1. Σόσκε ισινάμ μπουτ χαρούμενοι;

ΧΑΙΡΙΝΑΣΑ μπουτ τι ασουνάς σαρ ο υπηρέτες ι Ντεβλέσκε μουκχένα πουμαρό φως τι λελ-πες! Πέρσι, ο λαός ι Ιεχωβάσκο κερντάς πιο μπουτ από 10.000.000 μελέτες κατά Γραφή. Ντα εκατομμύρια ενδιαφερόμενοι αβιλέ κι Ανάμνηση ντα σικλιλέ για την αγάπη σο σικαντάς ο Ιεχωβά κάνα ντινάς ο λύτρος.​—1 Ιωάννη 4:9.

2, 3. (α) Σο να τσσιναβέλα-αμέν τι λας-αμέν ντα «τι ντας φως κο ντουνιάς»; (β) Σο κα ντικχάς ανταλέ μαθημάστε;

² Σαρί κι πφουβ, ο Μάρτυρες ι Ιεχωβάσκε κερένα λάφι μπουτ διαφορετικά τσσιμπά. Όμως, ανταβά να τσσιναβέλα-αμέν τι ντας δόξα ι Ιεχωβάς σαρ εκ ενωμέ φαμιλί. (Αποκάλυψη 7:9) Σο-ντα τσσιπ τι κεράσα λάφι ή κάι-ντα τι τζουβντιάσα, μπορίνασα τι λας-αμέν ντα “τι ντας φως κο ντουνιάς”.​—Φιλιππησίους 2:15.

³ Αμαρό έργος, αμαρί Χριστιανική ενότητα ντα αμαρέ προσπάθειες για τι ατσσάς πνευματικά τζανγκαντέ, ντένα δόξα ι Ιεχωβάς. Σαρ μπορίνασα τι μουκχάς αμαρό φως τι λελ-πες ανταλέ τρινέ τροπόντζαρ;​—Διαβάνεν Ματθαίος 5:​14-16.

4, 5. (α) Εκτός κατά έργος, καλέ γιαβερέ τροπόσαρ μπορίνασα τι μουκχάς αμαρό φως τι λελ-πες; (β) Καλά λατσσέ αποτελέσματα αβένα κάνα σικαβάσα λατσσιπέ; (Ντικχ ι φωτογραφία σο ισί κι αρχή)

⁴ Εκ σημαντικός τρόπος σο μουκχάσα τι λελ-πες αμαρό φως ισί τι βακεράς ο λατσσέ αμπέρια ντα τι κεράς μαθητέν. (Ματθαίος 28:​19, 20) Ο θέμας «Φως εν τη Σκοτία», κι Σκοπιά 1 Ιουνίου 1925 (15 Ιουνίου 1925 κι μπαλαμανί), βακερέλας ότι, κο τελευταία ντιβεσά, καέκ να κα μπορίνελας τι ατσσόλ πιστός κο Κύριος άμα να κα χρησιμοποιήνελας «ι ευκαιρία τι μουκχέλ πο φως τι λελ-πες». Χάνικ πιο τελέ βακερέλας: «Για τι κερέλ-λες ανταβά, πρέπει τι βακερέλ ο λατσσέ αμπέρια κο τζενέ ντα τι ακολουθίνελ ο δίκαιοι κανόνες ι Ιεχωβάσκε». Εκτός κατά έργος, αμαρί συμπεριφορά-ντα δοξάνελα ι Ιεχωβάς. Μπουτ τζενέ παρατηρίνενα-αμέν κάνα κεράσα έργος. Κάνα ασάσα λένγκε ντα χαιρετίνασα-λεν αντράλ αμαρέ γκίσταρ, βοηθίνασα-λεν τι σκεφτίνεν λατσσέ πράγματα αμένγκε ντα ι Ντεβλέσκε σο υπηρετίνασα.

⁵ Ο Ιησούς βακερντάς πι μαθητένγκε: «Κάνα κα ντεν αντρέ κο κχερ, χαιρετίνεν ι τζενέν σο ισί οτθέ». (Ματθαίος 10:​12) Κι περιοχή σο κερέλας έργος ο Ιησούς, ο τζενέ τθερένας ι συνήθεια τι καλίνεν ξενόν πουμαρέ κχερέστε. Αντιβές μπουτέ τθανέντε νανέ συνηθισμέ τι κερέν κάτι ασακό. Ο τζενέ μπορεί τι ανησυχίνεν ντα τι νευριάνεν κάνα ντικχένα ξένε τζενέν πουμαρέ πορτάτε. Όμως, αν ισινάμ φιλικοί ντα σικαβάσα λατσσιπέ, μπορεί τι ηρεμίνεν. Κάνα κερένα έργος κο σταντ, παρατηριντέν ότι άμα ασάνα λένγκε ντα χαιρετίνενα-λεν φιλικά ο τζενέ νιωθίνενα πιο άνετα τι αβέν ντα τι λεν εκ έντυπος; Μπορεί ατζέ-ντα τι μανγκέν τι αρχίνεν συζήτηση!

6. Σο βοηθίνελα εκχέ ηλικιωμέ ζευγαρίς τι συνεχίνελ τι κερέλ μπουτ κο έργος;

⁶ Εκ ηλικιωμέ ζευγάρι κι Αγγλία ναστί τζάλα κο έργος κχερ κχερέστε σαρ τζάλας ανγκλέ επειδή λένγκι υγεία νανέ μπουτ λατσσί. Οτθάρ, αποφασιντέ τι τσσουβέν εκ τραπέζι με έντυπα αβριάλ πουμαρέ κχερέσταρ. Μπεσένα πασέ εκχέ σχολειόστε, οτθάρ τσσουβένα έντυπα σο ταρτίνενα ι προσοχή ι νταντένγκι ντα ι νταΐνγκι σο τζάνα τι λεν πουμαρέ τσσαβέν κατά σχολείος. Μερικά νταντά ντα νταγιά λένα οντουλά έντυπα ντα ο ντούι τόμοι ι βιβλιόσκε Οι Νεαροί Ρωτούν​—Αποτελεσματικές Απαντήσεις. Εκ σκαπάνισσα λένγκε κχανγκιριάταρ αρχισάλι τι συνεργαζίντιβελ λέντζαρ. Ο νταντά ντα ο νταγιά ντικχένα ότι βόι ισί φιλική ντα ότι ο ζευγάρι μανγκέλα μπαγιά τι βοηθίνελ γιαβερέν. Εκ τανό λένταρ μάλιστα αρχισάλο τι κερέλ μελέτη.

7. Σαρ μπορίνενα τι βοηθίνεν ι προσφυγέν τουμαρέ τθεμέστε;

⁷ Ο τελευταία μπρεσά, μπουτ τζενέ αναγκασάλε τι νασέν πουμαρέ τθεμέσταρ ντα ακανά τζουβντιόνα γιαβερέ τθεμέντε σαρ πρόσφυγες. Σο μπορίνενα τι κερέν για τι βοηθίνεν ι προσφυγέν σο ισί τουμαρέ τθεμέστε τι σικλιόν ι Ιεχωβάσκε; Πρώτον, κα μπορίνενας τι σικλιόν τι χαιρετίνεν-λεν λένγκε τσσιμπάτε. Επίσης, άμα κα χρησιμοποιήνεν ι εφαρμογή JW Language, κα μπορίνενας τι σικλιόν μερικές φράσεις σο μπορεί τι κερέν-λεν τι μανγκέν τι συζητίνεν τουμέντζαρ. Σοράν, κα μπορίνενας τι  σικαβέν λένγκε βίντεα ντα έντυπα λένγκε τσσιμπάτε κατά ιστότοπος jw.org.​—Δευτερονόμιο 10:19.

8, 9. (α) Σαρ βοηθίνελα-αμέν η Συνάθροιση Ζωή ντα Έργος; (β) Σαρ μπορίνενα ο νταντά ντα ο νταγιά τι βοηθίνεν πουμαρέ τσσαβέν τι ντεν πιο λατσσέ απαντήσεις κο συναθροίσεις;

⁸ Ο Ιεχωβά ντέλα-αμέν ακριβώς οντουβά σο χρειαζίντιβασα για τι τθεράς λατσσέ αποτελέσματα κάνα κεράσα έργος. Για παράδειγμας, οντουλά σο σικλιάσα κι Συνάθροιση Ζωή ντα Έργος βοηθίνενα-αμέν τι τθεράς πιο μπουτ θάρρος για τι κεράς επανεπισκέψεις ντα τι αρχίνας μελέτες.

⁹ Κάνα αβένα μισαφίρια αμαρέ συναθροισιέντε, μπουτ φαρ κερένα λένγκε εντύπωση ο απαντήσεις ι χουρντένγκε. Μπορίνενα τι σικλιαρέν τουμαρέ τσσαβέν τι απαντίνεν πουμαρέ λαφίντζαρ. Μερικά τζενέ μανγκλέ τι σικλιόν ι αλήθεια κάνα ασουντέ χουρντέν τι σικαβέν πουμαρί πίστη απλέ λαφίντζαρ σο νικιόνας λένγκε γκίσταρ.​—1 Κορινθίους 14:25.

10. Σαρ μπορίνελα η φαμιλιάκι λατρεία τι βοηθίνελ ο φαμιλιά τι αβέν πιο ενωμέ;

¹⁰ Κάνα προσπαθίνασα μπουτ τι σικλιαράς αμαρί φαμιλί τι συνεργαζίντιβελ με ενότητα ντα ειρήνη, ντάσα δόξα κο Ιεχωβά. Για παράδειγμας, αν ισινάν ντατ ή ντάι κανόνινε τι κερές ι Φαμιλιάκι Λατρεία κάθε εβδομάδα. Μπουτ φαμιλιά ντικχένα ο JW Broadcasting, ντα σοράν συζητίνενα σαρ μπορίνενα τι κερέν οντουλά σο σικλιλέ. Τι ντες-τουτ γκοντί ότι ο σικλιαριπέ σο τθερέλα ανάγκη εκ χουρντό ισί μπουτ διαφορετικός οντουλέσταρ σο χρειαζίντιβελα εκ  έφηβος. Τι κερές ο πιο λατσσό σο μπορίνεσα για τι βοηθίντιβελ κατά φαμιλιάκι λατρεία ο κάθε εκ τι φαμιλιάταρ.​—Ψαλμός 148:​12, 13.

11-13. Σαρ μπορίνασα τι βοηθίνας αμαρί κχανγκιρί τι αβέλ πιο ενωμέ;

¹¹ Ατζέ-ντα αν ισινάν τερνό, μπορίνεσα τι βοηθίνες σαριλέν κι κχανγκιρί τι νιωθίνεν χρήσιμοι. Εκ τρόπος ισί τι αβές αμάλ ι πφουρέ πφραλέντζαρ ντα πφενίντζαρ. Πουτς-λεν σο βοηθιντάς-λεν τι συνεχίνεν τι υπηρετίνεν ι Ιεχωβάς για μπουτ μπρεσά. Βον μπορίνενα τι σικλιαρέν-τουτ μπουτ σημαντικά πράγματα. Ανταβά κα ενθαρρύνελ εμ λεν εμ τουτ! Επίσης, σαρέ, είτε ισινάμ τερνέ είτε πφουρέ, μπορίνασα τι κεράς οντουλέν σο αβένα κο συναθροίσεις κι Αίθουσα Βασιλείας τι νιωθίνεν ότι μανγκάσα-λεν. Μπορίνεσα τι χαιρετίνες-λεν, τι ασάς λένγκε, τι βοηθίνες-λεν τι αρακχέν θέση ντα τι γνωρίνες-λεν κο γιαβερά. Κερ-λεν τι νιωθίνεν σαρ τι αβένας πουμαρέ κχερέστε.

¹² Αν ισινάν διορισμέ τι κερές συναθροίσεις για το έργος, μπορίνεσα τι βοηθίνες ι πφουρέ πφραλέν τι συνεχίνεν τι μουκχέν πουμαρό φως τι λελ-πες. Τι αβές σίγουρος ότι βον τθερένα εκ τομέας σο μπορίνενα τι καλλιεργίνεν-λες. Κανόνινε τι νικιόν λέντζαρ πιο τερνέ πφραλά. Μπουτ φαρ ο πφουρέ πφραλά ντα πφενιά ντα οντουλά σο να τθερένα λατσσί υγεία χασαρένα πουμαρό κουράγιος επειδή να μπορίνενα τι κερέν αζόμ έργος καζόμ κερένας ανγκλέ. Αλλά κα νιωθίνεν πιο λατσσές κάνα τζανένα ότι πφαμπόσα λένγκε ντα αγαβέσα λένγκι κατάσταση. Να τθερέλα σημασία καζόμ πφουρέ ισί ή καζόμ μπρεσά ισί κι αλήθεια, το λατσσιπέ μπορίνελα τι ενθαρρύνελ-λεν τι συνεχίνεν τι βακερέν ο λατσσέ αμπέρια αντράλ πουμαρέ γκίσταρ.​—Λευιτικό 19:32.

¹³ Ο Ισραηλίτες απολαμβάνενας τι ντεν λατρεία ι Ιεχωβάς γιεκ. Ο ψαλμωδός γραφιντάς: «Καζόμ λατσσό ντα καζόμ σουκάρ ισί τι τζουβντιόν ο πφραλά μαζί ντα ενωμέ!» (Διαβάνεν Ψαλμός 133:1, 2) Μοιασκιαρντάς ανταγιά ενότητα εκχέ λαδίσαρ σο τσσουβένας κο ιερείς ντα κο βασιλιάδες κάνα διορίνενας-λεν. Ανταβά λάδι κοβλιαρέλας ο δέρμας ντα κχάντελας μίσκι. Αμέν-ντα μπορίνασα τι κοβλιαράς ο γκι αμαρέ πφραλένγκο αν κεράσα-λεν τι νιωθίνεν λατσσές ντα σικαβάσα λένγκε λατσσιπέ. Ανταβά κερέλα ι κχανγκιρί πιο ενωμέ. Μπορίνενα τι γνωρίνεν πιο λατσσές ι πφραλέν τουμαρέ κχανγκιριάτε;​—2 Κορινθίους 6:​11-13, υποσημείωση.

14. Σαρ μπορίνενα τι μουκχέν τουμαρό φως τι λελ-πες κο τθεμ σο μπεσένα;

¹⁴ Τουμαρό φως μπορίνελα τι λελ-πες κάι-ντα τι αβέν. Τουμαρό λατσσιπέ κα μπορίνελας τι κερέλ τουμαρέ γειτονέν τι μανγκέν τι σικλιόν πιο μπουτ ι Ιεχωβάσκε. Πουτσέν-τουμέν: “Σαρ ντικχένα-μαν μο γείτονες; Ισί μο κχερ περιποιημέ ντα πάκι; Ντέλα λατσσί εντύπωση κι γειτονιά; Βοηθίναβα μι γειτονέν;” Πουτσέν ι γιαβερέ Μαρτυρέν σαρ λένγκο λατσσιπέ ντα λένγκο παράδειγμας επηρεαντάς λένγκε τζενέν, λένγκε γειτονέν, οντουλέν σο κερένα λέντζαρ μπουτί ή λένγκε συμμαθητέν.​—Εφεσίους 5:9.

15. Σόσκε ισί σημαντικός τι αβάς πνευματικά τζανγκαντέ;

¹⁵ Αν μανγκάσα τι λελ-πες αμαρό φως ατζέ πιο μπουτ, πρέπει τι αγαβάς ότι ο ντιβεσά  σο τζουβντιάσα μανγκένα προσοχή. Ο Ιησούς μπουτ φαρ βακερντάς πι μαθητένγκε: «Τι αβέν τζανγκαντέ». (Ματθαίος 24:​42· 25:​13· 26:​41) Αν πακιάσα ότι η «μπαρί στεναχώρια» αργίνελα ατζέκ, να κα αβάς έτοιμοι τι καπτίνας κάθε ευκαιρία σο ντιντιόλα-αμέν για τι βοηθίνας γιαβερέν τι σικλιόν ι Ιεχωβάσκε. (Ματθαίος 24:​21) Αντίς τι λελ-πες αμαρό φως, κα αρχίνελ τι σβήνελ ντα σιγά σιγά μπορεί τι μερέλ.

16, 17. Σο μπορίνενα τι κερέν για τι συνεχίνεν τι αβέν πνευματικά τζανγκαντέ;

¹⁶ Ακανά πιο μπουτ από κάθε γιαβέρ φαρ πρέπει τι αβάς πνευματικά τζανγκαντέ. Ο πράγματα κο ντουνιάς αβένα χειρότερα. Αλλά τζανάσα ότι ο τέλος κα αβέλ ακριβώς κο σαάτι σο τραμπιντάς ο Ιεχωβά. (Ματθαίος 24:​42-44) Μέχρι τι αβέλ-πες όμως ανταβά, πρέπει τι κεράς υπομονή ντα τι τθεράς αμαρέ γιακχά κο μέλλον αμαρό. Τι διαβάνεν ι Γραφή κάθε ντιβές ντα ποτές μα τσσιναβέν τι προσευχίντιβεν κο Ιεχωβά. (1 Πέτρου 4:7) Τι σικλιόν κατά πφραλά ντα κατά πφενιά σο υπηρετιντέ ι Ιεχωβάς για μπουτ μπρεσά. Για παράδειγμας, μπορίνενα τι διαβάνεν ιστορίες πφραλένγκε, σαρ ισί ο άρθρος «Εβδομήντα Χρόνια Τώρα, Πιάνω τη Φορεσιά ενός Ιουδαίου», σο ισί κι Σκοπιά 15 Απριλίου 2012, σελίδες 18-21.

 ¹⁷ Τι κερέν μπουτ πράγματα κι υπηρεσία κι Ιεχωβάσκι. Τι κερέν λατσσέ πράγματα ι γιαβερένγκε ντα τι νακχέν χρόνος ι πφραλέντζαρ ντα ι πφενίντζαρ. Ανταβά κα ντελ-τουμέν χαρά, ντα κα νιωθίνεν ότι ο καιρός νακχέλα μπουτ σουγκό. (Εφεσίους 5:​16) Ο υπηρέτες ι Ιεχωβάσκε κερντέ μπουτ πράγματα κο τελευταία εκατό μπρεσά. Ντα αντιβές, κεράσα πιο μπουτ πράγματα σαρέ κατά γιαβερά μπρεσά. Ναστί νακχέλα αμαρέ γκοντιάταρ καζόμ μπουτ μπαριλό ο έργος ι Ιεχωβάσκο. Αμαρό φως λέλα-πες μπουτ!

18, 19. Σαρ μπορίνενα τι βοηθίνεν-αμέν ο πρεσβύτεροι τι υπηρετίνας ι Ιεχωβάς αντράλ αμαρέ γκίσταρ; Βακερέν εκ παράδειγμας.

¹⁸ Παρόλο σο κεράσα λάθη, ο Ιεχωβά μουκχέλα-αμέν τι υπηρετίνας-λες. Για τι βοηθίνελ-αμέν, ντέλα-αμέν «τζενέν σαρ δώρα», ι πρεσβυτερόν κι κχανγκιρί. (Διαβάνεν Εφεσίους 4:8, 11, 12) Άρα ι γιαβέρ φαρ σο κα αβέλ τουμένγκε εκ πρεσβύτερος, μα τι χασαρέν ι ευκαιρία τι σικλιόν κατά σοφία σο τθερέλα ντα κατά συμβουλές σο κα ντελ-τουμέν.

¹⁹ Για παράδειγμας, εκ ζευγάρι κι Αγγλία νακχένας εκ πρόβλημας πουμαρέ μπιαβέστε ντα μανγκλέ βοήθεια ντουέ πρεσβυτερόνταρ. Η ρομνί νιωθίνελας ότι λάκο ρομ να λέλας ι ευθύνη τι βοηθίνελ πι φαμιλί τι υπηρετίνελ ι Ιεχωβάς. Ο ρομ νιωθίνελας ότι να ισινέ λατσσό δάσκαλος ντα παραδεχτιντάς ότι να κανονίνελας τι κερέν φαμιλιάκι λατρεία κάθε εβδομάδα. Ο πρεσβύτεροι βοηθιντέ-λεν τι σκεφτίνεν ο παράδειγμας ι Ιησούσκο. Βακερντέ ι ρομέσκε τι φροντίνελ πι φαμιλί σαρ φροντίνελας ο Ιησούς πι μαθητέν. Βακερντέ ι ρομνιάκε τι τθερέλ υπομονή πι ρομέσαρ. Επίσης, βακερντέ λένγκε σαρ κα μπορίνενας τι κερέν ι φαμιλιάκι λατρεία πουμαρέ ντουέ τσσαβέντζαρ. (Εφεσίους 5:​21-29) Ο ρομ προσπαθιντάς μπουτ για τι αβέλ πιο λατσσό σαρ σορό ι φαμιλιάκο. Ο πρεσβύτεροι βακερντέ λέσκε τι συνεχίνελ πο αγώνας ντα τι συνεχίνελ τι στηρίντιβελ κο πνεύμας κι Ιεχωβάσκο. Η αγάπη ντα ο λατσσιπέ σο σικαντέ ο πρεσβύτεροι βοηθιντέ μπαγιά ανταγιά φαμιλί!

20. Καβά κα αβέλ ο αποτέλεσμας κάνα μουκχένα τουμαρό φως τι λελ-πες;

²⁰ «Ευτυχισμέ ισί οντουβά σο νταρέλα κατά Ιεχωβά ντα πφιρέλα Λέσκε ντρομέστε». (Ψαλμός 128:1) Κα αβέν χαρούμενοι κάνα μουκχένα τουμαρό φως τι λελ-πες. Οτθάρ σικλιαρέν ι γιαβερέν ι Ντεβλέσκε, κερέν ο πιο λατσσό σο μπορίνενα για τι βοηθίνεν τουμαρί φαμιλί ντα τουμαρί κχανγκιρί τι αβέλ ενωμέ, ντα συνεχίνεν τι αβέν πνευματικά τζανγκαντέ. Ο γιαβερά κα ντικχέν τουμαρό λατσσό παράδειγμας ντα κα μανγκέν βον-ντα τι δοξάνεν αμαρέ Νταντές, ι Ιεχωβάς.​—Ματθαίος 5:16.