ΤΖΟΥΒΝΤΙΑΣΑ εκχέ ντουνιάστε σο ανέλα αμένγκε μπουτ άγχος, οτθάρ μπορεί τι αβέλ δύσκολος τι αρακχάς ειρήνη. Ατζέ-ντα κάνα τθεράσα ειρήνη σε μερικά πράγματα αμαρέ ζωγιάτε μπορίνασα εύκολα τι χασαράς-λα. Καβά πράγμας σο βακερέλα η Αγία Γραφή μπορίνελα τι βοηθίνελ-αμέν τι αρακχάς αληθινή ειρήνη σο να χασάρντιβελα; Ντα σαρ μπορίνασα τι βοηθίνας ι γιαβερέν τι αρακχέν ασακί ειρήνη;

Για τι αρακχάς αληθινή ειρήνη, πρέπει τι νιωθίνας ότι τθεράσα ασφάλεια ντα αρακχαϊπέ. Χρειαζίντιβελα τι τθεράς λατσσέ αμαλέν, ντα ο πιο σημαντικός, χρειαζίντιβελα τι πλησιάνας ι Ντεβλές. Σαρ μπορίνασα τι κεράς-λες ανταβά;

Ο εντολές ντα ο αρχές ι Ιεχωβάσκε ισί πάντα λατσσέ αμένγκε. Κάνα ντάσα καν λέντε, σικαβάσα ότι τθεράσα εμπιστοσύνη κο Ιεχωβά ντα ότι μανγκάσα τι τθεράς εκ ειρηνική σχέση λέσαρ. (Ιερεμίας 17:7, 8· Ιακώβου 2:​22, 23) Αζομάν, ο Ιεχωβά κα πλησιάνελ-αμέν ντα κα ντελ-αμέν ειρήνη αμαρέ γκοντιάτε. Ο εδάφιος Ησαΐας 32:​17 βακερέλα: «Ο αποτέλεσμας σο κα ανέλ η αληθινή δικαιοσύνη κα αβέλ ειρήνη ντα ο καρπός σο κα νικαβέλ η αληθινή δικαιοσύνη κα αβέλ ηρεμία ντα ασφάλεια σο να χασάρντιβενα». Μπορίνασα τι αρακχάς αληθινή ειρήνη κάνα ντάσα καν ι Ιεχωβάς αντράλ αμαρέ γκίσταρ.​—Ησαΐας 48:​18, 19.

Ο Ιεχωβά ντινάς-αμέν εκ γιαβέρ-ντα πολύτιμος δώρος για τι βοηθίνελ-αμέν τι αρακχάς ειρήνη σο να χασάρντιβελα. Ανταβά δώρος ισί ο άγιος πνεύμας λέσκο.​—Πράξεις 9:31.

Ο απόστολος Παύλος βακερντάς ότι η ειρήνη ισί αντρέ “κο καρπός κι πνευμάσκο”. (Γαλάτες 5:​22, 23) Αφού η ειρήνη αβέλα κατά πνεύμας ι Ντεβλέσκο, αν μανγκάσα τι τθεράς ειρήνη πρέπει τι μουκχάς ο άγιος πνεύμας τι οδηγίνελ-αμέν. Σαρ μπορίνασα τι κεράς-λες ανταβά;

 Πρώτον, πρέπει τι διαβάνας ο Λάφι ι Ντεβλέσκο κάθε ντιβές. (Ψαλμός 1:2, 3) Καζόμ σκεφτίνασα λατσσές οντουλά σο διαβάνασα, ο άγιος πνεύμας βοηθίνελα-αμέν τι αγαβάς σαρ σκεφτίνελα ο Ιεχωβά διάφορε πραγματένγκε. Για παράδειγμας, σικλιάσα σαρ ατσσόλα βοβ ειρηνικός ντα σόσκε η ειρήνη ισί αζόμ σημαντική λέσκε. Κάνα κεράσα αμαρέ ζωγιάτε οντουλά σο σικλιάσα κατά Γραφή, τθεράσα πιο μπουτ ειρήνη αμαρέ ζωγιάτε.​—Παροιμίες 3:1, 2.

Δεύτερον, πρέπει τι προσευχίντιβας για τι τθεράς ο άγιος πνεύμας ι Ντεβλέσκο. (Λουκάς 11:​13) Ο Ιεχωβά ντέλα πο λάφι οντουλέντε σο ρόντενα λέσκι βοήθεια: «Η ειρήνη ι Ντεβλέσκι σο ισί πιο οπρέ σαρέ οντουλένταρ σο αγαβένα κα αρακχαβέλ τουμαρό γκι ντα τουμαρί γκοντί αντράλ κατά Ιησούς Χριστός». (Φιλιππησίους 4:6, 7) Κάνα ατσσάσα πασέ κο Ιεχωβά ντα στηρίντιβασα λέσκε πνευμάστε, βοβ κα ντελ-αμέν πραγματική ειρήνη αμαρέ γκοντιάτε.​—Ρωμαίους 15:13.

Η Γραφή βοηθιντάς μπουτέ τζενέν τι κερέν αλλαγές πουμαρέ ζωγιάτε ντα ακανά απολαμβάνενα ειρήνη ι Ιεχωβάσαρ, πουμαρέ νεαυτόσαρ ντα ι γιαβερέντζαρ. Σαρ κερντέ ανταλά αλλαγές;

Πριν τι σικλιόν ι αλήθεια, μερικά πφραλά ντα πφενιά ισινέ χολιάκε τζενέ ντα χάνας-πες. Αλλά κερντέ μπαρέ προσπάθειες για τι αλλάνεν ντα ακανά ισί πιο λατσσέ, υπομονετικοί ντα ειρηνικοί ι γιαβερέντζαρ. * (Ντικχ ι υποσημείωση) (Παροιμίες 29:​22) Ντικχέν σαρ εκ πφραλ σο βακερένα λέσκε Ντέιβιντ ντα εκ πφεν σο βακερένα λάκε Ρέιτσελ κερντέ ασακέ αλλαγές πουμαρέ νεαυτόστε.

Πριν τι σικλιόλ ι αλήθεια, ο Ντέιβιντ κατηγορίνελας ι γιαβερέν ντα κερέλας άγρια λάφι πι φαμιλιάκε. Όμως, σοράν αγαντάς ότι έπρεπε τι αλλάνελ. Σαρ αρακχλάς ειρήνη; Ο Ντέιβιντ βακερέλα: «Αρχισάλομ τι κεράβ μι ζωγιάτε ο αρχές ι Γραφιάκε, ντα σαρ αποτέλεσμας, μπαριλό ο σεβασμός σο τθεράας ο εκ ι γιαβερέσκε κι φαμιλί».

 Η Ρέιτσελ επηρεασάλι μπουτ κατά περιβάλλον σο μπαριλί. Βόι εξηγίνελα: «Μπαριλόμ εκχέ φαμιλιάτε σο χολιάναας μπουτ ο εκ ι γιαβερέσκε, οτθάρ χρειαζίντιβελα μέχρι ακανά τι προσπαθίναβ μα τι χολιάναβ». Σο βοηθιντάς-λα τι αρακχέλ ειρήνη; Βόι βακερέλα: «Τθεράβα εμπιστοσύνη κο Ιεχωβά ντα κεράβα προσευχή».

Ο Ντέιβιντ ντα η Ρέιτσελ ισί σάντε ντούι παραδείγματα τζενένγκε σο ακανά τθερένα ειρήνη επειδή κερντέ πουμαρέ ζωγιάτε ο αρχές ι Γραφιάκε ντα στηριντέ-πες κο άγιος πνεύμας. Παρόλο σο τζουβντιάσα εκχέ άγριε ντουνιάστε, μπορίνασα τι τθεράς ειρήνη αμαρέ γκοντιάτε. Ανταβά κα βοηθίνελ-αμέν τι τθεράς λατσσέ σχέσεις αμαρέ φαμιλιάσαρ ντα αμαρέ πφραλέντζαρ κι κχανγκιρί. Όμως, ο Ιεχωβά βακερέλα αμένγκε “τι τθεράς ειρήνη σαρέ ι τζενέντζαρ”. (Ρωμαίους 12:​18) Μπορίνελα τι αβέλ-πες μπαγιά ανταβά; Ντα σόσκε πρέπει τι προσπαθίνας τι τθεράς ειρήνη ι γιαβερέντζαρ;

Κο έργος, βακεράσα ο ειρηνικά αμπέρια ι Ντεβλέσκε Βασιλειάκε. (Ησαΐας 9:6, 7· Ματθαίος 24:​14) Μπουτ τζενέ μπεϊντίνενα ανταλά αμπέρια ντα δεχτίνενα-λεν. Οτθάρ, να νιωθίνενα ότι να τθερένα βοήθεια ή ότι ισί χολιαμέ ιτιρί οντουλένταρ σο αβένα-πες κο ντουνιάς. Ακανά τθερένα αληθινή ελπίδα για το μέλλον ντα ανταβά κερέλα-λεν τι “ρόντεν ι ειρήνη”.​—Ψαλμός 34:​14.

Αλλά να μπεϊντίνενα σαρέ ο τζενέ ανταλά αμπέρια. (Ιωάννης 3:​19) Όμως, είτε ασουνένα-αμέν ο τζενέ είτε να ασουνένα-αμέν, ο Ντεβέλ ντέλα-αμέν πο πνεύμας. Ανταβά βοηθίνελα-αμέν τι ατσσάς ειρηνικοί ντα σεβαστικοί κάνα κεράσα έργος. Αντικάς, ακολουθίνασα ι συμβουλή ι Ιησούσκι: «Κάνα κα ντεν αντρέ κο κχερ, χαιρετίνεν ι τζενέν σο ισί οτθέ. Άμα ο τζενέ ισί άξιοι, τι τζαλ λέντε η ειρήνη σο βακερντέν λένγκε τι τθερέν· αλλά άμα νανέ άξιοι, τουμαρί ειρήνη τι βουρτίνελ τουμέντε». (Ματθαίος 10:​11-13) Κάνα ακολουθίνασα ο συμβουλές ι Ιησούσκε, μπορίνασα τι ατσσάς ειρηνικοί σο-ντα βακερένα ή κερένα ο γιαβερά. Ντα να μπιστράσα ότι μπορεί τι τθεράς ι ευκαιρία τι βοηθίνας ανταλέ τζενέν κο μέλλον.

Βοηθίνασα επίσης τι υπαρχίντιβελ ειρήνη κάνα κεράσα λάφι με σεβασμός οντουλέντε σο τθερένα εξουσία, ατζέ-ντα άμα βον τζάνα κόντρα κο έργος σο κεράσα. Για παράδειγμας, εκχέ τθεμέστε κι Αφρική, η κυβέρνηση να μουκχέλας-αμέν τι χτίνας Αίθουσες Βασιλείας. Αμαρέ πφραλά τζανένας ότι έπρεπε τι προσπαθίνεν τι λύνεν ο πρόβλημας με ειρηνικός τρόπος. Μπουτσσαντέ εκχέ πφραλές σο ανγκλέ ισινέ ιεραπόστολος οτθέ τι τζαλ κο πρέσβης οντουλέ τθεμέσκο κο Λονδίνος, κι Αγγλία, ντα τι βακερέλ λέσκε για το ειρηνικός έργος σο κερένα ο Μάρτυρες ι Ιεχωβάσκε.

Ο πφραλ βακερντάς: «Κάνα ερεσλόμ οτθέ, αγαντόμ κατά ιριαϊπέ ι τζενιάκο σο κερέλας μπουτί οτθέ ότι ισινέ από εκ φυλή σο σικλιλόμας λένγκι τσσιπ. Οτθάρ, χαιρετιντόμ ι τζενιά λάκε τσσιμπάτε. Βόι σαστισάλι ντα πουτσλάς-μαν: “Σόσκε αβιλάν ατθέ;” Βακερντόμ λάκε με σουκάρ τρόπος ότι κα μανγκάβας τι ντικχάβ ι πρεσβής. Βόι λιντάς-λες τηλέφωνος, ντα βοβ νικίστιλο αβρί για τι αρακχέλ-μαν ντα χαιρετιντάς-μαν πι τσσιμπάτε. Σοράν, ασουντάς-μαν με προσοχή καζόμ εξηγίναβας λέσκε ο ειρηνικά πράγματα σο κερένα ο Μάρτυρες ι Ιεχωβάσκε».

Αφού ο πρέσβης ασουντάς οντουλά σο βακερντάς λέσκε ο πφραλ, αγαντάς πιο λατσσές αμαρό έργος ντα λέσκι μπέτι άποψη αλλαξάλι. Αφού νακχλό χάνικ καιρός, η κυβέρνηση αλλαντάς πι απόφαση ντα μουκχλάς ι Ιεχωβάσκε Μαρτυρέν τι χτίνεν Αίθουσες Βασιλείας. Ο πφραλά ισινέ μπουτ χαρούμενοι! Κάνα συμπεριφερίντιβασα κο γιαβερά με σεβασμός, βοηθίνασα τι υπαρχίντιβελ ειρήνη.

Αντιβές, ο λαός ι Ιεχωβάσκο απολαμβάνελα εκ πνευματικός παράδεισος, ντα ντέλα-λες λατρεία σε εκ ειρηνικός περιβάλλον. Ο κάθε εκ αμένταρ μπορίνελα τι βοηθίνελ τι υπαρχίντιβελ ανταγιά ειρήνη άμα προσπαθίνελα τι τθερέλ ειρήνη πι ζωγιάτε. Αντικάς, κα μπορίνας τι αβάς σίγουροι ότι ο Ιεχωβά ισί ευχαριστιμέ αμέντζαρ. Ντα κο νεβό ντουνιάς, κα ντελ-αμέν ειρήνη σο ατσσόλα για πάντα.​—2 Πέτρου 3:​13, 14.