1. Σο μανγκάσα τι βακεράς ι λαφίσαρ «αλήθεια»;

«ΣΑΡ σικλιλάν ι αλήθεια;» «Μπαριλάν κι αλήθεια;» «Καζόμ μπρεσά ισινάν κι αλήθεια;» Μάλλον κερντέ τουμένγκε ασακέ ερωτήσεις ή μπορεί τι κερντέν-λεν τουμέν γιαβερένγκε. Σο μανγκάσα τι βακεράς ι λαφίσαρ «αλήθεια»; Ο πιο μπουτ φαρ κάνα βακεράσα ανταβά λάφι, κεράσα λάφι οντουλένγκε σο πακιάσα, οντουλένγκε σο κεράσα για τι ντας λατρεία ι Ντεβλές ντα ι τροπόσκε σο τζουβντιάσα. Ο τζενέ σο ισί «κι αλήθεια» τζανένα σο σικλιαρέλα η Αγία Γραφή ντα κερένα πουμαρέ ζωγιάτε λάκε αρχές. Αντικάς, τσσιναβένα τι πακιάν οντουλά σο σικλιαρένα ο ψεύτικες θρησκείες ντα τθερένα ι πιο λατσσί ζωή σο κα μπορίνενας τι τθερέν σαρ ατελείς τζενέ.​—Ιωάν. 8:32.

2. Σο μπορεί τι ταρτιντάς εκχέ τζενές κι αλήθεια σαρ βακερένα ο εδάφια Ιωάννης 13:​34, 35;

² Σο ισινέ οντουβά σο ταρτιντάς-τουμέν κι αλήθεια; Μπορεί ο λατσσέ πράγματα σο κερέλα ο λαός ι Ιεχωβάσκο. (1 Πέτρ. 2:​12) Ή μπορεί τι ισινέ η αγάπη σο σικαβένα. Μπουτ ντικχλέ-λες ανταβά κι πρώτη συνάθροιση σο γκιλέ. Η αγάπη ι πφραλένγκι ατσσιλί λένγκε γκοντιάτε πιο μπουτ οντουλένταρ σο βακέρντιλε κι συνάθροιση. Ανταβά να κερέλα αμένγκε εντύπωση, σόσκε ο Ιησούς βακερντάς ότι λέσκε μαθητές κα αγαντίντιβενας κατά αγάπη σο κα σικαβένας ο εκ ι γιαβερέσκε. (Διαβάνεν Ιωάννης 13:​34, 35) Αλλά να ερεσέλα ανταβά για τι τθεράς ζουρανί πίστη.

3. Σο μπορεί τι αβέλ-πες άμα αμαρί πίστη κο Ντεβέλ βασίντιβελα σάντε κι αγάπη σο σικαβένα αμαρέ πφραλά ντα πφενιά;

³ Αμαρί πίστη δεν πρέπει τι βασίντιβελ σάντε κι αγάπη σο σικαβέλα ο λαός ι Ντεβλέσκο. Σόσκε; Βακερέν ότι εκ πφραλ​—ατζέ-ντα εκ πρεσβύτερος ή εκ σκαπανέας—​κερέλα εκ μπαρί αμαρτία. Ή εκ πφραλ ή εκ πφεν πληγώνελα-τουμέν. Ή μπορεί κάποιος τι αβέλα αποστάτης ντα τι αρχίνελα τι βακερέλ  ότι να τθεράσα ι αλήθεια. Άμα κα αβέλ-πες κάτι ασακό, μήπως κα χασαρέν τουμαρί πίστη ντα κα τσσιναβέν τι υπηρετίνεν ι Ιεχωβάς; Οντουβά σο σικλιάσα ισί: Άμα τουμαρί πίστη κο Ντεβέλ κα αβέλας σάντε οντουλένταρ σο κερένα γιαβερά τζενέ ντα όχι επειδή τουμέν ισινέν αμαλά λέσαρ, τουμαρί πίστη να κα αβέλας σταθερή. Οντουλά σο νιωθίνενα ι Ιεχωβάσκε ντα λέσκε λαόσκε μπορίνενα τι βοηθίνεν-τουμέν τι μπαριαρέν μπουτ τουμαρί πίστη. Αλλά ισί επίσης μπουτ σημαντικός τι διαβάνεν ι Γραφή μπουτ λατσσές, τι αγαβέν οντουλά σο σικλιόνα ντα τι ρόντεν για τι αβέν σίγουροι ότι σικλιόνα ι αλήθεια ι Ιεχωβάσκε. Πρέπει τι σικαβέν τουμαρέ νεαυτόσκε ότι η Γραφή τθερέλα ι αλήθεια ι Ιεχωβάσκε.​—Ρωμ. 12:2.

4. Σο κερένα μερικά τζενέ κάνα τθερένα προβλήματα σαρ βακερένα ο εδάφια Ματθαίος 13:​3-6, 20, 21;

⁴ Ο Ιησούς βακερντάς ότι μερικοί κα πακιάνας ι αλήθεια «χαράσαρ», αλλά λένγκι πίστη να κα ατσσόλας ζουρανί κάνα κα αβένας προβλήματα. (Διαβάνεν Ματθαίος 13:​3-6, 20, 21) Οντουλά τζενέ μπορεί μα τι αγαντέας ότι κον κα τζάλας παλάλ κο Ιησούς κα τθερέλας προβλήματα. (Ματθ. 16:​24) Ή μπορεί τι πακιάνας ότι σαρ Χριστιανοί κα τζουβντιόνας εκ μπουτ σουκάρ ζωή σο κα τθερέλας σάντε ευλογίες ντα να κα τθερέλας προβλήματα. Αλλά κο ντουνιάς αντιβές, κα αβέν σίγουρα προβλήματα. Μερικά πράγματα μπορεί τι αλλάνεν αμαρέ ζωγιάτε ντα ανταβά τι κερέλ-αμέν τι χασαράς για χάνικ αμαρί χαρά.​—Ψαλμ. 6:6· Εκκλ. 9:11.

5. Σαρ σικαβένα ο πιο μπουτ αμαρέ πφραλένταρ ντα πφενίνταρ καζόμ σίγουροι ισί ότι τθερένα ι αλήθεια;

⁵ Ο πιο μπουτ αμαρέ πφραλένταρ ντα πφενίνταρ σικαβένα καζόμ σίγουροι ισί ότι τθερένα ι αλήθεια. Σαρ; Λένγκι σιγουριά να χασάρντιβελα κάνα εκ πφραλ πληγώνελα-λεν ή κερέλα εκ αμαρτία. (Ψαλμ. 119:​165) Κάθε φαρ σο τθερένα εκ πρόβλημας, λένγκι πίστη αβέλα πιο ζουρανί, να χασαρέλα πι ζορ. (Ιακ. 1:​2-4) Σαρ κα τθερέν τουμέν-ντα ασακί ζουρανί πίστη;

6. Σαρ μπαριαρένας πουμαρί πίστη ο πρώτοι Χριστιανοί;

⁶ Ο πρώτοι Χριστιανοί μπαριαρένας πουμαρί πίστη σόσκε τζανένας ι Γραφή ντα οντουλά σο σικλιαρέλας ο Ιησούς Χριστός, δηλαδή ι «αλήθεια ι λατσσέ αμπερίνγκι». (Γαλ. 2:5) Ανταγιά αλήθεια ισί σαρέ ο πράγματα σο πακιάσα σαρ Χριστιανοί, εμ ο πράγματα σο τθερένα τι κερέν με τη θυσία ι Ιησούσκι ντα με την ανάσταση λέσκι. Ο απόστολος Παύλος ισινέ σίγουρος ότι ανταλά ισινέ μπαγιά. Σόσκε; Επειδή χρησιμοποιήνελας ι Γραφή για τι σικαβέλ «οντουλένταρ σο ισινέ γραμμέ ότι ο Χριστός έπρεπε τι τσσίντελ μπουτ ντα τι αναστίντιβελ κατά μουλέ». (Πράξ. 17:2, 3) Ο πρώτοι Χριστιανοί πακιάνας-λεν ανταλά ντα μανγκένας τι βοηθίνελ-λεν ο άγιος πνεύμας τι αγαβέν ο Λάφι ι Ντεβλέσκο. Σικαβένας πουμαρέ νεαυτόσκε ότι ανταλά σικλιαρέλα-λεν η Γραφή. (Πράξ. 17:​11, 12· Εβρ. 5:​14) Να μπαριόλας λένγκι πίστη σάντε οντουλέντζαρ σο νιωθίνενας ντα να υπηρετίνενας ι Ιεχωβάς σάντε επειδή νακχένας λατσσές πουμαρέ πφραλέντζαρ. Αλλά λένγκι πίστη μπαριόλας επειδή “σικλιόνας ατζέ πιο λατσσές ι Ντεβλέσκε”.​—Κολ. 1:9, 10.

7. Σαρ κα βοηθίνελ-αμέν αμαρί πίστη κι Γραφιάκε αλήθειες;

⁷ Ο αλήθειες ι Ντεβλέσκε Λαφίσκε να αλλάνενα. (Ψαλμ. 119:​160) Για παράδειγμας, να αλλάνενα άμα εκ πφραλ προσβαλίνελα-αμέν ή άμα κερέλα εκ μπαρί αμαρτία. Ντα να αλλάνενα κάνα τθεράσα προβλήματα. Οτθάρ, πρέπει τι τζανάς λατσσές οντουλά σο σικλιαρέλα η Γραφή ντα τι αβάς σίγουροι ότι ισί μπαγιά. Αμαρί μπαρί πίστη σο αβέλα οντουλένταρ σο σικλιαρέλα η  Γραφή, κα ατσσικιαρέλ-αμέν σταθερούς κο προβλήματα, σαρ η άγκυρα ατσσικιαρέλα σταθερός ο καράβι κι φουρτούνα. Σαρ μπορίνενα τι αβέν ατζέ πιο σίγουροι ότι τθερένα ι αλήθεια;

8. Σαρ αβιλό σίγουρος ο Τιμόθεος ότι τθερέλας ι αλήθεια σαρ βακερένα ο εδάφια 2 Τιμόθεο 3:​14, 15;

⁸ Ο Τιμόθεος ισινέ σίγουρος ότι τθερέλας ι αλήθεια. Σαρ τζανέλας-λες ανταβά; (Διαβάνεν 2 Τιμόθεο 3:​14, 15) Πρώτα λέσκι ντάι ντα λέσκι μπάμπα σικλιαρντέ-λες «ο άγια βιβλία». Αλλά σίγουρα βοβ-ντα ντινάς πι σαατίσταρ ντα πι ζοριάταρ για τι διαβάνελ-λεν. Αντικάς, “αβιλό σίγουρος” ότι τθερέλας ι αλήθεια. Σοράν, ο Τιμόθεος, λέσκι ντάι ντα λέσκι μπάμπα σικλιλέ ο Χριστιανικές αλήθειες. Ο Τιμόθεος σίγουρα μπεϊντιντάς μπουτ ι αγάπη σο σικαβένας ο μαθητές ι Ιησούσκε ντα μανγκέλας μπουτ τι νακχέλ σαάτι πι πφραλέντζαρ ντα πι πφενίντζαρ κι κχανγκιρί ντα τι βοηθίνελ-λεν. (Φιλιπ. 2:​19, 20) Όμως, λέσκι πίστη να βασίντιβελας κι αγάπη σο τθερέλας ι τζενένγκε, αλλά κο αλήθειες σο ανένας-λες πιο πασέ κο Ιεχωβά. Τουμέν-ντα πρέπει τι σκεφτίνεν λατσσές οντουλά σο σικλιλέν ι Ιεχωβάσκε κατά Γραφή.

9. Καλά τριν σημαντικά πράγματα πρέπει τι σικαβέν τουμαρέ νεαυτόσκε ότι ισί μπαγιά;

⁹ Κι αρχή, χρειαζίντιβελα τι σικαβέν τουμαρέ νεαυτόσκε ότι ισί μπαγιά τουλάχιστον τριν σημαντικά πράγματα. Πρώτον, πρέπει τι αβέν σίγουροι ότι ο Ιεχωβά Ντεβέλ κερντάς-λεν σαρέ. (Έξοδ. 3:​14, 15· Εβρ. 3:4· Αποκ. 4:​11) Δεύτερον, πρέπει τι σικαβέν τουμαρέ νεαυτόσκε ότι η Γραφή ισί ο λάφια σο βακερέλα ο Ντεβέλ ι τζενένγκε. (2 Τιμ. 3:​16, 17) Ντα τρίτον, πρέπει τι αβέν σίγουροι ότι ο Ιεχωβά τθερέλα εκ οργανωμέ ομάδα τζενένγκι σο ντένα-λες λατρεία τελάλ κατά Χριστός ντα ότι ανταγιά ομάδα ισί ο Μάρτυρες ι Ιεχωβάσκε. (Ησ. 43:​10-12· Ιωάν. 14:6· Πράξ. 15:​14) Να χρειαζίντιβελα τι τζανέν τα πάντα ι Γραφιάκε για τι σικαβέν τουμαρέ νεαυτόσκε ανταλά σημαντικές αλήθειες. Τουμαρό στόχος πρέπει τι αβέλ τι τσσουβέν “τουμαρί γκοντί” τι κχελέλ για τι αβέν ατζέ πιο σίγουροι ότι τθερένα ι αλήθεια.​—Ρωμ. 12:1.

10. Αφού κα σικλιάς ι αλήθεια, σο γιαβέρ πρέπει τι κεράς;

¹⁰ Αφού κα αβέν σίγουροι ανταλέ τρινέ σημαντικέ πραγματένγκε σο τθερένα τι κερέν τι Ντεβλέσαρ, ι Γραφιάσαρ ντα ι Ντεβλέσκε λαόσαρ, πρέπει τι μπορίνεν τι χρησιμοποιήνεν ι Γραφή για τι σικαβέν γιαβερένγκε ανταλά αλήθειες. Σόσκε; Επειδή σαρ Χριστιανοί, τθεράσα ι ευθύνη τι σικλιαράς ο αλήθειες σο τζανάσα οντουλέντε σο μανγκένα τι ασουνέν-αμέν. * (1 Τιμ. 4:​16) Καζόμ προσπαθίνασα τι βοηθίνας ι γιαβερέν τι αβέν σίγουροι οντουλένγκε σο σικλιαρέλα η Γραφή, αμέν-ντα αβάσα ατζέ πιο σίγουροι ανταλένγκε.

11. Σαρ σικλιαρέλας ο Παύλος ι τζενέν, ντα σαρ μπορίνασα τι μοιάζας λέστε;

¹¹ Κάνα ο απόστολος Παύλος σικλιαρέλας ι τζενέν, “κερέλας-λεν τι αβέν σίγουροι ι Ιησούσκε εμ κατά Νόμος ι Μωυσίσκο εμ κατά Προφήτες”. (Πράξ. 28:​23) Σαρ μπορίνασα τι μοιάζας κο Παύλος κάνα σικλιαράσα γιαβερέν ι αλήθεια; Να ερεσέλα σάντε τι βακεράς οντουλά σο σικλιαρέλα η Γραφή. Πρέπει τι βοηθίνας οντουλέν σο κεράσα μελέτη, καζόμ αβένα πιο πασέ κο Ιεχωβά, τι σκεφτίνεν λατσσές οντουλά σο σικλιόνα κατά Γραφή. Μανγκάσα τι πακιάν ι αλήθεια, όχι επειδή σεβάνενα-αμέν, αλλά επειδή σικαντέ πουμαρέ νεαυτόσκε ότι οντουλά σο σικλιόνα ισί η αλήθεια αμαρέ λατσσέ Ντεβλέσκε.

12, 13. Σαρ κα βοηθίνεν ο νταντά ντα ο νταγιά πουμαρέ τσσαβέν τι ατσσόν κι αλήθεια;

¹² Νταντάλεν ντα νταγιάλεν, σίγουρα μανγκένα τι ατσσόν τουμαρέ τσσαβέ κι αλήθεια. Μπορεί τι πακιάνα ότι, άμα κα κερέν λατσσέ αμαλέν κι κχανγκιρί, κα κερέν ζουρανί πουμαρί πίστη. Όμως, για τι αβέν σίγουροι τουμαρέ τσσαβέ ότι τθερένα ι αλήθεια, να ερεσέλα σάντε τι τθερέν λατσσέ αμαλέν. Πρέπει τι αρχίνεν τι αβέν βον αμαλά ι Ντεβλέσαρ ντα τι αβέν σίγουροι ότι οντουλά σο σικλιαρέλα η Γραφή ισί μπαγιά.

¹³ Για τι σικλιαρέν πουμαρέ τσσαβέν ι αλήθεια ι Ντεβλέσκε, ο νταντά ντα ο νταγιά πρέπει τι διαβάνεν λατσσές ι Γραφή. Πρέπει τι ντεν πουμαρέ σαατίσταρ για τι σκεφτίνεν λατσσές οντουλά σο σικλιόνα. Αντικάς, κα σικλιαρέν πουμαρέ τσσαβέν τι κερέν ο ίδιος. Πρέπει τι σικλιαρέν πουμαρέ τσσαβέν τι χρησιμοποιήνεν ο εργαλεία για τι κεράς μελέτη κατά Γραφή, σαρ κα σικλιαρένας εκχέ τζενές-ντα σο κερέλα μελέτη. Αντικάς, κα βοηθίνεν πουμαρέ τσσαβέν τι μπαριαρέν πουμαρί εκτίμηση ι Ιεχωβάσκε ντα ι “πιστέ ντα φρόνιμε δουλόσκε” σο αντρά-λέσταρ ντέλα-αμέν ο πνευματικός χαμπέ. (Ματθ. 24:​45-47) Νταντάλεν ντα νταγιάλεν, μα σικλιαρέν τουμαρέ τσσαβέν σάντε ο σημαντικές αλήθειες ι Γραφιάκε. Για τι βοηθίνεν-λεν τι μπαριαρέν πουμαρί  πίστη, σικλιαρέν-λεν «ο βαθιά πράγματα ι Ντεβλέσκε», ανάλογα λένγκε ηλικιάσαρ ντα ι πραγματέντζαρ σο μπορίνενα τι αγαβέν.​—1 Κορ. 2:10.

14. Σόσκε πρέπει τι διαβάνας ο προφητείες ι Γραφιάκε; (Ντικχέν ο πλαίσιος-ντα « Μπορίνενα τι Εξηγίνεν Ανταλά Προφητείες;»)

¹⁴ Ο προφητείες ι Γραφιάκε ισί μπουτ σημαντικός κομμάτι αντρέ κι Ντεβλέσκο Λάφι ντα βοηθίνενα-αμέν τι τθεράς ζουρανί πίστη κο Ιεχωβά. Καλά προφητείες μπαριαρντέ τουμαρί πίστη; Μπορεί τι βακερέν ο προφητείες ι “τελευταίε ντιβεσένγκε”. (2 Τιμ. 3:​1-5· Ματθ. 24:3, 7) Αλλά καλά γιαβερά προφητείες σο νικίστιλε μπαγιά κερένα-τουμέν τι αβέν πιο σίγουροι ότι τθερένα η αλήθεια; Για παράδειγμας, μπορίνενα τι εξηγίνεν σαρ αβιλέ-πες μπαγιά ντα σαρ αβένα-πες ακανά μπαγιά ο προφητείες σο ισί γραμμέ κο κεφάλαιος 2 ή κο κεφάλαιος 11 ι βιβλιόσκο Δανιήλ; * Άμα τουμαρί ζουρανί πίστη αβέλα κατά Γραφή, να κα χασαρέλ ποτές πι ζορ. Ντικχέν ο παράδειγμας αμαρέ πφραλένγκο σο γκιλέ λέντζαρ μπαρί κόντρα κι Γερμανία κο Δεύτερος Παγκόσμιος Πόλεμος. Παρόλο σο να αγαβένας ντιπ ι Γραφιάκε προφητείες ι τελευταίε ντιβεσένγκε, τθερένας ζουρανί πίστη κο Λάφι κι Ντεβλέσκο.

15-17. Σαρ βοηθιντάς η μελέτη ι Γραφιάκι ι πφραλέν σο τθερένας αζόμ μπαρό διωγμός κατά Ναζί;

¹⁵ Κάνα ο Ναζί κερένας κουμάντος κι Γερμανία, χιλιάδες πφραλά ντα πφενιά μπουτσσάντιλε κο στρατόπεδα συγκέντρωσης. Εμ ο Χίτλερ εμ ο Χάινριχ Χίμλερ, αρχηγός κο Ες-Ες, μισίνενας ι Ιεχωβάσκε Μαρτυρέν. Σαρ βακερντάς εκ πφεν, ο Χίμλερ βακερντάς μερικέ πφενίνγκε σο ισινέ κο στρατόπεδος συγκέντρωσης: «Τουμαρό Ιεχωβά μπορεί τι αβέλ Βασιλιάς κο ουρανός, αλλά ατθέ κι πφουβ κεράσα κουμάντος αμέν! Κα σικαβάς τουμένγκε κον κα ατσσόλ πιο μπουτ, τουμέν ή αμέν!» Σο βοηθιντάς ι Ιεχωβάσκε λαός τι ατσσόλ πιστός;

¹⁶ Οντουλά Σπουδαστές της Γραφής τζανένας ότι η Βασιλεία ι Ντεβλέσκι αρχισάλιας τι κυβερνίνελ κο 1914. Να κερντάς λένγκε εντύπωση σο τθερένας αζόμ μπαρό  διωγμός. Όμως, ο λαός ι Ιεχωβάσκο ισινέ σίγουρος ότι καέκ τζενέσκι κυβέρνηση να κα μπορίνελας τι τσσιναβέλ ι Ντεβλές τι κερέλ οντουβά σο τθερέλα πι γκοντιάτε. Ο Χίτλερ να κα μπορίνελας τι καταστραφίνελ ι αληθινή λατρεία ούτε τι τθερέλ εκ κυβέρνηση σο κα αβέλας πιο ζουρανί κατά Βασιλεία ι Ντεβλέσκι. Αμαρέ πφραλά ισινέ σίγουροι ότι, σο-ντα τι αβέλας-πες, ο Χίτλερ κα τσσιναβέλας τι κυβερνίνελ.

¹⁷ Οντουβά σο πακιάνας ο πφραλά ντα ο πφενιά ισινέ μπαγιά. Αντρέ χάνικ μπρεσέντε, η κυβέρνηση σο τθερένας ο Ναζί πελί, ντα ο Χάινριχ Χίμλερ, ο τζενό σο βακερντάς «ατθέ κι πφουβ κεράσα κουμάντος αμέν», προσπαθιντάς τι νασέλ για τι σώνελ-πες. Αζομάν, αρακχλάς ι πφραλές Λούμπκε, σο ισινέ φυλακή, ντα αγαντάς-λες. Ντιπ στεναχωριμέ, ο Χίμλερ πουτσλάς ι πφραλές Λούμπκε: «Σπουδαστή της Γραφής, σο αβέλα-πες ακανά;» Ο πφραλ Λούμπκε βακερντάς κο Χίμλερ ότι ο Μάρτυρες ι Ιεχωβάσκε ισινέ σίγουροι ότι η κυβέρνηση σο τθερένας ο Ναζί να κα τθερέλας επιτυχία ντα ότι βον κα ελευθερώντιβενας. Ο Χίμλερ, ο τζενό σο τθερέλας τι βακερέλ αζόμ μπουτ πράγματα ι Ιεχωβάσκε Μαρτυρένγκε, ανταγιά φαρ να βακερντάς τίποτα. Χάνικ πιο σοράν, μουνταρντάς-πες. Σο σικλιάσα; Άμα διαβάνασα ι Γραφή, εμ λάκε προφητείες, κα τθεράς μπουτ ζουρανί πίστη κο Ντεβέλ ντα κα ατσσάς πιστοί κάνα κα αβέν προβλήματα.​—2 Πέτρ. 1:​19-21.

18. Σαρ σικαβένα ο εδάφια Ιωάννης 6:​67, 68, σόσκε χρειαζίντιβασα τι “σικλιάς ντα τι αγαβάς πιο μπουτ πράγματα” σαρ γραφιντάς ο Παύλος;

¹⁸ Σαρέ πρέπει τι μανγκάς ι γιαβερέν για τι σικαβάς ότι ισινάμ αληθινοί Χριστιανοί. Αλλά χρειαζίντιβελα επίσης τι “σικλιάς ντα τι αγαβάς πιο μπουτ πράγματα”. (Φιλιπ. 1:9) Άμα να κα κεράς-λες ανταβά, μπορεί τι επηρεάντιβας κατά «μπαρμπάλ ι σικλιαριμάσκι σο αβέλα κατά πφιρνιπέ ι τζενένγκο», σο αντρέ ανταλέντε ισί ο αποστάτες-ντα. (Εφεσ. 4:​14) Κάνα μπουτ μαθητές ι Ιησούσκε τσσιναντέ τι τζαν παλά-λέστε, ο απόστολος Πέτρος βακερντάς με σιγουριά ότι ο Ιησούς τθερέλας «λάφια σο ντένα αιώνια ζωή». (Διαβάνεν Ιωάννης 6:​67, 68) Παρόλο σο ο Πέτρος αζομάν να αγαβέλας σαρέ ο πράγματα σο τθερένας τι κερέν οντουλέ λαφίντζαρ, ατσσιλό αφοσιωμέ σόσκε αγαντάας ι αλήθεια ι Χριστόσκε. Τουμέν-ντα μπορίνενα τι αβέν σίγουροι οντουλένγκε σο σικλιαρέλα η Γραφή. Άμα κερένα-λες ανταβά, τουμαρί πίστη κα ατσσόλ ζουρανί σο-ντα τι αβέλ-πες ντα κα βοηθίνεν γιαβερέν-ντα τι μπαριαρέν πουμαρί πίστη.​—2 Ιωάν. 1, 2.