1, 2. Κον ισινέ ο Σαδώκ; (1 Χρονικών 12:22, 26-28)

 ΣΚΕΦΤΙΝΕΝ ακαβά: Πο μπουτ από 340.000 τζενέ γκιντισάλεας για τι κερέν ι Δαβιδίς βασιλιάς σαρό κο Ισραήλ. Για τριν ντιβεσά, ο μουρσά ατσσιλέ κο βεσά πασέ κι Χεβρών. Οτθέ ασάνας, κερένας λάφι ντα γκιλιαβένας χαράσαρ ύμνοι. (1 Χρον. 12:39) Ισινέ οτθέ εκ τερνό-ντα σο βακέρντιβελας Σαδώκ. Μάλλον ο Σαδώκ να ξεχωρίνελας οντουλέ τζενένταρ. Όμως, ο Ιεχωβά τσσουντάς σημασία λέστε ντα μανγκλάς αμέν-ντα τι σικλιάς ότι ισινέ οτθέ. (Διαβάνεν 1 Χρονικών 12:22, 26-28) Κον ισινέ ο Σαδώκ;

² Ο Σαδώκ ισινέ ιερέας ντα κερέλας μπουτί γιεκ με το αρχιερέας Αβιάθαρ. Ο Ντεβέλ επίσης ντινάς κο Σαδώκ μπουτ σοφία ντα βοηθίνελας-λες τι αγαβέλ λέσκο θέλημας. (2 Σαμ. 15:27) Ο τζενέ τζάνας κο Σαδώκ κάνα μανγκένας γκοντιαβέρ συμβουλές. Επίσης ο Σαδώκ τθερέλας θάρρος. Ανταλέ μαθημάστε κα ντικχάς σαρ ο Σαδώκ σικαντάς θάρρος.

3. (α) Σόσκε χρειαζίντιβελα τι τθερέν θάρρος ο υπηρέτες ι Ιεχωβάσκε; (β) Σο κα ντικχάς ανταλέ μαθημάστε;

³ Ανταλέ τελευταίε ντιβεσέντε, ο Μπενγκ προσπαθίνελα ατζέ πο μπουτ τι καταστραφίνελ αμαρί πίστη κο Ιεχωβά. (1 Πέτρ. 5:8) Χρειαζίντιβελα τι σικαβάς θάρρος καζόμ μπεσάσα τι καταστραφίνελ ο Ιεχωβά ι Μπενγκές ντα λέσκε πφιρνέ ντουνιάς. (Ψαλμ. 31:24) Για τι ντικχάς τριν τρόπους σο μπορίνασα τι σικαβάς θάρρος σαρ ο Σαδώκ.

ΤΙ ΥΠΟΣΤΗΡΙΝΕΝ Ι ΒΑΣΙΛΕΙΑ Ι ΝΤΕΒΛΕΣΚΙ

4. Σόσκε χρειαζίντιβελα θάρρος ο λαός ι Ιεχωβάσκο για τι υποστηρίνελ λέσκι Βασιλεία; (Ντικχέν ι φωτογραφία-ντα)

⁴ Ο λαός ι Ιεχωβάσκο υποστηρίνελα σαρέ πι γκίσαρ ι Βασιλεία ι Ντεβλέσκι. Όμως, μπουτ φαρ χρειαζίντιβελα θάρρος για τι κεράς-λες ανταβά. (Ματθ. 6:33) Για παράδειγμας, ανταλέ πφιρνέ ντουνιάστε, χρειαζίντιβελα θάρρος για τι τζουβντιάς αντικάς σαρ βακερένα ο κανόνες ι Ιεχωβάσκε ντα για τι μουτθαβάς  ο λατσσέ αμπέρια ι Βασιλειάκε. (1 Θεσ. 2:2) Επίσης καζόμ τζάλα ανταβά ντουνιάς αβέλα ατζέ πο τρουγιμέ ιτιρί κατά πολιτική. Οτθάρ χρειαζίντιβελα τι τθεράς ατζέ πο μπουτ θάρρος για μα τι λας θέση ασακέ πραγματέντε. (Ιωάν. 18:36) Μπουτ υπηρέτες ι Ιεχωβάσκε δυσκολίντιβενα τι νικαβέν ο αναγκαία ή μπορεί τι χαλέ νταπ ή τι τσσουβντιλέ φυλακή επειδή να ανακατούντιβενα κο πολιτικά ή να τζάνα κο στρατός.

5. Σόσκε χρειαζίντιβελας θάρρος ο Σαδώκ για τι υποστηρίνελ ι Δαβιδίς;

⁵ Κάνα ο Δαβίδ αβιλό βασιλιάς κι Χεβρών ο Σαδώκ να γκιλό οτθέ απλώς για τι γιορτάνελ. Λιντάς παλά-πέστε πο όπλα ντα ισινέ έτοιμος τι πολεμίνελ. (1 Χρον. 12:38) Ισινέ έτοιμος τι ακολουθίνελ ι Δαβιδίς κο τζένγκι a ντα τι βοηθίνελ ι λαός Ισραήλ τι νικίνελ πι ντουσμανίν. Παρόλο σο ο Σαδώκ να ισινέ μπουτ μπρεσά πολεμιστής, ισινέ εκ μουρς σο τθερέλας θάρρος.

6. Σαρ σικλιλό ο Σαδώκ κατά Δαβίδ τι σικαβέλ θάρρος; (Ψαλμός 138:3)

⁶ Σαρ σικλιλό εκ ιερέας σαρ ο Σαδώκ τι σικαβέλ ασακό θάρρος; Τζανέλας μπουτέ τζενέν σο τθερένας ζορ ντα θάρρος. Σίγουρα σικλιλό μπουτ πράγματα κατά παράδειγμας λένγκο. Φιρειπείν, ο Δαβίδ σικαβέλας μπουτ θάρρος κάνα οδηγίνελας ι γιαβερέν ντα πολεμίνελας. Οτθάρ σαρέ ο Ισραηλίτες μανγκένας τι κερέν-λες βασιλιάς. (1 Χρον. 11:1, 2) Ο Δαβίδ στηρίντιβελας πάντα κο Ιεχωβά για τι βοηθίνελ-λες τι πολεμίνελ πι ντουσμανίν. (Ψαλμ. 28:7· διαβάνεν Ψαλμός 138:3) Ο Σαδώκ επίσης σικλιόλας γιαβερέ-ντα μουρσένταρ σο σικαβένας θάρρος. Σαρ για παράδειγμας κατά Ιωδαέ ντα λέσκε τσσαβέσταρ, κατά πολεμιστής Βεναΐας ντα κατά γιαβερά 22 μουρσά σο ισινέ αρχηγοί κο φάρες ντα υποστηριντέ ι Δαβιδίς. (1 Χρον. 11:22-25· 12:26-28) Σαρέ ανταλά μουρσά μανγκένας μπουτ τι αβέλ ο Δαβίδ λένγκο βασιλιάς.

7. (α) Καλά παραδείγματα τζενένγκε αμαρέ ντιβεσένταρ βοηθίνενα-αμέν τι σικαβάς θάρρος; (β) Σο σικλιόνα κατά παράδειγμας ι πφραλέσκο Ενσίλου κο βίντεος;

 ⁷ Κάνα σκεφτίνασα σαρ ο γιαβερά σικαντέ θάρρος για τι ατσσόν αφοσιωμέ κο Ιεχωβά ντα λέσκε Βασιλειάτε, βοηθίντιβασα τι σικαβάς αμέν-ντα θάρρος. Αμαρό Βασιλιάς, ο Χριστός Ιησούς, να μανγκλάς ιτς τι ανακατούντιβελ με το πολιτικά κο ντουνιάς κι Μπενγκέσκο. (Ματθ. 4:8-11· Ιωάν. 6:14, 15) Στηρίντιβελας πάντα κο Ιεχωβά για τι λελ ζορ. Τθεράσα επίσης μπουτ παραδείγματα τερνέ μουρσένγκε σο να δεχτιντέ τι τζαν κο στρατός ή τι ανακατούντιβεν με το πολιτικά. Μπορίνενα τι αρακχέν ασακέ εμπειρίες κο ιστότοπος jw.org. b

ΤΙ ΒΟΗΘΙΝΕΝ ΤΟΥΜΑΡΕ ΠΦΡΑΛΕΝ

8. Κάνα μπορεί τι χρειαζίντιβεν θάρρος ο πρεσβύτεροι για τι ντεν κο πφραλά οντουλά σο χρειαζίντιβενα;

⁸ Ο υπηρέτες ι Ιεχωβάσκε χαιρίνενα τι βοηθίνεν ο εκ ι γιαβερές. (2 Κορ. 8:4) Όμως, μπάζιμα χρειαζίντιβελα θάρρος για τι κερέν-λες ανταβά. Για παράδειγμας, κάνα αβέλα-πες τζένγκι, ο πρεσβύτεροι αγαβένα ότι ο πφραλά ντα ο πφενιά χρειαζίντιβενα ενθάρρυνση ντα στήριξη. Επίσης μανγκένα τι αβέν σίγουροι ότι ο πφραλά τθερένα εκ τρόπος τι διαβάνεν ι Γραφή ντα ο έντυπα ντα τι ντικχέν άμα τθερένα χαμπέ, σέα ντα κάπου τι μπεσέν. Ο πρεσβύτεροι μανγκένα ι πφραλέν ντα ι πφενίν. Άκ’ σόσκε ντένα-λεν οντουλά σο χρειαζίντιβενα, ατζέ-ντα κάνα ανταβά ισί μπουτ επικίνδυνος. (Ιωάν. 15:12, 13) Κάνα κερένα-λες ανταβά σικαβένα θάρρος σαρ ο Σαδώκ.

9. Σαρ βακερένα ο εδάφια 2 Σαμουήλ 15:27-29, καλέ πραγμάσκε μπουτσσαντάς ο Δαβίδ τον Σαδώκ; (Ντικχέν ι φωτογραφία-ντα)

⁹ Η ζωή ι Δαβιδίσκι ισινέ σε κίνδυνος. Λέσκο τσσαβό ο Αβεσσαλώμ ισινέ αποφασισμέ τι μουνταρέλ ι Δαβιδίς για τι αβέλ βοβ βασιλιάς. (2 Σαμ. 15:12, 13) Ο Δαβίδ έπρεπε τι νασέλ αμέσως κατά Ιερουσαλήμ! Βακερντάς πι υπηρετόνγκε: «Ιστίν τι νασάς σόσκε καέκ αμένταρ να κα γλιτώνελ κατά Αβεσσαλώμ!» (2 Σαμ. 15:14) Καζόμ  νασένας ο υπηρέτες, ο Δαβίδ αγαντάς ότι κάποιος έπρεπε τι ατσσόλ παλάλ για τι μουτθαβέλ λέσκε ο σχέδια σο τθερέλας ο Αβεσσαλώμ. Οτθάρ μπουτσσαντάς παλάλ κι πόλη τον Σαδώκ ντα γιαβερέν σο ισινέ ιερείς για τι κερέν-λες ανταβά. (Διαβάνεν 2 Σαμουήλ 15:27-29) Έπρεπε τι τθερέν πουμαρί γκοντί. Ανταβά σο βακερντάς λένγκε ο Δαβίδ τι κερέν ισινέ μπουτ επικίνδυνος. Κα μπορίνενας ατζέ-ντα τι χασαρέν πουμαρί ζωή. Ο Αβεσσαλώμ ισινέ εγωιστής, μοβόρι ντα να χάλας-λες ανάγκη ατζέ-ντα τι μουνταρέλ εκχέ τζενές. Ανέν τουμαρέ γκοντιάτε σο κα κερέλας κο Σαδώκ ντα κο γιαβερά ιερείς άμα κα σικλιόλας ότι μουτθαβένας ο σχέδια λέσκε κο Δαβίδ για τι αρακχαβέν-λες!

10. Σαρ ο Σαδώκ ντα οντουλά σο ισινέ λέσαρ αρακχαντέ ι Δαβιδίς;

¹⁰ Ο Δαβίδ κερντάς εκ σχέδιος ντα μανγκλάς κατά Σαδώκ ντα εκχέ γιαβερέ αφοσιωμέ αμαλέσταρ, κατά Χουσαΐ, τι βοηθίνεν-λες. (2 Σαμ. 15:32-37) Ο Χουσαΐ έπρεπε τι κερέλας χάι ότι βοηθίνελας τον Αβεσσαλώμ. Βακερντάς κο Αβεσσαλώμ τι κερέλ επίθεση κο Δαβίδ εκχέ τροπόσαρ σο κα ντέλας χρόνος κο Δαβίδ τι προετοιμάντιβελ. Σοράν, ο Χουσαΐ βακερντάς κο Σαδώκ ντα κο Αβιάθαρ ο σχέδιος. (2 Σαμ. 17:8-16) Σοραντάν, βον ο ντούι μπορισάλε τι μπουτσσαβέν αμπέρι κο Δαβίδ. Ι Ιεχωβάσκε βοηθειάσαρ ο Σαδώκ ντα ο γιαβερά ιερείς αρακχαντέ ι ζωή ι Δαβιδίσκι.​—2 Σαμ. 17:21, 22.

11. Σαρ μπορίνασα τι σικαβάς θάρρος σαρ ο Σαδώκ κάνα βοηθίνασα αμαρέ πφραλέν;

¹¹ Σαρ μπορίνασα τι σικαβάς θάρρος σαρ ο Σαδώκ, άμα κα χρειαζίντιβελ τι βοηθίνας αμαρέ πφραλέν κάνα ισί σε κίνδυνος; (1) Τι ντεν καν κο οδηγίες. Κάνα αβέλα-πες κάτι ασακό, ισί σημαντικός τι ατσσάς ενωμέ. Τι ντεν καν κο οδηγίες σο ντέλα-τουμέν ο Μπέθελ. (Εβρ. 13:17) Ο πρεσβύτεροι πρέπει τι ανέν μπουτ φαρ πουμαρέ γκοντιάτε ο οδηγίες σο βακερένα σαρ τι αβάς έτοιμοι για το καταστροφές ντα σο τι κεράς κάνα αβέλα εκ καταστροφή. (1 Κορ. 14:33, 40) (2) Τι τθερέν θάρρος αλλά τι  αβέν προσεκτικοί. (Παρ. 22:3) Τι σκεφτίνεν πριν τι κερέν κάτι. Μα τσσουβέν τουμαρί ζωή σε κίνδυνος χωρίς τι αβέλ πραγματική ανάγκη. (3) Τι στηρίντιβεν κο Ιεχωβά. Τι ντεν-τουμέν γκοντί ότι ο Ιεχωβά πφαμπόλα μπουτ εμ τουμένγκε εμ τουμαρέ πφραλένγκε. Κα βοηθίνελ-τουμέν τι φροντίνεν τουμαρέ πφραλέν, χωρίς τι παθίνεν κάτι.

12, 13. Σο σικλιόνα κατά εμπειρία του Βίκτορ ντα του Βιτάλι; (Ντικχέν ι φωτογραφία-ντα)

¹² Σκεφτίνεν για παράδειγμας τον Βίκτορ ντα τον Βιτάλι, ντουέ πρεσβυτερόν σο γκερένας πράγματα χαμάσκε ντα πανί πουμαρέ πφραλέντε κι Ουκρανία. «Ρόνταας παντού για τι αρακχάς πράγματα χαμάσκε», βακερέλα ο Βίκτορ. «Μπουτ φαρ ασουνάας τι πυροβολίνεν οτθέ πασέ σο ισινάμας. Εκ πφραλ τθερέλας κι αποθήκη μερικά πράγματα χαμάσκε ντα ντινάς-λεν κο πφραλά. Αντικάς, μπουτ πφραλά τθερένας οντουλά σο χρειαζίντιβενας για μερικά ντιβεσά. Καζόμ λονταβάας πράγματα αμαρέ φορτηγόστε, εκ μπουτ μπαρί σφαίρα πελί 20 μέτρα πο οκόρινγκ. Σαρό οντουβά ντιβές μολίναβας ι Ιεχωβάς τι ντελ-μαν ο θάρρος σο χρειαζίντιβαβας για τι συνεχίναβ τι βοηθίναβ ι πφραλέν».

¹³ «Χρειαζίντιβαας μπουτ θάρρος», βακερέλα ο Βιτάλι. «Μο πρώτος ταξίδι ατσσικιαρντάς 12 σαάτια. Προσευχίντιβαβας κο Ιεχωβά σαρό κο ντρομ». Ο Βιτάλι τθερέλας θάρρος, αλλά ισινέ προσεκτικός-ντα. Βοβ βακερέλα: «Μανγκάβας κατά Ιεχωβά τι βοηθίνελ-μαν τι αβάβ γκοντιαβέρ ντα τι αγαβάβ μο όρια. Οδηγίναβας σάντε κο ντρομά σο μουκχένας-αμέν ο ασκέρια τι νακχάς. Μι πίστη αβιλί πο ζουρανί κάνα ντικχλόμ σαρ συνεργαζίντιβενα ο πφραλά ντα ο πφενιά. Νικαβένας ο εμπόδια κατά ντρομ, γκίντενας ντα λονταβένας κο φορτηγός πράγματα χαμάσκε, σέα ντα γιαβερά σημαντικά πράγματα. Επίσης, ντένας-αμέν χαμπέ ντα εκ τθαν τι μπεσάς καζόμ κεράας ο ταξίδι».

ΤΙ ΑΤΣΣΟΝ ΑΦΟΣΙΩΜΕ ΚΟ ΙΕΧΩΒΑ

14. Σαρ μπορεί τι επηρεάντιβας άμα εκ τζενό σο μανγκάσα τσσιναντάς τι υπηρετίνελ ι Ιεχωβάς;

¹⁴ Εκ κατά πο μπαρέ δοκιμασίες σο μπορεί τι νακχάς ισί κάνα εκ τζενό αμαρέ φαμιλιάταρ ή εκ λατσσό αμάλ αμαρό νασέλα κατά Ιεχωβά. (Ψαλμ. 78:40· Παρ. 24:10) Καζόμ πο μπουτ μανγκάσα ανταλέ τζενές, αζόμ πο δύσκολος κα αβέλ τι νταϊντίνας-λες ανταβά. Άμα νακχλέν κάτι ασακό, μπορίνενα τι λεν ζορ κατά αφοσίωση σο σικαντάς ο Σαδώκ.

15. Σόσκε χρειαζίντιβελας θάρρος ο Σαδώκ για τι ατσσόλ αφοσιωμέ κο Ιεχωβά; (1 Βασιλέων 1:5-8)

¹⁵ Ο Σαδώκ ατσσιλό αφοσιωμέ κο Ιεχωβά κάνα λέσκο μπουτ λατσσό συνεργάτης, ο Αβιάθαρ, τραμπιντάς μα τι αβέλ αφοσιωμέ. Ανταβά αβιλό-πες κο τελευταία μπρεσά σο ισινέ βασιλιάς ο Δαβίδ. Κάνα ο Δαβίδ ισινέ τι μερέλ, λέσκο τσσαβό ο Αδωνίας, μανγκλάς τι λελ ο θρόνος σο ο Ιεχωβά ντινάς πο λάφι ότι κα ντέλας κο Σολομώντας. (1 Χρον. 22:9, 10) Ο Αβιάθαρ τραμπιντάς τι υποστηρίνελ τον Αδωνία. (Διαβάνεν 1 Βασιλέων 1:​5⁠-8) Αντικάς ο Αβιάθαρ να ατσσιλό αφοσιωμέ όχι σάντε κο Δαβίδ αλλά κο Ιεχωβά-ντα! Σκεφτίνεν καζόμ μπουτ πφανγκλάς ανταβά ο γκι του Σαδώκ! Για 40 περίπου μπρεσά, βοβ ντα ο Αβιάθαρ συνεργασάλεας μπουτ σαρ ιερείς. (2 Σαμ. 8:17) Βον ο ντούι τθερένας ι ευθύνη τι ακχάρντιβελ η κιβωτός ι αληθινέ Ντεβλέσκι. (2 Σαμ. 15:29) Κι αρχή ο ντούι-ντα υποστηριντέ ι Δαβιδίς σο ισινέ βασιλιάς ντα κερντέας μπουτ γιαβερά-ντα πράγματα γιεκ κι υπηρεσία κι Ιεχωβάσκι.​—2 Σαμ. 19:11-14.

16. Καβά πράγμας μάλλον βοηθιντάς τον Σαδώκ τι ατσσόλ αφοσιωμέ;

¹⁶ Παρόλο σο ο Αβιάθαρ να ατσσιλό αφοσιωμέ κο Ιεχωβά ντα τραμπιντάς τι προδόνελ ι Δαβιδίς, ο Σαδώκ να κερντάς-λες ανταβά. Ο Δαβίδ να σκεφτιντάς ότι ο Σαδώκ-ντα να κα ατσσόλας αφοσιωμέ. Κάνα σικάντιλε ο πφιρνικανέ σχέδια σο κερντάας ο Αδωνίας, ο Δαβίδ μανγκλάς  κατά Σαδώκ, κατά Νάθαν ντα κατά Βεναΐας τι κερέν βασιλιάς ι Σολομωντάς. (1 Βασ. 1:32-34) Ο παράδειγμας σο μουκχλέ ο αφοσιωμέ υπηρέτες ι Ιεχωβάσκε σαρ ισινέ ο Νάθαν ντα γιαβερά σο υποστηριντέ ι βασιλιάς Δαβίδ μάλλον ντινάς ζορ ντα θάρρος κο Σαδώκ. (1 Βασ. 1:38, 39) Κάνα ο Σολομών αβιλό βασιλιάς «διοριντάς τον Σαδώκ τι αβέλ αρχιερέας κι θέση του Αβιάθαρ».​—1 Βασ. 2:35.

17. Σαρ μπορίνενα τι μοιάζεν κο Σαδώκ άμα εκ τζενό σο μανγκένα-λες νασέλα κατά Ιεχωβά;

¹⁷ Σαρ μπορίνενα τι μοιάζεν κο Σαδώκ; Άμα εκ τζενό σο μανγκένα-λες τραμπίνελα τι νασέλ κατά Ιεχωβά, σικαβέν ξεκάθαρα ότι τουμέν τραμπίνενα τι ατσσόν αφοσιωμέ κο Ντεβέλ. (Ιησ. Ναυή 24:15) Ο Ιεχωβά κα ντελ-τουμέν ι ζορ ντα ο θάρρος σο κα χρειαζίντιβεν. Τι στηρίντιβεν λέστε αντράλ κατά προσευχή ντα τι ατσσόν πασέ τουμαρέ αφοσιωμέ πφραλέντε. Ι Ιεχωβάσκε ισί μπουτ σημαντική τουμαρί αφοσίωση ντα κα ευλογίνελ-τουμέν ανταλέσκε.​—2 Σαμ. 22:26.

18. Σο σικλιόνα κατά Μάρκο ντα κατά Σίσε;

¹⁸ Σκεφτίνεν σο αβιλό-πες κο Μάρκο ντα λέσκε ρομνιάτε, κι Σίσε. Λένγκε ντούι τσσαγιά κάνα μπαριλέ νασλέ κατά αλήθεια. Ο Μάρκο βακερέλα: «Κατά ντιβές σο μπιάντιβενα το τσσαβέ, μανγκέσα-λεν μπουτ. Κα κερέας σο νακχέλα τι βαστέσταρ για τι αρακχαβές-λεν. Οτθάρ, κάνα τραμπίνενα τι νασέν κατά Ιεχωβά, τι καρδιά πφανγκιόλα. Αλλά ο Ιεχωβά βοηθίνελα-αμέν τι νταϊντίνας. Κάνα με ισινόμ μπίζουρανο, μι ρομνί ισί ζουρανί. Ντα κάνα βόι ισί μπίζουρανι, ισινόμ ζουρανό με. Ο Ιεχωβά κερέλα-λες ανταβά!» Η Σίσε βακερέλα: «Ναστί κα νταϊντίναας άμα ο Ιεχωβά να κα ντέλας-αμέν ι ζορ σο χρειαζίντιβαας. Χάβας-μαν μι νεαυτόσαρ ντα βακεράβας ότι φταίναβας με. Οτθάρ, βακερντόμ κο Ιεχωβά σαρ νιωθίναβας. Χάνικ πο σοράν, εκ πφεν σο τθεράβας μπρεσά τι ντικχάβ-λα αβιλί πασέ μάντε, ακουμπιντάς-μαν κι πλάτη, ντικχλάς-μαν κο γιακχά ντα βακερντάς: “Ντε-τουτ γκοντί, Σίσε, να φταίνεσα τούι”. Ι Ιεχωβάσκε βοηθειάσαρ, μπορισάλομ τι ατσσικιαράβ μι χαρά κι υπηρεσία λέσκι».

19. Σο ισινέν αποφασισμέ τι κερέν;

¹⁹ Ο Ιεχωβά μανγκέλα σαρέ Λέσκε υπηρέτες τι τθερέν θάρρος σαρ ο Σαδώκ. (2 Τιμ. 1:7) Όμως, να μανγκέλα τι στηρίντιβας αμαρέ ζοριάτε. Μανγκέλα τι στηρίντιβας λέστε. Οτθάρ, άμα κα νακχέν κάτι σο κα χρειαζίντιβελ τι σικαβέν θάρρος, μανγκέν βοήθεια κατά Ιεχωβά. Μπορίνενα τι αβέν σίγουροι ότι κα ντελ-τουμέν θάρρος σαρ ντινάς κο Σαδώκ-ντα!​—1 Πέτρ. 5:10.