1. Καβά ισί εκ λόγος σο ο Ιεχωβά δημιουργιντάς ο μπιαβ;

 Ο ΙΕΧΩΒΑ ισί ο «ευτυχισμέ Ντεβέλ» ντα μανγκέλα αμέν-ντα τι αβάς ευτυχισμέ. (1 Τιμ. 1:11) Ντινάς-αμέν μπουτ δώρα για τι βοηθίνελ-αμέν τι απολαμβάνας ι ζωή. (Ιακ. 1:17) Εκ κατά δώρα ανταλά, ισί ο μπιαβ. Κάνα εκ μουρς ντα εκ τζουβέλ παντρίνενα, ντένα πουμαρό λάφι τι μανγκέν, τι σεβάνεν ντα τι φροντίνεν ο εκ ι γιαβερές. Κάνα ο ρομ ντα η ρομνί ατσσικιαρένα ζουρανί πουμαρί αγάπη ο εκ ι γιαβερέσκε, μπορίνενα ο ντούι-ντα τι αβέν χαρούμενοι.​—Παρ. 5:18.

2. Σο αβέλα-πες αντιβές μπουτέ μπιαβέντε;

² Δυστυχώς, μπουτ ζευγάρια αντιβές τσσιναβένα τι μανγκέν ντα τι σεβάνεν ο εκ ι γιαβερές αντικάς σαρ ντινέας πουμαρό λάφι. Οτθάρ, νανέ ευτυχισμέ. Εκ έρευνα σο αβιλί ακανά σουγκό βακερέλα ότι μπουτ μουρσά νταπένα πουμαρέ ρομνιέν, βακερένα λένγκε μπέτι λάφια ή συμπεριφερίντιβενα λένγκε μπέτι γιαβερέ τροπόντζαρ. Εκ ασακό ρομ μπορεί τι σεβάνελα πι ρομνιά ανγκλάλ κο γιαβερά αλλά κάνα ισί κχερέ συμπεριφερίντιβελα λάκε μπέτι τροπόσαρ. Επίσης, μπουτ μουρσά ντικχένα πορνογραφία ντα ανταβά-ντα κερέλα λένγκε ρομνιέν τι νιωθίνεν ότι να μανγκένα-λεν.

3. Σόσκε εκ μουρς μπορεί τι συμπεριφερίντιβελ μπέτι πι ρομνιάκε;

³ Σόσκε μερικά μουρσά συμπεριφερίντιβενα μπέτι πουμαρέ ρομνίνγκε; Μπορεί λένγκο ντατ τι νταπέλας πι ρομνιά, οτθάρ μπορεί τι σκεφτίνενα ότι νανέ κακός τι κερέν-λες βον-ντα ανταβά. Γιαβερά μουρσά συμπεριφερίντιβενα μπέτι πουμαρέ ρομνίνγκε επειδή ανταβά ισί συνηθισμέ κι κουλτούρα λένγκι. Ασακέ τζενέ μπορεί τι νιωθίνεν ότι για τι αβέν μπαγιά μουρσά πρέπει τι συμπεριφερίντιβεν αντικάς. Γιαβερά μουρσά να σικλιλέ τι κερέν κουμάντος οντουλά σο νιωθίνενα ούτε πουμαρί χολί. Μερικά μουρσά επειδή ντικχένα πορνογραφία τθερένα λάθος άποψη ι τζουβλίνγκε ντα για το σεξ. Επίσης, μπουτ επιστήμονες ντικχλέ ότι αντρέ κο Κορωνοϊός ατζέ πο μπουτ μουρσά αρχισάλε τι συμπεριφερίντιβεν μπέτι πουμαρέ ρομνίνγκε. Όμως, σο-ντα τι αβέλ-πες, να τθερέλα καέκ δικαιολογία εκ μουρς τι συμπεριφερίντιβελ μπέτι πι ρομνιάκε.

4. Σο πρέπει τι προσοχίνεν ο μουρσά σο ισί Χριστιανοί, ντα σόσκε;

 ⁴ Ο μουρσά σο υπηρετίνενα ι Ιεχωβάς πρέπει τι προσοχίνεν για μα τι μουκχέν ο λάθος τρόπος σο ντικχέλα ι τζουβλίν ανταβά ντουνιάς τι επηρεάνελ λένγκο τρόπος. a Σόσκε; Εκ λόγος ισί ότι ο πο μπουτ φορές οντουλά σο σκεφτίνελα εκ τζενό οντουλά κερέλα-ντα. Ο απόστολος Παύλος προειδοποιηντάς ι χρισμέ Χριστιανόν κι Ρώμη “μα τι μουκχέν τι επηρεάνελ-λεν ανταβά ντουνιάς”. (Ρωμ. 12:1, 2) Κάνα ο Παύλος γραφιντάς κο Ρωμαίοι, η κχανγκιρί οτθέ υπαρχίντιβελας ήδη μερικά μπρεσά. Όμως, ο λάφια ι Παυλόσκε σικαβένα ότι κάποιοι κατά κχανγκιρί συνεχίνενας τι επηρεάντιβεν κατά κουλτούρα ι τζενένγκι ντα κατά τρόπος σο σκεφτίνελας ο ντουνιάς. Άκ’ σόσκε βακερντάς λένγκε τι αλλάνεν ο τρόπος σο σκεφτίνενας ντα συμπεριφερίντιβενας. Ανταγιά συμβουλή ισί σίγουρα εμ ι Χριστιανέ μουρσένγκε αντιβές. Δυστυχώς, μερικοί λένταρ επηρεασάλε κατά τρόπος σο σκεφτίνελα ανταβά ντουνιάς ντα συμπεριφερίντιβενα μπέτι πουμαρέ ρομνίνγκε. b Σαρ μανγκέλα ο Ιεχωβά τι συμπεριφερίντιβεν ο μουρσά πουμαρέ ρομνίντε; Αρακχάσα ι απάντηση κο βασικός εδάφιος ανταλέ μαθημάσκο.

5. Σαρ βακερέλα κι 1 Πέτρου 3:7, σαρ πρέπει τι συμπεριφερίντιβελ εκ ρομ πι ρομνιάκε;

⁵ Διαβάνεν 1 Πέτρου 3:7. Ο Ιεχωβά ντέλα εντολή κο μουρσά τι σεβάνεν πουμαρέ ρομνίν. Ο σεβασμός τθερέλα τι κερέλ με το τρόπος σο συμπεριφερίντιβελα εκ τζενό εκχέ γιαβερέστε. Εκ μουρς σο σεβάνελα πι ρομνιά συμπεριφερίντιβελα λάκε λατσσιμάσαρ ντα με αγάπη. Κο μάθημας ανταβά, κα ντικχάς σαρ εκ μουρς μπορίνελα τι σικαβέλ σεβασμός πι ρομνιάκε. Πρώτα όμως, ελάν τι ντικχάς καλά πράγματα δεν πρέπει τι κερέλ ποτές εκ ρομ πι ρομνιάτε.

ΜΑ ΚΕΡΕΝ ΤΙΠΟΤΑ ΣΟ ΚΑ ΚΕΡΕΛ ΖΙΑΝΙ ΤΟΥΜΑΡΕ ΡΟΜΝΙΝΤΕ

6. Σαρ νιωθίνελα ο Ιεχωβά ι μουρσένγκε σο νταπένα πουμαρέ ρομνίν; (Κολοσσαείς 3:19)

⁶ Εκ μουρς δεν πρέπει τι νταπέλ πι ρομνιά. Ο Ιεχωβά μισίνελα οντουλέν σο μανγκένα ι βία. (Ψαλμ. 11:5) Να μπεϊντίνελα ιτς κάνα ο ρομά νταπένα πουμαρέ ρομνίν. (Μαλ. 2:16· διαβάνεν Κολοσσαείς 3:19) Σαρ βακερέλα ο εδάφιος ανταλέ μαθημάσκο, ο 1 Πέτρου 3:7, άμα εκ μουρς να συμπεριφερίντιβελα λατσσές πι ρομνιάτε, χαλαβέλα πι φιλία ι Ντεβλέσαρ. Ο Ιεχωβά μπορεί ατζέ-ντα μα τι ασουνέλ λέσκε προσευχές.

7. Σαρ βακερέλα κο Εφεσίους 4:31, 32, καλέ τροπόντζαρ δεν πρέπει τι κερέν λάφι ο μουρσά πουμαρέ ρομνίντε; (Ντικχέν επίσης ο «Σο Μανγκέλα τι Βακερέλ»)

⁷ Εκ μουρς δεν πρέπει τι ντελ βίκος οπράλ πι ρομνιάτε ή τι βακερέλ λάκε μπέτι λάφια. Μερικά μουρσά κερένα λάφι χολιάσαρ πουμαρέ ρομνίντε ντα βακερένα λάφια σο πφανγκένα λένγκο γκι. Αλλά ο Ιεχωβά μισίνελα “ι μπαρί χολί, ο βίκος ντα ο μπέτι λάφια”. c (Διαβάνεν Εφεσίους 4:31, 32) Ασουνέλα-λεν σαρέ. Ο τρόπος σο κερέλα λάφι εκ μουρς πι ρομνιάτε, ατζέ-ντα κάνα ισί κχερέ, τθερέλα μπαρί σημασία ι Ιεχωβάσκε. Εκ μουρς σο βακερέλα μπέτι λάφια πι ρομνιάτε να χαλαβέλα σάντε πο μπιαβ αλλά πι φιλία-ντα ι Ντεβλέσαρ.​—Ιακ. 1:26.

8. Σαρ νιωθίνελα ο Ιεχωβά για την πορνογραφία, ντα σόσκε;

⁸ Εκ μουρς δεν πρέπει τι ντικχέλ πορνογραφία. Σαρ νιωθίνελα ο Ιεχωβά για την πορνογραφία; Μισίνελα-λα. Οτθάρ, εκ μουρς σο ντικχέλα λουμνικανέ φωτογραφίες χαλαβέλα πι φιλία ι Ιεχωβάσαρ ντα να σικαβέλα ιτς σεβασμός πι ρομνιάτε. d Ο Ιεχωβά μπεκλεντίνελα κατά μουρσά τι ατσσόν αφοσιωμέ πουμαρέ ρομνίντε όχι σάντε  οντουλέντζαρ σο κερένα αλλά οντουλέντζαρ σο σκεφτίνενα-ντα. Ο Ιησούς βακερντάς ότι εκ μουρς σο ντικχέλα εκχέ γιαβερέ τζουβλιά πφιρνικανές «αντρέ πι γκίστε» κερντάς λάσαρ λουμνιπέ οπράλ πι μπιαβέστε. e​—Ματθ. 5:28, 29.

9. Σόσκε ο Ιεχωβά να μπεϊντίνελα ιτς κάνα ο μουρσά ζορισκιαρένα πουμαρέ ρομνίν κάνα κερένα σεξ;

⁹ Εκ μουρς δεν πρέπει τι ζορισκιαρέλ πι ρομνιά τι κερέλ πράγματα σο να μανγκέλα κάνα κερένα σεξ. Μερικά μουρσά κάνα σοβένα γιεκ πουμαρέ ρομνίντζαρ ζορισκιαρένα-λεν τι κερέν πράγματα σο ενοχλίνενα λένγκι συνείδηση ή κερένα-λεν τι νιωθίνεν μπέτι. Κάνα εκ μουρς συμπεριφερίντιβελα αντικάς ντικχέλα σάντε πο νεαυτός ντα να πφαμπόλα πι ρομνιάκε. Οτθάρ ο Ιεχωβά μισίνελα-λες ανταβά. Βοβ μπεκλεντίνελα κατά μουρσά τι μανγκέν ντα τι φροντίνεν πουμαρέ ρομνίν ντα τι σεβάνεν λένγκι συνείδηση. (Εφεσ. 5:28, 29) Σο αβέλα-πες όμως άμα εκ Χριστιανός μουρς ήδη συμπεριφερίντιβελα πι ρομνιάτε εκχέ ασακέ μπέτι τροπόσαρ ή ντικχέλα πορνογραφία; Σαρ μπορίνελα τι αλλάνελ ο τρόπος σο σκεφτίνελα ντα οντουλά σο κερέλα;

ΣΑΡ ΕΚ ΜΟΥΡΣ ΜΠΟΡΙΝΕΛΑ ΤΙ ΣΤΑΜΑΤΙΝΕΛ ΤΙ ΣΥΜΠΕΡΙΦΕΡΙΝΤΙΒΕΛ ΜΠΕΤΙ ΤΡΟΠΟΣΑΡ

10. Σαρ ο μουρσά μπορίνενα τι βοηθίντιβεν κατά παράδειγμας ι Ιησούσκο;

¹⁰ Σο κα βοηθίνελ εκχέ μουρσές τι σταματίνελ τι συμπεριφερίντιβελ τροπόσαρ σο κα κερέλας λέσκε ρομνιά τι νιωθίνελ μπέτι; Μπορίνελα τι προσπαθίνελ τι μοιάζελ κο Ιησούς. Παρόλο σο ο Ιησούς να παντρισάλοας ποτές, ο τρόπος σο συμπεριφερίντιβελας πι μαθητέντε ισί εκ μπουτ λατσσό παράδειγμας για τι αγαβέν ο μουρσά σαρ πρέπει τι συμπεριφερίντιβεν πουμαρέ ρομνίντε. (Εφεσ. 5:25) Για παράδειγμας, σκεφτίνεν σο μπορίνενα τι σικλιόν ο μουρσά κατά τρόπος σο συμπεριφερίντιβελας ο Ιησούς κο μαθητές ντα κατά τρόπος σο κερέλας λάφι λέντζαρ.

11. Σαρ συμπεριφερίντιβελας ο Ιησούς πι μαθητέντε;

¹¹ Ο Ιησούς ισινέ πάντα λατσσό πι μαθητέντζαρ ντα συμπεριφερίντιβελας λέντε με σεβασμός. Ποτές να ισινέ σκληρός λέντζαρ. Παρόλο σο ισινέ πο ζουρανό λένταρ, ποτές να χρησιμοποιηντάς πι ζορ για τι κερέλ-λεν τι νιωθίνεν πο τελέ ή τι νταρέν λέσταρ. Οκιά μπάνταρ, υπηρετίνελας-λεν ταπεινά. (Ιωάν. 13:12-17) Βακερντάς πι μαθητένγκε: «Σικλιόν μάνταρ, σόσκε τθεράβα κοβλό ντα ταπεινός γκι, ντα κα λοκχιόν». (Ματθ. 11:28-30) Σαρ ντικχάσα ο Ιησούς τθερέλας κοβλό γκι. Εκ τζενό σο τθερέλα κοβλό γκι νανέ μπίζουρανο, αλλά ισί αζόμ ζουρανό σο μπορίνελα τι κερέλ κουμάντος πο νεαυτός. Κάνα ο γιαβερά τζάνα λέσαρ κόντρα, ατσσόλα ήρεμος ντα κερέλα κουμάντος οντουλά σο νιωθίνελα.

12. Σαρ κερέλας λάφι ο Ιησούς κο γιαβερά;

¹² Ο Ιησούς ντέλας ζορ κο γιαβερά ντα λοκχιαρέλας λένγκο γκι πι λαφίντζαρ. Να κερέλας λάφι σκληρά πι μαθητέντε. (Λουκ. 8:47, 48) Ατζέ-ντα κάνα λέσκε ντουσμάνια προσβαλιντέ-λες ντα προσπαθιντέ τι νευριάνεν-λες “να προσβαλίνελας-λεν βοβ-ντα”. (1 Πέτρ. 2:21-23) Μπάζιμα ο Ιησούς τραμπίνελας ατζέ-ντα μα τι κερέλ ιτς λάφι αντίς τι κερέλ λένγκε λάφι μπέτι τροπόσαρ. (Ματθ. 27:12-14) Σο σουκάρ παράδειγμας ι Χριστιανέ μουρσένγκε!

13. Σαρ βακερέλα κο Ματθαίος 19:4-6, σαρ μπορίνελα εκ μουρς “τι ατσσόλ πασέ πι ρομνιάτε;” (Ντικχέν ι φωτογραφία-ντα)

¹³ Ο Ιησούς βακερντάς κο μουρσά τι ατσσόν αφοσιωμέ πουμαρέ ρομνίντε. Αντάς λένγκε γκοντιάτε ο λάφια σο βακερντάας λέσκο Ντατ, ότι εκ μουρς πρέπει τι «ατσσόλ πασέ πι ρομνιάτε». (Διαβάνεν Ματθαίος 19:4-6) Ο λάφι “τι ατσσόλ πασέ” πι ρομνιάτε κο πουρανό μπαλαμανό κείμενος μανγκέλα τι βακερέλ “τι αβέν κολλημέ γιεκ”. Άρα η αγάπη σο τθερέλα ο ρομ ντα η ρομνί πρέπει τι αβέλ αζόμ ζουρανί σαρ τι αβένας κολλημέ ο εκ κο γιαβέρ. Λένγκο μπιαβ να αβέλα-πες τι χαλάντιβελ χωρίς τι κερέλ ζιάνι κο ντούι-ντα. Εκ μουρς σο τθερέλα αζόμ λατσσί σχέση πι ρομνιάσαρ κα νασέλ ντουρ σαρέ κατά πράγματα σο τθερένα τι κερέν με την πορνογραφία. Κα λελ πο γιακχά σουγκό  σαρέ κατά “πράγματα σο να τθερένα αξία”. (Ψαλμ. 119:37) Σαρ ο Ιώβ, κερέλα εκ συμφωνία πι γιακχίντζαρ μα τι ντικχέλ πφιρνικανές εκχέ γιαβερέ τζουβλιά εκτός πι ρομνιάταρ.​—Ιώβ 31:1.

14. Καλά πράγματα κα βοηθίνεν εκχέ ασακέ μουρσές τι λατσσαρέλ πι φιλία ι Ιεχωβάσαρ ντα πι ρομνιάσαρ;

¹⁴ Εκ μουρς σο νταπέλα πι ρομνιά ή ντέλα βίκος οπρά-λάτε ντα βακερέλα λάκε μπέτι λάφια χρειαζίντιβελα τι κερέλ κάποια πράγματα για τι λατσσαρέλ πι φιλία ι Ιεχωβάσαρ ντα πι ρομνιάσαρ. Καλά ισί ανταλά πράγματα; Πρώτον, πρέπει τι αγαβέλ ότι τθερέλας σοβαρός πρόβλημας. Τίποτα ναστί ατσσόλα γκεραντό κατά γιακχά ι Ιεχωβάσκε. (Ψαλμ. 44:21· Εκκλ. 12:14· Εβρ. 4:13) Δεύτερον, πρέπει τι σταματίνελ τι συμπεριφερίντιβελ μπέτι τροπόσαρ πι ρομνιάτε. (Παρ. 28:13) Τρίτον, πρέπει τι μανγκέλ συγνώμη πι ρομνιάταρ ντα κατά Ιεχωβά. (Πράξ. 3:19) Πρέπει επίσης τι μολίνελ ι Ιεχωβάς τι κερέλ-λες εμ τι μανγκέλ τι αλλάνελ εμ τι βοηθίνελ-λες τι κερέλ κουμάντος οντουλά σο σκεφτίνελα, σο βακερέλα ντα κερέλα. (Ψαλμ. 51:10-12· 2 Κορ. 10:5· Φιλιπ. 2:13) Τέταρτον, πρέπει οντουλά σο βακερέλα πι προσευχιάτε τι κερέλ-λεν ντα. Δηλαδή τι σικλιόλ τι μισίνελ σο-ντα κα μπορίνελας τι κερέλ ζιάνι λέσκε ρομνιάτε σαρ ισί τι νταπέλ-λα, τι ντελ βίκος οπρά-λάτε ντα τι βακερέλ λάκε μπέτι λάφια. (Ψαλμ. 97:10) Πέμπτον, πρέπει τι τζαλ σουγκό κο πρεσβύτεροι ντα τι μανγκέλ λένταρ βοήθεια. (Ιακ. 5:14-16) Έκτον, πρέπει τι γραφίνελ κάποια πράγματα σο κα βοηθίνεν-λες τι ατσσόλ ντουρ ασακέ μπέτι πραγματένταρ ντα μα τι ξανακερέλ-λεν πάλι. Εκ μουρς σο ντικχέλα πορνογραφία-ντα πρέπει τι κερέλ ανταλά πράγματα. Ο Ιεχωβά κα ευλογίνελ λέσκε προσπάθειες τι αλλάνελ πι συμπεριφορά. (Ψαλμ. 37:5) Αλλά να ερεσέλα σάντε εκ ρομ τι σταματίνελ τι κερέλ πράγματα σο κερένα ζιάνι λέσκε ρομνιάτε. Χρειαζίντιβελα επίσης τι σικλιόλ τι σεβάνελ πι ρομνιά. Σαρ μπορίνελα τι κερέλ-λες ανταβά;

ΣΑΡ ΤΙ ΣΙΚΑΒΕΝ ΑΓΑΠΗ ΝΤΑ ΣΕΒΑΣΜΟΣ ΤΟΥΜΑΡΕ ΡΟΜΝΙΝΓΚΕ

15. Σαρ μπορίνελα εκ μουρς τι σικαβέλ ότι πφαμπόλα πι ρομνιάκε;

¹⁵ Σικαβέν ότι πφαμπόνα λένγκε. Μερικά πφραλά σο τθερένα εκ ευτυχισμέ μπιαβ κερένα κάθε ντιβές κάτι για τι σικαβέν πουμαρέ ρομνίνγκε καζόμ μπουτ μανγκένα-λεν. (1 Ιωάν. 3:18) Εκ μουρς μπορίνελα τι σικαβέλ ότι πφαμπόλα πι ρομνιάκε χουρντέ τροπόντζαρ. Σαρ για παράδειγμας τι  ασταρέλ λάκο βας ή τι ντελ-λα εκ μπαρί ανγκάλι. Κα μπορίνελας τι μπουτσσαβέλ λάκε μηνύματα ντα τι βακερέλ λάκε “σικλιντισάλομ τούκε” ή “σαρ ισινάν;” Μπάζιμα κα μπορίνελας τι γραφίνελ λάκε εκ κάρτα ντα τι βακερέλ λάκε καζόμ μπουτ μανγκέλα-λα. Κάνα εκ μουρς κερέλα ασακέ πράγματα σικαβέλα σεβασμός πι ρομνιάκε ντα κερέλα πο ζουρανό πο μπιαβ.

16. Σόσκε πρέπει εκ μουρς τι ισαρέλ πι ρομνιά;

¹⁶ Βακερέν λένγκε καζόμ σημαντικές ισί τουμένγκε. Εκ μουρς σο σικαβέλα σεβασμός πι ρομνιάκε βακερέλα λάκε σόσκε εκτιμίνελα-λα ντα κερέλα-λα τι νιωθίνελ σουκάρ πι νεαυτόσκε. Εκ τρόπος σο κερέλα-λες ανταβά ισί κάνα να μπιστρέλα τι σικαβέλ λάκε πι εκτίμηση σαρέ οντουλένγκε σο κερέλα για τι υποστηρίνελ-λες. (Κολ. 3:15) Κάνα εκ μουρς ισαρέλα πι ρομνιά αντράλ πι γκίσταρ, κερέλα λάκο γκι τι χαιρίνελ. Ντα σοράν βόι κα νιωθίνελ ότι αρακχαβέλα-λα, ότι μανγκέλα-λα ντα ότι σεβάνελα-λα.​—Παρ. 31:28.

17. Σαρ μπορίνελα εκ μουρς τι σικαβέλ σεβασμός πι ρομνιάκε;

¹⁷ Τι αβέν λατσσέ ντα τι σικαβέν λένγκε σεβασμός. Εκ μουρς σο μανγκέλα πι ρομνιά εκτιμίνελα-λα ντα φροντίνελα-λα. Ντικχέλα-λα σαρ εκ μπουτ σημαντικός δώρος κατά Ιεχωβά. (Παρ. 18:22· 31:10) Οτθάρ, συμπεριφερίντιβελα λάκε λατσσιμάσαρ ντα με σεβασμός ατζέ-ντα κάνα κερένα σεξ. Να κα ζορισκιαρέλ-λα τι κερέλ κάτι σο κα ανέλας-λα σε δύσκολη θέση ή κα ενοχλίνελας λάκι συνείδηση κάνα κερένα σεξ. f Επίσης κα κερέλ ο πο λατσσό για τι ατσσικιαρέλ εκ πάκι συνείδηση ανγκλάλ κο Ιεχωβά.​—Πράξ. 24:16.

18. Σο πρέπει τι αβέν αποφασισμέ ο μουρσά τι κερέν; (Ντικχέν ο πλαίσιος-ντα « Σταρ Τρόποι για τι Σικαβέλ εκ Μουρς Σεβασμός πι Ρομνιάτε»)

¹⁸ Μουρσάλεν, τι αβέν σίγουροι ότι ο Ιεχωβά ντικχέλα ντα εκτιμίνελα ο προσπάθειες σο κερένα για τι σικαβέν σεβασμός τουμαρέ ρομνίνγκε σαρέ κο πράγματα τουμαρέ ζωγιάτε. Τι αβέν αποφασισμέ τι σεβάνεν τουμαρέ ρομνίν. Σικαβένα λένγκε ότι σεβάνενα-λεν κάνα να κερένα πράγματα σο πφανγκένα λένγκο γκι αλλά ισινέν λατσσέ λέντζαρ ντα πφαμπόνα λένγκε. Κάνα κερένα-λες ανταβά σικαβένα ότι μανγκένα-λεν ντα εκτιμίνενα-λεν. Τι σεβάνεν τουμαρέ ρομνίν ντα αντικάς κα αρακχαβέν ι πο σημαντική σχέση σο τθερένα, τουμαρί σχέση ι Ιεχωβάσαρ.​—Ψαλμ. 25:14.