1-3. (α) Κάνα μπορεί τι γραφισάλο ο Ψαλμός 147; (β) Σο μπορίνασα τι σικλιάς όταν διαβάνασα ο Ψαλμός 147;

ΜΠΟΥΤ φαρ ισαράσα εκχέ τζενές όταν βακερέλα ή κερέλα κάτι σο μπεϊντίνασα. Καζόμ πιο μπουτ μανγκάσα τι ντας δόξα κο Ιεχωβά Ντεβέλ! Αμέν δοξάνασα-λες επειδή τθερέλα μπουτ δύναμη, σο ντικχάσα-λα κο σουκάρ πράγματα σο κερντάς, ντα επειδή σικαβέλα αμένγκε μπουτ μπαρί αγάπη, σο ντικχάσα-λα κι θυσία λέσκε Τσσαβέσκι.

² Όταν διαβάνασα ο Ψαλμός 147, αγαβάσα ξεκάθαρα ότι ο τζενό σο γραφιντάς-λες μανγκέλας αντράλ πι γκίσταρ τι ντελ δόξα κο Ιεχωβά. Επίσης, βακερντάς γιαβερέ τζενένγκε-ντα τι ντεν δόξα κο Ντεβέλ γιεκ λέσαρ.​—Διαβάνεν Ψαλμός 147:1, 7, 12.

³ Να τζανάσα κον γραφιντάς ο Ψαλμός 147. Αλλά ο τζενό σο γραφιντάς-λες μάλλον τζουβντιόλας όταν ο Ισραηλίτες βουρτισάλε κι Ιερουσαλήμ, αφού ο Ιεχωβά ελευθερωντάς-λεν κατά Βαβυλώνα. (Ψαλμός 147:2) Ο ψαλμωδός ντινάς δόξα κο Ιεχωβά επειδή Λέσκο λαός μπορίνελας πάλι τι ντελ-λες λατρεία πι τθεμέστε. Σοράν, ο ψαλμωδός βακερντάς γιαβερά-ντα λόγους για τι ντας δόξα κο Ιεχωβά. Καλά ισί ανταλά λόγοι; Ντα σο  λόγους τθερένα τουμέν για τι βακερέν «Αλληλούια», ή γιαβέρσοϊ «Ντεν δόξα κο Γιαχ»;​—Ψαλμός 147:1.

4. Όταν ο βασιλιάς Κύρος ελευθερωντάς ι Ισραηλιτέν, σαρ πρέπει τι νιωσάλε βον, ντα σόσκε;

⁴ Σκεφτίνεν σαρ νιωθίνενας ο Ισραηλίτες όταν ισινέ αιχμάλωτοι κι Βαβυλώνα. Οντουλά σο γκερντέ-λεν οτθέ πρασάνας-λεν ντα βακερένας λένγκε: «Γκιλιαβέν αμένγκε εκ κατά ύμνους της Σιών». Αλλά ο Ιουδαίοι να τθερένας όρεξη τι γκιλιαβέν. Η Ιερουσαλήμ, ο πιο μπαρό λόγος σο τθερένας τι χαιρίνεν, καταστραφισάλιας. (Ψαλμός 137:​1-3, 6) Λένγκε γκιά πφανγκιλέ, ντα τθερένας ανάγκη τι παρηγορίντιβεν. Αλλά αβιλό ακριβώς οντουβά σο βακερέλας ο λάφι ι Ντεβλέσκο: ο Ιεχωβά βοηθιντάς πι λαός. Σαρ; Ο βασιλιάς της Περσίας, ο Κύρος, λιντάς ι Βαβυλώνα ντα βακερντάς: «[Ο Ιεχωβά] τσσουντάς-μαν τι κεράβ λέσκε εκ κχερ κι Ιερουσαλήμ». Επίσης, ο Κύρος βακερντάς κο Ισραηλίτες: «Κον τουμένταρ ισί λέσκε λαόσταρ, μακάρι ο Ιεχωβά, λέσκο Ντεβέλ, τι αβέλ λέσαρ. Μπορίνελα τι τζαλ». (2 Χρονικών 36:​23) Καζόμ μπουτ πρέπει τι παρηγοριντέ ανταλά λάφια ι Ισραηλιτέν κι Βαβυλώνα!

5. Σο βακερντάς ο ψαλμωδός για τη δύναμη σο τθερέλα ο Ιεχωβά τι κερέλ-αμέν λατσσές;

⁵ Ο Ιεχωβά να παρηγοριντάς σάντε ι Ισραηλιτέν σαρ λαός, αλλά ι κάθε Ισραηλιτής-ντα ξεχωριστά. Ο Ιεχωβά κερέλα ο ίδιος αμένγκε-ντα αντιβές. Ο ψαλμωδός γραφιντάς ότι ο Ντεβέλ «κερέλα λατσσές οντουλέν σο τθερένα πφανγκό γκι ντα πφάντελα λένγκε πληγές». (Ψαλμός 147:3) Όταν ισινάμ νασφαλέ ή μπουτ στεναχωριμέ, μπορίνασα τι αβάς σίγουροι ότι ο Ιεχωβά πφαμπόλα αμένγκε. Ο Ιεχωβά μανγκέλα αντράλ πι γκίσταρ τι παρηγορίνελ-αμέν ντα τι πφάντελ ο πληγές σο τθεράσα αντρέ αμαρέ γκίστε. (Ψαλμός 34:​18· Ησαΐας 57:​15) Ντέλα-αμέν σοφία ντα δύναμη για τι μπορίνας τι ντας-λεν πέρα σαρέ ι προβληματέντζαρ σο μπορεί τι τθεράσα.​—Ιακώβου 1:5.

6. Σαρ μπορίνενα τι βοηθίντιβεν κατά εδάφιος Ψαλμός 147:​4; (Ντικχ ι φωτογραφία σο ισί κι αρχή.)

⁶ Σοράν ο ψαλμωδός ντικχλάς ο ουρανός ντα βακερντάς ότι ο Ιεχωβά «γκινέλα ο τσεργανιά» ντα «ντέλα-λεν σαριλέν βίκος λένγκε ναβέσαρ». (Ψαλμός 147:4) Ο ψαλμωδός μπορίνελας τι ντικχέλ ο τσεργανιά αλλά να νακχέλας λέσκε γκοντιάταρ καζόμ μπουτ ισινέ. Αντιβές ο επιστήμονες τζανένα ότι υπαρχίντιβενα δισεκατομμύρια τσεργανιά κο γαλαξίας αμαρό. Ντα μπορεί τι υπαρχίντιβενα τρισεκατομμύρια γαλαξίες σαρό κο σύμπαν! Ο τζενέ ναστί γκινένα σαρέ ο τσεργανιά, αλλά Οντουβά σο κερντάς-λεν μπορίνελα. Κι πραγματικότητα, τζανέλα ι κάθε τσεργάν αζόμ λατσσές σο τσσουντάς ι κάθε εκχιάκε εκ ναβ. (1 Κορινθίους 15:​41) Ο Ντεβέλ σο τζανέλα κατέ ισί η κάθε τσεργάν τζανέλα τουμέν-ντα. Πάντα τζανέλα ακριβώς κατέ ισινέν, σαρ νιωθίνενα ντα σο χρειαζίντιβενα!

7, 8. (α) Σο μπορίνελα τι αγαβέλ ο Ιεχωβά αμένγκε; (β) Βακερέν εκ παράδειγμας σο σικαβέλα καζόμ μπουτ πφαμπόλα αμένγκε ο Ιεχωβά.

⁷ Ο Ιεχωβά αγαβέλα σο τσσίντενα ντα τθερέλα ι δύναμη τι βοηθίνελ-τουμέν τουμαρέ  προβληματέντε. (Διαβάνεν Ψαλμός 147:5) Μπορεί τι αισθάνενα ότι νακχένα αζόμ δύσκολα σο ναστί νταϊντίνενα. Ο Ντεβέλ αγαβέλα σο μπορίνασα ντα σο να μπορίνασα τι κεράς, «ντέλα-πες γκοντί ότι ισινάμ τσικ». (Ψαλμός 103:​14) Ισινάμ ατελείς, οτθάρ κεράσα συνέχεια ο ίδια λάθη ντα μπορεί τι χασαράς αμαρό κουράγιος. Καζόμ μπουτ μετανιώνασα επειδή βακερντάμ μερικά λάφια, επειδή μανγκλάμ λάθος πράγματα ή επειδή ζηλιντάμ ι γιαβερέν! Ο Ιεχωβά, παρόλο σο να τθερέλα καέκ ελάττωμας, αγαβέλα ακριβώς σαρ νιωθίνασα.​—Ησαΐας 40:28.

⁸ Τουμέν νιωσάλεν ο ζουρανό βας ι Ιεχωβάσκο τι βοηθίνελ-τουμέν τι αρακχέν πάλι τουμαρό κουράγιος μετά από εκ δοκιμασία; (Ησαΐας 41:​10, 13) Ανταβά αβιλό-πες σε εκ σκαπάνισσα σο βακερένα λάκε Κιόκο. Κάνα γκιλί σε εκ νεβό διορισμός, χασαρντάς πο κουράγιος. Αλλά σαρ τζανέλας ότι ο Ιεχωβά αγαβέλας λάκε προβλήματα; Κι νεβί εκκλησία σο γκιλί, υπαρχίντιβενας μπουτ πφραλά ντα πφενιά σο μπορίνενας τι αγαβέν σαρ αισθάντιβελας. Νιωθίνελας ότι ο Ιεχωβά βακερέλας λάκε: «Μανγκάβα-τουτ, όχι σάντε επειδή ισινάν σκαπάνισσα, αλλά επειδή ισινάν μι τσσάι ντα ισινάν αφιερωμέ μάντε. Ισινάν εκ κατά Μάρτυρες σο τθεράβα ντα μανγκάβα τι αβές χαρούμενη!» Σαρ σικαντάς τουμένγκε ο Ιεχωβά ότι «ο πράγματα σο αγαβέλα ναστί γκιντιόνα»;

9, 10. Καβά ισί ο πιο σημαντικός τρόπος σο βοηθίνελα-αμέν ο Ιεχωβά; Βακερέν εκ παράδειγμας.

⁹ Σαρέ χρειαζίντιβασα πράγματα σαρ ισί ο χαμπέ, ο σέα ντα κάπου τι μπεσάς. Μπορεί τι ανησυχίνενα ότι να κα τθερέν χαμπέ τι χαν. Αλλά ο Ιεχωβά κερντάς ι πφουβ τι ντελ μπερεκέτι χαμπέ σαριλέντε, ατζέ-ντα «κο χουρντέ κοράκια σο ντένα βίκος για τι χαν». (Διαβάνεν Ψαλμός 147:8, 9) Αν ο Ιεχωβά ντέλα χαμπέ κο κοράκια, μπορίνασα τι αβάς σίγουροι ότι κα ντελ αμέντε-ντα ο πράγματα σο χρειαζίντιβασα.​—Ψαλμός 37:25.

¹⁰ Ο πιο σημαντικός ισί ότι ο Ιεχωβά ντέλα-αμέν σο-ντα χρειαζίντιβασα για τι ατσσικιαράς αμαρί πίστη ζουρανί, ντα ντέλα-αμέν “ι ειρήνη ι Ντεβλέσκι σο ισί πιο οπρέ σαρέ οντουλένταρ σο σκεφτίνασα”. (Φιλιππησίους 4:6, 7) Εκ πφραλ, σο βακερένα λέσκε Μουτσούο, ντα λέσκι ρομνί ντικχλέ σαρ βοηθιντάς-λεν ο Ιεχωβά. Όταν εκ τσουνάμι ιτσσαρντάς κάποια τθανά κι Ιαπωνία κο 2011, σωσάλε επειδή τσσουντέ-πες κι σκεπή πουμαρέ κχερέσκι. Οντουβά ντιβές, χασαρντέ σχεδόν σαρέ πουμαρέ πράγματα. Νακχλέ ι ιράτ αντρέ κο καρανίκι σε εκ δωμάτιος σο κερέλας μπουτ σιλ, κο δεύτερος όροφος πουμαρέ κχερέσκο. Το πρωί, ροντιντέ τι αρακχέν κάτι σο κα ενθαρρύνελας-λεν. Ο μόνος πράγμας σο μπορισάλε τι αρακχέν ισινέ ο Βιβλίος Έτους των Μαρτύρων του Ιεχωβά 2006. Σαρ βουρτίνελας ο Μουτσούο ο σελίδες, ντικχλάς ο τίτλος «Τα Πιο Θανατηφόρα Τσουνάμι που Καταγράφηκαν Ποτέ». Οτθέ βακερέλας για εκ σεισμός κι Σουμάτρα κο 2004 σο αντάς ο τσουνάμια με το πιο μπαρέ καταστροφές σο αβιλέ-πες ποτές. Ο Μουτσούο ντα λέσκι ρομνί ροβένας καζόμ διαβάνενας ο εμπειρίες ι πφραλένγκε ντα ι πφενίνγκε. Νιωθίνενας ότι ο Ιεχωβά ντέλας-λεν ακριβώς ι ενθάρρυνση σο χρειαζίντιβενας. Ο Ιεχωβά φροντίνελας-λεν με γιαβερά-ντα τρόπους. Λένγκε πφραλά γιαβερέ τθανένταρ κι Ιαπωνία μπουτσσαντέ λένγκε χαμπέ ντα σέα. Αλλά πιο μπουτ δύναμη σαριλένταρ ντινέ-λεν ο επισκέψεις σο κερένας ο πφραλά σο μπουτσσαβέλας η οργάνωση ι Ντεβλέσκι λένγκε εκκλησιάτε. Ο Μουτσούο βακερέλα: «Νιωθίναβας ότι ο Ιεχωβά ισινέ πασέ κο κάθε εκ αμένταρ ντα αρακχαβέλας-αμέν. Καζόμ μπαρί παρηγοριά λιντάμ!» Ο  Ντεβέλ πρώτα ντέλα οντουλά σο χρειαζίντιβασα για τι ατσσικιαράς αμαρί πίστη ζουρανί, ντα σοράν φροντίνελα ο γιαβερά ανάγκες σο τθεράσα.

11. Σο πρέπει τι κεράς για τι λας ι βοήθεια ι Ντεβλέσκι;

¹¹ Ο Ιεχωβά «βάντελα ι τζενέν σο ισί ήρεμοι». Μανγκέλα-αμέν ντα ισί πάντα έτοιμος τι βοηθίνελ-αμέν. (Ψαλμός 147:​6α) Σαρ μπορίνασα τι λας λέσκι βοήθεια; Πρέπει τι τθεράς εκ ζουρανί σχέση λέσαρ. Για τι τθεράς εκ ασακί σχέση πρέπει τι αβάς ήρεμοι. (Σοφονίας 2:3) Ο ήρεμα τζενέ στηρίντιβενα κο Ιεχωβά για τι διορθώνελ σαρέ ο αδικίες ντα τι σταματίνελ λένγκε βάσανα. Ο Ιεχωβά ευλογίνελα-λεν.

12, 13. (α) Για τι λας ι βοήθεια ι Ντεβλέσκι, καλέ πραγματένταρ πρέπει τι νασάς ντουρ; (β) Καλέ τζενέντζαρ χαιρίνελα ο Ιεχωβά;

¹² Οκιά μπάνταρ, ο Ντεβέλ «περαβέλα ι πφιρνέν τελέ κι πφουβ». (Ψαλμός 147:​6β) Να μανγκάσα τι αβέλ-πες ανταβά αμένγκε-ντα!  Μανγκάσα τι σικαβέλ αμένγκε ο Ντεβέλ πι αφοσιωμέ αγάπη. Οτθάρ, πρέπει τι μισίνας σο-ντα μισίνελα βοβ. (Ψαλμός 97:​10) Για παράδειγμας, πρέπει τι μισίνας ι σεξουαλική ανηθικότητα. Ανταβά μανγκέλα τι βακερέλ ότι πρέπει τι νασάς ντουρ σαρέ κατά πράγματα, σαρ ισί η πορνογραφία, σο κα μπορίνενας τι οδηγίνεν-αμέν κι σεξουαλική ανηθικότητα. (Ψαλμός 119:​37· Ματθαίος 5:​28) Μπορεί τι χρειαζίντιβελ τι κεράς μπαρό αγώνας, αλλά αξίνελα τι προσπαθίνας επειδή κα λας ι ευλογία ι Ιεχωβάσκι.

¹³ Να μπορίνασα τι κερδίνας ανταβά αγώνας κορκορέ. Πρέπει τι στηρίντιβας κο Ιεχωβά. Μήπως κα αβέλ χαρούμενος αμέντζαρ άμα στηρίντιβασα κο πράγματα σο στηρίντιβενα ο τζενέ; Όχι, ο Ιεχωβά «να χαιρίνελα κατά γκραστέσκι ζορ». Πρέπει άραγε τι στηρίντιβας κο δυνάμεις σο τθεράσα ή κο γιαβερά τζενέ; Ο Ιεχωβά να «σαστίνελα κατά ζουρανέ τσανγκά ι μουρσέσκε». (Ψαλμός 147:​10) Αντίθετα, πρέπει τι συνεχίνας τι προσευχίντιβας κο Ιεχωβά για βοήθεια ντα τι μολίνας-λες τι ελευθερώνελ-αμέν κατά αδυναμίες σο τθεράσα. Ο Ιεχωβά ποτές να κα τσαλιόλ τι ασουνέλ ανταλά προσευχές. «Ο Ιεχωβά χαιρίνελα οντουλέντζαρ σο νταρένα λέσταρ, οντουλέντζαρ σο μπεκλεντίνενα λέσκι αφοσιωμέ αγάπη». (Ψαλμός 147:​11) Επειδή ισί αφοσιωμέ ντα μανγκέλα-αμέν, τζανάσα ότι κα συνεχίνελ τι βοηθίνελ-αμέν τι τζας κόντρα κο μπέτι πράγματα σο μανγκάσα.

14. Καλέ πραγμάσκε ισινέ σίγουρος ο ψαλμωδός;

¹⁴ Ο Ιεχωβά ντέλα πο λάφι ότι κα βοηθίνελ-αμέν όταν τθεράσα προβλήματα. Όταν ο Ισραηλίτες βουρτισάλε κι Ιερουσαλήμ, ο ψαλμωδός σκεφτιντάς σαρ βοηθίνελας-λεν ο Ιεχωβά. Ο ψαλμωδός γκιλιαντάς: «Βοβ κερέλα ζουρανέ ο μπαρέ πόρτες σο τθερέλα τι πόλη· ευλογίνελα τι τσσαβέν. Ανέλα ειρήνη οτθέ σο μπεσέσα». (Ψαλμός 147:​13, 14) Επειδή ο ψαλμωδός τζανέλας ότι ο Ιεχωβά κα κερέλας ζουρανέ ο μπαρέ πόρτες σο τθερέλας η πόλη, νιωθίνελας ασφάλεια. Ανταβά ντέλας-λες ι σιγουριά ότι ο Ιεχωβά κα αρακχαβέλας πι λαός.

15-17. (α) Σαρ μπορεί τι νιωθίνας μερικές φορές για το δοκιμασίες σο νακχάσα, αλλά σαρ χρησιμοποιήνελα ο Ιεχωβά πο Λάφι για τι βοηθίνελ-αμέν; (β) Σικαβέν με παράδειγμας σαρ “ο λάφι ι Ντεβλέσκο τζάλα μπουτ σουγκό” για τι βοηθίνελ-αμέν.

¹⁵ Τουμαρέ προβλήματα μπορεί τι κερέν-τουμέν τι ανησυχίνεν, αλλά ο Ιεχωβά μπορίνελα τι ντελ-τουμέν σοφία για τι ντεν-λεν  πέρα. Ο ψαλμωδός βακερντάς ότι ο Ντεβέλ «μπουτσσαβέλα πι εντολή κι πφουβ· λέσκο λάφι τζάλα μπουτ σουγκό». Σοράν, ο ψαλμωδός κερντάς λάφι ι βιβέσκε, για την πάχνη ντα για το πάγος, ντα πουτσλάς: “Κον μπορίνελα τι αντιχίνελ ο σιλ σο ανένα;” Ντα σοράν βακερντάς ότι ο Ιεχωβά «μπουτσσαβέλα πο λάφι ντα λιώνελα-λεν». (Ψαλμός 147:​15-18) Αμαρό Ντεβέλ, σο τζανέλα σαρέ ο πράγματα ντα μπορίνελα τι κερέλ τα πάντα, σο κερέλα κουμάντος ο πάγος ντα ο βιβ, μπορίνελα σίγουρα τι βοηθίνελ-τουμέν τι τζαν κόντρα σαρέ κο προβλήματα σο τθερένα.

¹⁶ Αντιβές, ο Ιεχωβά οδηγίνελα-αμέν πι Λαφίσαρ, σο ισί η Αγία Γραφή. Ο ψαλμωδός βακερντάς ότι ο λάφι ι Ιεχωβάσκο «τζάλα μπουτ σουγκό» για τι βοηθίνελ-αμέν. Ο Ντεβέλ οδηγίνελα-αμέν με το σωστός τρόπος ντα κι σωστή στιγμή. Σκεφτίνεν σαρ βοηθίνελα-τουμέν η Γραφή, ο έντυπα σο ντέλα «ο πιστός ντα φρόνιμος δούλος», ο JW Broadcasting, ο ιστότοπος jw.org, ο πρεσβύτεροι ντα τουμαρέ πφραλά ντα πφενιά. (Ματθαίος 24:​45) Ντικχλέν τουμαρέ ζωγιάτε ότι ο Ιεχωβά αβέλα σουγκό για τι οδηγίνελ-τουμέν;

¹⁷ Εκ πφεν σο βακερένα λάκε Σιμόν ντικχλάς πι ζωγιάτε σαρ βοηθιντάς-λα ο Λάφι ι Ντεβλέσκο. Νιωθίνελας άχρηστη ντα αμντίνελας ότι ο Ιεχωβά να ισινέ χαρούμενος λάσαρ. Όμως, όταν χασαρέλας πο κουράγιος, συνεχίνελας τι προσευχίντιβελ κο Ιεχωβά ντα τι μολίνελ-λες τι βοηθίνελ-λα. Επίσης, συνεχίνελας τι διαβάνελ ι Γραφή. Η Σιμόν βακερέλα: «Ποτές να νιωσάλομ ότι ο Ιεχωβά να ντινάς-μαν δύναμη ντα ότι να οδηγιντάς-μαν». Ανταβά βοηθιντάς-λα τι τθερέλ πιο λατσσί άποψη πι νεαυτόσκε.

18. Σόσκε νιωθίνενα ότι ο Ιεχωβά ισί πασέ τουμέντε, ντα καλά λόγους τθερένα για τι «Ντεν Δόξα κο Γιαχ»;

¹⁸ Ο ψαλμωδός τζανέλας ότι σαρέ κατά λαοί ι πφουβιάκε ο Ιεχωβά τραμπιντάας ο πουρανό Ισραήλ για τι αβέλ λέσκο λαός. Σάντε οντουβά λαός λιντάας ι Ντεβλέσκο «λάφι» ντα «λέσκε νόμους». (Διαβάνεν Ψαλμός 147:​19, 20) Αντιβές, αμέν τθεράσα ι μπαρί τιμή τι τθεράς οπρ’ αμέντε ο ναβ ι Ντεβλέσκο. Εκτιμίνασα σο τζανάσα-λες, σο τθεράσα λέσκο Λάφι για τι οδηγίνελ-αμέν ντα σο μπορίνασα τι τθεράς εκ λατσσί σχέση λέσαρ. Σαρ οντουβά τζενό σο γραφιντάς ο Ψαλμός 147, τθερένα τουμέν-ντα μπουτ λόγους για τι «Ντεν Δόξα κο Γιαχ» ντα τι βακερέν γιαβερένγκε-ντα τι κερέν ο ίδιος.