1. Σο ντέλα-αμέν χαρά σαρ βακερένα ο εδάφια 3 Ιωάννη 3, 4;

ΜΠΟΡΙΝΕΝΑ τι σκεφτίνεν καζόμ χαρά λιντάς ο απόστολος Ιωάννης κάνα ασουνέλας ότι ο τζενέ σο βοηθιντάς τι σικλιόν ι αλήθεια συνεχίνενας τι υπηρετίνεν πιστά ι Ιεχωβάς; Νακχένας μπουτ προβλήματα, ντα ο Ιωάννης κερντάς σο νακχέλας λέσκε βαστένταρ για τι μπαριαρέλ ι πίστη ανταλέ αφοσιωμέ Χριστιανόνγκι σο ντικχέλας-λεν σαρ τι αβένας λέσκε τσσαβέ. Αντικάς αμέν-ντα λάσα χαρά κάνα αμαρέ τσσαβέ ή οντουλά σο βοηθίνασα-λεν τι σικλιόν ι αλήθεια, κερένα αφιέρωση κο Ιεχωβά ντα συνεχίνενα τι υπηρετίνεν-λες.​—Διαβάνεν 3 Ιωάννη 3, 4.

2. Σόσκε γραφιντάς πο επιστολές ο Ιωάννης;

² Κο 98 Κ.Χ., ο Ιωάννης μάλλον τζουβντιόλας κι Έφεσος ή κάπου οτθέ πασέ. Μπορεί τι γκιλό οτθέ κάνα νικίστιλο κατά φυλακή σο ισινέ κι Πάτμος. Αζομάν, ο άγιος πνεύμας ι Ιεχωβάσκο κερντάς-λες τι γραφίνελ τριν επιστολές. Γραφιντάς ανταλά επιστολές για τι κερέλ ι αφοσιωμέ Χριστιανόν τι μανγκέν τι ατσσικιαρέν πουμαρί πίστη κο Ιησούς ντα τι συνεχίνεν τι πφιρέν κι αλήθεια.

3. Καλέ ερωτησιέντε κα απαντίνας;

³ Ο Ιωάννης ισινέ ο τελευταίος απόστολος σο τζουβντιόλας ντα ανησυχίνελας σόσκε οντουλά σο σικλιαρένας ψέματα κο κχανγκιριά προσπαθίνενας τι χουχαβέν ι πφραλέν. * (1 Ιωάν. 2:​18, 19, 26) Οντουλά αποστάτες βακερένας ότι τζανένας ι Ιεχωβά Ντεβλές, αλλά να ντένας καν λέσκε εντολέντε. Ακανά κα ντικχάς ο συμβουλές ι Ντεβλέσκε σο γραφιντάς ο Ιωάννης. Καζόμ κεράσα-λες ανταβά, κα απαντίνας  ακαλέ τρινέ ερωτησιέντε: Σο μανγκέλα τι βακερέλ τι πφιράς κι αλήθεια; Σο κα μπορίνελας τι τσσιναβέλ-αμέν τι κεράς-λες ανταβά; Ντα σαρ κα βοηθίνας ο εκ ι γιαβερές τι ατσσάς κι αλήθεια;

4. Σο πρέπει τι κεράς για τι πφιράς κι αλήθεια σαρ βακερένα ο εδάφια 1 Ιωάννη 2:​3-6 ντα 2 Ιωάννη 4, 6;

⁴ Για τι πφιράς κι αλήθεια, πρέπει τι τζανάς ι αλήθεια σο αρακχάσα κο Λάφι κι Ντεβλέσκο, κι Γραφή. Επίσης, πρέπει τι “κεράς ο εντολές ι [Ιεχωβάσκε]”, δηλαδή τι ντας καν λέντε. (Διαβάνεν 1 Ιωάννη 2:​3-6· 2 Ιωάννη 4, 6) Ο Ιησούς ντέλας καν κο Ιεχωβά ντα μουκχλάς αμένγκε τέλειος παράδειγμας οπράλ ανταλέστε. Άρα, εκ σημαντικός πράγμας σο μπορίνασα τι κεράς για τι ντας καν ι Ιεχωβάς ισί τι κεράς οντουλά σο κερέλας ο Ιησούς καζόμ πιο λατσσές αβέλα-πες.​—Ιωάν. 8:​29· 1 Πέτρ. 2:21.

5. Καλέ πραγμάσκε πρέπει τι αβάς σίγουροι;

⁵ Για τι συνεχίνας τι πφιράς κι αλήθεια, πρέπει τι αβάς σίγουροι ότι ο Ιεχωβά πάντα βακερέλα ι αλήθεια ντα οτθάρ σαρέ οντουλά σο βακερέλα αμένγκε πι Λαφίστε, κι Γραφή, ισί μπαγιά. Επίσης, πρέπει τι αβάς σίγουροι ότι ο Ιησούς ισί ο Μεσσίας σο βακερντάας ο Ντεβέλ ότι κα αβέλας. Μπουτ τζενέ αντιβές βακερένα ότι ο Ιησούς νανέ Βασιλιάς κι Βασιλεία κι Ντεβλέσκι. Ο Ιωάννης βακερντάς ότι υπαρχίντιβενας «μπουτ τζενέ σο χουχαβένα», σο κα μπορίνενας τι χουχαβέν οντουλέν σο να πακιάνας ντιπ ι αλήθεια ι Ιεχωβάσκε ντα ι Ιησούσκε. (2 Ιωάν. 7-11) Ο Ιωάννης γραφιντάς: «Κον ισί ο ψεύτης άμα νανέ οντουβά σο να πακιάλα ότι ο Ιησούς ισί ο Χριστός;» (1 Ιωάν. 2:​22) Ο μόνος τρόπος για μα τι χουχάντιβας ισί τι διαβάνας ο Λάφι ι Ντεβλέσκο. Σάντε αντικάς κα μπορίναας τι σικλιάς ι Ιεχωβάς ντα ι Ιησούς. (Ιωάν. 17:3) Ντα σάντε αζομάν κα αβάς σίγουροι ότι τθεράσα ι αλήθεια.

6. Σο κα μπορίνελας τι τσσιναβέλ ι τερνέ Χριστιανόν τι πφιρέν κι αλήθεια;

⁶ Σαρέ ο Χριστιανοί πρέπει τι αρακχαβέν-πες για μα τι χουχάντιβεν κατά σοφία ι τζενένγκι. (1 Ιωάν. 2:​26) Ντα πιο μπουτ ο τερνέ Χριστιανοί πρέπει τι αρακχαβέν-πες. Η Αλέξια, * εκ Γαλλίδα πφεν σο ισί 25 μπρεσένγκι, βακερέλα: «Κάνα ισινόμας πιο χουρντί, ο ιδέες ι ντουνιάσκε, σαρ ισί η εξέλιξη ντα η σοφία ι τζενένγκι, κερντέ-μαν μα τι αβάβ σίγουρη ι αληθειάκε. Μπάζιμα, ταρτίνενας-μαν ο λάφια σο σικλιαρένας.  Αλλά σκεφτιντόμ ότι να αβέλας-πες τι ασουνάβ σάντε οντουλά σο σικλιάβας κο σχολείος ντα μα τι νταβ κο Ιεχωβά εκ ευκαιρία τι κερέλ λάφι». Η Αλέξια διαβαντάς ο βιβλίος Ζωή​—Πώς Βρέθηκε Εδώ; Από Εξέλιξη ή από Δημιουργία; Αντρέ σε χάνικ εβδομάδες, να τθερέλας αμφιβολίες. Βόι βακερέλα: «Σικαντόμ μι νεαυτόσκε ότι η Γραφή τθερέλα ι αλήθεια. Ντα αγαντόμ ότι άμα τζουβντιάβας σαρ βακερένα λάκε κανόνες κα τθεράβ χαρά ντα ειρήνη».

7. Σο πρέπει τι προσοχίνας μα τι κεράς, ντα σόσκε;

⁷ Σαρέ ο Χριστιανοί, χουρντέ ντα μπαρέ, πρέπει τι προσοχίνεν μα τι κερέν-πες ανγκλάλ κο γιαβερά ότι υπηρετίνενα ι Ιεχωβάς αλλά αποτσοράλ τι κερέν μπέτι πράγματα. Ο Ιωάννης βακερντάς ότι ναστί πφιράσα κι αλήθεια ντα κι ίδια στιγμή τι κεράς λουμνικανέ πράγματα. (1 Ιωάν. 1:6) Άμα μανγκάσα τι αβέλ χαρούμενος ο Ντεβέλ αμέντζαρ εμ ακανά εμ κο ντιβεσά σο κα αβέν, πάντα πρέπει τι ντας-αμέν γκοντί ότι ντικχέλα σο-ντα κεράσα. Κι πραγματικότητα, καέκ αμαρτία νανέ γκεραντί επειδή ο Ιεχωβά ντικχέλα σαρέ οντουλά σο κεράσα.​—Εβρ. 4:13.

8. Σο πρέπει τι κεράς πέρα;

⁸ Πρέπει τι κεράς πέρα ι άποψη σο τθερέλα ο ντουνιάς ι αμαρτιάκε. Ο απόστολος Ιωάννης γραφιντάς: «Αν κα βακεράς: “Να τθεράσα αμαρτία”, χουχαβάσα αμαρό νεαυτός». (1 Ιωάν. 1:8) Κο ντιβεσά σο τζουβντιόλας ο Ιωάννης, ο αποστάτες βακερένας ότι εκ τζενό μπορίνελας επίτηδες τι κερέλ μπίλατζανε πράγματα ντα τι συνεχίνελ τι αβέλ αμάλ ι Ντεβλέσκο. Ο τζενέ αντιβές τθερένα ι ίδια άποψη. Μπουτ βακερένα ότι πακιάνα κο Ντεβέλ, αλλά να ντένα καν οντουλέντε σο βακερέλα ο Ιεχωβά ι αμαρτιάκε, ντα πιο μπουτ οντουλά σο βακερέλα για το σεξ. Βακερένα ότι, άμα μανγκέλα εκ τζενό, μπορίνελα τι κερέλ οντουλά σο ο Ιεχωβά βακερέλα ότι ισί λάθος.

9. Σόσκε ισί λατσσό ι τερνένγκε τι κερέν οντουβά σο σικλιαρέλα η Γραφή ότι ισί σωστός;

⁹ Ι τερνέ Χριστιανόνγκε ισί μπουτ δύσκολος τι συνεχίνεν τι τθερέν σωστή άποψη για  το σεξ κάνα οντουλά σο ισί λέντζαρ κι μπουτί ή κο σχολείος να ντένα καν κο κανόνες κι Ιεχωβάσκε για το σεξ. Ανταβά αβιλό-πες κο Αλεξάνταρ. Βοβ βακερέλα: «Κάποια τσσαγιά κο σχολείος μανγκένας τι κερέν-μαν τι σοβάβ λέντζαρ. Βακερένας ότι, αφού να νικιάβας καεκχιάσαρ, μάλλον σοβάβας μουρσέντζαρ». Άμα νακχένα ασακέ δυσκολίες, τι ντεν-τουμέν γκοντί ότι, κάνα κερένα οντουβά σο βακερέλα η Γραφή ότι ισί σωστός, κα νιωθίνεν λατσσές τουμαρέ νεαυτόσαρ, να κα νασφάλιβεν, να κα στεναχωρίντιβεν ντα κα συνεχίνεν τι αβέν αμαλά ι Ιεχωβάσαρ. Κάθε φαρ σο κερένα πέρα ο γκεραλέ πράγματα, κα αβέλ τουμένγκε πιο εύκολος τι κερέν ο σωστός. Επίσης, τι ντεν-τουμέν γκοντί ότι η λάθος άποψη ανταλέ ντουνιάσκι για το σεξ αβέλα κατά Μπενγκ. Οτθάρ, κάνα να σκεφτίνενα σαρ σκεφτίνενα ο τζενέ κο ντουνιάς, “νικίνενα ι πφιρνές”.​—1 Ιωάν. 2:14.

10. Σαρ βοηθίνελα-αμέν ο εδάφιος 1 Ιωάννη 1:9 τι υπηρετίνας ι Ιεχωβάς με πάκι συνείδηση;

¹⁰ Αγαβάσα ότι ο Ιεχωβά τθερέλα ο δικαίωμας τι βακερέλ σο ισί αμαρτία. Ντα κεράσα ο πιο λατσσό σο μπορίνασα για μα τι κεράς αμαρτία. Κάνα όμως αμαρτίνασα, μουτθαβάσα σο λάθος κερντάμ ι Ιεχωβάσκε αντράλ κατά προσευχή. (Διαβάνεν 1 Ιωάννη 1:9) Ντα άμα κερντάμ εκ μπαρί αμαρτία, μανγκάσα βοήθεια κατά πρεσβύτεροι, σο τσσουντάς-λεν ο Ιεχωβά τι αρακχαβέν-αμέν. (Ιακ. 5:​14-16) Όμως, δεν πρέπει τι χαν-αμέν ο τύψεις επειδή ανγκλέ κερντάμ εκ λάθος. Σόσκε; Επειδή αμαρό λατσσό Ντατ ντινάς σαρ θυσία πι Τσσαβές για τι συγχωρίντιβεν αμαρέ αμαρτίες. Ο Ιεχωβά βακερέλα ότι κα συγχωρίνελ-αμέν άμα μετανιωσάλαμ οντουλένγκε σο κερντάμ, ντα μανγκέλα μπαγιά τι κερέλ-λες ανταβά. Οντουλέσκε, τίποτα ναστί τσσιναβέλα-αμέν τι υπηρετίνας-λες με πάκι συνείδηση.​—1 Ιωάν. 2:1, 2, 12· 3:​19, 20.

11. Σαρ μπορίνασα τι αρακχαβάς-αμέν κατά πράγματα σο σικλιαρένα ο αποστάτες για τι κερέν-αμέν τι χασαράς αμαρί πίστη;

¹¹ Μα τι ασουνάς οντουλά σο σικλιαρένα ο  αποστάτες. Ο Διάβολος πάντα προσπαθίνελας τι κερέλ ι Χριστιανόν τι χασαρέν πουμαρί πίστη. Οτθάρ, αμέν πρέπει τι τζανάς σαρ τι αγαβάς σο ισί μπαγιά ντα σο ισί ψέμας. * Αμαρέ ντουσμάνια μπορεί τι βακερέν ψέματα αντράλ κατά Ίντερνετ ή κατά κοινωνικά δίκτυα για τι κερέν-αμέν τι χασαράς αμαρί πίστη κο Ιεχωβά ντα αμαρί αγάπη ι πφραλένγκε. Μα μπιστρέν κον γκεραβέλα-πες παλάλ ανταλέ ψεματένταρ ντα μα ασουνέν-λεν!​—1 Ιωάν. 4:1, 6· Αποκ. 12:9.

12. Σόσκε πρέπει τι μπαριαράς αμαρί εκτίμηση για το αλήθειες σο σικλιλάμ;

¹² Για τι ντας-λεν πέρα ι Μπενγκέσαρ, σο τσσουβέλα-λεν αμέντζαρ, πρέπει τι μπαριαράς αμαρί πίστη κο Ιησούς ντα κο ρόλος σο κχελέλα κο σκοπός κι Ντεβλέσκο. Πρέπει επίσης τι ντας μπέσα οντουλέντε σο χρησιμοποιήνελα ο Ιεχωβά για τι οδηγίνελ πι οργάνωση αντιβές. (Ματθ. 24:​45-47) Μπαριαράσα αμαρί πίστη κάνα διαβάνασα κάθε ντιβές ο Λάφι ι Ντεβλέσκο. Αζομάν, αμαρί πίστη κα αβέλ σαρ δέντρος σο ισί ριζωμέ ντιπ αντρέ κι πφουβ. Ο Παύλος βακερντάς κάτι ασακό κι επιστολή σο γραφιντάς ι κχανγκιριάκε κο Κολοσσές: «Σαρ δεχτιντέν ι Χριστός Ιησούς, ι Κυριός, συνεχίνεν τι πφιρέν γιεκ λέσαρ, ενώ ισινέν ριζωμέ ντα χτισμέ κο Χριστός, σο ισί ο θεμέλιος, ντα ατσσόνα σταθεροί κι πίστη». (Κολ. 2:6, 7) Άμα μαράσα-αμέν για τι μπαριαράς αμαρί πίστη, ο Μπενγκ ντα οντουλά σο τσσίντενα λέσταρ ναστί κα κερέν-αμέν τι τσσιναβάς τι πφιράς κι αλήθεια.​—2 Ιωάν. 8, 9.

13. Σο πρέπει τι μπεκλεντίνας, ντα σόσκε;

¹³ Πρέπει τι μπεκλεντίνας ότι ο ντουνιάς κα μισίνελ-αμέν. (1 Ιωάν. 3:​13) Ο Ιωάννης ανέλα αμαρέ γκοντιάτε ότι «σαρέ ι ντουνιάς κερέλα-λες κουμάντος ο πφιρνό». (1 Ιωάν. 5:​19) Καζόμ ανταβά ντουνιάς ερεσέλα κο τέλος, η χολί ι Μπενγκέσκι μπαριόλα ατζέ πιο μπουτ. (Αποκ. 12:​12) Να χρησιμοποιήνελα σάντε πράγματα σο να αγαντίντιβενα ότι αβένα λέσταρ σαρ ισί ο λουμνιπέ ή ο ψέματα κατά αποστάτες. Τσσουβέλα τζενέν-ντα τι τζαν αμέντζαρ κόντρα. Τζανέλα ότι ατσσιλό-λες χάνικ βακίτι ντα προσπαθίνελα τι τσσιναβέλ αμαρό έργος ντα τι κερέλ-αμέν τι χασαράς αμαρί πίστη. Οτθάρ, να κερέλα αμένγκε εντύπωση σο μπουτ τθεμέντε να μουκχένα ι πφραλέν τι κερέν κάποια πράγματα ή τσσιναβένα ντιπ αμαρό έργος. Όμως, ο πφραλά ντα ο πφενιά οντουλέ τθεμέντε νταϊντίνενα. Σικαβένα ότι, σο-ντα τι κερέλ αμένγκε ο πφιρνό, αμέν κα νικίνας!

14. Καβά ισί εκ τρόπος σο μπορίνασα τι βοηθίνας αμαρέ πφραλέν ντα αμαρέ πφενίν τι ατσσόν κι αλήθεια;

¹⁴ Για τι βοηθίνας ι πφραλέν ντα ι πφενίν τι ατσσόν κι αλήθεια, πρέπει τι σικαβάς ότι πφαμπάσα λένγκε. (1 Ιωάν. 3:​10, 11, 16-18) Πρέπει τι μανγκάς ο εκ ι γιαβερές, όχι σάντε κάνα ο πράγματα τζάνα λατσσές, αλλά κάνα αβένα-πες προβλήματα-ντα. Για παράδειγμας, τζανένα καεκχές σο μουλό λέσταρ εκ τζενό ντα χρειαζίντιβελα τι λοκχιαράς λέσκο γκι ή τι βοηθίνας-λες συγκεκριμέ τροπόντζαρ; Μήπως ασουντέν μερικέ πφραλέν σο χασαρντέ μπουτ πουμαρέ πραγματένταρ επειδή αβιλί-πες εκ φυσική καταστροφή ντα χρειαζίντιβενα βοήθεια για τι λατσσαρέν πάλι ο Αίθουσες Βασιλείας ή πουμαρέ κχερά; Σικαβάσα καζόμ μανγκάσα ντα πφαμπάσα αμαρέ πφραλένγκε ντα αμαρέ πφενίνγκε, όχι σάντε αμαρέ λαφίντζαρ, αλλά πιο μπουτ οντουλέντζαρ σο κεράσα.

15. Σο πρέπει τι κεράς σαρ βακερένα ο εδάφια 1 Ιωάννη 4:7, 8;

¹⁵ Μοιάζασα αμαρέ Νταντέστε σο ισί κο ουρανός κάνα μανγκάσα ο εκ ι γιαβερές. (Διαβάνεν 1 Ιωάννη 4:7, 8) Εκ σημαντικός τρόπος σο σικαβάσα αγάπη ισί τι συγχωρίνας ο εκ ι γιαβερές. Για παράδειγμας, εκ  τζενό μπορεί τι ανέλ ντουκχ αμαρέ γκίστε αλλά σοράν τι μανγκέλ συγνώμη. Σικαβάσα αγάπη κάνα συγχωρίνασα-λες ντα κάνα μπιστράσα λέσκο λάθος. (Κολ. 3:​13) Εκ πφραλ σο βακερένα λέσκε Άλντο νακχλάς ανταγιά δοκιμασία κάνα ασουντάς εκχέ πφραλές σο σεβάνελας-λες μπουτ τι βακερέλ κάτι σο να ισινέ μπουτ λατσσό λέσκε τθεμέσκε. Ο Άλντο βακερέλα: «Κεράβας συνέχεια προσευχή κο Ιεχωβά τι βοηθίνελ-μαν μα τι τθεράβ μπέτι αισθήματα οντουλέ πφραλέσκε». Ο Άλντο όμως κερντάς κάτι ατζέ-ντα. Αποφασιντάς τι μανγκέλ κατά πφραλ τι νικιόν γιεκ κο έργος. Καζόμ ισινέ κο έργος, βακερντάς λέσκε καζόμ μπουτ ντουκχαντέ-λες λέσκε λάφια. «Κάνα ο πφραλ ασουντάς σαρ νιωσάλομας λέσκε λαφίνταρ», βακερέλα ο Άλντο, «μανγκλάς μάνταρ συγνώμη. Λέσκε φωνιάταρ αγαβάβας καζόμ μπουτ στεναχωρίντιβελας οντουλένγκε σο βακερντάας. Αρακχλάμ-λεν ντα μπισταρντάμ ανταβά πράγμας».

16, 17. Σο πρέπει τι αβάς αποφασισμέ τι κεράς;

¹⁶ Ο απόστολος Ιωάννης μανγκέλας μπουτ πι πφραλέν ντα μανγκέλας τι τθερέν ζουρανί πίστη. Ανταβά ντικχίντιβελα ξεκάθαρα κατά συμβουλές σο ντινάς-λεν αντράλ κατά τριν επιστολές σο γραφιντάς. Καζόμ ζορ λάσα σο τζανάσα ότι μουρσά ντα τζουβλιά σαρ λέστε τραμπίντιλε τι κυβερνίνεν γιεκ ι Χριστόσαρ!​—1 Ιωάν. 2:27.

¹⁷ Οτθάρ, τι λας κο σοβαρά ο συμβουλές σο ντικχλάμ. Τι αβάς αποφασισμέ τι πφιράς κι αλήθεια ντα τι ντας καν ι Ιεχωβάς κάθε πραγμάστε αμαρέ ζωγιάτε. Τι διαβάνεν λέσκο Λάφι ντα τι ντεν λέσκε μπέσα. Τι τθερέν μπαρί πίστη κο Ιησούς. Μα τι ασουνέν ι σοφία ι τζενένγκι ντα οντουλά σο σικλιαρένα ο αποστάτες. Ποτές μα κερέν-τουμέν ανγκλάλ κο γιαβερά ότι υπηρετίνενα ι Ιεχωβάς αλλά αποτσοράλ τι κερέν μπέτι πράγματα, ντα μα ασουνέν οντουλέν σο προσπαθίνενα τι κερέν-τουμέν τι αμαρτίνεν. Τι τζουβντιόν σαρ βακερένα ο κανόνες ι Ιεχωβάσκε. Καζόμ λατσσό ισί τι βοηθίνας αμαρέ πφραλέν τι ατσσόν ζουρανέ κάνα συγχωρίνασα οντουλέν σο ντουκχαβένα-αμέν ντα κάνα βοηθίνασα οντουλέν σο τθερένα ανάγκη. Αζομάν, παρόλο σο νακχάσα δυσκολίες κα συνεχίνας τι πφιράς κι αλήθεια.