Ο Τζενέ σο Διαβάνενα Πουτσένα
Πρέπει εκ Χριστιανός τι τθερέλ καραμπίνα ή ταπατζαλία, δηλαδή πιστόλι, για τι αρακχαβέλ-πες γιαβερέ τζενένταρ;
Ο Χριστιανοί ακολουθίνενα πάντα οντουλά σο βακερέλα η Αγία Γραφή για τι τραμπίνεν σαρ κα αρακχαβέν ή σαρ κα υπερασπίνεν πουμαρό νεαυτός. Ο λάφια ι Γραφιάκε σικαβένα ότι κα αβέλας λάθος τι χρησιμοποιήνεν ο Χριστιανοί ταπατζαλίες, καραμπίνες ή γιαβερά όπλα για τι αρακχαβέν-πες γιαβερέ τζενένταρ. Σκεφτίνεν:
Η ζωή ι τζενένγκι ισί ιερή κι Ιεχωβάσκε γιακχά. Ο ψαλμωδός Δαβίδ γραφιντάς: «Τούι [Ιεχωβά] ισινάν σο ντέσα ι ζωή». (Ψαλμός 36:9) Άρα, άμα εκ Χριστιανός κα τραμπίνελ τι αρακχαβέλ πες ή ο πράγματα σο τθερέλα, κα κερέλ σο-ντα νακχέλα λέσκε βαστέσταρ για μα τι τθερέλ ο ρατ ι γιαβερέσκο οπρά-πέστε, δηλαδή μα τι αβέλ υπεύθυνος σο εκ γιαβέρ τζενό χασαρντάς πι ζωή.—Δευτερονόμιο 22:8· Ψαλμός 51:14.
Ισί μπαγιά ότι, σο-ντα πράγμας τι λελ εκ τζενό πι βαστέντε για τι υπερασπίνελ πο νεαυτός, κα μπορίνελας τι κερέλ-λες τι τθερέλ ο ρατ εκχέ γιαβερέ τζενέσκο οπρά-πέστε. Όμως, με το όπλα ισί πιο εύκολος κάποιος τι μουνταρέλ εκχέ τζενές, είτε κατά λάθος είτε επίτηδες. * (Ντικχ ι υποσημείωση.) Επίσης, οντουβά τζενό σο τζάλα τι χαλ-πες μπορεί τι ισί μπουτ χολιαμέ, οτθάρ άμα κα ντικχέλ καέκ ταπατζαλία ή καραμπίνα, μπορεί τι αβέν ατζέκ πιο δύσκολα ο πράγματα ντα τελικά κάποιος τι χασαρέλ πι ζωή.
Όταν ο Ιησούς, ι ιράτ πριν τι μερέλ, βακερντάς πι μαθητένγκε τι λεν παλά-πουμέντε τσσουριά, να βακερντάς-λες ανταβά για τι αρακχαβέν-πες. (Λουκάς 22:36, 38) Οκιά μπάνταρ όμως, ο Ιησούς μανγκέλας τι σικλιαρέλ-λεν κάτι σημαντικός: Λέσκε μαθητές δεν έπρεπε τι αβέν βίαιοι, ατζέ-ντα άμα κα τζάνας τι χαν-πες λέντζαρ μπουτ τζενέ σο τθερένα τσσουριά ή γιαβερά όπλα. (Λουκάς 22:52) Όταν ο Πέτρος ντινάς πι τσσουριάσαρ ι υπηρετής σο τθερέλας ο αρχιερέας, ο Ιησούς βακερντάς κο Πέτρος: «Τσσουβ τι τσσουρί πι θεσιάτε». Σοράν ο Ιησούς βακερντάς κάτι σο ο Χριστιανοί τθερένα-λες πουμαρέ γκοντιάτε μέχρι αντιβές: «Σαρέ οντουλά σο χρησιμοποιήνενα τσσουρί κα μερέν τσσουριάταρ».—Ματθαίος 26:51, 52.
Σαρ βακερέλα ο εδάφιος Μιχαίας 4:3, ο υπηρέτες ι Ντεβλέσκε “λένα πουμαρέ σπαθιά ντα πουμαρέ δόρατα ντα κερένα-λεν εργαλεία ι χωραφίσκε”. Ο τζενέ τζανένα ότι ο αληθινοί Χριστιανοί ισί ειρηνικοί. Ακολουθίνενα ο εντολές ι Ντεβλέσκε, σο γραφιντάς-λεν ο απόστολος Παύλος, “μα τι κερέν κακός οντουλένγκε σο κερένα λένγκε κακός” ντα «τι τθερέν ειρήνη σαρέ ι τζενέντζαρ». (Ρωμαίους 12:17, 18) Παρόλο σο ο Παύλος νακχλάς μπουτ δυσκολίες, σαρ για παράδειγμας «κινδύνους τσορένταρ», ποτές να γκιλό κόντρα κο λάφια κι Γραφιάκε για τι αρακχαβέλ πο νεαυτός. (2 Κορινθίους 11:26) Αντίς τι κερέλ κάτι ασακό, τθερέλας εμπιστοσύνη κο Ντεβέλ ντα τζανέλας ότι ο λάφια ι Γραφιάκε “ισί πιο λατσσέ κατά τζενγκίσκε όπλα”.—Εκκλησιαστής 9:18.
Ι Χριστιανόνγκε, η ζωή ισί μπουτ πιο σημαντική κατά πράγματα σο τθερένα. Τζανάσα ότι, «καζόμ-ντα πράγματα τι τθερέλ εκ τζενό, να κα αρακχαβέν λέσκι ζωή». (Λουκάς 12:15) Οτθάρ, άμα να κα μπορίνας τι σταματίνας με ήρεμος τρόπος εκχέ τσορές σο τθερέλα όπλος, ισί λατσσό τι κεράς οντουβά σο βακερντάς ο Ιησούς: «Μα τζαν κόντρα οντουλέσαρ σο ισί πφιρνό». Ανταβά μπορεί τι μανγκέλα τι βακερέλ ότι κα μουκχάς-λες τι λελ σο μανγκέλα. (Ματθαίος 5:39, 40· Λουκάς 6:29) * (Ντικχ ι υποσημείωση.) Βέβαια, ο πιο λατσσό ισί μα τι ταρτίνας ι προσοχή ι γκεραλέ τζενένγκι. Μπορεί μα τι κερέν αμένγκε κακός άμα ακολουθίνασα οντουβά σο βακερέλα η Γραφή μα τι “σικαβάς μπαρικανές σαρ τζουβντιάσα”. (1 Ιωάννη 2:16) Επίσης, κάτι σο μπορεί τι αρακχαβέλ-αμέν ισί τι τζανέν αμαρέ γείτονες ότι ισινάμ Μάρτυρες του Ιεχωβά ντα ειρηνικά τζενέ.—Παροιμίες 18:10.
Ο Χριστιανοί σεβάνενα ι γιαβερένγκε συνειδήσεις. (Ρωμαίους 14:21) Μερικά πφραλά μπορεί τι σαστίνενας ή ατζέ-ντα τι χασαρένας πουμαρί πίστη, άμα κα λένας αμπέρι ότι εκ πφραλ τθερέλα εκ όπλος για τι αρακχαβέλ-πες γιαβερέ τζενένταρ. Μπορεί τι ισί νόμιμος τι τθεράς όπλος, αλλά επειδή μανγκάσα αμαρέ πφραλέν, ποτές να κα κεράας κάτι σο τζανάσα ότι κα μπορίνελας τι κερέλ-λεν τι χασαρέν πουμαρί πίστη.—1 Κορινθίους 10:32, 33· 13:4, 5.
Ο Χριστιανοί μανγκένα τι ντεν λατσσό παράδειγμας κο γιαβερά. (2 Κορινθίους 4:2· 1 Πέτρου 5:2, 3) Άμα εκ Χριστιανός τθερέλα ταπατζαλία ή καραμπίνα για τι αρακχαβέλ-πες κατά γιαβερά τζενέ, ο πρεσβύτεροι κα ντεν-λες συμβουλή αντράλ κατά Γραφή. Άμα κα αποφασίνελας τι ατσσικιαρέλ ο όπλος, να κα ντέλας λατσσό παράδειγμας. Οτθάρ, να κα μπορίνελας τι τθερέλ ευθύνες ή ειδικά προνόμια αντρέ κι εκκλησία. Ο ίδιος κα αβέλας-πες εκχέ Χριστιανόσαρ σο συνεχίνελα τι τθερέλ οπρά-πέστε εκ όπλος πι μπουτιάτε. Κα αβέλας μπουτ πιο λατσσό τι προσπαθίνελ τι αρακχέλ γιαβέρ μπουτί. *—Ντικχ ι υποσημείωση.
Ο Χριστιανός πρέπει τι αποφασίνελ κορκορό σαρ κα αρακχαβέλ πο νεαυτός, πι φαμιλί ντα πο πράγματα, ντα επίσης σο μπουτί κα κερέλ. Αλλά όταν λέλα ασακέ αποφάσεις, πρέπει τι βασίνελ-λεν κο λάφια κι Γραφιάκε. Αμαρό Ντεβέλ, σο τθερέλα μπουτ σοφία βακερέλα-λεν αμένγκε επειδή μανγκέλα-αμέν. Άκ’ σόσκε ο Χριστιανοί σο τθερένα ζουρανί φιλία ι Ιεχωβάσαρ τραμπίνενα μα τι τθερέν όπλος για τι αρακχαβέν-πες γιαβερέ τζενένταρ. Τζανένα ότι, άμα τθερένα εμπιστοσύνη κο Ντεβέλ ντα κερένα πουμαρέ ζωγιάτε οντουλά σο βακερέλα η Γραφή, κα τθερέν αληθινή ασφάλεια για πάντα.—Ψαλμός 97:10· Παροιμίες 1:33· 2:6, 7.
Κάνα κα αβέλ η μπαρί στεναχώρια, ο Χριστιανοί κα στηρίντιβεν κο Ιεχωβά ντα να κα προσπαθίνεν τι υπερασπίνεν κορκορέ πουμαρό νεαυτός
^ παρ. 3 Εκ Χριστιανός μπορεί τι αποφασίνελ τι τθερέλ καραμπίνα ή ταπατζαλία για τι τζαλ για κυνήγι ντα τι ασταρέλ ζώα χαμάσκε ή για τι αρακχαβέλ-πες κατά άγρια ζώα. Όταν όμως να χρησιμοποιήνελα οντουβά όπλος, πρέπει τι νικαβέλ ο σφαίρες, ή ατζέ-ντα τι πουτρέλ-λες, ντα τι τσσουβέλ-λες εκχέ τθανέστε σο κα αβέλ λατσσές γκεραντό. Τθεμέντε σο ισί παράνομος τι τθερέλ κάποιος ταπατζαλία ή καραμπίνα, ή γιαβερέ τθεμέντε σο ισί νόμιμος αλλά σε συγκεκριμέ περιπτώσεις, ο Χριστιανοί πρέπει τι ασουνέν ανταλά νόμοι.—Ρωμαίους 13:1.
^ παρ. 6 Για τι σικλιόν σαρ τι αρακχαβέν-τουμέν κατά βιασμός, ντικχέν ο θέμας «Πώς να Αποτρέψετε το Βιασμό» κο Ξύπνα! 8 Μαρτίου 1993.
^ παρ. 2 Για τι σικλιόν πιο μπουτ ι μπουτιένγκε σο χρειαζίντιβελα εκ τζενό τι τθερέλ όπλος οπρά-πέστε, ντικχέν ι Σκοπιά 1 Νοεμβρίου 2005, σελίδα 31, ντα 15 Νοεμβρίου 1983, σελίδες 25, 26.
