1, 2. (α) Καβά σημαντικός πράγμας μανγκέλας τι κερέλ η Χριστιανική κχανγκιρί σαρ βακερέλα η εντολή σο ντινάς ο Ιησούς κο εδάφια Ματθαίος 28:​18-20; (β) Σο ερωτήσεις κα ντικχάς ανταλέ μαθημάστε;

Ο ΑΠΟΣΤΟΛΟΙ γκιντισάλε εκχέ βεσέστε ντα μπεσένας σαρ σαρ τι ασουνέν ι Ιησούς. Αφού αναστισάλο, ο Ιησούς μανγκλάς λένταρ τι γκιντίντιβεν οντουλέ τθανέστε. (Ματθ. 28:​16) Μπορεί τι αβέλας αζομάν σο «σικαντάς-πες . . . σε πιο μπουτ από 500 πφραλά». (1 Κορ. 15:6) Σόσκε γκιντιντάς ο Ιησούς πι μαθητέν οτθέ; Για τι ντελ-λεν ακαγιά μπουτ σουκάρ εντολή: «Τζαν ντα κερέν μαθητέν σαρέ κατά τθεμά».​—Διαβάνεν Ματθαίος 28:​18-20.

² Ο μαθητές σο ασουντέ ο λάφια ι Ιησούσκε ισινέ κι πρώτη Χριστιανική κχανγκιρί σο κερντιλί πιο σοράν. Ο πιο σημαντικός πράγμας σο μανγκέλας τι κερέλ οντιά κχανγκιρί ισινέ τι κερέλ γιαβερέ-ντα μαθητέν ι Χριστόσκε. * Αντιβές, ο αληθινοί Χριστιανοί τθερένα μπουτ κχανγκιριά σαρί κι πφουβ, ντα ο πιο σημαντικός σο μανγκένα τι κερέν ανταλά κχανγκιριά ισί ο ίδιος. Ανταλέ μαθημάστε, κα ντικχάς σταρ ερωτήσεις: Σόσκε ισί αζόμ σημαντικός ο έργος για τι κεράς μαθητέν; Σαρ κεράσα μαθητέν; Βοηθίνενα σαρέ ο Χριστιανοί τι κερντιόν νεβέ μαθητές; Ντα σόσκε πρέπει τι τθεράς υπομονή ανταλέ εργόστε;

3. Σόσκε ισί αζόμ σημαντικός ο έργος για τι κεράς μαθητέν σαρ βακερένα ο εδάφια Ιωάννης 14:6 ντα 17:3;

³ Σόσκε ισί αζόμ σημαντικός ο έργος για τι κεράς μαθητέν; Επειδή σάντε ο μαθητές ι Χριστόσκε μπορίνενα τι αβέν αμαλά ι Ντεβλέσκε. Επίσης, οντουλά σο ακολουθίνενα ι Χριστός κερένα πιο λατσσί πουμαρί ζωή ακανά ντα μπεκλεντίνενα τι τζουβντιόν για πάντα. (Διαβάνεν Ιωάννης 14:6· 17:3) Σίγουρα, ο Ιησούς ντινάς-αμέν εκ σημαντική ευθύνη, αλλά να κεράσα ανταβά έργος κορκορέ. Ο απόστολος Παύλος γραφιντάς ότι βοβ ντα οντουλά σο κερένας έργος λέσαρ ισινέ «συνεργάτες ι Ντεβλέσκε». (1 Κορ. 3:9) Σο σουκάρ έργος ντινάς ο Ιεχωβά ντα ο Χριστός κο ατελείς τζενέ!

4. Σο σικλιάσα κατά εμπειρία σο τθερέλας ο Ιβάν ντα η Ματίλντε;

⁴ Ο έργος για τι κεράς μαθητέν ανέλα αμένγκε μπαρί χαρά. Ντικχέν σο κερντάς ο Ιβάν ντα λέσκι ρομνί η Ματίλντε, σο μπεσένα κι Κολομβία. Ντινέ μαρτυρία εκχέ τερνέστε, κο Νταβιέρ, σο βακερντάς λένγκε: «Μανγκάβα τι κεράβ αλλαγές μι ζωγιάτε, αλλά ναστί». Ο Νταβιέρ κχελέλας μποξ. Λέλας ναρκωτικά, ματιόλας ντα μπεσέλας εκχέ τζουβλιάσαρ, ι Ερικάσαρ, σο να ισινέ παντριμέ λάσαρ. Ο Ιβάν βακερέλα: «Λέλας-αμέν μπουτ σαάτια για τι τζας λέσκε γκαβέστε σο ισινέ μπουτ ντουρ, ντα νακχάας ι ποδηλατέντζαρ τσικαλέ ντρομένταρ. Κάνα η Έρικα ντικχλάς ότι αβέλας πιο λατσσό τζενό ο Νταβιέρ, συμμετεχίνελας βόι-ντα κι μελέτη». Σιγά σιγά, ο Νταβιέρ τσσιναντάς ο ναρκωτικά, ο πιπέ ντα ο μποξ. Επίσης, βοβ ντα η Έρικα παντρισάλε. Η Ματίλντε βακερέλα: «Κάνα ο ντούι-ντα μπολντιλέ κο 2016, ντινάμ-αμέν γκοντί ότι ο Νταβιέρ βακερέλας: “Μανγκάβα τι αλλάναβ, αλλά ναστί”. Οτθάρ, ναστί ατσσικιαράας αμαρέ δάκρυα». Σίγουρα, τθεράσα μπουτ μπαρί χαρά κάνα βοηθίνασα ι γιαβερέν τι αβέν μαθητές ι Χριστόσκε.

5. Σο χρειαζίντιβελα πρώτα για τι κεράς μαθητέν;

⁵ Για τι κεράς μαθητέν πρέπει πρώτα τι “ρόντας” τι αρακχάς οντουλέν σο τθερένα λατσσό γκι. (Ματθ. 10:​11) Σικαβάσα ότι ισινάμ μπαγιά Μάρτυρες ι Ιεχωβάσκε κάνα ντάσα μαρτυρία σαρέ οντουλέντε σο αρακχάσα. Σικαβάσα ότι ισινάμ αληθινοί Χριστιανοί κάνα ντάσα καν κι εντολή κι Χριστόσκι τι κεράς έργος.

6. Σο κα βοηθίνελ-αμέν τι τζας-λεν λατσσές κο έργος;

⁶ Μερικά τζενέ μανγκένα τι σικλιόν ο αλήθειες ι Γραφιάκε, αλλά μπουτ γιαβερά να ντικχίντιβενα τατέ κι αρχή. Μπορεί τι χρειαζίντιβελ τι ταρτίνας λένγκο ενδιαφέρον. Για τι τζας-λεν λατσσές κο έργος, πρέπει τι αβάς λατσσές προετοιμασμέ. Τραμπίνεν συγκεκριμέ θέματα σο ο τζενέ κα μανγκέν τι ασουνέν. Σοράν, αρακχέν σο κα βακερέν κι αρχή ι κάθε θεμάσκε.

7. Σαρ κα πουτρέν συζήτηση εκχέ τζενέσαρ, ντα σόσκε πακιάνα ότι ισί σημαντικός τι ασουνέν ντα τι σικαβέν σεβασμός;

⁷ Για παράδειγμας, βακερέν ι τζενέσκε: «Αντιβές σαρό κο ντουνιάς ο τζενέ τθερένα μπουτ προβλήματα. Κα βακερέας ότι χρειαζίντιβελα εκ κυβέρνηση σο κα κερέλ κουμάντος σαρί κι πφουβ για τι νασκιαρέλ-λεν ανταλά;» Σοράν συζητίνεν ο εδάφιος Δανιήλ 2:​44. Ή κα μπορίνενας τι βακερέν εκχέ γειτονάσκε: «Σο πακιάσα ότι κα βοηθίνελ εκχέ τζενές τι μπαριαρέλ σωστά πι τσσαβέν;» Σοράν συζητίνεν ο εδάφια Δευτερονόμιο 6:6, 7. Καβά-ντα θέμας τι τραμπίνεν, τι τθερέν τουμαρέ γκοντιάτε ι τζενέν σο κα ασουνέν-τουμέν. Σκεφτίνεν  σαρ κα βοηθίντιβεν αν κα σικλιόν σο σικλιαρέλα μπαγιά η Αγία Γραφή. Κάνα κερένα λάφι λέντζαρ, ισί σημαντικός τι ασουνέν-λεν ντα τι σεβάνεν οντουλά σο βακερένα τουμένγκε. Αντικάς, τουμέν κα αγαβέν-λεν πιο λατσσές ντα βον μάλλον κα ασουνέν-τουμέν.

8. Σόσκε δεν πρέπει τι τσσιναβάς τι κεράς επανεπισκέψεις;

⁸ Πριν τι αποφασίνελ τι κερέλ μελέτη εκ τζενό, μπορεί τι χρειαζίντιβελ τι ντεν τουμαρέ σαατίσταρ ντα τουμαρέ ζοριάταρ για τι κερέν επανεπισκέψεις. Σόσκε; Επειδή ο τζενέ μπορεί μα τι αβέν οτθέ ή μα τι μπορίνεν τι ασουνέν-αμέν κάνα τζάσα λένγκε πάλι. Επίσης, μπορεί τι χρειαζίντιβελ τι τζας λένγκε μπουτ φαρ μέχρι τι νιωθίνεν άνετα αμέντζαρ ντα τι μανγκέν τι κερέν μελέτη. Μα μπιστρέν ότι εκ φυτός μπαριόλα κάνα ποτίνασα-λες μπουτ φαρ. Αντικάς η αγάπη-ντα εκχέ τζενέσκι ι Ιεχωβάσκε ντα ι Χριστόσκε μπαριόλα κάνα κεράσα λέσαρ λάφι μπουτ φαρ κατά Ντεβλέσκο Λάφι.

9, 10. Σόσκε βακεράσα ότι σαρέ ο Χριστιανοί ρόντενα τι αρακχέν ι λατσσέ τζενέν;

⁹ Σαρέ ο πφραλά ρόντενα τι αρακχέν ι λατσσέ τζενέν. Ανταβά έργος ισί σαρ οντουβά σο κερένα ο τζενέ σο ρόντενα εκχέ χουρντέσκε σο χασάρντιλο. Σόσκε βακεράσα-λες ανταβά; Σκεφτίνεν για παράδειγμας σο αβιλό-πες κάνα εκ χουρντό τρινέ μπρεσένγκο νασλό ντουρ πι κχερέσταρ ντα χασάρντιλο. Περίπου 500 τζενέ ρόντενας λέσκε. Τελικά, περίπου 20 σαάτια πιο σοράν, εκ τζενό σο ρόντελας αρακχλάς-λες αντρέ εκχέ χωραφίστε. Οντουβά τζενό να μανγκλάς τι ισαρέν-λες σο αρακχλάς ι τσσαβές. Βακερντάς: «Αρακχλάμ-λες επειδή μπουτ τζενέ μαρντέ-πες».

 ¹⁰ Μπουτ τζενέ ισί σαρ οντουβά χουρντό τσσαβό, ισί χασαρντέ. Να μπεκλεντίνενα τι αβέλ κάτι πιο λατσσό, αλλά μανγκένα βοήθεια. (Εφεσ. 2:​12) Σαρέ αμέν, σο ισινάμ πιο μπουτ από οχτώ εκατομμύρια τζενέ, ρόντασα οντουλέ τζενένγκε σο αξίνενα. Μπορεί μα τι αρακχέν τουμέν εκχέ τζενές σο μανγκέλα τι κερέλ μελέτη κατά Γραφή. Όμως, γιαβερά πφραλά σο κερένα έργος κο ίδιος τομέας μπορεί τι αρακχέν εκχέ τζενές σο μανγκέλα τι σικλιόλ ι αλήθεια κατά Ντεβλέσκο Λάφι. Κάνα εκ πφραλ ή εκ πφεν αρακχέλα εκχέ τζενές σο αβέλα μαθητής ι Χριστόσκο, σαρέ οντουλά σο ροντιντέ τθερένα λόγους τι χαιρίνεν.

11. Ατζέ-ντα αν ακανά να τθερένα εκ μελέτη, καλέ γιαβερέ τροπόντζαρ μπορίνενα τι βοηθίνεν τι κερντιόν νεβέ μαθητές;

¹¹ Ατζέ-ντα αν ακανά να τθερένα εκ μελέτη, μπορίνενα τι βοηθίνεν τι κερντιόν νεβέ μαθητές γιαβερέ τροπόντζαρ. Για παράδειγμας, μπορίνενα τι χαιρετίνεν ι νεβέ τζενέν σο αβένα κι Αίθουσα Βασιλείας. Άμα σικαβένα ασακί αγάπη, κερένα-λεν τι αγαβέν ότι ισινάμ αληθινοί Χριστιανοί. (Ιωάν. 13:​34, 35) Ατζέ-ντα άμα ντένα χουρντέ απαντήσεις κι συνάθροιση, σικλιαρένα ι νεβέ τζενέν τι βακερέν με σεβασμός ντα αντράλ πουμαρέ γκίσταρ οντουλά σο πακιάνα. Επίσης, μπορίνενα τι τζαν εκχέ νεβέ πφραλέσαρ κο έργος ντα τι βοηθίνεν-λες τι σικλιαρέλ ι τζενέν κατά Γραφή. Αντικάς, σικλιαρένα-λες τι μοιάζελ κο Χριστός.​—Λουκ. 10:​25-28.

12. Μήπως χρειαζίντιβελα τι τζανάς μπουτ πράγματα για τι κεράς μαθητέν; Εξηγίνεν.

¹² Καέκ αμένταρ δεν πρέπει τι αμντίνελ ότι χρειαζίντιβελα τι τζανάς μπουτ πράγματα για τι σικλιαράς ι γιαβερέν τι αβέν μαθητές ι Ιησούσκε. Σόσκε βακεράσα-λες ανταβά; Για παράδειγμας η Φαουστίνα, σο τζουβντιόλα κι Βολιβία, να τζανέλας τι διαβάνελ κάνα κερντάς λάφι πρώτη φαρ ι Ιεχωβάσκε Μαρτυρέντζαρ. Σοράν, σικλιλί τι διαβάνελ χάνικ. Ακανά ισί μπολντί, ντα μπεϊντίνελα μπουτ τι σικλιαρέλ γιαβερέν. Ο πιο μπουτ φαρ, κερέλα παντς μελέτες κι εβδομάδα. Παρόλο σο να σικλιλί ατζέ τι διαβάνελ αζόμ λατσσές καζόμ διαβάνενα ο πιο μπουτ τζενέ σο κερέλα-λεν μελέτη, η Φαουστίνα βοηθιντάς σιοβέ τζενέν τι μπολντιόν.​—Λουκ. 10:21.

13. Ατζέ-ντα άμα τθεράσα μπερεκέτι πράγματα τι κεράς, καλά ευλογίες λάσα κάνα κεράσα μαθητέν;

¹³ Μπουτ Χριστιανοί τθερένα μπερεκέτι σημαντικά πράγματα τι κερέν. Όμως, αρακχένα χρόνος για τι κερέν μελέτες, ντα ανταβά ντέλα-λεν μπουτ χαρά. Η Μέλανι κατά Αλάσκα, μπαριαρέλας κορκορί πι τσσαγιά σο ισινέ οχτώ μπρεσένγκι. Επίσης, κερέλας μπουτ σαάτια μπουτί ντα αρακχαβέλας πι νταντές σο τθερέλας  καρκίνος. Σάντε βόι ισινέ Μάρτυρας οτθέ σο μπεσέλας. Επειδή μανγκέλας μπουτ τι κερέλ εκχέ τζενές μελέτη, προσευχίντιβελας τι τθερέλ ζορ για τι νικιόλ κο έργος παρόλο σο κερέλας μπουτ σιλ. Εκ ντιβές, αρακχλάς ι Σαρά, σο ατσσιλί πουταρντέ μόσαρ κάνα σικλιλί ότι ο Ντεβέλ τθερέλα ναβ. Πιο σοράν, η Σάρα μανγκλάς τι κερέλ μελέτη. Η Μέλανι ντέλα-πες γκοντί: «Κάθε Παρασκευή ιράτ, ισινόμας μπουτ κχινί, αλλά γιεκ μι τσσαγιάσαρ τζάας τι κεράς ι μελέτη ντα ανταβά κερέλας αμένγκε μπουτ λατσσιπέ. Μπεϊντίναας τι ρόντας για τι απαντίνας κο ερωτήσεις κι Σαράκε, πφερντιάας χαρά καζόμ ντικχάας-λα τι αβέλ αμαλίν ι Ιεχωβάσαρ». Η Σάρα να νταρασάλι κάνα γκιλέ λάσαρ κόντρα, τσσιναντάς τι τζαλ κι κχανγκιρί ντα μπολντιλί.

14. (α) Σόσκε ο έργος για τι κεράς μαθητέν ισί σαρ ο ψάρεμας; (β) Σαρ επηρεάνενα-τουμέν ο λάφια ι Παυλόσκε κο εδάφια 2 Τιμόθεο 4:1, 2;

¹⁴ Ατζέ-ντα άμα να αρακχλέν εκχέ τζενές σο μανγκέλα τι αβέλ μαθητής, μα τσσιναβέν τι ρόντεν. Ντεν-τουμέν γκοντί ι Ιησούσκε λάφια σο βακερντάς ότι ο έργος για τι κεράς μαθητέν ισί σαρ ο ψάρεμας. Ο ψαράδες μπορεί τι μπεκλεντίνενα μπουτ σαάτια για τι ασταρέν εκχέ ματσσές. Μπουτ φαρ κερένα μπουτί αντρέ κι ιράτ ή νωρίς το πρωί, ντα μερικές φορές χρειαζίντιβενα μπουτ σαάτια για τι ερεσέν οτθέ σο ισί ματσσέ. (Λουκ. 5:5) Αντικάς μερικά πφραλά-ντα τζάνα έργος μπουτ σαάτια ντα σαβέ τι μανγκές τθανέντε. Σόσκε; Για τι αρακχέν πιο μπουτ τζενέν.  Οντουλά σο κερένα ατζέ πιο μπουτ προσπάθεια μπουτ φαρ ευλογίντιβενα σόσκε αρακχένα τζενέν σο μανγκένα τι σικλιόν ι Ντεβλέσκε. Κα μπορίνενας τι κερέν έργος σαατίντε ντα τθανέντε σο κα αρακχέν πιο μπουτ τζενέν;​—Διαβάνεν 2 Τιμόθεο 4:1, 2.

15. Σόσκε πρέπει τι τθεράς υπομονή για τι κεράς μελέτες;

¹⁵ Σόσκε πρέπει τι τθεράς υπομονή για τι κεράς μελέτες; Εκ λόγος ισί ότι να ερεσέλα σάντε τι βοηθίνας ι τζενές σο κεράσα-λες μελέτη τι σικλιόλ ντα τι μανγκέλ οντουλά σο σικλιαρέλα η Γραφή. Χρειαζίντιβελα τι βοηθίνας-λες τι σικλιόλ ντα τι μανγκέλ Οντουλές σο κερντάς-λα τι γραφίντιβελ, ι Ιεχωβάς. Ντα να ερεσέλα σάντε τι σικλιαράς-λες σο μανγκέλα ο Ιησούς πι μαθητένταρ, αλλά χρειαζίντιβελα τι βοηθίνας-λες τι σικλιόλ σαρ τι κερέλ-λεν ανταλά πι ζωγιάτε. Πρέπει τι βοηθίνας-λες με υπομονή καζόμ μαρέλα-πες τι κερέλ πι ζωγιάτε ο αρχές ι Γραφιάκε. Μερικοί αλλάνενα πουμαρό τρόπος σκέψης ντα πουμαρέ συνήθειες αντρέ χάνικ μασικέντε. Γιαβερά χρειαζίντιβενα πιο μπουτ χρόνος.

16. Σο σικλιλέν κατά Ραούλ;

¹⁶ Εκ ιεραπόστολος κο Περού τθερέλας εκ εμπειρία σο σικαβέλα σο λατσσιπέ αβέλα κάνα κεράσα υπομονή. «Κερντόμας μελέτη ντούι βιβλία εκχέ τζενέσαρ σο βακερένα λέσκε Ραούλ», βακερέλα ο ιεραπόστολος. «Αλλά συνεχίνελας τι τθερέλ μπαρέ δυσκολίες πι ζωγιάτε. Τθερέλας μπουτ προβλήματα πι μπιαβέστε, κουσέλας ντα λέσκε τσσαβέ να σεβάνενας-λες. Όμως, να χασαρέλας ο συναθροίσεις, οτθάρ συνεχίναβας τι τζαβ για τι βοηθίναβ εμ λες εμ λέσκι φαμιλί. Νακχλέ πιο μπουτ από τριν μπρεσά οτθάρ μπερί σο γνωριντόμ-λες για τι ερεσέλ κο μπολντιπέ».

17. Σο κα ντικχάς κο γιαβέρ μάθημας;

¹⁷ Ο Ιησούς βακερντάς αμένγκε τι “τζας ντα τι κεράς μαθητέν σαρέ κατά τθεμά”. Για τι κεράς ανταγιά εντολή, μπουτ φαρ κεράσα λάφι τζενέντζαρ σο να σκεφτίνενα σαρ αμέν, σαρ ισί οντουλά-ντα σο να τθερένα θρησκεία ή να πακιάνα ότι υπαρχίντιβελα Ντεβέλ. Κο γιαβέρ μάθημας, κα ντικχάς σαρ τι βακεράς ο λατσσέ αμπέρια ασακέ τζενέντε.