκο ναβ ντα τι ανάς χαρά λέσκε γκίστε. (Παρ. 27:​11· Ματθ. 6:9· 1 Ιωάν. 5:3) Η Ανάμνηση κερέλα-αμέν τι μανγκάς ατζέ πο μπουτ τι τζουβντιάς ο κάθε ντιβές τροπόσαρ σο βακερέλα κο Ιεχωβά: “Μανγκάβα τι ατσσάβ τι μανγκιμάστε για πάντα!”

20. Καλά σημαντικούς λόγους τθεράσα για τι τζας κι Ανάμνηση;

²⁰ Είτε μπεκλεντίνασα τι τζουβντιάς για πάντα κο ουρανός είτε κι πφουβ, τθεράσα σημαντικούς λόγους τι τζας κι Ανάμνηση. Κάθε μπρες, κάνα γκιντίντιβασα οντουβά ντιβές κι Ανάμνηση, ντάσα-αμέν γκοντί ο μεριπέ εκχέ τζενέσκο σο μανγκάσα μπουτ, ι Ιησού Χριστόσκο. Πο μπουτ, ντάσα-αμέν γκοντί ο πο μπαρό μανγκιπέ σο σικάντιλο ποτές, ο μανγκιπέ σο σικαντάς αμένγκε ο Ιεχωβά κάνα ντινάς πι Τσσαβές σαρ λύτρος. Ανταβά μπρες, η Ανάμνηση κα αβέλ-πες Παρασκευή 15 Απριλίου 2022. Μανγκάσα ι Ιεχωβάς ντα λέσκε Τσσαβές. Οτθάρ, ο ντιβές σο μουλό ο Ιησούς, ο πο σημαντικός πράγμας αμένγκε ισί τι τζας κι Ανάμνηση.