1. Καλέ πραγμάστε τθερένα πουμαρί γκοντί ο πο μπουτ τζενέ αντιβές;

 Σαρ ντικχάσα μπουτ τζενέ αντιβές ντένα πο μπουτ προσοχή πουμαρέ νεαυτόστε παρά κο γιαβερά. Για παράδειγμας, μερικοί χρησιμοποιήνενα ο κοινωνικά δίκτυα για τι ταρτίνεν ι προσοχή οπρά-πουμέντε ντα τι σικαβέν οντουλά σο κερένα. Όμως, μπουτ χάνικα τζενέ μανγκένα τι ντεν δόξα κο Ιεχωβά Ντεβέλ. Ανταλέ μαθημάστε, κα ντικχάς σο μανγκέλα τι βακερέλ τι ντας δόξα κο Ιεχωβά ντα σο πρέπει τι τσσίντελ-αμέν τι κεράς-λες ανταβά. Κα σικλιάς επίσης σαρ μπορίνασα τι ντας κο Ντεβέλ ι δόξα σο αξίνελα. Κο τέλος κα ντικχάς σαρ ο ίδιος ο Ιεχωβά κα δοξάνελ πο ναβ ατζεχάνικ.

ΣΟ ΜΑΝΓΚΕΛΑ ΤΙ ΒΑΚΕΡΕΛ ΤΙ ΝΤΑΣ ΚΟ ΙΕΧΩΒΑ ΔΟΞΑ;

2. Σαρ ο Ιεχωβά σικαντάς πι δόξα κο βες Σινά; (Ντικχέν ι φωτογραφία-ντα)

² Σο ισί η δόξα; Κι Γραφή, ο λάφι «δόξα» μπορεί τι βακέρντιβελα σαρέ ι πραγματένγκε σο κερένα εκχές τι αβέλ εντυπωσιακός. Χάνικ πο σοράν αφού ελευθερωσάλο ο λαός Ισραήλ κατά Αίγυπτος σο ισινέ δούλοι, ο Ιεχωβά σικαντάς μπουτ σουκάρ τροπόσαρ πι δόξα. Σκεφτίνεν σο αβιλό-πες αζομάν: Εκατομμύρια Ισραηλίτες γκιντισάλε πασέ κο βες Σινά για τι ασουνέν σο κα βακερέλας λένγκε ο Ντεβέλ. Εκ καλό σύννεφος ιτσσαρντάς σαρό ο βες. Οτθέ σο να μπεκλεντίνενας-λες, αβιλό εκ μπαρό σεισμός, αστραπές, κεραυνοί ντα ασούντιλο τι πφούντελ ζουρανές εκ σινγκ. (Έξοδ. 19:16-18· 24:17· Ψαλμ. 68:8) Κάνα ο Ιεχωβά κερντάς ανταλά πράγματα, ο Ισραηλίτες πρέπει τι ατσσιλέ πουταρντέ μόσαρ σο αγαντέ καζόμ ζουρανό ισινέ ο Ιεχωβά.

3. Σο μανγκέλα τι βακερέλ τι ντας δόξα κο Ιεχωβά;

³ Αλλά ο τζενέ μπορίνενα τι ντεν δόξα κο Ιεχωβά; Βα, μπορίνενα. Εκ τρόπος τι ντας δόξα κο Ιεχωβά ισί κάνα βακεράσα κο γιαβερά ι μπαρέ πραγματένγκε σο κερντάς ντα για το σουκάρ ιδιότητες λέσκε. Επίσης, ντάσα δόξα κο Ντεβέλ κάνα ισαράσα-λες σαρέ ι πραγματένγκε σο βοηθίνελα-αμέν τι κεράς λέσκε ζοριάσαρ.  (Ησ. 26:12) Ο βασιλιάς Δαβίδ μουκχλάς αμένγκε εκ μπουτ λατσσό παράδειγμας επειδή ντέλας δόξα κο Ιεχωβά. Κι προσευχή σο κερντάς ανγκλάλ κι κχανγκιρί του Ισραήλ, ο Δαβίδ βακερντάς κο Ντεβέλ: «Τούι, Ιεχωβά, ισινάν μπαρό ντα ζουρανό ντα σουκάρ ντα λέσα-τουτ ντα ισινάν δοξασμέ, σόσκε σαρέ οντουλά σο ισί κο ουρανός ντα κι πφουβ ισί τιρέ». Αφού ο Δαβίδ μπιτισκιαρντάς πι προσευχή, «σαρί η κχανγκιρί ντινάς δόξα κο Ιεχωβά».​—1 Χρον. 29:11, 20.

4. Σαρ ντινάς ο Ιησούς δόξα κο Ιεχωβά;

⁴ Κάνα ο Ιησούς ισινέ κι πφουβ, ντέλας δόξα πι Νταντέστε καζόμ βακερέλας κο τζενέ ότι ο Ιεχωβά ντέλας-λες ι ζορ τι κερέλ θαύματα. (Μάρκ. 5:18-20) Ο Ιησούς επίσης ντέλας δόξα κο Ιεχωβά ι τροπόσαρ σο κερέλας λάφι πι Νταντέσκε κο τζενέ ντα ι τροπόσαρ σο συμπεριφερίντιβελας κο γιαβερά. Εκ ντιβές, ο Ιησούς ισινέ κι συναγωγή ντα σικλιαρέλας. Αντρέ οντουλέντε σο ασουνένας-λες ισινέ εκ τζουβέλ σο τθερέλας εκχέ δαιμονάς για 18 μπρεσά. Ο δαίμονας κερντάς λάκο σώμας τι αβέλ γκιντιμέ κο ντούι ντα ναστί κερέλας ιτς οπρέ. Σο μπέτι πράγμας ισινέ ανταβά! Ο Ιησούς τζιτζισάλο λάκε ντα οτθάρ γκιλό πασέ λάτε ντα βακερντάς λάκε γκουλντέ τροπόσαρ: «Τζουβλίε, τι νασέλ τούταρ το νασφαλιπέ». Σοράν, τσσουντάς πο βαστά οπρά-λάτε ντα οντιά στιγμή βόι κερντάς οπρέ πο σώμας ντα «δοξάνελας ι Ντεβλές». Τθερέλας μπαρί εκτίμηση σο ο Ιεχωβά κερντάς-λα λατσσές! (Λουκ. 13:10-13) Ανταγιά τζουβέλ τθερέλας εκ σημαντικός λόγος τι ντελ δόξα κο Ιεχωβά, σαρ αμέν-ντα.

ΣΟ ΤΣΣΙΝΤΕΛΑ-ΑΜΕΝ ΤΙ ΔΟΞΑΝΑΣ Ι ΙΕΧΩΒΑΣ;

5. Καλά λόγους τθεράσα τι σεβάνας ι Ιεχωβάς;

⁵ Δοξάνασα ι Ιεχωβάς επειδή σεβάνασα-λες μπουτ. Τθεράσα μπουτ λόγους για τι σεβάνας-λες. Ο Ιεχωβά τθερέλα ι ζορ τι κερέλ σο μανγκέλα ντα ποτές να κχινιόλα. (Ψαλμ. 96:4-7) Λέσκι σοφία ντικχίντιβελα μπουτ λατσσές κο πράγματα σο κερντάς. Βοβ ντινάς-αμέν ι ζωή ντα σαρέ οντουλά σο χρειαζίντιβασα για τι τζουβντιάς. (Αποκ. 4:11) Ισί αφοσιωμέ. (Αποκ. 15:4) Σο-ντα κερέλα τθερέλα επιτυχία ντα πάντα ατσσικιαρέλα πο λάφι. (Ιησ. Ναυή 23:14) Άκ’ σόσκε ο προφήτης Ιερεμίας βακερντάς ι Ιεχωβάσκε: «Ανγκλάλ σαρέ κο σοφοί κι τθεμένγκε ντα ανγκλάλ σαρέ κο βασίλεια λένγκε, να υπαρχίντιβελα καέκ σαρ τούτε»! (Ιερ. 10:6, 7) Σίγουρα, τθεράσα μπουτ λόγους τι σεβάνας αμαρέ Νταντές σο ισί κο ουρανός. Αλλά ο Ιεχωβά να κερδίνελα σάντε αμαρό σεβασμός, κερδίνελα αμαρί αγάπη-ντα.

6. Σόσκε μανγκάσα ι Ιεχωβάς;

⁶ Δοξάνασα ι Ιεχωβάς επειδή μανγκάσα-λες αντράλ αμαρέ γκίσταρ. Σκεφτίνεν μερικές ιδιότητες ι Ιεχωβάσκε σο κερένα-αμέν τι μανγκάς-λες. Συγχωρίνελα-αμέν ντα τζιτζίνελα αμένγκε. (Ψαλμ. 103:13· Ησ. 49:15) Πφαμπόλα αμένγκε. Κάνα ντουκχάσα, ντουκχάλα βοβ-ντα. (Ζαχ. 2:8) Βοηθίνελα-αμέν τι γνωρίνας-λες ντα τι αβάς λέσκε αμαλά. (Ψαλμ. 25:14· Πράξ. 17:27) Ντα ισί ταπεινός. «Κερέλα τελέ για τι ντικχέλ ο ουρανός ντα ι πφουβ, ντα βάντελα κατά τσικ οντουλές σο νανέ σημαντικός». (Ψαλμ. 113:6, 7) Σαρ αβέλα-πες μα τι μανγκάς τι δοξάνας εκχέ ασακέ Ντεβλές;​—Ψαλμ. 86:12.

7. Καγιά σουκάρ ευκαιρία τθεράσα;

⁷ Δοξάνασα ι Ιεχωβάς επειδή μανγκάσα ο γιαβερά-ντα τι σικλιόν λέσκε. Μπουτ τζενέ να τζανένα ι αλήθεια ι Ιεχωβάσκε. Σόσκε; Επειδή ο Μπενγκ βακερντάς μπουτ μπαρέ ψέματα λέσκε, ντα ο τζενέ πακιάνα ανταλά ψέματα. (2 Κορ. 4:4) Ο Μπενγκ κερντάς ι τζενέν τι πακιάν ότι ο Ντεβέλ μανγκέλα τι τιμωρίνελ-αμέν, ότι να πφαμπόλα αμένγκε ντα ότι βοβ αντάς σαρέ ο βάσανα σο ισί κο ντουνιάς. Αλλά αμέν τζανάσα ι αλήθεια αμαρέ Ντεβλέσκε! Τθεράσα ι ευκαιρία τι βακεράς κο γιαβερά καζόμ  λατσσό Ντεβέλ ισί μπαγιά ντα τι βοηθίνας-λεν τι ντεν λέστε δόξα βον-ντα. (Ησ. 43:10) Ο Ψαλμός 96 σικαβέλα αμένγκε καζόμ σημαντικός ισί τι ντας δόξα κο Ιεχωβά. Κα σικλιάς κατά ψαλμός ανταβά σαρ μπορίνασα τι ντας κο Ιεχωβά ι δόξα σο αξίνελα.

ΣΑΡ ΜΠΟΡΙΝΑΣΑ ΤΙ ΝΤΑΣ ΚΟ ΙΕΧΩΒΑ Ι ΔΟΞΑ ΣΟ ΑΞΙΝΕΛΑ;

8. Καβά ισί εκ τρόπος σο μπορίνασα τι δοξάνας ι Ιεχωβάς; (Ψαλμός 96:1-3)

⁸ Διαβάνεν Ψαλμός 96:1-3. Μπορίνασα τι δοξάνας ι Ιεχωβάς οντουλέντζαρ σο βακεράσα κο γιαβερά λέσκε. Ανταλέ εδαφιόντε, ο Ιεχωβά καλίνελα πι λαός “τι γκιλιαβέν λέσκε”, «τι δοξάνεν λέσκο ναβ», “τι βακερέν ο λατσσέ αμπέρια ότι ο Ντεβέλ σώνελα ι τζενέν” ντα τι «βακερέν κο τθεμά καζόμ μπαρί ισί λέσκι δόξα». Σαρέ ανταλά ισί τρόποι σο μπορίνασα τι δοξάνας αμαρέ Νταντές. Ο πιστοί Ιουδαίοι ντα ο πρώτοι Χριστιανοί να σακιντίνενας τι βακερέν κο γιαβερά ο μπουτ σουκάρ ιδιότητες ι Ιεχωβάσκε ντα ο λατσσέ πράγματα σο κερντάας λένγκε. (Δαν. 3:16-18· Πράξ. 4:29) Σαρ μπορίνασα τι κεράς-λες αμέν-ντα ανταβά;

9, 10. Σο σικλιόνα οντουλέσταρ σο αβιλό-πες κι Αντζελίνα; (Ντικχέν ι φωτογραφία-ντα)

⁹ Σκεφτίνεν σο αβιλό-πες κι Αντζελίνα, a εκχέ πφενιάτε σο τζουβντιόλα κι Αμερική. Κερντάς λάφι μπίνταρανες ι Ιεχωβάσκε οτθέ σο κερέλα μπουτί. Η Αντζελίνα ισινέ νεβί οντουλέ μπουτιάτε. Οτθάρ καλιντέ-λα γιεκ γιαβερέ τζενέντζαρ σο μόλις αρχισάλεας κι μπουτί για τι κερέν εκ συνάντηση. Κι συνάντηση οντιά, σαρέ μπορίνενας τι βακερέν κο γιαβερά μερικά πράγματα πουμαρέ νεαυτόσκε. Η Αντζελίνα ετοιμαντάς τι σικαβέλ λένγκε μερικές φωτογραφίες για τι εξηγίνελ λένγκε ι μπαρί χαρά σο τθερέλα σαρ Μάρτυρας ι Ιεχωβάσκι. Όμως, χάνικ πριν τι αβέλ λάκι σειρά τι κερέλ λάφι, εκ τζενό λάκε μπουτιάταρ βακερντάς ότι μπαριλόας σαρ Μάρτυρας ι Ιεχωβάσκο. Αρχισάλο τι κοροϊδίνελ οντουλά σο πακιάσα. Η Αντζελίνα βακερέλα: «Αγχωσάλομας μπουτ. Αλλά σκεφτιντόμ: “Ναστί ατσσάβα πφαντέ βαστέντζαρ. Πρέπει τι βακεράβ λένγκε σαρ ισί μπαγιά ο Ιεχωβά”».

¹⁰ Κάνα ο τζενό μπιτισκιαρντάς πο λάφια, η Αντζελίνα κερντάς εκ χουρντί προσευχή αντρά-πέσταρ. Σοράν βακερντάς λέσκε σουκάρ τροπόσαρ: «Με-ντα μπαριλόμ σαρ τούι. Με-ντα μπαριλόμ σαρ Μάρτυρας ι Ιεχωβάσκι ντα συνεχίναβα τι αβάβ μέχρι αντιβές». Οντουβά σο αβιλό-πες αγχωντάς-λα μπουτ, αλλά η Αντζελίνα ατσσιλί ήρεμη. Σικαντάς λένγκε ο φωτογραφίες σο υπηρετίνελα χαράσαρ ι Ιεχωβάς  γιεκ πι αμαλέντζαρ ντα εξηγιντάς λένγκε με σεβασμός οντουλά σο πακιάλα. (1 Πέτρ. 3:15) Καβά ισινέ ο αποτέλεσμας; Κάνα η Αντζελίνα μπιτισκιαρντάς οντουλά σο βακερέλας, ο μουρς ηρεμισάλο. Βακερντάς ατζέ-ντα μερικά λατσσέ πράγματα σο τζουβντιλόας κάνα κερέλας παρέα ι Μαρτυρέντζαρ. Η Αντζελίνα βακερέλα: «Επειδή ο Ιεχωβά ισί αζόμ λατσσό Ντεβέλ, αξίνελα τι τσσίντας λέσταρ. Ισί προνόμιος αμένγκε τι κεράς λάφι λέσκε ναβέσκε». Αμένγκε-ντα ισί προνόμιος τι δοξάνας ι Ιεχωβάς ατζέ-ντα κάνα ο γιαβερά προσπαθίνενα τι χαλαβέν λέσκο ναβ.

11. Σαρ σικαντέ κατά πουρανέ μπρεσά ο υπηρέτες ι Ιεχωβάσκε ότι κερένα οντουβά σο βακερέλα κο Ψαλμός 96:8;

¹¹ Διαβάνεν Ψαλμός 96:8. Μπορίνασα τι δοξάνας ι Ιεχωβάς οντουλέντζαρ σο τθεράσα. Ο αληθινοί υπηρέτες ι Ιεχωβάσκε πάντα ντένας λέστε δόξα ανταλέ τροπόσαρ. (Παρ. 3:9) Για παράδειγμας, ο Ισραηλίτες ντινέ λοβέ ντα πράγματα σο τθερένας αξία για τι βοηθίνεν τι χτίντιβελ ο ναός ντα τι φροντίνεν-λες. (2 Βασ. 12:4, 5· 1 Χρον. 29:3-9) Μερικοί κατά μαθητές ι Ιησούσκε ντινέ «πουμαρέ πραγματένταρ» για τι μπορίνελ βοβ ντα λέσκε απόστολοι τι τθερέν οντουλά σο χρειαζίντιβενας. (Λουκ. 8:1-3) Εμ ο πρώτοι Χριστιανοί βοηθιντέ πουμαρέ πφραλέν ντα πφενίν σο τζουβντιόνας τθεμέντε σο υπαρχίντιβελας μποκχ. (Πράξ. 11:27-29) Αντιβές, αμέν-ντα μπορίνασα τι δοξάνας ι Ιεχωβάς αντράλ κατά συνεισφορές σο κεράσα.

12. Σαρ μπορίνενα αμαρέ συνεισφορές τι ντεν δόξα κο Ιεχωβά; (Ντικχέν ι φωτογραφία-ντα)

¹² Σκεφτίνεν σάντε εκ παράδειγμας σο σικαβέλα σαρ αμαρέ συνεισφορές ντένα δόξα κο Ιεχωβά. Κο 2020 κι Ζιμπάμπουε η πφουβ σουκιλίας ντα ανταβά ατσσικιαρντάς μπουτ βακίτι. Οντουλέσκε μπουτ τζενέ γκιλέ τι μερέν. Εκ πφεν-ντα σο βακερένας λάκε Πρίσκα γκιλί τι παθίνελ ο ίδιος. Παρόλο σο υπαρχίντιβελας ανταβά πρόβλημας, η Πρίσκα συνεχίνελας τι τζαλ κο έργος κάθε Τετάρτη ντα Παρασκευή ατζέ-ντα κο βακίτι σο οργώνενας. Λάκε γείτονες κοροϊδίνενας-λα σο τζάλα κο έργος αντίς τι τζάλας πι χωραφίντε ντα βακερένας λάκε: «Κα μερές μποκχάταρ». Η Πρίσκα τζανέλας ότι ο Ιεχωβά κα φροντίνελας-λα ντα βακερέλας λένγκε: «Ο Ιεχωβά ποτές να μουκχλάς πι υπηρετόν». Χάνικ πο σοράν ο πφραλά αντράλ κατά οργάνωση μπουτσσαντέ λάκε μερικά πράγματα σο τθερέλας ανάγκη. Οντουλά πράγματα τθερέλας-λεν χάρη κο συνεισφορές αμαρέ. Ο γείτονες της Πρίσκας ατσσιλέ πουταρντέ μόσαρ ντα βακερντέ λάκε: «Ο Ντεβέλ  ποτές να μουκχλάς-τουτ. Οτθάρ, μανγκάσα τι σικλιάς πο μπουτ λέσκε». Εφτά κατά γείτονες λάκε αρχισάλε τι τζαν κο συναθροίσεις.

13. Σαρ μπορίνελα τι δοξάνελ ι Ιεχωβάς αμαρί συμπεριφορά; (Ψαλμός 96:9)

¹³ Διαβάνεν Ψαλμός 96:9. Μπορίνασα τι δοξάνας ι Ιεχωβάς με τη συμπεριφορά αμαρί. Ο ιερείς σο υπηρετίνενας κο ναός κι Ιεχωβάσκο έπρεπε τι αβέν πάκι οπρά-πουμέντε. (Έξοδ. 40:30-32) Αλλά ατζέ πο σημαντικός ανταλέσταρ ισινέ τι τθερέν πάκι συμπεριφορά. Ανταβά μανγκέλα τι βακερέλ μα τι κερέν ο πράγματα σο μισίνελα ο Ιεχωβά. (Ψαλμ. 24:3, 4· 1 Πέτρ. 1:15, 16) Χρειαζίντιβελα τι μαράς-αμέν για τι νικαβάς οπρ’ αμένταρ ο πουρανό χαρακτήρας. Ανταβά μανγκέλα τι βακερέλ μα τι σκεφτίνας ντα μα τι κεράς πράγματα σο πφανγκένα ι Ιεχωβάσκο γκι. Οκιά μπάνταρ χρειαζίντιβελα τι ιριάς ο νεβό χαρακτήρας. Ανταβά μανγκέλα τι βακερέλ τι σικλιάς σαρ τι σκεφτίνας ντα τι συμπεριφερίντιβας τροπόσαρ σο σικαβέλα ότι μοιάζασα κο Ιεχωβά ντα σικαβάσα λέσκε σουκάρ ιδιότητες. (Κολ. 3:9, 10) Με τη βοήθεια ι Ιεχωβάσκι, ατζέ-ντα ο τζενέ σο κερντέ μπουτ μπέτι πράγματα μπορίνενα τι αλλάνεν ντα τι ιρίν ο νεβό χαρακτήρας.

14. Σο σικλιόνα οντουλέσαρ σο αβιλό-πες με τον Τζακ; (Ντικχέν ι φωτογραφία-ντα)

¹⁴ Για παράδειγμας ο Τζακ ισινέ αζόμ γκεραλό ντα επικίνδυνος τζενό σο ο γιαβερά ντένας-λες βίκος «Μπενγκ». Ιτιρί οντουλέ μπουτ μπέτι πραγματένταρ σο κερντάς καταδικαντέας-λες τι μουνταρέν-λες. Όμως καζόμ μπεσέλας τι μουνταρέν-λες, ο Τζακ δεχτιντάς τι κερέλ μελέτη εκχέ πφραλέσαρ σο κερέλας έργος κι φυλακή σο ισινέ βοβ. Παρόλο σο κερντάας αζόμ μπέτι πράγματα ο Τζακ νικαντάς οπρά-πέσταρ ο πουρανό χαρακτήρας ντα αντικάς μπορισάλο τι μπολντιόλ. Αλλαξάλο αζόμ μπουτ σο ο ντιβές σο ισινέ τι μουνταρέν-λες μερικοί κατά φύλακες ροβένας. Εκ τζενό σο αρακχαβέλας ι φυλακισμέ τζενέν βακερντάς: «Ανγκλέ, ο Τζακ ισινέ ο πο γκεραλό τζενό αντρέ κι φυλακή. Ακανά ισί εκ κατά πο λατσσέ». Ι γιαβέρ εβδομάδα αφού μουνταρντέ τον Τζακ, ο πφραλά σο γκιλέ τι κερέν ι συνάθροιση κι φυλακή γνωριντέ εκχέ φυλακισμέ τζενές σο αβέλας κι συνάθροιση πρώτη φαρ. Σο κερντάς-λες τι μανγκέλ τι τζαλ κι συνάθροιση; Σαστισάλοας με το αλλαγές σο κερντάας ο Τζακ ντα μανγκέλας τι σικλιόλ σο χρειαζίντιβελας τι κερέλ για τι ντελ λατρεία ι Ιεχωβάς. Καζόμ μπαρί δόξα μπορίνελα τι ντελ αμαρί συμπεριφορά αμαρέ Νταντέστε σο ισί κο ουρανός!​—1 Πέτρ. 2:12.

 ΣΑΡ ΚΑ ΔΟΞΑΝΕΛ Ο ΙΕΧΩΒΑ ΠΟ ΝΑΒ ΑΤΖΕΧΑΝΙΚ;

15. Σαρ κα δοξάνελ ο Ιεχωβά ντιπ πο ναβ ατζεχάνικ; (Ψαλμός 96:10-13)

¹⁵ Διαβάνεν Ψαλμός 96:10-13. Ανταλά τελευταία εδάφια σο ισί κο Ψαλμός 96 σικαβένα ότι ο Ιεχωβά κρίνελα δίκαια ντα ισί Βασιλιάς. Σαρ κα δοξάνελ ο Ιεχωβά πο ναβ ατζεχάνικ; Κάνα κα κρίνελ ι τζενέν. Μπουτ σουγκό κα καταστραφίνελ ι Βαβυλώνα ι Μπαρί επειδή ανέλα μπαρί λατζ λέσκε άγιε ναβέστε. (Αποκ. 17:5, 16· 19:1, 2) Μερικοί σο κα ντικχέν πουμαρέ γιακχίντζαρ τι καταστραφίντιβελ η Βαβυλώνα η Μπαρί μπορεί τι αβέν αμέντζαρ για τι ντας λατρεία ι Ιεχωβάς γιεκ. Τελικά, κο Αρμαγεδδώνας, ο Ιεχωβά κα καταστραφίνελ σαρό ο πφιρνό ντουνιάς ι Μπενγκέσκο. Κα καταστραφίνελ σαρέ οντουλέν σο τζάνα λέστε κόντρα ντα πρασάνα λέσκο ναβ. Αλλά κα σώνελ σαρέ οντουλέν σο μανγκένα-λες, σο ντένα λέστε καν ντα ισί περήφανοι σο ντένα λέστε δόξα. (Μάρκ. 8:38· 2 Θεσ. 1:6-10) Σοράν κατά τελευταία δοκιμασία σο κα αβέλ-πες κάνα κα τελειώνεν ο χίλια μπρεσά σο κα κερέλ κουμάντος ο Χριστός, ο Ιεχωβά κα αγιάνελ ντιπ πο ναβ. (Αποκ. 20:7-10) Αζομάν, «σαρέ ο τζενέ οπράλ κι πφουβ κα σικλιόν για τη δόξα ι Ιεχωβάσκι σαρ ο πανιά ιτσσαρένα ι ντεριάβ».​—Αββακ. 2:14.

16. Σο ισινέν αποφασισμέ τι κερέν; (Ντικχέν ι φωτογραφία-ντα)

¹⁶ Σο σουκάρ κα αβέλ κάνα σαρέ ο τζενέ κα ντεν κο Ιεχωβά ι δόξα σο αξίνελα λέσκο ναβ! Αλλά μέχρι οντουβά ντιβές, μπορίνασα τι κεράς ο πο λατσσό για τι ντας αμαρέ Ντεβλέστε δόξα κατέ-ντα τι αβάς. Για τι σικαβέλ αμένγκε καζόμ σημαντικός ισί ανταβά, ο Κυβερνών Σώμας τραμπιντάς ο εδάφιος Ψαλμός 96:8 για τι αβέλ ο εδάφιος ι μπρεσέσκο για το 2025: «Ντεν κο Ιεχωβά ι δόξα σο αξίνελα λέσκο ναβ».