1, 2. (α) Σο βακερντάς ο Ιησούς πι μαθητένγκε τι προσοχίνεν; (β) Σόσκε μουκχλέ ο μαθητές ι Ιησούς; (Ντικχέν ο φωτογραφίες-ντα)

 «Ο ΤΖΕΝΟ μανγκέλα τι κερέλ ο λατσσό, αλλά λέσκο σώμας ισί μπίζουρανο». a (Ματθ. 26:41β) Ανταλέ λαφίντζαρ, ο Ιησούς σικαντάς ότι αγαβέλας ότι ισινάμ ατελείς. Αλλά επίσης μανγκέλας αμέν-ντα τι αγαβάς ακαβά: Δεν πρέπει τι αμντίνας ότι πάντα κα τθεράς ι ζορ τι κεράς ο σωστός. Οντιά ιράτ, ο μαθητές ντινέας πουμαρό λάφι ότι ποτές να κα μουκχένας πουμαρέ Κυριός. (Ματθ. 26:35) Μανγκένας μπαγιά τι κερένας ο σωστός. Όμως να αγαβένας καζόμ σουγκό κα μπορίνενας τι χασαρέν πουμαρί ζορ ντα τι κερέν ο λάθος πράγμας, κάνα κα αβέλας εκ δυσκολία. Οτθάρ ο Ιησούς βακερντάς λένγκε: «Ατσσόν τζανγκαντέ ντα μα τσσιναβέν τι προσευχίντιβεν, για μα τι περέν κο πειρασμός».​—Ματθ. 26:41α.

² Δυστυχώς όμως ο μαθητές να ατσσιλέ τζανγκαντέ. Σο κερντέ βον κάνα ο τζενέ ασταρντέ ι Ιησούς; Ατσσιλέ πασέ λέστε ή νταρασάλε ντα νασλέ; Επειδή να ατσσιλέας τζανγκαντέ, ο μαθητές κερντέ ακριβώς οντουβά σο βακερντέας ότι να κα κερένας ποτές​—μουκχλέ ι Ιησούς.​—Ματθ. 26:56.

3. (α) Για τι ατσσάς αφοσιωμέ κο Ιεχωβά, σόσκε δεν πρέπει τι σκεφτίνας ότι πάντα κα τθεράς ι ζορ τι κεράς ο σωστός; (β) Σο κα ντικχάς ανταλέ μαθημάστε;

³ Επειδή ισινάμ ατελείς, να λέλα-αμέν τι σκεφτίνας ότι πάντα κα τθεράς ι ζορ τι κεράς ο σωστός. Ισί μπαγιά ότι ισινάμ αποφασισμέ μα τι μουκχάς τίποτα τι κερέλ-αμέν τι νασάς κατά Ιεχωβά. Όμως, επειδή ισινάμ ατελείς μπορίνασα εύκολα τι περάς κο πειρασμός τι κεράς κάτι λάθος. (Ρωμ. 5:12· 7:21-23) Οτθέ σο να μπεκλεντίνασα-λες, μπορεί τι αβέλ ανγκλ’ αμέντε εκ πειρασμός σο ντικχίντιβελα μπουτ σουκάρ. Μανγκάσα τι ατσσάς αφοσιωμέ κο Ιεχωβά ντα λέσκε  Τσσαβέστε. Οτθάρ, χρειαζίντιβελα τι κεράς ι συμβουλή ι Ιησούσκι τι ατσσάς τζανγκαντέ ντα μα τι περάς κο πειρασμός τι αμαρτίνας. Ανταβά μάθημας κα βοηθίνελ-αμέν τι κεράς-λες ανταβά. Πρώτα, κα ντικχάς καλέ πραγματένταρ πρέπει τι αρακχαβάς-αμέν. Σοράν, σαρ μπορίνασα τι νασάς ντουρ κατά πειρασμός. Ντα κο τέλος, σαρ μπορίνασα τι συνεχίνας τι αρακχαβάς-αμέν κατά αμαρτία.

ΚΑΛΕ ΠΡΑΓΜΑΤΕΝΤΑΡ ΠΡΕΠΕΙ ΤΙ ΑΡΑΚΧΑΒΑΣ-ΑΜΕΝ;

4, 5. Σόσκε πρέπει τι αρακχαβάς-αμέν ατζέ-ντα κατά χουρντέ αμαρτίες;

⁴ Μερικές αμαρτίες ισί πο χουρντέ γιαβερένταρ. Όμως ατζέ-ντα ανταλά μπορεί τι κερέν-αμέν σιγά σιγά τι χασαράς αμαρί φιλία ι Ιεχωβάσαρ. Επίσης, μπορεί τι γκερέν-αμέν πο μπαρέ αμαρτιέντε.

⁵ Σαρέ μπορεί τι ντας κο πειρασμός τι κεράς εκ αμαρτία. Όμως, υπαρχίντιβενα διαφορετικές παγίδες σο μπορεί ο κάθε εκ αμένταρ τι περέλ πο εύκολα. Μπορεί κάποιος τι περέλ κι παγίδα τι κερέλ εκ μπαρί αμαρτία, ή τι τθερέλ εκ μαγαριμέ συνήθεια ή τι σκεφτίνελ σαρ σκεφτίνελα ανταβά ντουνιάς. Για παράδειγμας, εκ τζενό μπορεί τι μαρέλα-πες για μα τι κερέλ λουμνιπέ. Εκ γιαβέρ τζενό μπορεί τι μαρέλα-πες για μα τι κερέλ κάτι μαγαριμέ, σαρ ο αυνανισμός ή για μα τι ντικχέλ πορνογραφία. Εκ γιαβέρ μπορεί τι μαρέλα-πες για τι ατσσικιαρέλ πο νεύρα, για μα τι αβέλ μπαρικανό, ή για τι κερέλ ο σωστός παρόλο σο ο γιαβερά μπορεί τι τζάνα λέσαρ κόντρα. Σαρ βακερέλα ο Ιάκωβος, «ο κάθε εκ δοκιμάντιβελα σόσκε ταρτίντιβελα ντα χουχάντιβελα κατά πράγματα σο μανγκέλα λέσκο γκι».​—Ιακ. 1:14.

6. Καβά πράγμας πρέπει τι αγαβάς λατσσές;

⁶ Τζανένα καλέ παγιδέντε μπορεί τι περέν τουμέν πο εύκολα κο πειρασμός; Άμα να κα αγαβάς καλά ισί αμαρέ αδυναμίες ή άμα βακεράσα ότι ισινάμ αζόμ ζουρανέ σο να κα περάς ποτές σε εκ αμαρτία, χουχαβάσα αμαρό νεαυτός, ντα ανταβά ισί μπουτ επικίνδυνος. (1 Ιωάν. 1:8) Ντεν-τουμέν γκοντί ότι ο Παύλος βακερντάς ότι ατζέ-ντα ο «πνευματικά μουρσά» κα μπορίνενας τι περέν κο πειρασμός άμα νανέ τζανγκαντέ. (Γαλ. 6:1) Δεν πρέπει τι χουχαβάς αμαρό νεαυτός αλλά πρέπει τι αγαβάς καλέ πραγματέντε να ισινάμ αζόμ ζουρανέ.​—2 Κορ. 13:5.

7. Καβά πράγμας πρέπει τι προσοχίνας πο μπουτ; Βακερέν εκ παράδειγμας.

⁷ Αφού κα αγαβάς λατσσές καλέ παγιδέντε μπορεί τι περάς πο εύκολα, σο πρέπει τι κεράς; Τι μαράς-αμέν για τι αβάς πο ζουρανέ ντα αντικάς μα τι περάς κο παγίδες ανταλά! Φιρειπείν, κο πουρανέ μπρεσά, ο μπαρέ πόρτες σο τθερένας ο μπαρέ ντουβάρια ισινέ ο πο εύκολος τρόπος για  τι ντεν ο ντουσμάνια αντρέ κι πόλη. Οτθάρ, κο πόρτες τσσουβένας μπουτέ στρατιωτέν. Αντικάς αμέν-ντα, χρειαζίντιβελα τι προσοχίνας ατζέ πο μπουτ ο πράγματα σο τζανάσα ότι μπορεί τι κερέν-αμέν τι περάς πο εύκολα κο πειρασμός.​—1 Κορ. 9:27.

ΣΑΡ ΜΠΟΡΙΝΑΣΑ ΤΙ ΑΡΑΚΧΑΒΑΣ ΑΜΑΡΟ ΝΕΑΥΤΟΣ ΚΑΤΑ ΑΜΑΡΤΙΑ

8, 9. Σαρ κα μπορίνελας ο τερνό σο ισί κο Παροιμίες, κο κεφάλαιος 7, μα τι κερέλας ανταγιά μπαρί αμαρτία; (Παροιμίες 7:8, 9, 13, 14, 21)

⁸ Σαρ μπορίνασα τι αρακχαβάς αμαρό νεαυτός κατά αμαρτία; Ανέν τουμαρέ γκοντιάτε ι τερνές σο ισί κο Παροιμίες, κο κεφάλαιος 7. Σο σικλιάσα κατά παράδειγμας λέσκο; Βοβ κερντάς λουμνιπέ εκχέ λουμνέ τζουβλιάσαρ. Ο εδάφιος 22 βακερέλα αμένγκε ότι γκιλό παλά-λάτε «αμέσως». Αλλά σαρ ντικχάσα κο εδάφια πο οπρέ, κερντάας μπουτ γιαβερά-ντα πράγματα πριν ανταλέσταρ, σο γκερντέ-λες σιγά σιγά κι αμαρτία.

⁹ Καλά πράγματα γκερντέ ανταλέ τερνές κι αμαρτία; Πρώτα, αζομάν σο περέλας ο καρανίκι, βοβ “πφιρέλας πασέ κο ντρομ” κι λουμνέ τζουβλιάκο. Σοράν, τζάλας κάρινγκ λάκε κχερέστε. (Διαβάνεν Παροιμίες 7:8, 9) Σοραντάν, κάνα ντικχλάς ι τζουβλιά, να νασλό. Οκιά μπάνταρ, μουκχλάς-λα τι τσσουμίντελ-λες ντα ασουνέλας-λα καζόμ βόι βακερέλας λέσκε για το θυσίες συμμετοχής σο κερντάας. Ανταλέ τροπόσαρ, μπορεί τι μανγκέλας τι κερέλ-λες τι πακιάλ ότι να ισινέ πφιρνί τζουβέλ. (Διαβάνεν Παροιμίες 7:​13, 14, 21) Άμα ο τερνό να κα κερέλας ανταλά πο χουρντέ λάθη, να κα τσσουβέλας πο νεαυτός κο πειρασμός ντα αντικάς να κα κερέλας ι αμαρτία.

10. Σαρ μπορίνελα κάποιος αντιβές τι κερέλ ο ίδιος λάθος ανταλέ τερνέσαρ;

¹⁰ Ανταγιά ιστορία σο ισί κο Παροιμίες σικαβέλα μπουτ λατσσές σο μπορεί τι παθίνελ ο κάθε εκ αμένταρ. Μπορεί τι κερέλ εκ μπαρί αμαρτία ντα σοράν τι αμντίνελ ότι σαρέ αβιλέ-πες «αμέσως», ξαφνικά. Ή μπορεί τι βακερέλ: «Απλά αβιλό-πες». Όμως, άμα κα σκεφτίνελ σο αβιλό-πες μπαγιά, κα αγαβέλ ότι κερντάς κάποια πο χουρντέ λάθη σο γκερντέ-λες κι μπαρί αμαρτία. Για παράδειγμας, μπορεί τι κερέλας μπέτι παρέες ή τι τραμπίνελας μπέτι διασκέδαση. Ή μπέκιμ τι ντικχέλας πράγματα κο Ίντερνετ σο να ισινέ σωστά ή τι τζάλας τθανέντε σο να ισινέ λατσσέ ι Χριστιανόνγκε. Επίσης, μπορεί τι τσσιναντάας τι κερέλ προσευχή, τι διαβάνελ ι Γραφή, τι τζαλ κο συναθροίσεις ή κο έργος. Σαρ ανταβά τερνό κο Παροιμίες, μάλλον να κερντάς ι αμαρτία αζόμ ξαφνικά.

11. Καλέ πραγματένταρ πρέπει τι νασάς ντουρ για μα τι περάς κι αμαρτία;

¹¹ Σο σικλιάσα αμέν; Πρέπει τι νασάς ντουρ, όχι σάντε κατά αμαρτία, αλλά κατά πράγματα-ντα σο γκερένα-αμέν κι αμαρτία. Ανταβά σικαβένα ο λάφια σο ισί πο τελέ κατά ιστορία ι τερνέσκι ντα ι λουμνέ τζουβλιάκι. Τθερέλα ι συμβουλή: «Μα τι νασές ντα τι τζας λάκε ντρομέντε». (Παρ. 7:25) Επίσης βακερέλα: «Άτσσουβ ντουρ λάταρ ντα μα τζα πασέ κι πόρτα λάκε κχερέσκι». (Παρ. 5:3, 8) Για τι αρακχαβάς-αμέν κατά αμαρτία πρέπει τι ατσσάς ντουρ κατά πράγματα σο κα τσσουβένας-αμέν κο πειρασμός τι κεράς κάτι λάθος. b Ανταβά μανγκέλα τι βακερέλ τι νασάς ντουρ πραγματένταρ σο μπέκιμ νανέ κακός τι κερέν-λεν ο Χριστιανοί, αλλά τζανάσα ότι κα μπορίνενας τι τσσουβέν κο πειρασμός αμέν τι κεράς κάτι λάθος.​—Ματθ. 5:29, 30.

12. (α) Σο τραμπιντάας ο Ιώβ; (Ιώβ 31:1) (β) Σαρ κα βοηθίνελας-λες ανταβά τι νασέλ κατά πειρασμός;

¹² Για τι νασάς ντουρ πραγματένταρ σο γκερένα-αμέν κι αμαρτία, κα χρειαζίντιβελ τι τραμπίνας σαρέ αμαρέ γκίσαρ τι κεράς-λες ανταβά, σαρ κερντάς ο Ιώβ. Βοβ “κερντάας συμφωνία πι γιακχίντζαρ” μα τι ντικχέλ πφιρνικανές γιαβερέ τζουβλίν. (Διαβάνεν Ιώβ 31:1) Άμα κα κερέλας οντουβά σο τραμπιντάας, να κα περέλας κο πειρασμός τι κερέλ λουμνιπέ οπράλ  πι μπιαβέστε. Μπορίνασα αμέν-ντα τι τραμπίνας τι νασάς ντουρ σαρέ κατά πράγματα σο κα τσσουβένας-αμέν κο πειρασμός.

13. Σόσκε πρέπει τι προσοχίνας οντουλά σο σκεφτίνασα; (Ντικχέν ο φωτογραφίες-ντα)

¹³ Πρέπει επίσης τι προσοχίνας οντουλά σο σκεφτίνασα. (Έξοδ. 20:17) Μερικά τζενέ πακιάνα ότι νανέ κακός τι ανέλ κάποιος φαντασία ότι κερέλα κάτι μπέτι. Βακερένα ότι αφού σάντε σκεφτίνελα-λες ντα να κερέλα-λες νανέ λάθος. Αλλά ατζέ-ντα ανταβά νανέ λατσσό. Άμα εκ τζενό συνεχίνελα τι σκεφτίνελ εκ μπέτι πράγμας, κα αρχίνελ τι μανγκέλ ατζέ πο μπουτ τι κερέλ-λες. Αντικάς ισί σαρ τι δημιουργίνελα ο ίδιος εκ πειρασμός πι νεαυτόσκε σο πο σοράν κα χρειαζίντιβελ τι νασέλ ντουρ λέσταρ. Ισί μπαγιά όμως ότι μπάζιμα κα αβέν μπέτι σκέψεις αμαρέ γκοντιάτε. Ο πο σημαντικός ισί τι νασκιαράς αμέσως ανταλά σκέψεις ντα τι τσσουβάς λένγκε θεσιάτε λατσσέ σκέψεις. Επειδή να μουκχάσα εκ μπέτι σκέψη τι μπαριόλ αζόμ μπουτ αντρ’ αμέντε σο σοράν κα μανγκάς τι κεράς-λα, αρακχαβάσα αμαρό νεαυτός κατά αμαρτία.​—Φιλιπ. 4:8· Κολ. 3:2· Ιακ. 1:13-15.

14. Σο γιαβέρ κα βοηθίνελ-αμέν τι νασάς ντουρ κατά πειρασμός;

¹⁴ Σο γιαβέρ μπορίνασα τι κεράς για τι νασάς ντουρ κατά πειρασμός; Χρειαζίντιβελα τι αβάς ντιπ σίγουροι ότι ισί αμαρέ λατσσιμάσκε τι ντας καν κο νόμοι κι Ιεχωβάσκε. Μπάζιμα, μπορεί τι αβέλ αμένγκε δύσκολος τι σκεφτίνας ντα τι μανγκάς ο πράγματα σο μανγκέλα ο Ντεβέλ. Αλλά κάνα μαράσα-αμέν τι κεράς-λες ανταβά τθεράσα ειρήνη αμαρέ γκοντιάτε.

15. Σαρ κα νασάς ντουρ κατά πειρασμός άμα μαράσα-αμέν τι μανγκάς ο σωστά πράγματα;

¹⁵ Χρειαζίντιβελα τι μαράς-αμέν για τι μανγκάς ο σωστά πράγματα. Άμα κα σικλιάς “τι μισίνας ο γκεραλιπέ ντα τι μανγκάς ο λατσσιπέ”, κα ντελ αμαρό γκι ατζέ πο μπουτ τι κεράς ο σωστός ντα τι νασάς πραγματένταρ σο γκερένα κι αμαρτία. (Αμώς 5:15) Επίσης, άμα κα μανγκάς ο σωστά πράγματα κα τθεράς ι ζορ τι ατσσάς σταθεροί άμα κα αβέλ ανγκλ’ αμέντε εκ πειρασμός σο να μπεσάας λέσκε.

16. Σαρ βοηθίνενα-αμέν ο πνευματικά πράγματα τι ατσσάς τζανγκαντέ; (Ντικχέν ο φωτογραφίες-ντα)

¹⁶ Σαρ μπορίνασα τι μαράς-αμέν για τι μανγκάς ο σωστά πράγματα; Πρέπει τι τθεράς  σαρό αμαρό γκι κο πνευματικά πράγματα, καζόμ πο μπουτ μπορίνασα. Κάνα ισινάμ κι συνάθροιση ή κο έργος, νανέ εύκολος τι ντας κο πειρασμός τι κεράς κάτι μπέτι. Οκιά μπάνταρ, μανγκάσα ατζέ πο μπουτ τι κεράς ο γκι ι Ιεχωβάσκο. (Ματθ. 28:19, 20· Εβρ. 10:24, 25) Κάνα διαβάνασα ο Λάφι ι Ντεβλέσκο, σικλιαράσα-αμέν λέσταρ ντα σκεφτίνασα-λες λατσσές, μανγκάσα ατζέ πο μπουτ ο λατσσιπέ ντα μισίνασα ατζέ μπουτ ο γκεραλιπέ. (Ιησ. Ναυή 1:8· Ψαλμ. 1:2, 3· 119:97, 101) Ντεν-τουμέν γκοντί ότι ο Ιησούς βακερντάς πι μαθητένγκε: «Μα τσσιναβέν τι προσευχίντιβεν, για μα τι περέν κο πειρασμός». (Ματθ. 26:41) Ισί λατσσό τι κεράς προσευχή αμαρέ Νταντέστε σο ισί κο ουρανός για τι νακχάς χρόνος λέσαρ. Κάνα κεράσα-λες ανταβά λάσα βοήθεια ντα μανγκάσα ατζέ πο μπουτ τι κεράς λέσκο γκι.​—Ιακ. 4:8.

ΤΙ ΣΥΝΕΧΙΝΑΣ ΤΙ ΑΡΑΚΧΑΒΑΣ ΑΜΑΡΟ ΝΕΑΥΤΟΣ ΚΑΤΑ ΑΜΑΡΤΙΑ

17. Καγιά αδυναμία ναστί νασκιαρντάας ντιπ ο Πέτρος;

¹⁷ Μπέκιμ μπορίνασα τι νασκιαράς ντιπ αντρ’ αμένταρ κάποια αδυναμία σο τθεράσα. Όμως μπορεί τι αγαβάς ότι εκ γιαβέρ αδυναμία σο τθεράσα να μπορίνασα τι νασκιαράς-λα εύκολα. Σκεφτίνεν σο αβιλό-πες με τον απόστολο Πέτρο. Βοβ νταρασάλο κατά τζενέ ντα βακερντάς τριν φαρ ότι να τζανέλας ι Ιησούς. (Ματθ. 26:69-75) Πο σοράν, ο Πέτρος ντικχίντιβελα ότι νασκιαρντάας ανταγιά αδυναμία σο τθερέλας κάνα ντινάς μαρτυρία με θάρρος κο Σάνχεδριν. (Πράξ. 5:27-29) Όμως, χάνικ μπρεσά πο σοράν, «επειδή νταρέλας οντουλένταρ σο κερντέας περιτομή», τσσιναντάς τι χαλ ι Χριστιανόντζαρ σο ισινέ κατά γιαβερά τθεμά. (Γαλ. 2:11, 12) Λέσκι αδυναμία βουρτισάλιας πάλι. Μπέκιμ ποτές μα τι νασκιαρντάας-λα ντιπ αντρά-πέσταρ.

18. Σο μπορεί τι αβέλ-πες με κάποιες αδυναμίες σο τθεράσα;

¹⁸ Αμέν-ντα κα μπορίναας τι παθίνας ο ίδιος. Σαρ; Εκ αδυναμία σο αμντίνασα ότι νασκιαρντάμ-λα ντιπ κα μπορίνελας τι αβέλ πάλι ντα τι τσσουβέλ-αμέν κο πειρασμός. Για παράδειγμας, εκ πφραλ βακερέλα: «Τσσιναντόμ τι ντικχάβ πορνογραφία ντες μπρεσά ντα ισινόμας σίγουρος ότι να τθεράβας πάλι πρόβλημας ανταλέσαρ. Αλλά μι αδυναμία ισινέ σαρ εκ άγριος ζώος σο γκεραβέλας-πες ντα μπεκλεντίνελας τι αβέλ εκ λατσσί στιγμή για τι κερέλ επίθεση ντα τι τσσουβέλ-μαν πάλι κο πειρασμός τι ντικχάβ πορνογραφία». Ο λατσσό ισί ότι ο πφραλ συνεχιντάς τι μαρέλ-πες για μα τι περέλ κο πειρασμός. Αγαντάς λατσσές ότι κα χρειαζίντιβελας  τι κερέλ μπαρί προσπάθεια κάθε ντιβές για τι νασκιαρέλ ι αδυναμία ανταγιά. Ντα ανταβά μπέκιμ έπρεπε τι κερέλ-λες σαρέ πι ζωγιάτε, μέχρι τι αβέλ ο νεβό ντουνιάς. Λέσκι ρομνί ντα ο πρεσβύτεροι βοηθίνενας-λες μπουτ. Αντικάς προσοχίνελας ατζέ πο μπουτ τι νασέλ ντουρ κατά πορνογραφία.

19. Σο κα μπορίναας τι κεράς άμα τθεράσα εκ αδυναμία σο να μπορισάλαμ τι νασκιαράς-λα ατζέκ;

¹⁹ Σο μπορίνασα τι κεράς για μα τι γκερέλ-αμέν εκ αδυναμία, σο να νασκιαρντάμ-λα ατζέκ, κι αμαρτία; Μπορίνασα τι κεράς οντουβά σο βακερντάς αμένγκε ο Ιησούς: “Τι ατσσάς τζανγκαντέ”. Άμα κεράσα-λες ανταβά, κα νασάς ντουρ κατά πειρασμός. Ατζέ-ντα κάνα νιωθίνενα ζουρανέ, συνεχίνεν τι νασέν ντουρ κατά πράγματα σο κα μπορίνενας τι οδηγίνεν-τουμέν κο πειρασμός. (1 Κορ. 10:12) Συνεχίνεν τι κερέν ο πράγματα σο βοηθιντέ-τουμέν τι πολεμίνεν ι αδυναμία σο τθερένα. Ο εδάφιος Παροιμίες 28:14 βακερέλα: «Ευτυχισμέ ισί ο τζενό σο προσοχίνελα πάντα οντουλά σο κερέλα».​—2 Πέτρ. 3:14.

ΣΟ ΕΥΛΟΓΙΕΣ ΚΑ ΤΘΕΡΑΣ ΑΜΑ ΚΑ ΣΥΝΕΧΙΝΑΣ ΤΙ ΑΡΑΚΧΑΒΑΣ-ΑΜΕΝ ΚΑΤΑ ΑΜΑΡΤΙΑ

20, 21. (α) Καλά ευλογίες τθεράσα κάνα αρακχαβάσα-αμέν κατά πειρασμός; (β) Άμα κεράσα σο νακχέλα αμαρέ βαστέσταρ, σο κα κερέλ ο Ιεχωβά αμένγκε; (2 Κορινθίους 4:7)

²⁰ Ισινάμ σίγουροι ότι κάνα αρακχαβάσα-αμέν κατά πειρασμός ισί πάντα αμαρέ λατσσιμάσκε. Ισί μπαγιά ότι κάνα αμαρτίνασα, “απολαμβάνασα για χάνικ ι αμαρτία”. Όμως, κάνα τζουβντιάσα αντικάς σαρ μανγκέλα ο Ιεχωβά, κα αβάς μπουτ πο ευτυχισμέ. (Εβρ. 11:25· Ψαλμ. 19:8) Ανταβά αβέλα-πες επειδή ισινάμ κερντέ τι τζουβντιάς αντικάς σαρ βακερένα ο κανόνες ι Ιεχωβάσκε. (Γέν. 1:27) Κάνα κεράσα-λες ανταβά, τθεράσα πάκι συνείδηση ντα ι ευκαιρία τι τζουβντιάς για πάντα.​—1 Τιμ. 6:12· 2 Τιμ. 1:3· Ιούδα 20, 21.

²¹ Σαρέ τζανάσα ότι ο «σώμας ισί μπίζουρανο». Αλλά ανταβά να μανγκέλα τι βακερέλ ότι να τθεράσα καέκ βοήθεια. Ο Ιεχωβά ισί έτοιμος τι ντελ-αμέν ι ζορ σο τθεράσα ανάγκη. (Διαβάνεν 2 Κορινθίους 4:7) Τσσουβέν σημασία όμως ότι ο Ντεβέλ ντέλα-αμέν ι ζορ σο ισί πο μπαρί αμαρέ ζοριάταρ. Αλλά ι ζορ σο τθεράσα, ισί αμαρί ευθύνη τι τσσουβάς-λα σαρί. Κεράσα-λες ανταβά κάνα μαράσα-αμέν κάθε ντιβές για τι νασάς ντουρ κατά πειρασμός. Άμα κεράσα σο νακχέλα αμαρέ βαστέσταρ, ισινάμ σίγουροι ότι ο Ιεχωβά κα απαντίνελ αμαρέ προσευχιέντε ντα κα ντελ-αμέν πο μπουτ ζορ κάνα χρειαζίντιβασα-λα. (1 Κορ. 10:13) Ι Ιεχωβάσκε βοηθειάσαρ μπορίνασα τι αρακχαβάς-αμέν κατά πειρασμός.