1. Σαρ μπορίνασα τι νακχάς σαάτι ι Ιεχωβάσαρ;

 ΜΠΕΪΝΤΙΝΑΣΑ τι νακχάς σαάτι ι τζενέντζαρ σο μανγκάσα. Ο αντρόγυνα σο τθερένα εκ ευτυχισμέ μπιαβ μπεϊντίνενα μπουτ τι νακχέν σαάτι ο εκ ι γιαβερέσαρ. Ο τερνέ μπεϊντίνενα τι αβέν γιεκ πουμαρέ λατσσέ αμαλέντζαρ. Ντα σαρέ αμέν μπεϊντίνασα ο σαάτι σο νακχάσα αμαρέ πφραλέντζαρ ντα πφενίντζαρ. Αλλά πο μπουτ σαρέ ανταλένταρ, μπεϊντίνασα τι νακχάς σαάτι αμαρέ Ντεβλέσαρ. Κεράσα-λες ανταβά κάνα προσευχίντιβασα λέστε, διαβάνασα λέσκο Λάφι ντα σκεφτίνασα λατσσές οντουβά σο τθερέλα πι γκοντιάτε τι κερέλ ντα λέσκε σουκάρ ιδιότητες. Ο σαάτι σο νακχάσα ι Ιεχωβάσαρ ισί μπουτ σημαντικός!​—Ψαλμ. 139:17.

2. Καγιά δυσκολία τθεράσα;

² Παρόλο σο μπεϊντίνασα τι νακχάς σαάτι ι Ιεχωβάσαρ, τθεράσα εκ δυσκολία. Τθάβντασα μπουτ αμαρέ ζωγιάτε, οτθάρ μπέκιμ τι αβέλ αμένγκε δύσκολος τι αρακχάς σαάτι ι Ιεχωβάσκε πραγματένγκε. Η μπουτί, η φαμιλί ντα γιαβερά πράγματα σο πρέπει τι αβέν-πες μπέκιμ τι λένα αζόμ μπουτ αμαρέ σαατίσταρ σο νιωθίνασα ότι να ερεσαβάσα τι προσευχίντιβας, τι σικλιαράς-αμέν κατά Γραφή ή τι σκεφτίνας λατσσές οντουλά σο σικλιάσα.

3. Σο γιαβέρ μπέκιμ τι χαλαβέλ αμαρό σαάτι;

³ Ισί κάτι γιαβέρ-ντα σο μπορίνελα τι χαλαβέλ αμαρό σαάτι. Άμα να τθεράσα αμαρί γκοντί, μπέκιμ τι μουκχάς γιαβερά πράγματα σο νανέ λάθος τι τσορέν ο σαάτι σο κα μπορίναας τι ντας για τι αβάς πο πασέ κο Ιεχωβά. Ανέν τουμαρέ γκοντιάτε για παράδειγμας οντουλά σο κεράσα για τι νακχάς λατσσές. Μπάζιμα, ισί λατσσό σαρέ αμέν τι αρακχάς σαάτι για τι μπεσάς  χάνικα. Αλλά ατζέ-ντα άμα τραμπίνασα τι νακχάς λατσσές πραγματέντζαρ σο νανέ γκεραλέ, μπέκιμ τι ντας αζόμ μπουτ σαάτι λέντε σο να κα ερεσαβάς τι κεράς πράγματα ι Ιεχωβάσκε. Πρέπει τι ντας-αμέν γκοντί ότι ο πο σημαντικός αμαρέ ζωγιάτε νανέ τι νακχάς λατσσές.​—Παρ. 25:​27· 1 Τιμ. 4:8.

4. Σο κα ντικχάς ακανά;

⁴ Ανταλέ μαθημάστε, κα ντικχάς σόσκε πρέπει τι τσσουβάς ανγκλάλ ο σωστά πράγματα. Κα ντικχάς επίσης σαρ κα χρησιμοποιήνας καζόμ πο λατσσές αβέλα-πες ο σαάτι σο νακχάσα ι Ιεχωβάσαρ ντα σαρ κα ντικχάς λατσσιπέ ανταλέσταρ.

5. Σαρ κα βοηθίνελ εκχέ τερνές η συμβουλή σο ισί κο εδάφια Εφεσίους 5:​15-17 τι τραμπίνελ ο πο λατσσό ντρομ πι ζωγιάτε;

⁵ Τραμπίνεν ο πο λατσσό ντρομ τουμαρέ ζωγιάτε. Ο τερνέ μπουτ φαρ σκεφτίνενα σο ισί πο λατσσό τι κερέν πουμαρέ ζωγιάτε. Ο δάσκαλοι ντα λένγκε τζενέ σο νανέ Μάρτυρες ι Ιεχωβάσκε μπέκιμ τι βακερένα λένγκε τι τζαν κο πανεπιστήμιος για τι αρακχέν εκ λατσσί μπουτί ντα τι κερέν λοβέ. Ανταβά ντρομ μπέκιμ τι λελ μπουτ λένγκε σαατίσταρ. Οκιά μπάνταρ, ο ντατ, η ντάι ντα ο πφραλά κι κχανγκιρί μπέκιμ τι βακερένα ι τερνένγκε τι κερέν πο μπουτ πράγματα ι Ιεχωβάσκε. Σο κα βοηθίνελ εκχέ τερνές σο μανγκέλα ι Ιεχωβάς τι λελ ι πο λατσσί απόφαση; Κα αβέλ λατσσό λέσκε τι διαβάνελ ντα τι σκεφτίνελ λατσσές ο εδάφια Εφεσίους 5:​15-17. (Διαβάνεν) Αφού κα διαβάνελ ανταλά εδάφια, εκ τερνό κα μπορίνελας τι πουτσέλ-πες: “Σο «μανγκέλα ο Ιεχωβά»; Καγιά απόφαση κα κερέλ λέσκο γκι; Καβά ντρομ κα βοηθίνελ-μαν τι χρησιμοποιήναβ μο σαάτι καζόμ πο λατσσές αβέλα-πες;” Τι ντεν-τουμέν γκοντί ότι «τζουβντιάσα γκεραλέ ντιβεσέντε», ντα ανταβά ντουνιάς σο ισί κο βας κι Μπενγκέσκο, ατζεχάνικ κα αβέλ καταστροφή. Οτθάρ, ισί γκοντιαβέρ τι κεράς αμαρέ ζωγιάτε πράγματα σο κα κερέν ι Ιεχωβάσκο γκι.

6. Σο τραμπιντάς η Μαρία, ντα σόσκε οντουβά σο τραμπιντάς ισινέ γκοντιαβέρ;

⁶ Τσσουβέν ανγκλάλ ο σωστά πράγματα. Για τι χρησιμοποιήνας καζόμ πο λατσσές αβέλα-πες αμαρό σαάτι, πρέπει τι τραμπίνας καβά κατά ντούι πράγματα σο νανέ λάθος κα κεράς. Ντικχάσα-λες ανταβά οντουλένταρ σο αβιλέ-πες κάνα ο Ιησούς γκιλό κο κχερ κι Μαριάκο ντα κι Μαρθάκο. Η Μάρθα ισινέ αζόμ χαρούμενη σο τθερέλας ι Ιησούς πι κχερέστε, σο αρχισάλι τι κερέλ λέσκε μπουτ πράγματα τι χαλ. Αλλά η Μαρία μπεσλί πασέ κο Ιησούς ντα ασουνέλας οντουλά σο βακερέλας. Οντουβά σο κερντάς η Μάρθα να ισινέ λάθος, αλλά ο Ιησούς βακερντάς ότι η Μαρία «τραμπιντάς ι πο λατσσί μερίδα». (Λουκ. 10:​38-42, υποσ.) Καζόμ νακχένας ο μπρεσά, η Μαρία μπέκιμ τι μπισταρντάς σο χαλέ οντουβά ντιβές, αλλά μπορίνασα τι αβάς σίγουροι ότι ποτές να μπισταρντάς σο σικλιλί κατά Ιησούς. Σαρ η Μαρία εκτιμιντάς οντουβά χάνικ σαάτι σο τθερέλας ι Ιησούσαρ, αντικάς αμέν-ντα εκτιμίνασα ο σαάτι σο νακχάσα ι Ιεχωβάσαρ. Σαρ κα χρησιμοποιήνας καζόμ πο λατσσές αβέλα-πες ανταβά σαάτι;

7. Σόσκε ισί σημαντικός τι κεράς προσευχή, τι σικλιαράς-αμέν κατά Γραφή ντα τι σκεφτίνας λατσσές οντουλά σο σικλιάσα;

⁷ Αγαβέν ότι ντάσα λατρεία ι Ιεχωβάς κάνα κεράσα προσευχή, σικλιαράσα-αμέν κατά Γραφή ντα σκεφτίνασα λατσσές οντουλά σο σικλιάσα. Κάνα προσευχίντιβασα, κεράσα λάφι αμαρέ Νταντέσαρ, σο μανγκέλα-αμέν μπουτ. (Ψαλμ. 5:7) Κάνα σικλιαράσα-αμέν κατά Αγία Γραφή, “σικλιάσα ι Ντεβλέσκε”, σο ισί ο πο γκοντιαβέρ σαριλένταρ. (Παρ. 2:​1-5) Κάνα σκεφτίνασα  λατσσές οντουλά σο σικλιάσα ι Ιεχωβάσκε, ανάσα αμαρέ γκοντιάτε λέσκε σουκάρ ιδιότητες ντα ντάσα-αμέν γκοντί ο μπουτ σουκάρ πράγματα σο μανγκέλα τι κερέλ αμένγκε ντα σαρέ ι τζενένγκε. Ανταβά ισί ο πο λατσσό τρόπος τι χρησιμοποιήνας αμαρό σαάτι. Αλλά σο κα βοηθίνελ-αμέν τι κεράς-λες ανταβά;

8. Σο σικλιάσα κατά τρόπος σο χρησιμοποιηντάς ο Ιησούς πο σαάτι κι έρημος;

⁸ Άμα αβέλα-πες, αρακχέν εκ ήσυχος τθαν. Ντικχέν ο παράδειγμας ι Ιησούσκο. Πριν τι αρχίνελ τι κερέλ πο έργος κι πφουβ, ο Ιησούς ισινέ 40 ντιβεσά κι έρημος. (Λουκ. 4:1, 2) Οντουλέ ήσυχε τθανέστε, μπορίνελας τι κερέλ προσευχή κο Ιεχωβά ντα τι σκεφτίνελ σο μανγκέλας λέσκο Ντατ λέσταρ. Ανταβά βοηθιντάς-λες τι αβέλ έτοιμος ι δοκιμασιένγκε σο κα νακχέλας ατζεχάνικ. Σαρ μπορίνενα τι βοηθίντιβεν κατά παράδειγμας ι Ιησούσκο; Άμα τθερένα μπαρί φαμιλί, μπέκιμ μα τι αβέλ πάντα εύκολος τι αρακχέν ησυχία αντρέ κο κχερ. Άμα ισί αντικάς, κα μπορίνενας τι αρακχέν εκ ήσυχος τθαν αβρί. Ανταβά κερέλα η Ζιλί κάνα μανγκέλα τι κερέλ προσευχή για τι νακχέλ σαάτι ι Ιεχωβάσαρ. Βόι ντα λάκο ρομ μπεσένα εκχέ χουρντέ κχερέστε κι Γαλλία, ντα ισί δύσκολος τι ατσσόλ κορκορί ντα τι τθερέλ ησυχία. Η Ζιλί βακερέλα: «Οτθάρ, τζάβα κο πάρκος κάθε ντιβές. Οτθέ μπορίναβα τι αβάβ κορκορί, να πφιρέλα μι γκοντί ντα κεράβα μπαγιά λάφι κο Ιεχωβά».

9. Παρόλο σο τθερέλας μπουτ πράγματα τι κερέλ, σαρ σικαντάς ο Ιησούς ότι ισινέ σημαντική λέσκε η φιλία σο τθερέλας ι Ιεχωβάσαρ;

⁹ Ο Ιησούς τθερέλας μπουτ πράγματα τι κερέλ. Καζόμ τζάλας τθαν τθανέστε για τι κερέλ έργος, τζάνας παλά-λέστε μπουτ τζενέ ντα σαρέ μανγκένας τι αβέν λέσαρ. Εκ φαρ, «σαρί η πόλη γκιντισάλι αβριάλ λέσκε κχερέσταρ» για τι ντικχέλ-λες. Ο Ιησούς όμως αρακχέλας πάντα σαάτι για τι κερέλ προσευχή κο Ιεχωβά. Πριν τι ντισιόλ, αρακχλάς “εκ ήσυχος τθαν” σο κα μπορίνελας οτθέ τι νακχέλ σαάτι κορκορό πι Νταντέσαρ.​—Μάρκ. 1:​32-35.

10, 11. Καγιά σημαντική συμβουλή ντινάς ο Ιησούς πι μαθητέντε κο κήπος της Γεθσημανή σαρ βακερένα ο εδάφια Ματθαίος 26:​40, 41, αλλά σο αβιλό-πες;

¹⁰ Ι τελευταία ιράτ πριν τι μερέλ, καζόμ λέσκο έργος ερεσέλας κο τέλος, ο Ιησούς ρόντελας πάλι εκ ήσυχος τθαν για τι σκεφτίνελ ντα τι προσευχίντιβελ. Αρακχλάς ανταβά ήσυχος τθαν κο κήπος της Γεθσημανή. (Ματθ. 26:​36) Αζομάν, ο Ιησούς βακερντάς πι μαθητένγκε εκ μπουτ σημαντική συμβουλή ι προσευχιάκε.

¹¹ Ντικχέν σο αβιλό-πες. Κάνα ερεσλέ κο κήπος της Γεθσημανή, νακχλόας ο σαάτι, μπέκιμ τι ισινέ επκάς ιράτ. Ο Ιησούς μανγκλάς πι αποστολόνταρ τι «ατσσόν τζανγκαντέ» ντα γκιλό τι προσευχίντιβελ. (Ματθ. 26:​37-39) Αλλά καζόμ προσευχίντιβελας, βον σοτέ. Κάνα ντικχλάς-λεν τι σοβέν, ο Ιησούς βακερντάς λένγκε πάλι τι “αβέν τζανγκαντέ ντα μα τι τσσιναβέν τι προσευχίντιβεν”. (Διαβάνεν  Ματθαίος 26:​40, 41) Αγαβέλας ότι ισινέ μπουτ αγχωμέ ντα κχινέ. Ο Ιησούς πφαμπόλας λένγκε ντα αγαντάς ότι «ο σώμας ισί μπίζουρανο». Γκιλό τι προσευχίντιβελ ατζέ ντούι φαρ, αλλά κάνα βουρτισάλο, ντικχλάς πι μαθητέν τι σοβέν αντίς τι προσευχίντιβεν.​—Ματθ. 26:​42-45.

12. Σο μπορίνασα τι κεράς άμα μπάζιμα ισινάμ αζόμ αγχωμέ ή κχινέ σο ναστί κεράσα προσευχή;

¹² Τραμπίνεν ο σωστός σαάτι. Μπάζιμα, μπέκιμ τι ισινάμ αζόμ αγχωμέ ή κχινέ σο ναστί κεράσα προσευχή. Άμα ανταβά αβιλό-πες τουμένγκε-ντα, τι τζανέν ότι γιαβερά-ντα νιωθίνενα αντικάς. Σο μπορίνενα τι κερέν; Μερικοί σο ισινέ σικλέ τι προσευχίντιβεν κο Ιεχωβά κο τέλος κι ντιβεσέσκο αγαντέ ότι ισί πο λατσσό λένγκε τι προσευχίντιβεν χάνικ πριν τι αράτιβελ, κάνα να κα αβέν αζόμ κχινέ. Γιαβερά αγαντέ ότι βοηθίνελα μπουτ ο τρόπος σο τραμπίνενα τι μπεσέν κάνα προσευχίντιβενα. Σο αβέλα-πες όμως άμα τθερένα αζόμ μπαρό άγχος ή χασαρντέν αζόμ μπουτ τουμαρί ζορ σο ναστί κερένα προσευχή; Βακερέν κο Ιεχωβά σαρ νιωθίνενα. Μπορίνενα τι αβέν σίγουροι ότι αμαρό Ντατ σο τζιτζίνελα αμένγκε αζόμ μπουτ κα αγαβέλ.​—Ψαλμ. 139:4.

13. Σαρ κα μπορίνενας ο ηλεκτρονικές συσκευές τι τσσορέν κατά σαάτι σο νακχάσα ι Ιεχωβάσαρ;

¹³ Κερέν ο πο λατσσό για μα τι τθερέν τουμαρί γκοντί γιαβερτθέ κάνα σικλιαρένα-τουμέν κατά Γραφή. Να αβάσα λατσσέ αμαλά ι Ιεχωβάσαρ σάντε ι προσευχιάσαρ. Αβάσα ατζέ πο πασέ κο Ιεχωβά κάνα σικλιαράσα-αμέν λέσκε Λαφίσταρ ντα κάνα τζάσα κο συναθροίσεις. Σο μπορίνενα τι κερέν για τι χρησιμοποιήνεν καζόμ πο λατσσές αβέλα-πες ο σαάτι σο ντένα κο σικλιαριπέ κι Γραφιάκο ντα κο συναθροίσεις; Πουτσέν-τουμέν: “Σόσκε πφιρέλα μι γκοντί κάνα ισινόμ κι συνάθροιση ή κάνα σικλιαράβα-μαν κατά Γραφή;” Μήπως τθερένα τουμαρί γκοντί κο τηλέφωνος, κο μηνύματα ή σε εκ γιαβέρ ηλεκτρονική συσκευή; Αντιβές, εκατομμύρια τζενέ τθερένα ανταλά χρήσιμα εργαλεία. Τζενέ σο ρόντενα οπράλ ανταλέστε βακερένα ότι, άμα μαράσα-αμέν τι τθεράς αμαρί γκοντί οντουλέστε σο κεράσα, ναστί κα κεράς-λες ανταβά άμα τθεράσα πασέ αμέντε αμαρό κινητός. Εκ καθηγητής βακερέλα: «Ναστί τθερένα τουμαρί γκοντί οντουλέστε σο κερένα οντουβά σαάτι. Τουμαρί γκοντί πφιρέλα γιαβερτθέ». Αμαρέ συνελευσιέντε, πριν τι αρχίνελ ο πρόγραμμας, μπουτ φαρ βακέρντιβελα  αμένγκε τι πφάντας αμαρέ ηλεκτρονικές συσκευές για μα τι ενοχλίνας ι γιαβερέν. Μήπως κα μπορίναας τι κεράς-λες ανταβά κάνα ισινάμ κορκορέ για μα τι ενοχλίνεν αμέν αμαρέ συσκευές ντα μα τι τσορέν κατά σαάτι σο νακχάσα ι Ιεχωβάσαρ;

14. Σαρ κα βοηθίνελ-αμέν ο Ιεχωβά μα τι πφιρέλ αμαρί γκοντί σαρ βακερένα ο εδάφια Φιλιππησίους 4:6, 7;

¹⁴ Μανγκέν κατά Ιεχωβά τι βοηθίνελ-τουμέν μα τι πφιρέλ τουμαρί γκοντί. Άμα ντικχένα ότι τουμαρί γκοντί ισί γιαβερτθέ κάνα σικλιαρένα-τουμέν κατά Γραφή ή κάνα ισινέν κι συνάθροιση, μανγκέν κατά Ιεχωβά τι βοηθίνελ-τουμέν. Άμα τσσουβένα τουμαρέ γκίστε ή ισινέν αγχωμέ εκχέ πραγμάσκε, μπέκιμ νανέ εύκολος τι τθερέν τουμαρί γκοντί κι Ντεβλέσκο Λάφι, αλλά ισί μπουτ σημαντικός τι κερέν-λες ανταβά. Κερέν προσευχή για τι ντελ-τουμέν ο Ντεβέλ ι ειρήνη σο να αρακχαβέλα σάντε τουμαρό γκι, αλλά “τουμαρί γκοντί-ντα”.​—Διαβάνεν Φιλιππησίους 4:6, 7.

15. Καβά ισί εκ λατσσιπέ κάνα νακχάσα σαάτι ι Ιεχωβάσαρ;

¹⁵ Άμα ντένα τουμαρέ σαατίσταρ για τι κερέν λάφι κο Ιεχωβά, για τι ασουνέν-λες ντα για τι κερέν σκέψεις λέσκε, κα ντικχέν μπαρό λατσσιπέ. Σαρ; Πρώτον, κα λεν πο λατσσέ αποφάσεις. Η Γραφή βακερέλα αμένγκε ότι «οντουβά σο πφιρέλα γκοντιαβέρ τζενέντζαρ κα αβέλ γκοντιαβέρ». (Παρ. 13:​20) Οτθάρ, καζόμ νακχένα σαάτι οντουλέσαρ σο ισί πο γκοντιαβέρ σαριλένταρ, ι Ιεχωβάσαρ, κα αβέν πο γκοντιαβέρ. Κα αγαβέν πο λατσσές σαρ τι κερέν λέσκο γκι ντα σαρ μα τι λεν αποφάσεις σο πφανγκένα λέσκο γκι.

16. Σαρ κα σικλιαράς πο λατσσές άμα νακχάσα σαάτι ι Ιεχωβάσαρ;

¹⁶ Δεύτερον, κα σικλιαρέν πο λατσσές. Κάνα κεράσα μελέτη εκχέ τζενές, εκ κατά πο σημαντικά πράγματα σο μανγκάσα ισί τι βοηθίνας-λες τι αβέλ πασέ κο Ιεχωβά. Καζόμ πο μπουτ προσευχίντιβασα κο Ιεχωβά ντα σικλιάσα λέσκε, αζόμ πο μπουτ κα μανγκάς-λες ντα κα μπορίνας τι σικλιαράς ι τζενές σο κεράσα-λες μελέτη τι μανγκέλ-λες βοβ-ντα. Ανταβά αβιλό-πες ι Ιησούσαρ-ντα. Κάνα κερέλας λάφι πι Νταντέσκε, σικαβέλας καζόμ μπουτ μανγκέλας-λες, ντα ανταβά βοηθιντάς λέσκε μαθητέν-ντα τι μανγκέν ι Ιεχωβάς.​—Ιωάν. 17:​25, 26.

17. Σόσκε κεράσα ζουρανί αμαρί πίστη κάνα προσευχίντιβασα ντα σικλιαράσα-αμέν κατά Γραφή;

¹⁷ Τρίτον, τουμαρί πίστη κα αβέλ πο ζουρανί. Ανέν τουμαρέ γκοντιάτε σο αβέλα-πες κάνα μανγκένα κατά Ντεβέλ τι σικαβέλ τουμένγκε σο τι κερέν, τι λοκχιαρέλ τουμαρό γκι ή τι βοηθίνελ-τουμέν. Κάθε φαρ σο ο Ιεχωβά απαντίνελα ανταλέ προσευχιέντε, τουμαρί πίστη λέστε μπαριόλα. (1 Ιωάν. 5:​15) Σο γιαβέρ μπορίνενα τι κερέν για τι μπαριαρέν τουμαρί πίστη; Τι σικλιαρέν-τουμέν κατά Γραφή. Ντεν-τουμέν γκοντί ότι «η πίστη αβέλα κατά πράγματα σο  ασουνέλα εκ τζενό». (Ρωμ. 10:​17) Αλλά για τι κεράς πο ζουρανί αμαρί πίστη, να ερεσέλα σάντε τι σικλιάς πράγματα. Σο γιαβέρ πρέπει τι κεράς;

18. Σικαβέν εκχέ παραδειγμάσαρ σόσκε πρέπει τι σκεφτίνας λατσσές οντουλά σο σικλιάσα.

¹⁸ Πρέπει τι σκεφτίνας λατσσές οντουλά σο σικλιάσα. Ντικχέν σο νακχλάς οντουβά σο γραφιντάς ο Ψαλμός 77. Τσσουντάς μπουτ πι γκίστε σόσκε νιωθίνελας ότι βοβ ντα ο γιαβερά Ισραηλίτες χασαρντέας ι ευλογία ι Ιεχωβάσκι. Ανταλά πράγματα σο τθερέλας πι γκοντιάτε κερένας-λες τι ντισαρέλ. (Εδάφια 2-8) Σο κερντάς; Βακερντάς κο Ιεχωβά: «Κα σκεφτίναβ σαρέ οντουλά σο κερντάν ντα κα ανάβ μι γκοντιάτε ο τρόπος σο κερέσα ο πράγματα». (Εδάφιος 12) Σίγουρα, ο ψαλμωδός τζανέλας λατσσές σο κερντάας ο Ιεχωβά πι λαόσκε ανγκλέ, αλλά πουτσλάς: «Μπισταρντάς ο Ντεβέλ τι σικαβέλ λατσσιπέ; Τσσιναντάς τι τζιτζίνελ επειδή ισί χολιαμέ;» (Εδάφιος 9) Ο ψαλμωδός σκεφτιντάς λατσσές εμ σαρέ οντουλά σο κερντάς ο Ιεχωβά εμ ότι ανγκλέ ο Ντεβέλ τζιτζισάλο ντα πφαμπιλό πι λαόσκε. (Εδάφιος 11) Σο αβιλό-πες; Ο ψαλμωδός αγαντάς ότι ο Ιεχωβά να κα μουκχέλας Πι λαός. (Εδάφιος 15) Αντικάς κα αβέλ πο ζουρανί τουμαρί-ντα πίστη καζόμ σκεφτίνενα λατσσές σο κερντάς ο Ιεχωβά πι λαόσκε ντα σο κερντάς τουμένγκε.

19. Καβά ισί εκ γιαβέρ τρόπος σο ντικχάσα λατσσιπέ άμα νακχάσα σαάτι ι Ιεχωβάσαρ;

¹⁹ Τέταρτον, ντα πο σημαντικός, τουμαρό μανγκιπέ ι Ιεχωβάσκε κα αβέλ ατζέ πο μπαρό. Ο μανγκιπέ, πο μπουτ σαρέ κατά γιαβερά ιδιότητες, κα τσσίντελ-τουμέν τι ντεν καν κο Ιεχωβά, τι κερέν θυσίες για τι κερέν λέσκο γκι ντα τι νταϊντίνεν καγιά-ντα δυσκολία κα αβέλ τουμένγκε. (Ματθ. 22:​37-39· 1 Κορ. 13:4, 7· 1 Ιωάν. 5:3) Τίποτα ναστί αβέλα πο σημαντικός κατά λατσσί φιλία ι Ιεχωβάσαρ σο ντέλα-λα αμέντε μανγκιμάσαρ!​—Ψαλμ. 63:​1-8.

20. Σο κα κερέν για μα τι χαλαβέν γιαβερτθέ ο σαάτι σο νακχένα ι Ιεχωβάσαρ;

²⁰ Ντεν-τουμέν γκοντί ότι κάνα κερένα προσευχή, σικλιαρένα-τουμέν κατά Γραφή ντα σκεφτίνενα λατσσές οντουλά σο σικλιόνα, ντένα λατρεία ι Ιεχωβάς. Σαρ ο Ιησούς, αρακχέν εκ ήσυχος τθαν για τι νακχέν σαάτι ι Ιεχωβάσαρ. Μα τθερέν τουμαρί γκοντί γιαβερτθέ. Μανγκέν κατά Ιεχωβά τι βοηθίνελ-τουμέν μα τι πφιρέλ τουμαρί γκοντί κάνα κερένα πράγματα Λέσκε. Άμα χρησιμοποιήνενα καζόμ πο λατσσές αβέλα-πες τουμαρό σαάτι ακανά, ο Ιεχωβά κα ευλογίνελ σαρέ οντουλά σο κερένα ντα κα τθερέν ζωή για πάντα κο νεβό ντουνιάς.​—Μάρκ. 4:24.