1. Σαρ νιωθίνενα τουμέν για την αλήθεια;

 Ι ΙΕΧΩΒΑΣΚΟ λαός μανγκέλα μπουτ ι αλήθεια σο ισί αντρέ λέσκε Λαφίστε. Αμαρί πίστη βασίντιβελα κι αλήθεια ανταγιά. (Ρωμ. 10:17) Ισινάμ σίγουροι ότι ο Ιεχωβά κερντάς ι Χριστιανική κχανγκιρί για τι αβέλ «η κολόνα ντα ο θεμέλιος ι αληθειάκο». (1 Τιμ. 3:15) Ντάσα καν χαράσαρ “οντουλέν σο οδηγίνενα-αμέν” καζόμ ντένα-αμέν τι αγαβάς ι αλήθεια κατά Αγία Γραφή ντα βοηθίνενα-αμέν τι κεράς οντουβά σο μανγκέλα ο Ντεβέλ.​—Εβρ. 13:17.

2. Σαρ βακερέλα κο εδάφιος Ιακώβου 5:19, σο κα μπορίναας τι παθίνας ατζέ-ντα άμα τζανάσα ι αλήθεια;

² Όμως, ατζέ-ντα άμα δεχτιντάμ ι αλήθεια ντα αγαντάμ ότι χρειαζίντιβελα τι ντας καν κο πράγματα σο βακερέλα αμένγκε η οργάνωση ι Ντεβλέσκι, κα μπορίναας τι χουχάντιβας. (Διαβάνεν Ιακώβου 5:19) Ο Μπενγκ κα μανγκέλας μπουτ τι κερέλ-αμέν τι τσσιναβάς τι ντας μπέσα κο λάφια κι Γραφιάκε ή κο τρόπος σο οδηγίνελα-αμέν η οργάνωση ι Ντεβλέσκι!​—Εφεσ. 4:14.

3. Σόσκε χρειαζίντιβελα τι ατσσάς αφοσιωμέ κι αλήθεια; (Εφεσίους 6:13, 14)

³ Διαβάνεν Εφεσίους 6:13, 14. Ατζεχάνικ, ο Μπενγκ κα χρησιμοποιήνελ μπαρέ ψέματα για τι χουχαβέλ σαρέ ι τζενέν ντα αντικάς τι τζαν κόντρα κο Ιεχωβά. (Αποκ. 16:13, 14) Επίσης, τζανάσα ότι ο Μπενγκ καζόμ τζάλα κα προσπαθίνελ ατζέ πο μπουτ τι χουχαβέλ ι Ιεχωβάσκε λαός. (Αποκ. 12:9) Άκ’ σόσκε ισί σημαντικός τι σικλιαράς-αμέν τι ξεχωρίνας ι αλήθεια κατά ψέμας ντα τι ντας καν κι αλήθεια. (Ρωμ. 6:17· 1 Πέτρ. 1:22) Ανταβά ισί μπουτ σημαντικός για τι σώντιβας κατά μπαρί στεναχώρια!

4. Σο κα ντικχάς ανταλέ μαθημάστε;

 ⁴ Ανταλέ μαθημάστε, κα ντικχάς ντούι μπουτ σημαντικές ιδιότητες. Ανταλά ιδιότητες κα βοηθίνεν-αμέν: πρώτον, τι ξεχωρίνας καγιά ισί η αλήθεια σο αβέλα κατά Αγία Γραφή ντα, δεύτερον, τι δεχτίνας οντουλά σο βακερέλα αμένγκε ι Ντεβλέσκι οργάνωση. Σοράν, κα ντικχάς τριν πράγματα σο πρέπει τι κεράς για τι ατσσάς αφοσιωμέ κι αλήθεια.

ΙΔΙΟΤΗΤΕΣ ΣΟ ΧΡΕΙΑΖΙΝΤΙΒΑΣΑ ΓΙΑ ΤΙ ΞΕΧΩΡΙΝΑΣ Ι ΑΛΗΘΕΙΑ

5. Σαρ βοηθίνελα-αμέν η νταρ μα τι στεναχωρίνας ι Ιεχωβάς τι αγαβάς ι αλήθεια;

⁵ Νταρ μα τι στεναχωρίνας ι Ιεχωβάς. Τι νταράς κατά Ιεχωβά μανγκέλα τι βακερέλ ότι μανγκάσα-λες αζόμ μπουτ σο να κα κεράας ποτές κάτι σο κα πφανγκέλας λέσκο γκι. Μανγκάσα μπουτ τι αγαβάς ι διαφορά σο τθερέλα ο σωστός κατά λάθος ντα η αλήθεια κατά ψέμας, για τι κεράς ο γκι ι Ιεχωβάσκο τι χαιρίνελ. (Παρ. 2:3-6· Εβρ. 5:14) Μπουτ φαρ οντουβά σο κερέλα ι τζενένγκο γκι πφανγκέλα ι Ιεχωβάσκο γκι. Οτθάρ, δεν πρέπει ποτές τι μουκχάς ι νταρ κατά τζενέ τι αβέλ πο μπαρί κατά αγάπη σο τθεράσα ι Ιεχωβάσκε.

6. Σαρ η νταρ κατά τζενέ κερντάς ανταλέ ντεσέ Ισραηλιτέν μα τι βακερέν ο πράγματα αντικάς σαρ ισινέ;

⁶ Άμα νταράσα κατά τζενέ πο μπουτ απ’ ότι κατά Ιεχωβά, μπορεί τι νασάς κατά αλήθεια. Ανέν τουμαρέ γκοντιάτε ο παράδειγμας ι 12 αρχηγόνγκο σο γκιλέ αποτσοράλ τι ντικχέν ο τθεμ σο ο Ιεχωβά ντινάας πο λάφι ότι κα ντέλας κο Ισραηλίτες. Η νταρ σο τθερένας κατά Χαναναίοι ο ντες αρχηγοί ισινέ πο μπαρί κατά αγάπη σο τθερένας ι Ιεχωβάσκε. Βακερντέ κο γιαβερά Ισραηλίτες: «Να μπορίνασα τι τζας κόντρα οντουλέ τζενέντζαρ, επειδή ισί πο ζουρανέ αμένταρ». (Αριθ. 13:27-31) Κο γιακχά κι τζενένγκε, ο Χαναναίοι ισινέ μπαγιά πο ζουρανέ κατά Ισραηλίτες. Αλλά ο τζενό σο βακερέλας ότι ο Ισραηλίτες να μπορίνενας τι νικίνεν πουμαρέ ντουσμανίν μπιστρέλας ι Ιεχωβάς. Οντουλά ντες αρχηγοί έπρεπε τι ατσσόνας  οντουλέ πραγμάστε σο μανγκέλας ο Ιεχωβά τι κερένας ο Ισραηλίτες. Έπρεπε επίσης τι σκεφτίνενας λατσσές οντουλά σο κερντάας λένγκε ο Ιεχωβά πριν από χάνικ βακίτι. Άμα κα κερένας-λες ανταβά, κα αγαβένας ότι η ζορ ι Χαναναιόνγκι ισινέ μπουτ χουρντί ανγκλάλ κι μπαρί ζορ κι Ιεχωβάσκι. Όμως ο Ιησούς του Ναυή ντα ο Χάλεβ να ισινέ σαρ ανταλέ άπιστε αρχηγόντε. Βον μανγκλέ τι κερέν ι Ιεχωβάσκο γκι. Βακερντέ κο λαός: «Άμα ο Ιεχωβά κα ατσσόλ ευχαριστιμέ αμέντζαρ, κα ανέλ-αμέν σίγουρα ανταλέ τθεμέστε».​—Αριθ. 14:6-9.

7. Σαρ μπορίνασα τι κεράς πο ζουρανί αμαρί νταρ μα τι στεναχωρίνας ι Ιεχωβάς; (Ντικχέν ι φωτογραφία-ντα)

⁷ Για τι κεράς πο ζουρανί αμαρί νταρ μα τι στεναχωρίνας ι Ιεχωβάς, χρειαζίντιβελα τι σκεφτίνας σο κερέλα λέσκο γκι κάθε φαρ σο λάσα εκ απόφαση. (Ψαλμ. 16:8) Κάνα διαβάνενα ιστορίες κατά Γραφή, πουτσέν-τουμέν: “Άμα κα νακχάβας με κάτι ασακό, καγιά απόφαση κα λάβας;” Για παράδειγμας, ανέν τουμαρέ γκοντιάτε ότι ισινέν οτθέ ντα ασουνένα κατά ντες αρχηγοί τι βακερέν ότι ο Ισραηλίτες να κα μπορίνενας τι νικίνεν ι Χαναναιόν. Τουμέν, κα πακιάνας-λεν ντα κα νταρένας κατά τζενέ; Ή μήπως τουμαρί αγάπη ι Ιεχωβάσκε ντα η επιθυμία τι κερέν λέσκο γκι κα αβέλας πο ζουρανί κατά νταρ; Σαρό ο λαός αζομάν να αγαντάς ι αλήθεια σο βακερντέ ο Ιησούς του Ναυή ντα ο Χάλεβ. Αντικάς, χασαρντέ ι ευκαιρία τι ντεν κο Υποσχεμέ Τθεμ.​—Αριθ. 14:10, 22, 23.

8. Καγιά ιδιότητα πρέπει τι μαράς-αμέν τι μπαριαράς, ντα σόσκε;

⁸ Ταπεινότητα. Ο Ιεχωβά σικαβέλα ι αλήθεια κο ταπεινά τζενέ. (Ματθ. 11:25) Δεχτιντάμ ταπεινά βοήθεια για τι σικλιάς ι αλήθεια. (Πράξ. 8:30, 31) Όμως, πρέπει τι συνεχίνας τι προσοχίνας για μα τι αβάς μπαρικανέ. Άμα ισινάμ μπαρικανέ, μπορεί τι αμντίνας ότι αμαρέ απόψεις ισί αζόμ σωστές, καζόμ ισί ο αρχές ι Γραφιάκε ντα ο οδηγίες κατά οργάνωση ι Ιεχωβάσκι.

9. Σαρ μπορίνασα τι ατσσικιαράς αμαρί ταπεινότητα;

⁹ Για τι ατσσικιαράς αμαρί ταπεινότητα, χρειαζίντιβελα τι ντας-αμέν γκοντί καζόμ χουρντέ ισινάμ ανγκλάλ κο Ιεχωβά. (Ψαλμ. 8:3, 4) Επίσης, μπορίνασα τι προσευχίντιβας κο Ιεχωβά τι βοηθίνελ-αμέν τι αβάς πο ταπεινοί ντα τι ντας καν. Ο Ιεχωβά βοηθίνελα-αμέν τι αγαβάς ότι λέσκε σκέψεις, σο σικλιάσα κατά Γραφή ντα λέσκε οργανωσιάταρ, τθερένα πο μπαρί αξία κατά σκέψεις αμαρέ. Κάνα διαβάνενα ι Γραφή, ρόντεν καλά πράγματα σικαβένα ότι ο Ιεχωβά μανγκέλα ι ταπεινότητα ντα μισίνελα ο μπαρικανιπέ. Επίσης, προσπαθίνεν ατζέ πο μπουτ τι ατσσόν ταπεινοί κάνα λένα εκ διορισμός σο ντέλα-τουμέν εξουσία ή κερέλα-τουμέν τι σικάντιβεν.

ΣΑΡ ΜΠΟΡΙΝΑΣΑ ΤΙ ΣΥΝΕΧΙΝΑΣ ΤΙ ΝΤΑΣ ΚΑΝ ΚΙ ΑΛΗΘΕΙΑ

10. Καλέ τζενέν χρησιμοποιηντάς ο Ιεχωβά για τι σικλιαρέλ ντα τι οδηγίνελ πι λαός;

¹⁰ Συνεχίνεν τι ντεν μπέσα οντουλέντε σο βακερέλα η οργάνωση ι Ιεχωβάσκι. Κο πουρανό Ισραήλ, ο Ιεχωβά ντέλας οδηγίες πι λαόστε αντράλ κατά Μωυσής ντα σοράν αντράλ κατά Ιησούς του Ναυή. (Ιησ. Ναυή 1:16, 17) Ο Ισραηλίτες ευλογίντιβενας κάνα αγαβένας ότι ο Ιεχωβά τσσουντάας ανταλέ τζενέν κι θέση σο ισινέ. Μπουτ μπρεσά πο σοράν, ο 12 απόστολοι τθερένας ι ευθύνη τι οδηγίνεν ι Χριστιανική κχανγκιρί. (Πράξ. 8:14, 15) Όμως, πο σοράν, ντιντιλί ανταγιά ευθύνη γιαβερέ-ντα πρεσβυτερόντε κι Ιερουσαλήμ. Ο πφραλά ντένας καν κο οδηγίες σο λένας οντουλέ πιστέ μουρσένταρ. Αντικάς, ο «κχανγκιριά αβένας πο ζουρανέ κι πίστη ντα αβγατίντιβενας κάθε ντιβές». (Πράξ. 16:4, 5) Αντιβές-ντα ευλογίντιβασα κάνα ντάσα καν κο οδηγίες σο ντέλα η οργάνωση ι Ιεχωβάσκι. Αλλά σαρ κα νιωθίνελας  ο Ιεχωβά άμα να κα δεχτίναας ότι βοβ τραμπίνελα ι διορισμέ τζενέν για τι οδηγίνεν-αμέν; Κα αρακχάς ι απάντηση άμα κα ντικχάς σο αβιλό-πες αζομάν σο ο Ισραηλίτες τζάνας κο Υποσχεμέ Τθεμ.

11. Σο παθισάλε οντουλά σο να σικαντέ σεβασμός, οντουλέστε σο τραμπιντάας ο Ντεβέλ, κο Μωυσής; (Ντικχέν ι φωτογραφία-ντα)

¹¹ Κάνα ο Ισραηλίτες τζάνας κο Υποσχεμέ Τθεμ, μερικά μουρσά σο τθερένας εξουσία αρχισάλε μα τι αβέν σίγουροι ότι ο Μωυσής ισινέ οντουβά σο διοριντάας ο Ιεχωβά. Βακερντέ: «Σαρό ο λαός ισί άγιος [όχι σάντε ο Μωυσής], σαρέ ο Ισραηλίτες, ντα ο Ιεχωβά ισί λέντζαρ». (Αριθ. 16:1-3) Ισινέ μπαγιά ότι κο γιακχά κι Ντεβλέσκε “σαρό ο λαός ισινέ άγιος”. Όμως, ο Ιεχωβά τραμπιντάας ι Μωυσής για τι οδηγίνελ πι λαός. (Αριθ. 16:28) Κάνα γκιλέ κόντρα κο Μωυσής, ισινέ σαρ τι γκιλέ κόντρα κο Ιεχωβά. Να σκεφτίνενας οντουβά σο μανγκέλας ο Ιεχωβά. Σκεφτίνενας οντουλά σο μανγκένας βον, δηλαδή τι τθερέν πο μπουτ εξουσία ντα τι σικάντιβεν. Ο Ντεβέλ μουνταρντάς οντουλέν σο ξεκινιντέ ανταγιά κόντρα, αλλά μπουτέ γιαβερέν-ντα σο γκιλέ παλά-λέντε. (Αριθ. 16:30-35, 41, 49) Μπορίνασα τι αβάς σίγουροι ότι ο Ιεχωβά να μανγκέλα ιτς ι τζενέν σο να σεβάνενα ο οδηγίες σο ντέλα-αμέν αντράλ κατά οργάνωση λέσκι.

12. Σόσκε μπορίνασα τι συνεχίνας τι ντας μπέσα κι οργάνωση κι Ιεχωβάσκι;

¹² Μπορίνασα τι συνεχίνας τι ντας μπέσα κι οργάνωση κι Ιεχωβάσκι. Κάνα ντικχίντιβελα ότι χρειαζίντιβελα τι αβέλ εκ αλλαγή κο τρόπος σο αγαβάσα εκ αλήθεια κατά Γραφή ή κο τρόπος σο κεράσα ο έργος, ο διορισμέ πφραλά κερένα ο αλλαγές σο χρειαζίντιβελα. (Παρ. 4:18) Οντουβά σο μανγκένα πο μπουτ σαριλένταρ ισί τι κερέν ο γκι ι Ιεχωβάσκο. Επίσης, κερένα ο πο λατσσό σο μπορίνενα για τι βασίνεν ο αποφάσεις σο λένα κι Γραφή. Κερένα-λες ανταβά επειδή αντρέ κι Γραφή ισί ο λάφια σο πρέπει τι ακολουθίνεν σαρέ ο υπηρέτες ι Ιεχωβάσκε.

13. Σο ισί «ο λάφια σο κερένα λατσσιπέ», ντα σο πρέπει τι κεράς ανταλέντζαρ;

 ¹³ «Τι ατσσικιαρές ζουρανές ο λάφια σο κερένα λατσσιπέ». (2 Τιμ. 1:13) «Ο λάφια σο κερένα λατσσιπέ» ισί ο πράγματα σο σικλιαρντάς ο Χριστός ντα υπαρχίντιβενα αντρέ κι Αγία Γραφή. (Ιωάν. 17:17) Σαρέ οντουλά σο πακιάσα στηρίντιβενα κο σικλιαριπέ ανταβά. Η οργάνωση ι Ιεχωβάσκι σικλιαρντάς-αμέν τι συνεχίνας τι ντας μπέσα ανταλέ λαφίντε. Άμα κα κεράς-λες ανταβά, κα ευλογίντιβας.

14. Σαρ τσσιναντέ μερικοί Χριστιανοί τι ατσσικιαρέν «ο λάφια σο κερένα λατσσιπέ»;

¹⁴ Σο μπορεί τι παθίνας άμα κα σταματίνας τι βασίνας οντουλά σο πακιάσα κο «λάφια σο κερένα λατσσιπέ»; Ντικχέν εκ παράδειγμας. Κο μπρεσά σο τζουβντιόνας ο πρώτοι Χριστιανοί, πφιρντιλό ο λάφι ότι ο ντιβές ι Ιεχωβάσκο αβιλόας. Όμως ανταβά να ισινέ μπαγιά. Μπέκιμ μπουτσσάντιλοας εκ γράμμας σο βακερέλας-λες ανταβά, ντα ο τζενέ αμντίνενας ότι γραφιντάας-λες ο Παύλος. Χωρίς τι μπεσέν ντα τι ρόντεν άμα ισινέ αντικάς ο πράγματα, μερικοί Χριστιανοί κι Θεσσαλονίκη πακιαντέ ανταβά ψέμας ντα μάλιστα βακερένας-λες γιαβερτθέ-ντα. Να κα χουχάντιβενας άμα κα ντένας-πες γκοντί οντουλά σο σικλιαρντάας-λεν ο Παύλος κάνα ισινέ λέντζαρ. (2 Θεσ. 2:1-5) Ο Παύλος ντινάς πι πφραλέντε ι συμβουλή μα τι πακιάν σο-ντα ασουνένας. Μανγκέλας τι βοηθίνελ-λεν τι αγαβέν άμα εκ γράμμας ισινέ λέσταρ. Οτθάρ, ο Παύλος μπιτισκιαρντάς ι δεύτερη επιστολή κο Θεσσαλονικείς ι λαφίντζαρ: «Αντικάς χαιρετίναβα-τουμέν, με ο Παύλος, κάνα γραφίναβα μι βαστέσαρ. Πάντα αντικάς γραφίναβα σαρέ μο γράμματα, για τι τζανέν ότι με γραφιντόμ-λεν».​—2 Θεσ. 3:17.

15. Σαρ μπορίνασα τι αρακχαβάς-αμέν κατά ψέματα σο ντικχίντιβενα αληθινά; Βακερέν εκ παράδειγμας. (Ντικχέν ο φωτογραφίες-ντα)

¹⁵ Σο σικλιάσα κατά λάφια σο βακερντάς ο Παύλος κο Θεσσαλονικείς; Κάνα ασουνάσα κάτι σο να ταιριάνελα οντουλέντζαρ σο σικλιλάμ κατά Γραφή ή κάτι σο κερέλα-αμέν τι σαστίνας, χρειαζίντιβελα τι αβάς προσεκτικοί. Κι πρώην Σοβιετική Ένωση, αμαρέ ντουσμάνια πφιραντέ κο πφραλά εκ επιστολή ντα βακερένας χάι ότι ισινέ κατά Μπέθελ. Ο γράμμας βακερέλας ότι έπρεπε μερικά πφραλά τι κερέν εκ γιαβέρ, ξεχωριστή οργάνωση. Ο γράμμας ντικχίντιβελας  ότι ισινέ αληθινός. Αλλά ο πιστά πφραλά να χουχάντιλε. Αγαντέ ότι οντουλά σο βακερέλας ο γράμμας να ταιριάνενας οντουλέντζαρ σο σικλιλέας κατά Γραφή. Αντιβές, αμαρέ ντουσμάνια χρησιμοποιήνενα μπάζιμα ο Ίντερνετ για τι μπερδίνεν-αμέν ντα τι ανέν αμένγκε διχόνοια. Αντίς τι “μουκχάς αμαρί γκοντί τι μπερδίντιβελ” κατά λάφια σο βακερένα ο γιαβερά, μπορίνασα τι αρακχαβάς-αμέν κάνα σκεφτίνασα άμα ανταβά σο ασουνάσα ή διαβάνασα συμφωνίνελα με το αλήθειες ι Γραφιάκε.​—2 Θεσ. 2:2· 1 Ιωάν. 4:1.

16. Σαρ βακερένα ο εδάφια Ρωμαίους 16:17, 18, σο πρέπει τι κεράς άμα μερικά πφραλά πφιραβένα λάφια σο τζάνα κόντρα κι αλήθεια;

¹⁶ Τι ατσσόν ενωμέ οντουλέντζαρ σο ισί αφοσιωμέ κο Ιεχωβά. Ο Ιεχωβά μανγκέλα τι αβάς ενωμέ κι λατρεία αμαρί. Κα ατσσάς ενωμέ άμα συνεχίνασα τι ντας καν κι αλήθεια. Οντουλά τζενέ σο πφιραβένα λάφια σο τζάνα κόντρα κι αλήθεια ανένα διχόνοια αντρέ κι κχανγκιρί. Ανταλέσκε, ο Ντεβέλ βακερέλα αμένγκε τι “ατσσάς ντουρ λένταρ”. Άμα να κα κεράς-λες ανταβά, μπέκιμ αμέν-ντα ο ίδιοι τι νασάς ντουρ κατά αλήθεια.​—Διαβάνεν Ρωμαίους 16:17, 18.

17. Σο λατσσιπέ ντικχάσα κάνα ξεχωρίνασα ι αλήθεια ντα ντάσα καν λάτε;

¹⁷ Άμα κα ξεχωρίνας ι αλήθεια ντα κα ντας καν λάτε, κα ατσσάς πασέ κο Ιεχωβά ντα κα ατσσικιαράς ζουρανί αμαρί πίστη. (Εφεσ. 4:15, 16) Να κα χουχάντιβας κατά ψεύτικος σικλιαριπέ ντα κατά μπαρέ ψέματα ι Μπενγκέσκε. Κα αβάς αρακχαντέ κο βαστά κι Ιεχωβάσκε καζόμ κα αβέλ-πες η μπαρί στεναχώρια. Τι ατσσόν αφοσιωμέ κο πράγματα σο ισί αληθινά, «ντα ο Ντεβέλ σο ντέλα ειρήνη κα αβέλ τουμέντζαρ».​—Φιλιπ. 4:8, 9.