1, 2. Σο σικαβέλα η Αγία Γραφή για κάποιους βασιλιάδες κο Ισραήλ;

 Η ΑΓΙΑ ΓΡΑΦΗ βακερέλα ότι υπαρχίντιβενας πο μπουτ από 40 βασιλιάδες κο Ισραήλ. a Κερέλα λάφι για το πράγματα σο κερντέ μερικοί λένταρ, χωρίς τι γκεραβέλ κάτι. Φιρειπείν, ατζέ-ντα ο πιστοί βασιλιάδες κερντέ μερικά μπέτι πράγματα. Σκεφτίνεν για παράδειγμας ι Δαβιδίς, σο ισινέ λατσσό βασιλιάς. Ο Ιεχωβά βακερντάς: «Μο υπηρέτης ο Δαβίδ . . . ακολουθιντάς-μαν σαστέ γκίσαρ ντα κερντάς σάντε ο σωστός μι γιακχίντε». (1 Βασ. 14:8) Όμως, ανταβά τζενό γκιλό εκχέ παντριμέ τζουβλιάσαρ ντα κανονιντάς τι μουνταρέν λάκε ρομές κο τζένγκι. b​—2 Σαμ. 11:4, 14, 15.

² Οκιά μπάνταρ, μπουτ κατά άπιστοι βασιλιάδες κερντέ κάποια λατσσέ πράγματα. Σαρ για παράδειγμας ο Ροβοάμ. Κο γιακχά κι Ιεχωβάσκε, βοβ «κερντάς ο γκεραλιπέ». Οτθάρ ισινέ άπιστος. (2 Χρον. 12:14) Όμως, ο Ροβοάμ ντινάς καν κο Ιεχωβά σο βακερντάς λέσκε μα τι πολεμίνελ ο ντες φάρες του Ισραήλ ντα τι μουκχέλ-λεν τι τραμπίνεν γιαβερέ βασιλιάς. Επίσης, λατσσαρντάς αζόμ λατσσές ο πόλεις κο τθεμ σο ισινέ βασιλιάς για τι αρακχαβένας ι Ντεβλέσκε λαός.​—1 Βασ. 12:21-24· 2 Χρον. 11:5-12.

3. Σο μπορεί τι σκεφτίνας, ντα σο κα ντικχάς ανταλέ μαθημάστε;

³ Όμως, ακανά μπορεί τι σκεφτίνασα: Άμα ο βασιλιάδες κο Ισραήλ κερένας εμ λατσσέ εμ μπέτι πράγματα, σαρ αποφασίνελας ο Ιεχωβά άμα εκ βασιλιάς ισινέ πιστός λέσκε γιακχίντε; Η απάντηση ανταλέ ερωτησιάτε κα βοηθίνελ-αμέν τι αγαβάς σο μανγκέλα ο Ιεχωβά αμένταρ. Κα ντικχάς τριν πράγματα σο μάλλον ντικχέλας ο Ιεχωβά πριν τι αποφασίνελ άμα εκ βασιλιάς ισινέ  λατσσό ή όχι. Πρώτον, άμα υπηρετίνελας ι Ιεχωβάς σαστέ γκίσαρ. Δεύτερον, άμα μετανιώνελας μπαγιά πι αμαρτιένγκε. Ντα τρίτον άμα συνεχίνελας τι υπηρετίνελ ι Ιεχωβάς σωστέ τροπόσαρ.

ΜΑΝΓΚΕΝΑΣ Ι ΙΕΧΩΒΑΣ ΣΑΣΤΕ ΓΚΙΣΑΡ

4. Σο διαφορά τθερένας ο πιστοί ντα ο άπιστοι βασιλιάδες;

⁴ Ο βασιλιάδες σο κερένας ι Ιεχωβάσκο γκι ντένας-λες λατρεία σαστέ γκίσαρ. c Ο πιστός βασιλιάς Ιωσαφάτ «ρόντελας ι Ιεχωβάσκε σαρέ πι γκίσαρ». (2 Χρον. 22:9) Η Γραφή βακερέλα για τον Ιωσία: «Πριν λέσταρ να ισινέ βασιλιάς σαρ λέστε, σο βουρτισάλο κο Ιεχωβά σαρέ πι γκίσαρ». (2 Βασ. 23:25) Σο βακερέλα ο Λάφι ι Ντεβλέσκο ι Σολομωντάσκε, σο κο τέλος πι ζωγιάκο να ατσσιλό πιστός; «Λέσκο γκι να ισινέ σαστό». (1 Βασ. 11:4) Η Γραφή κερέλα λάφι εκχέ γιαβερέ-ντα άπιστε βασιλιάσκε, για τον Αβιάμ. Βακερέλα: «Λέσκο γκι να ισινέ σαστό κο γιακχά κι Ιεχωβάσκε».​—1 Βασ. 15:3.

5. Εξηγίνεν σο μανγκέλα τι βακερέλ τι υπηρετίνας ι Ιεχωβάς σαστέ γκίσαρ.

⁵ Σο μανγκέλα τι βακερέλ τι υπηρετίνας ι Ιεχωβάς σαστέ γκίσαρ; Εκ τζενό σο τθερέλα σαστό πο γκι κο Ντεβέλ να υπηρετίνελα-λες επειδή πρέπει. Οκιά μπάνταρ, οντουβά σο ταρτίνελα-λες τι κερέλ-λες ανταβά ισί η αγάπη ντα η αφοσίωση. Ανταγιά αγάπη ντα αφοσίωση ατσσικιαρέλα-λα σαρέ πι ζωγιάτε.

6. Σαρ μπορίνασα τι ατσσικιαράς σαστό αμαρό γκι; (Παροιμίες 4:23· Ματθαίος 5:29, 30)

⁶ Σαρ μπορίνασα τι μοιάζας κο πιστοί βασιλιάδες ντα τι ατσσικιαράς σαστό αμαρό γκι; Πρέπει τι νασάς ντουρ κατά μπέτι πράγματα σο μπορεί τι κερέν αμένγκε ζιάνι. Για παράδειγμας η διασκέδαση σο νανέ λατσσί μπορεί τι κερέλ-αμέν μα τι ντας σαρό αμαρό γκι κο Ιεχωβά. Ο ίδιος πράγμας μπορεί τι παθίνας άμα τθεράσα μπέτι παρέες ντα μπίτσαλι γιακχ. Άμα ντικχλάμ ότι κάτι αρχίνελα τι σουρντιαρέλ αμαρί αγάπη ι Ιεχωβάσκε, χρειαζίντιβελα τι μαράς-αμέν για τι αλλάνας ο τρόπος σο σκεφτίνασα ντα ο πράγματα σο κεράσα.​—Διαβάνεν Παροιμίες 4:​23· Ματθαίος 5:​29, 30.

7. Σόσκε πρέπει τι νασάς ντουρ πραγματένταρ σο κερένα αμένγκε ζιάνι;

⁷ Πρέπει πάντα τι ντας σαστό αμαρό γκι κο Ιεχωβά. Άμα να τθεράσα αμαρί γκοντί κα μπορίναας τι χουχάντιβας ντα τι πακιάς ότι άμα κα κεράς πο μπουτ πράγματα κι υπηρεσία λέσκι, να κα χρειαζίντιβελ τι ατσσάς ντουρ πραγματένταρ σο κερένα αμένγκε ζιάνι. Βακερέν χάι ότι ισινέν εκ ντιβές αβρί σο κερέλα μπουτ σιλ ντα μπουτ μπαρμπάλ. Ερεσένα σουγκό κχερέ ντα πφαμπαρένα ι σόμπα. Κα τατιόλας όμως ο κχερ άμα κα μουκχένας ι πόρτα πουταρντί; Όχι, η σουρντί μπαρμπάλ κα ντέλας σουγκό σαρό κο κχερ. Σο σικαβέλα ανταβά παράδειγμας; Να ερεσέλα απλώς τι χας πνευματικός χαμπέ σο ταταρέλα αμαρί φιλία ι Ιεχωβάσαρ. Πρέπει επίσης τι πφάντας ι πόρτα κο πράγματα σο κερένα αμένγκε ζιάνι για μα τι ντελ αμαρέ γκίστε η σουρντί μπαρμπάλ ανταλέ ντουνιάσκι. Δηλαδή μα τι επηρεάντιβας κατά τρόπος σο σκεφτίνελα ντα συμπεριφερίντιβελα ανταβά ντουνιάς.

ΜΕΤΑΝΙΩΣΑΛΕ ΠΟΥΜΑΡΕ ΑΜΑΡΤΙΕΝΓΚΕ

8, 9. Σο κερντάς ο βασιλιάς Δαβίδ ντα ο βασιλιάς Εζεκίας κάνα λιντέ διόρθωση; (Ντικχέν ι φωτογραφία)

⁸ Σαρ ντικχλάμ πο οπρέ, ο βασιλιάς Δαβίδ κερντάς μπουτ μπαρέ λάθη. Αλλά κάνα ο προφήτης Νάθαν κερντάς λέσαρ λάφι ι αμαρτιάκε σο κερντάς, ο Δαβίδ σικαντάς ταπεινότητα να μετανιωσάλο. (2 Σαμ. 12:13) Κατά λάφια σο ισί γραμμέ κο Ψαλμός 51, αγαβάσα ότι μετανιωσάλο αντράλ πι γκίσταρ. Ο Δαβίδ να κερντάς ότι μετανιωσάλο για τι χουχαβέλ τον Νάθαν ή τι νασέλ κατά τιμωρία.​—Ψαλμ. 51:3, 4, 17, επιγραφή.

⁹ Ο Βασιλιάς Εζεκίας-ντα αμαρτιντάς. Η Γραφή  βακερέλα: «Λέσκο γκι αβιλό μπαρικανό ντα κερντάς ι Ντεβλές τι τθερέλ χολί λέσκε, ι Ιουδάσκε ντα για την Ιερουσαλήμ». (2 Χρον. 32:25) Σόσκε αβιλό μπαρικανό ο Εζεκίας; Μπορεί τι λιντάς οπρά-πέστε επειδή ισινέ χουλανό, επειδή νικιντάας ι Ασσυριόν ή επειδή ο Ντεβέλ κερντάας-λες λατσσές λέσκε νασφαλιμάσταρ. Λέσκο μπαρικανιπέ μπορεί τι κερντάας-λες τι σικαβέλ πο χουλανιπέ κο Βαβυλώνιοι, ντα αντικάς τι διορθώνελ-λες ο προφήτης Ησαΐας. (2 Βασ. 20:12-18) Αλλά σαρ ο Δαβίδ, αντικάς ο Εζεκίας-ντα σικαντάς ταπεινότητα ντα μετανιωσάλο. (2 Χρον. 32:26) Τελικά ο Ιεχωβά βακερντάς ότι ισινέ πιστός βασιλιάς σο «κερντάς ο σωστός».​—2 Βασ. 18:3.

10. Σο κερντάς ο βασιλιάς Αμαζίας κάνα λιντάς διόρθωση;

¹⁰ Οκιά μπάνταρ ο βασιλιάς Αμαζίας ι Ιουδάσκο κερντάς ο σωστός, «αλλά όχι σαρέ πι γκίσαρ». (2 Χρον. 25:2) Σο λάθος κερντάς; Κάνα ο Ιεχωβά βοηθιντάς-λες τι νικίνελ ι Εδωμιτέν, ο Αμαζίας ντινάς λατρεία λένγκε ντεβλέντε. d Σοράν, κάνα ο προφήτης ι Ιεχωβάσκο γκιλό τι κερέλ λέσαρ λάφι, ο βασιλιάς να μανγκλάς ιτς τι ασουνέλ-λες.​—2 Χρον. 25:14-16.

11. Σαρ σικαβένα ο εδάφια 2 Κορινθίους 7:9, 11, σο πρέπει τι κεράς για τι συγχωρίνελ-αμέν ο Ιεχωβά; (Ντικχέν ο φωτογραφίες-ντα)

¹¹ Σο σικλιάσα κατά παραδείγματα ανταλά; Χρειαζίντιβελα τι μετανιώνας αμαρέ αμαρτιένγκε ντα τι κεράς σο νακχέλα αμαρέ βαστέσταρ για μα τι ξανακεράς-λεν. Σο πρέπει τι κεράς άμα λιντάμ συμβουλή κατά πρεσβύτεροι, ατζέ-ντα για κάτι σο ντικχίντιβελα αμένγκε χουρντό; Δεν πρέπει τι νιωθίνας ότι ο Ιεχωβά ή ο πρεσβύτεροι να μανγκένα-αμέν. Ατζέ-ντα ο λατσσέ βασιλιάδες κο Ισραήλ χρειαζίντιβελας τι λεν συμβουλή ντα διόρθωση. (Εβρ. 12:6) Κάνα λάσα διόρθωση, πρέπει (1) τι ντας καν ταπεινά, (2) τι κεράς ο αλλαγές σο χρειαζίντιβενα ντα (3) τι συνεχίνας τι υπηρετίνας ι Ιεχωβάς σαρέ αμαρέ γκίσαρ. Άμα μετανιώνασα αμαρέ αμαρτιένγκε, ο Ιεχωβά κα συγχωρίνελ-αμέν.​—Διαβάνεν 2 Κορινθίους 7:9, 11.

ΝΤΕΝΑΣ ΛΑΤΡΕΙΑ ΚΟ ΙΕΧΩΒΑ ΣΩΣΤΕ ΤΡΟΠΟΣΑΡ

12. Καγιά μπαρί διαφορά τθερένας ο πιστοί βασιλιάδες κατά άπιστοι;

¹² Ο βασιλιάδες σο ισινέ πιστοί κο γιακχά κι Ιεχωβάσκε ντένας-λες λατρεία σωστέ τροπόσαρ. Βοηθίνενας ι λαός-ντα τι κερέλ-λες ανταβά. Ισί μπαγιά όμως ότι κερένας λάθη-ντα, σαρ ντικχλάμ. Αλλά ντένας λατρεία σάντε κο Ιεχωβά ντα μαρένας-πες τι καταστραφίνεν ο είδωλα πουμαρέ τθεμέσταρ. e

13. Σόσκε ο Ιεχωβά βακερντάς ότι ο Αχαάβ ισινέ άπιστος;

¹³ Σόσκε ο Ιεχωβά βακερντάς ότι μερικοί βασιλιάδες ισινέ άπιστοι; Σίγουρα, να κερντέας σάντε μπέτι πράγματα. Για παράδειγμας, ο πφιρνό βασιλιάς Αχαάβ χτιντάς πόλεις ντα νικιντάς ι Ισραηλιτένγκε ντουσμανίν. (1 Βασ. 20:21, 29· 22:39) Ντα αφού λιντάς αμπέρι ότι μουνταρντέ τον Ναβουθέ ιτιρί λέσταρ, «ταπεινωντάς πο νεαυτός». (1 Βασ. 21:27-29) Αλλά σοράν ανταλέσταρ, ο Αχαάβ ασουντάς πι ρομνιά ντα συνεχίνελας τι ντελ λατρεία ψεύτικε ντεβλέντε. Επίσης, επηρεάνελας ι λαός-ντα τι κερέλ ανταβά μπέτι πράγμας. Ανταβά σικαβέλα ότι να μετανιωσάλο.​—1 Βασ. 21:25, 26.

14. (α) Σόσκε βακερντάς ο Ιεχωβά ότι ο βασιλιάς Ροβοάμ ισινέ άπιστος; (β) Καβά λάθος κερντέ ο πο μπουτ άπιστοι βασιλιάδες;

¹⁴ Ντικχέν ο παράδειγμας εκχέ γιαβερέ-ντα άπιστε βασιλιάσκο​—του Ροβοάμ. Σαρ ντικχλάμ πο οπρέ, ο Ροβοάμ κερντάς μπερεκέτι λατσσέ πράγματα καζόμ ισινέ βασιλιάς. Αλλά κάνα αβιλό  ζουρανό, τσσιναντάς τι ντελ καν κο νόμος κι Ιεχωβάσκο ντα αρχισάλο τι ντελ λατρεία ψεύτικε ντεβλέντε. (2 Χρον. 12:1) Από αζομάν ντέλας λατρεία εμ κο Ιεχωβά, εμ ψεύτικε ντεβλέντε. (1 Βασ. 14:21-24) Να ισινέ σάντε ο Ροβοάμ ντα ο Αχαάβ σο να ατσσιλέ αφοσιωμέ κι αληθινή λατρεία. Ο πο μπουτ άπιστοι βασιλιάδες ντένας λατρεία ψεύτικε ντεβλέντε ντα επηρεάνενας γιαβερέν-ντα. Σίγουρα ο πο σημαντικός πράγμας σο ντικχέλας ο Ιεχωβά πριν τι αποφασίνελ άμα εκ βασιλιάς ισινέ πιστός ή όχι ισινέ άμα ντέλας-λες λατρεία σωστέ τροπόσαρ.

15. Σόσκε ισί σημαντικός ι Ιεχωβάσκε τι ντας-λες λατρεία σωστέ τροπόσαρ;

¹⁵ Σόσκε ισινέ αζόμ σημαντικός ι Ιεχωβάσκε τι ντεν-λες λατρεία ο βασιλιάδες σωστέ τροπόσαρ; Εκ λόγος ισινέ ότι ο βασιλιάδες τθερένας ι ευθύνη τι οδηγίνεν ι Ντεβλέσκε λαός κι αληθινή λατρεία. Εκ γιαβέρ λόγος ισινέ ότι η ψεύτικη λατρεία γκερέλα σε γιαβερά μπαρέ αμαρτίες ντα λάθη. (Ωσηέ 4:1, 2) Επίσης ο βασιλιάδες ντα ο Ισραηλίτες ισινέ αφιερωμέ κο Ιεχωβά. Οτθάρ η Γραφή βακερέλα ότι κάνα ανακατούντιβενας κι ψεύτικη λατρεία ισινέ σαρ εκ παντριμέ τζενό σο τζάλα γιαβερέσαρ. (Ιερ. 3:8, 9) Κάνα εκ παντριμέ τζενό κερέλα-λες ανταβά, ντουκχαβέλα ο γκι πι ρομέσκο ή πι ρομνιάκο σο λέστε ντινάας πο λάφι τι ατσσόλ αφοσιωμέ. Αντικάς-ντα, κάνα εκ υπηρέτης ι Ντεβλέσκο ανακατούντιβελα κι ψεύτικη λατρεία, ντουκχαβέλα ο γκι ι Ιεχωβάσκο σο Λέστε ντινάας πο λάφι τι ατσσόλ αφοσιωμέ. f​—Δευτ. 4:23, 24.

16. Σο διαφορά τθερέλα κο γιακχά κι Ιεχωβάσκε, εκ δίκαιος τζενό από εκ πφιρνό;

¹⁶ Σο σικλιαρένα-αμέν σαρέ ανταλά; Πρέπει  τι αβάς αποφασισμέ τι ατσσάς ντουρ σαρέ κατά πράγματα σο τθερένα σχέση με την ψεύτικη λατρεία. Πρέπει επίσης πάντα τι ντας λατρεία κο Ιεχωβά ι τροπόσαρ σο μανγκέλα ντα τι συνεχίνας τι κεράς μπουτ πράγματα κι υπηρεσία λέσκι. Ο προφήτης Μαλαχίας βακερντάς ξεκάθαρα καγιά διαφορά τθερέλα κο γιακχά κι Ιεχωβάσκε εκ λατσσό τζενό από εκ γκεραλό. Γραφιντάς: «Κα ντικχέν πάλι ι διαφορά σο τθερέλα ο δίκαιος κατά πφιρνό, ντα οντουβά σο υπηρετίνελα ι Ντεβλές οντουλέσταρ σο να υπηρετίνελα-λες». (Μαλ. 3:18) Άρα δεν πρέπει τι μουκχάς τίποτα, ούτε αμαρέ ατέλειες ούτε αμαρέ λάθη τι λεν αζόμ μπουτ αμαρί ζορ σο κα κερέν-αμέν τι τσσιναβάς τι υπηρετίνας ι Ντεβλές. Ατζέ-ντα άμα να κα κεράς εκ μπαρί αμαρτία, άμα κα τσσιναβάς τι υπηρετίνας ι Ιεχωβάς ανταβά-ντα ισί μπαρί αμαρτία.

17. Σόσκε πρέπει τι τθεράς αμαρί γκοντί κάνα τραμπίνασα κάσαρ κα παντρίνας;

¹⁷ Άμα ισινέν εργένια ντα σκεφτίνενα τι παντρίνεν, ντικχέν σαρ ο λάφια σο βακερντάς ο Μαλαχίας μπορίνενα τι βοηθίνεν-τουμέν για τι τραμπίνεν γκοντιάσαρ κάσαρ κα παντρίνεν. Εκ τζενό μπορεί τι τθερέλα λατσσέ-ντα ιδιότητες. Αλλά άμα να υπηρετίνελα ι αληθινέ Ντεβλές, ισί κο γιακχά κι Ιεχωβάσκε ανταγιά στιγμή δίκαιος; (2 Κορ. 6:14) Άμα κα παντρίνεν ανταλέ τζενέσαρ, κα βοηθίνελ-τουμέν τι ατσσόν πιστοί κο Ιεχωβά; Σκεφτίνεν ακαβά: Ο τζουβλιά σο παντρισάλο λέντζαρ ο βασιλιάς Σολομών τθερένας λατσσέ-ντα ιδιότητες. Αλλά να ντένας λατρεία κο Ιεχωβά ντα κερντέ χάνικ χάνικ ο γκι ι Σολομωντάσκο μα τι αβέλ σαστό κο Ιεχωβά αλλά τι ντελ λατρεία ψεύτικε ντεβλέντε.​—1 Βασ. 11:1, 4.

18. Σο πρέπει τι σικλιαρέν ο νταντά ντα ο νταγιά πουμαρέ τσσαβέν;

¹⁸ Νταντάλεν ντα νταγιάλεν, μπορίνενα τι χρησιμοποιήνεν ο ιστορίες ι βασιλιαδένγκε σο ισί κι Γραφή για τι βοηθίνεν τουμαρέ τσσαβέν τι μανγκέν τι υπηρετίνεν ι Ιεχωβάς αντράλ  πουμαρέ γκίσταρ. Βοηθίνεν-λεν τι αγαβέν ότι πριν τι αποφασίνελ ο Ιεχωβά άμα εκ βασιλιάς ισινέ πιστός ή όχι, οντουβά σο ντικχέλας πρώτα ισινέ άμα ντέλας-λες λατρεία με το σωστός τρόπος. Σικλιαρέν τουμαρέ τσσαβέν τουμαρέ λαφίντζαρ ντα τουμαρέ παραδειγμάσαρ ότι ο πνευματικά πράγματα ισί πο σημαντικά σαρέ κατά γιαβερά. Σαρ για παράδειγμας τι σικλιαρέν-πες κατά Γραφή, τι τζαν κο συναθροίσεις ντα κο έργος. (Ματθ. 6:33) Άμα να κερένα-λες ανταβά, τουμαρέ τσσαβέ κα μπορίνενας τι υπηρετίνεν ι Ιεχωβάς όχι επειδή μανγκένα Λες, αλλά για μα τι χαλαβέν τουμαρό χατίρι. Αντικάς μπορεί μα τι τσσουβέν πρώτα πουμαρέ ζωγιάτε ι αληθινή λατρεία ή ατζέ-ντα τι τσσιναβέν ντιπ τι υπηρετίνεν ι Ιεχωβάς.

19. Καγιά ελπίδα υπαρχίντιβελα οντουλένγκε σο τσσιναντέ τι υπηρετίνεν ι Ιεχωβάς; (Ντικχέν ο πλαίσιος-ντα « Μπορίνενα τι Βουρτίνεν κο Ιεχωβά!»)

¹⁹ Άμα κάποιος τσσιναντάς τι υπηρετίνελ ι Ιεχωβάς, μήπως να τθερέλα καέκ ελπίδα; Νάα, τθερέλα. Επειδή μπορίνελα τι μετανιώνελ ντα τι βουρτίνελ κι αληθινή λατρεία. Για τι κερέλ-λες ανταβά, χρειαζίντιβελα τι αβέλ ταπεινός ντα τι δεχτίνελ βοήθεια κατά πρεσβύτεροι. (Ιακ. 5:14) Βα, για τι αβές πάλι αμάλ ι Ιεχωβάσκο χρειαζίντιβελα προσπάθεια. Αλλά αξίνελα μπουτ!

20. Σαρ κα ντικχέλ-αμέν ο Ιεχωβά άμα μοιάζασα κο πιστοί βασιλιάδες;

²⁰ Σο σικλιλάμ κατά βασιλιάδες κο πουρανό Ισραήλ; Μπορίνασα τι αβάς σαρ ο πιστοί βασιλιάδες. Σαρ; Άμα ατσσικιαράσα αμαρό γκι σαστό κο Ιεχωβά. Άμα σικλιάσα αμαρέ λαθίνταρ, μετανιώνασα ντα κεράσα ο αλλαγές σο χρειαζίντιβενα. Ντα άμα συνεχίνασα τι ντας λατρεία σάντε κο Ιεχωβά αντικάς σαρ μανγκέλα βοβ. Άμα τουμέν κα τραμπίνεν τι ατσσόν αφοσιωμέ κο Ιεχωβά, βοβ-ντα κα ντικχέλ τουμέν σαρ τζενέ σο κερένα ο σωστός λέσκε γιακχίντε.