Μπιάντιλομ κο 1954 κο Σεντ Πολ κι Μινεσότα, κο ΗΠΑ, εκχέ φαμιλιάτε σο ισινέ Ρωμαιοκαθολική. Να ισινάμας ούτε χουλανέ ούτε τσορορέ. Ισινόμας ο δεύτερος κατά παντς τσσαβέ. Γκιλόμ σε Καθολικός σχολείος ντα κι κχανγκιρί βοηθίναβας ι παπαζίς. Όμως, τζανάβας χάνικ πράγματα ι Άγιε Γραφιάκε. Παρόλο σο πακιάβας ότι πρέπει τι υπαρχίντιβελ εκ Ντεβέλ σο κερντάς-λεν σαρέ, χασαρντόμ ντιπ μι πίστη κι κχανγκιρί.

Κάνα ισινόμας κο πρώτος μπρες κι Νομική Σχολή Γουίλιαμ Μίτσελ, εκ αντρόγυνος σο ισινέ Μάρτυρες ι Ιεχωβάσκε αβιλέ μι κχερέστε. Αζομάν μπουγαράβας ο σέα, αλλά βον λατσσιμάσαρ βακερντέ μάνγκε τι αβέν εκ γιαβέρ φαρ. Κάνα αβιλέ, πουτσλόμ-λεν ντούι πράγματα: «Σόσκε ο λατσσέ τζενέ να ντικχένα καέκ λατσσιπέ πουμαρέ ζωγιάτε;» ντα «Σαρ μπορίνενα τι αβέν ο τζενέ μπαγιά ευτυχισμέ;» Λιντόμ ο βιβλίος Η Αλήθεια που Οδηγεί στην Αιώνιο Ζωή ντα ι Μετάφραση Νέου Κόσμου, σο τθερέλας εκ μπουτ σουκάρ πράσινος χρώμας. Επίσης, αρχισάλομ τι κεράβ μελέτη. Μο γιακχά πουτάρντιλε. Χαιρισάλομ μπουτ σο σικλιλόμ  ότι η Βασιλεία ι Ντεβλέσκι ισί η κυβέρνηση σο κα κερέλ κουμάντος κι πφουβ. Ντικχάβας ότι η κυβέρνηση ι τζενένγκι να αντάς λατσσιπέ ντα πφερντάς ι ντουνιάς ντουκχ, βάσανα ντα αδικίες.

Κερντόμ αφιέρωση κο Ιεχωβά κο 1982 ντα μπολντιλόμ πιο σοράν οντουβά μπρες κι συνέλευση «Η Αλήθεια της Βασιλείας», σο αβιλί-πες σε εκ πφαντό στάδιος κο Σεντ Πολ. Εκ εβδομάδα πιο σοράν, γκιλόμ πάλι οντουλέ τθανέστε ντα ντινόμ εξετάσεις για τι αβάβ δικηγόρος. Κο Οκτώβριος, σικλιλόμ ότι νακχλόμ κο εξετάσεις, ανταβά μανγκέλας τι βακερέλ ότι μπορίναβας τι κεράβ μπουτί σαρ δικηγόρος.

Οντουλέ συνελευσιάτε, ντικχλόμ ι πφραλές Μάικ Ρίτσαρντσον, σο ισινέ κο Μπέθελ κο Μπρούκλιν ντα βακερντάς μάνγκε ότι κο κεντρικά γραφεία κερντιλόας νομικός τμήμας. Ντινόμ-μαν γκοντί ο λάφια σο βακερντάς ο Αιθίοπας αξιωματικός κο εδάφιος Πράξεις 8:​36 ντα σκεφτιντόμ: “Σο τσσιναβέλα-μαν τι μανγκάβ τι κεράβ μπουτί κο Νομικός Τμήμας;” Οντουλέσκε, κερντόμ αίτηση για τι υπηρετίναβ κο Μπέθελ.

Μο ντατ ντα μι ντάι να χαιρισάλε ιτς σο αβιλόμ Μάρτυρας ι Ιεχωβάσκο. Μο ντατ πουτσλάς-μαν σο λατσσιπέ κα ντικχάβας σαρ δικηγόρος άμα κα τζάβας κο Μπέθελ. Βακερντόμ λέσκε ότι να κα κεράβας μπουτί λοβένγκε ντα ότι κα λάβας σάντε 75 δολάρια κο μάσεκ, καζόμ λένας αζομάν κάθε μάσεκ σαρέ ο Μπεθελίτες.

Επειδή πιο τζανγκλέ ντινόμας μο λάφι τι κεράβ μπουτί κο δικαστήριος, ναστί τζάβας αμέσως κο Μπέθελ, οτθάρ γκιλόμ κο Μπέθελ σο ισί κο Μπρούκλιν κι Νέα Υόρκη κο 1984. Τσσουντέ-μαν κο Νομικός Τμήμας. Η μπουτί σο κερντόμας κο δικαστήριος προετοιμαντάς-μαν οντουλένγκε σο κα αβένας-πες.

Κο Νοέμβριος 1983, κιντάμ ο Θέατρος Στάνλεϊ κο Τζέρσι Σίτι του Νιου Τζέρσι. Ο πφραλά μανγκλέ ο άδειες σο χρειαζίντιβενας για τι λατσσαρέν ο ηλεκτρολογικά ντα ο υδραυλικά κο κτίριος. Ο πφραλά βακερντέ κο κράτος ότι κο Θέατρος Στάνλεϊ μανγκένας τι κερέν ο συνελεύσεις ι Ιεχωβάσκε Μαρτυρένγκε. Ανταβά ισινέ πρόβλημας. Ο κανόνες κο Νιου Τζέρσι βακερένας ότι ο κτίρια σο κερντιόνα για τι ντιντιόλ λατρεία έπρεπε τι αβέν τθανέντε σο μπεσένας τζενέ. Ο Θέατρος Στάνλεϊ ισινέ εκχέ τθανέστε σο τθερέλας μαγαζιά, οντουλέσκε να ντινέ ο άδειες. Ο πφραλά κερντέ πάλι αίτηση, αλλά να δεχτιντέ-λα.

 Ι πρώτη εβδομάδα σο ισινόμας κο Μπέθελ, η οργάνωση γκερντάς ο πρόβλημας κο δικαστήριος. Επειδή ντούι μπρεσά κερντόμας μπουτί εκχέ δικαστηριόστε κο Σεντ Πολ κι Μινεσότα, ισινόμας σικλό ασακέ μπουτιέντζαρ. Εκ αμαρέ δικηγορόνταρ βακερντάς ότι κο Θέατρος Στάνλεϊ αβιλέας-πες διάφορες εκδηλώσεις, σαρ για παράδειγμας τσσουντέ ταινίες ντα αβιλέ ροκ συναυλίες. Σόσκε κα αβέλας παράνομος τι αβέλ-πες οτθέ εκ θρησκευτική εκδήλωση; Ο δικαστήριος αποφασιντάς ότι ο Τζέρσι Σίτι να σεβαντάς ι ελευθερία σο τθεράσα σαρ θρησκεία τι ντας λατρεία ελεύθερα ντα ντινάς εντολή τι ντιντιόν-αμέν ο άδειες σο χρειαζίντιβαας. Αρχισάλομ τι ντικχάβ σαρ ευλογίνελας ο Ιεχωβά ο νομικά μέσα σο χρησιμοποιήνελας λέσκι οργάνωση για τι αβέλ-πες λέσκο έργος. Χαιρίναβας μπουτ σο βοηθίναβας με-ντα τι αβέλ-πες ανταβά.

Ο πφραλά αρχισάλε τι λατσσαρέν μπουτ πράγματα. Πριν τι νακχέλ εκ μπρες, 8 Σεπτεμβρίου 1985, αβιλί-πες οτθέ, κι Αίθουσα Συνελεύσεων κο Τζέρσι Σίτι, η αποφοίτηση της Γαλαάδ η τάξη 79. Ισινόμας μπουτ χαρούμενος σο βοηθίναβας ανταλέ μπουτιάσαρ ι Ιεχωβάς. Ντέλας-μαν μπουτ πιο μπαρί χαρά κατά μπουτί σο κερντόμας σαρ δικηγόρος πριν τι αβάβ κο Μπέθελ. Να νακχέλας μι γκοντιάταρ αζομάν ότι ο Ιεχωβά κα ντέλας-μαν μπουτ γιαβερά ασακέ προνόμια!

Κο μπρεσά κατά 1980, ο γιατροί μπουτ φαρ να σεβάνενας ι επιθυμία εκχέ πφραλέσκι μα τι μανγκέλ τι τσσουβέν λέσκε ρατ. Άμα εκ τζουβέλ ισινέ κχαμνί, ο πράγματα λάκε ισινέ ατζέ πιο δύσκολα, σόσκε ο δικαστές μπουτ φαρ πακιάνας ότι να τθερέλας ο δικαίωμας μα τι μανγκέλ τι τσσουβέν λάκε ρατ. Ο δικαστές βακερένας ότι άμα εκ ντάι να κα μανγκέλας τι τσσουβέν λάκε ρατ, μπορεί τι μερέλας ντα ο χουρντό κα μπαριόλας μπι-νταγιάκο.

29 Δεκεμβρίου 1988, η πφεν Ντενίζ Νικολό χασαρντάς μπουτ ρατ αφού μπιαντάς πι τσσαβές. Λάκι αιμοσφαιρίνη πελί τελέ κατά 5, ντα ο γιατρός μανγκλάς λάταρ τι τσσουβέλ ρατ. Η πφεν Νικολό να μανγκλάς. Ο γιαβέρ ντιβές, ο νοσοκομείος μανγκλάς δικαστική εντολή για τι τσσουβέν λάκε ο ρατ σο χρειαζίντιβελας. Χωρίς τι ασουνέλ σο τθερέλας τι βακερέλ η πφεν Νικολό ή λάκο ρομ ντα χωρίς τι βακερέλ-λες λένγκε, ο δικαστής ντινάς εντολή κο νοσοκομείος τι τσσουβέν λάκε ρατ.

Παρασκευή 30 Δεκεμβρίου, ο γιατροί τσσουντέ ρατ κι πφεν Νικολό παρόλο σο λάκο ρομ ντα γιαβερά λάκε φαμιλιάταρ βακερένας μα τι τσσουβέν λάκε. Οντιά ιράτ, ο ασκέρια ασταρντέ μερικέ τζενέν λάκε φαμιλιάταρ ντα μερικέ πρεσβυτερόν, ντα κατηγοριντέ-λεν ότι πφαντέ ο ντρομ για μα τι τζαν κι πφεν ντα τι τσσουβέν λάκε ρατ. Ο γιαβέρ ντιβές, ο εφημερίδες, η τηλεόραση ντα ο ράδιος κι Πόλη  της Νέας Υόρκης ντα κο Λονγκ Άιλαντ κερένας λάφι οντουλένγκε σο αβιλέ-πες.

Δευτέρα πρωί, κερντόμ λάφι κο πρόεδρος κι δικαστηριόσκο, κο Μίλτον Μόλεν. Βακερντόμ λέσκε σο αβιλό-πες ντα ότι ο γιαβέρ δικαστής ντινάας εντολή τι τσσουβέν ρατ χωρίς τι ασουνέλ ι πφενιά ή λάκε ρομές. Ο δικαστής Μόλεν μανγκλάς μάνταρ τι νακχάβ λέσκε γραφειόσταρ απόγευμας για τι ντικχάς σο αβιλόας-πες ντα σο βακερέλας ο νόμος οντουλέ περιπτωσιάκε. Αβιλό μάντζαρ μο επίσκοπος-ντα, ο Φίλιπ Μπράμλεϊ. Ο δικαστής καλιντάς ι δικηγορός-ντα σο τθερέλας ο νοσοκομείος. Καζόμ κεράας λάφι, νευριασάλαμ. Κάποια στιγμή, ο πφραλ Μπράμλεϊ γραφιντάς μάνγκε εκχέ χαρτίστε: «Ηρέμινε χάνικ». Λέσκι συμβουλή ισινέ μπουτ σωστή, σόσκε αρχίναβας τι νευριάναβ καζόμ προσπαθίναβας τι σικαβάβ ότι ο γιαβέρ δικηγόρος ισινέ λάθος.

Περίπου εκ σαάτι πιο σοράν, ο δικαστής Μόλεν βακερντάς ότι η υπόθεση κα αβέλας πρώτη κο δικαστήριος ο γιαβέρ ντιβές. Σαρ νασάας λέσκε γραφειόσταρ, βακερντάς ότι ο δικηγόρος ι νοσοκομειόσκο κα τθερέλας μπουτ δύσκολη μπουτί ο γιαβέρ ντιβές. Ανταβά μανγκέλας τι βακερέλ ότι να κα αβέλας λέσκε εύκολος τι κερέλ ι γιαβερέν τι πακιάν ότι τθερέλα δίκιος. Νιωσάλομ ότι ο Ιεχωβά σικαβέλας μάνγκε ότι κα νικίνας. Πφερντιλόμ εκτίμηση ι Ιεχωβάσκε κάνα σκεφτίναβας ότι χρησιμοποιηντάς-αμέν για τι κερέλ οντουβά σο μανγκέλα.

Κερντάμ μπουτί μέχρι αργά οντιά ιράτ για τι ετοιμάνας σο κα βακεράας. Ο δικαστήριος ισινέ μπουτ πασέ κο Μπέθελ κο Μπρούκλιν, οτθάρ ο πιο μπουτ κατά χουρντό Νομικός Τμήμας γκιλάμ πφιριντός. Κάνα ο σταρ δικαστές ασουντέ σο βακερντάμ λένγκε, αποφασιντέ ότι δεν έπρεπε τι ντιντιόλας εντολή τι τσσουβέν ρατ ι πφενιάκε. Ο πιο μπαρό δικαστήριος τσσιντιντάς κατά πφεν Νικολό, ντα βακερντάς ότι ισί παράνομος τι ντιντιόλ εντολή άμα να κα ασουνέν πρώτα σο τθερέλα τι βακερέλ ο νασφαλό.

Τελικά, ο πιο μπαρό δικαστήριος κι Νέα Υόρκη δεχτιντάς ο δικαίωμας σο τθερέλας η πφεν Νικολό τι κερέλ θεραπεία χωρίς τι τσσουβέν λάκε ρατ. Ισινέ η πρώτη κατά σταρ αποφάσεις σο τθερένας τι κερέν ι ρατέσαρ σο γκιλέ κο πιο μπαρέ δικαστήρια κο Ηνωμένες Πολιτείες ντα τθεράβας ο προνόμιος τι βοηθίναβ. (Ντικχέν ο πλαίσιος « Νίκες κο  Μπαρέ Δικαστήρια») Επίσης, συνεργασάλομ γιαβερέ δικηγορόντζαρ κο Μπέθελ μπουτιέντε σαρ ισί κον κα λελ ι τσσαβέν, διαζύγια ντα νόμους τθανένγκε ντα κτιριόνγκε.

Κάνα γνωριντόμ μι ρομνιά, την Ντον, ισινέ χωρισμέ ντα μπαριαρέλας κορκορί πι τρινέ τσσαβέν. Κερέλας μπουτί για το αναγκαία ντα κερέλας σκαπανικός. Τθερέλας δύσκολη ζωή, ντα κερντάς μάνγκε μπαρί εντύπωση καζόμ μπουτ μανγκέλας τι υπηρετίνελ ι Ιεχωβάς. Κο 1992, ισινάμας κι Συνέλευση Περιφερείας «Φορείς Φωτός» κι Πόλη της Νέας Υόρκης, ντα μανγκλόμ λάταρ τι γνωρίντιβας πιο λατσσές. Παντρισάλαμ εκ μπρες πιο σοράν. Μι ρομνί, σο τσσουβέλα πάντα ι Ιεχωβάς πρώτα ντα σο κερέλα-τουτ τι ασάς, ισί μπαγιά εκ δώρος κατά Ιεχωβά. O κάθε ντιβές ισί σουκάρ λάσαρ.​—Παρ. 31:12.

Κάνα παντρισάλαμ, ο τσσαβέ ισινέ 11, 13 ντα 16 μπρεσένγκε. Επειδή μανγκάβας τι αβάβ λατσσό ντατ, διαβάναβας λατσσές ντα κεράβας σο-ντα αρακχάβας κο έντυπα ι μαμοσολόνγκε. Καζόμ νακχένας ο μπρεσά τθεράας δυσκολίες, αλλά χαιρίναβα σο τελικά ο τσσαβέ ντικχένα-μαν σαρ αμάλ σο ντένα λέσκε μπέσα ντα σαρ λατσσό ντατ. Αμαρό κχερ ισινέ πάντα πουταρντό ι αμαλένγκε σο τθερένας αμαρέ τσσαβέ ντα μπεϊντίναας μπουτ σο τθεράας αζόμ τερνέν πασ’ αμέντε.

Κο 2013, η Ντον ντα με γκιλάμ κο Ουισκόνσιν για τι αρακχαβάς μι νταντές ντα λάκε νταντές ντα νταγιά σο ισινέ πφουρέ. Σαστισάλομ σο να τσσιναντόμ τι υπηρετίναβ κο Μπέθελ. Μανγκλέ μάνταρ τι συνεχίναβ τι βοηθίναβ αμαρί οργάνωση κο νομικά σαρ προσωρινός εθελοντής.

Κο Σεπτέμβριος 2018, ντινόμ σημασία ότι ασταρέλας-μαν χας κάνα τζάβας τι κεράβ λάφι. Αμαρό γιατρός οτθέ ντικχλάς-μαν αλλά να αρακχλάς κατάρ αβέλας ο χας. Σοράν, εκ γιαβέρ γιατρός βακερντάς μάνγκε τι τζαβ κο νευρολόγος. Κο Ιανουάριος 2019, ο νευρολόγος αρακχλάς ότι τθεράβας εκ σπάνια νευρολογική διαταραχή σο βακέρντιβελας προϊούσα υπερπυρηνική παράλυση (PSP).

Τριν ντιβεσά πιο σοράν, σαρ κεράβας πατινάζ κο πάγος, πελόμ ντα πφανγκλόμ μο δεξίς βας. Κεράβας πατινάζ σαρί μι ζωή ντα ισινόμας μπουτ λατσσό. Ανταλέσταρ αγαντόμ ότι ναστί ελεγχίναβας μο κινήσεις. Μο νασφαλιπέ μπαριλό μπουτ σουγκό, ντα οτθάρ ακανά ναστί κεράβα λάφι, ναστί πφιράβα ντα ναστί μπιλιαβάβα.

Ισινέ μπουτ μπαρό προνόμιος μάνγκε τι χρησιμοποιήναβ οντουλά σο τζανάβα σαρ δικηγόρος για τι βοηθίναβ ι Ιεχωβάσκι οργάνωση. Ντα τθεράβας ο προνόμιος τι γραφίναβ μπουτ θέματα περιοδικόντε σο διαβάνενας γιατροί, δικηγόροι ντα δικαστές. Επίσης, κεράβας ομιλίες σαρό κο ντουνιάς, για τι υπερασπίναβ ο δικαίωμας σο τθερένα ι Ιεχωβάσκε υπηρέτες τι τραμπίνεν τι κερέν θεραπεία ή χειρουργείος χωρίς τι τσσουβέν λένγκε ρατ. Όμως, σαρ βακερέλα ο εδάφιος Λουκάς 17:​10, βακεράβα: “Άχρηστος δούλος ισινόμ. Κερντόμ οντουβά σο έπρεπε τι κεράβ”.