1. Σο μανγκάσα σαρέ;

ΣΑΡ νιωθίνενα κάνα εκ τζενό σο τζανένα ντα σεβάνενα-λες μπιστρέλα τουμαρό ναβ ή ατζέ χειρότερα, να ντέλα-πες γκοντί κον ισινέν; Μπορεί τι στεναχωρίντιβεν. Σόσκε; Επειδή σαρέ μανγκάσα τι δεχτίνεν-αμέν ο γιαβερά. Αλλά να ερεσέλα-αμέν σάντε τι τζανέν ο γιαβερά κον ισινάμ. Μανγκάσα τι τζανέν επίσης σο τζενέ ισινάμ ντα σο καταφεριντάμ αμαρέ ζωγιάτε.​—Αριθμοί 11:​16, υποσημείωση· Ιώβ 31:6.

2, 3. Σο μπορεί τι αβέλ-πες άμα να κα προσοχίνας; (Ντικχ ι φωτογραφία σο ισί κι αρχή)

² Αλλά άμα να κα προσοχίνας, μπορεί τι μανγκάς τι εκτιμίνεν-αμέν με λάθος τρόπος. Ο ντουνιάς ι Μπενγκέσκο μπορίνελα τι κερέλ-αμέν τι μανγκάς μπαρό ναβ ντα τι αβάς σημαντικοί. Κάνα αβέλα-πες ανταβά, να ντάσα αμαρέ Νταντές, ι Ιεχωβά Ντεβλές, ι εκτίμηση ντα ι λατρεία σο αξίνελα.​—Αποκάλυψη 4:11.

³ Κο μπρεσά κι Ιησούσκε, μερικοί αρχηγοί ι θρησκειάκε μανγκένας τι εκτιμίνεν-λεν ο τζενέ με λάθος τρόπος.  Ο Ιησούς βακερντάς πι μαθητένγκε: «Τι αρακχαβέν-τουμέν κατά γραμματείς σο μανγκένα τι ιρίν στολές κάνα πφιρένα ντα μπεϊντίνενα τι χαιρετίνεν-λεν με σεβασμός ο τζενέ κο αγορές ντα τι μπεσέν ανγκλάλ [«κο πιο λατσσέ θέσεις», υποσημείωση] κο συναγωγές ντα κο πιο σημαντικές θέσεις κο τραπέζια». Σοράν βακερντάς: «Λένγκι τιμωρία κα αβέλ πιο μπαρί». (Λουκάς 20:​46, 47) Οκιά μπάνταρ όμως, ο Ιησούς ισαρντάς εκχέ τσορορέ χηρά σο ντινάς ντούι λεπτά ι ναόσκε, ενώ μάλλον καέκ γιαβέρ να εκτιμιντάς οντουβά σο κερντάς. (Λουκάς 21:​1-4) Ισί ξεκάθαρος ότι η άποψη σο τθερέλας ο Ιησούς ισινέ μπουτ διαφορετική κατά άποψη σο τθερένας ο γιαβερά. Ανταβά μάθημας κα βοηθίνελ-αμέν τι συνεχίνας τι τθεράς ι σωστή άποψη ανταλέ θεμάσκε, ι άποψη σο μανγκέλα ο Ιεχωβά Ντεβέλ τι τθεράς.

4. Κον μανγκένα τι τζανέλ-τουμέν ντα τι εκτιμίνελ-τουμέν, ντα σόσκε;

⁴ Κον μανγκένα τι τζανέλ-τουμέν ντα τι εκτιμίνελ-τουμέν; Μπουτ τζενέ μανγκένα τι ντεν-λεν σημασία ο γιαβερά, οτθάρ κερένα προσπάθειες για τι σπουδάνεν, για τι τζαν λατσσές λένγκε μπουτιά ή για τι αβέν καλλιτέχνες ντα αθλητές. Αλλά ο Παύλος εξηγιντάς ότι υπαρχίντιβελα κάτι μπουτ πιο σημαντικός ανταλέσταρ, κάνα γραφιντάς: «Ακανά σο γνωριντέν ι Ντεβλές, ή μάλλον ακανά σο γνωριντάς-τουμέν ο Ντεβέλ, σαρ αβέλα-πες τι βουρτίνεν πάλι κο βασικά πράγματα κι ντουνιάσκε σο ισί μπίζουρανε ντα άχρηστα ντα τι μανγκέν τι υπηρετίνεν-λεν πάλι σαρ δούλοι;» (Γαλάτες 4:9) Σο μπαρό προνόμιος ισί “τι γνωρίνελ-αμέν ο Ντεβέλ”, ο πιο Μπαρό Άρχοντας σαρό κο σύμπαν! Ο Ιεχωβά τζανέλα κον ισινάμ, μανγκέλα-αμέν ντα μανγκέλα τι αβάς πασέ λέστε. Κερντάς-αμέν για τι μπορίνας τι αβάς λέσκε αμαλά.​—Εκκλησιαστής 12:​13, 14.

5. Σο πρέπει τι κεράς για τι τζανέλ-αμέν ο Ντεβέλ;

⁵ Τζανάσα ότι ο Μωυσής ισινέ αμάλ ι Ιεχωβάσκο. Κάνα μολιντάς ι Ιεχωβάς ντα βακερντάς λέσκε: «Κερ-μαν τι σικλιάβ το ντρομ», ο Ιεχωβά απαντιντάς: «Ανταβά-ντα σο μανγκέσα μάνταρ κα κεράβ-λες, σόσκε κερδιντάν μι ευλογία ντα τζανάβα-τουτ τι ναβέσαρ». (Έξοδος 33:​12-17) Ο Ιεχωβά μπορίνελα τι τζανέλ αμέν-ντα προσωπικά. Αλλά σο πρέπει τι κεράς για τι αβάς ι Ιεχωβάσκε αμαλά; Πρέπει τι μανγκάς-λες ντα τι αφιερώνας αμαρί ζωή λέστε.​—Διαβάνεν 1 Κορινθίους 8:3.

6, 7. Σο κα μπορίνελας τι κερέλ-αμέν τι χασαράς αμαρί φιλία ι Ιεχωβάσαρ;

⁶ Όμως, πρέπει τι ατσσικιαράς ι πολύτιμη φιλία σο τθεράσα αμαρέ Νταντέσαρ σο ισί κο ουρανός. Σαρ ο πρώτοι Χριστιανοί κι Γαλατία, πρέπει τι τσσιναβάς τι υπηρετίνας σαρ δούλοι “ο βασικά πράγματα ι ντουνιάσκε σο ισί μπίζουρανε ντα άχρηστα”, σαρ για παράδειγμας ι επιτυχία ντα ο μπαρό ναβ σο ντέλα ανταβά ντουνιάς. (Γαλάτες 4:9) Οντουλά Χριστιανοί κι Γαλατία γνωριντέας ι Ντεβλές, ντα ο Ντεβέλ γνωριντάας-λεν. Αλλά ο Παύλος βακερντάς ότι οντουλά πφραλά “βουρτίνενας πάλι” κο τσουτσέ πράγματα. Γιαβερέ λαφίντζαρ, βακερέλας λένγκε: “Σόσκε βουρτισάλεν ντα αρχισάλεν τι υπηρετίνεν πάλι ο άχρηστα πράγματα σο μουκχλένας παλάλ;”

⁷ Κα μπορίνελας ανταβά τι αβέλ-πες αμένγκε-ντα; Βα. Σαρ ο Παύλος, κάνα  σικλιλάμ ι αλήθεια, μπορεί τι κερντάμ πέρα ο μπαρό ναβ ντα ι επιτυχία σο ντέλα ι Μπενγκέσκο ντουνιάς. (Διαβάνεν Φιλιππησίους 3:7, 8) Μπορεί τι κερντάμ πέρα ο ευκαιρίες σο ντιντιόνας-αμέν τι σπουδάνας, τι αρακχάς εκ λατσσί μπουτί ή τι νικαβάς μπουτ λοβέ. Ή κα μπορίναας τι τθεράας μπαρό ναβ ντα τι αβάας χουλανέ επειδή τζάας-λεν λατσσές κι μουσική ή κο αθλήματα. Αλλά κερντάμ πέρα σαρέ ανταλά ευκαιρίες. (Εβραίους 11:​24-27) Κα αβέλας μπαρό λάθος τι μετανιώνας σο λιντάμ ανταλά λατσσέ αποφάσεις ντα τι νιωθίνας ότι αμαρί ζωή κα αβέλας πιο λατσσί άμα κα κουλαντίναας ανταλά πράγματα! Άμα κα σκεφτίναας αντικάς, μπορεί τι βουρτίναας κο πράγματα ανταλέ ντουνιάσκε, κο πράγματα σο αποφασιντάμας ότι ισινέ «μπίζουρανε ντα άχρηστα».

8. Σο κα βοηθίνελ-αμέν τι αβάς πιο αποφασισμέ τι μανγκάς τι τζανέλ-αμέν ντα τι εκτιμίνελ-αμέν ο Ιεχωβά;

⁸ Σο κα βοηθίνελ-αμέν τι αβάς πιο αποφασισμέ τι τζανέλ-αμέν ντα τι εκτιμίνελ-αμέν ο Ιεχωβά ντα όχι ο ντουνιάς; Πρέπει τι τθεράς αμαρέ γκοντιάτε ντούι σημαντικά πράγματα. Πρώτον, ο Ιεχωβά πάντα εκτιμίνελα οντουλέν σο υπηρετίνενα-λες πιστά. (Διαβάνεν Εβραίους 6:​10· 11:6) Ι Ιεχωβάσκε, σαρέ οντουλά σο υπηρετίνενα-λες πιστά τθερένα αξία, οτθάρ νιωθίνελα ότι κα αβέλας «άδικος» μα τι ντελ-λεν σημασία. Ο Ιεχωβά πάντα τζανέλα «οντουλέν σο ισί λέσκε». (2 Τιμόθεο 2:​19) «Τζανέλα ο ντρομ ι δίκαιε τζενένγκο» ντα τζανέλα σαρ τι σώνελ-λεν.​—Ψαλμός 1:6· 2 Πέτρου 2:9.

9. Βακερέν παραδείγματα σο σικαβένα σαρ ο Ιεχωβά ευλογιντάς πι λαός.

⁹ Μερικέ περιπτωσιέντε, ο Ιεχωβά ευλογιντάς πι λαός με μπουτ ξεχωριστούς τρόπους. (2 Χρονικών 20:​20, 29) Για παράδειγμας, σκεφτίνεν σαρ ο Ιεχωβά σωντάς πι λαός κι Ερυθρά Θάλασσα κάνα κουλαντίνελας-λεν ο ζουρανό στρατός ι Φαραώσκο. (Έξοδος 14:​21-30· Ψαλμός 106:​9-11) Ανταβά πράγμας ισινέ αζόμ εντυπωσιακός σο ο τζενέ σο μπεσένας πασέ οντουλέ τθανέστε κερένας λάφι λέσκε ατζέ-ντα 40 μπρεσά πιο σοράν. (Ιησούς του Ναυή 2:​9-11) Λάσα μπαρί ζορ κάνα ντάσα-αμέν γκοντί ότι ο Ιεχωβά μανγκέλας πι λαός ντα χρησιμοποιηντάς πι ζορ για τι σώνελ-λες κο πουρανέ μπρεσά, επειδή ατζεχάνικ ο Γωγ του Μαγώγ κα κερέλ αμένγκε επίθεση. (Ιεζεκιήλ 38:​8-12) Αζομάν, κα χαιρίνας μπουτ σόσκε κερντάμ ο πιο λατσσό σο μπορίναας για τι τζανέλ-αμέν ντα τι εκτιμίνελ-αμέν ο Ιεχωβά ντα όχι ο ντουνιάς.

10. Σο γιαβέρ πρέπει τι τθεράς αμαρέ γκοντιάτε;

¹⁰ Ο δεύτερος πράγμας σο πρέπει τι τθεράς αμαρέ γκοντιάτε ισί ότι ο Ιεχωβά μπορεί τι σικαβέλ αμένγκε καζόμ μπουτ εκτιμίνελα-αμέν με τρόπους σο ποτές να κα μπεκλεντίναας. Αν ο τζενέ κερένα λατσσέ πράγματα σάντε για  τι ισαρέν-λεν ο γιαβερά, ο Ιεχωβά να κα ευλογίνελ-λεν. Σόσκε; Σαρ βακερντάς ο Ιησούς, οντουλά τζενέ λένα οντουβά σο αξίνενα κάνα ο γιαβερά ισαρένα-λεν. (Διαβάνεν Ματθαίος 6:​1-5) Αλλά σο κα αβέλ-πες οντουλέ τζενέντζαρ σο κερένα λατσσέ πράγματα αλλά ο γιαβερά να σικαβένα λένγκε εκτίμηση; Ο Ιεχωβά, «σο ντικχέλα σαρέ ο πράγματα», ντικχέλα σο κερένα ντα ευλογίνελα-λεν. Ντα ισί φαρ σο ο Ιεχωβά ευλογίνελα πι υπηρετόν με τρόπους σο να μπεκλεντίνενα. Για τι ντικχάς μερικά παραδείγματα.

11. Σαρ ντινάς ο Ιεχωβά σημασία κι Μαρία;

¹¹ Ο Ιεχωβά τραμπιντάς εκχέ ταπεινέ τζουβλιά, σο βακερένας λάκε Μαρία, για τι αβέλ η ντάι λέσκε Τσσαβέσκι, ι Ιησούσκι. Η Μαρία τζουβντιόλας σε εκ χουρντί πόλη σο βακέρντιβελας Ναζαρέτ, ντουρ κατά Ιερουσαλήμ ντα κατά σουκάρ ναός. (Διαβάνεν Λουκάς 1:​26-33) Σόσκε ο Ιεχωβά τραμπιντάς ι Μαριά; Ο άγγελος Γαβριήλ βακερντάς λάκε ότι “κερδιντάς ι ευλογία ι Ντεβλέσκι”. Μπορίνασα τι αγαβάς ότι ισινέ εκ μπουτ λατσσί αμαλίν ι Ιεχωβάσκι οντουλένταρ σο βακερντάς πιο σοράν κι Ελισάβετ σο ισινέ τζενέ λάσαρ. (Λουκάς 1:​46-55) Ο Ιεχωβά ντικχέλας ι Μαριά, ντα ευλογιντάς-λα με τρόπος σο ποτές να μπεκλεντίνελας σόσκε ισινέ πιστή λέστε.

12, 13. Σαρ ντιντιλί τιμή κο Ιησούς κάνα μπιάντιλο ντα κάνα η Μαρία γκερντάς-λες κο ναός 40 ντιβεσά πιο σοράν;

¹² Κάνα μπιάντιλο ο Ιησούς, κάσκε βακερντάς-λες ανταβά ο Ιεχωβά; Να βακερντάς-λες κο τζενέ σο τθερένας εξουσία ή κο άρχοντες σο ισινέ κι Ιερουσαλήμ ντα κι Βηθλεέμ. Αλλά μπουτσσαντάς αγγελόν μερικέ ταπεινέ τσομπανίντε σο αρακχαβένας ι μπρακέν κο χωράφια αβριάλ κατά Βηθλεέμ. (Λουκάς 2:​8-14) Σοράν, οντουλά τσομπάνια γκιλέ τι ντικχέν ι χουρντές. (Λουκάς 2:​15-17) Η Μαρία ντα ο Ιωσήφ πρέπει τι εντυπωσιασάλε μπουτ κάνα ντικχλέ ότι ντιντιόλας κο Ιησούς τιμή ασακέ τροπόσαρ. Ο τρόπος σο ο Ιεχωβά κερέλα ο πράγματα ισί μπουτ διαφορετικός κατά  τρόπος σο κερέλα-λεν ο Μπενγκ. Κάνα ο Μπενγκ μπουτσσαντάς τζενέν σο μελετίνενας ο τσεργανιά οτθέ σο μπεσέλας ο Ιησούς πι νταντέσαρ ντα πι νταγιάσαρ, σαρέ κι Ιερουσαλήμ λιντέ αμπέρι ότι μπιάντιλο ο Ιησούς ντα οτθάρ αβιλέ μπουτ προβλήματα. (Ματθαίος 2:3) Ο αποτέλεσμας ισινέ τι μερέν μπουτ τσσαβέ.​—Ματθαίος 2:16.

¹³ Ο Νόμος σο ντινάας ο Ιεχωβά κο Ισραηλίτες βακερέλας ότι αφού κα νακχένας σαράντα ντιβεσά οτθάρ μπερί σο κα μπιάντιβελας εκ τσσαβό, η ντάι έπρεπε τι κερέλ εκ θυσία κο Ιεχωβά. Οτθάρ, η Μαρία κερντάς ταξίδι περίπου 9 χιλιόμετρα κατά Βηθλεέμ μέχρι κο ναός κι Ιερουσαλήμ με τον Ιωσήφ ντα ι Ιησούσαρ. (Λουκάς 2:​22-24) Καζόμ ισινέ κο ντρομ, η Μαρία μπορεί τι σκεφτίνελας αν ο ιερέας κα κερέλας κάτι ξεχωριστός για τι ντελ τιμή κο Ιησούς. Τελικά ντιντιλί τιμή κο Ιησούς, αλλά όχι με το τρόπος σο μπορεί τι μπεκλεντίνελας η Μαρία. Ο Ιεχωβά τραμπιντάς τον Συμεών, σο ισινέ «δίκαιος ντα σεβάνελας ι Ντεβλές», ντα ι Αννά, σο ισινέ εκ χήρα προφήτισσα 84 μπρεσένγκι, για τι βακερέν ότι ο Ιησούς κα αβέλας ο Μεσσίας, δηλαδή ο Χριστός.​—Λουκάς 2:​25-38.

14. Σαρ ευλογιντάς ο Ιεχωβά ι Μαριά;

¹⁴ Συνεχιντάς ο Ιεχωβά τι εκτιμίνελ ι Μαριά οντουλένγκε σο κερντάς για τι μπαριαρέλ ντα τι φροντίνελ πιστά ι Ιησούς; Βα. Ο Ντεβέλ κανονιντάς τι γραφίντιβεν κι Γραφή μερικά πράγματα σο βακερντάς ντα κερντάς η Μαρία. Κο τριν επκάς μπρεσά σο κερέλας ο Ιησούς πο έργος, μάλλον η Μαρία ναστί τζάλας παλά-λέστε κο ταξίδια σο κερέλας. Ίσως έπρεπε τι μπεσέλ κι Ναζαρέτ σόσκε ισινέ χήρα. Οτθάρ, χασαρντάς μπουτ σουκάρ εμπειρίες. Αλλά κάνα μουνταρντέ ι Ιησούς, ισινέ πασέ λέστε. (Ιωάννης 19:​26) Πιο σοράν, η Μαρία ισινέ κι Ιερουσαλήμ ι Ιησούσκε μαθητέντζαρ πριν τι λεν ο άγιος πνεύμας κι Πεντηκοστή. (Πράξεις 1:​13, 14) Μάλλον αβιλί βόι-ντα χρισμέ γιεκ ι γιαβερέ μαθητέντζαρ. Άμα αβιλό-πες ανταβά, ντιντιλί-λα η ευκαιρία τι αβέλ ι Ιησούσαρ κο ουρανός για πάντα. Καζόμ μπουτ ευλογισάλι σαρέ οντουλένγκε σο κερντάς με πίστη!

15. Σαρ σικαντάς ο Ιεχωβά ότι ισινέ ευχαριστιμέ ι Ιησούσαρ κάνα ισινέ κι πφουβ;

¹⁵ Ο Ιησούς να μανγκέλας τιμή κατά θρησκειάκε αρχηγοί ντα κατά πολιτικοί. Αλλά τριν φαρ, ο Ιεχωβά κερντάς λάφι κατευθείαν κατά ουρανός για τι τζανέλ λέσκο Τσσαβό ότι μανγκέλα-λες. Ανταβά πρέπει τι ντινάς μπουτ ζορ ι Ιησούς! Αμέσως μετά κατά μπολιπέ ι Ιησούσκο κι Λεν Ιορδάνης, ο Ιεχωβά βακερντάς: «Ακαβά ισί μο Τσσαβό σο μανγκάβα-λες μπουτ, ισινόμ ευχαριστιμέ λέσαρ». (Ματθαίος 3:​17) Ο Ιωάννης ο Βαφτιστής μάλλον ισινέ ο μόνος τζενό, εκτός κατά Ιησούς, σο ασουντάς ανταλά λάφια. Σοράν, περίπου εκ μπρες πριν τι μερέλ ο Ιησούς, τριν λέσκε αποστολόνταρ ασουντέ ι Ιεχωβάς τι βακερέλ: «Ακαβά [ο Ιησούς] ισί μο Τσσαβό σο μανγκάβα-λες μπουτ, ισινόμ ευχαριστιμέ λέσαρ. Τι ασουνέν-λες». (Ματθαίος 17:5) Ντα σάντε χάνικ ντιβεσά πριν τι μερέλ ο Ιησούς, ο Ιεχωβά πάλι κερντάς λάφι πι Τσσαβέστε κατά ουρανός.​—Ιωάννης 12:28.

16, 17. Σαρ ντινάς ο Ιεχωβά τιμή ι Ιησούς με τρόπος σο να μπεκλεντίνελας;

¹⁶ Ο Ιησούς τζανέλας ότι ο τζενέ κα κατηγορίνενας-λες ότι προσβαλιντάας ι Ντεβλές πι λαφίντζαρ ντα ότι κα μερέλας με τρόπος σο κα ανέλας λέσκε μπαρί λατζ. Αλλά προσευχισάλο τι αβέλ-πες ι Ντεβλέσκο θέλημας ντα όχι λέσκο. (Ματθαίος 26:​39, 42) «Νταϊντιντάς ο κας σο βασανιντέ-λες, ντα να χάλας-λες ανάγκη η λατζ» σόσκε μανγκέλας τι τζανέλ-λες ντα τι εκτιμίνελ-λες λέσκο Ντατ ντα όχι ο ντουνιάς. (Εβραίους 12:2) Σαρ σικαντάς λέσκε ο Ιεχωβά πι εκτίμηση;

¹⁷ Κάνα ο Ιησούς ισινέ κι πφουβ, προσευχισάλο τι τθερέλ ι δόξα σο τθερέλας ανγκλέ, κάνα ισινέ κο ουρανός πι Νταντέσαρ. (Ιωάννης 17:5) Η Γραφή να βακερέλα πουθενά ότι ο Ιησούς μανγκέλας τι τθερέλ πιο μπουτ πράγματα. Να μπεκλεντίνελας τι ευλογίντιβελ με εκ ξεχωριστός τρόπος επειδή κερντάς ι Ιεχωβάσκο θέλημας κι πφουβ. Αλλά σο κερντάς ο Ιεχωβά; Ντινάς τιμή ι Ιησούς με τρόπος σο να μπεκλεντίνελας. Κάνα αναστιντάς ι Ιησούς, ντινάς-λες εκ «πιο μπαρί θέση» κο ουρανός. Ντινάς επίσης κο Ιησούς αθάνατη ζωή σαρ πνευματικός πλάσμας, κάτι σο να λιντάας καέκ γιαβέρ μέχρι αζομάν! * (Ντικχ ι υποσημείωση) (Φιλιππησίους 2:9· 1 Τιμόθεο 6:​16) Καζόμ σουκάρ τροπόσαρ ευλογιντάς ο Ιεχωβά ι Ιησούς επειδή υπηρετιντάς-λες πιστά!

18. Σο κα βοηθίνελ-αμέν τι μανγκάς τι τζανέλ-αμέν ντα τι εκτιμίνελ-αμέν ο Ιεχωβά ντα όχι ο ντουνιάς;

¹⁸ Σο κα βοηθίνελ-αμέν τι μανγκάς τι τζανέλ-αμέν ντα τι εκτιμίνελ-αμέν ο Ιεχωβά ντα όχι ο ντουνιάς; Πρέπει τι τθεράς αμαρέ γκοντιάτε ότι ο Ιεχωβά πάντα εκτιμίνελα πι πιστέ υπηρετόν ντα ότι μπουτ φαρ ευλογίνελα-λεν με τρόπους σο να μπεκλεντίνενα. Καέκ να μπορίνελα τι σκεφτίνελ σαρ κα ευλογίνελ-αμέν ο Ιεχωβά κο μέλλον! Αλλά ακανά, καζόμ νταϊντίνασα προβλήματα ντα δυσκολίες ανταλέ πφιρνέ ντουνιάστε, πρέπει τι ντας-αμέν γκοντί ότι ανταβά ντουνιάς ντα η δόξα σο ντέλα χασάρντιβενα. (1 Ιωάννη 2:​17) Οκιά μπάνταρ όμως, αμαρό λατσσό Ντατ, ο Ιεχωβά, να κα μπιστρέλ ποτές αμαρό έργος ντα ι αγάπη σο σικαβάσα λέσκε ναβέσκε σόσκε «νανέ άδικος». (Εβραίους 6:​10) Σίγουρα κα ευλογίνελ-αμέν, ντα μπορεί τι κερέλ-λες ανταβά με τρόπους σο να νακχένα ιτς αμαρέ γκοντιάταρ!