ΟΤΑΝ ο Ιησούς σικλιαρντάς πι μαθητέν σαρ τι βακερέν ο λατσσέ αμπέρια, προειδοποιηντάς-λεν ότι ο τζενέ να κα μανγκένας πάντα τι ασουνέν. (Λουκάς 10:3, 5, 6) Ο ίδιος αβέλα-πες με το έργος αμαρό-ντα. Μερικά τζενέ σο αρακχάσα τθερένα μπέτι συμπεριφορά ή ατζέ-ντα μανγκένα τι χαν-πες αμέντζαρ. Ντα όταν κερένα-λες ανταβά, μπορεί τι αβέλ αμένγκε δύσκολος τι σικαβάς συμπόνια ντα τι μανγκάς τι κεράς λένγκε λάφι ι Ντεβλέσκε.

Ο τζενό σο σικαβέλα συμπόνια ντικχέλα ο ανάγκες ντα ο προβλήματα ι γιαβερένγκε, αγαβέλα λένγκι ντουκχ ντα μανγκέλα τι βοηθίνελ-λεν. Όμως, σο κα αβέλ-πες άμα αρχισάλαμ τι χασαράς αμαρί συμπόνια ι τζενένγκε σο αρακχάσα κο έργος; Κα χασαράς αμαρό ζήλος, δηλαδή να κα μανγκάς μπουτ τι βακεράς λένγκε ι Ντεβλέσκε ντα να κα μπορίνας τι βοηθίνας-λεν. Μπορίνασα τι βακεράς ότι αμαρό ζήλος μοιάζελα σαρ η γιακ. Για τι πφαμπόλ εκ γιακ χρειαζίντιβελα μπουτ οξυγόνος. Αντικάς, για τι αβέλ αμαρό ζήλος ζουρανό, πρέπει τι τθεράς συμπόνια!​—1 Θεσσαλονικείς 5:19.

Σαρ μπορίνασα τι προσπαθίνας τι τθεράς πιο μπουτ συμπόνια ατζέ-ντα όταν ανταβά ισί δύσκολος; Για τι ντικχάς τριν παραδείγματα σο μπορίνασα τι μοιάζας λέντε: ι Ιεχωβάσκο, ι Ιησούσκο ντα ι Παυλόσκο.

Για μπουτ μπρεσά, ο τζενέ βακερένα μπαρέ ψέματα ι Ιεχωβάσκε. Αλλά βοβ συνεχίνελα τι “σικαβέλ λατσσιπέ κο αχάριστοι ντα κο πφιρνέ”. (Λουκάς 6:​35) Σαρ σικαβέλα πο λατσσιπέ; Κερέλα υπομονή σαριλέντζαρ. Ο Ιεχωβά μανγκέλα τι σώντιβεν «σαρέ ο τζενέ». (1 Τιμόθεο 2:3, 4) Παρόλο σο ο Ντεβέλ μισίνελα ο πφιρνιπέ, ο τζενέ τθερένα μπαρί αξία λέσκε ντα να μανγκέλα καέκ λένταρ τι χασαρέλ πι ζωή.​—2 Πέτρου 3:9.

Ο Ιεχωβά τζανέλα ότι ο Σατανάς μπορίνελα τι κερέλ ι τζενέν τι πακιάν σε εκ ψέμας. (2 Κορινθίους 4:3, 4) Μπουτέ τζενέν σικλιαρντέ-λεν χουρντιαρέλα ψέματα ι Ντεβλέσκε. Οτθάρ ο τρόπος σο σκεφτίνενα ντα οντουλά σο αισθάντιβενα μπορεί τι δυσκολίνενα-λεν τι δεχτίνεν ι αλήθεια. Όμως, ο Ιεχωβά μανγκέλα μπουτ τι βοηθίνελ ασακέ τζενέν. Σαρ τζανάσα-λες ανταβά;

Σκεφτίνεν, για παράδειγμας, σαρ νιωθίνελας ο Ιεχωβά ι τζενένγκε κι πόλη της Νινευή. Παρόλο σο ισινέ άγριοι, ο Ιεχωβά βακερντάς ι Ιωνάσκε: «Δεν έπρεπε με-ντα τι τζιτζίναβ για τη Νινευή, για τη μπαρί πόλη, σο οτθέ υπαρχίντιβενα πιο μπουτ από 120.000 τζενέ σο να τζανένα τι ξεχωρίνεν ο σωστός κατά λάθος;» (Ιωνάς 4:​11) Ο Ιεχωβά τζιτζισάλο ι τζενένγκε, σο να τζανένας ι αλήθεια λέσκε. Οντουλέσκε μπουτσσαντάς ι Ιωνάς για τι προειδοποιήνελ-λεν.

Αμαρέ αισθήματα ι τζενένγκε ισί ίδια με το αισθήματα σο τθερέλα ο Ιεχωβά. Βον τθερένα μπαρί αξία. Σαρ ο Ιεχωβά-ντα, μανγκάσα μπουτ τι βοηθίνας-λεν τι σικλιόν λέσκε, ατζέ-ντα άμα ντικχίντιβελα ότι να κα δεχτίνεν ι αλήθεια.

Όταν ο τζενέ να δεχτίνενα τι ασουνέν ι Ντεβλέσκε, χρειαζίντιβελα τι προσπαθίνας τι ντικχάς  σόσκε κερένα-λες ανταβά. Μερικά τζενέ μπορεί τι τθερένα μπέτι άποψη ι Γραφιάκε ή για τη Χριστιανοσύνη επειδή κάποιοι σο βακερένα ότι ισί Χριστιανοί κερένα μπέτι πράγματα. Γιαβερά μπορεί τι τθερένα ασουντό ψέματα οντουλένγκε σο πακιάσα. Μερικοί πάλι μπορεί τι νταρένα ότι λένγκε τζενέ ντα γιαβερά κα πρασάν-λεν άμα κα κερέν αμέντζαρ λάφι.

Μερικοί σο αρακχάσα-λεν κο έργος μπορεί τι νακχλέ αζόμ μπουτ πουμαρέ ζωγιάτε σο επηρεασάλε βαθιά. Η Κιμ, εκ ιεραπόστολος, βακερέλα ότι μπουτ τζενέ σο ισί λάκε τομεάστε τσσιντιντέ μπουτ ιτιρί εκχέ τζενγκίσταρ σο χασαρντέ τα πάντα. Να τθερένα καέκ πραγματική ελπίδα για το μέλλον. Ισί απογοητευμέ ντα να τθερένα εμπιστοσύνη καεκχέσκε. Ο τζενέ οντουλέ τομεάστε μπουτ φαρ προσπαθίνενα τι τσσιναβέν ι Μαρτυρέν τι κερέν λάφι ι Ντεβλέσκε. Εκ φαρ κερντέ επίθεση κι Κιμ ενώ κερέλας λάφι ι Ντεβλέσκε.

Σαρ μπορίνελα η Κιμ τι σικαβέλ συμπόνια ατζέ-ντα όταν ο τζενέ συμπεριφερίντιβενα λάκε μπέτι τροπόσαρ; Πάντα προσπαθίνελα τι ντελ-πες γκοντί ο εδάφιος Παροιμίες 19:​11 σο βακερέλα: «Όταν εκ τζενό αγαβέλα σαρ ισί μπαγιά ο πράγματα σίγουρα να χολιάνελα εύκολα». Σκεφτίνελα σο τσσιντιντέ ο τζενέ σο ισί λάκε τομεάστε, ντα ανταβά βοηθίνελα-λα τι προσπαθίνελ τι σικαβέλ λένγκε συμπόνια. Ντα να τζάνα λάσαρ κόντρα σαρέ ο τζενέ σο αρακχέλα. Κι ίδια περιοχή, τθερέλα μερικές λατσσέ επανεπισκέψεις.

Μπορίνασα τι πουτσάς αμαρό νεαυτός: “Άμα να τζανάβας ι αλήθεια, σαρ κα αντιδράναβας αν ο Μάρτυρες ι Ιεχωβάσκε αβένας για τι κερέν λάφι ι Ντεβλέσκε;” Για παράδειγμας, σο κα κεράας άμα ασουντάμας μπουτ ψέματα για τους Μάρτυρες; Μπορεί τι αντιδράναας αμέν-ντα με μπέτι τρόπος ντα τι χρειαζίντιβαας εκχέ τζενές τι σικαβέλ αμένγκε συμπόνια. Ο Ιησούς βακερντάς ότι πρέπει τι συμπεριφερίντιβας κο γιαβερά αντικάς σαρ μανγκάσα τι συμπεριφερίντιβεν αμένγκε. Οτθάρ πρέπει τι προσπαθίνας τι αγαβάς σαρ νιωθίνενα ο γιαβερά ντα τι σικαβάς λένγκε υπομονή, ατζέ-ντα όταν ανταβά ισί δύσκολος.​—Ματθαίος 7:12.

Ο απόστολος Παύλος σικαβέλας συμπόνια ατζέ-ντα κο τζενέ σο χολιάνενας μπουτ όταν κερέλας λένγκε λάφι ι Ντεβλέσκε. Σόσκε; Επειδή ντέλας-πες γκοντί σαρ ισινέ βοβ. Βακερντάς: «Πριν βακεράβας λάφια σο προσβαλίνενας ι Ντεβλές, τζάβας κόντρα λέσκε λαόσαρ, ντα να σικαβάβας σεβασμός. Όμως σικάντιλο μάνγκε έλεος σόσκε να τζανάβας ντα να πακιάβας». (1 Τιμόθεο 1:​13) Ο Παύλος αγαβέλας ότι ο Ιεχωβά ντα ο Ιησούς σικαντέας λέσκε μπουτ μπαρό έλεος. Μπορίνελας τι αγαβέλ ι τζενέν σο μανγκένας τι τσσιναβέν-λες τι κερέλ λάφι ι Ντεβλέσκε, επειδή κάποτε νιωθίνελας βοβ-ντα σαρ λέντε.

Μπάζιμ, ο Παύλος αρακχέλας τζενέν σο τθερένας μπαρί πίστη ψεύτικε λαφίντε. Σαρ αισθάντιβελας  ανταλέσκε; Ο εδάφιος Πράξεις 17:​16 βακερέλα ότι, ενώ ισινέ κι Αθήνα, «ναστί νταϊντίνελας τι ντικχέλ ι πόλη τι αβέλ πφερντί είδωλα». Όμως, χρησιμοποιηντάς ο πράγματα σο κερένας-λες μα τι νταϊντίνελ για τι ντελ λατσσί μαρτυρία. (Πράξεις 17:​22, 23) Ο Παύλος “για τι σώνελ με κάθε τρόπος μερικέ τζενέν” αλλάνελας ο τρόπος σο κερέλας λάφι ι Ντεβλέσκε κο τζενέ ανάλογα με το ανάγκες σο τθερένας.​—1 Κορινθίους 9:​20-23.

Κάνα κεράσα λάφι ι Ντεβλέσκε τζενέντε σο αντιδράνενα με μπέτι τρόπος ή σο πακιάνα λάθος πραγματέντε μπορίνασα τι κεράς οντουβά σο κερντάς ο Παύλος. Τι χρησιμοποιήνας σο-ντα τζανάσα λένγκε για τι βοηθίνας-λεν τι σικλιόν ο «λατσσέ αμπέρια για κάτι πιο λατσσό». (Ησαΐας 52:7) Εκ πφεν σο λάκο ναβ ισί Ντόροθι βακερέλα: «Αμαρέ τομεάστε, μπουτέ τζενέν σικλιαρντέ-λεν ότι ο Ντεβέλ ισί σκληρός ντα μπεϊντίνελα τι κρίνελ ι γιαβερέν. Ισαράβα ασακέ τζενέν για τι ζουρανί πίστη σο τθερένα κο Ντεβέλ ντα σοράν σικαβάβα λένγκε αντράλ κατά Γραφή ο λατσσό χαρακτήρας ι Ιεχωβάσκο ντα ο υποσχέσεις λέσκε για το μέλλον».

Πρέπει επίσης τι προσπαθίνας τι ντας θάρρος αμαρέ πφραλέν ντα αμαρέ πφενίν όταν νικιάσα λέντζαρ κο έργος. Η Τζέσικα βακερέλα ότι όταν νικιόλα κο έργος γιαβερέντζαρ ντα κάποιος λένταρ τθερέλα εκ μπέτι εμπειρία, προσπαθίνελα μα τι ντελ μπουτ σημασία οντουλέστε σο βακερέλα. Οκιά μπάνταρ, όμως, βακερέλα για κάτι ωραίος, σαρ για παράδειγμας ο λατσσέ αποτελέσματα σο ανέλα αμαρό έργος παρόλο σο μερικοί να μανγκένα τι ασουνέν.

Ο Ιεχωβά αγαβέλα ότι μπάζιμα ισί αμένγκε δύσκολος τι κεράς ο έργος. Αλλά ισί μπουτ χαρούμενος κάνα σικαβάσα ο έλεος σο σικαβέλα βοβ! (Λουκάς 6:​36) Βέβαια, ο Ιεχωβά να κα σικαβέλ συμπόνια ντα υπομονή ι τζενένγκε για πάντα. Μπορίνασα τι αβάς σίγουροι ότι βοβ τζανέλα κάνα ακριβώς ισί ο κατάλληλος καιρός για τι ανέλ ο τέλος. Μέχρι αζομάν, πρέπει τι κεράς λάφι ι Ντεβλέσκε χωρίς τι χασαράς χρόνος. (2 Τιμόθεο 4:2) Τι συνεχίνας λοιπόν τι κεράς ο έργος με ζήλος ντα τι τθεράς πραγματική συμπόνια “σαβέ τι μανγκές τζενένγκε”.