1. Καβά δύσκολος πράγμας πρέπει τι κεράς σαρέ;

 ΚΑΘΕ ΝΤΙΒΕΣ χρειαζίντιβελα τι λας αποφάσεις. Μερικές αποφάσεις ισί εύκολος τι λας-λεν, σαρ για παράδειγμας σο κα χας ή κάνα κα τζας τι σοβάς. Ενώ γιαβερά αποφάσεις ισί πο δύσκολες. Μπορεί τι επηρεάνεν αμαρί υγεία, αμαρέ αγαπημέ τζενέν, ή ι λατρεία σο ντάσα κο Ιεχωβά. Μανγκάσα αμαρέ αποφάσεις τι κερέν λατσσιπέ εμ αμένγκε εμ αμαρέ φαμιλιάκε. Ο πο σημαντικός ισί ότι μανγκάσα αμαρέ αποφάσεις τι κερέν ι Ιεχωβάσκο γκι.​—Ρωμ. 12:1, 2.

2. Καλά πράγματα κα βοηθίνεν-τουμέν τι λεν γκοντιαβέρ αποφάσεις;

² Κα μπορίνεν τι λεν γκοντιαβέρ αποφάσεις (1) άμα σικλιόνα σαρ ισί μπαγιά ο πράγματα, (2) άμα μπεσένα τι ντικχέν καγιά ισί η άποψη ι Ιεχωβάσκι ι θεμάσκε, ντα (3) άμα σκεφτίνενα λατσσές καλά επιλογές τθερένα. Ανταλέ μαθημάστε κα ντικχάς ανταλά τριν πράγματα, ντα κα βοηθίνελ-αμέν τι σικλιαράς αμαρό νεαυτός τι αγαβέλ σαρ ισί μπαγιά ο πράγματα.​—Παρ. 2:11.

ΣΙΚΛΙΟΝ ΣΑΡ ΙΣΙ ΜΠΑΓΙΑ Ο ΠΡΑΓΜΑΤΑ

3. Σικαβέν εκχέ παραδειγμάσαρ σόσκε χρειαζίντιβελα τι σικλιόν σαρ ισί μπαγιά ο πράγματα πριν τι λεν εκ απόφαση.

³ Ο πρώτος πράγμας σο πρέπει τι κερέν για τι λεν εκ λατσσί απόφαση ισί τι σικλιόν σαρ ισί μπαγιά ο πράγματα. Σόσκε ισί σημαντικός ανταβά; Σκεφτίνεν εκχέ τζενές σο τζάλα κο γιατρός επειδή τθερέλα εκ μπαρό πρόβλημας υγείας. Κα ντέλας-λες ο γιατρός φάρμακα χωρίς πρώτα τι εξετάνελ-λες ή τι κερέλ λέσκε ερωτήσεις; Σίγουρα όχι. Τουμέν-ντα κα μπορίνεν τι λεν πο λατσσέ αποφάσεις άμα πρώτα σικλιόνα λατσσές σαρ ισί μπαγιά ο πράγματα σο τθερένα τι κερέν ι θεμάσαρ σο απασχολίνελα-τουμέν. Σαρ κα μπορίνεν τι κερέν-λες ανταβά;

4. Σαρ βακερέλα ο εδάφιος Παροιμίες 18:13, σαρ μπορίνασα τι αβάς σίγουροι ότι τζανάσα σαρ ισί μπαγιά ο πράγματα; (Ντικχέν ι φωτογραφία-ντα)

⁴ Ο πο μπουτ φαρ, για τι σικλιόν σαρ ισί μπαγιά ο πράγματα  μπορίνενα τι κερέν ερωτήσεις. Για παράδειγμας, βακερέν ότι ισινέν καλεσμέ εκχέ παρεάτε. Πρέπει τι τζαν; Άμα να τζανένα λατσσές οντουλές σο κερέλα ι παρέα ή σο κανονίντιλο τι αβέλ-πες, κα χρειαζίντιβελ τι πουτσέν-λες: «Κατέ ντα κάνα κα αβέλ η παρέα; Καζόμ τζενέ κα αβέν; Κον κα προσοχίνελ ότι σαρέ ο πράγματα κα τζαν λατσσές; Καλά τζενέ κα αβέν; Σο κα κεράς; Κα υπαρχίντιβελ αλκοόλ;» Ο απαντήσεις ανταλέ ερωτησιέντε κα βοηθίνεν-τουμέν τι λεν εκ γκοντιαβέρ απόφαση.​—Διαβάνεν Παροιμίες 18:13.

5. Αφού κα σικλιόν σαρ ισί μπαγιά ο πράγματα, σο πρέπει τι κερέν σοράν;

⁵ Σοράν, αφού κα σικλιόν σαρ ισί μπαγιά ο πράγματα, σκεφτίνεν λατσσές σαρί ι κατάσταση. Για παράδειγμας, σο κα κερέν άμα κα σικλιόν ότι κα υπαρχίντιβεν μερικά τζενέ σο να ακολουθίνενα ο αρχές ι Γραφιάκε; Ή σο κα κερέν άμα κα σικλιόν ότι κα ντιντιόλ αλκοόλ χωρίς τι υπαρχίντιβελ τζενό σο κα προσοχίνελ μα τι πιν μπουτ οντουλά σο ισί κι παρέα; Σκεφτίνενα ότι μπέκιμ τι αβέν-πες πράγματα κι παρέα σο κα νακχαβέν ο όρια; (1 Πέτρ. 4:3) Επίσης, σο κα κερέν άμα ο σαάτι σο ισί κανονισμέ η παρέα περέλα ο ίδιος σαάτι σο τθερένα συνάθροιση ή έργος; Κάνα σκεφτίνενα λατσσές σαρί ι κατάσταση, κα αβέλ πο εύκολος τουμένγκε τι λεν εκ λατσσί απόφαση. Όμως υπαρχίντιβελα κάτι ατζέκ σο πρέπει τι σκεφτίνεν. Τζανένα σαρ νιωθίνενα τουμέν για την κατάσταση. Αλλά πουτσέν τουμαρό νεαυτός: “Σαρ νιωθίνελα ο Ιεχωβά ανταλέσκε;”​—Παρ. 2:6.

 ΜΠΕΣΕΝ ΝΤΑ ΝΤΙΚΧΕΝ ΚΑΓΙΑ ΙΣΙ Η ΑΠΟΨΗ Ι ΙΕΧΩΒΑΣΚΙ

6. Σαρ βακερέλα ο εδάφιος Ιακώβου 1:5, σόσκε πρέπει τι μανγκάς κατά Ιεχωβά αντράλ κατά προσευχή τι βοηθίνελ-αμέν;

⁶ Μανγκέν κατά Ιεχωβά τι βοηθίνελ-τουμέν τι αγαβέν καγιά ισί λέσκι άποψη εκχέ θεμάσκε. Ο Ιεχωβά σίγουρα κα ντελ-αμέν ι σοφία τι αγαβάς άμα εκ συγκεκριμέ απόφαση κα κερέλ λέσκο γκι. Ντέλα ασακί σοφία «αντράλ πι γκίσταρ ντα χωρίς τι ρόντελ λάθη καεκχέστε».​—Διαβάνεν Ιακώβου 1:5.

7. Σαρ μπορίνενα τι σικλιόν καγιά ισί η άποψη ι Ιεχωβάσκι εκχέ θεμάσκε; Βακερέν εκ παράδειγμας.

⁷ Αφού κα προσευχίντιβεν κο Ιεχωβά για τι σικαβέλ τουμένγκε σο τι κερέν, ντεν προσοχή για τι αγαβέν καγιά ισί λέσκι απάντηση. Φιρειπείν: Άμα κα τζάνας ταξίδι ντα κα χασαρένας τουμαρό ντρομ, μπέκιμ τι πουτσένας εκχέ τζενές σο τζουβντιόλα οτθέ για τι βοηθίνελ-τουμέν. Αλλά μήπως κα νασένας πριν τι ντελ-τουμέν οδηγίες ο τζενό; Σίγουρα όχι. Πρέπει τι ασουνέν προσεκτικά οντουλά σο κα βακερέλ τουμένγκε. Αντικάς, αφού κα μανγκέν κατά Ιεχωβά τι ντελ-τουμέν σοφία, προσπαθίνεν τι αγαβέν αντράλ κατά νόμοι ντα κατά αρχές ι Γραφιάκε καγιά ισί λέσκι απάντηση κο θέμας σο απασχολίνελα-τουμέν. Για παράδειγμας, κάνα αποφασίνενα άμα κα τζαν κι παρέα σο βακερντάμ πο οπρέ, μπορίνενα τι σκεφτίνεν σο βακερέλα η Γραφή για το γλέντια χωρίς όρια, για το μπέτι παρέες, ντα ότι χρειαζίντιβελα τι τσσουβάς ι Ντεβλέσκι Βασιλεία πο οπρέ οντουλένταρ σο κα μανγκάας τι κεράς αμέν.​—Ματθ. 6:33· Ρωμ. 13:13· 1 Κορ. 15:33.

8. Σο μπορίνενα τι κερέν άμα χρειαζίντιβενα βοήθεια για τι αρακχέν ο πληροφορίες σο μανγκένα; (Ντικχέν ι φωτογραφία-ντα)

 ⁸ Επίσης, μερικές φορές μπορεί τι χρειαζίντιβεν βοήθεια για τι αρακχέν ο πληροφορίες σο μανγκένα. Μπορίνενα τι λεν συμβουλές εκχέ πφραλέσταρ ή εκχέ πφενιάταρ σο ισί μπρεσά κι αλήθεια. Όμως, γιεκ ανταλέσαρ κα βοηθίντιβεν άμα κα κερέν έρευνα κορκορέ-ντα. Υπαρχίντιβενα μπουτ πληροφορίες κο εργαλεία σο τθεράσα για τι σικλιαράς-αμέν, σαρ ισί ο Οδηγός Έρευνας ι Ιεχωβάσκε Μαρτυρένγκε ντα ο βιβλίος Εδάφια για τη Χριστιανική Ζωή. Μα τι μπιστρέν ότι τουμαρό στόχος ισί τι λεν εκ απόφαση σο κα κερέλ ι Ιεχωβάσκο γκι.

9. Σαρ μπορίνασα τι αβάς σίγουροι ότι αμαρί απόφαση κα κερέλ ι Ιεχωβάσκο γκι; (Εφεσίους 5:17)

⁹ Σαρ μπορίνασα τι αβάς σίγουροι ότι αμαρί απόφαση κα κερέλ ι Ιεχωβάσκο γκι; Ο πρώτος ντα ο πο σημαντικός πράγμας ισί τι τζανάς λατσσές ι Ιεχωβάς. Η Γραφή βακερέλα: «Για τι αγαβές ο πράγματα πρέπει τι τζανές οντουλές σο ισί ντιπ Άγιος». (Παρ. 9:10) Βα, μπορίνελα τι αβέλ-πες ανταβά άμα τζανάσα λατσσές καλά ισί ο ιδιότητες ι Ιεχωβάσκε, καβά ισί λέσκο σκοπός ντα σο ισί οντουβά σο μανγκέλα ή μισίνελα. Πουτσέν τουμαρό νεαυτός: “Οντουλένταρ σο τζανάβα ι Ιεχωβάσκε, καγιά απόφαση μπορίναβα τι λαβ σο κα κερέλ λέσκο γκι;”​—Διαβάνεν Εφεσίους 5:17.

10. Σόσκε ο αρχές ι Γραφιάκε ισί πο σημαντικές κατά έθιμα ή κατά κουλτούρα σο μπορεί τι τθερέλ αμαρί φαμιλί;

¹⁰ Για τι κεράς ι Ιεχωβάσκο γκι, μπέκιμ τι χρειαζίντιβελ μπάζιμα τι στεναχωρίνας οντουλέν σο ισί πασέ αμέντε. Για παράδειγμας, εκ ντατ ντα εκ ντάι μπορεί τι επιμίνεν τι παντρίνελ λένγκι τερνί τσσάι εκχέ μουρσέσαρ σο ισί χουλανό, παρόλο σο νανέ αζόμ ζουρανό πνευματικά. Ισί λογικός ο ντατ ντα η ντάι τι μανγκέν τι τθερέλ λένγκι τσσάι ο αναγκαία. Όμως βόι πρέπει τι πουτσέλ πο νεαυτός: «Κα βοηθίνελ-μαν ανταβά μουρς τι τθεράβ εκ ζουρανί φιλία ι Ιεχωβάσαρ;» Ο εδάφιος Ματθαίος 6:33 μπορίνελα τι βοηθίνελ-αμέν τι αγαβάς καγιά ισί η άποψη ι Ιεχωβάσκι. Οτθέ βακερέλα ότι ο Χριστιανοί πρέπει τι συνεχίνεν τι «τσσουβέν πο ανγκλάλ σαριλένταρ ι Βασιλεία». Παρόλο σο σεβάνασα αμαρέ νταντές ντα νταγιά ντα ι γιαβερέ τζενέν, ο πο σημαντικός αμένγκε ισί τι κεράς ι Ιεχωβάς χαρούμενος.

ΣΚΕΦΤΙΝΕΝ ΛΑΤΣΣΕΣ ΚΑΛΑ ΕΠΙΛΟΓΕΣ ΤΘΕΡΕΝΑ

11. Σαρ βακερέλα ο εδάφιος Φιλιππησίους 1:9, 10, σο κα βοηθίνελ-τουμέν τι σκεφτίνεν λατσσές καλά επιλογές τθερένα;

¹¹ Αφού κα ντικχέν καλά αρχές κατά Γραφή τθερένα τι κερέν με την απόφαση τουμαρί, χρειαζίντιβελα τι σκεφτίνεν λατσσές σο επιλογές τθερένα. (Διαβάνεν Φιλιππησίους 1:9, 10) Άμα κα αγαβέν ντιπ λατσσές σαρ ισί ο πράγματα, ανταβά κα βοηθίνελ-τουμέν τι σκεφτίνεν σο αποτελέσματα κα ανέλ η κάθε επιλογή. Μπάζιμ η απόφαση μπορεί τι λιντιόλ εύκολα. Όμως νανέ σαρέ ο αποφάσεις απλές. Άμα κα προσπαθίνεν τι αγαβέν ντιπ λατσσές σαρ ισί ο πράγματα, ανταβά κα βοηθίνελ-τουμέν τι λεν γκοντιαβέρ αποφάσεις ατζέ-ντα κο δύσκολες καταστάσεις.

12, 13. Άμα κα αγαβέν ντιπ λατσσές σαρ ισί ο πράγματα, σαρ κα βοηθίνελ-τουμέν ανταβά τι τραμπίνεν σο μπουτί κα κερέν;

¹² Βακερέν ότι ρόντενα μπουτιάκε για τι ανέν τουμαρέ φαμιλιάτε ο απαραίτητα. Υπαρχίντιβενα ντούι μπουτιά. Σκεφτίνενα σαρ ισί μπαγιά ο πράγματα, για παράδειγμας, σο μπουτί ισί η κάθε εκ, καλά σαάτια πρέπει τι κερέν μπουτί, καζόμ κα λελ-τουμέν για τι τζαν οτθέ ντα γιαβερά. Ο ντούι-ντα μπουτιά ισί σωστά εκχέ Χριστιανόσκε. Μπέκιμ ντικχίντιβελα τουμένγκε πο λατσσί η εκ επειδή μπεϊντίνενα-λα πο μπουτ σαρ μπουτί ή επειδή ισί πο μπουτ ο λοβέ. Όμως υπαρχίντιβενα γιαβερά-ντα πράγματα σο πρέπει τι σκεφτίνεν πριν τι λεν εκ απόφαση.

¹³ Φιρειπείν, μήπως η μπουτί περέλα ο ίδιος σαάτι σο τθερένα συνάθροιση; Μήπως η μπουτί λέλα τουμένταρ ο χρόνος σο κα ντένας-λες τουμαρέ φαμιλιάτε για τι νιωθίνελ ασφάλεια, ευτυχία ντα πασέ κο Ιεχωβά; Ασακέ ερωτήσεις κα βοηθίνεν-τουμέν τι τσσουβέν «ο πο σημαντικά  πράγματα», δηλαδή ι λατρεία ντα ο ανάγκες τουμαρέ φαμιλιάκε, πο οπρέ κατά υλικά πράγματα. Αντικάς κα μπορίνεν τι λεν εκ απόφαση σο κα τθερέλ ι ευλογία ι Ιεχωβάσκι.

14. Άμα κα αγαβάς ντιπ λατσσές σαρ ισί ο πράγματα ντα κα σικαβάς αγάπη, σαρ κα βοηθίνελ-αμέν ανταβά μα τι κεράς ι γιαβερέν τι χασαρέν πουμαρί πίστη;

¹⁴ Άμα κα αγαβάς ντιπ λατσσές σαρ ισί ο πράγματα, κα σκεφτίνας σαρ κα μπορίνελας τι επηρεάνελ αμαρί απόφαση ι γιαβερέ τζενέν, για μα τι κεράς-λεν τι «χασαρέν πουμαρί πίστη». (Φιλιπ. 1:10) Ανταβά ισί σημαντικός κάνα τραμπίνασα σο σέα κα ιριάς ντα σαρ κα αβέλ αμαρί εμφάνιση. Για παράδειγμας, μπορεί τι μπεϊντίνας εκ συγκεκριμέ τρόπος για τι ιριάβας-αμέν ντα τι λατσσαράς-αμέν. Αλλά σο κα κεράας άμα ο πφραλά ή ο τζενέ αβρί κο ντουνιάς κα νιωθίνενας μπέτι ανταλέσαρ; Άμα κα αγαβάς ντιπ λατσσές σαρ ισί ο πράγματα, ανταβά κα βοηθίνελ-αμέν τι σεβάνας οντουλά σο νιωθίνενα. Η αγάπη κα κερέλ-αμέν τι ντικχάς ο λατσσιπέ «ι γιαβερέσκο» ντα τι αβάς σεμνοί. (1 Κορ. 10:23, 24, 32· 1 Τιμ. 2:9, 10) Αντικάς κα λας  εκ απόφαση σο σικαβέλα ότι μανγκάσα ντα ότι σεβάνασα ι γιαβερέν.

15. Σο πρέπει τι σκεφτίνεν πριν τι εφαρμόνεν εκ σημαντική απόφαση;

¹⁵ Άμα τθερένα τι λεν εκ απόφαση, σκεφτίνεν σο χρειαζίντιβελα τι κερέν για τι τθερέλ επιτυχία. Ο Ιησούς βακερντάς “τι μπεσάς πρώτα τι σκεφτίνας καζόμ κα χαλαβάς”. (Λουκ. 14:28) Οτθάρ, σκεφτίνεν ο χρόνος, ο λοβέ ντα ι προσπάθεια σο κα χρειαζίντιβελ τι κερέν για τι τθερέλ επιτυχία τουμαρί απόφαση. Μερικέ περιπτωσιέντε, μπορίνενα τι κερέν λάφι τουμαρέ φαμιλιάσαρ ντα τι συζητίνεν σο μπορίνελα τι κερέλ ο κάθε εκ τουμένταρ για τι τθερέλ επιτυχία η απόφαση σο λιντέν. Σόσκε ισί μπουτ σημαντικός ανταβά; Επειδή μπορίνελα τι βοηθίνελ-τουμέν τι αγαβέν άμα χρειαζίντιβελα τι κερέν κάποιες αλλαγές κι απόφαση σο λιντέν ή τι τραμπίνεν τι κερέν κάτι γιαβέρ. Ντα κάνα κερένα λάφι τουμαρέ φαμιλιάσαρ ντα ασουνένα ο απόψεις ντα ο ιδέες σο μπέκιμ τθερένα, κα αβέλ πο εύκολος τι συνεργαζίντιβεν τουμέντζαρ για τι τθερέλ επιτυχία η απόφαση.​—Παρ. 15:22.

ΛΕΝ ΕΚ ΑΠΟΦΑΣΗ ΣΟ ΚΑ ΤΘΕΡΕΛ ΕΠΙΤΥΧΙΑ

16. Καλά πράγματα κα βοηθίνεν-τουμέν για τι λεν εκ απόφαση σο κα τθερέλ επιτυχία; (Ντικχέν ο πλαίσιος-ντα « Σαρ τι Λεν Γκοντιαβέρ Αποφάσεις»)

¹⁶ Άμα κερντέν σαρέ οντουλά σο ντικχλάμ πο οπρέ, ισινέν έτοιμοι τι λεν εκ γκοντιαβέρ απόφαση. Σικλιλέν σαρ ισί μπαγιά ο πράγματα ντα ντικχλέν ο αρχές σο κα βοηθίνεν-τουμέν τι λεν εκ απόφαση σο κα κερέλ ο γκι ι Ιεχωβάσκο. Ακανά μπορίνενα τι μανγκέν κατά Ιεχωβά τι βοηθίνελ-τουμέν για τι τθερέλ επιτυχία τουμαρί απόφαση.

17. Καβά ισί ο πο σημαντικός πράγμας σο κα βοηθίνελ-τουμέν τι λεν λατσσέ αποφάσεις;

¹⁷ Ατζέ-ντα άμα ανγκλέ λιντένας μπουτ αποφάσεις σο τθερένας επιτυχία, τι ντεν-τουμέν γκοντί ότι ο πο σημαντικός πράγμας σο κα βοηθίνελ-τουμέν τι λεν λατσσέ αποφάσεις ισί, όχι τι στηρίντιβεν τουμαρέ νεαυτόστε ή κο πράγματα σο τζανένα, αλλά κι σοφία κι Ιεχωβάσκι. Σάντε βοβ μπορίνελα τι βοηθίνελ-τουμέν τι σικλιόν, τι αγαβέν ντα τι ντικχέν σαρ ισί μπαγιά ο πράγματα. Σαρέ ανταλά ισί μπουτ σημαντικά πράγματα ντα αβένα κατά σοφία ι Ντεβλέσκι. (Παρ. 2:1-5) Ο Ιεχωβά μπορίνελα τι βοηθίνελ-τουμέν τι λεν αποφάσεις σο κερένα λέσκο γκι.​—Ψαλμ. 23:2, 3.