Τζανάσα ότι ο Ιησούς αβιλό Αρχιερέας κάνα μπολντιλό κο 29 Κ.Χ. Σαρ τζανάσα-λες ανταβά; Κάνα μπολντιλό, σικαντάς ότι μανγκέλας τι ντελ πι ζωή σαρ θυσία κο θυσιαστήριος κι Ντεβλέσκε “θελημάσκο”. (Γαλ. 1:4· Εβρ. 10:​5-10) Αφού ανταβά συμβολικός θυσιαστήριος υπαρχίντιβελα οτθάρ μπερί σο μπολντιλό ο Ιησούς, ο μπαρό πνευματικός ναός-ντα πρέπει τι υπαρχίντιβελα οτθάρ μπερί. Αντρέ ανταλέ πνευματικέ ναόστε, ο τζενέ σο πακιάνα κι θυσία κι Ιησούσκι, μπορίνενα τι ντεν πάκι λατρεία κο Ιεχωβά. Ο θυσιαστήριος ισί κάτι μπουτ σημαντικός σο τθερέλα οντουβά πνευματικός ναός.​—Ματθ. 3:​16, 17· Εβρ. 5:​4-6.

Κο μπαρό πνευματικός ναός έπρεπε τι υπηρετίνελ εκ αρχιερέας. Οτθάρ, ο Ιεχωβά τραμπιντάς «άγιε πνευμάσαρ ντα ζοριάσαρ» ι Ιησούς για τι αβέλ ο αρχιερέας. (Πράξ. 10:​37, 38· Μάρκ. 1:​9-11) Όμως, σαρ τζανάσα ότι ο Ιησούς τραμπίντιλο Αρχιερέας πριν κατά μεριπέ ντα κατά ανάσταση λέσκι; Οντουλά σο κερέλας ο Ααρών ντα ο αρχιερείς σο ισινέ σοράν λέσταρ κα βοηθίνεν-αμέν τι απαντίνας ανταλέ ερωτησιάτε.

Ο Νόμος σο ντινάς ο Ιεχωβά κο Μωυσής βακερέλας ότι σάντε ο αρχιερέας μπορίνελας τι τζαλ κο Άγια των Αγίων σο ισινέ κι σκηνή της μαρτυρίας ντα, σοράν κο Άγια των Αγίων σο ισινέ κο ναός. Ο Άγια των Αγίων χωρίντιβενας κατά Άγια εκχέ κουρτινάσαρ. Ο αρχιερέας νακχέλας ανταλέ κουρντινάταρ σάντε κο Ντιβές σο κερένας για τι ιτσσάρντιβεν λένγκε αμαρτίες. (Εβρ. 9:​1-3, 6, 7) Σαρ ο Ααρών ντα ο αρχιερείς σο ισινέ σοράν λέσταρ τραμπίντιλε τι αβέν αρχιερείς πριν τι νακχέν «κατά κουρτίνα» σο ισινέ κι σκηνή της μαρτυρίας, αντικάς ο Ιησούς-ντα πρέπει τι τραμπίντιλο τι αβέλ Αρχιερέας ι μπαρέ πνευματικέ ναόσκο πριν τι μερέλ ντα τι νακχέλ «κατά κουρτίνα, δηλαδή πι σωμάσταρ», για τι τζουβντιόλ κο ουρανός. (Εβρ. 10:​20) Οντουλέσκε, ο απόστολος Παύλος βακερντάς ότι ο Ιησούς «αβιλό σαρ αρχιερέας» ντα σοράν «τσσουντάς-πες κο πιο μπαρό ντα κο πιο τέλειος τσαντίρι σο νανέ κερντό βαστένταρ», τσσουντάς-πες «κο ουρανός».​—Εβρ. 9:​11, 24.

Να τθερέλα διαφορά ο ντιβές σο ο Ντεβέλ δεχτιντάς ι νεβί συμφωνία κατά ντιβές σο αρχισάλι τι αβέλ-πες. Σόσκε; Κάνα ο Ιησούς γκιλό κο ουρανός ντα σικαντάς μάξους αμένγκε ι αξία πι τέλειε ζωγιάκι, κερντάς ντούι πράγματα για τι δεχτίνελ ο Ντεβέλ ι νεβί συμφωνία, δηλαδή τι αβέλ νόμιμη οντιά συμφωνία. Ανταλέντζαρ σο κερντάς, η συμφωνία αρχισάλι τι αβέλ-πες ντα. Καλά πράγματα έπρεπε τι αβέν-πες;

Πρώτα, ο Ιησούς σικαντάς-πες ανγκλάλ κο Ιεχωβά. Σοράν, ντινάς κο Ιεχωβά ι αξία σο τθερέλας λέσκι θυσία. Τελικά, ο Ιεχωβά δεχτιντάς ι αξία σο τθερέλας ο ρατ ι Ιησούσκο σο τσσορντιλό. Πριν τι αβέν-πες ανταλά, η νεβί συμφωνία να αρχισάλιας τι αβέλ-πες ατζέκ.

Η Γραφή να βακερέλα αμένγκε κάνα ακριβώς δεχτιντάς ο Ιεχωβά ι αξία σο τθερέλας ι Ιησούσκι θυσία. Οτθάρ, ναστί βακεράσα κάνα ακριβώς δεχτιντάς ο Ιεχωβά ι νεβί συμφωνία ντα κάνα αρχισάλι τι αβέλ-πες. Όμως, τζανάσα ότι ο Ιησούς γκιλό κο ουρανός ντες ντιβεσά πριν κατά Πεντηκοστή. (Πράξ. 1:3) Κάποια στιγμή αντρέ οντουλέ ντιβεσέντε, σικαντάς ι αξία σο τθερέλας λέσκι θυσία κο Ιεχωβά ντα βοβ δεχτιντάς-λα. (Εβρ. 9:​12) Τζανάσα ότι η νεβί συμφωνία αρχισάλιας τι αβέλ-πες σο αβιλέ-πες κι Πεντηκοστή. (Πράξ. 2:​1-4, 32, 33) Ντικχίντιβελα ότι αζομάν αβιλίας-πες η νεβί συμφωνία.

Χάνικ λαφίντζαρ, ο Ιεχωβά δεχτιντάς ι νεβί συμφωνία ντα οντιά συμφωνία αρχισάλι τι αβέλ-πες κάνα ο Ιεχωβά δεχτιντάς ι αξία σο τθερέλας ο ρατ ι Ιησούσκο σο τσσορντιλό ντα τσσουντάς ι χρισμέν αντρέ ανταλέ συμφωνιάτε. Ο Ιησούς ισί ο Αρχιερέας ντα ο Μεσίτης οντουλέ συμφωνιάτε.​—Εβρ. 7:​25· 8:​1-3, 6· 9:​13-15.