1. Σο μανγκέλα ο Ιεχωβά αντιβές;

 ΑΝΤΙΒΕΣ, ο Ντεβέλ μανγκέλα τι βακέρντιβεν ο λατσσέ αμπέρια ι Βασιλειάκε σαρί κι πφουβ. (Μάρκ. 13:​10· 1 Τιμ. 2:3, 4) Ανταβά έργος ισί ι Ιεχωβάσκο, ντα ισί αζόμ σημαντικός, σο τσσουντάς πι αγαπημέ Τσσαβές τι σικαβέλ αμένγκε σαρ τι κεράς-λες. Ισινάμ σίγουροι ότι, επειδή ο Ιησούς σικαβέλα αμένγκε μπουτ λατσσές σο τι κεράς, ο έργος κα αβέλ-πες αντικάς σαρ μανγκέλα ο Ιεχωβά ντα καζόμ μανγκέλα πριν τι αβέλ ο τέλος.​—Ματθ. 24:14.

2. Σο κα ντικχάς ανταλέ μαθημάστε;

² Ανταλέ μαθημάστε, κα ντικχάς σαρ χρησιμοποιήνελα ο Ιησούς ι “πιστέ ντα φρόνιμε δουλός” για τι ντελ πνευματικός χαμπέ ντα τι οργανώνελ οντουλέν σο τζάνα παλά-λέστε ι πο μπαρέ εργόσκε σο αβιλό-πες ποτές. (Ματθ. 24:​45) Ντα κα ντικχάς σο μπορίνελα τι κερέλ ο κάθε εκ αμένταρ για τι ασουνέλ ι Ιησούς ντα ι πιστέ δουλός.

3. Καγιά εξουσία ντιντιλί κο Ιησούς;

³ Ο Ιησούς σικαβέλα σαρ τι αβέλ-πες ο έργος. Σαρ ισινάμ σίγουροι ανταλέσκε; Χάνικ πριν τι λιντιόλ κο ουρανός, ο Ιησούς ντικχλάς μερικέ πιστέ μαθητέν εκχέ βεσέστε κι Γαλιλαία. Βακερντάς λένγκε: «Σαρί η εξουσία κο ουρανός ντα κι πφουβ ντιντιλί μάντε». Ντικχέν σο βακερντάς λένγκε σοράν ανταλέσταρ: «Τζαν ντα κερέν μαθητέν σαρέ κατά τθεμά». (Ματθ. 28:​18, 19) Άρα, αντρέ κο πράγματα σο ντιντιλέ-λες ισινέ η εξουσία τι σικαβέλ σαρ τι αβέλ-πες ο έργος.

4. Σόσκε ισινάμ σίγουροι ότι ο Ιησούς ατζέκ ατζέκ σικαβέλα σαρ τι αβέλ-πες ο έργος;

 ⁴ Ο Ιησούς βακερντάς ότι λέσκε μαθητές κα βακερένας ντα κα σικλιαρένας ο λατσσέ αμπέρια “σαρέ κο τθεμά” ντα ότι βοβ κα αβέλας λέντζαρ «σαρέ ο ντιβεσά μέχρι κο τέλος ανταλέ ντουνιάσκο». (Ματθ. 28:​20) Οντουλέ λαφίνταρ, αγαβάσα ότι ο έργος κα συνεχίντιβελας μέχρι αμαρέ ντιβεσέντε ντα ο Ιησούς κα σικαβέλας σαρ τι αβέλ-πες.

5. Σαρ βοηθίνασα τι νικιόλ μπαγιά ο εδάφιος Ψαλμός 110:3;

⁵ Ο Ιησούς να νταρέλας ότι να κα αβένας μπερεκέτι τζενέ τι κερέν ο έργος κο τελευταία ντιβεσά ανταλέ ντουνιάσκε. Τζανέλας ότι κα νικιόνας μπαγιά ακαλά λάφια ι ψαλμωδόσκε: «Το λαός κα ντελ πο νεαυτός αντράλ πι γκίσταρ κο ντιβές σο κα οδηγίνες το στρατός κο τζένγκι». (Ψαλμ. 110:3) Άμα βακεράσα ο λατσσέ αμπέρια, ασουνάσα ι Ιησούς ντα ι πιστέ δουλός ντα βοηθίνασα τι νικιόλ μπαγιά ανταγιά προφητεία. Ο έργος τζάλα ανγκλάλ, αλλά ισί δυσκολίες-ντα.

6. Καγιά ισί εκ δυσκολία σο τθερένα οντουλά σο βακερένα ι Βασιλειάκε αμπέρια αντιβές;

⁶ Εκ δυσκολία σο τθερένα οντουλά σο βακερένα ι Βασιλειάκε αμπέρια ισί η κόντρα σο τζάνα λέντζαρ. Αποστάτες, παπάζια ντα πολιτικοί βακερντέ ψέματα αμαρέ εργόσκε μπουτέ τζενέντε. Άμα αμαρέ τζενέ, οντουλά σο τζανένα-αμέν ή κερένα αμέντζαρ μπουτί χουχάντιλε ανταλέ ψεματένταρ, μπέκιμ ζορισκιαρένα-αμέν τι τσσιναβάς τι υπηρετίνας ι Ιεχωβάς ντα τι τσσιναβάς τι βακεράς ο λατσσέ αμπέρια. Μερικέ τθεμέντε, αμαρέ ντουσμάνια νταραβένα, ασταρένα ή ατζέ-ντα τσσουβένα κι φυλακή αμαρέ πφραλέν ντα πφενίν. Να σαστίνασα ανταλέντζαρ σο κερένα. Ο Ιησούς βακερντάας: «Σαρό ο ντουνιάς κα μισίνελ-τουμέν ιτιρί μι ναβέσταρ». (Ματθ. 24:9) Σάντε ότι μισίνενα-αμέν αζόμ μπουτ σικαβέλα ότι τθεράσα ι ευλογία ι Ιεχωβάσκι. (Ματθ. 5:​11, 12) Ο Μπενγκ ισί παλάλ κατά κόντρα σο τζάνα αμέντζαρ. Αλλά ναστί τσσουβέλα-λεν ι Ιησούσαρ! Ι Ιησούσκε βοηθειάσαρ, ο λατσσέ αμπέρια ερεσένα τζενέντε σαρέ κατά τθεμά. Ντικχέν σαρ τζανάσα-λες ανταβά.

7. Καλά πράγματα σικαβένα αμένγκε ότι νικιόνα μπαγιά ο εδάφια Αποκάλυψη 14:6, 7;

⁷ Εκ γιαβέρ δυσκολία σο τθεράσα κάνα βακεράσα ι Βασιλειάκε αμπέρια ισί ο μπουτ τσσιμπά. Κι αποκάλυψη σο ντινάς κο απόστολος Ιωάννης, ο Ιησούς βακερντάας ότι αμαρέ ντιβεσέντε ο λατσσέ αμπέρια κα νακχαβένας ανταγιά δυσκολία. (Διαβάνεν Αποκάλυψη 14:6, 7) Σαρ αβέλα-πες ανταβά; Ντάσα καζόμ πο μπουτ τζενέντε αβέλα-πες ι ευκαιρία τι ασουνέν ι Βασιλειάκε αμπέρια. Αντιβές, τζενέ σαρό κατά ντουνιάς μπορίνενα τι διαβάνεν θέματα κατά Γραφή αμαρέ ιστοτοπόστε, κο jw.org, πο μπουτ από 1.000 τσσιμπέντε! Ο Κυβερνών Σώμας βακερντάς τι νικιόλ ο βιβλίος Μπουτ Σουκάρ Ζωή για Πάντα!, σο ισί ο βασικός βιβλίος για τι αβέν-πες ο μελέτες, πο μπουτ από 700 τσσιμπέντε! Ντα ο πνευματικός χαμπέ μπορίνενα τι τθερέν-λες εμ ο κασουκέ αντράλ κατά βίντεα εμ ο κορορέ αντράλ κατά εκδόσεις κι Μπράιγ. Ντικχάσα τι νικιόν μπαγιά ο προφητείες ι Γραφιάκε. Τζενέ «σαρέ κατά τσσιμπά ι τθεμένγκε» σικλιόνα τι κερέν λάφι ι «πάκι τσσιπ» ι αληθειάκι σο ισί κι Γραφή. (Ζαχ. 8:​23· Σοφ. 3:9) Σαρέ ανταλά αβένα-πες σόσκε ο Ιησούς Χριστός σικαβέλα μπουτ λατσσές σαρ τι αβέν-πες.

8. Σο αβιλό-πες μέχρι ακανά χάρη κο έργος σο κεράσα;

⁸ Αντιβές, πο μπουτ από 8.000.000 τζενέ 240 τθεμέντε ισί αντρέ κι οργάνωση κι Ιεχωβάσκι, ντα κάθε μπρες μπολντιόνα μπουτ χιλιάδες! Όμως, ατζέ πο σημαντικός κατά νούμερα ισί ο πνευματικές ιδιότητες, ο «νεβό  χαρακτήρας», σο τθερένα ακανά ανταλά νεβέ μαθητές. (Κολ. 3:​8-10) Μπουτ λένταρ ανγκλέ κερένας λουμνικανέ πράγματα, χάνας-πες ι γιαβερέντζαρ, ισινέ ρατσιστές ντα ισαρένας πουμαρό τθεμ, αλλά ακανά τσσιναντέ τι κερέν-λεν ανταλά. Η προφητεία κο εδάφιος Ησαΐας 2:4 νικιόλα μπαγιά: “Να σικλιόνα τι κερέν τζένγκι”. Καζόμ μαράσα-αμέν τι ιριάς ο νεβό χαρακτήρας, βοηθίνασα τι ταρτίντιβεν τζενέ κι οργάνωση κι Ντεβλέσκι ντα σικαβάσα ότι τζάσα παλάλ αμαρέ Αρχηγόστε, κο Χριστός Ιησούς. (Ιωάν. 13:​35· 1 Πέτρ. 2:​12) Σόσκε αβένα-πες σαρέ ανταλά; Σόσκε ο Ιησούς ντέλα-αμέν ι βοήθεια σο χρειαζίντιβασα.

9. Σο βακερντάς ο Ιησούς ότι κα αβέλας-πες κο βακίτι κι τελευταίε ντιβεσένγκο σαρ ντικχάσα κο εδάφια Ματθαίος 24:​45-47;

⁹ Διαβάνεν Ματθαίος 24:​45-47. Ο Ιησούς βακερντάας ότι κο βακίτι κι τελευταίε ντιβεσένγκο κα τραμπίνελας εκχέ “πιστέ ντα φρόνιμε δουλός” για τι ντελ πνευματικός χαμπέ. Οτθάρ, κα μπεκλεντίναας τι κερέλ μπουτ μπουτί ανταβά δούλος αμαρέ ντιβεσέντε. Ντα ντικχάσα τι αβέλ-πες ανταβά. Αμαρό αρχηγός χρησιμοποιήνελα χάνικ χρισμέ τζενέν για τι ντελ, κο λαός κι Ντεβλέσκο ντα κο τζενέ σο σικλιόνα ι αλήθεια, πνευματικός «χαμπέ αζομάν σο πρέπει τι ντελ-λες». Ανταλά μουρσά να κερένα κουμάντος ι πίστη ι γιαβερένγκι. (2 Κορ. 1:​24) Οκιά μπάνταρ, αγαβένα ότι ο Ιησούς Χριστός ισί οντουβά σο “οδηγίνελα ντα ντέλα εντολές” πι λαόστε.​—Ησ. 55:4.

10. Καβά βιβλίος οντουλένταρ σο ντικχίντιβενα κο φωτογραφίες κερντάς-τουμέν τι πφιρέν κο ντρομ σο γκερέλα κι ζωή για πάντα;

¹⁰ Κατά 1919, ο πιστός δούλος νικαντάς μπουτ βιβλία για τι βοηθίνελ ι νεβέ τζενέν τι σικλιόν ι αλήθεια. Κο 1921, ο δούλος νικαντάς ο βιβλίος Η Κιθάρα του Θεού για τι σικλιαρέλ ι νεβέ τζενέν ο βασικά πράγματα ι Γραφιάκε. Καζόμ νακχέλας ο βακίτι, νικιόνας  γιαβερά-ντα βιβλία. Καβά βιβλίος βοηθιντάς-τουμέν τι σικλιόν ντα τι μανγκέν αμαρέ Νταντές, ι Ιεχωβάς; Ο «Έστω ο Θεός Αληθής», ο Η Αλήθεια που Οδηγεί στην Αιώνιο Ζωή, ο Μπορείτε να Ζείτε για Πάντα στον Παράδεισο στη Γη, ο Γνώση που Οδηγεί στην Αιώνια Ζωή, ο Τι Διδάσκει Πράγματι η Αγία Γραφή;, ο Σο Μπορίνελα τι Σικλιαρέλ-αμέν η Αγία Γραφή; ή ο Μπουτ Σουκάρ Ζωή για Πάντα!, σο ισί αμαρό πο νεβό βιβλίος; Ο κάθε εκ ανταλέ βιβλιόνταρ κερντιλό για τι ντελ-αμέν ντιπ οντουβά σο χρειαζίντιβαας κο βακίτι σο νικίστιλο.

11. Σόσκε ισί μπουτ σημαντικός τι λας σαρέ πνευματικός χαμπέ;

¹¹ Ο πνευματικός χαμπέ να χρειαζίντιβενα-λες σάντε ο τζενέ σο σικλιόνα ακανά ι Ιεχωβάσκε. Σαρέ χρειαζίντιβασα-λες. Ο απόστολος Παύλος βακερντάς: «Ο χαμπέ ισί τζενένγκε σο ισί ζουρανέ κι πίστη». Ο Παύλος σοράν βακερντάς ότι κάνα κεράσα οντουλά σο σικλιάσα αντράλ ανταλέ πνευματικέ χαμπέσταρ κα “αγαβάς σο ισί σωστός ντα σο ισί λάθος”. (Εβρ. 5:​14) Μπορεί τι ισί μπουτ δύσκολος τι ντας καν κο κανόνες κι Ιεχωβάσκε ακανά, σόσκε ο ντουνιάς ισί πφερντό τζενέντζαρ σο κερένα μπίλατζανε πράγματα. Αλλά ο Ιησούς ντέλα-αμέν ι ζορ σο χρειαζίντιβασα αντράλ κατά μπουτ σουκάρ πνευματικός χαμπέ. Ανταβά χαμπέ ισί αντράλ κατά Ντεβλέσκο Λάφι, κατά Αγία Γραφή. Ο πιστός δούλος νικαβέλα ντα ντέλα ανταβά χαμπέ αντικάς σαρ σικαβέλα λέσκε ο Ιησούς.

12. Σαρ ντάσα δόξα κι Ντεβλέσκο ναβ σαρ ο Ιησούς;

¹² Σαρ ο Ιησούς, αντικάς αμέν-ντα ντάσα κι Ντεβλέσκο ναβ ι δόξα σο αξίνελα λέσκε. (Ιωάν. 17:6, 26) Για παράδειγμας, κατά 1931, τθεράσα ο Γραφικός ναβ Μάρτυρες ι Ιεχωβάσκε, ντα αντικάς σικαβάσα ότι μανγκάσα τι τζανέν-αμέν σαρέ ο τζενέ αμαρέ Νταντέσκε ναβέσαρ. (Ησ. 43:​10-12) Ντα κατά Οκτώβριος οντουλέ μπρεσέσκο, ι Ντεβλέσκο ναβ σικάντιβελα κι ανγκλαϊνί σελίδα  ανταλέ περιοδικόσκι. Επίσης, η Μετάφραση Νεβέ Ντουνιάσκι τσσουντάς πάλι ι Ντεβλέσκο ναβ οτθέ σο πρέπει τι αβέλ λέσκε Λαφίστε. Σο μπαρί διαφορά κατά κχανγκιριά ι ντουνιάσκε σο νικαντέ ο ναβ ι Ιεχωβάσκο μπουτέ Γραφιένταρ σο μεταφραντέ!

13. Σο κερέλα-τουμέν τι πακιάν ότι ο Ιησούς χρησιμοποιήνελα ι “πιστέ ντα φρόνιμε δουλός” αντιβές; (Ιωάννης 6:68)

¹³ Αντράλ κατά «πιστός ντα φρόνιμος δούλος», ο Ιησούς κερντάς εκ σημαντική οργάνωση κι πφουβ για τι ντιντιόλ πάκι λατρεία. Σαρ νιωθίνενα τουμέν ανταλέ οργανωσιάκε; Μπέκιμ αβένα τουμαρέ γκοντιάτε ο λάφια ι απόστολε Πετρόσκε, σο βακερντάς κο Ιησούς: «Κάστε τι τζας; Τούι τθερέσα λάφια σο ντένα αιώνια ζωή». (Ιωάν. 6:​68) Κάι κα αβέλας ο κάθε εκ αμένταρ αντιβές άμα να ισινάμας κι οργάνωση κι Ιεχωβάσκι; Αντράλ ανταλέ οργανωσιάταρ, ο Χριστός κανονίνελα τι τθεράς λατσσό πνευματικός χαμπέ. Ντα σικλιαρέλα-αμέν τι κεράς αμαρό έργος λατσσές. Επίσης, βοηθίνελα-αμέν τι ιριάς «ο νεβό χαρακτήρας» για τι κεράς ο γκι ι Ιεχωβάσκο.​—Εφεσ. 4:24.

14. Σο λατσσιπέ ντικχλέν κο νασφαλιπέ κι Κορωνοϊόσκο επειδή ισινέν αντρέ κι Ιεχωβάσκι οργάνωση;

¹⁴ Ο Ιησούς ντέλα γκοντιαβέρ οδηγίες δύσκολε ντιβεσέντε. Ο λατσσίματα ανταλέσταρ ντικχίντιλε μπουτ λατσσές κάνα αρχισάλο ο νασφαλιπέ ι Κορωνοϊόσκο. Ενώ μπουτ τζενέ κο ντουνιάς να τζανένας σο τι κερέν, ο Ιησούς κανονιντάς τι λας ξεκάθαρες οδηγίες για τι ατσσάς αρακχαντέ. Βακέρντιλο αμένγκε τι ιριάς μάσκα κάνα νικιάσα αβρί ντα μα τι αβάς μπουτ πασέ κο γιαβερά. Κο πρεσβύτεροι βακέρντιβελας μα τι τσσιναβέν τι κερέν λάφι σαριλέντζαρ κι κχανγκιρί ντα τι τζανέν σο  χρειαζίντιβενα ο πφραλά για τι ατσσόν αρακχαντέ ντα πασέ κο Ιεχωβά. (Ησ. 32:1, 2) Λάας πο μπουτ οδηγίες ντα ζορ αντράλ κατά αμπέρια σο νικιόνα κάθε μάσεκ κατά Κυβερνών Σώμας.

15. Σο βακέρντιλο αμένγκε τι κεράς ι συναθροισιέντζαρ ντα ι εργόσαρ κο νασφαλιπέ κι Κορωνοϊόσκο, ντα σο αβιλό-πες;

¹⁵ Κο νασφαλιπέ κι Κορωνοϊόσκο, βακέρντιλο αμένγκε σαρ τι κεράς ο συναθροίσεις ντα ο έργος. Μπουτ σουγκό, αρχισάλαμ τι κεράς ο συναθροίσεις ντα ο συνελεύσεις αντράλ κατά Ίντερνετ. Ντα αρχισάλαμ τι κεράς ο πο μπουτ έργος αντράλ κατά επιστολές ντα κατά τηλέφωνος. Ο Ιεχωβά ευλογιντάς αμαρέ προσπάθειες. Μπερεκέτι γραφεία τμήματος βακερντέ ότι ο πφραλά ντα ο πφενιά ισί ατζέ πο μπουτ ακανά. Ντα μπουτ πφραλά ντα πφενιά τθερένας μπουτ σουκάρ εμπειρίες αντρέ ανταλέ βακιτίστε.​—Ντικχέν ο πλαίσιος « Ο Ιεχωβά Ευλογίνελα Αμαρό Έργος».

16. Καλέ πραγμάσκε μπορίνασα τι αβάς σίγουροι;

¹⁶ Μερικοί μπέκιμ πακιάνας ότι να χρειαζίντιβελας τι αρακχαβάς-αμέν αζόμ μπουτ κατά Κορωνοϊός καζόμ βακερέλας η οργάνωση. Αλλά παλάλ γιαβερέστε αγαντίντιλο ότι ο οδηγίες σο λιντάμ ισινέ μπουτ γκοντιαβέρ. (Ματθ. 11:​19) Ντα καζόμ σκεφτίνασα λατσσές ότι ο Ιησούς οδηγίνελα πι λαός μανγκιμάσαρ, ισινάμ σίγουροι ότι, σο-ντα τι αβέλ-πες ανγκλ’ αμέντε, ο Ιεχωβά ντα λέσκο αγαπημέ Τσσαβό κα αβέν αμέντζαρ.​—Διαβάνεν Εβραίους 13:5, 6.

17. Σαρ νιωθίνενα σο ισί ο Ιησούς τουμαρό Αρχηγός;

¹⁷ Σο σουκάρ ισί σο ο Ιησούς ισί αμαρό Αρχηγός! Ισινάμ αντρέ εκχέ οργανωσιάτε σο νανέ ιλιαντί κουλτουρέντε, τθεμέντε ή τσσιμπέντε. Τθεράσα λατσσό πνευματικός χαμπέ ντα λάσα ο σικλιαριπέ σο χρειαζίντιβασα για τι κεράς ο έργος. Ο κάθε εκ αμένταρ σικλιόλα τι ιρίλ ο νεβό χαρακτήρας ντα τι μανγκέλ ι γιαβερέν. Τθεράσα μπουτ λόγους τι ισαράς-αμέν αμαρέ αρχηγόσκε, ι Ιησούσκε!