1, 2. (α) Καβά μπαρό ζήτημας επηρεάνελα σαρέ ι ντουνιάς; (β) Σόσκε ισί σημαντικός αμένγκε ανταβά ζήτημας;

ΑΝΤΙΒΕΣ, μπουτέ τζενένγκε ο λοβέ ισί ο πιο μπαρό ζήτημας. Ανταλά σκεφτίνενα ντα ανταλένγκε αγχώνενα. Νακχένα μπουτ σαάτια για τι νικαβέν πιο μπουτ λοβέ ή για τι ατσσικιαρέν οντουλά σο τθερένα. Γιαβερένγκε, ο πιο σημαντικός ζήτημας ισί λένγκι φαμιλί, λένγκι υγεία ή οντουλά σο μανγκένα τι κερέν πουμαρέ ζωγιάτε.

² Εκ γιαβέρ ζήτημας, όμως, ισί ατζέ πιο σημαντικός ανταλένταρ. Καβά ισί ανταβά; Τι δικαιώντιβελ η κυριαρχία ι Ιεχωβάσκι. Δεν πρέπει ποτές τι χασαράς αμαρέ γιακχίνταρ ανταβά ζήτημας. Άμα να προσοχιντάμ, κα μπορίναας τι ασχολίντιβας αζόμ μπουτ με το πράγματα ι κάθε ντιβεσέσκε ή τι αγχώνας αζόμ μπουτ αμαρέ προβληματένγκε σο κα μπιστράας καζόμ σημαντικός ισί ανταβά ζήτημας. Άμα υποστηρίνασα ι κυριαρχία ι Ιεχωβάσκι, κα μπορίνας τι αντιμετωπίνας πιο λατσσές ο προβλήματα ι κάθε ντιβεσέσκε ντα κα αβάς πιο πασέ κο Ιεχωβά.

3. Σαρ μανγκέλα ο Σατανάς τι ντικχάς ι κυβέρνηση ι Ντεβλέσκι;

³ Ο Σατανάς ο Διάβολος τσσουντάς αμφιβολίες για το  δικαίωμας σο τθερέλα ο Ιεχωβά τι κυβερνίνελ. Ο Σατανάς μανγκέλα τι πακιάν ο τζενέ ότι ο Ιεχωβά ισί γκεραλό Κυβερνήτης ντα ότι να μανγκέλα ο πιο λατσσό αμένγκε. Ο Μπενγκ κερντάς τι ντικχίντιβελ ότι ο τζενέ κα αβέν πιο ευτυχισμέ άμα κα κερένας-πες κορκορέ κουμάντος. (Γένεση 3:1-5) Επίσης, κερντάς τι ντικχίντιβελ ότι καέκ τζενό νανέ μπαγιά πιστός κο Ντεβέλ ντα ότι, άμα η ζωή κα αβέλ μπουτ δύσκολη, σαρέ ο τζενέ κα μουκχέν ι κυβέρνηση ι Ιεχωβάσκι. (Ιώβ 2:4, 5) Οτθάρ, ο Ιεχωβά μουκχλάς τι νακχέν μπουτ μπρεσά για τι σικαβέλ ξεκάθαρα ότι, όταν να κυβερνίνελα Βοβ, η ζωή ισί πφερντί στεναχώριες.

4. Σόσκε πρέπει τι ντιντιόλ εκ λύση κο ζήτημας της κυριαρχίας;

⁴ Σίγουρα, ο Ιεχωβά τζανέλα ότι ο κατηγορίες ι Μπενγκέσκε ισί ψεύτικες. Σόσκε όμως μουκχλάς ι Μπενγκές τι προσπαθίνελ τι σικαβέλ ότι τθερέλα δίκιος; Η απάντηση επηρεάνελα σαριλέν, εμ οντουλέν σο ισί κο ουρανός εμ οντουλέν σο ισί κι πφουβ. (Διαβάνεν Ψαλμός 83:18) Ο Αδάμ ντα η Εύα μουκχλέ ι κυβέρνηση ι Ιεχωβάσκι, σαρ κερντέ μπουτ γιαβερά-ντα τζενέ πιο σοράν. Ανταβά κα κερέλας μερικούς τι πακιάν ότι ο Διάβολος τθερέλα δίκιος. Καζόμ ανταβά ζήτημας ατσσόλα χωρίς απάντηση κι γκοντί κι τζενένγκι ή κι αγγελόνγκι, ναστί υπαρχίντιβελα αληθινή ειρήνη ντα ενότητα. Αλλά όταν η κυριαρχία ι Ιεχωβάσκι κα δικαιώντιβελ, σαρέ κα τζουβντιόν για πάντα ντα κα κυβερνίντιβεν σουκάρ λέσταρ. Αζομάν σαρό ο σύμπαν κα τθερέλ ειρήνη.—Εφεσίους 1:9, 10.

5. Σαρ επηρεάνελα αμέν-ντα ο ζήτημας της κυριαρχίας;

⁵ Η κυριαρχία ι Ντεβλέσκι κα δικαιώντιβελ ντα η κυβέρνηση ι Μπενγκέσκι ντα ι τζενένγκι να κα τθερέλ ιτς επιτυχία ντα κα χασάρντιβελ. Η κυβέρνηση ι Ντεβλέσκι αντράλ κατά Χριστόσκι Βασιλεία κα τθερέλ επιτυχία. Οντουλά σο κα ατσσόν πιστοί κα σικαβέν ότι ο τζενέ μπορίνενα τι ατσσικιαρέν πουμαρί ακεραιότητα ντα τι υποστηρίνεν πιστά ι κυβέρνηση ι Ντεβλέσκι. (Ησαΐας 45:23, 24) Μανγκάσα τι αβάς αμέν-ντα εκ ανταλέ πιστέ τζενένταρ; Σίγουρα μανγκάσα! Άρα, χρειαζίντιβελα τι αγαβάς καζόμ σημαντικός ισί μπαγιά ανταβά ζήτημας.

6. Καζόμ σημαντικός ισί τι δικαιώντιβελ η κυριαρχία ι Ιεχωβάσκι;

⁶ Νανέ αζόμ σημαντική αμαρί ευτυχία καζόμ ισί τι δικαιώντιβελ η κυριαρχία ι Ιεχωβάσκι. Ανταβά όμως να μανγκέλα τι βακερέλ ότι νανέ σημαντικός τι σώντιβας ή ότι ο Ιεχωβά να πφαμπόλα μπαγιά αμένγκε. Σαρ τζανάσα-λες ανταβά;

7, 8. Σαρ κα ευλογίντιβας όταν κα δικαιώντιβελ η κυριαρχία ι Ντεβλέσκι;

⁷ Ο Ιεχωβά μανγκέλα μπουτ ι τζενέν. Κι πραγματικότητα, ισινάμ λέσκε αζόμ σημαντικοί σο ντινάς πι τσσαβές για τι μπορίνας τι τζουβντιάς για πάντα. (Ιωάννης 3:16· 1 Ιωάννη 4:9) Άμα ο Ιεχωβά να κα κερέλας μπαγιά ο υποσχέσεις σο ντινάς-αμέν για το μέλλον, ο Σατανάς ντα ο γιαβερά σο τζάνα κόντρα κο Ντεβέλ κα τθερένας δίκιος. Ο Σατανάς βακερέλα ότι ο Ιεχωβά ισί εκ ψεύτης  σο να ντέλα κο τζενέ λατσσέ πράγματα ντα κυβερνίνελα με άδικος τρόπος. Ο τζενέ σο τζάνα κόντρα κο Ιεχωβά πρασάνα λέσκε υποσχέσεις ντα βακερένα: «Κάνα κα νικιόλ μπαγιά η υπόσχεση ότι κα αβέλ βοβ; Επειδή από αζομάν σο σοτέ αμαρέ παππούδες ο σοϊπέ ι μεριμάσκο, σαρέ ο πράγματα συνεχίνενα τι αβέν αντικάς σαρ ισινέ όταν δημιουργισάλεας». (2 Πέτρου 3:3, 4) Αλλά ο Ιεχωβά κα ατσσικιαρέλ πο λάφι. Όταν κα δικαιώντιβελ λέσκι κυριαρχία, ο τζενέ σο ντένα-λες καν σίγουρα κα σώντιβεν! (Διαβάνεν Ησαΐας 55:10, 11) Η κυριαρχία ι Ιεχωβάσκι βασίντιβελα κι αγάπη. Άρα, μπορίνασα τι αβάς σίγουροι ότι πάντα κα μανγκέλ ντα κα εκτιμίνελ πι πιστέ υπηρετόν.—Έξοδος 34:6.

⁸ Τζανάσα ότι η κυριαρχία ι Ιεχωβάσκι ισί μπουτ σημαντικός ζήτημας, αλλά ανταβά να μανγκέλα τι βακερέλ ότι νανέ λέσκε σημαντικός τι σώντιβας. Ο Ιεχωβά πφαμπόλα μπουτ αμένγκε. Πρέπει τι ντας-αμέν γκοντί σο ισί πιο σημαντικός ντα τι υποστηρίνας πιστά ι κυβέρνηση ι Ιεχωβάσκι.

9. Σο βακερντάς ο Σατανάς κο Ντεβέλ για τον Ιώβ; (Ντικχ ι φωτογραφία σο ισί κι αρχή.)

⁹ Ισί σημαντικός τι τθεράς ι σωστή άποψη για την κυριαρχία ι Ιεχωβάσκι. Μπορίνασα τι ντικχάς-λες ανταβά όταν διαβάνασα ο βιβλίος Ιώβ, εκ κατά πρώτα βιβλία σο γραφισάλε κι Αγία Γραφή. Οτθέ σικλιάσα ότι ο Σατανάς βακερντάς ότι, αν ο Ιώβ κα νακχέλας μπαρέ προβλήματα, κα μουκχέλας ι Ντεβλές. Μάλιστα μανγκλάς κατά Ντεβέλ τι ανέλ βάσανα κο Ιώβ. Ο Ιεχωβά να κα κερέλας κάτι ασακό, αλλά μουκχλάς ι Σατανάς τι δοκιμάνελ τον Ιώβ, ντα βακερντάς: «Σαρέ οντουλά σο τθερέλα βοβ ισί τι βαστέστε». (Διαβάνεν Ιώβ 1:7-12) Αφού νακχλό χάνικ καιρός, ο Ιώβ χασαρντάς πι υπηρετόν ντα σαρέ πο πράγματα. Σοράν, σικλιλό ότι ο ντες τσσαβέ λέσκε μουλέ εκχέ μπουτ μπαρέ μπαρμπαλιάταρ. Ο Σατανάς κερντάς τι ντικχίντιβελ ότι ο Ντεβέλ αντάας ανταλά μπέτι πράγματα. (Ιώβ 1:13-19) Πιο σοράν, ο Σατανάς αντάς κο Ιώβ εκ τζουνγκαλί αρρώστια σο κερέλας-λες τι ντουκχάλ μπουτ. (Ιώβ 2:7) Ντα εκτός ανταλένταρ, η ρομνί του Ιώβ ντα τριν ψεύτικα αμαλά λέσκε βακερντέ λέσκε πράγματα σο πληγωντέ-λες ντα κερντέ-λες τι χασαρέλ πι δύναμη.—Ιώβ 2:9· 3:11· 16:2.

10. (α) Σαρ σικαντάς ο Ιώβ πι ακεραιότητα κο Ντεβέλ; (β) Σόσκε χρειαζίντιβελας διόρθωση ο Ιώβ;

¹⁰ Τθερέλας δίκιος ο Σατανάς; Όχι. Παρόλο σο νακχλάς μπουτ ο Ιώβ, ποτές να μουκχλάς ι Ιεχωβάς. (Ιώβ 27:5) Αλλά για χάνικ καιρός, ο Ιώβ μπισταρντάς σο ισινέ μπαγιά σημαντικός ντα σκεφτιντάς πιο μπουτ πο νεαυτός. Βακερέλας συνέχεια ότι να κερντάας τίποτα κακός. Επίσης αμντίνελας ότι τθερέλας ο δικαίωμας τι σικλιόλ σόσκε νακχέλας αζόμ μπουτ βάσανα. (Ιώβ 7:20· 13:24) Μπορίνασα μάλλον τι αγαβάς σόσκε νιωθίνελας αντικάς ο Ιώβ. Όμως, ο Ιεχωβά τζανέλας ότι ο Ιώβ τθερέλας λάθος άποψη ντα διορθωντάς-λες. Σαρ κερντάς-λες ανταβά;

11, 12. Σο βοηθιντάς ο Ιεχωβά τον Ιώβ τι αγαβέλ; Σο κερντάς ο Ιώβ;

¹¹ Κο βιβλίος Ιώβ, κεφάλαια 38 μέχρι 41, μπορίνασα τι διαβάνας σο βακερντάς ο Ιεχωβά κο Ιώβ. Ο Ιεχωβά να εξηγιντάς λέσκε σόσκε τθερέλας βάσανα. Αντίθετα, ο Ιεχωβά μανγκέλας τι βοηθίνελ-λες τι αγαβέλ καζόμ χουρντό ισινέ ανγκλάλ κο Ντεβέλ. Σικλιαρντάς τον Ιώβ ότι υπαρχίντιβενας μπουτ πιο σημαντικά ζητήματα λέσκε προβληματένταρ. (Διαβάνεν Ιώβ 38:18-21) Ο λάφια ι Ιεχωβάσκε βοηθιντέ τον Ιώβ τι αλλάνελ πι άποψη.

¹² Μετά σαρέ οντουλένταρ σο νακχλάς ο Ιώβ, μήπως ισινέ σκληρός ο τρόπος σο  κερντάς λέσκε λάφι ο Ιεχωβά; Όχι, ντα ούτε ο Ιώβ σκεφτιντάς κάτι ασακό. Ο Ιώβ αγαντάς ντα εκτιμιντάς ι συμβουλή ι Ιεχωβάσκι. Μάλιστα βακερντάς: «Λάβα παλάλ οντουλά σο βακερντόμ ντα μετανιώναβα τσικάσαρ ντα πραχόσαρ». (Ιώβ 42:1-6) Πιο τζανγκλέ, εκ τερνό τζενό, ο Ελιού, βοηθιντάας βοβ-ντα τον Ιώβ τι αλλάνελ ο τρόπος σο σκεφτίνελας. (Ιώβ 32:5-10) Αφού ο Ιώβ ασουντάς ι συμβουλή σο ντινάς-λες με αγάπη ο Ιεχωβά ντα διορθωντάς πι άποψη, ο Ιεχωβά σικαντάς κο γιαβερά ότι ισινέ μπουτ ευχαριστιμέ με την πίστη του Ιώβ.—Ιώβ 42:7, 8.

13. Σαρ κα μπορίνελας τι βοηθίνελ τον Ιώβ η συμβουλή ι Ιεχωβάσκι μετά κατά δοκιμασίες σο νακχλάς;

¹³ Η συμβουλή σο λιντάς ο Ιώβ κατά Ιεχωβά κα συνεχίνελας τι βοηθίνελ-λες ατζέ-ντα μετά κατά δοκιμασίες σο νακχλάς. Σαρ; «Ο ευλογίες σο αντάς ο Ιεχωβά κο Ιώβ κο τέλος λέσκε ζωγιάκο ισινέ πιο μπουτ οντουλένταρ σο τθερέλας κι αρχή». Αφού νακχλέ χάνικ μπρεσά, «κερντάς εφτά τσσαβέν ντα τρινέ τσσαΐν». (Ιώβ 42:12-14) Παρόλο σο ο Ιώβ μανγκέλας ανταλέ τσσαβέν, σίγουρα σικλιντίνελας πι τσσαβένγκε σο μουλέας. Ντα μάλλον να μπισταρντάς ποτές σαρέ οντουλά μπέτι πράγματα σο τσσιντιντάας βοβ ντα λέσκι φαμιλί. Ατζέ-ντα άμα σικλιλό ι αιτία σο νακχλάς αζόμ μπουτ δοκιμασίες, μπορεί τι σκεφτίνελας σόσκε ο Ντεβέλ μουκχλάς τι τθερέλ αζόμ μπουτ βάσανα. Άμα νακχένας ασακέ σκέψεις λέσκε γκοντιάταρ, κα μπορίνελας τι ντελ-πες γκοντί σο βακερντάς λέσκε ο Ιεχωβά. Ανταβά κα ντέλας-λες παρηγοριά ντα κα βοηθίνελας-λες τι τθερέλ ι σωστή άποψη.—Ψαλμός 94:19.

14. Σο μπορίνασα τι σικλιάς οντουλένταρ σο αβιλέ-πες κο Ιώβ;

¹⁴ Άμα σκεφτίνασα σοβαρά ανταλά σο αβιλέ-πες κο Ιώβ, κα μπορίνας αμέν-ντα τι αλλάνας αμαρί άποψη ντα τι αρακχάς παρηγοριά. Ο βιβλίος του Ιώβ ισί αντρέ οντουλέντε σο γραφιντάς ο Ιεχωβά «αμαρέ σικλιαριμάσκε, για τι μπορίνας τι τθεράς ελπίδα κατά υπομονή σο κεράσα ντα κατά παρηγοριά σο ντέλα η Γραφή». (Ρωμαίους 15:4) Σικλιαρέλα-αμέν μα τι σκεφτίνας  αζόμ μπουτ αμαρέ προβλήματα για μα τι τσσιναβάς τι σκεφτίνας σαρ κα δικαιώντιβελ η κυριαρχία ι Ιεχωβάσκι. Σαρ κερντάς ο Ιώβ, αντικάς αμέν-ντα σικαβάσα ότι υποστηρίνασα ι κυριαρχία ι Ιεχωβάσκι όταν ατσσάσα πιστοί λέστε ατζέ-ντα άμα η ζωή ισί δύσκολη.

15. Καλά αποτελέσματα ανέλα η πίστη σο σικαβάσα όταν τθεράσα προβλήματα;

¹⁵ Η ιστορία του Ιώβ μπορίνελα τι ντελ-αμέν παρηγοριά επειδή σικλιαρέλα-αμέν ότι ο δοκιμασίες να σικαβένα ότι ο Ιεχωβά χολιασάλο αμέντζαρ. Ο δοκιμασίες ντένα-αμέν ι ευκαιρία τι υποστηρίνας ι κυριαρχία ι Ιεχωβάσκι. (Παροιμίες 27:11) Όταν νταϊντίνασα-λεν πιστά, κεράσα ι Ιεχωβάς χαρούμενος ντα αμαρί ελπίδα για το μέλλον αβέλα πιο ζουρανί. (Διαβάνεν Ρωμαίους 5:3-5) Η ιστορία του Ιώβ σικλιαρέλα-αμέν ότι «ο Ιεχωβά σικαβέλα μπουτ αγάπη ντα συγχωρίνελα». (Ιακώβου 5:11) Άμα υποστηρίνασα λέσκι κυριαρχία, βοβ κα ευλογίνελ-αμέν. Επειδή τζανάσα-λες ανταβά, βοηθίντιβασα “τι νταϊντίνας σαρέ ο πράγματα με υπομονή ντα χαρά”.—Κολοσσαείς 1:11.

16. Σόσκε πρέπει τι βακεράς αμαρέ νεαυτόσκε καζόμ σημαντικός ισί τι δικαιώντιβελ ι κυριαρχία ι Ιεχωβάσκι;

¹⁶ Ισί μπαγιά ότι, όταν τθεράσα προβλήματα αμαρέ ζωγιάτε, νανέ εύκολος τι τθεράς συνέχεια αμαρέ γιακχά κι κυριαρχία κι Ιεχωβάσκι ντα τι σκεφτίνας σαρ κα δικαιώντιβελ. Ατζέ-ντα ο χουρντέ προβλήματα μπορεί τι μοιάζεν μπαρέ αν σκεφτίνασα-λεν μπουτ. Οτθάρ, πρέπει τι βακεράς συνέχεια αμαρέ νεαυτόσκε καζόμ σημαντικός ισί τι υποστηρίνας ι κυριαρχία ι Ντεβλέσκι, ατζέ-ντα όταν τθεράσα μπαρέ δυσκολίες.

17. Άμα κεράσα μπουτ πράγματα κο έργος κι Ιεχωβάσκο, σαρ κα βοηθίντιβας τι τθεράς συνέχεια αμαρέ γιακχά οντουλέστε σο ισί πραγματικά σημαντικός;

¹⁷ Άμα κεράσα μπουτ πράγματα κο έργος κι Ιεχωβάσκο, κα μπορίνας τι ντας-αμέν γκοντί σο ισί πραγματικά σημαντικός. Για παράδειγμας, εκ πφεν σο βακέρντιβελας Ρενέ κερντάς εγκεφαλικός, ντουκχάλας συνέχεια ντα τθερέλας καρκίνος. Καζόμ ισινέ κο νοσοκομείος, κερέλας έργος κο  τζενέ σο κερένας μπουτί οτθέ, κο νασφαλέ ντα κο τζενέ σο τζάνας τι ντικχέν-λεν. Εκ φαρ σο ατσσιλίας κο νοσοκομείος δυόμισι εβδομάδες, κερντάς λάφι 80 σαάτια ι Ντεβλέσκε. Παρόλο σο η Ρενέ τζανέλας ότι κα μερέλας, ποτές να μπισταρντάς σο ισινέ πραγματικά σημαντικός. Επειδή υποστηρίνελας ι κυριαρχία ι Ιεχωβάσκι, νιωθίνελας αντρά-πέστε ειρήνη.

18. Σο σικλιαρέλ-αμέν η περίπτωση της Τζένιφερ για την κυριαρχία ι Ιεχωβάσκι;

¹⁸ Επίσης μπορίνασα τι υποστηρίνας ι κυριαρχία ι Ιεχωβάσκι όταν αντιμετωπίνασα πιο χουρντέ προβλήματα. Εκ πφεν, η Τζένιφερ, ατσσιλί τριν ντιβεσά σε εκ αεροδρόμιος ντα μπεκλεντίνελας τι αρακχέλ εκ πτήση για τι βουρτίνελ πέσκε κχερέ. Ο πτήσεις ακυρώντιβενας παλάλ γιαβερέστε, ντα η Τζένιφερ τσσιντιλίας-πες ντα νιωθίνελας κορκορί. Κα μπορίνελας τι αρχίνελ τι τζιτζίνελ πέσκε. Αλλά αντί τι κερέλ-λες ανταβά, προσευχισάλι κο Ιεχωβά για τι βοηθίνελ-λα τι βακερέλ ο λατσσέ αμπέρια κο γιαβερά τζενέ σο ατσσιλέ βον-ντα κο αεροδρόμιος. Ο αποτέλεσμας ισινέ τι κερέλ λάφι μπουτέ τζενέντε ντα τι ντελ μπουτ έντυπα. Η Τζένιφερ βακερντάς: «Νιωσάλομ ότι ο Ιεχωβά ευλογιντάς-μαν, παρόλο σο νακχλόμ ανταγιά δυσκολία, ντα ντινάς-μαν μπερεκέτι ζορ για τι δοξάναβ λέσκο ναβ».

19. Σο σικαβέλα καλά τζενέ πακιάνα μπαγιά κο Ντεβέλ;

¹⁹ Σάντε ο λαός ι Ιεχωβάσκο αγαβέλα μπαγιά καζόμ σημαντική ισί η κυριαρχία ι Ιεχωβάσκι. Ανταβά σικαβέλα καλά τζενέ πακιάνα μπαγιά κο Ντεβέλ. Οτθάρ, ο κάθε εκ αμένταρ πρέπει τι κερέλ ο πιο λατσσό σο μπορίνελα για τι συνεχίνελ τι υποστηρίνελ ι κυριαρχία ι Ιεχωβάσκι.

20. Σαρ νιωθίνελα ο Ιεχωβά σαρέ οντουλένγκε σο κερένα για τι υποστηρίνεν λέσκι κυριαρχία;

²⁰ Ο Ιεχωβά ντέλα σημασία ντα εκτιμίνελα σαρέ οντουλά σο κερένα για τι υποστηρίνεν λέσκι κυριαρχία όταν υπηρετίνενα-λες πιστά ντα νταϊντίνενα ο δυσκολίες. (Ψαλμός 18:25) Ο γιαβέρ μάθημας κα εξηγίνελ πιο μπουτ σόσκε αξίνελα τι υποστηρίνεν ι κυριαρχία ι Ιεχωβάσκι ντα σαρ μπορίνενα τι υποστηρίνεν-λα ατζέ πιο λατσσές.