1, 2. Σαρ ντέλα-αμέν παρηγοριά ο Ιεχωβά κο στεναχώριες σο τθεράσα, ντα καγιά υπόσχεση αρακχάσα λέσκε Λαφίστε;

ΕΚ ΤΕΡΝΟ πφραλ, σο ισινέ εργένη, σκεφτίνελας ο εδάφιος 1 Κορινθίους 7:28, σο βακερέλα ότι ο τζενέ σο παντρίνενα «κα τθερέν στεναχώρια πουμαρέ σωμάστε». Κερντάς λάφι εκχέ μπαρέ παντριμέ πρεσβυτερόσαρ ντα πουτσλάς-λες: «Σο ισί ανταγιά “στεναχώρια”, ντα άμα κα παντρίναβ, σαρ κα μπορίναβ τι αντιμετωπίναβ-λα;» Πριν τι απαντίνελ κι ερώτηση, ο πρεσβύτερος βακερντάς οντουλέ τερνέ πφραλέσκε τι σκεφτίνελ κάτι γιαβέρ σο γραφιντάς ο απόστολος Παύλος: Ο Ιεχωβά ισί «ο Ντεβέλ κάθε παρηγοριάς, σο ντέλα-αμέν κουράγιος σαρέ κο στεναχώριες σο τθεράσα».—2 Κορινθίους 1:3, 4.

² Τζανάσα ότι ο Ιεχωβά, αμαρό Ντατ, μανγκέλα-αμέν ντα ντέλα-αμέν παρηγοριά όταν νακχάσα δυσκολίες. Μπορεί τι αβένα τουμαρέ γκοντιάτε μερικές περιπτώσεις σο ο Ιεχωβά στηριντάς-τουμέν ντα οδηγιντάς-τουμέν αντράλ πι Λαφίσταρ. Μπορίνασα τι αβάς σίγουροι ότι μανγκέλα ο πιο λατσσό αμένγκε,  σαρ κερντάς πι υπηρετόντζαρ-ντα κο παρελθόν.—Διαβάνεν Ιερεμίας 29:11, 12.

3. Καλέ ερωτησιέντε κα απαντίνας ανταλέ μαθημάστε;

³ Ο πιο μπουτ φαρ, ισί πιο εύκολος τι νταϊντίνας ο προβλήματα ντα ο στεναχώριες όταν τζανάσα σόσκε νακχάσα-λεν. Άρα, σόσκε μπορεί τι τθεράσα στεναχώριες αμαρέ παντριάτε ή αμαρέ φαμιλιάτε; Ντα καλά παραδείγματα κατά Αγία Γραφή ντα αμαρέ ντιβεσένταρ μπορίνενα τι βοηθίνεν-αμέν τι αρακχάς ι παρηγοριά σο χρειαζίντιβασα; Κα απαντίνας ανταλέ ερωτησιέντε για τι ντικχάς σαρ μπορίνασα τι νταϊντίνας ο στεναχώριες.

4, 5. Σο στεναχώριες μπορεί τι τθερέλ εκ αντρόγυνος;

⁴ Αφού ο Ιεχωβά κερντάς ι πρώτε τζουβλιά, αντάς-λα κο μουρς, ντα αβιλί λέσκι ρομνί. Σοράν ο Ιεχωβά βακερντάς: «Ο τζενό κα μουκχέλ πι νταντές ντα πι νταγιά ντα κα αβέλ γιεκ πι ρομνιάσαρ σαρ εκ σώμας». (Γένεση 2:24) Αντιβές σαρέ ισινάμ ατελείς. (Ρωμαίους 3:23) Άρα, όταν εκ μουρς ντα εκ τζουβέλ παντρίνενα, ισί λογικός τι τθερέν προβλήματα. Για παράδειγμας, πριν τι παντρίνελ, εκ τζουβέλ έπρεπε τι ασουνέλ πι νταντές ντα πι νταγιά. Αλλά ο Λάφι ι Ντεβλέσκο βακερέλα ότι, αφού κα παντρίνελ εκ αντρόγυνος, ο μουρς αβέλα ο σορό πι ρομνιάκο. (1 Κορινθίους 11:3) Κι αρχή, ο μουρς μπορεί τι δυσκολίντιβελα τι ντελ οδηγίες πι ρομνιάτε. Ντα ι τζουβλιάκε μπορεί τι αβέλας πιο εύκολος τι ασουνέλ πι νταντές ντα πι νταγιά παρά τι ασουνέλ πι ρομές. Επίσης, κάτι γιαβέρ σο μπορεί τι ανέλα στεναχώρια εκχέ μουρσέσκε ντα εκχέ τζουβλιάκε σο παντρίνενα, ισί ότι κι αρχή μπορεί μα τι τθερένα λατσσέ σχέσεις πουμαρέ σαστρέσαρ ντα πουμαρέ σασάσαρ.

⁵ Σκεφτίνεν επίσης σαρ μπορεί τι νιωθίνελ εκ αντρόγυνος όταν κα σικλιόλ ότι κα κερέλ μαξιμίς. Παρόλο σο μπορεί τι ισί μπουτ χαρούμενοι, μπουτ φαρ ανησυχίνενα. Μπορεί τι σκεφτίνενα άμα κα τθερέλ εκ λατσσό κχαμνιπέ ντα άμα κα αβέλ ζουρανό ο μαξίμι. Τζανένα επίσης ότι κα τθερέν πιο μπουτ έξοδα. Αφού κα μπιάντιβελ ο μαξίμι, ο αντρόγυνος πρέπει τι κερέλ γιαβερά-ντα αλλαγές. Η ντάι μπορεί τι νακχέλα πο πιο μπουτ χρόνος για τι αρακχαβέλ ι μαξιμίς. Άρα, ο μουρς ντα η τζουβέλ μπορεί μα τι νακχένα μαζί αζόμ χρόνος καζόμ νακχένας πριν. Αλλά ο ευθύνες ι νταντέσκε-ντα κα αβέν πιο μπουτ. Πρέπει τι αβέλ σίγουρος ότι λέσκι ρομνί ντα λέσκο τσσαβό τθερένα σαρέ οντουλά σο χρειαζίντιβενα.

6-8. Σαρ μπορεί τι αισθάνελ εκ αντρόγυνος άμα να μπορίνελα τι κερέλ τσσαβέν;

⁶ Μερικά αντρόγυνα τθερένα εκ γιαβέρ στεναχώρια. Μανγκένα μπουτ τι κερέν τσσαβέν, αλλά να μπορίνενα. Η τζουβέλ, καζόμ να ατσσόλα κχαμνί, μπορεί τι αισθάνελα μπαρί ντουκχ αντρέ πι γκίστε. (Παροιμίες 13:12) Κο ντιβεσά σο γραφισάλι η Γραφή, ισινέ μπουτ σημαντικός εκχέ τζουβλιάκε τι παντρίνελ ντα τι κερέλ τσσαβέν. Οντουλέσκε η Ραχήλ, η ρομνί του Ιακώβ, ισινέ μπουτ στεναχωριμέ σο ναστί μπορίνελας τι ατσσόλ κχαμνί, ενώ λάκι πφεν μπορίνελας. (Γένεση 30:1, 2) Μερικέ τθεμέντε αντιβές, μπουτ τζενέ πακιάνα ότι ισί σημαντικός τι κερέν μπουτέ τσσαβέν. Ο τζενέ μπουτ φαρ πουτσένα ι ιεραποστολόν σο τζουβντιόνα οντουλέ τθεμέντε σόσκε να τθερένα τσσαβέν. Ατζέ-ντα όταν ο ιεραπόστολοι απαντίνενα καζόμ πιο λατσσές μπορίνενα, μερικοί βακερένα: «Σο μπεζαβά! Κα κεράς προσευχή τουμένγκε!»

⁷ Σκεφτίνεν εκ γιαβέρ παράδειγμας. Εκ πφεν κι Αγγλία πάντα μανγκέλας τι κερέλ τσσαβέν. Όταν αγαντάς ότι να κα κερέλας  τσσαβέν ανταλέ ντουνιάστε, χασαρντάς πο κουράγιος. Βόι ντα λάκο ρομ αποφασιντέ τι υιοθετίνεν εκχέ χουρντές. Αλλά κι αρχή συνεχίνελας τι αβέλ στεναχωριμέ. Βόι βακερντάς: «Τζανάβας ότι γιαβέρ ισινέ τι υιοθετίναβ ντα γιαβέρ τι μπιανάβ εκχέ μαξιμίς».

⁸ Η Γραφή βακερέλα ότι εκ τζουβέλ «κα ατσσόλ ασφαλής άμα κα κερέλ τσσαβέν». (1 Τιμόθεο 2:15) Αλλά ανταβά να μανγκέλα τι βακερέλ ότι κα τζουβντιόλ για πάντα απλά επειδή τθερέλα τσσαβέν. Άρα, σο μανγκέλα τι βακερέλ ανταβά εδάφιος; Εκ ντάι ασχολίντιβελα μπουτ πι τσσαβέντζαρ ντα πι κχερέσαρ. Ανταβά μπορίνελα τι βοηθίνελ-λα μα τι ασχολίντιβελ με το κουτσομπολιός ντα γιαβερέ πραγματέντζαρ σο δεν πρέπει τι ανακατούντιβελ. (1 Τιμόθεο 5:13) Όμως, μπορεί πάλι τι τθερέλ προβλήματα πι παντριάτε ντα πι φαμιλιάτε.

9. Καγιά γιαβέρ στεναχώρια μπορεί τι τθερέν ο παντριμέ τζενέ;

⁹ Εκ γιαβέρ στεναχώρια σο μπορεί τι αβέλ εκχέ παντριμέ τζενέσκε ισί όταν μερέλα λέσκι ρομνί ή λάκο ρομ. Ατζέ-ντα άμα πακιάνας ότι να κα αβέλας-πες ποτές ανταβά, μπουτ τζενέ έπρεπε τι νταϊντίνεν ανταγιά μπαρί στεναχώρια. Ο Χριστιανοί πακιάνα μπουτ κι υπόσχεση ότι κα αναστίντιβεν ο μουλέ, ντα ανταβά ντέλα-λεν μπαρί παρηγοριά. (Ιωάννης 5:28, 29) Αμαρό Ντατ, ο Ιεχωβά, ντινάς μπουτ υποσχέσεις αντρέ πι Λαφίστε σο ντένα-αμέν παρηγοριά όταν τθεράσα δυσκολίες. Ακανά κα ντικχάς σαρ μερικοί υπηρέτες ι Ντεβλέσκε νιωσάλε ανταγιά παρηγοριά ντα σαρ βοηθίντιλε.

10. Σαρ αρακχλάς παρηγοριά η Άννα; (Ντικχ ι φωτογραφία σο ισί κι αρχή.)

¹⁰ Σκεφτίνεν σο αβιλό-πες κι Άννα, κι αγαπημέ ρομνί του Ελκανά. Μανγκέλας τι κερέλ τσσαβέν, αλλά να μπορίνελας. Όμως, η γιαβέρ ρομνί του Ελκανά, η Φενίννα, τθερέλας μπουτέ τσσαβέν. (Διαβάνεν 1 Σαμουήλ 1:4-7) Οντουβά σο κερέλας χειρότερα ο πράγματα ισινέ ότι η Φενίννα πρασάλας ι Αννά «κάθε μπρες» επειδή να μπορίνελας τι κερέλ τσσαβέν. Ανταβά πληγώνελας μπουτ ι Αννά. Σο κερντάς για τι αρακχέλ παρηγοριά; Προσευχίντιβελας κο Ιεχωβά. Μάλιστα γκιλί οτθέ σο ντένας λατρεία κο Ιεχωβά ντα κερντάς εκ μπαρί προσευχή. Μανγκλάς κατά Ιεχωβά τι ντελ-λα εκχέ τσσαβές, ντα ισινέ σίγουρη ότι κα βοηθίνελας-λα. Αφού προσευχισάλι, αμέσως νιωσάλι μπουτ πιο λατσσές ντα «λάκο μούι να ντικχίντιβελας στεναχωριμέ». (1 Σαμουήλ 1:12, 17, 18) Τζανέλας ότι ο Ιεχωβά είτε κα ντέλας-λα εκχέ τσσαβές είτε κα παρηγορίνελας-λα με εκ γιαβέρ τρόπος.

11. Σαρ μπορίνελα η προσευχή τι ντελ-αμέν παρηγοριά;

¹¹ Αφού ισινάμ ατελείς ντα τζουβντιάσα κι Μπενγκέσκο ντουνιάς, κα συνεχίνας τι τθεράς στεναχώριες. (1 Ιωάννη 5:19) Όμως τθεράσα βοήθεια. Μπορίνασα τι προσευχίντιβας κο Ιεχωβά, κο «Ντεβέλ κάθε παρηγοριάς». Ανταβά κερντάς η Άννα. Βακερντάς κο Ιεχωβά ακριβώς σαρ νιωθίνελας ντα μολιντάς-λες τι βοηθίνελ-λα. Αντικάς αμέν-ντα, όταν νακχάσα μπαρέ στεναχώριες, να ερεσέλα σάντε τι βακεράς αμαρέ  προβλήματα κο Ιεχωβά. Πρέπει τι μολίνας-λες τι βοηθίνελ-αμέν ντα τι βακεράς λέσκε ακριβώς σαρ νιωθίνασα.—Φιλιππησίους 4:6, 7.

12. Σο βοηθίνελας ι Αννά τι αβέλ χαρούμενη παρόλο σο τθερέλας στεναχώριες;

¹² Μπορεί τι ισινάμ μπουτ στεναχωριμέ επειδή να τθεράσα τσσαβέν ή επειδή μουλό εκ τζενό σο μανγκάσα-λες μπουτ. Παρ’ όλα αυτά, μπορίνασα τι αρακχάς παρηγοριά. Σκεφτίνεν εκ γιαβέρ παράδειγμας. Εκ τζουβέλ, η Άννα, σο τζουβντιόλας κο ντιβεσά κι Ιησούσκε, ισινέ σάντε εφτά μπρεσά παντριμέ πι ρομέσαρ όταν βοβ μουλό. Ντα μάλλον να τθερέλας τσσαβέν. Αλλά σο βοηθιντάς-λα; «Να λειπίνελας ποτές κατά ναός». Ατζέ-ντα όταν η Άννα ισινέ 84 μπρεσένγκι, συνεχίνελας τι τζαλ κο ναός για τι προσευχίντιβελ ντα τι ντελ λατρεία κο Ιεχωβά. (Λουκάς 2:37) Ανταβά ντέλας-λα παρηγοριά ντα βοηθίνελας-λα τι αβέλ χαρούμενη παρόλο σο τθερέλας στεναχώριες.

13. Σαρ μπορίνενα ο αληθινά αμαλά τι ντεν-αμέν παρηγοριά άμα αμαρέ τζενέ στεναχωρίνενα-αμέν;

¹³ Μπορίνασα επίσης τι λας παρηγοριά κατά αληθινά αμαλά σο αρακχάσα αντρέ κι εκκλησία. (Παροιμίες 18:24) Η Πόλα ισινέ σάντε παντζέ μπρεσένγκι όταν λάκι ντάι τσσιναντάς τι υπηρετίνελ ι Ιεχωβάς. Η Πόλα ισινέ μπουτ στεναχωριμέ ντα ο πράγματα ισινέ δύσκολα λάκε. Αλλά εκ σκαπάνισσα, η Αν, ενθαρρυντάς-λα ντα σικαντάς λάκε ενδιαφέρον αντράλ πι γκίσταρ. «Παρόλο σο να ισινάμας τζενέ με την Αν, βόι σικαντάς ότι πφαμπόλας μάνγκε ντα ανταβά βοηθιντάς-μαν μπουτ», βακερέλα η Πόλα. «Ανταβά κερντάς-μαν τι συνεχίναβ τι υπηρετίναβ ι Ιεχωβάς». Πιο σοράν, η ντάι της Πόλα βουρτισάλι κι εκκλησία ντα ανταβά ντέλα μπαρί χαρά κι Πόλα. Η Αν-ντα ισί χαρούμενη επειδή μπορισάλι τι βοηθίνελ ι Πολά τι συνεχίνελ τι υπηρετίνελ ι Ιεχωβάς.

14. Σαρ βοηθίντιβασα όταν ντάσα παρηγοριά κο γιαβερά;

¹⁴ Όταν κεράσα συνέχεια πράγματα για τι βοηθίνας ι γιαβερέν, μπουτ φαρ μπιστράσα αμαρέ προβλήματα. Για παράδειγμας, μπουτ πφενιά, είτε ισί παντριμέ είτε  νανέ, τζανένα ότι, κάνα βακερένα ο λατσσέ αμπέρια για τη Βασιλεία κο γιαβερά, συνεργαζίντιβενα ι Ιεχωβάσαρ ντα κερένα λέσκο θέλημας. Ανταβά κερέλα-λεν χαρούμενες. Κι πραγματικότητα, σαρέ μπορίνασα τι σικαβάς ότι ενδιαφερίντιβασα ι γιαβερένγκε άμα βακεράσα λένγκε ο λατσσέ αμπέρια. Ντα όταν κεράσα πράγματα για τι βοηθίνας αμαρέ πφραλέν ντα αμαρέ πφενίν, αβάσα πιο πασέ λέντε. (Φιλιππησίους 2:4) Ακριβώς ανταβά κερντάς ο απόστολος Παύλος. Πφαμπόλας ι γιαβερένγκε «σαρ εκ ντάι αρακχαβέλα πι μαξιμίν σο ντέλα-λεν τθουτ». Ο Παύλος επίσης παρηγορίνελας ντα ενθαρρύνελας πι πφραλέν «σαρ κερέλα εκ ντατ πι τσσαβένγκε».—Διαβάνεν 1 Θεσσαλονικείς 2:7, 11, 12.

15. Κον τθερέλα ι ευθύνη τι σικλιαρέλ ι τσσαβέν ι Ιεχωβάσκε;

¹⁵ Σαρ μπορίνασα τι ντας παρηγοριά κο φαμιλιά σο τθεράσα κι εκκλησία; Μερικές φορές, ο νεβέ πφραλά μπορεί τι μανγκέν αμένταρ τι βοηθίνας-λεν τι σικλιαράς λένγκε τσσαβέν ι Ιεχωβάσκε ή ατζέ-ντα τι κεράς μελέτη λένγκε τσσαβέν. Η Γραφή σικαβέλα ότι ο Ιεχωβά ντέλα κο ντατ ντα κι ντάι ι ευθύνη τι σικλιαρέν ντα τι διορθώνεν πουμαρέ τσσαβέν. (Παροιμίες 23:22· Εφεσίους 6:1-4) Παρόλο σο μερικές φορές μπορεί τι βοηθίνενα ο γιαβερά-ντα, ισί μπουτ σημαντικός τι σικλιαρέν ο νταντά ντα ο νταγιά πουμαρέ τσσαβέν. Πρέπει τι κερέν λάφι πουμαρέ τσσαβέντζαρ κάθε ντιβές.

16. Σο πρέπει τι ντας-αμέν γκοντί όταν βοηθίνασα ι γιαβερένγκε τσσαβέν;

¹⁶ Όταν εκ ντατ ή εκ ντάι μανγκέλα αμένταρ τι κεράς μελέτη λέσκε τσσαβές ή λέσκε τσσαγιά, ισί λατσσό τι ντας-αμέν γκοντί ότι να τθεράσα ι ίδια εξουσία σο τθερένα βον. Μερικές φορές μπορεί τι κεράς μελέτη ατζέ-ντα εκχέ τσσαβές σο νανέ λέσκο ντατ ή λέσκι ντάι κι αλήθεια. Όταν κεράσα μελέτη τσσαβέν σο νανέ αμαρέ, κα αβέλας σοφός τι κεράς ι μελέτη λένγκε κχερέστε, όταν ισί οτθέ λένγκο ντατ ντα λένγκι ντάι ή εκ γιαβέρ Μάρτυρας, ή τι κεράς ι μελέτη εκχέ τθανέστε σο κα ντικχέν-αμέν γιαβερά τζενέ. Άμα κα κεράς-λες ανταβά, καέκ να κα σκεφτίνελ λάθος πράγματα αμένγκε. Ντα κα αβέλας λατσσό εκ ντιβές ο νταντά ντα ο νταγιά τι μπορίνεν τι σικλιαρέν βον πουμαρέ τσσαβέν ι Ιεχωβάσκε.

17. Σαρ μπορίνενα ο τσσαβέ τι ντεν παρηγοριά πουμαρέ φαμιλιάτε;

¹⁷ Ο τερνέ σο σικλιλέ τι μανγκέν ι Ιεχωβάς μπορίνενα τι παρηγορίνεν ντα τι ενθαρρύνεν πουμαρί φαμιλί. Σαρ; Μπορίνενα τι κερέν-λες ανταβά όταν σεβάνενα πουμαρέ νταντές ντα πουμαρέ νταγιά ντα όταν μαρένα-πες τι βοηθίνεν-λεν με μπουτ τρόπους. Επίσης, όταν ο τσσαβέ ατσσόνα πιστά κο Ιεχωβά, ανταβά ενθαρρύνελα σαρί ι φαμιλί. Πριν τον Κατακλυσμό, ο Λάμεχ ντέλας λατρεία κο Ιεχωβά. Αφού μπιάντιλο λέσκο τσσαβό, ο Νώε, βοβ βακερντάς: «Βοβ κα ανέλ αμένγκε παρηγοριά ι σκληρέ μπουτιάκε σο κερένα ντουκχάσαρ αμαρέ βαστά, επειδή ο Ιεχωβά ντινάς αρμανιά ι πφουβ». Ανταγιά προφητεία νικίστιλι μπαγιά μετά τον Κατακλυσμό, όταν ο Ιεχωβά λιντάς κατά πφουβ ο αρμανιά σο ντινάας. (Γένεση 5:29· 8:21) Αντιβές, ο τσσαβέ ντα ο τσσαγιά σο ατσσόνα πιστά κο Ιεχωβά μπορίνενα βον-ντα τι ντεν παρηγοριά πουμαρέ φαμιλιάτε. Μπορίνενα τι βοηθίνεν σαριλέν αντρέ κι φαμιλί τι νταϊντίνεν ο στεναχώριες σο τθερένα ακανά ντα σο κα τθερέν κο μέλλον.

18. Σο κα βοηθίνελ-αμέν τι νταϊντίνας σο-ντα στεναχώριες μπορεί τι τθεράς;

¹⁸ Ο λαός ι Ιεχωβάσκο αντιβές αρακχέλα μπαρί παρηγοριά όταν προσευχίντιβελα, όταν σκεφτίνελα ο παραδείγματα σο ισί κι Γραφή ντα όταν κερέλα λατσσέ φιλίες ι πφραλέντζαρ ντα ι πφενίντζαρ. (Διαβάνεν Ψαλμός 145:18, 19) Τζανάσα ότι ο Ιεχωβά πάντα ισί έτοιμος τι ντελ-αμέν παρηγοριά, ντα ισινάμ σίγουροι ότι κα βοηθίνελ-αμέν τι νταϊντίνας σο-ντα στεναχώριες μπορεί τι τθεράς!