1. Σόσκε ισί λατσσό αμένγκε τι παρακολουθίνας ι Ανάμνηση ι Ιησούσκε μεριμάσκι κάθε μπρες;

 Ο ΙΕΧΩΒΑ ντινάς-αμέν εκ πολύτιμος δώρος κάνα μπουτσσαντάς πι Τσσαβές τι μερέλ αμένγκε! (2 Κορ. 9:15) Επειδή ο Ιησούς μουλό αμένγκε, μπορίνασα τι αβάς φίλοι ι Ιεχωβάσαρ. Επίσης τθεράσα ι ελπίδα τι τζουβντιάς για πάντα. Τθεράσα μπουτ λόγους για τι σικαβάς εκτίμηση ι Ιεχωβάσκε, σο ντινάς ο λύτρος επειδή μανγκέλα-αμέν μπουτ! (Ρωμ. 5:8) Για μα τι μπιστράς ποτές οντουβά σο κερντέ αμένγκε ο Ιεχωβά ντα ο Ιησούς, ντιντιλί-αμέν η εντολή κατά Χριστός τι κεράς ι Ανάμνηση λέσκε μεριμάσκι.​—Λουκ. 22:19, 20.

2. Σο κα ντικχάς ανταλέ μαθημάστε;

² Ανταβά μπρες, η Ανάμνηση κα αβέλ-πες κο Σάββατος 12 Απριλίου 2025. Σίγουρα σαρέ κα κεράς ο πο λατσσό για τι αβάς οτθέ. Κα αβέλας λατσσό ο κάθε εκ αμένταρ τι αρακχέλ χρόνος πριν ντα σοράν κατά Ανάμνηση για τι σκεφτίνελ λατσσές a οντουβά σο κερντέ αμένγκε ο Ιεχωβά ντα λέσκο Τσσαβό. Κο μάθημας ανταβά, κα ντικχάς σο σικλιάσα κατά λύτρος ι Ιεχωβάσκε ντα λέσκε Τσσαβέσκε. Ο γιαβέρ μάθημας κα βοηθίνελ-αμέν τι αγαβάς σο λατσσιπέ ντικχάσα κατά λύτρος ντα σαρ μπορίνασα αμέν τι σικαβάς αμαρί εκτίμηση λέσκε.

ΣΟ ΣΙΚΛΙΑΡΕΛΑ-ΑΜΕΝ Ο ΛΥΤΡΟΣ Ι ΙΕΧΩΒΑΣΚΕ

3. Σαρ αβέλα-πες ο μεριπέ εκχέ τζενέσκο τι ελευθερώνελ εκατομμύριε τζενέν κατά αμαρτία ντα κατά μεριπέ; (Ντικχέν ι φωτογραφία-ντα)

³ Ο λύτρος σικλιαρέλα-αμέν ότι ο Ιεχωβά ισί εκ Ντεβέλ σο μανγκέλα ι δικαιοσύνη. (Δευτ. 32:4) Σαρ; Σκεφτίνεν: Κάνα ο Αδάμ να ντινάς καν κο Ντεβέλ, αβιλό αμαρτωλός ντα μουλό. Επειδή αμέν ισινάμ λέσκε τσσαβέ, αμέν-ντα ισινάμ αμαρτωλοί ντα μεράσα. (Ρωμ. 5:12) Για τι ελευθερώνελ-αμέν κατά αμαρτία ντα  κατά μεριπέ, ο Ιεχωβά μπουτσσαντάς ι Ιησούς για τι ντελ ο λύτρος. Αλλά σαρ αβέλα-πες ο μεριπέ εκχέ τέλειε τζενέσκο τι ελευθερώνελ αζόμ μπουτέ τζενέν κατά αμαρτία ντα κατά μεριπέ; Ο απόστολος Παύλος βακερέλα: «Αντράλ εκχέ τζενέσταρ σο να ντινάς καν [κατά Αδάμ], μπουτ τζενέ αβιλέ αμαρτωλοί. Αντικάς-ντα αντράλ εκχέ τζενέσταρ σο ντινάς καν [κατά Ιησούς], μπουτ τζενέ κα αβέν δίκαιοι». (Ρωμ. 5:19· 1 Τιμ. 2:6) Άρα, σαρ βακερντάς ο Παύλος, σαρέ ο τζενέ ισί αμαρτωλοί ντα πρέπει τι μερέν επειδή εκ τέλειος τζενό να ντινάς καν κο Ντεβέλ. Οτθάρ, για τι ελευθερώντιβας κατά αμαρτία ντα κατά μεριπέ, εκ τέλειος τζενό έπρεπε τι ντελ καν κο Ντεβέλ.

4. Σόσκε να μουκχλάς ο Ιεχωβά ι Αδαμίσκε τσσαβέν σο τθερένας λατσσό γκι τι τζουβντιόν για πάντα;

⁴ Χρειαζίντιβελας μπαγιά ο Ιησούς τι μερέλ για τι σώνελ-αμέν; Σόσκε ο Ιεχωβά να μουκχλάς ι Αδαμίσκε τσσαβέν σο τθερένας λατσσό γκι τι τζουβντιόν για πάντα; Μπορεί τι σκεφτίνας ότι ανταβά κα αβέλας ο πο λατσσό τρόπος για τι λύντιβελ o πρόβλημας. Αλλά ανταβά να κα ερεσέλας για τη τέλεια δικαιοσύνη ι Ιεχωβάσκι. Επειδή ο Ιεχωβά ισί δίκαιος, να κα τραμπίνελας ποτές τι πφάντελ πο γιακχά κι μπαρί αμαρτία σο κερντάς ο Αδάμ κάνα τραμπιντάς μα τι ντελ-λες καν.

5. Σόσκε ισινάμ σίγουροι ότι ο Ιεχωβά κα κερέλ πάντα οντουβά σο ισί σωστός;

⁵ Σο κα αβέλας-πες όμως άμα ο Ιεχωβά κα κερέλας κάτι σο να ισινέ δίκαιος; Σο κα αβέλας-πες δηλαδή άμα κα μουκχέλας τι τζουβντιόν για πάντα ο προσάγγονα ι Αδαμίσκε χωρίς τι ντιντιόλ ο λύτρος; Αντικάς ο τζενέ μπορεί τι σκεφτίνενας ότι κα κερέλας κάτι γιαβέρ-ντα σο να ισινέ δίκαιος ντα ότι μπορεί μα τι κερέλ οντουβά σο βακερντάς για το μέλλον. Μπορεί μα τι αβένας σίγουροι άμα ο Ιεχωβά κα κερέλας τι νικιόν μπαγιά σαρέ λέσκε υποσχέσεις. Αλλά να χρειαζίντιβελα τι ανησυχίνας ανταλέσκε. Ο Ιεχωβά κερντάς οντουβά σο ισινέ δίκαιος παρόλο σο ανταβά αντάς λέσκε μπαρί ντουκχ. Θυσιαντάς πι μοναδικέ Τσσαβές. Ανταβά κερέλα-αμέν σίγουρους ότι πάντα κα κερέλ ο σωστός.

6. Καγιά γιαβέρ ιδιότητα κερντάς ι Ιεχωβάς τι μπουτσσαβέλ πι Τσσαβές; (1 Ιωάννη 4:9, 10)

⁶ Υπαρχίντιβελα εκ γιαβέρ-ντα ιδιότητα σο κερντάς ι Ιεχωβάς ατζέ πο μπουτ τι μπουτσσαβέλ ι Ιησούς τι μερέλ αμένγκε. Ισί η αγάπη σο τθερέλα αμένγκε. (Ιωάν. 3:16· διαβάνεν 1 Ιωάννη 4:9, 10) Ο Ιεχωβά μπουτσσαντάς πι Τσσαβές τι μερέλ αμένγκε επειδή μανγκέλα τι τζουβντιάς για πάντα ντα επίσης επειδή μανγκέλα τι αβάς αντρέ λέσκε φαμιλιάτε. Σκεφτίνεν: Κάνα ο Αδάμ αμαρτισάλο, να ισινέ πια αντρέ κι φαμιλί κι Ιεχωβάσκι. Οτθάρ, σαρέ αμέν να ισινάμ αντρέ κι φαμιλί κι Ντεβλέσκι κάνα μπιάντιβασα. Όμως, επειδή ντιντιλό ο λύτρος, σαρέ ο τζενέ σο πακιάνα κο Ντεβέλ ντα ντένα-λες καν κα αβέλ εκ ντιβές σο κα μπορίνεν τι αβέν αντρέ λέσκε φαμιλιάτε. Ατζέ-ντα ακανά ο Ιεχωβά μπορίνελα τι συγχωρίνελ αμαρέ αμαρτίες ντα μπορίνασα τι τθεράς εκ λατσσί φιλία λέσαρ ντα αμαρέ πφραλέντζαρ  ντα πφενίντζαρ. Ο Ιεχωβά μανγκέλα-αμέν μπαγιά!​—Ρωμ. 5:10, 11.

7. Σαρ οντουλά σο τσσιντιντάς ο Ιησούς βοηθίνενα-αμέν τι αγαβάς καζόμ μπουτ μανγκέλα-αμέν ο Ιεχωβά;

⁷ Μπορίνασα τι αγαβάς καζόμ μπουτ μανγκέλα-αμέν ο Ιεχωβά άμα κα σκεφτίνας καζόμ ντουκχασάλο ο Ντεβέλ κάνα ντικχέλας πι Τσσαβές τι τσσίντελ μπουτ. Ο Σατανάς βακερντάς ότι καέκ υπηρέτης ι Ντεβλέσκο να κα ατσσόλας πιστός Λέστε κάνα κα νακχέλας δυσκολίες. Για τι νικαβέλ ψεύτης ι Μπενγκές, ο Ιεχωβά μουκχλάς ι Ιησούς τι τσσίντελ μπουτ πριν τι μερέλ. (Ιώβ 2:1-5· 1 Πέτρ. 2:21) Ο Ιεχωβά ντικχέλας τζενέν τι πρασάν ι Ιησούς, στρατιωτέν τι νταπέν-λες ντα σοράν τι καρφώνεν-λες κο κας. Σοράν ο Ιεχωβά ντικχλάς πι αγαπημέ Τσσαβές τι ντουκχάλ μπουτ ντα τι μερέλ. (Ματθ. 27:28-31, 39) Ο Ιεχωβά κα μπορίνελας τι τσσιναβέλ-λεν σαρέ ανταλά κάνα-ντα κα μανγκέλας. Για παράδειγμας, κάνα ο τζενέ βακερντέ: «Τι σώνελ-λες ακανά [ο Ντεβέλ] άμα μανγκέλα-λες», ο Ιεχωβά κα μπορίνελας τι κερέλ-λες. (Ματθ. 27:42, 43) Όμως, άμα κα κερέλας-λες ανταβά, σοράν ο Ιησούς να κα μπορίνελας τι ντέλας πι ζωή σαρ λύτρος. Αντικάς να κα τθεράας ελπίδα. Οτθάρ ο Ιεχωβά μουκχλάς πι Τσσαβές τι τσσίντελ αζόμ μπουτ ντα κο τέλος τι μερέλ.

8. Νιωσάλο ο Ιεχωβά ντουκχ κάνα ντικχλάς πι Τσσαβές τι τσσίντελ μπουτ; Εξηγίνεν. (Ντικχέν ι φωτογραφία-ντα)

⁸ Δεν πρέπει τι σκεφτίνας ότι επειδή ο Ντεβέλ ισί ο πο Ζουρανό, να τθερέλα αισθήματα! Κάνα δημιουργιντάς ι τζενέν, κερντάς-λεν τι τθερέν αισθήματα. Ντα επειδή η Γραφή βακερέλα ότι δημιουργιντάς-αμέν για τι μοιάζας λέστε, ανταβά μανγκέλα τι βακερέλ ότι τθερέλα Βοβ-ντα. Η Γραφή βακερέλα ότι μπουτ φαρ ο Ντεβέλ νιωσάλο “ντουκχ κο γκι” ντα “πφανγκιλό λέσκο γκι”. (Ψαλμ. 78:40, 41) Επίσης σκεφτίνεν σο αβιλό-πες με τον Αβραάμ ντα τον Ισαάκ. Ο Ιεχωβά βακερντάς κο Αβραάμ τι θυσιάνελ πι μοναδικέ τσσαβές. (Γέν. 22:9-12· Εβρ. 11:17-19) Ανέν τουμαρέ γκοντιάτε σαρέ οντουλά σο νιωθίνελας ο Αβραάμ κάνα γκιλό τι μουνταρέλ πι τσσαβές. Σκεφτίνεν καζόμ πο μπουτ στεναχωριμέ ντα αγχωμέ πρέπει τι ισινέ ο Ιεχωβά κάνα ντικχέλας ι τζενέν τι βασανίνελ λέσκε Τσσαβές ντα τι μουνταρέλ-λες!​—Ντικχέν ο βίντεος Να Μιμείστε την Πίστη Τους​—Αβραάμ, Μέρος 2 κο jw.org.

9. Σο σικλιάσα κατά εδάφια Ρωμαίους 8:32, 38, 39 για την αγάπη ι Ιεχωβάσκι;

⁹ Αντράλ κατά λύτρος σικλιάσα ότι καέκ να μανγκέλα-αμέν καζόμ μανγκέλα-αμέν ο Ιεχωβά. Ούτε ατζέ-ντα αμαρέ τζενέ ντα αμαρέ λατσσέ αμαλά. (Διαβάνεν Ρωμαίους 8:32, 38, 39) Ισινάμ ντιπ σίγουροι ότι ο Ιεχωβά μανγκέλα-αμέν πο μπουτ από ότι μανγκάσα αμέν αμαρό νεαυτός. Μανγκένα τι τζουβντιόν για πάντα; Ο Ιεχωβά μανγκέλα-λες ανταβά ατζέ πο μπουτ τουμένταρ. Μανγκένα τι συγχωρίντιβεν τουμαρέ αμαρτίες; Ο Ιεχωβά μανγκέλα-λες ανταβά ατζέ πο μπουτ τουμένταρ. Οντουβά σο μανγκέλα αμένταρ ισί σάντε τι σικαβάς εκτίμηση για το πολύτιμος δώρος ανταβά, τι σικαβάς πίστη λέστε ντα τι ντας-λες καν. Ο λύτρος ισί εκ πολύτιμος δώρος σο σικαβέλα αμένγκε καζόμ μπουτ μανγκέλα-αμέν ο  Ιεχωβά. Ντα κο νεβό ντουνιάς, κα σικλιάς ατζέ πο μπουτ πράγματα για την αγάπη ι Ιεχωβάσκι.​—Εκκλ. 3:11.

Ο ΛΥΤΡΟΣ ΣΙΚΛΙΑΡΕΛΑ-ΑΜΕΝ Ι ΧΡΙΣΤΟΣΚΕ

10. (α) Καβά πράγμας αγχώνελας ι Ιησούς κάνα ισινέ τι μερέλ; (β) Καλέ τροπόσαρ σικαντάς ο Ιησούς ότι ο Ιεχωβά τθερέλα δίκιος; (Ντικχέν ο πλαίσιος-ντα « Η Θυσία ι Ιησούσκι Σικαντάς ότι ο Ιεχωβά Ισί Δίκαιος»)

¹⁰ Ι Ιησούς ενδιαφερίνελα-λες μπουτ σαρ ντικχένα ο τζενέ λέσκε Νταντές. (Ιωάν. 14:31) Ο Ιησούς ισινέ μπουτ αγχωμέ επειδή κα μουνταρένας-λες ι ίδιε τροπόσαρ σο μουνταρένας εκχέ τζενές σο οντουλέντζαρ σο κερέλας να σεβάνελας ι Ντεβλές. Αγχώνελας επειδή ανταβά μπορεί τι κερέλας ι τζενέν τι σκεφτίνεν μπέτι πράγματα λέσκε Νταντέσκε. Άκ’ σόσκε μολιντάς ι Ντεβλές: «Ντάντε μου, άμα αβέλα-πες, λε ανταβά ποτήρι ντουρ μάνταρ». (Ματθ. 26:39) Όμως επειδή ο Ιησούς ατσσιλό πιστός κο Ιεχωβά μέχρι κο μεριπέ, σικαντάς ξεκάθαρα ότι οντουλά μπέτι πράγματα σο βακερέλα ο Μπενγκ λέσκε Νταντέσκε νανέ μπαγιά.

11. Σαρ σικαντάς ο Ιησούς πι μπαρί αγάπη ι τζενένγκε; (Ιωάννης 13:1)

¹¹ Κάτι γιαβέρ σο σικλιάσα αντράλ κατά λύτρος ισί ότι ο Ιησούς πφαμπόλα μπουτ ι τζενένγκε, ντα ατζέ πο μπουτ οντουλένγκε σο τζάνα παλά-λέστε. (Παρ. 8:31· διαβάνεν Ιωάννης 13:1) Για παράδειγμας, ο Ιησούς τζανέλας ότι μερικά κατά πράγματα σο έπρεπε τι κερέλ κι πφουβ κα αβένας μπουτ δύσκολα, ντα ατζέ πο μπουτ λέσκο μεριπέ. Αλλά ο Ιησούς κερντάς σαρέ ανταλά δύσκολα πράγματα, όχι απλώς επειδή ο Ιεχωβά βακερντάας λέσκε τι κερέλ-λεν, αλλά επειδή μανγκέλα ι τζενέν. Βακερέλας κο τζενέ ο λατσσέ αμπέρια, σικλιαρέλας-λεν, βοηθίνελας-λεν ντα αντικάς σικαντάς πι μπαρί αγάπη λένγκε. Ατζέ-ντα κο ντιβές σο μουλό, ο Ιησούς ντινάς πι σαατίσταρ για τι τθοβέλ ο πιντρέ πι αποστολόνγκε ντα τι ντελ-λεν ζορ. (Ιωάν. 13:12-15) Σοράν, παρόλο σο τσσίντελας μπαρί ντουκχ οπράλ κο κας, ο Ιησούς ντινάς ελπίδα κο τσορ σο ισινέ πασέ λέστε κάνα βακερντάς λέσκε ότι κα αβέλας  λέσαρ κο Παράδεισος. Επίσης σικαντάς ότι πφαμπόλας πι νταγιάκε ντα μανγκλάς κατά Ιωάννης τι αρακχαβέλ-λα. (Λουκ. 23:42, 43· Ιωάν. 19:26, 27) Ο Ιησούς σικαντάς πι μπαρί αγάπη ι τζενένγκε όχι σάντε επειδή μουλό λένγκε, αλλά επειδή συμπεριφερίντιβελα λέντε μανγκιμάσαρ ντα λατσσιμάσαρ.

12. Σο κερέλα ο Ιησούς αμένγκε ακανά;

¹² Ισί μπαγιά ότι ο Ιησούς «μουλό σάντε εκ φαρ», αλλά συνεχίνελα τι κερέλ θυσίες αμένγκε. (Ρωμ. 6:10) Δηλαδή σο κερέλα αμένγκε; Συνεχίνελα τι κερέλ μπουτί για τι ντελ-αμέν ο λατσσίματα σο μπορίνασα τι τθεράς χάρη κο λύτρος. Σκεφτίνεν ο μπουτ πράγματα σο κερέλα. Ισί αμαρό Βασιλιάς, αμαρό Αρχιερέας ντα ο σορό ι κχανγκιριάκο. (1 Κορ. 15:25· Εφεσ. 5:23· Εβρ. 2:17) Γκίντελα ι χρισμέ τζενέν ντα ο μπαρό πλήθος, ντα ανταβά ισί κάτι σο κα συνεχίνελ τι κερέλ-λες μέχρι τι τελειώνελ η μπαρί στεναχώρια. b (Ματθ. 25:32· Μάρκ. 13:27) Επίσης χρησιμοποιήνελα ι πιστέ ντα φρόνιμε δουλός για τι ντελ-αμέν οντουλά σο χρειαζίντιβασα για τι υπηρετίνας ι Ιεχωβάς πιστά ανταλά τελευταία ντιβεσά. (Ματθ. 24:45) Ντα κο χίλια μπρεσά σο κα αβέλ Βασιλιάς, κα συνεχίνελ τι κερέλ μπουτ πράγματα αμένγκε. Ο Ιεχωβά μπαγιά ντινάς πι Τσσαβές αμένγκε!

ΣΥΝΕΧΙΝΕΝ ΤΙ ΣΙΚΛΙΟΝ

13. Σαρ μπορίνενα τι συνεχίνεν τι σικλιόν για την αγάπη σο τθερέλα ο Ντεβέλ ντα ο Χριστός αμένγκε;

¹³ Τι σκεφτίνεν λατσσές οντουλά σο κερντάς ο Ιεχωβά Ντεβέλ ντα ο Ιησούς Χριστός τουμένγκε. Ανταβά κα βοηθίνελ-τουμέν τι αγαβέν πο λατσσές ι αγάπη σο τθερένα τουμένγκε. Κο εβδομάδες πριν ντα σοράν κατά Ανάμνηση ανταλέ μπρεσέσκι, μπορίνενα τι διαβάνεν εκ ή πο μπουτ κατά Ευαγγέλια. Μα προσπαθίνεν τι διαβάνεν μπουτ κεφάλαια. Αλλά ντεν τουμαρέ σαατίσταρ για τι σκεφτίνεν γιαβερά-ντα λόγους σο τθεράσα τι μανγκάς ι Ιεχωβάς ντα ι Ιησούς. Ντα κερέν ο πο λατσσό για τι βακερέν κο γιαβερά-ντα οντουλά σο σικλιλέν.

14. Σαρ σικαβέλα ο Ψαλμός 119:97, σαρ κα σικλιάς πο μπουτ για το λύτρος ντα γιαβερέ πραγματένγκε άμα κα ρόντας; (Ντικχέν ι φωτογραφία-ντα)

¹⁴ Άμα ισινέν κι αλήθεια μπουτ μπρεσά, μπορεί τι σκεφτίνενα άμα υπαρχίντιβενα ατζέκ νεβέ πράγματα σο μπορίνενα τι σικλιόν για την δικαιοσύνη ι Ντεβλέσκι, για την αγάπη λέσκι ντα για το λύτρος. Ισί μπαγιά ότι πάντα κα τθεράς κάτι νεβό τι σικλιάς ανταλέ πραγματένγκε. Οτθάρ, σο μπορίνενα τι κερέν; Κερέν ο πο λατσσό για τι βοηθίντιβεν κατά μπουτ πληροφορίες σο ισί κο έντυπα αμαρέ. Κάνα διαβάνενα κάτι κι Γραφή σο ναστί αγαβένα-λες ντιπ, ρόντεν-λες. Σοράν αντρέ κο ντιβές, σκεφτίνεν λατσσές οντουλά  σο αρακχλέν ντα σο σικλιαρένα-τουμέν ανταλά ι Ιεχωβάσκε, λέσκε Τσσαβέσκε ντα για την αγάπη σο τθερένα τουμένγκε.​—Διαβάνεν Ψαλμός 119:97.

15. Σόσκε πρέπει τι συνεχίνας τι σικλιάς νεβέ πράγματα κατά Γραφή;

¹⁵ Μα τσσουβέν τουμαρέ γκίστε άμα να αρακχένα κάτι νεβό ή κάτι σο κερέλα τουμένγκε εντύπωση κάθε φαρ σο διαβάνενα ντα ρόντενα. Σκεφτίνεν ότι ισινέν σαρ ο τζενέ σο ρόντενα για τι αρακχέν χρυσός. Μπουτ φαρ ο τζενέ σο ρόντενα για χρυσός χρειαζίντιβενα μπουτ σαάτια ή ντιβεσά για τι αρακχέν ατζέ-ντα εκ χουρντό κομμάτι. Όμως, να μουκχένα-πες επειδή ο χρυσός, ατζέ-ντα άμα ισί χάνικ, τθερέλα μπαρί αξία λένγκε. Καζόμ πο μπαρί αξία τθερέλα αμένγκε ο κάθε πράγμας σο σικλιάσα κατά Γραφή! (Ψαλμ. 119:127· Παρ. 8:10) Οτθάρ, συνεχίνεν τι διαβάνεν ι Γραφή ντα τι ρόντεν για τι σικλιόν νεβέ πράγματα.​—Ψαλμ. 1:2.

16. Σαρ μπορίνασα τι μοιάζας κο Ιεχωβά ντα κο Ιησούς;

¹⁶ Καζόμ σικλιαρένα-τουμέν κατά Γραφή, ρόντεν τρόπους για τι κερέν οντουλά σο σικλιόνα. Για παράδειγμας, προσπαθίνεν τι συμπεριφερίντιβεν κο γιαβερά δίκαια, σαρ ο Ιεχωβά. Κερέν οντουβά σο μανγκέλα ο Ιεχωβά ντα βοηθίνεν ι γιαβερέν ατζέ-ντα άμα μπάζιμα ανταβά κερέλα τουμαρί ζωή πο δύσκολη, σαρ κερντάς ο Ιησούς-ντα επειδή μανγκέλας πι Νταντές. Επίσης βακερέν κο γιαβερά ο λατσσέ αμπέρια, σαρ ο Ιησούς, για τι τθερέν βον-ντα ι ευκαιρία τι δεχτίνεν ο μπουτ μπαρό δώρος ι Ιεχωβάσκο.

17. Σο κα ντικχάς κο γιαβέρ μάθημας;

¹⁷ Καζόμ πο μπουτ αγαβάσα ντα εκτιμίνασα ο λύτρος, αζόμ πο μπουτ κα μανγκάς ι Ιεχωβάς ντα λέσκε Τσσαβές. Ντα επειδή αμέν κα μανγκάς-λεν πο μπουτ, βον-ντα κα μανγκέν-αμέν ατζέ πο μπουτ. (Ιωάν. 14:21· Ιακ. 4:8) Οτθάρ, τι χρησιμοποιήνας καζόμ πο λατσσές αβέλα-πες οντουλά σο ντέλα-αμέν ο Ιεχωβά για τι συνεχίνας τι σικλιάς για το λύτρος. Κο γιαβέρ μάθημας κα ντικχάς μερικούς τρόπους σο μπορίνασα τι βοηθίντιβας κατά λύτρος ντα τι σικαβάς αμαρί εκτίμηση για την αγάπη ι Ιεχωβάσκι.