1, 2. Καλά δυσκολίες μπορεί τι νακχέν μερικοί πιστοί υπηρέτες ι Ιεχωβάσκε;

 ΕΚ ΜΠΟΥΤ μπέτι πράγμας μπορίνελα τι αλλάνελ αμαρί ζωή αντρέ σε εκ στιγμή. Για παράδειγμας, εκ πιστός πφραλ, ο Λουίς, a σικλιλό ότι τθερέλας εκ σπάνιος καρκίνος. Ο γιατρός βακερντάς λέσκε ότι κα τζουβντιόλας σάντε χάνικ μασεκά ατζέκ. Η Μόνικα ντα λάκο ρομ κερένας γιεκ μπουτ πράγματα ι Ιεχωβάσκε. Αλλά εκ ντιβές, η Μόνικα σικλιλί ότι λάκο ρομ, σο ισινέ πρεσβύτερος, κερέλας-πες ανγκλάλ κο γιαβερά ότι υπηρετίνελας ι Ιεχωβάς αλλά αποτσοράλ κερέλας μπέτι πράγματα για μπουτ μπρεσά. Η Ολίβια, εκ μπίπαντριμε πφεν, έπρεπε τι νασέλ πι κχερέσταρ επειδή κα αβέλας εκ μπαρό τυφώνας. Κάνα βουρτισάλι, λάκο κχερ καταστραφισάλοας. Αντρέ σε εκ στιγμή, η ζωή ανταλέ τζενένγκι αλλαξάλι ντιπ. Μήπως αβιλό-πες τουμένγκε-ντα κάτι μπουτ μπέτι σο αλλαντάς ξαφνικά τουμαρί ζωή;

² Παρόλο σο ισινάμ πιστοί υπηρέτες ι Ιεχωβάσκε, νακχάσα προβλήματα ντα νασφαλίματα σο νακχένα σαρέ ο τζενέ. Εκτός ανταλένταρ, μπορεί τι τζαν αμέντζαρ κόντρα ο τζενέ σο μισίνενα ι Ντεβλέσκε λαός. Παρόλο σο ο Ιεχωβά να σταματίνελα ανταλά προβλήματα, ντέλα πο λάφι τι βοηθίνελ-αμέν. (Ησ. 41:10) Λέσκε βοηθειάσαρ, μπορίνασα τι ατσσικιαράς αμαρί χαρά, τι λας λατσσέ αποφάσεις ντα τι ατσσάς αφοσιωμέ λέστε ατζέ-ντα κο δύσκολες καταστάσεις. Ανταλέ μαθημάστε, κα ντικχάς σταρ τρόπους σο ο Ιεχωβά βοηθίνελα-αμέν κάνα ο πράγματα αμαρέ ζωγιάτε ισί μπουτ μπέτι. Κα ντικχάς επίσης σο χρειαζίντιβελα τι κεράς για τι ντικχάς λατσσιπέ κατά βοήθεια σο ντέλα-αμέν.

 Ο ΙΕΧΩΒΑ ΚΑ ΑΡΑΚΧΑΒΕΛ-ΤΟΥΜΕΝ

3. Κάνα νακχάσα κάτι μπουτ μπέτι, σο μπορεί τι δυσκολίντιβας τι κεράς;

³ Η δυσκολία. Κάνα νακχάσα κάτι μπουτ μπέτι, μπέκιμ δυσκολίντιβασα τι σκεφτίνας καθαρά ντα τι λας αποφάσεις. Σόσκε; Επειδή μπέκιμ νιωθίνασα μπαρί ντουκχ ντα ανησυχία. Μπορεί τι νιωθίνας σαρ τι αβάς αντρέ κι ομίχλη χωρίς τι τζανάς κατέ τι τζας. Ντικχέν σαρ νιωθίνενας ο ντούι πφενιά, σο βακερντάμ λένγκε πο οπρέ, κάνα νακχένας πουμαρέ δοκιμασίες. Η Ολίβια βακερέλα: «Κάνα ο τυφώνας περαντάς μο κχερ, νιωθίναβας σαρ χαμέ ντα να τζανάβας σο τι κεράβ». Η Μόνικα βακερέλα σαρ νιωθίνελας κάνα λάκο ρομ προδοντάς-λα: «Να νιωθίναβας σάντε απογοητευμέ. Νιωθίναβας σαρ τι ντινέας-μαν τσσουριάσαρ. Ισινέ δύσκολος μάνγκε τι κεράβ ατζέ-ντα ο πο απλά πράγματα ι κάθε ντιβεσέσκε. Ποτές να νακχλόας μι γκοντιάταρ ότι κα αβέλας-πες ανταβά μάνγκε». Ο Ιεχωβά ντέλα πο λάφι ότι κα βοηθίνελ-αμέν κάνα αμαρέ δοκιμασίες ισί μπουτ πφαρέ αμένγκε. Σαρ;

4. Σο ντέλα ο Ιεχωβά πο λάφι τι κερέλ, σαρ βακερένα ο εδάφια Φιλιππησίους 4:6, 7;

⁴ Σο κερέλα ο Ιεχωβά. Ντέλα πο λάφι τι ντελ-αμέν ι «ειρήνη ι Ντεβλέσκι», σαρ βακέρντιβελα κι Αγία Γραφή. (Διαβάνεν Φιλιππησίους 4:6, 7) Ανταγιά ειρήνη ισί η ηρεμία σο νιωθίνασα αντρέ αμαρέ γκίστε ντα αμαρέ γκοντιάτε επειδή ισινάμ λατσσέ αμαλά ι Ιεχωβάσαρ. Ανταγιά ειρήνη “ισί πο οπρέ σαρέ οντουλένταρ σο αγαβάσα”. Ισί πο σουκάρ σαρέ οντουλένταρ σο μπορίνασα τι σκεφτίνας. Για παράδειγμας, κερντέν ποτές προσευχή κο Ιεχωβά αντράλ τουμαρέ γκίσταρ ντα σοράν σαστισάλεν επειδή νιωσάλεν μπαρί ηρεμία; Ανταβά αίσθημας ισί «η ειρήνη ι Ντεβλέσκι».

5. Σαρ αρακχαβέλα η ειρήνη ι Ντεβλέσκι αμαρί γκοντί ντα αμαρό γκι;

⁵ Ανταλά εδάφια βακερένα επίσης ότι η ειρήνη ι Ντεβλέσκι «κα αρακχαβέλ τουμαρό γκι ντα τουμαρί γκοντί». Ο πουρανό μπαλαμανό λάφι φρουρέω, σο ατθέ μεταφράντιβελα «αρακχαβέλ», ισινέ εκ λάφι σο βακερένας-λες κάνα ο φρουροί, δηλαδή ο στρατιώτες, αρακχαβένας εκ πόλη για τι αβέλ ασφαλής κατά επιθέσεις. Ο τζενέ σο μπεσένας σε εκ ασακί πόλη σοβένας ήσυχοι, επειδή τζανένας ότι υπαρχίντιβενας στρατιώτες κο μπαρέ πόρτες. Αντικάς-ντα, κάνα η ειρήνη ι Ντεβλέσκι αρακχαβέλα αμαρό γκι ντα αμαρί γκοντί, νιωθίνασα ήρεμοι επειδή τζανάσα ότι ισινάμ ασφαλείς. (Ψαλμ. 4:8) Ατζέ-ντα άμα αμαρί κατάσταση να κα αλλάνελ αμέσως, μπορίνασα πάλι τι νιωθίνας ειρήνη, σαρ αβιλό-πες με την Άννα σο ισί κι Γραφή. (1 Σαμ. 1:16-18) Ντα κάνα νιωθίνασα ήρεμοι, ο πο μπουτ φαρ ισί αμένγκε πο εύκολος τι σκεφτίνας καθαρά ντα τι λας γκοντιαβέρ αποφάσεις.

6. Σο μπορίνασα τι κεράς για τι βοηθίντιβας κατά ειρήνη ι Ντεβλέσκι; (Ντικχέν ι φωτογραφία-ντα)

⁶ Σο χρειαζίντιβελα τι κεράς αμέν. Σαρ ο τζενέ σο μπεσένας σε εκ πόλη ντένας βίκος ι  στρατιωτέν για τι αρακχαβέν-λεν, αντικάς αμέν-ντα μπορίνασα τι μανγκάς κατά Ιεχωβά τι αρακχαβέλ-αμέν. Σαρ; Τι προσευχίντιβας μέχρι τι νιωθίνας ι ειρήνη ι Ντεβλέσκι. (Λουκ. 11:9· 1 Θεσ. 5:17) Ο Λουίς, σο βακερντάμ λέσκε πο οπρέ, εξηγιντάς σαρ βοβ ντα λέσκι ρομνί, η Άνα, μπορισάλε τι νταϊντίνεν κάνα σικλιλέ ότι κα τζουβντιόλας ατζέ χάνικ μασεκά. Ο Λουίς βακερντάς: «Σε εκ ασακί στιγμή, ισί μπουτ δύσκολος τι λες αποφάσεις σο τθερένα τι κερέν τι υγειάσαρ ντα γιαβερέ πραγματέντζαρ. Αλλά η προσευχή βοηθιντάς-αμέν μπουτ τι τθεράς ειρήνη σαρέ ανταλέντε σο νακχάσα». Ο Λουίς ντα λέσκι ρομνί βακερντέ ότι προσευχίντιβενας αντράλ πουμαρέ γκίσταρ ντα μπουτ φαρ, καζόμ μανγκένας κατά Ιεχωβά τι ντελ-λεν ειρήνη κι γκοντί, ήρεμος γκι ντα σοφία για τι λεν λατσσέ αποφάσεις. Ντα νιωθίνενας ότι ο Ιεχωβά βοηθίνελας-λεν. Άμα νακχένα κάτι μπουτ δύσκολος, μα τσσιναβέν τι κερέν προσευχή, ντα κα νιωθίνεν ι ειρήνη ι Ιεχωβάσκι τι αρακχαβέλ τουμαρό γκι ντα τουμαρί γκοντί.​—Ρωμ. 12:12.

Ο ΙΕΧΩΒΑ ΚΑ ΚΕΡΕΛ-ΤΟΥΜΕΝ ΣΤΑΘΕΡΟΥΣ

7. Σο μπορεί τι νιωθίνας κάνα νακχάσα εκ πφαρί δοκιμασία;

⁷ Η δυσκολία. Κάνα νακχάσα εκ πφαρί δοκιμασία, οντουλά σο νιωθίνασα, σκεφτίνασα ντα κεράσα μπορεί μα τι αβέν αζόμ ισορροπημέ καζόμ ισινέ ανγκλέ. Σαρ εκ καράβι σε εκ μπαρί φουρτούνα γκερένα-λες ο κύματα εκ ακατάρ εκ οκουτάρ, αντικάς μπορεί τι νιωθίνας ότι αμαρέ αισθήματα-ντα γκερένα-αμέν εκ ακατάρ εκ οκουτάρ. Η Άνα βακερντάς ότι νιωσάλι μπουτ διαφορετικά αισθήματα κάνα μουλό ο Λουίς. Βόι βακερντάς: «Μερικές φορές, νιωθίναβας τσουτσί αντρέ μάντε ντα αρχίναβας τι τζιτζίναβ μι νεαυτόσκε. Αλλά νιωθίναβας χολί-ντα επειδή μουλόας ο Λουίς». Επίσης, η Άνα νιωθίνελας κορκορί ντα ισινέ απογοητευμέ επειδή έπρεπε τι λελ αποφάσεις πραγματένγκε σο ο Λουίς κερέλας-λεν μπουτ λατσσές. Μπάζιμα, νιωθίνελας σαρ τι αβέλας αντρέ εκχέ ντεριαβάτε σο τθερέλας μπαρέ κύματα. Σαρ βοηθίνελα-αμέν ο Ιεχωβά κάνα αρχίνασα τι νιωθίνας ασακέ συναισθήματα;

8. Καγιά σιγουριά ντέλα-αμέν ο Ιεχωβά, σαρ βακερέλα ο εδάφιος Ησαΐας 33:6;

⁸ Σο κερέλα ο Ιεχωβά. Ντέλα-αμέν ι σιγουριά ότι κα κερέλ-αμέν σταθερούς. (Διαβάνεν Ησαΐας 33:6) Κάνα ισί εκ μπαρί φουρτούνα, εκ καράβι μπορεί τι αρχίνελ τι κουνιάντιβελ επικίνδυνα εκ ακατάρ εκ οκουτάρ. Για τι ατσσόλ σταθερός, ο καράβι μπορεί τι τθερέλ πτερύγια σο ισί αντρέ κο πανί ντα νικιόνα κάνα ισί κίνδυνος. Ανταλά πτερύγια βοηθίνενα ο καράβι μα τι κουνιάντιβελ αζόμ μπουτ. Ανταλέ τροπόσαρ, ο τζενέ κο καράβι ισί πο ασφαλείς ντα λένγκο ταξίδι ισί πο άνετος. Αλλά ανταλά πτερύγια βοηθίνενα πο μπουτ κάνα ο καράβι τσσίντελα ανγκλάλ. Αντικάς-ντα, ο Ιεχωβά κα κερέλ-αμέν σταθερούς άμα τσσίντασα ανγκλάλ δύσκολε ντιβεσέντε.

9. Σαρ βοηθίνενα-αμέν τι ατσσικιαράς αμαρί ισορροπία ο εργαλεία για τι ρόντας; (Ντικχέν ι φωτογραφία-ντα)

 ⁹ Σο χρειαζίντιβελα τι κεράς αμέν. Κάνα τουμαρέ συναισθήματα κερένα-τουμέν τι νιωθίνεν σαρ εκ καράβι σε εκ μπαρί φουρτούνα, τι κερέν ο πο λατσσό σο μπορίνενα για τι ατσσικιαρέν τουμαρό πνευματικός πρόγραμμας. Ισί μπαγιά ότι να κα μπορίνεν τι κερέν αζόμ μπουτ πράγματα καζόμ κερένας ανγκλέ, αλλά τι ντεν-τουμέν γκοντί ότι ο Ιεχωβά ισί λογικός. (Ντικχέν Λουκάς 21:1-4) Επίσης, ντεν τουμαρέ σαατίσταρ για τι σικλιαρέν-τουμέν κατά Γραφή ντα τι σκεφτίνεν λατσσές οντουλά σο διαβάνενα. Σόσκε; Αντράλ πι οργανωσιάταρ, ο Ιεχωβά ντινάς-αμέν μπουτ σουκάρ πληροφορίες κατά Γραφή σο βοηθίνενα-αμέν τι ατσσικιαράς αμαρί ισορροπία. Για τι αρακχέν ανταβά σο χρειαζίντιβενα, μπορίνενα τι χρησιμοποιήνεν ο εργαλεία για τι ρόντας σο υπαρχίντιβενα τουμαρέ τσσιμπάτε, σαρ ισί η εφαρμογή JW Library^®, ο Ευρετήριο Εκδόσεων Σκοπιάς ντα ο Οδηγός Έρευνας για τους Μάρτυρες του Ιεχωβά. Η Μόνικα βακερντάς ότι χρησιμοποιήνελας ανταλά εργαλεία για τι αρακχέλ συμβουλές κάνα νιωθίνελας ότι λάκε αισθήματα κερένας-λα τι νιωθίνελ φουρτούνα αντρέ πέστε. Για παράδειγμας, ρόντελας ο λάφι «χολί». Γιαβερά φαρ, ρόντελας ο λάφι «προδοντάς» ή ο λάφι «αφοσίωση». Σοράν, διαβάνελας μέχρι τι νιωθίνελ πο λατσσές. Βόι βακερντάς: «Κάνα αρχίναβας τι ρόνταβ, ισινόμας μπουτ πιεσμέ. Αλλά καζόμ διαβάναβας, νιωθίναβας σαρ τι λέλας-μαν ο Ιεχωβά ανγκάλι. Ντικχάβας ότι ο Ιεχωβά αγαβέλας ο διαφορετικά αισθήματα σο νιωθίναβας ντα βοηθίνελας-μαν». Επειδή ο Ιεχωβά ντέλα-τουμέν ανταγιά βοήθεια, μπορίνενα τουμέν-ντα τι ατσσικιαρέν τουμαρί ισορροπία μέχρι τι ερεσέν πο ήρεμε πανίντε.​—Ψαλμ. 119:143, 144.

Ο ΙΕΧΩΒΑ ΚΑ ΣΤΗΡΙΝΕΛ-ΤΟΥΜΕΝ

10. Σαρ μπορεί τι νιωθίνας σοράν από εκ μπουτ μπέτι πράγμας;

¹⁰ Η δυσκολία. Σοράν από εκ μπουτ μπέτι πράγμας, μπέκιμ υπαρχίντιβενα ντιβεσά σο νιωθίνασα ότι νανέ-αμέν ζορ αμαρέ σωμάστε ντα αμαρέ γκίστε. Μπέκιμ νιωθίνασα σαρ εκ ντινό αθλητής σο ανγκλέ τθάβντελας σουγκό αλλά ακανά μπανγκιόλα. Μπέκιμ δυσκολίντιβασα τι κεράς πράγματα σο ανγκλέ κεράας-λεν εύκολα. Μπέκιμ να τθεράσα όρεξη τι ασχολίντιβας πραγματέντζαρ σο ανγκλέ μπεϊντίναας-λεν μπουτ. Σαρ ο Ηλίας, μπέκιμ νιωθίνασα ότι ισί μπουτ δύσκολος τι ιστιάς. Μανγκάσα απλώς τι σοβάς. (1 Βασ. 19:5-7) Σο ντέλα πο λάφι τι κερέλ ο Ιεχωβά κάνα νιωθίνασα μπίζουρανε;

11. Καλέ γιαβερέ τροπόσαρ βοηθίνελα-αμέν ο Ιεχωβά; (Ψαλμός 94:18)

¹¹ Σο κερέλα ο Ιεχωβά. Ντέλα πο λάφι τι στηρίνελ-αμέν. (Διαβάνεν Ψαλμός 94:18) Σαρ εκ ντινό αθλητής χρειαζίντιβελα στήριξη για  τι πφιρέλ, αντικάς αμέν-ντα μπέκιμ χρειαζίντιβασα βοήθεια για τι συνεχίνας τι ατσσάς απασχολημέ ι Ιεχωβάσκε πραγματέντζαρ. Ασακέ σαατίντε, ο Ιεχωβά ντέλα-αμέν ι σιγουριά: «Με, ο Ιεχωβά το Ντεβέλ, ασταράβα σικίς το δεξίς βας ντα βακεράβα τούκε: “Μα ντάρα. Με κα βοηθίναβ-τουτ”». (Ησ. 41:13) Ο βασιλιάς Δαβίδ νιωσάλο ανταγιά βοήθεια. Κάνα νακχλάς δοκιμασίες ντα δυσκολίες πι ντουσμανίνταρ, βακερντάς κο Ιεχωβά: «Το δεξίς βας στηρίνελα-μαν». (Ψαλμ. 18:35) Αλλά σαρ στηρίνελα-αμέν ο Ιεχωβά;

12. Κας μπορίνελα τι χρησιμοποιήνελ ο Ιεχωβά για τι βοηθίνελ-αμέν κάνα ισινάμ μπίζουρανε;

¹² Μπουτ φαρ, ο Ιεχωβά στηρίνελα-αμέν κάνα τσσίντελα γιαβερέν τι βοηθίνεν-αμέν. Για παράδειγμας, εκ φαρ σο ο Δαβίδ νιωθίνελας μπίζουρανο, λέσκο αμάλ ο Ιωνάθαν γκιλό τι ντικχέλ-λες για τι στηρίνελ-λες ντα τι ντελ-λες ζορ. (1 Σαμ. 23:16, 17) Αντικάς-ντα, ο Ιεχωβά τραμπιντάς τον Ελισαιέ για τι ντελ βοήθεια κο Ηλίας. (1 Βασ. 19:16, 21· 2 Βασ. 2:2) Αντιβές, ο Ιεχωβά μπορίνελα τι χρησιμοποιήνελ αμαρί φαμιλί, αμαρέ αμαλέν ή ι πρεσβυτερόν για τι στηρίνελ-αμέν. Όμως, κάνα ισινάμ στεναχωριμέ, μπέκιμ ατσσάσα ντουρ κατά γιαβερά. Μανγκάσα απλώς τι ατσσάς κορκορέ. Ανταβά ισί κάτι φυσιολογικός. Σο μπορίνασα τι κεράς για τι στηρίνελ-αμέν ο Ιεχωβά;

13. Σο χρειαζίντιβελα τι κεράς για τι βοηθίντιβας κατά στήριξη ι Ιεχωβάσκι; (Ντικχέν ι φωτογραφία-ντα)

¹³ Σο χρειαζίντιβελα τι κεράς αμέν. Τι προσπαθίνεν μπουτ μα τι τσσίντεν-τουμέν ντουρ κατά γιαβερά. Κάνα τσσίντασα-αμέν ντουρ κατά γιαβερά, μπουτ φαρ να σκεφτίνασα καθαρά, ντα ντικχάσα σάντε αμαρό νεαυτός ντα ο προβλήματα σο νακχάσα αμέν. Ανταβά τρόπος σκέψης μπορίνελα τι επηρεάνελ αμαρέ αποφάσεις. (Παρ. 18:1) Σίγουρα, σαρέ χρειαζίντιβασα μπάζιμα τι ατσσάς κορκορέ, ειδικά κάνα νακχάσα κάτι μπουτ μπέτι. Όμως, άμα κα τσσίντας-αμέν ντουρ κατά γιαβερά για μπουτ βακίτι, μπορεί τι κεράς πέρα ο τρόπος σο χρησιμοποιήνελα ο Ιεχωβά για τι στηρίνελ-αμέν. Οτθάρ, κάνα νακχένα μπαρέ στεναχώριες, καζόμ δύσκολος-ντα τι αβέλ, τι δεχτίνεν ι βοήθεια τουμαρέ φαμιλιάκι, τουμαρέ αμαλένγκι ντα ι πρεσβυτερόνγκι. Τι ντικχέν-λεν σαρ ο τρόπος σο χρησιμοποιήνελα ο Ιεχωβά για τι στηρίνελ-τουμέν.​—Παρ. 17:17· Ησ. 32:1, 2.

Ο ΙΕΧΩΒΑ ΚΑ ΛΟΚΧΙΑΡΕΛ ΤΟΥΜΑΡΟ ΓΚΙ

14. Καλά πράγματα κα μπορίνενας τι ανέν αμένγκε νταρ;

¹⁴ Η δυσκολία. Ισί φαρ σο μπορεί τι νιωθίνας μπαρί νταρ. Κι Αγία Γραφή, πιστοί υπηρέτες ι Ντεβλέσκε βακερντέ ότι μερικές φορές νιωσάλε στεναχώρια ντα νταρ επειδή λένγκε ντουσμάνια ή γιαβερά πράγματα πιένενας-λεν. (Ψαλμ. 18:4· 55:1, 5) Μπορεί αμέντζαρ-ντα τι τζαν κόντρα  αμαρέ συμμαθητές, ο τζενέ σο κεράσα λέντζαρ μπουτί, αμαρί φαμιλί ή η κυβέρνηση. Ή μπορεί τι νταράς ότι κα μεράς επειδή τθεράσα εκ πρόβλημας υγείας. Ασακέ βακιτίντε, μπέκιμ τι νιωθίνας ότι ισινάμ σαρ μαξίμια σο να τθερένα βοήθεια. Σαρ βοηθίνελα-αμέν ο Ιεχωβά κάνα νιωθίνασα αντικάς;

15. Καγιά σιγουριά ντέλα-αμέν ο εδάφιος Ψαλμός 94:19;

¹⁵ Σο κερέλα ο Ιεχωβά. Βοβ λοκχιαρέλα ντα γαλίνελα αμαρό γκι. (Διαβάνεν Ψαλμός 94:19) Ανταβά ψαλμός μπέκιμ ανέλα αμαρέ γκοντιάτε εκχέ χουρντέ τσσαγιά σο νταρέλα ντα να μπορίνελα τι σοβέλ επειδή αβρί υπαρχίντιβελα εκ μπαρί καταιγίδα. Ανέν τουμαρέ γκοντιάτε ανταλέ τσσαγιάκε νταντές τι τσσουβέλ-πες κο δωμάτιος ντα τι λελ-λα ανγκάλι μέχρι τι ασταρέλ-λα λίντρα. Παρόλο σο η καταιγίδα συνεχίνελα, η χουρντί νιωθίνελα αρακχαντί ντα λοκχιόλα λάκο γκι πι νταντέσκε ανγκαλιάτε. Κάνα νακχάσα δοκιμασίες σο ανένα αμένγκε νταρ, μπέκιμ τθεράσα ι ανάγκη τι λελ-αμέν ανγκάλι αμαρό ουράνιος Ντατ μέχρι τι νιωθίνας πο ήρεμοι. Σαρ μπορίνασα τι λας ανταγιά παρηγοριά κατά Ιεχωβά;

16. Σο μπορίνασα τι κεράς για τι λοκχιαρέλ ο Ιεχωβά αμαρό γκι; (Ντικχέν ι φωτογραφία-ντα)

¹⁶ Σο χρειαζίντιβελα τι κεράς αμέν. Τι νακχέν σαάτι συνέχεια ι Ιεχωβάσαρ​—τι προσευχίντιβεν λέστε ντα τι διαβάνεν λέσκο Λάφι. (Ψαλμ. 77:1, 12-14) Άμα κερένα-λες ανταβά, αζομάν ο πρώτος πράγμας σο κα κερέν κάνα ισινέν πιεσμέ ισί τι μανγκέν βοήθεια τουμαρέ ουράνιε Νταντέσταρ. Τι βακερέν κο Ιεχωβά οντουλά σο νταραβένα-τουμέν ντα ανησυχίνενα-τουμέν. Τι μουκχέν-λες τι κερέλ τουμένγκε λάφι ντα τι λοκχιαρέλ τουμαρό γκι αντράλ κατά Γραφή. (Ψαλμ. 119:28) Μπέκιμ κα ντικχέν ότι μερικές ιστορίες κατά Γραφή λοκχιαρένα μπουτ τουμαρό γκι κάνα νταρένα. Για παράδειγμας, μπορίνενα τι λεν ζορ κατά βιβλία Ιώβ, Ψαλμοί ντα Παροιμίες, ντα κατά λάφια ι Ιησούσκε σο ισί κο Ματθαίος, κεφάλαιος 6. Καζόμ προσευχίντιβενα κο Ιεχωβά ντα διαβάνενα λέσκο Λάφι, βοβ κα λοκχιαρέλ τουμαρό γκι.

17. Καλέ πραγμάσκε μπορίνασα τι αβάς σίγουροι;

¹⁷ Μπορίνασα τι αβάς σίγουροι ότι ο Ιεχωβά κα αβέλ οτθέ αμένγκε κάνα αβένα-πες μπέτι πράγματα αμαρέ ζωγιάτε. Ποτές να κα αβάς κορκορέ. (Ψαλμ. 23:4· 94:14) Ο Ιεχωβά ντέλα πο λάφι τι αρακχαβέλ-αμέν, τι κερέλ-αμέν σταθερούς, τι στηρίνελ-αμέν ντα τι λοκχιαρέλ αμαρό γκι. Ο εδάφιος Ησαΐας 26:3 βακερέλα σο κα κερέλ ο Ιεχωβά: «Κα αρακχαβές οντουλέν σο στηρίντιβενα σαρέ πουμαρέ γκίσαρ τούτε· κα ντες-λεν ειρήνη σο ατσσόλα για πάντα, επειδή τθερένα εμπιστοσύνη τούτε». Οτθάρ, τι σικαβέν εμπιστοσύνη κο Ιεχωβά ντα τι κερέν ο πο λατσσό σο μπορίνενα για τι ντικχέν λατσσιπέ κατά βοήθεια σο ντέλα-τουμέν. Άμα κα κερέν-λες ανταβά, κα αρακχέν πάλι τουμαρί ζορ ατζέ-ντα δύσκολε ντιβεσέντε.