1. Σο πρέπει τι αποφασίνεν ο τερνέ για το μέλλον; Σο μπορίνελα τι βοηθίνελ-λεν μα τι ανησυχίνεν μπουτ; (Ντικχ ι φωτογραφία σο ισί κι αρχή.)

ΤΟΥΜΕΝ, τερνάλεν, μάλλον κα συμφωνίνεν ότι, πριν τι αρχίνεν εκ ταξίδι, ισί λατσσό τι κερέν σχέδια για τι σκεφτίνεν κατέ κα τζαν. Η ζωή ισί σαρ εκ ταξίδι, ντα ο καιρός τι σκεφτίνεν κατέ μανγκένα τι τζαν ισί ακανά σο ισινέν τερνέ. Βέβαια, μπορεί μα τι αβέλ εύκολος τι κερέν ασακέ σχέδια. Εκ τερνί πφεν, η Χέδερ, βακερντάς: «Νταρέσα όταν σκεφτίνεσα-λες. Πρέπει τι αποφασίνες σο κα κερές τι ζωγιάσαρ». Άμα νιωθίνενα αντικάς, ντεν-τουμέν γκοντί ότι ο Ιεχωβά βακερέλα: «Μα ανησύχινε, σόσκε με ισινόμ το Ντεβέλ. Κα νταβ-τουτ ζορ, βα, κα βοηθίναβ-τουτ».​—Ησαΐας 41:10.

2. Σαρ τζανένα ότι ο Ιεχωβά μανγκέλα τι κερέν σχέδια για τι τθερέν εκ ευτυχισμέ μέλλον;

² Ο Ιεχωβά βακερέλα τουμένγκε τι κερέν λατσσέ σχέδια για το μέλλον. (Εκκλησιαστής 12:1· Ματθαίος 6:​20) Μανγκέλα τι αβέν ευτυχισμέ. Ανταβά αγαβένα-λες ξεκάθαρα όταν ντικχένα, ασουνένα ντα δοκιμάνενα ο πράγματα σο κερντάς. Ο Ιεχωβά φροντίνελα-αμέν με γιαβερά-ντα τρόπους. Ντέλα-αμέν συμβουλές ντα σικλιαρέλα-αμέν σαρ τι τζουβντιάς με το πιο  λατσσό τρόπος. Άρα, όταν ο τζενέ να ασουνένα λέσκε λατσσέ συμβουλές, ο Ιεχωβά να χαιρίνελα. Βακερέλα οντουλένγκε σο να ακολουθίνενα λέσκι καθοδηγία: «Τραμπιντέν οντουβά σο να ευχαριστίνελας-μαν. . . . Ντικχέν! Μο υπηρέτες κα χαιρίνεν, αλλά τουμέν κα λατζάντιβεν. Ντικχέν! Μο υπηρέτες κα ντεν βίκος από χαρά επειδή λένγκο γκι κα αβέλ πφερντό ευτυχία». (Ησαΐας 65:​12-14) Όταν κεράσα λατσσέ επιλογές αμαρέ ζωγιάτε, ντάσα δόξα κο Ιεχωβά.​—Παροιμίες 27:11.

3. Σο βακερέλα τουμένγκε ο Ιεχωβά τι κερέν;

³ Σο σχέδια βακερέλα τουμένγκε ο Ιεχωβά τι κερέν; Για τι αβέν ευτυχισμέ, πρέπει τι γνωρίνεν ι Ιεχωβάς ντα τι υπηρετίνεν-λες. Αντικάς ισί κερντέ ο τζενέ κατά Ιεχωβά. (Ψαλμός 128:1· Ματθαίος 5:3) Ο ζώα απλώς χάνα, πίνα ντα μπιανένα. Αλλά ο Ιεχωβά μανγκέλα τι κερέν σχέδια σο κα ανέν τουμένγκε ευτυχία ντα κα ντεν νόημας τουμαρέ ζωγιάτε. Οντουβά σο κερντάς-τουμέν ισί «ο Ντεβέλ σο σικαβέλα αγάπη», “ο ευτυχισμέ Ντεβέλ”, σο κερντάς ι τζενέν “τι μοιάζεν λέστε”. (2 Κορινθίους 13:​11· 1 Τιμόθεο 1:​11· Γένεση 1:​27) Κα αβέν ευτυχισμέ όταν προσπαθίνενα τι σικαβέν ι αγάπη σο σικαβέλα αμαρό Ντεβέλ. Η Αγία Γραφή βακερέλα: «Ισί πιο μπαρί χαρά όταν ντέσα παρά όταν λέσα». (Πράξεις 20:​35) Να νιωθιντέν-λες τουμέν-ντα ανταβά; Ισί κάτι σο αβέλα-πες πάντα κι ζωή. Οτθάρ, ο Ιεχωβά μανγκέλα τι κερέν σχέδια για το μέλλον σο βασίντιβενα κι αγάπη σο τθερένα λέσκε ντα ι γιαβερένγκε.​—Διαβάνεν Ματθαίος 22:​36-39.

4, 5. Σο κερέλας ευτυχισμέ ι Ιησούς;

⁴ Ο Ιησούς Χριστός μουκχλάς τέλειος παράδειγμας τουμένγκε, τερνάλεν. Κάνα ισινέ χουρντό σίγουρα κχελέλας πέσκε ντα νακχέλας λατσσές. Σαρ βακερέλα ο Λάφι ι Ντεβλέσκο, ισί «βακίτι τι ασάλ» εκ τζενό ντα «βακίτι τι κχελέλ». (Εκκλησιαστής 3:4) Επίσης, ο Ιησούς διαβάνελας ο Γραφές ντα αντικάς πλησιάνελας ι Ιεχωβάς. Όταν ισινέ 12 μπρεσένγκο, ο δάσκαλοι κο ναός ατσσιλέ πουταρντέ μόσαρ «οντουλένταρ σο αγαβέλας ντα κατά απαντήσεις σο ντέλας».​—Λουκάς 2:​42, 46, 47.

⁵ Όταν ο Ιησούς μπαριλό, ισινέ ευτυχισμέ επειδή κερέλας σαρέ οντουλά σο μανγκέλας λέσταρ ο Ντεβέλ. Για παράδειγμας, ο Ντεβέλ μανγκέλας λέσταρ τι “βακερέλ λατσσέ αμπέρια κο τσορορέ” ντα «ότι ο κορορέ κα ντικχέν πάλι». (Λουκάς 4:​18) Ο εδάφιος Ψαλμός 40:8 βακερέλα καλά ισινέ ο αισθήματα ι Ιησούσκε: «Χαιρίναβα μπουτ, Ντέβλα μου, τι κεράβ οντουβά σο μανγκέσα». Ο Ιησούς χαιρίνελας τι σικλιαρέλ ι τζενέν πι Νταντέσκε. (Διαβάνεν Λουκάς 10:​21) Εκ φαρ, αφού κερντάας λάφι εκχέ τζουβλιάσαρ για την αληθινή λατρεία, ο Ιησούς βακερντάς πι μαθητένγκε: «Μο χαμπέ ισί τι κεράβ ο θέλημας οντουλέσκο σο μπουτσσαντάς-μαν ντα τι τελειώναβ λέσκο έργος». (Ιωάννης 4:​31-34) Ο Ιησούς ισινέ ευτυχισμέ επειδή σικαβέλας αγάπη ι Ντεβλέσκε ντα ι γιαβερένγκε. Άμα κα κερέν-λες τουμέν-ντα ανταβά, κα αβέν ευτυχισμέ.

6. Σόσκε ισί λατσσό τι κερέν λάφι γιαβερέ τζενέντζαρ για το σχέδια σο τθερένα τουμαρέ γκοντιάτε;

⁶ Μπουτ Χριστιανοί αρχισάλε ο σκαπανικός κάνα ισινέ τερνέ, ντα ανταβά κερντάς-λεν ευτυχισμέ. Κα μπορίνενας τι κερέν λάφι ασακέ πφραλέντζαρ για το σχέδια σο τθερένα τουμαρέ γκοντιάτε; «Ο σχέδια να τθερένα  επιτυχία όταν να συζητίντιβενα, αλλά τθερένα επιτυχία όταν μπουτ τζενέ σο τθερένα σοφία βακερένα πουμαρέ απόψεις ο εκ κο γιαβέρ». (Παροιμίες 15:​22) Ανταλά πφραλά ντα πφενιά μάλλον κα βακερέν τουμένγκε ότι ο σκαπανικός κα σικλιαρέλ-τουμέν πράγματα σο κα βοηθίνεν-τουμέν σαρέ τουμαρέ ζωγιάτε. Ο Ιησούς σικλιλό μπουτ πράγματα πι Νταντέσταρ κάνα ισινέ κο ουρανός. Σοράν, κάνα κερέλας ο έργος ι Ντεβλέσκο κι πφουβ, συνεχίνελας τι σικλιόλ. Χαιρίνελας μπουτ επειδή βακερέλας κο γιαβερά ο λατσσέ αμπέρια ντα επειδή ατσσόλας πιστός κάνα νακχέλας δυσκολίες. (Διαβάνεν Ησαΐας 50:4· Εβραίους 5:8· 12:2) Για τι ντικχάς σόσκε η ολοχρόνια υπηρεσία μπορίνελα τι κερέλ-τουμέν ευτυχισμέ.

7. Σόσκε μπουτ τερνέ χαιρίνενα τι κερέν μαθητέν;

⁷ Ο Ιησούς βακερντάς αμένγκε τι “κεράς μαθητέν” ντα τι σικλιαράς ι τζενέν. (Ματθαίος 28:​19, 20) Άμα σχεδιάνενα τι κερέν ανταβά έργος τουμαρέ ζωγιάτε, κα τθερέν εκ ευτυχισμέ ζωή σο ντέλα δόξα ι Ντεβλές. Σαρ αβέλα-πες γιαβερέ πραγματέντζαρ-ντα, κα χρειαζίντιβεν χρόνος για τι σικλιόν τι κερέν λατσσές ανταβά έργος. Εκ πφραλ, ο Τίμοθι, σο αρχισάλο ο σκαπανικός όταν ισινέ 19 μπρεσένγκο, βακερντάς: «Μπεϊντίναβα τι υπηρετίναβ ι Ιεχωβάς κι ολοχρόνια υπηρεσία επειδή αντικάς μπορίναβα τι σικαβάβ μι αγάπη λέσκε. Κι αρχή, να μπορίναβας τι αρχίναβ καέκ μελέτη, αλλά σοράν γκιλόμ εκχέ γιαβερέ εκκλησιάτε, ντα αντρέ εκχέ μασικέστε αρχισάλομ μπουτ μελέτες. Εκ τζενό σο κεράβας-λες μελέτη αρχισάλο τι αβέλ κι Αίθουσα Βασιλείας. Όταν παρακολουθιντόμ ι Βιβλική Σχολή ι Πφραλένγκε σο Ισί Εργένια, σο ατσσικιαρντάς ντούι μάσεκ, λιντόμ εκ νεβό διορισμός, ντα αρχισάλομ σταρ μελέτες. Μπεϊντίναβα μπουτ τι σικλιαράβ ι τζενέν, καζόμ ντικχάβα ότι ο άγιος πνεύμας αλλάνελα λένγκι ζωή». * (Ντικχ ι υποσημείωση.)​—1 Θεσσαλονικείς 2:19.

8. Σο κερντέ μερικά τερνέ πφραλά για τι βακερέν ο λατσσέ αμπέρια πιο μπουτ τζενένγκε;

⁸ Μερικά τερνέ πφραλά σικλιλέ εκ γιαβέρ τσσιπ. Για παράδειγμας, ο Τζέικομπ, σο ισί κατά Βόρεια Αμερική, γραφιντάς: «Κάνα ισινόμας εφτά μπρεσένγκο, τθεράβας μπουτέ συμμαθητέν σο ισινέ κατά Βιετνάμ. Μανγκάβας τι κεράβ λέντζαρ λάφι ι Ιεχωβάσκε. Οτθάρ, μετά από χάνικ καιρός, κερντόμ σχέδια για τι σικλιάβ λένγκι τσσιπ. Οντουβά σο βοηθιντάς-μαν πιο μπουτ τι σικλιάβ ι τσσιπ ισινέ ότι διαβάναβας ι Σκοπιά κο αγγλικά ντα συγκρίναβας-λα με τη Σκοπιά κο βιετναμικά. Επίσης, κερντόμ αμαλέν από εκ βιετναμική εκκλησία σο ισινέ οτθέ πασέ. Όταν ισινόμας 18 μπρεσένγκο, αρχισάλομ ο σκαπανικός. Σοράν, παρακολουθιντόμ ι Βιβλική Σχολή ι Πφραλένγκε σο Ισί Εργένια. Ανταβά βοηθιντάς-μαν κο διορισμός σο τθεράβα ακανά σαρ σκαπανέας, αφού ισινόμ ο μοναδικός πρεσβύτερος σε εκ βιετναμικός όμιλος. Μπουτέ τζενένγκε σο ισί κατά Βιετνάμ κερέλα λένγκε εντύπωση σο σικλιλόμ λένγκι τσσιπ. Δεχτίνενα-μαν πουμαρέ κχερέντε, ντα μπουτ φαρ μπορίναβα τι κεράβ-λεν μελέτη κατά Γραφή. Μερικοί τθερένα κερντό πρόοδος ντα μπολντιλέ».​—Ντικχ Πράξεις 2:7, 8.

9. Σο σικλιαρέλα-αμέν ο έργος για τι κεράς μαθητέν;

⁹ Ο έργος για τι κερέν μαθητέν σικλιαρέλα-τουμέν σαρ τι κερέν σωστά τουμαρί μπουτί, σαρ τι κερέν λάφι ι γιαβερέ τζενέντζαρ, σαρ τι τθερέν σιγουριά ντα σαρ τι συμπεριφερίντιβεν με τρόπος σο να προσβαλίνελα ι γιαβερέν. (Παροιμίες 21:5· 2 Τιμόθεο 2:​24) Αλλά ο πιο σημαντικός λόγος σο ανέλα χαρά ανταβά έργος ισί επειδή  σικλιαρέλα-τουμέν σαρ τι σικαβέν ότι οντουλά σο πακιάνα κατά Γραφή ισί μπαγιά. Επίσης σικλιόνα σαρ τι συνεργαζίντιβεν λατσσές ι Ιεχωβάσαρ.​—1 Κορινθίους 3:9.

10. Σαρ μπορίνενα τι αρακχέν χαρά κο έργος για τι κερέν μαθητέν ατζέ-ντα άμα χάνικ τζενέ τουμαρέ τθανέστε μανγκένα τι κερέν μελέτη;

¹⁰ Μπορίνενα τι αρακχέν χαρά κο έργος για τι κερέν μαθητέν ατζέ-ντα άμα χάνικ τζενέ τουμαρέ τθανέστε μανγκένα τι κερέν μελέτη κατά Γραφή. Σαρέ ο πφραλά αντρέ κι εκκλησία συνεργαζίντιβενα γιεκ κο έργος για τι κερέν μαθητέν. Παρόλο σο σάντε εκ πφραλ ή εκ πφεν μπορεί τι αρακχέλ εκχέ τζενές σο τελικά κα αβέλ μαθητής, σαρέ χαιρίνασα επειδή σαρέ ροντιντάμ για τι αρακχάς οντουλέ τζενές. Για παράδειγμας, ο Μπράντον, σο κερέλας σκαπανικός εννιά μπρες εκχέ τθανέστε σο χάνικ τζενέ κερένας μελέτη, βακερέλα: «Μπεϊντίναβα τι βακεράβ ο λατσσέ αμπέρια επειδή ανταβά μανγκέλα αμένταρ ο Ιεχωβά. Αρχισάλομ ο σκαπανικός χάνικ καιρός αφού τελειωσάλομ ο σχολείος. Χαιρίναβα μπουτ τι ενθαρρύναβ ι τερνέ πφραλέν αμαρέ εκκλησιάτε ντα τι ντικχάβ-λεν τι κερέν πνευματική πρόοδος. Όταν παρακολουθιντόμ ι Βιβλική Σχολή ι Πφραλένγκε σο Ισί Εργένια, σαρ σκαπανέας λιντόμ εκ νεβό διορισμός. Ισί μπαγιά ότι με ποτές να αρακχλόμ κο έργος εκχέ τζενές σο κερντάς πρόοδος ντα μπολντιλό, αλλά γιαβερά πφραλά αρακχλέ. Χαιρίναβα σο κερντόμ σχέδια για τι συμμετεχίναβ αζόμ πιο λατσσές αβέλα-πες κο έργος για τι κεράς μαθητέν».​—Εκκλησιαστής 11:6.

11. Καβά πράγμας κι υπηρεσία κι Ιεχωβάσκι χαιρίνενα τι κερέν μπουτ τερνέ;

¹¹ Υπαρχίντιβενα μπουτ ευκαιρίες για τι υπηρετίνας ι Ιεχωβάς. Για παράδειγμας, μπουτ τερνέ βοηθίνενα κι οικοδόμηση. Χρειαζίντιβασα εκατοντάδες νεβέ Αίθουσες Βασιλείας. Οντουλέ τθανέντε ντιντιόλα δόξα κο Ιεχωβά, οτθάρ κάνα βοηθίνενα τι χτίντιβεν τθερένα χαρά. Μπορίνενα επίσης τι τθερέν ι χαρά τι κερέν μπουτί γιεκ τουμαρέ πφραλέντζαρ ντα πφενίντζαρ. Ντα μπορίνενα τι σικλιόν μπουτ πράγματα, σαρ για παράδειγμας τι κερέν λατσσί μπουτί με ασφάλεια ντα τι συνεργαζίντιβεν οντουλέντζαρ σο ισί υπεύθυνοι.

12. Σαρ μπορίνελα ο σκαπανικός τι οδηγίνελ-τουμέν τι κερέν νεβέ πράγματα κι Ιεχωβάσκι υπηρεσία;

¹² Εκ πφραλ, ο Κέβιν, βακερέλα: «Χουρντιαρέλα μπερί, μανγκάβας τι υπηρετίναβ ι Ιεχωβάς κι ολοχρόνια υπηρεσία. Τελικά, αρχισάλομ ο σκαπανικός όταν ισινόμας 19 μπρεσένγκο. Για τι νικαβάβ ο απαραίτητα, κεράβας μπουτί χάνικ σαάτια εκχέ πφραλέστε σο ισινέ οικοδόμος. Σικλιλόμ τι τσσουβάβ σκεπές, παράθυρα ντα πόρτες. Σοράν, νακχλόμ ντούι μπρες με εκ ομάδα σο ξαναχτίνελας Αίθουσες Βασιλείας ντα κχερά ι πφραλένγκε όταν αβένας τυφώνες. Όταν ασουντόμ ότι υπαρχίντιβελας ανάγκη κι οικοδόμηση κι Νότια Αφρική, κερντόμ αίτηση ντα καλιντέ-μαν τι τζαβ. Ατθέ κι Αφρική, τζάβα μπουτέ τθανέντε για τι βοηθίναβ τι κερντιόν νεβέ Αίθουσες Βασιλείας. Μι ομαδάσαρ κι οικοδόμηση ισινάμ σαρ εκ φαμιλί. Μπεσάσα γιεκ, διαβάνασα ι Γραφή γιεκ ντα κεράσα μπουτί γιεκ. Ντα χαιρίναβα μπουτ τι τζαβ κο έργος κάθε εβδομάδα ι πφραλέντζαρ  σο μπεσένα κο τθαν σο κεράσα μπουτί. Ο σχέδια σο κερντόμ κάνα ισινόμας χουρντό κερντέ-μαν ευτυχισμέ με τρόπους σο ανγκλέ να νακχένας μι γκοντιάταρ».

13. Σόσκε μπουτ τερνέ ισί ευτυχισμέ σο υπηρετίνενα ι Ιεχωβάς κο Μπέθελ;

¹³ Μερικοί σο ισινέ σκαπανείς υπηρετίνενα ακανά κο Μπέθελ. Οντουλά σο υπηρετίνενα κο Μπέθελ τζουβντιόνα με τρόπος σο ντέλα-λεν χαρά επειδή σο-ντα κερένα οτθέ κερένα-λες ι Ιεχωβάσκε. Η φαμιλί Μπέθελ βοηθίνελα τι κερντιόν Γραφές ντα γιαβερά εκδόσεις για τι μπορίνεν ο τζενέ τι σικλιόν ι αλήθεια. Εκ Μπεθελίτης, ο Ντάστιν, βακερέλα: «Τσσουντόμ στόχος τι κεράβ ι ολοχρόνια υπηρεσία κάνα ισινόμας εννιά μπρεσένγκο, ντα αρχισάλομ ο σκαπανικός κάνα τελειωντόμ ο σχολείος. Μετά από ενάμιση μπρες, καλιντέ-μαν τι υπηρετίναβ κο Μπέθελ. Οτθέ σικλιλόμ τι κεράβ μπουτί κο πιεστήρια ντα πιο σοράν ασχολισάλομ με προγράμματα κο υπολογιστές. Κο Μπέθελ, χαιρίναβα τι σικλιάβ με λεπτομέρειες σο αβέλα-πες κο έργος κι Ντεβλέσκο σαρό κο ντουνιάς. Χαιρίναβα μπουτ σο υπηρετίναβα ατθέ επειδή σο-ντα κεράσα βοηθίνελα ι τζενέν τι πλησιάνεν ι Ιεχωβάς».

14. Σαρ μπορίνενα τι προετοιμάντιβεν ακανά για τι αρχίνεν ο τακτικός σκαπανικός;

¹⁴ Σαρ μπορίνενα τι προετοιμάντιβεν για τι αρχίνεν ο τακτικός σκαπανικός; Για τι  υπηρετίνεν ι Ιεχωβάς καζόμ πιο λατσσές μπορίνενα, χρειαζίντιβελα τι τθερέν πνευματικές ιδιότητες. Τι διαβάνεν ι Ντεβλέσκο Λάφι κάθε ντιβές, τι σκεφτίνεν προσεκτικά οντουλά σο διαβάνενα ντα τι προσπαθίνεν τι σικαβέν τουμαρί πίστη με το απαντήσεις σο ντένα κο συναθροίσεις. Κο μπρεσά σο τζάνα σχολείος, μπορίνενα τι σικλιόν τι βακερέν ο λατσσέ αμπέρια με πιο σουκάρ τρόπος. Για τι σικλιόν σαρ τι σικαβέν ενδιαφέρον ι τζενένγκε, κερέν λένγκε ερωτήσεις οντουλένγκε σο πακιάνα χωρίς τι προσβαλίνεν-λεν, ντα ασουνέν λένγκε απαντήσεις. Επίσης, μπορίνενα τι αβέν έτοιμοι τι κερέν διάφορα πράγματα κι εκκλησία, σαρ για παράδειγμας τι βοηθίνεν τι ατσσόλ πάκι ντα περιποιημέ η Αίθουσα Βασιλείας. Ο Ιεχωβά χαιρίνελα τι χρησιμοποιήνελ οντουλέν σο ισί ταπεινοί ντα κερένα μπουτί αντράλ πουμαρέ γκίσταρ. (Διαβάνεν Ψαλμός 110:3· Πράξεις 6:​1-3) Ο απόστολος Παύλος λιντάς ι Τιμοθεός κο ιεραποστολικός έργος επειδή «τθερέλας λατσσό ναβ κο πφραλά».​—Πράξεις 16:​1-5.

15. Σο μπορίνενα τι κερέν για τι αρακχέν εκ μπουτί σο κα βοηθίνελ-τουμέν τι κερέν σκαπανικός;

¹⁵ Ο πιο μπουτ οντουλένταρ σο ισί κι ολοχρόνια υπηρεσία χρειαζίντιβελα τι κερέν εκ μπουτί. (Πράξεις 18:2, 3) Ίσως κα μπορίνενας τι κερέν χάνικ μαθήματα σε εκ σχολή σο κα βοηθίνεν-τουμέν τι αρακχέν εκ μπουτί με χάνικ σαάτια οτθέ σο μπεσένα. Βακερέν κο επίσκοπος περιοχής ντα γιαβερέ σκαπανίνγκε οντουλά σο σχεδιάνενα τι κερέν ντα μανγκέν λένταρ τι ντεν-τουμέν συμβουλές. Σοράν, σαρ βακερέλα η Γραφή, “μουκχέν κο Ιεχωβά σο-ντα κερένα ντα τουμαρέ σχέδια κα τθερέν επιτυχία”.​—Παροιμίες 16:3· 20:18.

16. Σαρ μπορίνελα η ολοχρόνια υπηρεσία τι προετοιμάνελ-τουμέν για τι λεν γιαβερά ευθύνες κο μέλλον;

¹⁶ Μπορίνενα τι αβέν σίγουροι ότι ο Ιεχωβά μανγκέλα τι «ασταρέν σικίς» εκ ευτυχισμέ μέλλον. (Διαβάνεν 1 Τιμόθεο 6:​18, 19) Η ολοχρόνια υπηρεσία βοηθίνελα-τουμέν τι αβέν γκοντιαβέρ Χριστιανοί ενώ συνεργαζίντιβενα γιαβερέντζαρ σο ισί κι ολοχρόνια υπηρεσία. Επίσης, μπουτ πφραλά ντα πφενιά αγαντέ ότι η ολοχρόνια υπηρεσία σο κερντέ κάνα ισινέ τερνέ βοηθιντάς-λεν πιο σοράν λένγκε παντριάτε. Μπουτ φαρ, οντουλά σο κερένας σκαπανικός πριν τι παντρίνεν συνεχίνενα ο σκαπανικός σαρ αντρόγυνος.​—Ρωμαίους 16:3, 4.

17, 18. Σο σχέση τθερέλα τουμαρό γκι ντα ο σχέδια σο κερένα;

¹⁷ Ο εδάφιος Ψαλμός 20:4 βακερέλα: «Μακάρι [ο Ιεχωβά] τι ντελ-τουτ οντουλά σο μανγκέλα το γκι, ντα τι ανέλ επιτυχία σαρέ κο σχέδια σο κερέσα». Καζόμ κερένα σχέδια για το μέλλον, σκεφτίνεν σο μανγκένα μπαγιά τι κερέν τουμαρέ ζωγιάτε. Σκεφτίνεν σο κερέλα ο Ιεχωβά αμαρέ ντιβεσέντε ντα σο κα μπορίνενας τι κερέν τουμέν κο έργος λέσκο. Σοράν, κερέν σχέδια σο κα ντεν-λες χαρά.

¹⁸ Όταν χρησιμοποιήνενα τουμαρί ζωή για τι ντεν δόξα ι Ιεχωβάς ντα για τι υπηρετίνεν-λες σαρέ τουμαρέ γκίσαρ, κα αβέν μπουτ ευτυχισμέ. Κα “αρακχέν μπαρί χαρά οντουλέ πραγματέντε σο τθερένα τι κερέν ι Ιεχωβάσαρ, ντα βοβ κα ντελ-τουμέν οντουλά σο μανγκέλα τουμαρό γκι”.​—Ψαλμός 37:4.