1, 2. Σόσκε βακεράσα ότι εκ Χριστιανός κα μπορίνελας τι μοιάζελ εκχέ βουτσσέ κτιριόσαρ; (1 Κορινθίους 15:58)

 ΚΟ 1978, εκ μπουτ βουτσσό κτίριος χτίντιλο κο Τόκιος, κι Ιαπωνία. Ο τζενέ σκεφτίνενας σαρ κα νταϊντίνελας ανταβά κτίριος ο σεισμούς σο αβένας-πες συνέχεια κι πόλη οντιά. Καβά ισινέ ο μυστικός; Ο μηχανικοί κερντέ ανταβά βουτσσό κτίριος σταθερός για τι νταϊντίνελ ο σεισμοί. Επίσης κερντέ ανταβά βουτσσό κτίριος εκχέ τροπόσαρ σο κα μπορίνελας τι κουνιάντιβελ χάνικ χωρίς τι περέλ. Ο Χριστιανοί μοιάζενα ανταλέ βουτσσέ κτιριόσαρ. Σόσκε βακεράσα-λες ανταβά;

² Ο Χριστιανός πρέπει τι τθερέλ εκ ισορροπία​—δηλαδή εμ τι αβέλ σταθερός εμ τι κουνιάντιβελ, σαρ τι βακεράας, κατά απόψεις σο τθερέλα. Πρέπει επίσης τι αβέλ ζουρανό ντα σταθερός κο πράγματα σο τθερένα τι κερέν με το νόμοι ντα με το κανόνες ι Ιεχωβάσκε. (Διαβάνεν 1 Κορινθίους 15:​58) Ισί “έτοιμος τι ντελ καν” ντα να τσσίντελα-πες παλάλ. Οκιά μπάνταρ, χρειαζίντιβελα τι αβέλ “λογικός”, ή γιαβέρσοϊ τι κουνιάντιβελ, σαρ τι βακεράας, κατά απόψεις σο τθερέλα άμα ισί λέσκε βαστέστε ή άμα ισί ανάγκη τι αβέλ-πες ανταβά. (Ιακ. 3:​17) Ο Χριστιανός σο σικλιλό τι αβέλ ισορροπημέ να κα αβέλ ούτε μπουτ αυστηρός ούτε μπουτ κοβλό. Ανταλέ μαθημάστε, κα ντικχάς σαρ μπορίνασα τι αβάς σταθεροί. Κα ντικχάς επίσης παντς τρόποι σο προσπαθίνελα ο Μπενγκ τι κερέλ-αμέν μα τι αβάς σταθεροί, ντα κα σικλιάς σαρ μπορίνασα τι τζας κόντρα κο προσπάθειες σο κερέλα.

3. Καλά νόμοι ι Ιεχωβάσκε αρακχάσα κο εδάφια Πράξεις 15:​28, 29;

³ Ο Ιεχωβά ισί οντουβά σο τσσουβέλα νόμους ντα κερέλα πάντα πο νόμοι τι αβέν ξεκάθαροι για τι μπορίνελ λέσκο λαός τι αγαβέλ-λεν. (Ησ. 33:​22) Για παράδειγμας, ο κυβερνών σώμας κο πρώτος αιώνας βακερντάς τριν τρόπους σο πρέπει ο Χριστιανοί τι ατσσόν σταθεροί: (1) τι νασέν κατά ειδωλολατρία ντα τι ντεν λατρεία σάντε ι Ιεχωβάς, (2) τι σεβάνεν ότι ο ρατ ισί  ιερός ντα (3) τι κερέν ο πάκι κανόνες ι Γραφιάκε. (Διαβάνεν Πράξεις 15:​28, 29) Σαρ μπορίνενα ο Χριστιανοί αντιβές τι ατσσόν σταθεροί ανταλέ συγκεκριμέ τρινέ τροπόντζαρ;

4. Σαρ ατσσάσα αφοσιωμέ σάντε κο Ιεχωβά; (Αποκάλυψη 4:11)

⁴ Νασάσα κατά ειδωλολατρία ντα ντάσα λατρεία σάντε ι Ιεχωβάς. Βοβ βακερντάς ι Ισραηλιτένγκε τι αβέν αφοσιωμέ σάντε λέστε. (Δευτ. 5:​6-10) Κάνα ο Μπενγκ τσσουντάς ι Ιησούς κο πειρασμός, ο Ιησούς σικαντάς ξεκάθαρα ότι πρέπει τι ντας λατρεία σάντε ι Ιεχωβάς. (Ματθ. 4:​8-10) Οτθάρ, να χρησιμοποιήνασα είδωλα κι λατρεία σο ντάσα. Επίσης, να ντάσα λατρεία τζενέντε​—κο αρχηγοί κι θρησκειάκε, κο πολιτικοί ή κο διάσημοι αθλητές, ηθοποιούς ή μουσικούς—​σαρ τι αβένας ντεβέλ. Τζάσα κατά μπάντα ι Ιεχωβάσκι ντα ντάσα λατρεία σάντε οντουλές σο “κερντάς-λεν σαρέ”.​—Διαβάνεν Αποκάλυψη 4:11.

5. Σόσκε ντάσα καν κο νόμος κι Ιεχωβάσκο σο βακερέλα ότι η ζωή ντα ο ρατ ισί ιερά;

⁵ Κεράσα ο νόμος ι Ιεχωβάσκο σο βακερέλα ότι η ζωή ντα ο ρατ ισί ιερά. Σόσκε; Επειδή ο Ιεχωβά βακερέλα ότι ο ρατ μανγκέλα τι σικαβέλ ι ζωή, εκ πολύτιμος δώρος λέσταρ. (Λευιτ. 17:​14) Κάνα ο Ιεχωβά μουκχλάς ι τζενέν τι χαν μας κατά ζώα, βακερντάς λένγκε μα τι χαν ο ρατ. (Γέν. 9:4) Βακερντάς πάλι ανταγιά εντολή κάνα ντινάς ο Μωσαϊκός Νόμος κο Ισραηλίτες. (Λευιτ. 17:​10) Επίσης, κερντάς ι πφραλέν κατά κυβερνών σώμας κο πρώτος αιώνας τι ντεν σαρέ κο Χριστιανοί ι εντολή «τι ατσσόν ντουρ . . . ρατέσταρ». (Πράξ. 15:​28, 29) Ντάσα καν κι εντολή ανταγιά κάνα αποφασίνασα καλά θεραπείες κατά γιατροί κα δεχτίνας. b

6. Καλά προσπάθειες κεράσα για τι τζουβντιάς αντικάς σαρ βακερένα ο πάκι κανόνες ι Ιεχωβάσκε;

⁶ Κεράσα ακριβώς ο πάκι κανόνες ι Ιεχωβάσκε. (Εβρ. 13:4) Ο απόστολος Παύλος βακερέλα αμένγκε τι “μουνταράς” ο μπέτι πράγματα σο ισί αμαρέ σωμάστε​—δηλαδή τι λας αυστηρά μέτρα για τι νασκιαράς ο μπέτι πράγματα σο μανγκέλα αμαρό σώμας. Να ντικχάσα ή να κεράσα τίποτα σο κα μπορίνελας τι γκερέλ-αμέν κο λουμνιπέ. (Κολ. 3:5· Ιώβ 31:1) Κάνα νακχάσα εκ πειρασμός, να μουκχάσα αμαρό νεαυτός τι σκεφτίνελ ή τι κερέλ κάτι σο κα χαλαβέλας αμαρί φιλία ι Ντεβλέσαρ.

7. Σο πρέπει τι αβάς αποφασισμέ τι κεράς, ντα σόσκε;

⁷ Ο Ιεχωβά μπεκλεντίνελα τι “ντας καν αντράλ αμαρέ γκίσταρ”. (Ρωμ. 6:​17) Ο νόμοι ι Ιεχωβάσκε ισί πάντα αμαρέ λατσσιμάσκε, ντα να αβέλα-πες τι τραμπίνας καλέ νομόντε κα ντας καν. (Ησ. 48:​17, 18· 1 Κορ. 6:9, 10) Μαράσα-αμέν τι κεράς ο γκι ι Ιεχωβάσκο ντα τι σικαβάς αμέν-ντα ι ίδια εκτίμηση σο σικαντάς ο ψαλμωδός κάνα βακερντάς: «Μανγκάβα σαρέ μι γκίσαρ τι νταβ καν τι εντολέντε πάντα, μέχρι κο τέλος». (Ψαλμ. 119:​112) Όμως, ο Μπενγκ προσπαθίνελα τι κερέλ-αμέν μα τι αβάς αποφασισμέ. Καλά τρόποι χρησιμοποιήνελα;

8. Σαρ χρησιμοποιήνελα ο Μπενγκ ο διωγμός για τι κερέλ-αμέν μα τι αβάς αποφασισμέ;

⁸ Διωγμός. Ο Μπενγκ χρησιμοποιήνελα ι βία ντα τσσουβέλα ι τζενέν τι πιένεν-αμέν για τι κερέλ-αμέν μα τι ατσσάς αποφασισμέ. Οντουβά σο μανγκέλα ισί τι “χαλ-αμέν”, τι κερέλ ζιάνι κι φιλία σο τθεράσα ι Ιεχωβάσαρ. (1 Πέτρ. 5:8) Ο Χριστιανοί κο πρώτος αιώνας νακχένας μπουτ δυσκολίες, χάνας νταπ ντα μουνταρένας-λεν επειδή ισινέ αποφασισμέ τι ατσσόν σταθεροί. (Πράξ. 5:​27, 28, 40· 7:​54-60) Ο Μπενγκ συνεχίνελα τι χρησιμοποιήνελ ο διωγμός αντιβές. Μπορίνασα τι ντικχάς-λες ανταβά κατά μπέτι τρόπος σο  αμαρέ ντουσμάνια συμπεριφερίντιβενα αμαρέ πφραλέντε ντα πφενίντε κι Ρωσία ντα γιαβερέ τθεμέντε. Ντα ο ντουσμάνια τζάνα κόντρα αμαρέ πφραλέντζαρ ντα πφενίντζαρ σαβέ τι μανγκές τροπόντζαρ.

9. Σικαβέν εκχέ παραδειγμάσαρ σόσκε χρειαζίντιβελα τι αρακχαβάς-αμέν κατά παγίδες σο να μπεκλεντίνασα.

⁹ Παγίδες σο να μπεκλεντίνασα. Εκτός κατά ξεκάθαρες παγίδες σο τσσουβέλα, ο Μπενγκ χρησιμοποιήνελα “πφιρνίματα-ντα”. (Εφεσ. 6:​11) Ντικχέν σο αβιλό-πες εκχέ πφραλέστε, κο Μπομπ, σο γκιλό κο νοσοκομείος για τι κερέλ εκ σοβαρή εγχείρηση. Βακερντάς ι γιατρόνγκε ότι να κα δεχτίνελας ρατ σο-ντα τι αβέλας-πες. Ο χειρούργος συμφωνιντάς τι σεβάνελ λέσκι απόφαση. Όμως, ι ιράτ πριν κατά εγχείρηση, ο αναισθησιολόγος γκιλό κο Μπομπ αφού λέσκι φαμιλί νασλίας. Βακερντάς λέσκε ότι μάλλον να κα τσσουβένας λέσκε ρατ, αλλά κα τθερένας χάνικ ρατ κι νάκρη σε περίπτωση σο κα χρειαζίντιβελας. Μπέκιμ ο γιατρός αμντίνελας ότι ο Μπομπ κα αλλάνελας άποψη κάνα να κα αβένας οτθέ λέσκε τζενέ. Αλλά βοβ ατσσιλό σταθερός ντα βακερντάς ότι να κα δεχτίνελας ρατ σο-ντα τι αβέλας-πες.

10. Σόσκε ισί παγίδα ο τρόπος σο σκεφτίνενα ο τζενέ; (1 Κορινθίους 3:​19, 20)

¹⁰ Ο τρόπος σο σκεφτίνενα ο τζενέ. Άμα σκεφτίνασα σαρ ο τζενέ κο ντουνιάς, μπέκιμ τι αρχίνας μα τι ντας καν κο Ιεχωβά ντα κο νόμοι λέσκε. (Διαβάνεν 1 Κορινθίους 3:​19, 20) Μπουτ φαρ, «η σοφία ανταλέ ντουνιάσκι» βακερέλα ι τζενένγκε τι κερέν ο πράγματα σο μανγκέλα ο σώμας. Χάνικ Χριστιανοί κι Πέργαμος ντα κο Θυάτειρα αρχισάλε τι κερέν μπίλατζανε πράγματα ντα τι ντεν λατρεία κο είδωλα σαρ ο γιαβερά τζενέ. Ο Ιησούς ντινάς ζουρανί συμβουλή κο ντούι-ντα κχανγκιριά επειδή μουκχένας τι αβέλ-πες λουμνιπέ. (Αποκ. 2:​14, 20) Αντιβές, ο τζενέ πιένενα αμέν-ντα τι σκεφτίνας σαρ σκεφτίνενα βον. Αμαρέ τζενέ ντα αμαρέ αμαλά μπέκιμ προσπαθίνενα τι κερέν-αμέν τι πακιάς ότι ισινάμ μπουτ αυστηροί ντα ότι δεν πρέπει τι ντας καν κο νόμοι κι Ντεβλέσκε. Για παράδειγμας, μπέκιμ τι βακερένα ότι να πειράνελα τι κεράς οντουβά σο μανγκέλα αμαρό σώμας ντα ότι ο πάκι κανόνες ι Γραφιάκε ισί πουρανέ.

11. Καζόμ ατσσάσα σταθεροί, σο δεν πρέπει τι κεράς;

¹¹ Κάποιες φορές, μπέκιμ τι σκεφτίνας ότι ο οδηγίες σο ντέλα-αμέν ο Ιεχωβά νανέ αζόμ ξεκάθαρες. Κα μπορίναας ατζέ-ντα τι τζας κο πειρασμός μα τι “ακολουθίνας σάντε ο πράγματα σο ισί γραμμέ”. (1 Κορ. 4:6) Ο αρχηγοί ι θρησκειάκε κο ντιβεσά κι Ιησούσκε κερντέ ανταγιά αμαρτία. Βον τσσουβένας πουμαρέ κανόνες κο Νόμος, ντα αντικάς ισινέ δύσκολος ι τζενένγκε τι ντεν καν κο κανόνες ανταλά. (Ματθ. 23:4) Ο Ιεχωβά ντέλα-αμέν ξεκάθαρες οδηγίες αντράλ πι Λαφίσταρ ντα αντράλ πι οργανωσιάταρ. Να τθεράσα καέκ λόγος τι τσσουβάς γιαβερά-ντα λάφια λέσκε οδηγιέντε. (Παρ. 3:​5-7) Οτθάρ, ακολουθίνασα σάντε ο πράγματα σο ισί γραμμέ κι Γραφή ντα να τσσουβάσα αμαρέ κανόνες κο πφραλά κο πράγματα σο τθερένα τι κερέν λέντζαρ.

12. Σαρ χρησιμοποιήνελα ο Μπενγκ «ψεύτικα λάφια»;

¹² Ψέματα. Ο Μπενγκ χρησιμοποιήνελα «ο ψεύτικα λάφια» ντα ο “πράγματα ι ντουνιάσκε” για τι χουχαβέλ ντα τι τρουγίνελ ι τζενέν. (Κολ. 2:8) Κο πρώτος αιώνας, ανταλά πράγματα τθερένας τι κερέν με φιλοσοφίες σο βασίντιβενας κι τζενένγκε ιδέες, με το σικλιαριπέ ι Ιουδαιόνγκο σο να βασίντιβελας κι Γραφή, ντα με το σικλιαριπέ ότι ο Χριστιανοί έπρεπε τι κερέν ο Μωσαϊκός Νόμος. Ανταβά ισινέ ψέμας επειδή λέλας ι προσοχή ι τζενένγκι κατά Ιεχωβά, σο Λέσταρ αβέλα η σοφία. Αντιβές, ο Μπενγκ χρησιμοποιήνελα ι τηλεόραση ντα ο κοινωνικά δίκτυα για τι πφιραβέλ λάφια σο να βασίντιβενα πουθενά ντα ψεύτικα αμπέρια σο  βακερένα μερικοί πολιτικοί. Ντικχλάμ μπουτ ασακέ ψεύτικες ιστορίες κο Κορωνοϊός. c Ο Μάρτυρες ι Ιεχωβάσκε σο ασουντέ ο οδηγίες κατά οργάνωση αμαρί να ανησυχίνενας αζόμ μπουτ καζόμ ανησυχίνενας οντουλά σο ασουνένας ανταλά ψεύτικα λάφια.​—Ματθ. 24:45.

13. Σόσκε πρέπει τι προσοχίνας μα τι νασέλ αμαρί προσοχή;

¹³ Πράγματα σο λένα αμαρί προσοχή. Δεν πρέπει τι νασέλ αμαρί προσοχή κατά «πο σημαντικά πράγματα». (Φιλιπ. 1:9, 10) Ο πράγματα σο λένα αμαρί προσοχή μπέκιμ τι κερέν-αμέν τι χασαράς μπουτ σαάτι ντα ζορ σο κα μπορίναας τι ντας πραγματέντε σο κα βοηθίνενας-αμέν. Ο πράγματα ι κάθε ντιβεσέσκε​—σαρ ισί ο χαμπέ, ο πιπέ, η διασκέδαση ντα η μπουτί—​κα μπορίνενας τι λεν αμαρί προσοχή άμα κα μουκχάς-λεν τι αβέν ο πο σημαντικά αμαρέ ζωγιάτε. (Λουκ. 21:​34, 35) Επίσης, κάθε ντιβές ασουνάσα ντα διαβάνασα ειδήσεις σο τθερένα τι κερέν με το διαδηλώσεις ντα με το πολιτικά. Πρέπει τι αβάς σίγουροι ότι να κα μουκχάς κο διαφωνίες ανταλά τι λεν αμαρί προσοχή, σόσκε άμα κα κεράς-λες ανταβά, μπορεί τι αρχίνας τι λας θέση αμαρέ γκοντιάτε ντα αμαρέ γκίστε. Ο Μπενγκ χρησιμοποιήνελα σαρέ ο τρόποι σο βακερντάμ πο οπρέ για τι κερέλ-αμέν μα τι αβάς αποφασισμέ τι κεράς ο σωστός. Για τι ντικχάς σαρ μπορίνασα τι τζας κόντρα κο προσπάθειες κι Μπενγκέσκε ντα τι ατσσάς σταθεροί.

14. Καβά ισί εκ πράγμας σο μπορεί τι βοηθίνελ-αμέν τι τσσίντας κατά Ιεχωβάσκι μπάντα;

¹⁴ Τι σκεφτίνεν τουμαρί αφιέρωση ντα τουμαρό μπολντιπέ. Κερντέν ανταλά βήματα επειδή μανγκένας τι τσσίντεν κατά Ιεχωβάσκι μπάντα. Ντεν-τουμέν γκοντί σο βοηθιντάς-τουμέν τι αβέν σίγουροι ότι αρακχλένας ι αλήθεια. Σικλιλέν μπουτ πράγματα ι Ιεχωβάσκε ντα μπαριαρντέν τουμαρό σεβασμός ντα τουμαρί αγάπη τουμαρέ Νταντέσκε σο ισί κο ουρανός. Αρχισάλεν τι τθερέν πίστη ντα μανγκλέν τι μετανιώνεν. Τουμαρό γκι τσσιντιντάς-τουμέν τι μουκχέν ο λάθος πράγματα σο κερένας ντα τι αρχίνεν τι τζουβντιόν αντικάς σαρ μανγκέλα ο Ντεβέλ. Λοκχιλό τουμαρό γκι κάνα  αγαντέν ότι ο Ντεβέλ συγχωριντάς-τουμέν. (Ψαλμ. 32:1, 2) Τζάνας κο συναθροίσεις ντα αρχισάλεν τι βακερέν γιαβερέντε-ντα ο σουκάρ πράγματα σο σικλιλένας. Σαρ αφιερωμέ ντα μπολντέ Χριστιανοί, πφιρένα ακανά κο ντρομ σο γκερέλα κι ζωή, ντα ισινέν αποφασισμέ μα τι νασέν λέσταρ.​—Ματθ. 7:​13, 14.

15. Σόσκε ντικχάσα λατσσιπέ κάνα σικλιαράσα-αμέν κατά Λάφι ι Ντεβλέσκο ντα σκεφτίνασα-λες λατσσές;

¹⁵ Τι σικλιαρέν-τουμέν κατά Λάφι ι Ντεβλέσκο ντα τι σκεφτίνεν-λες λατσσές. Σαρ εκ δέντρος μπορίνελα τι αβέλ ζουρανό άμα λέσκε ρίζες ισί αχόρτ κι πφουβ, αντικάς αμέν-ντα μπορίνασα τι ατσσάς σταθεροί άμα τθεράσα ζουρανί πίστη κο Λάφι κι Ντεβλέσκο. Καζόμ εκ δέντρος μπαριόλα, λέσκε ρίζες τζάνα πο αχόρτ ντα αβένα πο μπαρέ. Κάνα σικλιαράσα-αμέν κατά Λάφι ι Ντεβλέσκο ντα σκεφτίνασα-λες λατσσές, μπαριαράσα αμαρί πίστη ντα αμαρί σιγουριά ότι ο ντρομ ι Ντεβλέσκο ισί ο πο λατσσό. (Κολ. 2:6, 7) Τι σκεφτίνεν σαρ ο σικλιαριπέ, ο οδηγίες ντα ο αρακχαϊπέ ι Ιεχωβάσκο βοηθιντέ λέσκε υπηρετόν ανγκλέ. Για παράδειγμας, κάνα ο Ιεζεκιήλ ντικχλάς εκχέ φαντασιάτε εκ ναός, ντινάς μπαρί προσοχή καζόμ εκ άγγελος γκινέλας προσεκτικά ο ναός. Οντιά φαντασία ντινάς ζορ κο Ιεζεκιήλ, ντα σικλιαρέλα αμέν-ντα σαρ τι κεράς ο κανόνες ι Ιεχωβάσκε για την πάκι λατρεία. d (Ιεζ. 40:​1-4· 43:​10-12) Ντικχάσα λατσσιπέ αμέν-ντα κάνα ντάσα αμαρέ σαατίσταρ για τι σικλιαράς-αμέν κατά Λάφι ι Ντεβλέσκο ντα τι σκεφτίνας λατσσές ο πο αχόρτ πράγματα λέσκε Λαφίσταρ.

16. Σαρ αρακχαντάς ι πφραλές Μπομπ ο σταθερός γκι; (Ψαλμός 112:7)

¹⁶ Κερέν τουμαρό γκι σταθερός. Ο βασιλιάς Δαβίδ σικαντάς πι μπαρί αγάπη ι Ιεχωβάσκε κάνα γκιλιαντάς: «Μο γκι ισί σταθερός, Ντέβλα». (Ψαλμ. 57:7) Μπορίνασα αμέν-ντα τι τθεράς σταθερός γκι, άμα ντάσα σαρί αμαρί μπέσα κο Ιεχωβά. (Διαβάνεν Ψαλμός 112:7) Ντικχέν σαρ βοηθιντάς ανταβά ι πφραλές Μπομπ. Κάνα βακερντέ λέσκε ότι τθερένας ρατ κι νάκρη σε περίπτωση σο κα χρειαζίντιβελας, βοβ βακερντάς λένγκε οντιά στιγμή ότι, άμα υπαρχίντιβελας ατζέ-ντα εκ χουρντί  περίπτωση τι τσσουβέν λέσκε ρατ, κα νασέλας αμέσως κατά νοσοκομείος. Πο σοράν, ο Μπομπ βακερντάς: «Να σακιντισάλομ ντα να νταρασάλομ ιτς».

17. Σο σικλιάσα οντουλένταρ σο αβιλέ-πες κο Μπομπ; (Ντικχέν ι φωτογραφία-ντα)

¹⁷ Ο Μπομπ ατσσιλό σταθερός επειδή λιντάας πι απόφαση μπουτ καιρός πριν τι τζαλ κο νοσοκομείος. Πρώτον, μανγκέλας αντράλ πι γκίσταρ τι ντελ χαρά κο Ιεχωβά. Δεύτερον, για τι σικλιόλ καζόμ ιερή ισί η ζωή ντα ο ρατ, ροντιντάς προσεκτικά κι Γραφή ντα κο έντυπα σο τθεράσα. Τρίτον, ισινέ σίγουρος ότι, άμα κα ντέλας καν κι εντολή ανταγιά, ο Ιεχωβά κα πφερέλας-λες ευλογίες σο κα ατσσικιαρένας για πάντα. Μπορίνασα αμέν-ντα τι τθεράς σταθερός γκι σο-ντα δοκιμασίες τι νακχάς.

18. Σαρ σικλιαρέλα-αμέν ο παράδειγμας του Βαράκ τι ντας μπέσα κο Ιεχωβά; (Ντικχέν ι φωτογραφία κι ανγκλαϊνί σελίδα)

¹⁸ Τι ντεν μπέσα κο Ιεχωβά. Σκεφτίνεν σαρ τθερέλας επιτυχία ο Βαράκ επειδή ντινάς μπέσα κι οδηγία κι Ιεχωβάσκι. Παρόλο σο σαρό κο τθεμ να ντικχίντιβελας ούτε ασπίδα ούτε κοντάρι, ο Ιεχωβά ντινάς κο Βαράκ ι οδηγία τι τζαλ τι κερέλ τζένγκι ι λατσσέ στρατόσαρ σο τθερέλας εκ Χαναναίος αρχηγός, ο Σισάρα. (Κριτ. 5:8) Η προφήτισσα Δεββώρα βακερντάς κο Βαράκ τι γουλίλ κατά βεσά για τι τζαλ τι κερέλ τζένγκι με τον Σισάρα ντα με το 900 άρματα σο τθερέλας. Κι πεδιάδα, κα αβέλας μπουτ δύσκολος ι Ισραηλιτένγκε τι κερέν τζένγκι με το άρματα σόσκε τθάβντενας σουγκό. Παρόλο σο ο Βαράκ τζανέλας-λες ανταβά, ντινάς καν. Καζόμ λέσκε στρατιώτες γουλίνας κατά Βες Θαβώρ, ο Ιεχωβά κερντάς τι περέλ μπαρό μπρισίμ κατά ουρανός. Ο άρματα του Σισάρα κολλισάλε κι τσικ, ντα ο Ιεχωβά ντινάς ι νίκη κο Βαράκ. (Κριτ. 4:​1-7, 10, 13-16) Αντικάς-ντα, ο Ιεχωβά κα ντελ-αμέν ι νίκη άμα κα ντας μπέσα λέστε ντα κο οδηγίες σο ντέλα-αμέν αντράλ πι οργανωσιάταρ.​—Δευτ. 31:6.

19. Σόσκε μανγκένα τι ατσσόν σταθεροί;

¹⁹ Κα συνεχίνας τι μαράς-αμέν τι ατσσάς σταθεροί καζόμ τζουβντιάσα ανταλέ ντουνιάστε. (1 Τιμ. 6:​11, 12· 2 Πέτρ. 3:​17) Οτθάρ, τι αβάς αποφασισμέ μα τι τζας ακατάρ ντα οκουτάρ κατά διωγμός, κατά παγίδες σο να μπεκλεντίνασα, κατά τρόπος σο σκεφτίνενα ο τζενέ, κατά ψέματα ντα κατά πράγματα σο λένα αμαρί προσοχή. (Εφεσ. 4:​14) Οκιά μπάνταρ, τι ατσσάς σταθεροί, πάντα αφοσιωμέ κο Ιεχωβά ντα μα τι τσσιναβάς τι ντας καν λέσκε εντολέντε. Χρειαζίντιβελα όμως τι αβάς λογικοί-ντα. Κο γιαβέρ μάθημας, κα ντικχάς ο τέλειος παράδειγμας ι Ιεχωβάσκο ντα ι Ιησούσκο, σο ισί ο πο λογικοί.